Руһа ујан дүшүнҹәјә малик олун вә јашајын!
“Руһа ујан дүшүнҹә... һәјатдыр” (РОМАЛЫЛАРА 8:6).
1, 2. Мүгәддәс Китабда “ҹисмани тәбиәт” вә “руһ” неҹә бир-биринә гаршы гојулур?
ҸИСМАНИ тәбиәтин арзуларына јол вермәји үстүн тутан позғун бир ҹәмијјәтдә јашајараг, Аллаһын ҝөзүндә әхлаги ҹәһәтдән ләкәсиз галмаг бир о гәдәр дә асан дејил. Лакин Мүгәддәс Јазыларда “ҹисмани тәбиәт” вә “руһ” бир-биринә гаршы гојулур. Орада ҝүнаһлы ҹисмани тәбиәтин арзуларынын једәјиндә јеримәјин дәһшәтли нәтиҹәләри илә Аллаһын мүгәддәс руһуна итаәткарлығын хејир-дуаланмыш сәмәрәләри арасында олан фәрг ајдын ҝөстәрилир.
2 Мисал үчүн, Иса Мәсиһ белә демишди: “Һәјат верән руһдур; ҹисмани тәбиәт һеч бир шејә јарамаз; сизә сөјләмиш олдуғум сөзләр руһдур вә һәјатдыр” (Јәһја 6:63). Һәвари Павел исә Галатијадакы мәсиһчиләрә јазырды: “Ҹисмани тәбиәт Руһа зидд вә Руһ ҹисмани тәбиәтә зидд оланы арзу едир; онлар бир-биринә гаршы дурурлар” (Галатијалылара 5:17). Павел һәмчинин деди: “Өз ҹисмани тәбиәти үчүн әкән, о тәбиәтдән өлүм бичәҹәкдир; Руһ үчүн әкән исә, Руһдан әбәди һәјат бичәҹәкдир” (Галатијалылара 6:8).
3. Пис арзу вә мејлләрдән азад олмаг үчүн ваҹиб олан нәдир?
3 Јегованын мүгәддәс руһунун — фәал гүввәсинин көмәклији сајәсиндә натәмиз “ҹисмани еһтираслардан” вә ҝүнаһлы бәдәнин зәрәрли һөкмранлығындан мүвәффәгијјәтлә азад ола биләрик (1 Петер 2:11). Пис мејлләрин көләлијиндән азад олмаг үчүн, Аллаһын руһунун көмәјинә малик олмаг сон дәрәҹәдә ваҹибдир, чүнки Павел нөвбәти сөзләри јазмышды: “Ҹисмани тәбиәтә ујан дүшүнҹә — өлүм, Руһа ујан дүшүнҹә исә — һәјат вә сүлһдүр” (Ромалылара 8:6). Руһани дүшүнҹәјә малик олмаг нә демәкдир?
“Руһа ујан дүшүнҹә”
4. “Руһа ујан дүшүнҹә” ифадәси нә мә’на дашыјыр?
4 “Руһа ујан дүшүнҹә”ләр һаггында јазаркән, Павел “дүшүнҹә тәрзи... мәгсәд, ҝүҹлү истәк, сә’ј ҝөстәрмәк” мә’насыны дашыјан јунан сөзү истифадә етмишдир. Бу сөзлә бағлы олан фе’л “дүшүнмәк, мүәјјән дүшүнҹә тәрзинә малик олмаг” мә’насыны дашыјыр. Јә’ни руһа ујан дүшүнҹәјә малик олмаг, Јегованын фәал гүввәсинә табе олуб, онун тәрәфиндән һәрәкәтә ҝәтирилмәк мә’насыны верир. Бу ҝөстәрир ки, биз өз дүшүнҹәмизи, вәрдишләримизи вә мәгсәдләримизи көнүллү сурәтдә бүтүнлүклә Аллаһын мүгәддәс руһунун тә’сиринә табе етдиририк.
