Ҝөзләмәји баҹарын!
“Гуртулушумун Аллаһыны ҝөзләјәҹәјәм; Аллаһым мәни ешидәҹәк” (МИКА 7:7).
1, 2. а) Сәһв дүшүнҹә тәрзинә малик олдуглары үчүн исраиллиләр сәһрада неҹә әзаб чәкдиләр? б) Өзүндә дүзҝүн дүшүнҹә тәрзини инкишаф етдирмәјән мәсиһчи илә нә баш верә биләр?
ҺӘЈАТДА чох шејә ја мүсбәт, ја да ки, мәнфи нөгтеји-нәзәрлә бахмаг олар: һәр шеј бизим дүшүнҹә тәрзимиздән асылыдыр. Исраиллиләр сәһрада оларкән, мө’ҹүзәли тәрздә манна илә тә’мин олунурдулар. Онлар, әтрафдакы ҹансыз мәнзәрәјә ҝөз ҝәздирәрәк, гида илә тә’мин олундугларына ҝөрә Јеговаја дәрин миннәтдарлыг һисси бәсләмәли идиләр. Бу онларын мүсбәт дүшүнҹә тәрзинә малик олдугларыны әкс етдирәрди. Онлар исә Мисирдә једикләри ҹүрбәҹүр јемәкләри хатырлајыр вә шикајәтләнирдиләр ки, манна дадсыздыр. Бунунла да мәнфи дүшүнҹә тәрзинә малик олдугларыны ҝөстәрирдиләр. (Сајлар 11:4—6).
2 Бу ҝүн дә, мәсиһчинин дүшүнҹә тәрзиндән асылы олараг, бә’зи иш она севиндириҹи вә ја кәдәрли ҝөрүнә биләр. Дүшүнҹә тәрзи дүзҝүн олмазса, мәсиһчи севинҹини итирә биләр, бу исә чох ҹидди һалдыр, чүнки Неһемја дејирди: “РӘБ севинҹи гүввәтимиздир” (Неһемја 8:10). Мүсбәт, севинҹлә долу дүшүнҹә тәрзи гүввәтли галмагда бизә көмәк едир, јығынҹагда сүлһ вә бирлијә сәбәб олур (Ромалылара 15:13; Филипилиләрә 1:25).
3. Дүзҝүн дүшүнҹә тәрзи чәтин вахтларда Јеремјаја неҹә көмәк етди?
3 Јеремјанын чәтин вахтларда јашамасына бахмајараг, о, мүсбәт дүшүнҹә тәрзини горујуб сахлајырды. Һәтта б. е. ә. 607-ҹи илдә Јерусәлимин зәбт едилмәсинин дәһшәтинә бахаркән дә, о, баш верән һадисәнин мүсбәт тәрәфләрини ҝөрмәји баҹарды. Мәсәлән, Јегованын Исраили унутмајаҹағыны вә халгын горунаҹағыны ҝөрүрдү. Бу пејғәмбәр, “Јеремјанын мәрсијәләри” адлы китабында јазырды: “РӘББИН шәфгәтләриндәндир ки, тәләф олмадыг, чүнки мәрһәмәти түкәнмәз. Онлар һәр сабаһ тәзәләнир, сәнин сәдагәтин бөјүкдүр” (Јеремјанын мәрсијәләри 3:22, 23). Тарих әрзиндә Аллаһын хидмәтчиләри ән чәтин вәзијјәтләрдә белә, мүсбәт, һәтта севинҹлә долу дүшүнҹә тәрзини горујуб сахламаға чалышыблар (2 Коринфлиләрә 7:4; 1 Салониклиләрә 1:6; Јагуб 1:2).
4. Иса һансы дүшүнҹә тәрзини горујуб сахлајырды вә бу она неҹә көмәк етди?
