Һәр шеји елә един ки, Аллаһ шәрәфләнсин

ҺӘЈАТЫМЫЗЫ Аллаһа һәср етдијимиз үчүн данышығымызла вә давранышымызла Она шәрәф ҝәтирмәлијик. Һәвари Булусун нөвбәти сөзләри бу саһәдә бизә рәһбәрликдир: «Истәр јејәндә, ичәндә, истәрсә дә башга бир иш ҝөрәндә һәр шеји елә един ки, Аллаһ шәрәфләнсин» (1 Кор. 10:31). Бунун үчүн биздән Јеһованын али варлығыны әкс етдирән салеһлик нормаларына бағлы галмаг тәләб олунур (Кол. 3:10). Мүгәддәс халг олдуғумуз үчүн биз Аллаһа бәнзәмәјә чалышмалыјыг (Ефес. 5:1, 2).

² Һәвари Бутрус мәсиһиләрин диггәтини буна јөнәлдәрәк јазмышды: «Итаәткар ушаглар кими олун, вахтилә ҹаһиллик ичиндә јашајаркән дахилиниздә һөкм сүрмүш истәкләрә ујмајын. Сизи чағырмыш Мүгәддәс Аллаһ кими һәр бир ишиниздә мүгәддәс олун, ахы јазылыб: “Мүгәддәс олун, чүнки Мән мүгәддәсәм”» (1 Бут. 1:14—16). Гәдим Исраил халгы кими, бүтүн мәсиһиләрдән дә мүгәддәс олмаг тәләб олунур. Бунун үчүн биз паклығымызы горујуруг, пис ишләрдән вә бу дүнјадан узаг дуруруг. Бунун сајәсиндә биз тәмиз галыб Јеһоваја ибадәт едә билирик (Чых. 20:5).

³ Мүгәддәслији горумаг үчүн Јеһова Аллаһын мүгәддәс Кәламындакы ганун вә принсипләрә бағлы галмалыјыг (2 Тим. 3:16). Мүгәддәс Китабы арашдырмагла биз Јеһова Аллаһ вә Онун јоллары барәдә өјрәнир, Она даһа јахын олуруг. Бу мүталиә Аллаһын Падшаһлығыны һәр шејдән үстүн тутмаг вә Јеһованын ирадәсини һәјатымызда биринҹи јерә гојмаг үчүн бизә әминлик верир (Мәт. 6:33; Ром. 12:2). Бунун үчүн биздән јени мәнлијә бүрүнмәк тәләб олунур (Ефес. 4:22—24).

РУҺАНИ ВӘ ӘХЛАГИ ТӘМИЗЛИК

⁴ Јеһованын салеһлик нормаларына ујғун јашамаг һәмишә асан олмур. Дүшмәнимиз Шејтан Иблис бизи һәгигәт јолундан узаглашдырмаг үчүн фүрсәт ахтарыр. Бу дүнјанын пис тәсири вә ҝүнаһлы хисләтимиз вәзијјәти даһа да ағырлашдырыр. Һәср олунмағымыза ујғун јашамаг үчүн даим мүбаризә апармалыјыг. Мүгәддәс Китабда дејилир ки, тәгиб вә сынагларла үзләшәндә чашыб галмамалыјыг. Истәр-истәмәз биз бу дүнјада салеһлик уғрунда әзаб чәкирик (2 Тим. 3:12). Әслиндә, сынагларла үзләшәндә севинмәлијик, чүнки бу сынаглар Аллаһын ирадәсини јеринә јетирдијимизи сүбут едир (1 Бут. 3:14—16; 4:12, 14—16).

⁵ Иса камил олса да, чәкдији әзаблар сајәсиндә итаәтли олмағы өјрәнди. О, Шејтанын бүтүн имтаһанларындан үзүағ чыхды; о, бу дүнјада өзүнә шан-шөһрәт ахтармырды (Мәт. 4:1—11; Јәһ. 6:15). Иса ҝүзәштә ҝетмәји ағлындан белә кечирмирди. Аллаһа садиглијини горудуғу үчүн дүнјанын нифрәтини газанса да, о, Јеһованын салеһлик нормаларына бағлы галырды. Өлүмүндән бир аз әввәл Иса шаҝирдләрини хәбәрдар етмишди ки, онлар да дүнјанын нифрәтинә туш ҝәләҹәкләр. О вахтдан бәри Исанын давамчылары әзаб-әзијјәтлә үзләширләр; амма онлар билирләр ки, Аллаһын Оғлу дүнјаја галиб ҝәлиб, буна ҝөрә дә ҹәсарәтлә ирәли ҝедирләр (Јәһ. 15:19; 16:33; 17:16).