5. Өзүмүзү мүгәддәс руһун тә’сиринә нә дәрәҹәдә табе етдирмәлијик?
5 Мүгәддәс руһун тә’сиринә нә дәрәҹәдә табе олаҹағымызы, Павел “руһун... гул”лары олмаг барәдә сөз етмәклә вурғулајыр (Ромалылара 7:6). Мәсиһчиләр, Исанын фидијә гурбанлығына олан иманларына әсасән, ҝүнаһын һөкмранлығындан азад олдулар вә беләликлә ҝүнаһ үчүн “өлдү”ләр, јә’ни онун гулу олмаға сон гојдулар (Ромалылара 6:2, 11). Мәҹази мә’нада өлү олан бу инсанлар һәгиги мә’нада јашајырлар вә “салеһлијин гул”лары олараг Мәсиһин ардынҹа ҝетмәкдә азаддырлар (Ромалылара 6:18—20).
Бөјүк дәјишиклик
6. “Салеһлијин гул”лары олан инсанлар һансы дәјишиклији һисс едирләр?
6 “Ҝүнаһын гуллары” олмаға сон гојараг, “салеһлијин гул”лары кими Аллаһа хидмәт етмәјә башладыглары заман, мәсиһчиләр бөјүк дәјишиклик һисс едирләр. Бу дәјишиклији һисс едән инсанлар һаггында Павел јазырды: “Тәмизләндиниз, тәгдис олундунуз вә Рәббимиз Иса Мәсиһин ады илә, Аллаһымызын Руһу илә бәраәт газандыныз” (Ромалылара 6:17, 18; 1 Коринфлиләрә 6:11).
7. Һәр шејә Јегованын ҝөзү илә бахмаг нә үчүн ваҹибдир?
7 Белә тәәҹҹүб доғураҹаг тәрздә дәјишилмәк үчүн, илк нөвбәдә һәр бир шејә Јегованын неҹә мүнасибәт ҝөстәрдијини өјрәнмәк лазымдыр. Чох әсрләр бундан әввәл мәзмурчу Давуд, сәмими гәлбдән Аллаһа јалварырды: “Ја РӘБ, јолларыны мәнә билдир... Мәнә һәгигәтиндә јол ҝөстәр вә мәнә өјрәт” (Мәзмур 25:4, 5). Јегова Давуду динләди. О, бизим дөврдә дә хидмәтчиләринин бу ҹүр дуаларына ҹаваб вермәјә һазырдыр. Аллаһын јоллары вә һәгигәти пак вә мүгәддәс олдуғу үчүн, биздә натәмиз ҹисмани тәбиәтин арзуларынын једәјиндә ҝетмәјә мејл јаранан заман, онларын үзәриндә дүшүнмәк бизә көмәк едәҹәкдир.
Аллаһын Кәламынын ваҹиб ролу
8. Мүгәддәс Китабы өјрәнмәк нә үчүн сон дәрәҹәдә ваҹибдир?
8 Аллаһын Кәламы олан Мүгәддәс Китаб, Онун мүгәддәс руһунун тә’сири алтында јазылыб. Буна ҝөрә дә мүгәддәс руһун бизә тә’сир етмәсинә јол вермәк үчүн, башга ишләрлә јанашы, имкан дахилиндә Мүгәддәс Китабы һәр ҝүн охумаг вә өјрәнмәк сон дәрәҹәдә ваҹибдир (1 Коринфлиләрә 2:10, 11; Ефеслиләрә 5:18). Әҝәр зеһнимизи вә үрәјимизи Мүгәддәс Китабын һәгигәтләри илә долдурур вә онун принсипләрини мәнимсәјириксә, о заман руһанилијимизә едилән һүҹумлара гаршы дурмаг асан олаҹагдыр. Бәли, әхлагсыз ширникдирмәләр јаранан заман Аллаһын руһу, Мүгәддәс Китаб “шәһадәтләрини [“хатырлатмаларыны”, ЈД]” вә принсипләрини јаддашымызда ҹанландыраҹаг. Бу исә Онун ирадәсинә ујғун давранмаг гәтијјәтимизи мөһкәмләндирәҹәкдир (Мәзмур 119:1, 2, 99; Јәһја 14:26). Бунун сајәсиндә исә биз јалана ујмајаҹаг вә пис јола ајаг басмајаҹағыг (2 Коринфлиләрә 11:3).
