ФӘСИЛ 30

Евлилијә, һәгигәтән дә, һазырыгмы?

Сән артыг өз јарыны тапмысан. Хејли вахтдыр ки, ҝөрүшүрсүнүз вә бир-биринизи севдијинизә әминсиниз. Хошбәхт евлилијин астанасындасыныз. Јохса елә дејил? Инди, һәјатынын ән ваҹиб гәрарыны вермәли олдуғун бир анда үрәјинә горху дүшүб...

Евлилијә, һәгигәтән дә, һазырыгмы?

ЕВЛИЛИКГАБАҒЫ шүбһәләринин олмасы тәбиидир, һәтта севдијинә әмин олсан белә. Әтрафында олан бәдбәхт евлиликләри вә бошанмалары нәзәрә алсан, һәјатыны көклү шәкилдә дәјишә биләҹәк бу гәрары верәркән еһтијат етмәјин тәәҹҹүблү дејил. Бәс сән евлилијә һазыр олдуғуна неҹә әмин ола биләрсән? Бунун үчүн хәјалларындан әл чәкиб никаһла бағлы һәгигәтләри ҝөрмәјә чалышмалысан. Мисал үчүн:

ХҮЛЈА 1 «Әсас одур ки, биз бир-биримизи севирик, галаны бош шејдир».

Һәгигәт: Севҝи нә мәсрәфләри өдәјир, нә дә мадди проблемләрин өһдәсиндән ҝәлир. Арашдырмалара әсасән, аиләләрдә мүнагишәләрин вә бошанмаларын башлыҹа сәбәби мадди чәтинликләрдир. Пула олан гејри-таразлы нөгтеји-нәзәрин сәнә руһани вә емосионал зәрәр вура биләр вә һәјат јолдашынла мүнасибәтләринә мәнфи тәсир ҝөстәрә биләр (1 Тимотејә 6:9, 10). Бундан һансы гәнаәтә ҝәлмәк олар? Бу кими мәсәләләри евләнмәмишдән габаг һәлл етмәк лазымдыр!

Мүгәддәс Китаб дејир: «Сиздән кимсә бир гүллә тикмәк фикринә дүшсә, мәҝәр тикинтини гуртармаға ҝүҹүнүн чатыб-чатмајаҹағыны билмәк үчүн әввәлҹә отуруб вәсаитини һесабламаз?» (Лука 14:28).

Тәклиф: Јахшы оларды ки, бу мөвзуну ҝәләҹәк һәјат јолдашынла һәлә аилә гурмаздан әввәл ҝөтүр-гој едәсән (Сүлејманын мәсәлләри 13:10). Сиз нөвбәти суаллары мүзакирә едә биләрсиниз: «Бүдҹәмизи неҹә тәртиб едә биләрик? Банкдакы һесабларымыз бирҝә олаҹаг, јохса ајры-ајры? Верҝиләри өдәмәкдә вә мәсрәфләри һесабламагда һансымыз даһа тәҹрүбәлијик?a Бир-биримиздән хәбәрсиз нә гәдәр пул хәрҹләјә биләрик?» Сиз артыг индидән бир команда олмалысыныз! (Ваиз 4:9, 10).

ХҮЛЈА 2 «Биз идеал ҹүтлүк олаҹағыг, чүнки һәр шејдә фикирләримиз үст-үстә дүшүр вә һеч мүбаһисә етмирик!»

Һәгигәт: Әҝәр сизин индијә кими һеч вахт сөзүнүз чәп ҝәлмәјибсә, демәли, һәлә мүбаһисәли мәсәләләрә тохунмамысыныз. Аилә гурандан сонра исә бундан гача билмәјәҹәксиниз! Данылмаз фактдыр ки, ики гејри-камил инсандан камил ҹүтлүк ола билмәз. Буна ҝөрә дә мүбаһисәләр гачылмаздыр (Ромалылара 3:23; Јагуб 3:2). Јалныз нә дәрәҹәдә јахшы јола ҝетдијинизә јох, фикир ајрылығы јаранаркән нә баш вердијинә дә диггәт јетирмәк лазымдыр. Мөһкәм никаһ — фикирләрини ајдын шәкилдә билдирмәјә чәкинмәјән, ејни заманда мүнагишәләри сүлһ јолу илә һәлл етмәји баҹаран ики инсан арасындакы бирликдир.