⁶ Бу дүнјаја аид олмамаг үчүн Ағамыз Иса кими Јеһованын салеһлик нормаларындан мөһкәм јапышмалыјыг. Дүнјанын сијаси вә сосиал ишләринә гарышмамалы вә мәнәви тәнәззүлә уғрајан бу дүнјадан узаг дурмалыјыг. Биз Јагуб 1:21 ајәсиндә јазылан мәсләһәтә ҹидди јанашырыг: «Өзүнүзү һәр ҹүр чиркабдан вә пислијин һәр зәррәсиндән тәмизләјин вә сизи хилас етмәјә гадир олан сөзүн ичиниздә әкилмәсинә һәлимликлә јол верин». Аллаһын Кәламынын мүталиәси вә ибадәт ҝөрүшләри сајәсиндә һәгигәт сөзү зеһнимиздә вә үрәјимиздә әкилир вә бунун сајәсиндә дүнјанын тәклифләри бизи өзүнә чәкмир. Исанын шаҝирди Јагуб јазырды: «Мәҝәр билмирсиниз ки, дүнја илә достлуг Аллаһла дүшмәнчилик демәкдир? Буна ҝөрә дә дүнјанын досту олмаг истәјән өзүнү Аллаһын дүшмәни едир» (Јаг. 4:4). Бу сәбәбдән, Мүгәддәс Китаб бизә ҹидди шәкилдә мәсләһәт ҝөрүр ки, Аллаһын салеһ ганунларындан мөһкәм јапышаг вә бу дүнјанын ишләринә гарышмајаг.

⁷ Аллаһын Кәламы бизи биабырчы вә әхлагсыз һәрәкәтләрдән чәкиндирир. Орада јазылыб: «Әхлагсызлығын, һәр ҹүр натәмизлијин, аҹҝөзлүјүн адыны белә чәкмәјин, ахы бунлар мүгәддәсләрә јарашмыр» (Ефес. 5:3). Буна ҝөрә дә биз налајиг, позғун, әдәбсиз фикирләри бејнимиздән говмалыјыг вә јол вермәмәлијик ки, бу шејләр данышығымыза нүфуз етсин. Бунунла биз Јеһованын пак әхлаг нормаларына ујғун јашамаг истәдијимизи ҝөстәририк.

ФИЗИКИ ТӘМИЗЛИК

⁸ Мәсиһиләр баша дүшүрләр ки, руһани вә әхлаги тәмизлик гәдәр физики тәмизлик дә ваҹибдир. Аллаһ мүгәддәс олдуғу үчүн гәдимдә Исраил халгына дүшәрҝәни тәмиз сахламағы бујурмушду. Биз дә тәмиз олмалыјыг ки, Јеһова арамызда мурдар бир шеј ҝөрмәсин (Ган. 23:14).

⁹ Мүгәддәс Китаба әсасән, мүгәддәслик вә физики тәмизлик бир-бирилә бағлы анлајышлардыр. Мәсәлән, һәвари Булус јазырды: «Әзизләрим,.. ҝәлин ҹисми вә руһу мурдарлајан һәр шејдән өзүмүзү тәмизләјәк вә Аллаһ горхусу илә там мүгәддәслијә јетишәк» (2 Кор. 7:1). Буна ҝөрә дә бүтүн мәсиһиләр, һәм кишиләр, һәм гадынлар мүнтәзәм чиммәли вә палтарларыны јумалыдырлар. Һәр өлкәнин шәраити мүхтәлифдир, амма мәсиһи өзүнү вә ушагларыны тәмиз сахламаг үчүн су вә сабун тапа биләр.

