Аиләдә хошбәхтлијә неҹә наил олмаг олар?

1. Аилә хошбәхтлијинин ачары нәдәдир?

ЈЕҺОВА Аллаһ сизин хошбәхт аиләјә саһиб олманызы истәјир. Онун Кәламы олан Мүгәддәс Китабда аиләнин бүтүн үзвләринә рәһбәрлик тәгдим олунур вә Аллаһын онлара һансы ролу һәвалә етдији тәсвир едилир. Әҝәр аиләдә һәр бир кәс Аллаһын мәсләһәтләринә әмәл едәрсә, онда бу, ҝөзәл сәмәрәләр ҝәтирәҹәк. Иса демишдир: «Аллаһын сөзүнү динләјиб, она әмәл едәнләр бәхтијардырлар» (Лука 11:28).

2. Аиләдә хошбәхтлијә наил олмаг үчүн нәји гәбул етмәк чох ваҹибдир?

² Аилә һәјатында хошбәхтлијә наил олмаг үчүн, Иса Мәсиһин «Атамыз» адландырдығы Јеһова Аллаһын аиләнин баниси олдуғуну гәбул етмәк чох ваҹибдир (Матта 6:9). Јер үзүндә олан һәр бир аилә өз мөвҹудлуғуна ҝөрә сәмави Атамыза борҹлудур. Әлбәттә, О, аиләдә хошбәхтлијә неҹә наил олмағын үсулуну чох јахшы билир (Ефеслиләрә 3:14, 15). Аллаһын аиләнин һәр бир үзвүнә вердији мәс’улијјәт барәдә Мүгәддәс Китаб нә дејир?

АЛЛАҺ АИЛӘНИН БАНИСИДИР

3. Мүгәддәс Китаба әсасән, илк аилә неҹә гурулду вә биз бу мә’лумата нә үчүн е’тибар едә биләрик?

³ Јеһова илк инсан ҹүтү олан Адәмлә Һәвваны јарадыб, онлары никаһ телләри илә бирләшдирди. Онлары ҝөзәл ҹәннәт мәканы олан Еден бағында јерләшдирди. Јеһова онларын ушагларынын олмасыны истәјирди. О, Адәмлә Һәвваја деди: ‘Төрәјиб чохалын вә јер үзүнү бүрүјүн’ (Јарадылыш 1:26-28; 2:18, 21-24). Бу әфсанә дејил, чүнки «Јарадылыш» китабында аиләнин јаранмасы барәдә дејиләнләри Иса Мәсиһин өзү тәсдиг етмишдир (Матта 19:4, 5). Бу ҝүн сајсыз-һесабсыз чәтинликләрлә гаршылашмамыза вә мүасир һәјатын Аллаһын нијјәтиндән узаг олмасына бахмајараг, аиләдә хошбәхтлијә наил олмаг олар. Ҝәлин бунун неҹә мүмкүн олдуғуну нәзәрдән кечирәк.

4. а) Аиләнин һәр бир үзвү хошбәхтлијин олмасына неҹә көмәк едә биләр? б) Аиләдә хошбәхтлијә наил олмаг үчүн нәјә ҝөрә Иса һаггында өјрәнмәк лазымдыр?

⁴ Аиләнин һәр бир үзвү мәһәббәт тәзаһүр етдирмәкдә Аллаһы тәглид етмәклә, аиләдә хошбәхтлијин олмасына көмәк едә биләр (Ефеслиләрә 5:1, 2). Бәс ҝөрмәдијимиз Аллаһы неҹә тәглид едә биләрик? Јеһова Өз илкин Оғлуну јер үзүнә ҝөндәрди вә онун нүмунәси Аллаһы танымағымыза көмәк едир (Јәһја 1:14, 18, İ–93). Иса өз сәмави Атасынын шәхсијјәтини о гәдәр мүкәммәл сурәтдә тәзаһүр етдирирди ки, ону динләјән вә ҝөрән инсанлар санки Јеһованын Өзүнү ешидир вә ҝөрүрдүләр (Јәһја 14:9). Буна ҝөрә дә, Исанын мәһәббәти неҹә тәзаһүр етдирдијини өјрәнмәклә вә онун нүмунәсини изләмәклә, аилә һәјатында хошбәхтлијә наил ола биләрик.

