“Саат ҝәлди!”
“Бу дүнјадан Атанын јанына көчәҹәји саат ҝәлди” (ЈӘҺЈА 13:1).
1. Б. е. 33-ҹү илиндә Пасха јахынлашанда Јерусәлим һансы сөһбәтләрдән һәрәкәтә ҝәлир вә нәјә ҝөрә?
ИСА, б. е. 29-ҹү илиндә вәфтиз олунараг, өлүмү, дирилмәси вә иззәтләнмәси “саатына” апаран јола гәдәм гојду. Инди б. е. 33-ҹү илинин баһар фәсли башлајыб. Синедрионун - јәһуди али мәһкәмәсинин, Исаны өлдүрмәк үчүн гәрар чыхардығы вахтдан ҹәми бир нечә һәфтә кечиб. Иса, онларын планыны, чох еһтимал ки, Накдимондан - Синедрионун үзвү олан вә она јахшы мүнасибәт ҝөстәрән инсандан - өјрәнәрәк Јерусәлимдән чыхыр вә Иордан чајынын о тајына кечир. Пасха бајрамы јахынлашдығына ҝөрә инсанларын чоху, өлкәнин һәр тәрәфиндән Јерусәлимә ҝедир вә шәһәр Иса барәдә олан сөһбәтләрдән һәрәкәтә ҝәлир. Инсанлар бир-бирләриндән сорушурлар: “Нә фикирләширсиниз? О, бајрама ҝәлмәјәҹәкми?” Баш каһинләр вә фәрисејләр, Исанын һарада олдуғуну ҝөрән һәр бир шәхсин бу барәдә онлара мә’лумат вермәсини әмр едәрәк, даһа чох чахнашма јарадырлар (Јәһја 11:47—57).
2. Мәрјәмин һансы һәрәкәти мүбаһисә јарадыр вә Исанын ону мүдафиә едән ҹавабы, “өз саатынын” јахын олдуғуну билмәси илә әлагәдар нәји ҝөстәрир?
2 Пасхадан алты ҝүн әввәл, нисанын сәккизиндә, Иса Јерусәлимин әтрафына гајыдыр. О, Јерусәлимдән тәхминән үч километр аралыда јерләшән, севимли достлары Мартанын, Мәрјәмин вә Лазарын јашадыглары Бејтанја кәндинә ҝәлир. Инди ҹүмә ҝүнүнүн ахшамыдыр вә Иса, шәнбә ҝүнүнү орада кечирир. Нөвбәти ахшам Мәрјәм баһалы һиндсүнбүлү јағындан Исанын башына, ајагларына сүртәрәк, она гуллуг ҝөстәрир, бу исә шаҝирдләрин е’тиразына сәбәб олур. Иса ҹаваб верир: “Гадындан әл чәк! Буну мәним дәфним үчүн сахлајыб. Чүнки јохсуллар һәмишә сизин јаныныздадыр, Мән исә һәмишә сизин јанынызда дејиләм” (Јәһја 12:1—8; Матта 26:6—13). Иса “бу дүнјадан Атанын јанына көчәҹәји саатын ҝәлдијини” билир (Јәһја 13:1). О, беш ҝүндән сонра “бир чохлары үчүн ҹаныны фидијә олараг” верәҹәк (Марк 10:45). Бу вахтдан е’тибарән, Исанын етдији вә өјрәтдији һәр ишдә тә’хирәсалынмазлыг һисси әкс олунур. Бу әшјалар системинин сонуну һәвәслә ҝөзләјән бизләр үчүн бу неҹә дә ҝөзәл нүмунәдир! Ҝөрәк нөвбәти ҝүн о ҝүнләрин әһәмијјәтини анладығыны Иса неҹә ҝөстәрир.
Исанын зәфәрлә Јерусәлимә ҝәлдији ҝүн
3. а) Иса базар ҝүнү, 9 нисанда, Јерусәлимә неҹә дахил олур вә онун әтрафындакы инсанларын әксәријјәти буна неҹә мүнасибәт ҝөстәрир? б) Иса, издиһамдан шикајәтләнән фәрисејләрә нә ҹаваб верир?