¹⁰ Шаһидлик фәалијјәти илә мәшғул олдуғумуз үчүн гоншулугда јашајан инсанлар бизи јахшы таныјыр. Евимиз һәм ичәридән, һәм дә бајырдан тәмиз вә сәлигәли оларса, бунун өзү ҝөзәл шаһидликдир. Бу ишдә бүтүн аиләнин әмәји олмалыдыр. Гардашлар хүсусилә евә вә һәјәт-баҹаја диггәт јетирмәлидирләр, чүнки евин һәјәти вә өзү бахымлы оланда башгаларында хош тәәссүрат ојадыр. Руһани ишләрлә јанашы, бу кими ишләрдә дә мәсулијјәти үзәринә ҝөтүрән аилә башчысы ҝөстәрир ки, аиләсини јахшы идарә едир (1 Тим. 3:4, 12). Баҹылар да тәмизлијә вә сәлигә-сәһмана фикир вермәлидирләр, хүсусилә дә евин ичиндә (Тит. 2:4, 5). Бу саһәдә јахшы тәрбијә алмыш ушаглар өз тәмизликләринә фикир верәҹәк, отагларыны тәмиз вә сәлигәли сахлајаҹаглар. Бунун сајәсиндә бүтүн аилә үзвләри тәмизкар олмағы өјрәнәҹәк; бу, јени дүнјада да лазым олаҹаг.

¹¹ Бир чох Јеһованын Шаһиди ибадәт ҝөрүшләринә автомобиллә ҝедиб-ҝәлир. Бәзи әразиләрдә автомобилсиз хидмәт етмәк гејри-мүмкүндүр. Автомобил тәмиз вә јахшы вәзијјәтдә олмалыдыр. Евимиздән вә автомобилимиздән бизим Јеһованын тәмиз вә мүгәддәс халгынын бир һиссәси олдуғумуз ҝөрүнмәлидир. Ејни шеји хидмәтә ҝөтүрдүјүмүз чантаја вә Мүгәддәс Китаба да аид етмәк олар.

¹² Ҝејимимиз вә хариҹи ҝөрүнүшүмүз Аллаһын принсипләринә ујғун олмалыдыр. Биз нүфузлу адамын гәбулуна сәлигәсиз, неҹә ҝәлди ҝејиниб ҝетмәрик. Тәбии ки, тәблиғ заманы вә ја сәһнәдә Јеһованы тәмсил едәркән әјин-башымыза даһа чох диггәт јетирмәлијик. Хариҹи ҝөрүнүшүмүз вә ҝејимимиз башгаларында динимиз һагда мүәјјән тәәссүрат јарадыр. Буна ҝөрә дә хариҹи ҝөрүнүшүмүз јерсиз диггәт ҹәлб етмәмәли вә башгаларына һөрмәт етдијимизи ҝөстәрмәлидир (Мик. 6:8; 1 Кор. 10:31—33; 1 Тим. 2:9, 10). Тәблиғә, јығынҹаға, рајон топлантыларына, јахуд реҝионал топлантыја ҝедәндә Мүгәддәс Китабда тәмизлик вә ләјагәтли ҝејимлә бағлы јазыланлары јадда сахламалыјыг. Биз һәр заман Јеһованын адына шәрәф ҝәтирмәк истәјирик.

¹³ Јеһованын Шаһидләринин баш идарәсинә вә филиалларына ҝедәркән дә ејни принсипә әсасән давранмалыјыг. Унутмајаг ки, Бејтел «Аллаһын еви» демәкдир. Буна ҝөрә дә ора ҝедәндә ибадәт ҝөрүшүнә ҝејиндијимиз кими ҝејинмәли вә давранмалыјыг.

¹⁴ Асудә вахтымызда да ҝејимимизә вә хариҹи ҝөрүнүшүмүзә фикир вермәлијик. Өзүмүздән соруша биләрик: «Гејри-формал шаһидлик вермәк имканы јаранса, ҝејимимә ҝөрә тәблиғ етмәјә утанмајаҹам?»

САҒЛАМ ИСТИРАҺӘТ ВӘ ӘЈЛӘНҸӘ

¹⁵ Истираһәт вә әјләнҹә ҝүмраһ вә сағлам олмаг үчүн ваҹибдир. Бир дәфә Иса шаҝирдләринә демишди: «Ҝәлин сакит бир јерә ҝедәк, бир аз динҹинизи алын» (Марк 6:31). Истираһәт вә сағлам әјләнҹә инсанын һәјатына рәнҝ гатыр. Бунун сајәсиндә биз тәравәтләнир вә ишимизи давам етдирә билирик.

