Әјјуб камил галыр

СОН һәддәдәк сынанарса вә итаәткарлығы санки һеч бир мадди фајда ҝәтирмәзсә, инсанлардан кимсә Аллаһа садиг галаҹагмы? Бу суал Әјјуб адлы бир нәфәрлә бағлы галдырылды вә өз ҹавабыны да тапды.

Исраиллиләр Мисирдә оларкән индики Әрәбистанын әразисиндә Ибраһимин Әјјуб адлы гоһуму јашајырды. Бу арада мәләкләр ҝөјдә Аллаһын һүзурунда топлашдылар. Үсјанкар Шејтан да онларын арасында иди. Мәләкләрин өнүндә Јеһова хидмәтчиси Әјјубун садиглијинә әмин олдуғуну билдирди. Јеһова деди ки, јер үзүндә Әјјуб кими камил инсан јохдур. Анҹаг Шејтан иддиа етди ки, Әјјуб Аллаһа јалныз хејир-дуа вердији вә мүдафиә етдији үчүн хидмәт едир. Шејтан Әјјубун әлиндән һәр шеји алындығы тәгдирдә Аллаһы ләнәтләјәҹәји фикрини ирәли сүрдү.

Аллаһ Шејтана изин верди ки, әввәлҹә Әјјубун вар-дөвләтини вә ушагларыны сонра исә сағламлығыны әлиндән алсын. Баш верәнләрдә Шејтанын әли олдуғундан хәбәрсиз олан Әјјуб нәјә ҝөрә Аллаһын бүтүн бу сынаглара јол вердијини анлаја билмирди. Буна бахмајараг, Әјјуб һеч вахт Аллаһдан үз дөндәрмәди.

Үч јаланчы досту Әјјубун јанына ҝәлди. «Әјјуб» китабынын бир чох сәһифәләрини тутмуш сөзләри илә онлар Әјјубу јанлыш олараг инандырмаға чалышырдылар ки, Аллаһ ону ҝизли ҝүнаһларына ҝөрә ҹәзаландырыр. Онлар һәтта иддиа едирдиләр ки, Аллаһ Өз хидмәтчиләриндән мәмнун дејил вә онлара етибар етмир. Әјјуб онларын јанлыш фикирләрини рәдд етди. О, өләнәдәк камил галаҹағыны гәтијјәтлә бәјан етди!

Анҹаг Әјјуб өзүнә һәддиндән артыг һагг газандырмагла сәһвә јол верди. Сөһбәтә әввәлдән ахырадәк сакитҹә гулаг асдыгдан сонра јашҹа кичик Әлифәз сөзә башлады. Әлифәз Јеһова Аллаһын һакимијјәтинә бәраәт газандырылмасынын һәр һансы инсанын бәраәт газанмасындан гат-гат ваҹиб олдуғуну дәрк етмәдији үчүн Әјјубу мәзәммәт етди. О, Әјјубун јаланчы достларыны да ҹидди шәкилдә гынады.

Сонра Јеһова Аллаһ Әјјубла данышараг онун фикирләринә дүзәлиш верди. Јеһова Әјјубун диггәтини јаратдығы харигәләрә јөнәлдәрәк ону Јараданын бөјүклүјү илә мүгајисәдә инсанын нә гәдәр кичик олдуғу үзәриндә дүшүнмәјә тәшвиг етди. Әјјуб һәлимликлә Аллаһын етдији дүзәлиши гәбул етди. Чох меһрибан вә мәрһәмәтли олан Јеһова Әјјубун сағламлығыны гајтарды, она әввәлкиндән икигат артыг вар-дөвләт вә он ушаг бәхш етди (Јагуб 5:11). Шиддәтли сынаг алтында камиллијини горумагла Әјјуб Шејтанын сынаға чәкилдији тәгдирдә инсанларын Аллаһа садиг галмајаҹағына даир ирәли сүрдүјү јалан иттиһамына уғурла ҹаваб верди.

«Әјјуб» китабына әсасланыб.