4 Јеремјанын ҝүнләриндән алты јүз ил сонра, мүсбәт дүшүнҹә тәрзи сынаглара таб ҝәтирмәкдә Исаја көмәк етмишдир. Биз охујуруг: “О [Иса], гаршысына гојулан севинҹ уғрунда, рүсвајчылыға е’тинасызлыг ҝөстәриб, чармыха тәһәммүл етди вә Аллаһын тахтынын сағында отурду” (Ибраниләрә 12:2). Иса, гаршылашдығы мүгавимәт вә ја тәзјигләрә бахмајараг — һәтта дирәк үзәриндә әзаб чәкдији заман да — “гаршысына гојулан севинҹ” барәдә фикирләширди. Бу севинҹ, Јегованын али һакимијјәтинә һагг газандырмаг вә Онун адыны иззәтләндирмәк, еләҹә дә итаәткар инсанлара ҝәләҹәкдә сон дәрәҹә чох хејир-дуалар ҝәтирмәк имканындан ибарәт иди.
Ҝөзләмәк баҹарығыны әлдә един
5. Ҝөзләмәк баҹарығы һансы һалларда мүәјјән шејләрә дүзҝүн јанашмагда бизә көмәк едәр?
5 Әҝәр Исада олан дүшүнҹә тәрзини өзүмүздә инкишаф етдиририксә, һәтта бир иш бизим ҝөзләдијимиз кими вә ја ҝөзләдијимиз заман баш вермәјәндә дә, Јегованын гаршысында севинҹимизи итирмәјәҹәјик. Мика пејғәмбәр деди: “Гуртулушумун Аллаһыны ҝөзләјәҹәјәм; Аллаһым мәни ешидәҹәк” (Мика 7:7; Јеремјанын мәрсијәләри 3:21). Биз дә ҝөстәрә биләрик ки, ҝөзләмәји баҹарырыг. Неҹә? Мүхтәлиф үсулларла. Мәсәлән, бизә елә ҝәлә биләр ки, мәс’улијјәтли бир гардаш сәһвә јол вериб вә вәзијјәти ҝеҹикдирмәдән дүзәлтмәк лазымдыр. Әҝәр ҝөзләмәји баҹарырыгса, гаршымыза тәхминән белә суаллар гојарыг: о һәгигәтәнми сәһвә јол вериб, јохса нәји исә мән дүзҝүн анламамышам? Анҹаг, әҝәр сәһв едибсә дә, ола билсин һәмин шәхсин дәјишиклик едәҹәјини вә гәти ислаһедиҹи тәдбирләрин артыг лазым ҝәлмәјәҹәјини биләрәк, Јегованын өзү һадисәләрин белә ҝедишинә јол верир?
6. Шәхси проблеми илә мүбаризә апаран адама ҝөзләмәк баҹарығы неҹә көмәк едәҹәк?
6 Шәхси проблемимиз бизи нараһат едәндә вә ја бир нөгсанымызла мүбаризә апаранда да ҝөзләмәк баҹарығы бизә көмәк едә биләр. Тутаг ки, Јеговадан көмәк етмәсини хаһиш едирик, амма проблемимиз олдуғу кими галыр. Нә етмәли? Проблемин һәлли үчүн әлимиздән ҝәләни етмәли вә Исанын бу сөзләринә инанмалыјыг: “Диләјин, сизә вериләҹәк; ахтарын, тапаҹагсыныз; гапыны дөјүн, сизә ачылаҹаг” (Лука 11:9). Дуа етмәјә вә Јегованы ҝөзләмәјә давам един. Јегова мүнасиб вахтда вә өзү сечдији үсулла дуаларыныза ҹаваб верәҹәк (1 Салониклиләрә 5:17).
7. Ҝөзләмәк баҹарығы, Мүгәддәс Китабын тәдриҹән ајдынлашан изаһларына дүзҝүн јанашмагда бизә неҹә көмәк едәҹәк?
7 Аллаһын Кәламында ҝөстәрилән пејғәмбәрликләр јеринә јетир вә бизим Мүгәддәс Китабы дәрк етмәк анлајышымыз даһа чох ајдынлашыр. Амма, бә’зән дүшүнә биләрик ки, бу вә ја диҝәр суалын изаһы ҝеҹикир. Әҝәр изаһат бизим истәдијимиз вахтда ҝәлмирсә, ҝөзләмәјә һазырыгмы? Унутмајын ки, Јегова, “Мәсиһин сирри”ни тәхминән 4 мин ил әрзиндә јаваш-јаваш ашкар етмәји мүнасиб ҝөрдү (Ефеслиләрә 3:3—6). Буну нәзәрә алараг, сәбирсизлик етмәјә биздә әсас вармы? “Садиг вә ағыллы гул”ун Јегованын халгына “вахтлы-вахтында... јемәк вермәк үчүн” тә’јин олундуғуна шүбһә едирикми? (Матта 24:45). Һәр шеји ахыра гәдәр там анламадығымыз үчүн, өзүмүзү Аллаһа мәгбул севинҹдән нәјә ҝөрә мәһрум едәк? Јадда сахлајын: “сирри” нә заман вә неҹә ашкар етмәји Јегованын өзү һәлл едир (Амос 3:7).