ӘРЛӘР ҮЧҮН НҮМУНӘ

5, 6. а) Әрләр Исанын јығынҹаға мүнасибәтиндән һансы нүмунәни ҝөтүрә биләрләр? б) Ҝүнаһларымызын бағышланмасы үчүн нә етмәлијик?

⁵ Мүгәддәс Китабда дејилир ки, әрләр арвадлары илә Исанын өз шаҝирдләри илә даврандығы кими давранмалыдырлар. Ҝәлин орада јазыланлара диггәт јетирәк: «Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди... Беләҹә әрләр дә өз арвадларыны, өз бәдәнләри гәдәр севмәлидирләр. Өз арвадыны севән өзүнү севир. Чүнки һеч ким һеч заман өз бәдәнинә нифрәт етмәмишдир, лакин Рәбб [Мәсиһ] ҹәмијјәти етдији кими, ону једирир вә бәсләјир» (Ефеслиләрә 5:23, 25-29).

⁶ Исанын јығынҹаға бәсләдији ҝүҹлү мәһәббәт әрләр үчүн ҝөзәл нүмунәдир. Гејри-камил олмаларына бахмајараг, Иса шаҝирдләрини «сона гәдәр севди» вә һәјатыны онларын уғрунда гурбан верди (Јәһја 13:1; 15:13). Мүгәддәс Китаб әрләри сәсләјир: «Еј әрләр, өз арвадларынызы севин вә онларла сәрт давранмајын» (Колослулара 3:19). Хүсусән дә арвады дүшүнмәдән һәрәкәт едән заманлар, әрә бу мәсләһәти тәтбиг етмәјә нә көмәк едәр? Әр унутмамалыдыр ки, о да сәһвә јол верир вә Аллаһ тәрәфиндән бағышланмаға еһтијаҹы вар. Бәс Аллаһ ону бағышласын дејә, әр нә етмәлидир? Она гаршы ҝүнаһ ишләдәнләри, һәмчинин өз һәјат јолдашыны бағышламалыдыр. Әлбәттә, бу принсип арвадлара да аиддир (Матта 6:12, 14, 15). Әбәс јерә дејилмир ки, хошбәхт аилә, бағышламаға һазыр олан ики инсан арасындакы бирликдир.

7. Иса нәји нәзәрә алырды вә әрләр ондан һансы нүмунәни ҝөтүрә биләрләр?

⁷ Әрләр, һәмчинин јахшы јадда сахламалыдырлар ки, Иса өз шаҝирдләринә гаршы һәр заман диггәтли иди. О, онларын имканларыны вә ҝүҹләрини нәзәрә алырды. Мәсәлән, шаҝирдләри јоруланда О демишди: «Тәкликдә сакит бир јерә ҝедин вә бир аз динҹәлин» (Марк 6:30-32). Арвадлар да гајғыја вә диггәтә лајигдирләр. Мүгәддәс Китаб онлары «зәиф ҹинс» адландырыр вә әрләрә өз арвадларына ‘һөрмәт ҝөстәрмәләрини’ әмр едир. Нәјә ҝөрә? Она ҝөрә ки, әрләр дә, арвадлар да ејни «һәјат ән’амынын һәмварисләри»дирләр (1 Петер 3:7). Әрләр унутмамалыдырлар ки, инсан Аллаһын ҝөзүндә өз ҹинсинә ҝөрә јох, садиглији сајәсиндә дәјәрли сајылыр (Мәзмур 101:6).

8. а) Нәјә ҝөрә демәк олар ки, «арвадыны севән, өзүнү севир»? б) Әрлә арвадын ‘бир бәдән’ олдугларыны неҹә изаһ едәрдиниз?