Мүгәддәс Китаб дејир: «Гәзәбләнәндә ҝүнаһ ишләмәјин» (Ефеслиләрә 4:26).

Тәклиф: Валидејнләринлә вә баҹы-гардашларынла аранызда мүбаһисә јаранаркән неҹә даврандығына диггәт јетир. Бу китабын 93-ҹү сәһифәсиндәки, јахуд 2-ҹи ҹилдин 221-ҹи сәһифәсиндәки ҹәдвәлә охшар ҹәдвәл гур вә гејдләр апар: аранызда фикир ајрылығы нәјә ҝөрә јараныр, сән буна неҹә јанашырсан вә әслиндә неҹә јанашсан даһа јахшы олар. Мәсәлән, әҝәр реаксијан гапыны чырпыб отагдан чыхмагдырса, белә вәзијјәтләрдә даһа јахшы неҹә даврана биләҹәјини дүшүн вә јаз. Әҝәр сән индидән мүнагишәләр заманы дүзҝүн реаксија ҝөстәрмәји өјрәнсән, хошбәхт аилә үчүн зәрури олан баҹарыға јијәләнәҹәксән.

ХҮЛЈА 3 «Никаһа дахил олдугдан сонра бүтүн ҹинси истәкләрими тәмин едәҹәјәм».

Һәгигәт: Евлилик о демәк дејил ки, сән һәр үрәјин истәјәндә ҹинси әлагәдә ола биләҹәксән. Унутма ки, һәјат јолдашын бир инсандыр вә онун һиссләрини дә нәзәрә алмаг лазымдыр. Ачығыны десәк, елә анлар ола биләр ки, арвадын (әрин) емосионал ҹәһәтдән ҹинси әлагәјә һазыр олмасын. Евли олмағыныз сәнә тәкид етмәјә әсас вермир (1 Коринфлиләрә 10:24). Ҝөрүндүјү кими, неҹә субајлара, еләҹә дә евлиләрә өзүнә һаким олмағы баҹармаг олдугҹа ваҹибдир (Галатијалылара 5:22, 23).

Мүгәддәс Китаб дејир: «Гој һәр кәс өз бәдәнини паклыгла вә ләјагәтлә идарә етмәји баҹарсын. Аллаһ истәмир ки, араныздан кимсә... аҹҝөз шәһвәтин әсири олсун» (1 Салоникилиләрә 4:4, 5).

Тәклиф: Өз ҹинси истәкләрини вә вәрдишләрини диггәтлә анализ ет вә онларын ҝәләҹәк никаһына неҹә тәсир едәҹәји барәдә фикирләш. Мәсәлән: сәнин мастурбасија кими вәрдишин вармы? Бәс порнографијаја бахмаг? Әкс ҹинсдән олан инсана ҝизлин-ҝизлин шәһвәтлә бахырсанмы? Өзүндән соруш: «Әҝәр субај икән ҹинси истәкләримә һаким олмағы баҹармырамса, бәс аилә гурандан сонра нејләјәҹәм?» (Матта 5:27, 28). Үстәлик, бир шејин дә үзәриндә дүшүнмәлисән: сәни флирт едән, ҝүндә бири илә ҝөрүшән, гашы-ҝөзү ојнајан бири кими таныјырлармы? Әҝәр беләдирсә, аилә гурдугдан сонра јалныз бир инсана — һәјат јолдашына бағлы галмалы олдугда бу вәрдишин өһдәсиндән неҹә ҝәләҹәксән? (Сүлејманын мәсәлләри 5:15—17).