8. Јегованын сәбирлилији бир чохларынын хејринә неҹә хидмәт едир?
8 Бә’зиләри, Аллаһа узун илләр сәдагәтлә хидмәт етдикдән сонра, “РӘББИН бөјүк вә горхунҹ ҝүнү” ҝәләнә гәдәр јашамајаҹагларыны дүшүнәрәк, кәдәрләнә биләрләр (Јоел 2:30, 31). Лакин белә инсанлар, ишә мүсбәт тәрәфдән бахмагла севинҹ тапа биләрләр. Петер мәсләһәт верирди: “Рәббимизин сәбрини дә гуртулуш һесаб един” (2 Петер 3:15). Јегованын сәбир етмәси, милјонларла јахшы гәлбли инсанларын һәгигәти өјрәнмәсинә имкан јарадыб. Мәҝәр бу, севинмәк үчүн әсас дејилми? Бундан әлавә, Јегова нә гәдәр сәбир едирсә, бизим дә хиласымызы “баша чатдырмаг үчүн горху вә ләрзә илә һәрәкәт” етмәјә бир о гәдәр чох вахтымыз вар (Филипилиләрә 2:12; 2 Петер 3:11, 12).
9. Әҝәр Јеговаја хидмәтдә имканларымыз мәһдуддурса, ҝөзләмәк баҹарығы сәбир етмәкдә бизә неҹә көмәк едәр?
9 Мүгавимәт, хәстәлик, гоҹалыг вә ја диҝәр проблемләр Падшаһлыг һаггындакы хәбәри тәблиғ етмәкдә бизә манечилик төрәдәндә, ҝөзләмәк баҹарығы руһдан дүшмәмәкдә бизә көмәк едәҹәк. Јегова, бизим Она үрәкдән хидмәт едәҹәјимизи ҝөзләјир (Ромалылара 12:1). Буна бахмајараг, Аллаһын “јохсула вә фағыра аҹыјан” Оғлу биздән мәнтигә ујғун дәрәҹәдә едә билдијимиздән артыг етмәји тәләб етмир; буну Јегова да тәләб етмир (Мәзмур 72:13). Буна ҝөрә дә биз, ја индики әшјалар системиндә, ја да ҝәләҹәкдә шәраитләрин дәјишәҹәјини сәбирлә ҝөзләјәрәк, баҹардығымызы етмәјә тәшвиг олунуруг. Јадда сахлајын: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10).
10. Ҝөзләмәк баҹарығыны тәзаһүр етдирмәклә, Аллаһа мәгбул олмајан һансы хүсусијјәтдән гачынмаг олар? Изаһ един.
10 Ҝөзләмәк баҹарығы өзүнә ҝүвәнәрәк давранмагдан узаг олмаға да бизә көмәк едәҹәк. Дөнүк чыханлардан бә’зиләри ҝөзләмәк истәмәмишдиләр. Бәлкә дә онлар дүшүнүрдүләр ки, Мүгәддәс Китабы баша дүшмәк үсулунда вә ја тәшкилатчылыг ишләриндә нәји исә дәјишмәк лазымдыр. Һәтта онлар разылашмырдылар ки, Јегованын руһу садиг вә ағыллы гулу, бизим јох, Онун нөгтеји-нәзәриндән лазым ҝәлән вахтда бир дәјишиклик етмәјә тәшвиг едир. Бундан башга, бүтүн дәјишикликләр, бизим шәхси фикримизлә јох, Јегованын ирадәси илә ујғун олмалыдыр. Дөнүк чыханлар өзүнә ҝүвәнмә хүсусијјәтинин онларын дүшүнҹәләринә һаким олмасына вә онлары бүдрәтмәсинә јол верирләр. Лакин онлар Мәсиһин дүшүнҹә тәрзини мәнимсәмиш олсајдылар, севинҹи горујуб сахламаг вә Јегованын халгы арасында галмаг онлара мүјәссәр оларды (Филипилиләрә 2:5—8).