⁸ Мүгәддәс Китабда дејилир ки, «арвадыны севән, өзүнү севир». Чүнки Исанын дедији кими, әрлә арвад «артыг ики дејил, бир бәдәндирләр» (Матта 19:6). Бу о демәкдир ки, онлар јалныз бир-бирләри илә ҹинси мүнасибәтдә ола биләрләр (Сүлејманын мәсәлләри 5:15-21; Ибраниләрә 13:4). Әҝәр онлар өз мәнфәәтләрини ҝүдмәдән бир-бирләринин гајғысына галарларса, никаһда сәдагәти горујуб сахлаја биләрләр (1 Коринфлиләрә 7:3-5). Мүгәддәс Китаб бир ваҹиб һәгигәти хатырладыр: «Һеч ким һеч заман өз бәдәнинә нифрәт етмәмишдир, лакин... ону једирир вә бәсләјир». Әр, өз башы олан Иса Мәсиһин гаршысында мәс’улијјәт дашыдығыны јадда сахлајараг, арвадыны өзү кими севмәлидир (Ефеслиләрә 5:29; 1 Коринфлиләрә 11:3).

9. Филипилиләрә 1:8 ајәсиндә Исанын һансы хүсусијјәтиндән бәһс едилир вә әрләр нә үчүн буну өз һәјат јолдашлары илә мүнасибәтләриндә ҝөстәрмәлидирләр?

⁹ Һәвари Павел Иса Мәсиһин севҝисиндән бәһс етмишдир (Филипилиләрә 1:8). Исанын бу хүсусијјәти бир чох инсанлары, о ҹүмләдән онун шаҝирди олан гадынлары да өзүнә ҹәлб едирди (Јәһја 20:1, 11-13, 16). Гадынлар да истәјирләр ки, әрләри онлара севҝи ҝөстәрсинләр.

ГАДЫНЛАР ҮЧҮН НҮМУНӘ

10. Иса гадынлара нәдә нүмунә гојду?

¹⁰ Аилә бир гурулушдур, орада әмин-аманлығын вә бирлијин олмасы үчүн, ким исә башчы ролуну иҹра етмәлидир. Һәтта Исанын да башчысы вар. «Арвадын башы әр» олдуғу кими, ‘Мәсиһин башы да Аллаһдыр’ (1 Коринфлиләрә 11:3). Өз Атасынын башчылығына табе олмагла, Иса бизим үчүн ҝөзәл нүмунә гојду, чүнки бизләрдән һәр биримиз кимәсә табејик.

11. Гадын өз әринә неҹә мүнасибәт ҝөстәрмәлидир вә онун давранышы һансы сәмәрәләри ҝәтирә биләр?

¹¹ Бүтүн әрләр гејри-камилдирләр вә чох вахт идеал аилә башчысы тәләбләринә ујғун ҝәлмирләр. Бу һалда гадын неҹә давранмалыдыр? О, әринин ләјагәтини алчалтмамалы вә рәһбәрлији өз әлинә кечирмәјә чалышмамалыдыр. Гадын јадда сахламалыдыр ки, Аллаһ һәлим вә сакит руһу чох гијмәтләндирир (1 Петер 3:4). О бу ҹүр руһ тәзаһүр етдирәрсә, чәтинликләр јарандыгда белә, Мүгәддәс Китабын башчылыг принсипинә табе олмаг асан олаҹаг. Бундан әлавә, Мүгәддәс Китабда дејилир: «Арвад... әринә еһтирам етсин» (Ефеслиләрә 5:33). Бәс әҝәр әр Мәсиһи өз башы һесаб етмирсә, онда неҹә? Мүгәддәс Китаб гадынлары тәшвиг едир: «Өз әрләринизә табе олун ки, бә’зиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр» (1 Петер 3:1, 2).

12. Гадынын өз фикрини мүлајимликлә демәси нә үчүн әринә һөрмәтсизлик ҝөстәрдијини билдирмир?