9. Мүгәддәс Китабы өјрәнмәк, Јегова илә олан мүнасибәтимизи горумаг гәтијјәтимизи неҹә мөһкәмләндирир?
9 Мүгәддәс Китабы она әсасланан нәшрләрин көмәклији илә үрәкдән вә чалышганлыгла өјрәнәрәк, Аллаһын руһунун ағлымыза вә үрәјимизә тә’сир етмәсинә имкан веририк, бу исә Јегованын нормаларына олан һөрмәтимизи артырыр. Аллаһла олан мүнасибәтимиз бизим үчүн һәјатда ән ваҹиб јери тутмаға башлајыр. Ҝүнаһ ишләтмәк һәвәси јарананда исә биз онун ҝәтирәҹәји зөвг барәдә дүшүнмәјәҹәјик. Әксинә, бизи илк нөвбәдә Јегованын гаршысында нөгсансызлығымызы неҹә горујаҹағымыз нараһат едәҹәкдир. Әҝәр биз Онунла олан мүнасибәтимизи јүксәк дәрәҹәдә гијмәтләндиририксә, бу мүнасибәти позаҹаг вә ја тамамилә мәһв едәҹәк һәр һансы һәвәсә гаршы мүбаризә апармаға тәшвиг олунаҹағыг.
“Шәриәтини нә гәдәр севирәм!”
10. Руһа ујан дүшүнҹәјә малик олараг, Аллаһын ганунуна итаәткарлыг ҝөстәрмәк нәјә ҝөрә ваҹибдир?
10 Руһа ујан дүшүнҹәјә малик олмаг үчүн, Аллаһын Кәламыны садәҹә олараг билмәк кифајәт дејил. Сүлејман падшаһ Јегованын нормаларыны јахшы баша дүшүрдү, лакин јенә дә һәјатынын сонуна јахын онлардан үз дөндәрди (1 Краллар 4:29, 30; 11:1—6). Әҝәр руһани әһвал-руһијјәјә маликиксә, онда биз нәинки Мүгәддәс Китабын дедикләрини билмәјин, һәмчинин Аллаһын ганунларына сәмими гәлбдән итаәт етмәјин ваҹиблијини дә баша дүшәҹәјик. Бунун үчүн Јегованын нормаларыны виҹданла өјрәнмәк вә онлара сә’јлә риајәт етмәјә чалышмаг лазымдыр. Мәзмурчу мәһз бу ҹүр әһвал-руһијјәјә малик иди. О охујурду: “Шәриәтини нә гәдәр севирәм! Бүтүн ҝүн дүшүнҹәм одур” (Мәзмур 119:97). Әҝәр биз һәгигәтән дә, Аллаһын ганунуна риајәт етмәк истәјириксә, онда Она мәгбул хүсусијјәтләри тәзаһүр етдирмәјә тәшвиг олунарыг (Ефеслиләрә 5:1, 2). Биз, дүзҝүн олмајан арзуларын аҹиз гурбанлары дејилик — биз руһун сәмәрәләрини тәзаһүр етдиририк, Јеговаја мәгбул олмаг арзусу исә бизи “ҹисмани тәбиәтин” пис әмәлләриндән горујур (Галатијалылара 5:16, 19—23; Мәзмур 15:1, 2).
11. Јегованын, ҹинси әхлагсызлығы гадаған едән ганунунун бизим үчүн һансы тәрздә мүдафиә кими хидмәт етдијини изаһ един.