3 Базар ҝүнү, нисанын 9-да, Иса зәфәрлә Јерусәлимә дахил олур. Зәкәријјә 9:9 ајәси јеринә јетсин дејә, сыпанын белиндә шәһәрә јахынлашаркән онун әтрафына топлашан инсанларын әксәријјәти палтарларыны, диҝәрләри исә ағаҹдан кәсдикләри будаглары јола сәрирләр. Онлар уҹадан “Рәббин ады илә ҝәлән Падшаһа һәмд олсун!” дејирләр. Издиһам ичиндә олан фәрисејләр Исанын шаҝирдләрини сусдурмасыны истәјирләр. Лакин Иса ҹаваб верир: “Сизә дејирәм ки, әҝәр онлар суссалар, дашлар дилә ҝәләр” (Лука 19:38—40, И— 93; Матта 21:6—9).
4. Иса Јерусәлимә ҝирәркән шәһәр нәјә ҝөрә һәрәкәтә ҝәлир?
4 Орада јығыланларын чоху ҹәми бир нечә һәфтә әввәл Исанын Лазары неҹә дирилтдијини ҝөрмүшдүләр. Инди онлар һәмин мө’ҹүзә һаггында башгаларына сөјләјирләр. Буна ҝөрә дә, Иса Јерусәлимә ҝирәркән бүтүн шәһәр һәрәкәтә ҝәлир. “Бу Кимдир?” - дејә инсанлар сорушур. Һәр јердән ҹаваб ешидилир: “Бу, Галилејанын Назарет шәһәриндән олан Иса Пејғәмбәрдир”. Бу һадисәни ҝөрән фәрисејләр ҝилејләниб дејирләр: “Дүнја Онун ардынҹа ҝетди” (Матта 21:10, 11; Јәһја 12:17—19).
5. Иса мә’бәдә ҝәлдикдә нә баш верир?
5 Бөјүк Мүәллим, Иса, Јерусәлимә ҝәлдикдә өз адәти үзрә, тә’лим вермәк үчүн мә’бәдә ҝедир. Орада корлар вә топаллар онун јанына ҝәлир вә Иса онлара шәфа верир. Баш каһинләр вә дин алимләри буну ҝөрдүкдә, һәмчинин оғлан ушагларынын мә’бәддә, уҹадан - “Давуд Оғлуна һосанна!” дедикләрини ешитдикдә, һиддәтләнирләр. Онлар е’тираз едиб дејирләр: “Бунларын нә сөјләдијини ешидирсәнми?” Иса ҹаваб верир: “Бәли: “Кичик ушагларын вә әмзикли оланларын ағзындан камил һәмд алдын” - сөзүнү һеч охумамысынызмы?” Иса, тә’лиминә давам едәрәк, мә’бәддә баш верән һадисәләрә диггәтлә тамаша едир (Матта 21:15, 16; Марк 11:11).
6. Исанын давранышы неҹә дәјишди вә нәјә ҝөрә?
6 Исанын индики давранышы, јарым ил әввәл олан давранышындан тамамилә фәргләнир! О вахт Иса Јерусәлимә, Чадыр бајрамына “ачыг јох, ҝизлиҹә имиш кими” (КМ) ҝетмишди (Јәһја 7:10). Һәр дәфә дә һәјаты тәһлүкә алтында оланда онлардан узаглашмаг үчүн еһтијатлы давранырды. Инди исә, тутулмасы әмр едилмиш шәһәрә ачыг-ашкар ҝәлир! Бундан әлавә исә, Мәсиһ олдуғуну ачыгҹа билдирмәк Исанын адәти дејилди (Јешаја 42:2; Марк 1:40—44). О, өз әтрафында һај-күј олмасыны вә ја өзү барәдә тәһриф олунмуш мә’луматларын ағыздан-ағыза јајылмасыны истәмир. Лакин инди халг Исаны ачыгҹа Падшаһ вә Хиласкар, јә’ни Мәсиһ е’лан едир, онун өзү исә, шаҝирдләринин сусмасыны истәјән дин рәһбәрләринин истәкләрини рәдд едир! Бу дәјишиклик нә илә изаһ олунур? Иса, ертәси ҝүн “Инсан Оғлунун иззәтләнмәк вахты ҝәлди” дејәркән бунун сәбәбини билдирди (Јәһја 12:23).