¹² Әринин мәсиһчи олуб-олмамасындан асылы олмајараг, гадынын өз фәргли нөгтеји-нәзәрини мүлајимликлә демәси, әринә һөрмәтсизлик ҝөстәрдијини билдирмир. Ола билсин ки, гадын һаглыдыр вә онун тәклифи бүтүн аиләјә фајда ҝәтирә биләр. Ибраһим бир аилә мәсәләсиндә арвады Сара илә разылашмајанда, Аллаһ она деди: «Саранын сәнә сөјләдији... сөзләрә гулаг ас» (Јарадылыш 21:9-12). Лакин әрин јекун гәрары Мүгәддәс Китаб принсипинә зидд ҝетмирсә, гадын итаәткарлыг ҝөстәрмәли вә әринин гәрарыны дәстәкләмәлидир (Һәвариләрин ишләри 5:29; Ефеслиләрә 5:24).

13. а) Титус 2:4, 5 ајәләри аиләли гадынлары нәјә тәшвиг едир? б) Мүгәддәс Китабда ајры јашамаға вә бошанмаға даир нә дејилир?

¹³ Гадын өз ролуну јеринә јетирмәклә, аиләнин хошбәхтлији үчүн чох шеј едә биләр. Мүгәддәс Китаб аиләли гадынлара мәсләһәт ҝөрүр: «Өз әрләрини, ушагларыны севсинләр, тәмкинли, исмәтли, евдар, хејирхаһ, өз әрләринә табе олсунлар» (Титуса 2:4, 5). Бу мәсләһәтә риајәт едән гадын һәм әринин, һәм дә ушагларынын һөрмәт вә мәһәббәтини газаныр (Сүлејманын мәсәлләри 31:10, 28). Никаһ ики гејри-камил инсанын бирлији олдуғу үчүн, истисна вәзијјәтләр ајры јашамаға вә ја бошанмаға сәбәб ола биләр (Сүлејманын мәсәлләри 31:10, 28). Бә’зи һалларда Мүгәддәс Китаб никаһда оланлара ајры јашамаға иҹазә верир. Анҹаг бу гәрар там ҹиддиликлә гәбул олунмалыдыр, чүнки Мүгәддәс Китабда дејилир: «Арвад әриндән ајрылмасын... Әр дә өз арвадыны бошамасын» (1 Коринфлиләрә 7:10, 11). Мүгәддәс Китабда бошанмаға иҹазә верән јеҝанә сәбәб, һәјат јолдашларындан биринин зина, јә’ни ҹинси әхлагсызлыг етмәсидир (Матта 19:9).

ВАЛИДЕЈНЛӘР ҮЧҮН НҮМУНӘ

14. Иса ушаглара неҹә јанашырды вә онларын нәјә еһтијаҹы вар?

¹⁴ Иса ушагларла неҹә рәфтар етмәјә даир валидејнләрә ҝөзәл нүмунә гојду. Ушаглары онун јанына бурахмајанда, о деди: «Гојун ушаглар Мәним јаныма ҝәлсинләр! Онлара мане олмајын». Мүгәддәс Китабда дејилир ки, о, ушаглары «гуҹаглајыб, әлләрини үзәрләринә гојараг, хејир-дуа верди» (Марк 10:13-16). Әҝәр Иса ушаглара вахт ајырырдыса, валидејнләр дә өз көрпәләринә вахт ајырмалы дејилләрми? Ушаглара бир нечә дәгигә јох, чох вахт ајырмаг лазымдыр, онларын буна еһтијаҹы вар. Онлары өјрәтмәк вә тәрбијә етмәк үчүн дә вахт ајырмаг лазымдыр, чүнки бунлары валидејнләрдән Јеһова тәләб едир (Ганунун тәкрары 6:4-9).

15. Валидејнләр ушагларыны горумаг үчүн нә едә биләрләр?