11 Јегованын ганунларына дәрин мәһәббәт вә һөрмәти неҹә инкишаф етдирмәк олар? Буну етмәјин үсулларындан бири, онларын дәјәри үзәриндә дәриндән дүшүнмәкдир. Мисал үчүн, ҹинси әлагәни никаһла мәһдудлашдыран, ҹинси әхлагсызлығы вә зина етмәји гадаған едән гануну ҝөтүрәк (Ибраниләрә 13:4). Бу гануна табе олмагла биз нә исә итиририкми? Севән сәмави Атамыз бизи фајдалы бир шејдән мәһрум едәҹәк ганун верәрми? Әлбәттә, јох! Јегованын әхлаг нормаларына риајәт етмәјән бир чох инсанларын һәјатларында нә баш верир? Арзу едилмәз һамиләликләр чох вахт аборта, јахуд еркән вә хошбәхт олмајан никаһа ҝәтириб чыхарыр. Чохлары ушагларыны тәнһа бөјүтмәјә мәҹбурдурлар. Бундан әлавә, ҹинси әхлагсызлыгла мәшғул оланлар үчүн ҹинси јолла јолухан хәстәликләрә тутулмаг тәһлүкәси вар (1 Коринфлиләрә 6:18). Әҝәр ҹинси әхлагсызлыға Јегованын хидмәтчиси јол верәрсә, бу она емосионал зәрбә вураҹагдыр. Виҹдан әзабыны боғмаға чалышараг, о, ҝеҹәләр јатмаја вә үрәк ағрылары кечирә биләр (Мәзмур 32:3, 4; 51:3). Јегованын, ҹинси әхлагсызлығы гадаған едән ганунунун бизим үчүн мүдафиә кими хидмәт етмәси ајдын дејилми? Бәли, мә’нәви тәмизлији горумаг— бөјүк сәадәтдир!
Јеговадан көмәк диләјин
12, 13. Ҝүнаһлы арзулар бизи тә’гиб едән заман дуа етмәк нә үчүн мүнасибдир?
12 Руһа ујан дүшүнҹәјә малик олмаг үчүн, сөзсүз ки, үрәкдән дуа етмәк лазымдыр. Аллаһын руһунун көмәјини диләмәк тамамилә мүнасибдир, чүнки Иса демишди: “Мадәм ки, сиз... өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!” (Лука 11:13). Зәифлијимизлә апардығымыз мүбаризәдә руһун бизим үчүн нә дәрәҹәдә ваҹиб олдуғуну дуаларымызда сөјләјә биләрик (Ромалылара 8:26, 27). Әҝәр ҝүнаһлы истәкләримизин вә пис мејлләримизин тә’сири алтына дүшдүјүмүзү дәрк едириксә, јахуд һәмиманлымыз диггәтимизи гајғыкешликлә буна јөнәлдирсә, дуаларымызда бу проблем һаггында конкрет олараг сөјләмәк вә бу мејлләрин өһдәсиндән ҝәлмәкдә Аллаһдан көмәк диләмәк дүзҝүн оларды.
13 Јегова, диггәтимизи әдаләтли, пак, јахшы, тә’рифә лајиг шејләрә ҹәмләшдирмәкдә көмәк едәҹәкдир. “Аллаһын... сүлһү”нүн үрәјимизи вә зеһнимизи горумасыны Ондан диләмәк неҹә дә дүзҝүндүр! (Филипилиләрә 4:6—8). Ҝәлин, Аллаһдан “салеһлик, Аллаһ јолуна бағлылыг, иман, мәһәббәт, тәһәммүл, һәлимлик јолуну излә”мәкдә бизә көмәк етмәсини хаһиш едәк! (1 Тимотејә 6:11—14). Сәмави Атамызын көмәклији сајәсиндә, тәһлүкәләр вә ширникдириҹи тә’сирләр нәзарәт алтындан чыхаҹаг дәрәҹәдә ҝүҹлү олмајаҹагдыр. Әксинә, бизи һәјатда Аллаһын бәхш етдији раһатлыг мүшајиәт едәҹәкдир.