11. Ҝөзләмә вахтыны сәмәрәли тәрздә неҹә сәрф едә биләрик вә бу ишдә кимләрин нүмунәсинә риајәт етмәк олар?
11 Ҝөзләмәји баҹармаг, шүбһәсиз ки, әринмәк вә ја һеч бир иш ҝөрмәдән отурмаг демәк дејил. Ҝөрүләси ишләримиз чохдур. Мәсәлән, Мүгәддәс Китабын шәхсән өјрәнилмәси заманы дәриндән тәдгигат апармалы, бунунла да садиг пејғәмбәрләрин вә һәтта мәләкләрин руһани ишләрә ҝөстәрдикләри ҹанлы марағы ҝөстәрмәлијик. Белә мараг һаггында һәвари Петер дејирди: “Пејғәмбәрләрин арашдырма вә тәдгигатлары да, бу гуртулуша даир иди... Бу һәгигәтләри мәләкләр дә тәдгиг етмәк истәјирләр” (1 Петер 1:10—12). Јалныз шәхси өјрәнмәләримиз дејил, дуаларымыз вә јығынҹагларда мүнтәзәм иштиракымыз да ваҹибдир (Јагуб 4:8). Өзүнүн руһани тәлабатларыны дәрк едәрәк руһани гиданы даим гәбул едән вә һәмиманлыларла үнсијјәтдә олан шәхсләр, Мәсиһин дүшүнҹә тәрзини мәнимсәдикләрини ҝөстәрирләр (Матта 5:3).
Реал нөгтеји-нәзәр
12. а) Адәм вә Һәвва һансы сәрбәстлијә ҹан атырдылар? б) Инсанларын Адәмлә Һәвванын јолуну давам етдирмәләринин нәтиҹәси нә олду?
12 Аллаһ илк инсан ҹүтүнү јараданда, нәјин јахшы вә нәјин пис олдуғуну һәлл етмәк һүгугуну өз ихтијарында сахлады (Тәквин 2:16, 17). Адәмлә Һәвва Аллаһын рәһбәрлијиндән асылы олмаг истәмәдиләр, бунун нәтиҹәсиндә бу ҝүн бизи әһатә едән дүнја мөвҹуд олду. Һәвари Павел деди: “Буна ҝөрә неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир” (Ромалылара 5:12). Адәмин вахтындан индијә кими өтүб кечән бәшәр тарихинин алты мин или, Јеремјанын сөзләринин һәгигәт олдуғуну тәсдиг етди: “Ја РӘБ, билирәм ки, инсанын јолу өз әлиндә дејилдир; аддымларыны доғрултмаг јеријән инсанын әлиндә дејилдир” (Јеремја 10:23). Јеремјанын сөзләри илә разылашмаг, тәслим олмаг демәк дејил. Бу, реалист олмаг демәкдир. Пејғәмбәрин сөзләри изаһ едир ки, нәјә ҝөрә узун илләр әрзиндә “бир адамын диҝәр адам үзәриндә һакимијјәти өз зәрәринәдир” — чүнки инсанлар Аллаһын рәһбәрлијиндән асылы олмадан рәһбәрлик едирләр (Ваиз 8:9).
13. Јегованын Шаһидләри инсанларын имканларына реал олараг неҹә бахырлар?