ХҮЛЈА 4 «Евлилик мәни хошбәхт едәҹәк».

Һәгигәт: Субај икән хошбәхт олмајан инсан аилә гурдугдан сонра да хошбәхт олмајаҹаг. Нијә? Чүнки инсанын хошбәхт олмасы онун шәраитиндән чох, шәраитә мүнасибәтиндән асылыдыр (Сүлејманын мәсәлләри 15:15). Даима һәјатларындан шикајәтләнән инсанлар, әсасән, диггәтләрини малик олдуглары шејләрә јох, әлдә едә билмәдикләри шејләрә ҹәмләјирләр. Һәлә субај икән һәјата никбин јанашмағы өјрән. Сабаһ-бириҝүн аилә гуранда һәм өзүнүн, һәм дә һәјат јолдашынын мүсбәт ҹәһәтләрини үзә чыхараҹагсан.

Мүгәддәс Китаб дејир: «Һәр бир шәраитдә нәјим варса, она гане олмағы өјрәнмишәм» (Филипилиләрә 4:11).

Тәклиф: Бәзән мәнфи фикирләр гејри-реал үмидләрдән ирәли ҝәлир. Бир вәрәг ҝөтүр вә никаһдан ҝөзләдијин бир-ики шеји јаз. Сонра өзүндән соруш: «Мәним үмидләрим нәјә әсасланыр: һәгигәтә, јохса иллүзијаја? Онлара филмләр вә романтик әсәрләр өз тәсирини ҝөстәрмир ки? Никаһын јалныз мәнә һансы фајдалары ҝәтирәҹәји, мәсәлән, тәнһалыгдан гуртулмаг, өз ҹинси истәкләрими тәмин етмәк вә һәмјашыдларымын ҝөзүндә рәғбәт газанмаг барәдә дүшүнүрәм?» Әҝәр еләдирсә, «мән» әвәзинә «биз» дејә дүшүнмәји өјрән. Бунун үчүн никаһын сизин һәр икинизә ҝәтирәҹәји ики-үч фајданы јаз.

Јухарыда садаланан хүлјалар сәнә хошбәхт аилә гурмаға мане олаҹаг. Хәјаллар аләминдән јерә ен вә реалист олмаға чалыш. 216 вә 217-ҹи сәһифәләрдәки суаллар һәјатда ән бөјүк хејир-дуалардан биринә — хошбәхт аиләјә саһиб олмаг үзрә икән сәнә вә ҝәләҹәк һәјат јолдашына көмәк едәҹәк! (Ганунун тәкрары 24:5; Сүлејманын мәсәлләри 5:18).

[Һашијә]

АЧАР АЈӘ

“Буна ҝөрә дә киши өз ата-анасыны тәрк едиб, гадынына говушаҹаг вә онлар бир бәдән олаҹаг” Јарадылыш 2:24

МӘСЛӘҺӘТ

Узун илләрдир евли олан бир ҹүтлүкдән соруш: аилә гурмаг үзрә олан ҝәнҹләрә хошбәхт олмалары үчүн һансы мәсләһәти верәрдиләр? (Сүлејманын мәсәлләри 27:17).

БИЛИРСӘН... ?

Хошбәхт аиләләрдә әрлә арвад арасында јахын дост мүнасибәти олур, онлар бир-бирләри илә чох ҝөзәл үнсијјәт едир, мүнагишәләри неҹә һәлл едәҹәкләрини билирләр. Онларын ҝөзүндә никаһ өмүрлүк бир иттифагдыр.

ҺӘРӘКӘТ ПЛАНЫ!

Ҝәләҹәкдә јахшы һәјат јолдашы олмаг үчүн артыг индидән үзәриндә ишләмәли олдуғум ҹәһәт: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Бир чох өлкәләрдә бошанмаларын сајы һәддән артыг чохдур. Сәнҹә, нәјә ҝөрә?

