БӨЛМӘ 4

Аллаһ һагда һәгигәт

ИНСАНЛАР чохлу аллаһлара ибадәт едирләр. Лакин Мүгәддәс Јазылар өјрәдир ки, јалныз бир һәгиги Аллаһ вар. Ондан башга Аллаһ јохдур, О, гүдрәтли вә әбәдидир. Ҝөјдә вә јер үзүндә олан һәр шеји О јарадыб вә бизә һәјат верән дә Одур. Буна ҝөрә дә, биз јалныз Она ибадәт етмәлијик.

Муса пејғәмбәр Ганунлардан ибарәт даш лөвһәләри әлиндә тутуб — Аллаһын Муса пејғәмбәрә вердији Ганун «мәләкләр васитәсилә верилмиш»ди

Аллаһын јалныз бир ады вар. Онун ады будур: ЈЕҺОВА. Аллаһ Муса пејғәмбәрә демишди: «Исраиллиләрә белә сөјлә: “Мәни сизин јаныныза ата-бабаларынызын Аллаһы, Ибраһимин Аллаһы, Исһагын Аллаһы, Јагубун Аллаһы Јеһова ҝөндәриб”. Адым әбәдилик будур, нәсилдән-нәслә Мәни бу адла јадда сахлајаҹаглар» (Чыхыш 3:15). Јеһова адына Мүгәддәс Јазыларда тәхминән 7000 дәфә раст ҝәлинир. Зәбур 83:18 ајәсиндә Аллаһ һаггында дејилир: «Ады Јеһова олан Сән, дүнјада тәк Сән уҹасан».

Өлү дәниздә тапылан вә Аллаһын адыны ҝөстәрән гәдим әлјазмалар — Мүгәддәс Јазыларын Өлү дәниздә тапылмыш гәдим әлјазмаларында Аллаһын ады ҝөстәрилир

Инсанлар һеч вахт Аллаһы ҝөрмәјибләр. Аллаһ Муса пејғәмбәрә демишди: «Үзүмү... ҝөрә билмәзсән, чүнки үзүмү ҝөрән кәс сағ гала билмәз» (Чыхыш 33:20). Аллаһ ҝөјләрдә јашајыр вә ҝөзәҝөрүнмәздир. Бүт, сурәт вә рәмзләр дүзәлтмәк, онларын васитәси илә Аллаһа дуа етмәк дүзҝүн дејил. Јеһова Аллаһ Муса пејғәмбәр васитәсилә бујурмушду: «Өзүнүз үчүн нә јухарыда — сәмада, нә ашағыда — јердә, нә дә јердәки суларда олан шејләрин һеч биринин бүтүнү вә ја сурәтини дүзәлтмәјин. Онлара сәҹдә гылыб ситајиш етмәјин, чүнки Мән, Аллаһыныз Јеһова там сәдагәт тәләб едән Аллаһам» (Чыхыш 20:2—5). Сонралар Аллаһ Әшија пејғәмбәр васитәсилә демишди: «Мән Јеһовајам. Адым будур. Шанымы һеч кәсә вермәрәм, Мәнә уҹалан мәдһләри бүтләрә вермәрәм» (Әшија 42:8).

Бәзи инсанлар Аллаһа инансалар да, Онун дәркедилмәз вә әлчатмаз олдуғуну дүшүнүрләр. Бәзиләри исә Аллаһы севмәк әвәзинә, Ондан горхурлар. Бәс сиз нә фикирләширсиниз? Аллаһ шәхсән сизин гајғыныза галыр? Сиз Ону таныја, һәтта Она јахынлаша биләрсиниз? Ҝәлин ҝөрәк Мүгәддәс Китаб Аллаһын хүсусијјәтләри барәдә нә өјрәдир.

Аллаһын мүгәддәс руһу вә мәләкләри

Аллаһ Өз ирадәсини јеринә јетирмәк үчүн мүгәддәс руһуну ҝөндәрир. Аллаһын руһу шүурлу варлыг вә ја мәләк дејил. Бу руһ Аллаһын нијјәтини һәјата кечирмәк үчүн истифадә етдији ҝөзәҝөрүнмәз фәал гүввәдир. Аллаһ ҝөјләри вә јери јаратмаг үчүн бу ҝүҹүндән истифадә едиб. «Ҝөјләр Јеһованын сөзү илә, орада оланлар ағзынын нәфәси илә јаранды» (Зәбур 33:6). Јарадылыш 1:2 ајәси изаһ едир ки, јер су илә өртүлү оланда вә Аллаһ јери инсанларын јашамасы үчүн һазырлајанда «Аллаһын руһу суларын үзәриндә һәрәкәт едирди». Сонра да Аллаһ мүгәддәс руһунун васитәсилә јер үзүндә олан бүтүн ҹанлылары јарадыб.

Аллаһ Өз нијјәтини һәјата кечирмәк үчүн мәләкләрдән дә истифадә едир. О, мәләкләри ҝөјдә Онун јанында јашамалары үчүн јарадыб. Онлар чох гүдрәтлидирләр. Мәләкләр инсанлара Аллаһын сөзләрини чатдырыр вә ваҹиб тапшырыглары јеринә јетирирләр. Мәсәлән, Мүгәддәс Китабда дејилир ки, Аллаһын Муса пејғәмбәрә вердији Ганун «мәләкләр васитәсилә верилмиш»ди. Һәмчинин Аллаһын мәләкләри Онун јер үзүндәки хидмәтчиләринә көмәк едир. Ејни заманда Мүгәддәс Китаб Аллаһын мәләкләрини «хиласы мирас алаҹаг адамлара хидмәт етмәк үчүн ҝөндәрилән руһани варлыглар» адландырыр (Ибраниләрә 1:14; 2:2).