Ҹәсарәтли давраныш вә һәјаты хилас едән тә’лимләр
7, 8. Исанын, ерамызын 33-ҹү илинин 10 нисанындакы давранышы, 30-ҹу илин Пасха бајрамында етдикләрини нә илә хатырладыр?
7 Иса, нисанын 10 — да, сәһәр мә’бәдә ҝәләрәк, өтән ҝүн орада ҝөрүдүкләри илә әлагәдар һәрәкәтә башлады. О, “мә’бәддәки сатыҹылары вә алыҹылары говмаға башлады, сәррафларын масаларыны вә ҝөјәрчин сатанларын күрсүләрини чевирди. Вә гојмурду ки, јүк дашыјан кимсә мә’бәд әразисиндән кечсин”. Тагсыркарлары мүһакимә едәрәк деди: “Мәним евимә бүтүн халглар үчүн дуа еви дејиләҹәк,- јазылмајыбмы? Амма сиз ону гулдур јувасына дөндәрмисиниз!” (Марк 11:15—17).
8 Исанын бу давранышы, үч ил габаг, б. е. 30-ҹу илиндә Пасха бајрамына мә’бәдә ҝәлдији заман етдији иши хатырладыр. Амма бу дәфә Иса тагсыркарлары даһа кәскин шәкилдә иттиһам едир. Инди о, мә’бәддә алвер едәнләри “гулдурлар” адландырыр (Лука 19:45, 46; Јәһја 2:13—16). Бу доғрудан да беләдир, чүнки онлар гурбан ҝәтирмәк үчүн һејван алмалы олан инсанлардан һәддиндән артыг јүксәк гијмәт тәләб едирдиләр. Баш каһинләр, дин алимләри вә халгын рәисләри Исанын етдији иши ешидир вә јенидән ону өлдүрмәјә ҹәһд ҝөстәрирләр. Анҹаг буну неҹә едәҹәкләрини билмирләр, чүнки Исанын тә’лиминә валеһ олан халг һәмишә онун јанындадыр (Марк 11:18; Лука 19:47, 48).
9. Иса һансы дәрси верир вә мә’бәддә ону динләјәнләри нәјә дә’вәт едир?
9 Иса мә’бәддәки тә’лиминә давам едәрәк, билдирир: “Инсан Оғлунун иззәтләнмәк вахты ҝәлди”. Бәли, о, инсан олараг ҹәми бир нечә ҝүн өмрү галдығыны билир. Буғда тохумунун сәмәрә вермәси үчүн тохумун өлмәли олдуғу кими, башгаларынын да әбәдијјән јашамаларына имкан јаранмасы үчүн өзүнүн өлмәси ҝәрәк олдуғуну сөјләјәрәк, Иса динләјиҹиләрини дә’вәт едир: “Ким Мәнә хидмәт едәҹәксә, ардымҹа ҝәлсин; Мән һарада олурамса, хидмәткарым да орада олаҹагдыр; ким Мәнә хидмәт едәрсә, Ата она һөрмәт едәҹәкдир” (Јәһја 12:23—26).
10. Гаршыдакы ишҝәнҹәли өлүм Исада һансы һиссләри ојадыр?