¹⁵ Бу ҝүн дүнја ҝет-ҝедә даһа да гәддарлашыр. Валидејнләр өз ушагларыны тәһлүкәләрдән, мәсәлән, азјашлы ушаглары јолдан чыхармаға чалышан позғун инсанлардан горумалыдырлар. Исанын «өвладларым» адландырдығы шаҝирдләрини неҹә горудуғуна диггәт јетирин. Өлдүрүлмәсиндән бир гәдәр әввәл ону тутмаға ҝәлдикләри заман, Иса шаҝирдләринин бурахылмасы үчүн гајғы ҝөстәрди (Јәһја 13:33; 18:7-9). Өвладларыныз варса, онлары Иблисин зәрәр вурмаг ҹәһдиндән горумаг үчүн хүсусилә еһтијатлы олмалысыныз. Бу пис дүнјанын јајдығы тәһлүкәләрә гаршы ушаглары әввәлҹәдән хәбәрдар етмәк лазымдырa (1 Петер 5:8). Ушагларын физики вә руһани сағламлығы, һәмчинин әхлаги тәмизлији индики гәдәр тәһлүкә алтында олмамышдыр.

16. Иса шаҝирдләринин гејри-камиллијинә неҹә мүнасибәт ҝөстәрирди вә валидејнләр онун нүмунәсиндән нә өјрәнә биләрләр?

¹⁶ Исанын өлүмүндән габагкы ҝеҹә шаҝирдләри араларында кимин ән бөјүк олдуғу барәдә мүбаһисә етмәјә башладылар. Иса онлара һирсләнмәк әвәзинә, сөзләри вә нүмунәси илә онлары мәһәббәтлә өјрәтмәјә давам етди (Лука 22:24-27; Јәһја 13:3-8). Валидејнләр, ушагларынызын сәһвләрини дүзәлдәркән, Исанын нүмунәсини неҹә тәглид едә биләрсиниз? Әлбәттә, ушағы ҹәзаландырмаг лазымдыр, амма бунун һәддини билмәк ҝәрәкдир, бүтүн аҹығымызы ушағын үстүнә төкмәк дүзҝүн дејил. ‘Гылынҹ кими јаралајан’ дүшүнүлмәмиш сөзләрдән гачмалыјыг (Јеремја 30:11; Сүлејманын мәсәлләри 12:18). Ушағы елә тәрбијә етмәк лазымдыр ки, о, бунун ҝәтирдији фајданы ҝөрсүн (Ефеслиләрә 6:4; Ибраниләрә 12:9-11).

УШАГЛАР ҮЧҮН НҮМУНӘ

17. Иса ушаглара нәдә ҝөзәл нүмунә гојду?

¹⁷ Ушаглар Исадан нә исә өјрәнә биләрләрми? Әлбәттә! Иса валидејнләрә гулаг асмаға даир ҝөзәл нүмунә гојду. «Атанын Мәнә өјрәтдији кими сөјләјирәм» дедикдән сонра, Иса әлавә етди: «Мән даим Онун хошуна ҝәлән ишләри ҝөрүрәм» (Јәһја 8:28, 29). Иса сәмави Атасына итаәткар иди, Мүгәддәс Китаб да ушаглары валидејнләринин сөзләринә гулаг асмаға тәшвиг едир (Ефеслиләрә 6:1-3). Иса камил ушаг олса да, јер үзүндәки гејри-камил валидејнләри Јусифлә Мәрјәмә гулаг асырды. Сөзсүз ки, бу, бүтүн аиләјә хошбәхтлик ҝәтирирди (Лука 2:4, 5, 51, 52).

18. Иса нә үчүн һәр шејдә сәмави Атасына итаәткарлыг ҝөстәрирди вә ушагларын итаәткарлығы кимә севинҹ ҝәтирир?

¹⁸ Ушаглар Исаны тәглид едәрәк валидејнләринә неҹә севинҹ бәхш едә биләрләр? Әлбәттә, валидејнләрә гулаг асмаг һәр заман асан олмур, лакин Јеһова ушагларын итаәткар олмаларыны истәјир (Сүлејманын мәсәлләри 1:8; 6:20). Иса һәр заман, һәтта ән чәтин анларда белә өз сәмави Атасына итаәткар иди. Бир дәфә, Аллаһын ирадәсини јеринә јетирмәк Исаја хүсуси илә чәтин олан заман, о, Атасындан хаһиш етди: «Бу касаны [хүсуси тәләби] Мәндән узаглашдыр». Амма буна бахмајараг, Иса Аллаһын ирадәсини јеринә јетирди, чүнки баша дүшүрдү ки, Ата нәјин дүз олдуғуну даһа јахшы билир (Лука 22:42). Ушаглар итаәткарлыг ҝөстәрмәји өјрәнмәклә, валидејнләрини вә ҝөјдәки Аталарыны чох севиндирирләрb (Сүлејманын мәсәлләри 23:22-25).