13 Бәшәријјәтин дүшдүјү вәзијјәти нәзәрә алараг, Јегованын Шаһидләри дәрк едирләр ки, индики әшјалар системиндә бир шејә наил олмағын һәдди вар. Севинҹимизи горујуб сахламагда мүсбәт дүшүнҹә тәрзи бизә көмәк едәр, амма о һәр шеји һәлл етмир. Американын бир дин хадими 1950-ҹи илләрин башланғыҹында, “Мүсбәт дүшүнҹәнин ҝүҹү” (“The Power of Positive Thinking”) адлы тезсатылан китаб нәшр етди. Бу китабын вердији мәсләһәтә әсасән, әҝәр манеәләрә мүсбәт дүшүнҹә тәрзи илә јанашыларса, онларын әксәријјәтинин өһдәсиндән ҝәлмәк олар. Шүбһәсиз ки, мүсбәт дүшүнҹә чох јахшыдыр. Лакин тәҹрүбә ҝөстәрир ки, билијимизин, баҹарыг сәвијјәмизин, мадди вәсаитимизин вә бир чох диҝәр амилләрин чатышмамазлығы, наил ола биләҹәјимиз һәр бир ишдә бизә мәһдудијјәт гојур. Бәшәријјәтин гаршылашдығы дүнја проблемләри исә о гәдәр бөјүкдүр ки, инсанларын дүшүнҹә тәрзи нә гәдәр мүсбәт олса да, онларын өһдәсиндән мүвәффәгијјәтлә ҝәлә билмирләр!
14. Демәк олармы ки, Јегованын Шаһидләри мәнфи нөгтеји-нәзәрә маликдирләр? Изаһ един.
14 Јегованын Шаһидләри бу мәсәләләрә реал нөгтеји-нәзәрлә бахдыглары үчүн, бә’зән онлары мәнфи дүшүнҹәјә малик олмагда иттиһам едирләр. Әксинә онлар инсанлара, бәшәријјәтин һәјатыны әбәдијјән јахшылашдыра биләҹәк јеҝанә Шәхсијјәт һаггында данышмаға чалышырлар. Шаһидләр бу ишдә дә Мәсиһин дүшүнҹә тәрзини тәглид едирләр (Ромалылара 15:2). Бундан әлавә онлар, Аллаһла јахшы мүнасибәти инкишаф етдирмәкдә инсанлара фәал сурәтдә көмәк едирләр. Онлар билирләр ки, бу мүнасибәт сон мәрһәләдә даһа бөјүк хејир-дуаја сәбәб олаҹаг (Матта 28:19, 20; 1 Тимотејә 4:16).
15. Јегованын Шаһидләринин фәалијјәти сајәсиндә инсанлар јахшылыға доғру неҹә дәјишилирләр?
15 Јегованын Шаһидләри әтрафларында олан иҹтимаи проблемләрә — хүсусилә дә Мүгәддәс Китаба зидд олуб инсаны натәмиз едән вәрдишләрә — ҝөз јуммурлар. Марагланан шәхс Јегованын Шаһиди олмаздан әввәл дәјишикликләр едир, белә ки, о, Аллаһа мәгбул олмајан нөгсанлара гаршы чох вахт мүбаризә апармалы олур (1 Коринфлиләрә 6:9—11). Јегованын Шаһидләри, Мүгәддәс Китаб мүждәсинә хош мүнасибәт билдирән инсанлара сәрхошлугдан, наркотик маддәләрин гәбулундан, әхлагсызлыгла мәшғул олмагдан вә өһдәсиндән ҝәлинмәси мүмкүн олмајан гумар ојунларындан чәкинмәјә көмәк едибләр. Јени һәјата башлајан бу инсанлар, аиләләрини виҹданла вә мәс’улијјәтлә тә’мин етмәји өјрәнмишләр (1 Тимотејә 5:8). Ајры-ајры инсанлар вә аиләләр белә көмәји гәбул едәндә, бу, иҹтимаи проблемләрин һәллинә: наркоманларын, аиләдәки зоракылыг һадисәләринин азалмасына вә саирәјә сәбәб олур. Гануна риајәт едән вәтәндашлар олараг, Јегованын Шаһидләри, башгаларына да һәјатларында јахшлыға доғру дәјишиклик етмәкдә көмәклик ҝөстәрир вә бунунла да, иҹтимаи проблемләрлә мәшғул олан дөвләт идарәләринин јүкүнү јүнҝүлләшдирирләр.
16. Јегованын Шаһидләри нәјә ҝөрә ислаһатчы һәрәкатларына гошулмурлар?