10 Ҹәми дөрд ҝүндән сонра мә’руз галаҹағы ишҝәнҹәли өлүм барәдә дүшүнәрәк, Иса сөзүнә давам едир: “Инди ҹаным чох сыхылыр; вә нә дејим? Еј Ата, Мәни бу саатдан гуртармы дејим?” Лакин Исаны ҝөзләјән агибәт гачылмаздыр. О дејир: “Елә бу саат үчүн ҝәлдим”. Бәли, Иса, Аллаһын нијјәтиндә тутдуғу һәр шејлә разыдыр. О, гурбан тимсалындакы өлүмүнә гәдәр Аллаһын ирадәсинә табе олмаға там гәрарлыдыр (Јәһја 12:27). Аллаһын ирадәсинә бүтүнлүклә табе олмаг мәсәләсиндә Иса бизә неҹә дә ҝөзәл нүмунә вериб!
11. Ҝөјләрдән сәс ешидән издиһама Иса нә өјрәдир?
11 Өлүмүнүн, Атасынын адына неҹә тә’сир едәҹәјиндән дәрин нараһатчылыг һисси кечирәрәк, Иса дуа едир: “Еј Ата, адыны иззәтләндир!” Ҝөјләрдән, мә’бәдә јығылан издиһамы һејрәтә салан сәс ешидилир: “Һәм иззәтләндирдим, һәм дә иззәтләндирәҹәјәм”. Бөјүк Мүәллим бу фүрсәтдән истифадә едиб, јығылан издиһама, сәсин нә үчүн ешидилдијини, өз өлүмүнүн нәјә сәбәб олаҹағыны вә онларын иман ҝөстәрмәләринин нәјә ҝөрә лазым ҝәлдијини сөјләјир (Јәһја 12:28—36). Ахырынҹы ики ҝүн әрзиндә Иса, шүбһәсиз ки, чох иш ҝөрүр. Анҹаг һәлледиҹи ҝүн һәлә габагдадыр.
Ифша етмәк ҝүнү
12. Чәршәнбә ҝүнү, нисанын 11-дә, дин рәһбәрләри Исаны һијлә илә тутмаға неҹә ҹәһд ҝөстәрирләр вә бу нәјә сәбәб олур?
12 Нисанын 11-дә, чәршәнбә ахшамы, Иса тә’лим вермәк үчүн јенә мә’бәдә ҝедир. Ону гәрәзли динләјиҹиләр ҝөзләјир. Исанын өтән ҝүндә етдији ишләри нәзәрдә тутараг, баш каһинләр вә халгын ағсаггаллары сорушурлар: “Бу ишләри нә сәлаһијјәтлә едирсән? Вә Сәнә бу сәлаһијјәти ким верди?” Баҹарыглы Мүәллим өз ҹавабы илә онлары чашдырыр вә сонра - икиси үзүм бағы, бири исә тој зијафәти һаггында - үч тә’сирли мәсәл сөјләјәрәк дүшмәнләринин пис нијјәтли олдугларыны үзә чыхардыр. Ешитдикләриндән һиддәтләнән дин рәһбәрләри, Исаны тутмаг истәјирләр. Амма онлар, Исаны пејғәмбәр һесаб едән халгдан горхурлар. Буна ҝөрә дә, тутулмасына сәбәб олаҹаг бир сөз дедиртмәк мәгсәдилә Исаны данышдырырлар. Исанын вердији ҹаваблар онлары сусдурур (Матта 21:23—22:46).
13. Иса дин алимләри вә фәрисејләрлә әлагәдар өз динләјиҹиләринә һансы мәсләһәти верир?
13 Дин алимләри вә фәрисејләр Аллаһын Ганунуну өјрәтдикләрини иддиа етдикләри үчүн, Иса өз динләјиҹиләрини тәшвиг едир: “Сизә әмр етдикләри һәр шејә риајәт вә әмәл един; лакин онларын әмәлләринә ҝөрә етмәјин, чүнки сөјләрләр, амма әмәл етмәзләр” (Матта 23:1—3). Иса халг гаршысында онларын пислијини ифша етди. Лакин Исанын онлар барәдә сөјләдикләри бунунла гуртармыр. Бу, онун мә’бәддә кечирдији сон ҝүнүдүр вә о, иттиһамлары ҹәсарәтлә бир-биринин ардынҹа сөјләјир.