Руһу кәдәрләндирмәјин
14. Һансы мә’нада Аллаһын руһу бизи паклыға ҹан атмаға тәшвиг едир?
14 Јеткин мәсиһчиләр, Павелин “руһу сөндүрмәјин” мәсләһәтини өзләринә тәтбиг едирләр (1 Салониклиләрә 5:19). Аллаһын руһу — “гүдсијјәт руһу” олдуғу үчүн, һәр ҹәһәтдән пакдыр вә мүгәддәсдир (Ромалылара 1:4). Буна ҝөрә дә һәмин руһ бизә тә’сир етмәјә башладығы заман, мүгәддәслијә, јә’ни паклыға ҹан атмаға тәшвиг едир. О бизә, Аллаһа итаәткарлыгла фәргләнән тәмиз һәјат сүрмәкдә көмәк едир (1 Петер 1:2). Һәр һансы натәмиз һәрәкәт Аллаһын руһуна гаршы е’тинасызлыг демәкдир, бу исә фаҹиәви нәтиҹәләрә ҝәтириб чыхара биләр. Неҹә?
15, 16. а) Биз Аллаһын руһуну неҹә кәдәрләндирә биләрик? б) Јегованын руһуну кәдәрләндирмәмәк үчүн нә етмәлијик?
15 Павел јазырды: “Аллаһын Мүгәддәс Руһуну кәдәрләндирмәјин. Хилас ҝүнү үчүн о Руһла мөһүрләндиниз” (Ефеслиләрә 4:30). Јегованын руһу, Мүгәддәс Јазыларда мөһүрлә мүгајисә олунур вә садиг мәсһ едилмиш мәсиһчиләрин ҝөзләдикләри — “ҝөзләнилән шејә зәманәт” адландырылыр. Сөһбәт, онларын ҝөјдә јашајаҹагларындан вә өлмәзлији мирас алаҹагларындан ҝедир (2 Коринфлиләрә 1:22, ЈД; 1 Коринфлиләрә 15:50—57; Вәһј 2:10). Аллаһын руһунун рәһбәрлији сајәсиндә мәсһ едилмишләр вә онларын јер үмиди олан јолдашлары өз сәдагәтләрини горуја вә ҝүнаһлы ишләрдән гачына биләрләр.
16 Һәвари, мәсиһчиләри јалана, оғурлуға, утанылаҹаг давраныша вә саирә ишләрә олан мејлләрә гаршы хәбәрдар етди. Әҝәр өзүмүзә бу ҹүр ишләрә мејл етмәјә изин версәјдик, Аллаһын Кәламынын илһамланмыш өјүдләринә зидд давранмыш олардыг (Ефеслиләрә 4:17—29; 5:1—5). Бунунла биз, Аллаһын руһуну мүәјјән дәрәҹәдә кәдәрләндирмиш олардыг, буну исә сөзсүз ки, истәмирик. Башга сөзләрлә десәк, Јегованын Кәламынын мәсләһәтләринә ҝөстәрилән һәр һансы е’тинасызлыг, биләрәкдән ишләдилән ҝүнаһа вә Онун лүтфүнүн тамамилә итирилмәсинә ҝәтириб чыхаран нөгтеји-нәзәрләрин вә хүсусијјәтләрин инкишафына атылан илк аддым ола биләр (Ибраниләрә 6:4—6). Әҝәр биз һал-һазырда ҝүнаһ ишләтмәсәк дә, ола билсин ки, ҝүнаһа апаран јолда дуруруг. Руһун рәһбәрлијинә зидд давранмаға давам едәрәк, биз ону кәдәрләндиририк. Бундан әлавә биз, мүгәддәс руһун мәнбәји олан Јегованын өзүнә мүгавимәт ҝөстәрир вә Ону кәдәрләндиририк. Аллаһы севән бизләр, буну әсла истәмирик. Ҝәлин, Јегованын руһуну кәдәрләндирмәмәк вә бундан сонра да руһани дәјәрләр һаггында дүшүнәрәк, мүгәддәс адына иззәт ҝәтирмәк үчүн дуада Ондан көмәк диләјәк!