¹⁶ Бу ҝүн әјләнҹә нөвләри чох олдуғу үчүн мәсиһиләр һикмәтлә давраныб сечиҹи олмалыдырлар. Истираһәт етмәк лазымдыр, амма истираһәт һәјатда әсас јери тутмамалыдыр. Мүгәддәс Китаб бизи хәбәрдар едир ки, ахырзаманда инсанлар «Аллаһдан чох ејш-ишрәти севәҹәкләр» (2 Тим. 3:1, 4). Буҝүнкү әјләнҹәләрин чоху Јеһова Аллаһын ганунлары илә јашамаг истәјәнләрә јарашмајан әјләнҹәләрдир.

¹⁷ Биринҹи әсрдәки мәсиһиләр јашадыглары ејш-ишрәт дүнјасынын зәрәрли әјләнҹәләриндән узаг дурурдулар. Рома сиркләриндә тамашачылар башгаларынын әзаб чәкмәјинә бахмагла әјләнирдиләр. Тамашачылары әјләндирмәк үчүн тамашаларда зоракылыг, гәтл вә ҹинси әхлагсызлыг сәһнәләри ҝөстәрилирди, лакин биринҹи әсрдәки мәсиһиләр бу ҹүр әјләнҹәләрдән гачырдылар. Бу ҝүн дә әјләнҹәләрин әксәријјәти бу ҹүр сәһнәләрлә долудур, ҹәмијјәтин зөвгүнә ујғун һазырланыр. Биз неҹә һәрәкәт етдијимизә диггәт јетирмәлијик, мәнәвијјаты мурдарлајан әјләнҹәләрдән узаг дурмалыјыг (Ефес. 5:15, 16; Зәб. 11:5). Бәлкә дә, сечдијиниз әјләнҹәнин өзү пис дејил, амма аб-һава мәсиһиләр үчүн мүнасиб олмаја биләр (1 Бут. 4:1—4).

¹⁸ Елә истираһәт вә әјләнҹә нөвләри вар ки, мәсиһиләр ондан зөвг алырлар. Чохлары нәшрләримиздә әјләнҹә илә бағлы Мүгәддәс Китаба әсасән верилән мәсләһәт вә тәклифләрин фајдасыны ҝөрүб.

¹⁹ Бәзән бир нечә аилә бирликдә истираһәт едир. Јахуд да баҹы-гардашлары тоја вә бу кими мәҹлисләрә дәвәт едирләр (Јәһ. 2:2). Мәҹлисдә баш верәнләрә ҝөрә мәҹлиси тәшкил едән мәсулијјәт дашыјыр. Ајдындыр ки, бөјүк мәҹлис тәшкил едәндә ҝөздә-гулагда олмаг лазымдыр. Бу ҹүр мәҹлисләрдә инсанлар өзләрини сәрбәст һисс едиб јемәкдә, ичкидә һәдди аша биләр, һәтта ҹидди ҝүнаһа јол верә биләрләр. Дәрракәли мәсиһи буну нәзәрә алараг чалышмалыдыр ки, гонагларын сајы һәдди ашмасын вә мәҹлис чох узун чәкмәсин. Мәҹлисдә ички олаҹагса, һәддән артыг чох олмамалыдыр (Филип. 4:5). Мәсиһи әлиндән ҝәләни етсә ки, мәҹлисдә хош аб-һава олсун, баҹы-гардашлар руһлансын, онда ички вә јемәк мәсәләсиндә наразылыг олмајаҹаг.

²⁰ Гонагпәрвәрлик ҝөзәл хүсусијјәтдир (1 Бут. 4:9). Руһланмаг, динҹәлмәк, үнсијјәт етмәк үчүн сүфрә ачыб баҹы-гардашлары гонаг чағыранда касыблары вә имкансызлары јаддан чыхармамалыјыг (Лука 14:12—14). Өзүмүз гонаг оланда исә Марк 12:31 ајәсиндә јазылан мәсләһәтә ујғун давранмалыјыг. Ҝөстәрдији хејирхаһлыға ҝөрә ев саһибинә тәшәккүрүмүзү билдирмәји унутмамалыјыг.