14, 15. Иса дин алимләрини вә фәрисејләри неҹә ифша едир?
14 Иса алты дәфә: “Вај һалыныза, гануншүнаслар вә фәрисејләр, икиүзлүләр!” дејир. Исанын онлары икиүзлү адландырмасынын сәбәби одур ки, онлар “Ҝөјләрин Падшаһлығыны инсанларын үзүнә” гапајыр вә ораја ҝирмәк истәјәнләрә имкан вермирләр. Бу икиүзлүләр дәнизи вә гуруну долашырлар ки, һеч олмаса бир адамы јәһуди дининә ҝәтирсинләр, амма һәмин адам нәтиҹәдә әбәди мәһвә лајиг олур. Онлар, ондалығы өдәмәјә даһа чох фикир верәрәк “ганунун даһа ваҹиб ишләрини, әдаләти, мәрһәмәти вә иманы” инкар едирләр. “Финҹанын вә чанағын чөлүнү” тәмизләјирләр, лакин “онларын ичи сојғунчулуг вә тамаһкарлыгла долудур”, јә’ни онларын дахилләриндә олан “мурдарлыг” вә “чүрүклүк” хариҹи ҝөрүнүшдән диндар ҝөрүнмәләри сајәсиндә ҝизләдилир. Бундан башга, дин алимләри вә фәрисејләр, диггәти өзләринин хејријјәчиликләринә јөнәлтмәјә чалышараг, пејғәмбәрләрә мәгбәрәләр тикмәјә вә онлары бәзәмәјә һазырдырлар, һалбуки, онларын өзләри “пејғәмбәрләри өлдүрәнләрин оғуллары”дырлар (Матта 23:13—15, 23—31, И—93).
15 Дүшмәнләрини руһани дәјәрләринин олмадығына ҝөрә тәнбеһ едәрәк, Иса дејир: “Кор рәһбәрләр! Вај һалыныза!”. Онлар, ибадәт јеринин руһани дәјәриндән чох мә’бәдин гызылына әһәмијјәт вердикләри үчүн, мә’нәви ҹәһәтдән кордурлар. Сонра Иса ҝүҹлү сөзләрлә онлары ифша едир. О дејир: “Еј иланлар, ҝүрзәләр нәсли! Ҹәһәннәм мәһкумијјәтиндән неҹә гачаҹагсыныз?” Бәли, Исанын сөзләринә ҝөрә, натәмиз јол илә ҝетдикләри үчүн онлары әбәди мәһв ҝөзләјир (Матта 23:16—22, 33). Падшаһлыг һаггындакы мүждәни е’лан едәркән, бунун үчүн јалан дини ифша етмәк лазым ҝәлсә белә, ҝәлин биз дә ҹәсарәтли олаг.
16. Зејтун дағында отураркән, Иса шаҝирдләринә һансы ваҹиб пејғәмбәрлији сөјләјир?
16 Иса мә’бәди тәрк едир. Ахшама јахын, һава сәринләшән заман, өз һәвариләри илә бирликдә Зејтун дағына галхыр. Дағда отураркән, Иса, мә’бәдин дағыдылмасына даир пејғәмбәрлик сөјләјир, һәмчинин өзүнүн иштиракыны вә әшјалар системинин сонуну ҝөстәрән әламәтләри тәсвир едир. Бу пејғәмбәрлик сөзләри бизим зәманәмизә дә аиддир. Һәмин ҝүн ахшам Иса әлавә олараг шаҝирдләринә дејир: “Ики ҝүн сонра пасха бајрамы башлајаҹағыны билирсиниз. Вә Инсан Оғлу чармыха чәкилмәк үчүн әлә вериләҹәкдир” (Матта 24:1—14; 26:1, 2).
Иса “онлары сона гәдәр севди”
17. а) Пасха заманы, 14 нисанда, Иса оникиләрә һансы дәрси верир? б) Јәһуда Искарјоту ҝөндәрдикдән сонра, Иса һансы бајрамы тә’јин едир?
