Мәнфи һиссләрдән неҹә азад олмалы
● Асаф һејфсиләнирди: “Ҝерчәк, үрәјими бош јерә тәмизләмишәм. Вә сучсузлугла әлләрими јумушам; чүнки һәр ҝүн бәлаја уғрадым вә һәр сабаһ ҹәза чәкдим” (Мәзмур 73:13, 14).
● Барук аһ чәкәрәк дејирди: “Вај башыма! Чүнки РӘБ ағрыларыма кәдәр гатды; инилтимдән јорулдум вә раһатлыг тапмырам” (Јеремја 45:3).
● Наоми кәдәр ичиндә инилдәјирди: “Һәр шејә Гадир олан мәнә гаршы чох сәрт давранды. Мән долу олараг ҝетдим вә РӘБ мәни бош олараг ҝери ҝәтирди; мадәм ки РӘБ мәнә гаршы шәһадәт етди вә Гадир үзәримә пислик ҝәтирди, нә үчүн сиз мәнә Наоми дејирсиниз?” (Рут 1:20, 21).
МҮГӘДДӘС КИТАБДА, Јегованын бә’зән үмидсизлик һисси кечирән садиг хидмәтчиләринин чохлу нүмунәләри вардыр. Гејри-камил инсанлар олдуғумуз үчүн, бә’зән биз дә буна бәнзәр һиссләр кечиририк. Ким исә даһа чох чәтинликләр чәкдијинә ҝөрә мә’јуслуға дүшмәјә вә һәтта өзүнә гаршы тәәссүф һисси кечирмәјә даһа чох мејллидир.
Анҹаг бу ҹүр һиссләрдән азад олунмасаг, бу бизим диҝәр инсанларла вә Јегова Аллаһла мүнасибәтимизин позулмасына сәбәб ола биләр. Өзүнә гаршы тәәссүф һисси кечирмәјә мејлли олан мәсиһчи бир гадын е’тираф едир: “Мәни гонаг дә’вәт едәндә әксәр һалларда бојун гачырырам, чүнки өзүмү һәмиманлыларла үнсијјәтдә олмаға лајиг билмирәм”. Бу ҹүр һиссләр инсана неҹә дә сыхыҹы тә’сир едир! Онларын өһдәсиндән ҝәлмәк үчүн нә етмәк олар?
Јеговаја јахынлашын
Асаф 73-ҹү Мәзмурда өзүнүн чашгынлығы һагда ачыгҹа сөјләјир. О, һәјатыны ҝүнаһкарларын гајғысыз һәјаты илә мүгајисә едәрәк, онлара һәсәд апарыр. Онларын аллаһсыз ишләрини, ловғалыгларыны вә гәддарлыгларыны, ејни заманда исә ҹәзасыз галдыгларыны ҝөрүр. Онда Асаф шүбһә илә билдирир: “Тәмиз һәјат сүрмәјә дәјәрми?” (Мәзмур 73:3—9, 13, 14).
Ола билсин ки, Асаф кими сиз дә, писләрин өз ганунсузлуглары илә ловғаланараг неҹә тәрәгги етдикләрини мүшаһидә едирсиниз. Асаф, белә сыхыҹы һиссләрин өһдәсиндән неҹә ҝәлди? О, давам едир: “Буну неҹә анлаја биләрәм дејә дүшүнүнҹә, бу мәним ҝөзләримдә чәтин бир иш иди; Аллаһын мә’бәдинә ҝиринҹәјә гәдәр, онларын сонуну анлајынҹаја гәдәр” (Мәзмур 73:16, 17). Јеговаја дуада мүраҹиәт етмәклә Асаф дүзҝүн давранмыш олду. Һәвари Павелин сонралар сөјләдији сөзләрлә десәк, Асаф өзүндәки “руһани адамы” ојандырараг “руһани олмајан адамы” рәф етди. О, јаранан вәзијјәтә јенидән бахды вә “руһани” анлајышы, Јегованын пислијә нифрәт етдијини вә писләрин өз вахтында ҹәзаларыны чәкәҹәкләрини анламагда она көмәк етди (1 Коринфлиләрә 2:14, 15, И—93).
Мүгәддәс Китабын көмәји илә һәјата реал бахмаг неҹә дә ваҹибдир! Јегова бизә хатырладыр ки, О, пис инсанларын давранышларына лагејд јанашмыр. Мүгәддәс Китабда дејилир: “Алданмајын: Аллаһа истеһза едилмәз. Чүнки инсан нәји әкәрсә, ону да бичәҹәкдир... Јахшылыг едәркән руһдан дүшмәјәк” (Галатијалылара 6:7—9). Јегова писләри “сүрүшкән јерләрә” гојаҹаг вә “учурума атаҹагдыр” (Мәзмур 73:18). Аллаһын әдаләтлилији ахырда һөкмән галиб ҝәләҹәкдир.