Руһа ујан дүшүнҹәни горујун
17. Гаршымыза һансы руһани мәгәсдләри гоја биләрик вә онлара наил олмаға сә’ј ҝөстәрмәк нә үчүн мүдрикликдир?
17 Руһа ујан дүшүнҹәјә малик олмағын үсулларындан бири — гаршымыза руһани мәгсәдләр гојмаг вә онлара наил олмаг үчүн сә’ј ҝөстәрмәкдир. Тәләбат вә шәраитләримиздән асылы олараг гаршымыза — өјрәнмәјә даһа чох вахт һәср етмәк, онун кејфијјәтини јахшылашдырмаг, тәблиғ фәалијјәтиндә даһа артыг иштирак етмәк кими мәгсәдләр гоја биләрик. Јахуд хүсуси хидмәт нөвләриндән биринә: үмуми пионерлијә, миссионерлијә вә ја Бејт-елдә хидмәт етмәјә сә’ј ҝөстәрә биләрик. Онда бизим зеһнимиз руһани мәнафеләрлә мәшғул олаҹаг вә биз инсан зәифликләринә асанлыгла мүгавимәт ҝөстәрә биләҹәјик. Биз, тамаһкар мәгсәдләрә ҹан атмағын вә Мүгәддәс Китаба зидд, бу әшјалар системиндәки инсанлара исә хас олан арзуларын једәјиндә јеримәјин ширникдириҹи тә’сири алтына дүшмәјәҹәјик. Руһани мәгсәдләрә наил олмаға сә’ј ҝөстәрмәк мүдрикликдир, чүнки Иса тәшвиг едирди: “Јер үзүндә өзүнүзә хәзинәләр јығмајын; орада ҝүвә вә пас онлары мәһв едәр; вә орада оғрулар ҝирәр вә оғурларлар. Лакин өзүнүзә ҝөјдә хәзинәләр јығын ки, орада нә ҝүвә, нә пас мәһв едәр вә нә оғрулар ораја ҝирәрләр, нә дә оғурларлар. Чүнки хәзинәниз һарадаса, үрәјиниз дә орада олаҹагдыр” (Матта 6:19—21).
18. Ахыр ҝүнләрдә руһа ујан дүшүнҹәни горумаг нә үчүн ваҹибдир?
18 Бу “ахыр ҝүнләрдә” руһа ујан дүшүнҹәјә малик олмаг вә дүнјәви арзулары боғмаг — ән мүдрик давраныш тәрзидир (2 Тимотејә 3:1—5). Чүнки “дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:15—17). Әҝәр ҝәнҹ мәсиһчи таммүддәтли хидмәтә ҹан атырса, бу мәгсәд ҝәнҹлијинин чәтин илләриндә вә јеткинлик һәјатынын башланғыҹында онун үчүн мајак олаҹагдыр. Ким исә ону јолдан чыхармаға ҹәһд ҝөстәрәндә, о, Јеговаја хидмәтдә нәјә наил олмаг истәдијини ајдын шәкилдә тәсәввүр едәҹәк. Белә инсан руһани мәгсәдләри мадди мәгсәдләрә вә ја ҝүнаһлы зөвгләрә дәјишмәјин ағылсызлыг, һәтта сәфеһлик олдуғуну дүшүнәҹәкдир. Хатырлајын: руһани әһвал-руһијјәјә малик олан Муса “ҝүнаһ илә мүвәггәти олараг зөвг алмагданса, Аллаһын халгы илә әзаб чәкмәји тәрҹиһ етди” (Ибраниләрә 11:24, 25). Ҝәнҹ олуб-олмадығымыза бахмајараг, әҝәр ҹисмани јох, руһани дәјәрләр барәдә дүшүнүрүксә, онда биз дә бу ҹүр давранаҹағыг.