17 Нөвбәти ики ҝүндә - 12 вә 13 нисанда, Иса мә’бәддә ҝөрүнмүр. Дин хадимләри ону өлдүрмәјә чалышырлар, Иса исә һәвариләри илә бирликдә Пасханы кечирмәсинә һеч нәјин мане олмасыны истәмир. Чәршәнбә ҝүнү Ҝүнәшин батмасы илә 14 нисан - Исанын инсан кими јер үзүндә јашадығы сон ҝүн - башлајыр. Һәмән ахшам Иса вә һәвариләри, Јерусәлимдә Пасха бајрамыны гејд етмәк үчүн һәр шеј һазырланмыш бир евә топлашырлар. Пасха заманы Иса оникиләрин ајагларыны јумагла, онлара тәвазөкарлыға аид ҝөзәл дәрс верир. Өз Устадыны 30 ҝүмүшә - Мусанын ганунуна әсасән бир гул гијмәтинә - сатмаға разылашан Јәһуда Искарјоту ҝөндәрдикдән сонра, Иса өз өлүмүнүн хатирә Ахшамыны тә’јин едир (Чыхыш 21:32; Матта 26:14, 15, 26—29; Јәһја 13:2—30).
18. Иса 11 садиг һәварисинә мәһәббәтлә даһа нәји өјрәдир вә өзүнүн јахынлашан ҝедишинә онлары неҹә һазырлајыр?
18 Хатирә Ахшамы тә’јин едилдикдән сонра, һәвариләр арасында кимин ән бөјүк олдуғу барәдә гызғын мүбаһисә јараныр. Иса исә, онлары данламаг әвәзинә, башгаларына хидмәт етмәјин нә гәдәр ваҹиб олдуғуну сәбирлә өјрәдир. Һәвариләринин сынагларда онунла бәрабәр олдугларыны хатырлајараг, Иса падшаһлыг үчүн онларла әһд бағлајыр (Лука 22:24—30). О һәмчинин, онлары севдији кими, онларын да бир-бирләрини севмәсини бујурур (Јәһја 13:34). Отагдан чыхмаға тәләсмәјәрәк, Иса онлары мәһәббәтлә, јахынлашмагда олан ҝедишинә һазырлајыр. Онларла достлуғуну тәсдиг едир, иман ҝөстәрмәләри үчүн тәшвиг едир вә мүгәддәс руһун онлара көмәк едәҹәјини вә’д едир (Јәһја 14:1—17; 15:15). Отагдан чыхмаздан габаг, Иса Атасына јалварыр: “Еј Ата, саат ҝәлди; Өз Оғлуну иззәтләндир ки, Оғлун да Сәни иззәтләндирсин”. Доғрудан да, Иса һәвариләрини ајрылыға һазырлады вә шүбһәсиз олараг, “онлары сона гәдәр севди” (Јәһја 13:1; 17:1).
19. Иса Ҝетсамани бағында нә үчүн әзаб чәкир?
19 Јәгин ки, артыг ҝеҹә јарыдан өтүб вә Иса 11 садиг һәвариси илә Ҝетсамани бағына ҝәлир. О, һәвариләри илә бураја тез-тез ҝәлирди (Јәһја 18:1, 2). Ҹәмиси бир нечә саатдан сонра, Иса, санки нифрәтә лајиг бир ҹинајәткар кими өләҹәкдир. Гаршыдакы һадисәни ҝөзләмәк вә бунун Атасынын адына рүсвајчылыг ҝәтирә биләҹәјини анламаг Исаја о дәрәҹәдә әзаб верир ки, дуа етдији вахт онун тәри ган дамҹылары һалында торпаға төкүлүр (Лука 22:41—44). Иса һәвариләринә дејир: “Саат ҝәлди... Будур, Мәни әлә верән јахынлашды!” Һәлә Иса данышаркән, Јәһуда Искарјот вә онунла бәрабәр әлләриндә мә’шәл вә чыраг олан силаһлы издиһам ҝәлир. Онлар Исаны һәбс етмәјә ҝәлирләр. О, мүгавимәт ҝөстәрмәдән, изаһ едир: “Бунларын олмасы ҝәрәкдир дејән Јазылар онда бәс неҹә доғру чыхарды?” (Марк 14:41—43; Матта 26:48—54).