16 Беләликлә, демәк олармы ки, Јегованын Шаһидләри дүнјадакы мә’нәви шәраитә тә’сир етмишләр? Фәрги өзүнүз ҝөрүн: он ил әввәл Јегованын фәал Шаһидләринин сајы 3 800 000-дән бир гәдәр аз иди, инди исә онларын сајы демәк олар ки, 6 000 000 нәфәрдир. Бу о демәкдир ки, онларын сајы тәхминән 2 200 000 нәфәр артыб вә һәм дә онлардан чоху, мәсиһчи олмаг үчүн, натәмиз вәрдишләринә сон гојмалы олублар. Чох инсанларын һәјаты јахшылашыб! Лакин бу сај, бурада дејилән мүддәт әрзиндә 875 милјон артан дүнја әһалисинин сајы илә мүгајисәдә чох аздыр. Јегованын Шаһидләри, бәшәријјәт арасындан чох аз адамларын һәјат јолуна ҝәләҹәкләрини анладыгларына бахмајараг, һәгигәтә һәссас мүнасибәт ҝөстәрән инсанлара көмәк етмәкдән севинҹ әлдә едирләр (Матта 7:13, 14). Шаһидләр, дүнја мигјасында јахшылыға доғру јалныз Аллаһын едә биләҹәји дәјишикликләри ҝөзләјәрәк, чох вахт әввәлҹә хош нијјәтләрлә башланан, амма мә’јуслуг вә һәтта зоракылыгла тамамланан ислаһатчы һәрәкатларына гошулмурлар (2 Петер 3:13).
17. Иса, ону әһатә едән инсанлара көмәк ҝөстәрмәк үчүн нә едирди, амма о нәји етмирди?
17 Јегованын Шаһидләри белә давранараг, Исанын јер үзүндә јашадығы заман Јеговаја, ҝөстәрдији е’тибары әкс етдирирләр. Биринҹи әсрдә Иса шәфавериҹи мө’ҹүзәләр едирди (Лука 6:17—19). О, һәтта өлүләри дә дирилдирди (Лука 7:11—15; 8:49—56). Лакин о, хәстәликләрә бир дәфәлик сон гојмады вә дүшмән олан өлүмә дә галиб ҝәлмәди. О, билирди ки, Аллаһын буну етмәк үчүн гәрара алдығы вахт һәлә ҝәлмәјиб. Гејри-ади баҹарыглы, камил инсан олан Иса, јәгин ки, мүһүм сијаси вә иҹтимаи проблемләрин һәлли үчүн чох шејләр едә биләрди. Ҝөрүнүр, мүасирләриндән чоху онун һакимијјәтә ҝәлмәсини вә бүтүн бу ишләри һәјата кечирмәсини истәјирдиләр, анҹаг Иса разы олмады. Биз охујуруг: “О вахт Исанын ҝөстәрдији әламәти ҝөрән халг: “Доғрудан да дүнјаја ҝәлмәли олан Пејғәмбәр Будур”, деди. Иса да, онларын Ону Падшаһ етмәк үчүн ҝәлиб, зорла апармаг истәдикләрини анлајараг јенә тәк-тәнһа даға чәкилди” (Јәһја 6:14, 15, ӘҸ—93).
18. а) Иса ҝөзләмәји баҹардығыны һәмишә неҹә ҝөстәрирди? б) Исанын тутдуғу мөвге 1914-ҹү илдән неҹә дәјишиб?
18 Иса сијасәтә гарышмыр вә иҹтимаи ишләрлә мәшғул олмурду, чүнки билирди ки, јер үзүнүн бүтүн сакинләринә шәфа вермәк үчүн падшаһлыг һакимијјәтини алаҹағы вахт һәлә чатмамышдыр. Иса, һәтта өлмәз руһ олуб, ҝөјләрә галхдыгдан сонра да, фәалијјәт ҝөстәрмәк үчүн Јегованын тә’јин етдији вахта гәдәр ҝөзләмәјә һазыр иди (Мәзмур 110:1; Һәвариләрин ишләри 2:34, 35). Лакин 1914-ҹү илдә Аллаһын Падшаһлығынын Падшаһы олан вахтдан, Иса “фатеһ кими јола чыхды ки, фәтһ етсин” (Вәһј 6:2; 12:10). Өзләрини мәсиһчи адландыран диҝәр инсанлар, Мүгәддәс Китабын Падшаһлыг һаггындакы тә’лимләринә аид анлашылмаз вәзијјәтдә галмағы үстүн тутдуглары бир вахтда, биз, Исанын Падшаһлығына табе олдуғумуз үчүн неҹә дә шадыг!