19. а) Шејтан ушаглары нәјә тәһрик етмәјә чалышыр? б) Ушағын јанлыш һәрәкәти валидејнләрә неҹә тә’сир едә биләр?

¹⁹ Иблисин Исаны сынаға чәкмәси ҝөстәрир ки, о, ушаглары да пис һәрәкәтләрә тәһрик етмәјә чалышаҹагдыр (Матта 4:1-10). Шејтан Иблисин һијләләриндән бири, һәмјашыдларын тә’сиридир вә буна мүгавимәт ҝөстәрмәк хүсусилә чәтин ола биләр. Буна ҝөрә, Аллаһын ганунлары илә јашамајан инсанларла достлуг етмәмәк олдугҹа ваҹибдир! (1 Коринфлиләрә 15:33). Јагубун гызы Дина Јеһоваја гуллуг етмәјән инсанларла достлуг едирди вә бу, бөјүк бәлалара сәбәб олду (Јарадылыш 34:1, 2). Аилә үзвләриндән биринин әхлагсыз һәрәкәт етмәсинин бүтүн аиләјә ҝәтирә биләҹәји ағры-аҹылары бир анлыға тәсәввүр един! (Сүлејманын мәсәлләри 17:21, 25).

АИЛӘ ХОШБӘХТЛИЈИНИН АЧАРЫ

20. Хошбәхтлијә наил олмаг үчүн аиләнин һәр бир үзвү нә етмәлидир?

²⁰ Мүгәддәс Китаб мәсләһәтләри һәјата кечириләрсә, аилә проблемләринин өһдәсиндән ҝәлмәк асан олаҹаг. Аилә хошбәхтлијинин ачары да елә мәһз Мүгәддәс Китаб мәсләһәтләринин тәтбиг едилмәсиндән ибарәтдир. Беләликлә, әрләр, өз һәјат јолдашларынызы севин вә онларла Исанын јығынҹагла даврандығы кими давранын. Гадынлар, әрләринизә аиләнин башчысы кими табе олун вә Сүлејманын мәсәлләри 31:10-31 ајәләриндә бәһс олунан хејирхаһ арваддан нүмунә ҝөтүрүн. Валидејнләр, өвладларыныза тә’лим-тәрбијә верин (Сүлејманын мәсәлләри 22:6). Аталар, ‘өз аиләнизи јахшы идарә един’ (1 Тимотејә 3:4, 5; 5:8). Вә ушаглар, валидејнләринизә итаәт един (Колослулара 3:20). Һамы гејри-камилдир вә һеч ким сәһв һәрәкәтдән сығорталанмајыб. Буна ҝөрә дә, тәвазөкарлыгла бир-бириниздән үзүр истәјин.

21. Бизи һансы ҝөзәл ҝәләҹәк ҝөзләјир вә индидән аиләдә хошбәхтлијә неҹә наил ола биләрик?

²¹ Аллаһын Кәламында аилә һәјатыны хошбәхт етмәјә көмәк едән күлли-мигдарда мәсләһәт вә принсипләр јерләшир. Мүгәддәс Китабда Јеһованын хидмәтчиләринин хошбәхт олаҹаглары јени дүнјадан, јә’ни јерүзү Ҹәннәтдән дә бәһс едилир (Вәһј 21:3, 4). Бизи неҹә дә ҝөзәл ҝәләҹәк ҝөзләјир! Аллаһын Мүгәддәс Китабда јазылмыш рәһбәрлијинә табе олараг, биз индидән аиләдә хошбәхтлијә наил ола биләрик.