Инсан Оғлу иззәтләнир!
20. а) Һәбс олундугдан сонра, Иса һансы ишҝәнҹәләрә мә’руз галыр? б) Өлмәздән бир нечә ан габаг Иса нә үчүн уҹадан “тамам олду” дејир?
20 Һәбс олундугдан сонра, Иса јаланчы шаһидләр тәрәфиндән иттиһам едилир, тәрәфҝир һакимләр тәрәфиндән тагсыркар тутулур, Понти Пилат ону мәһкум едир, каһинләр вә халг тәрәфиндән лаға гојулур, сонра исә әсҝәрләр тәрәфиндән истеһза едилир вә ишҝәнҹәјә мә’руз галыр (Марк 14:53—65; 15:1, 15; Јәһја 19:1—3). Ҹүмә ҝүнү ҝүнорта чағы Исаны дирәк үзәринә мисмарлајырлар, әлләри вә ајагларында мисмарларын ачдығы јара бәдәнин ағырлығындан парчаландыгда, Иса шиддәтли ағрылар һисс едир (Јәһја 19:17, 18). Ҝүндүз, тәхминән саат үч радәләриндә Иса уҹадан “тамам олду” дејир. Бәли, јер үзүндә јеринә јетирмәк үчүн ҝәлдији һәр шеји тамамлады. Иса, руһуну Аллаһа тапшырараг, башыны јана әјир вә вәфат едир (Јәһја 19:28, 30; Матта 27:45, 46; Лука 23:46). Үч ҝүн кечдикдән сонра Јегова Оғлуну дирилдир (Марк 16:1—6). Дирилдикдән гырх ҝүн сонра Иса ҝөјләрә галхыр вә иззәтләндирилир (Јәһја 17:5; Һәвариләрин ишләри 1:3, 9—12; Филипилиләрә 2:8—11).
21. Биз Исаны неҹә тәглид едә биләрик?
21 Биз Исанын “изләри илә” неҹә ҝедә биләрик? (1 Петер 2:21). Онун кими, ҝәлин биз дә Падшаһлыг һаггындакы мүждәни тәблиғ етмәкдә вә шаҝирдләр һазырламагда гүввәмизи әсирҝәмәјәк. Ҝәлин Аллаһын Кәламыны ҹәсарәтлә данышаг (Матта 24:14; 28:19, 20; Һәвариләрин ишләри 4:29—31; Филипилиләрә 1:14). Ҝәлин һансы зәманәдә јашадығымызы һеч вахт унутмајаг вә бир-биримизи мәһәббәтә вә хејирли ишләрә тәшвиг етмәкдән ваз кечмәјәк (Марк 13:28—33; Ибраниләрә 10:24, 25). Гој бизим давраныш тәрзимиз бүтүнлүклә Јегова Аллаһын ирадәсилә вә “сонун вахты”нда јашадығымызы анламагла мүәјјән едилсин (Даниел 12:4).
Сиз неҹә ҹаваб верәрдиниз?
• Өлүмүнүн јахын олдуғуну билмәси, Исанын Јерусәлим мә’бәдиндә етдији сон хидмәтинә неҹә тә’сир етди?
• Нәдән ҝөрүнүр ки, Иса өзүнүнкүләри “сона гәдәр севди”?
• Һәјатынын сон саатларында баш верән һадисәләр Иса һагда нәји ҝөстәрир?
• Хидмәтимиздә Исаны неҹә тәглид едә биләрик?
[12-ҹи сәһифәдәки шәкил]
Иса “онлары сона гәдәр севди”