19. Руһа ујан дүшүнҹәјә малик олмаг бизә нә верәҹәкдир?
19 “Ҹисмани тәбиәтә ујан дүшүнҹә Аллаһа гаршы дүшмәнчилик”, “Руһа ујан дүшүнҹә исә — һәјат вә сүлһдүр” (Ромалылара 8:6, 7). Руһа ујан дүшүнҹәни горумагла гијмәтли сүлһә саһиб олаҹағыг. Үрәјимиз вә зеһнимиз, ҝүнаһлы вәзијјәтимизин тә’сириндән даһа јахшы мүдафиә олунаҹаг. Ҝүнаһ ишләтмәк мејлинә даһа јахшы мүгавимәт ҝөстәрә биләҹәјик. Вә Аллаһ, ҹисмани тәбиәтлә руһ арасында ҝедән фасиләсиз мүбаризәдә бизә көмәк едәҹәкдир.
20. Ҹисмани тәбиәтлә руһ арасындакы мүбаризәдә гәләбә газанмағын мүмкүн олдуғуна неҹә әмин олмаг олар?
20 Руһа ујан дүшүнҹәни горумагла биз һәјатын вә мүгәддәс руһун мәнбәји олан Јегова илә һәјати ваҹиб әлагәни горумуш олуруг (Мәзмур 36:9; 51:11). Шејтан Иблис вә онун гуллары, Јегова Аллаһла мүнасибәтимизи позмаг үчүн әлләриндән ҝәләни едирләр. Онлар бизим зеһнимизә саһиб олмаға чалышырлар, чүнки бунун әввәл-ахыр Аллаһла дүшмәнчилијә вә өлүмә ҝәтириб чыхараҹағыны билирләр. Буна бахмајараг, биз ҹисмани тәбиәтлә руһ арасында баш верән мүбаризәдә гәләбә газана биләрик. Павел өз тәҹрүбәсиндә буна әмин олду. Өз мүбаризәсини тәсвир едәрәк, о сорушур: “Өлүмә апаран бу бәдәндән мәни ким хилас едәҹәк?” Вә сонра хиласын мүмкүн олдуғуну ҝөстәрәрәк, уҹадан дејир: “Рәббимиз Иса Мәсиһ васитәси илә Аллаһа шүкүр едирәм!” (Ромалылара 7:21—25). Әбәди һәјат үмидинә саһиб олараг, инсан зәифликләринин өһдәсиндән ҝәлмәк вә руһа ујан дүшүнҹәјә малик олмаг үчүн, ҝөстәрдији көмәјә ҝөрә, Иса Мәсиһ васитәсилә Аллаһа миннәтдарлығымызы билдирмәјә бизим дә сәбәбимиз вар (Ромалылара 6:23).
Хатырлајырсынызмы?
• Руһа ујан дүшүнҹәләр нәдир?
• Јегованын руһунун бизә тә’сир етмәсинә неҹә изин верә биләрик?
• Ҝүнаһла мүбаризә апараркән Мүгәддәс Китабы өјрәнмәјин, Јегованын ганунуна итаәт етмәјин вә дуа етмәјин нә үчүн ваҹиб олдуғуну изаһ един.
• Һәјата апаран јолда галмаг үчүн руһани мәгсәдләр бизә неҹә көмәк едәҹәкдир?
[14-ҹү сәһифәдәки шәкил]
Мүгәддәс Китабын өјрәнилмәси, руһанилијимизә едилән һүҹумлара давам ҝәтирмәкдә көмәк едир.
[15-ҹи сәһифәдәки шәкил]
Ҝүнаһлы арзуларын өһдәсиндән ҝәлмәк үчүн Јеговадан көмәк диләмәк мүнасибдир.
[16-ҹы сәһифәдәки шәкилләр]
Руһани мәгсәдләр — руһа ујан дүшүнҹәни горумагда бизә көмәк едәҹәкдир.