²¹ Аллаһын бәхш етдији бол немәтләр мәсиһиләрә севинҹ ҝәтирир вә онлар јејиб-ичиб зәһмәтләриндән һәзз алырлар (Ваиз 3:12, 13). Әҝәр һәр шеји Аллаһы шәрәфләндирән тәрздә етсәк, һәм ев јијәси, һәм дә гонаглар руһани тәравәт алдыглары үчүн мәҹлиси хош хатирәләрлә јада салаҹаглар.

МӘКТӘБ ТӘДБИРЛӘРИ

²² Мәктәбдә алдыглары тәһсил Јеһованын Шаһидләринин өвладларына фајда ҝәтирир. Онлар мәктәбдә јахшы охумағы вә јазмағы өјрәнирләр. Диҝәр фәнләр исә ҝәнҹләрә руһани мәгсәдләрә чатмаға көмәк едә биләр. Мәсиһи ҝәнҹләр мәктәб илләриндә руһани ишләри һәјатларында биринҹи јерә гојмаг вә Улу Јараданларыны унутмамаг үчүн әлләриндән ҝәләни едирләр (Ваиз 12:1).

²³ Мәктәбли мәсиһиләрә мәсләһәт ҝөрүлүр ки, Јеһоваја ибадәт етмәјән ҝәнҹләрлә мүмкүн гәдәр аз үнсијјәт етсинләр (2 Тим. 3:1, 2). Мәсиһи ҝәнҹләр өзләрини дүнјанын тәсириндән горуја биләрләр, чүнки Јеһова онлары көмәксиз гојмур (Зәб. 23:4; 91:1, 2). Одур ки, әзиз ҝәнҹләр, сизи Јеһованын көмәјиндән јарарланыб өзүнүзү горумаға тәшвиг едирик (Зәб. 23:5).

²⁴ Мәсиһи ҝәнҹләрин әксәријјәти мәктәб илләриндә дүнјадан узаг дурмаг үчүн дәрсдәнкәнар тәдбирләрдә иштирак етмирләр. Синиф јолдашлары вә мүәллимләри онлары баша дүшмәјә биләр, әсас одур ки, Аллаһ онлардан разы галыр. Бунун үчүн онлардан Аллаһын Кәламына әсасән тәрбијә едилмиш виҹданларына ујғун һәрәкәт етмәк, еләҹә дә рәгабәт вә ја милләтчилик руһунда кечән тәдбирләрдә иштирак етмәмәк гәтијјәти тәләб олунур (Гал. 5:19, 26). Ҝәнҹләр Аллаһы севән валидејнләрин Мүгәддәс Китаба әсасланан мәсләһәтләринә гулаг ассалар вә јығынҹагда сағлам үнсијјәт гурсалар, Јеһованын салеһ нормаларына бағлы гала биләҹәкләр.

ИШ ВӘ ИШҜҮЗАР МҮНАСИБӘТЛӘР

²⁵ Мүгәддәс Китаба әсасән, аилә башчылары аиләләрини доландырмаг мәсулијјәти дашыјырлар (1 Тим. 5:8). Бунунла белә, онлар баша дүшүрләр ки, Аллаһын Падшаһлығыны биринҹи јерә гојмалыдырлар, иш исә икинҹи јердә дурмалыдыр (Мәт. 6:33; Ром. 11:13). Мөминлији үстүн тутан, јемәји вә палтары варса, бунларла гане олан инсан һәддән артыг нараһатчылыг кечирмәјәҹәк вә дүнја малынын далынҹа гачмајаҹаг (1 Тим. 6:6—10).

