БӨЛМӘ 7
Аллаһын пејғәмбәрләр васитәсилә вердији вәд
ГӘДИМ заманларда пејғәмбәрләр Аллаһа иман тәзаһүр етдирирдиләр. Онун вәдләринә инаныр вә һәјатларыны она әсасән гурурдулар. Аллаһ онлара һансы вәдләри вермишди?
Адәмлә Һәвва ҝүнаһ ишләтдикдән дәрһал сонра Аллаһ вәд етди ки, «илан»ла тәмсил олунан «Иблис вә Шејтан адланан бөјүк әждаһа»нын башындан вурараг ону әбәдијјән мәһв едәҹәк бир Шәхс ҝөндәрәҹәк (Јарадылыш 3:14, 15; Вәһј 12:9, 12). Ҝөрәсән, о Шәхс ким олаҹаг?
Бу илк пејғәмбәрликдән тәхминән 2000 ил сонра Јеһова Аллаһ Ибраһим пејғәмбәрә вәд етди ки, ҝөндәрәҹәји Шәхс онун нәслиндән олаҹаг. Аллаһ Ибраһимә деди: «Јер үзүнүн бүтүн халглары сәнин өвладын васитәсилә мүбарәк олаҹаг, чүнки сән Мәним сөзүмә гулаг асдын» (Јарадылыш 22:18).
Бизим ерадан әввәл 1473-ҹү илдә Аллаһ Муса пејғәмбәрә бу «өвлад» барәдә нөвбәти сөзләри деди: «Аллаһыныз Јеһова сизә сојдашларынызын арасындан мәним кими бир пејғәмбәр јетирәҹәк. Она гулаг асмалысыныз» (Ганунун тәкрары 18:15). Муса кими, бу пејғәмбәр дә Ибраһим пејғәмбәрин нәслиндән төрәмәли иди.
Һәмчинин бу пејғәмбәр Давуд падшаһын нәслиндән чыхмалы вә бөјүк падшаһ олмалы иди. Аллаһ Давуд падшаһа вәд етмишди: «Сәнин өвладыны... ортаја чыхараҹағам, онун тахт-таҹыны бәргәрар едәҹәјәм» (2 Ишмуил 7:12, 13). Еләҹә дә Аллаһ ачыглады ки, Давудун нәслиндән ҝәләҹәк бу Шәхс «Сүлһ әмири олаҹаг». Онун «һакимијјәти уҹгарларадәк јајылаҹаг, сүлһүн сону олмајаҹаг. О, Давудун тахтында, падшаһлығынын башында отураҹаг. Һакимијјәтини индидән сонсузадәк әдаләт вә салеһлик үзәриндә бәргәрар едәҹәк» (Әшија 9:6, 7). Бәли, Аллаһа садиг олан бу Падшаһ бүтүн дүнјада сүлһү вә әдаләти бәргәрар едәҹәк. Бәс о нә вахт ҝәләҹәк?
Вәд олунмуш «өвлад»... Ибраһимин нәслиндән ҝәлмәли, Муса кими пејғәмбәр олмалы, Давудун нәслиндән ҝәлмәли, ерамызын 29-ҹу илиндә пејда олмалы, иланын — Шејтанын башыны әзмәли иди
Сонралар Ҹәбрајыл мәләк Аллаһын пејғәмбәри олан Дәнјала белә бир хәбәр ҝәтирди: «Бил вә аҝаһ ол, Јерусәлимин јенидән тикилиб бәрпа едилмәси үчүн фәрманын чыхмасындан Өндәр Мәсиһин зүһуруна гәдәр једди һәфтә вә алтмыш ики һәфтә кечәҹәк» (Дәнјал 9:25). Һәр бири 7 илдән ибарәт олан бу 69 һәфтә 483 илә бәрабәрдир. Бу дөвр бизим ерадан әввәл 455-ҹи илдә башлајыб, ерамызын 29-ҹу илиндә битмишдирa.
Доғруданмы, Мусаја кими пејғәмбәр олан Мәсиһ вә вәд олунмуш «өвлад» — ерамызын 29-ҹу илиндә пејда олду? Ҝәлин буну нәзәрдән кечирәк.
a Јеһованын Шаһидләри тәрәфиндән дәрҹ едилән «Әбәди хошбәхт һәјат!» китабынын 255-ҹи сәһифәсиндәки 2-ҹи әлавәјә бахын.