Ҝөзләмәк, кәдәр мәнбәјидир, јохса севинҹ?
19. Ҝөзләмәк нә заман “үрәји хәстә едәр” вә нә заман севинҹ ҝәтирәр?
19 Сүлејман билирди ки, ҝөзләмәк кәдәрләндирә биләр. О јазырды: “Башга ҝүнә атылан үмид үрәји хәстә едәр” (Сүлејманын мәсәлләри 13:12). Әлбәттә, әҝәр инсанын бәсләдији үмидләр һеч нәјә әсасланмырса, мә’јуслугдан үрәк “хәстәләнә” биләр. Амма биз хошбәхт һадисәләри мәсәлән, тој, ушағын дүнјаја ҝәлишини вә ја әзиз адамларла ҝөрүшәҹәјимизи ҝөзләјәндә, һәмин ҝүн ҝәлмәздән әввәл ҝөзләмәк севинҹимиз ашыб-дашыр. Әҝәр биз, олаҹаг һадисәјә һазырлашараг, ҝөзләдијимиз вахты мүдрикликлә истифадә едириксә, севинҹ ҝүҹләнәҹәкдир.
20. а) Биз һансы мө’ҹүзәли һадисәләри әминликлә ҝөзләјә биләрик? б) Јегованын нијјәтләринин јеринә јетмәсини ҝөзләдијимиз мүддәтдә севинмәјимизә нә көмәк едәр?
20 Әҝәр биз үмидләримизин јеринә јетәҹәјинә тамамилә әминиксә — һәтта онларын нә заман јеринә јетәҹәјини дәгиг билмәсәк дә — ҝөзләмәк вахты “үрәји хәстә” етмәмәлидир. Аллаһын садиг ибадәтчиләри, Мәсиһин Миниллик Падшаһлығынын јахын олдуғуну билирләр. Онлар әминдирләр ки, өлүм вә хәстәлијин сонуну ҝөрәҹәкләр. Онлар, милјардларла дирилән инсанлары, о ҹүмләдән өз әзизләрини гаршылајаҹаглары вахты севинҹлә ҝөзләјәрәк хәјалән һәзз алырлар (Вәһј 20:1—3, 6; 21:3, 4). Еколожи бөһран вәзијјәтиндә јашадыглыры бир вахтда, јер үзүндә һөкмән бәрпа олунаҹаг Ҹәннәт һаггында мәмнунијјәтлә дүшүнүрләр (Јешаја 35:1, 2, 7). Буна ҝөрә “һәр заман Рәббин ишиндә тәрәгги” едәрәк, ҝөзләдијимиз вахты мүдрикликлә истифадә етмәк, доғрудан да ағыллы давранышдыр! (1 Коринфлиләрә 15:58). Руһани гиданы гәбул етмәјә давам един. Јегова илә јахын, гаршылыглы мүнасибәт јарадын. Үрәкләриндә Јеговаја хидмәт етмәк мејли олан јени инсанлары ахтарын. Һәмиманлыларынызы руһландырын. Јегованын тәрәфиндән верилән вахтдан даһа сәмәрәли истифадә един. О заман, Јегованы ҝөзләмәк, сизи “үрәји хәстә” етмәјәҹәк. Әксинә, севинҹиниз ашыб-дашаҹаг!
Сиз неҹә изаһ едәрдиниз?
• Ҝөзләмәји баҹардығыны Иса неҹә ҝөстәрди?
• Ҝөзләмәк баҹарығы мәсиһчиләрә һансы һалларда ҝәрәкдир?
• Јегованын Шаһидләри нәјә ҝөрә Јегованы ҝөзләмәјә һазырдырлар?
• Јегованы ҝөзләмәкдән неҹә севинҹ алмаг олар?
[24-ҹү сәһифәдәки шәкилләр]
Иса, гаршысына гојулан севинҹ наминә сынаглара таб ҝәтирди
[25-ҹи сәһифәдәки шәкил]
Һәтта узун илләр хидмәт етдикдән сонра да, севинҹимизи горујуб сахлаја биләрик