²⁶ Ишләјән бүтүн мәсиһиләр Мүгәддәс Китабын принсипләрини унутмамалыдырлар. Һалал зәһмәтлә пул газанмаг о демәкдир ки, инсан Аллаһын вә дөвләтин ганунуну позмадан пул газаныр (Ром. 13:1, 2; 1 Кор. 6:9, 10). Биз пис үнсијјәтин тәһлүкәли олдуғуну да унутмамалыјыг. Мәсиһин әсҝәрләри кими биз Аллаһын нормаларына зидд ҝедән, битәрәфлијимизи позан, јахуд руһанилијимизә зәрәр ҝәтирән коммерсија фәалијјәтинә баш гошмамалыјыг (Әшј. 2:4; 2 Тим. 2:4). Һәмчинин Аллаһын дүшмәни олан «Бөјүк Бабил»лә һеч бир әлагәмиз олмамалыдыр (Вәһј 18:2, 4; 2 Кор. 6:14—17).

²⁷ Биз мәсиһиләр Аллаһын салеһлик нормаларына әсасән јашадығымыз үчүн ибадәт ҝөрүшләриндән ишҝүзар мәсәләләрдә вә диҝәр шәхси мәгсәдләрдә истифадә етмирик. Һәфтәлик ибадәт ҝөрүшләриндә вә бөјүк топлантыларда јығышмагда јеҝанә мәгсәдимиз Јеһоваја ибадәт етмәкдир. Бу ҝөрүшләрдә биз Јеһованын һазырладығы руһани сүфрәдән гидаланыр вә бир-биримизи руһландырырыг (Ром. 1:11, 12; Ибр. 10:24, 25). Чалышмалыјыг ки, ҝөрүшләримиздә үнсијјәтимиз руһани мөвзулардан кәнара чыхмасын.

МӘСИҺИЛӘР АРАСЫНДАКЫ БИРЛИК

²⁸ Јеһованын салеһлик нормалары тәләб едир ки, Онун халгы «сүлһүн бирләшдириҹи телләри арасында руһун вердији бирлији» горусун (Ефес. 4:1—3). Мәсиһиләр јалныз өзләрини дүшүнмүр, әксинә, онлар башгаларына јахшылыг етмәјә ҹан атырлар (1 Салон. 5:15). Шүбһә јохдур ки, сиз дә өз јығынҹағынызда бунун шаһиди олмусунуз. Ирги, милли, сосиал, мадди вәзијјәтимиздән вә ја тәһсилимиздән асылы олмајараг, һамымыз ејни ганунлара табе олуруг. Јеһованын халгынын бу сәҹијјәви хүсусијјәти һәтта кәнар инсанларын диггәтиндән јајынмыр (1 Бут. 2:12).

²⁹ Һәвари Булус бирлик үчүн даһа бир әсас ҝәтирир: «Дәвәт олундуғунуз үмид бир олдуғу кими, бәдән дә бир, руһ да бир, Аға да бир, иман да бир, вәфтиз дә бир, һамынын Атасы вә Аллаһы да бирдир. О, һамынын үзәриндәдир, һамы васитәсилә вә һамыда фәалијјәт ҝөстәрир» (Ефес. 4:4—6). Бу сөзләр бизи Мүгәддәс Китабын еһкамларында, тәлимләриндә бирлијә сәсләјир вә бунунла биз Јеһованын али һакимијјәтинә табе олдуғумузу ҝөстәририк. Бәли, Јеһова халгына һәгигәтин пак дилини бәхш едиб ки, онлар чијин-чијинә Она хидмәт едә билсинләр (Сәф. 3:9).

³⁰ Јеһованын халгы арасындакы бирлик вә әмин-аманлыг Онун хидмәтчиләри үчүн тәравәт мәнбәјидир. Биз Јеһованын «[онлары] ағылдакы гојун-гузу кими... бир јерә јығаҹағам» вәдинин артыг ҝерчәк олдуғунун шаһидијик (Мик. 2:12). Јеһованын тәләбләринә ујғун јашајараг бу сүлһү вә әмин-аманлығы горумалыјыг.

³¹ Јеһованын халгынын ичәрисиндә олмаг шәрәфинә лајиг ҝөрүләнләр неҹә дә хошбәхтдирләр! Јеһованын адыны дашымаг үчүн һәр гурбаны вермәјә дәјәр. Биз Јеһова илә ҝөзәл мүнасибәтләримизи горујуб-сахламаг истәјирик, бунун үчүн Онун гајда-ганунларына ујғун һәјат тәрзи сүрүр вә башгаларына да буну төвсијә едирик (2 Кор. 3:18).