● Садәҹә аиләдәки проблемләрдән гачмаг үчүн никаһа дахил олмаг нәјә ҝөрә тәһлүкәлидир?

● Никаһда Мүгәддәс Китаб принсипләринә риајәт етмәк нәјә ҝөрә ваҹибдир?

[220–ҹи сәһифәдәки јазы]

“Никаһ мәсулијјәтли аддымдыр. Јалныз үзәринә дүшән өһдәчиликләри билмәк кифајәт дејил, аилә гураҹағын адамы јахындан танымаг да олдугҹа ваҹибдир” Ајсун

[216 вә 217–ҹи сәһифәләрдәки чәрчивә/шәкил]

Чәрчивә

Евлилијә һазырсанмы?

Бу ики сәһифәдә ҝәтирилән суаллары нәзәрдән кечир. Онлары һәтта ҝәләҹәк һәјат јолдашынла да мүзакирә едә биләрсән. Мүгәддәс Китабдан ајәләри охумағы унутма.

Пул

□ Пула неҹә јанашырсан? (Ибраниләрә 13:5, 6).

□ Пулдан мүдрикликлә истифадә етдијин нәдән ҝөрүнүр? (Матта 6:19—21).

□ Һал-һазырда борҹун вармы? Онлары гајтармаг үчүн нә едирсән? (Сүлејманын мәсәлләри 22:7).

□ Тој хәрҹиниз нә гәдәр олаҹаг? Борҹ ҝөтүрәҹәксинизми? Әҝәр ҝөтүрәҹәксинизсә, онда нә гәдәр ҝөтүрмәјиниз мүдриклик оларды? (Лука 14:28).

□ Аилә гурдугдан сонра икинизә дә ишләмәк лазым ҝәләҹәкми? Әҝәр лазым ҝәләҹәксә, бир-биринизин иш графикинә неҹә ујғунлашаҹагсыныз? (Сүлејманын мәсәлләри 15:22).

□ Һарада јашајаҹагсыныз? Евә, јемәјә, пал-палтара нә гәдәр пулунуз чыхаҹаг? Бу хәрҹләри неҹә өдәјәҹәксиниз? (Сүлејманын мәсәлләри 24:27).

Аилә

□ Валидејнләринлә вә баҹы-гардашларынла јола ҝедирсәнми? (Чыхыш 20:12; Ромалылара 12:18).

□ Аилә үзвләринлә аранда проблем јарананда неҹә һәлл едирсән? (Колослулара 3:13).

□ «Сакит вә һәлим овгаты» неҹә тәзаһүр етдирирсән [суал гызлара аиддир]? (1 Петер 3:4).

□ Ушаг планлашдырырсынызмы? (Мәзмур 127:3). Әҝәр планлашдырмырсынызса, онда неҹә горунаҹагсыныз?

□ Аиләнин руһани тәләбатларынын гајғысына неҹә галаҹагсан [суал оғланлара аиддир]? (Матта 5:3).

Хүсусијјәтләр

□ Әмәксевәр олдуғуну неҹә ҝөстәрирсән? (Сүлејманын мәсәлләри 6:9—11; 31:17, 19, 21, 22, 27).

□ Фәдакар олдуғуну неҹә ҝөстәрирсән? (Филипилиләрә 2:4).

□ Башчылыг вәзифәсини јеринә јетирәркән Иса Мәсиһдән нүмунә ҝөтүрдүјүнү неҹә ҝөстәрә биләрсән [суал оғланлара аиддир]? (Ефеслиләрә 5:25, 28, 29).

□ Башчылыг принсипинә неҹә табе ола биләрсән [суал гызлара аиддир]? (Ефеслиләрә 5:22—24).

[219–ҹу сәһифәдәки шәкил]

Никаһа «атылмаға» тәләсмәјин — әввәлҹә үзәҹәјиниз «суја» бәләд олун