Јегованын сүфрәси архасындакы мүнтәзәм руһани гидаланма програмы вә Аллаһын халгы илә фајдалы үнсијјәт иманынызы мөһкәмләндирмәјә, һәмчинин мә’јуслуғун вә диҝәр мәнфи һиссләрин өһдәсиндән ҝәлмәјә сизә көмәк едәҹәкдир (Ибраниләрә 10:25). Асаф кими, Аллаһла јахын мүнасибәтинизи горујун вә Онун сизи неҹә дә мәһәббәтлә һимајә етдијини һисс едәҹәксиниз. Асаф давам едир: “Фәгәт мән даима сәнинлә бәрабәрәм; мәним сағ әлимдән тутдун. Өјүдүнлә мәнә јол ҝөстәрәрсән вә сонра мәни иззәтлә аларсан” (Мәзмур 73:23, 24). Ушаг вахты тәһгирә мә’руз галан бир мәсиһчи гадын бу сөзләрин там мүдриклијини дәрк етди. О сөјләјир: “Јығынҹагда баҹы-гардашларла сых үнсијјәтә башладыгда мәним һәјата олан нөгтеји-нәзәрим дәјишди. Мән тамамилә ајдын тәрздә ҝөрдүм ки, мәсиһчи ағсаггаллары — полис дејил, севән рәһбәрләрдир”. Мәсиһчи јығынҹағындакы ағсаггаллар, һәмиманлыларына онлары дарыхдыран емосија вә һиссләринин өһдәсиндән ҝәлмәкдә көмәк едәрәк ваҹиб рол ојнајырлар (Ишаја 32:1, 2; 1 Салониклиләрә 2:7, 8).
Јегованын мәсләһәтләринә диггәт јетирин
Јеремја пејғәмбәрин катиби Барук, тә’јинаты барәдә олдугҹа нараһат олараг дәрин аһ чәкирди. Лакин Јегова Баруку һәр шејә ајыг бахмаға вадар едәрәк, она шәфгәт ҝөстәрди: “Сән өзүн үчүн бөјүк шејләрми ахтарырсан? Ахтарма; чүнки будур, мән бүтүн бәшәрин үзәринә фәлакәт ҝәтирәҹәјәм, РӘБ дејир; фәгәт ҝедәҹәјин бүтүн јерләрдә ҹаныны сәнә гәнимәт малы олараг верәҹәјәм” (Јеремја 45:2—5).
Јегова Барука ачыгҹа деди ки, онун мә’јуслуғуна шәхси егоистик истәкләри сәбәб олмушдур. Барук, “өзүнә бөјүк шејләр ахтардығына” ҝөрә, Аллаһдан алдығы тә’јинатында севинҹ ҝөрмүрдү. Јәгин сиз дә разысыныз ки, мә’јуслугла мүбаризә апараркән дүзҝүн аддымлар атмаг — диггәтимизи јајындыран шејләрдән гачынмаг вә Аллаһын сүлһүнү һисс етмәјә көмәк едән Аллаһа мәгбул мәмнунлуг һиссини инкишаф етдирмәк лазымдыр (Филипилиләрә 4:6, 7).
Дул галан Наоми, әри вә ики оғлу Моабда өлән заман, сыхынтынын ону әлдән салмасына јол вермәди. Бунунла јанашы Мүгәддәс Китабда хатырланыр ки, о, итки аҹысыны кәскин сурәтдә һисс етмиш, өзүнә вә ики ҝәлининә гаршы тәәссүф һисси кечирмишдир. Онлары ҝери евләринә ҝөндәрәрәк, Наоми ҝилејләнирди: “Сиздән өтрү чох кәдәрләнирәм, чүнки РӘББИН әли мәнә гаршы галхды”. Бејтлеһемә ҝәлдикдә исә о исрар едирди: “Мәнә Наоми демәјин, мәнә Мара дејин; чүнки һәр шејә Гадир олан мәнә гаршы чох аҹы давранды” (Рут 1:13, 20).
Лакин кәдәр ичиндә олан Наоми руһдан дүшмәди, Аллаһдан вә Онун халгындан узаглашмады. О, Моаб дүзәнликләриндә ешитди ки, “Рәбб халгыны зијарәт етди вә чөрәк верди” (Рут 1:6). О, анлады ки, онун үчүн ән јахшысы — Јегованын халгы илә олмагдыр. Беләликлә, Наоми ҝәлини Рутла бирликдә Јәһудејаја гајытды. О, Рута онларын гоһуму Боазла өзүнү неҹә апармалы олдуғуна аид мүдрик мәсләһәтләр верирди.
Бу ҝүн дә, һәјат јолдашыны итирән садиг мәсиһчиләр, топлантынын ишиндә фәал сурәтдә иштирак едәрәк кәдәр вә итки һиссләринин өһдәсиндән мүвәффәгијјәтлә ҝәлирләр. Мүгәддәс Китабы һәр ҝүн охумагла, Наоми кими, онлар да вахт вә гүввәләрини руһани ишләрә сәрф етмәкдә давам едирләр.
Аллаһын мүдриклији хејир-дуа ҝәтирир
Мүгәддәс Китабда тәсвир олунмуш бу һадисәләр, мүдрик давранмаға вә мәнфи һиссләрдән азад олмаға көмәк едир. Асаф көмәји Аллаһын мә’бәдиндә ахтарырды вә Јеговаја үмид бағлајырды. Варух мәсләһәтә диггәт јетирди вә ону јајындыран мәнфәәтпәрәст мејлләринин өһдәсиндән ҝәлди. Наоми, ҝәнҹ гадын олан Руту һәгиги Аллаһа хидмәтдә хүсуси ролу јеринә јетирмәјә һазырлајараг, Аллаһын халгы илә бирликдә Она сә’јлә хидмәт едирди (1 Коринфлиләрә 4:7; Галатијалылара 5:26; 6:4).
Јегованын өз хидмәтчиләринә — истәр ајрылыгда, истәрсә дә бүтүн халгына үмумиликдә газандырдығы гәләбә һагда дәриндән дүшүнәрәк, мә’јуслуғун вә диҝәр мәнфи һиссләрин өһдәсиндән ҝәлмәк мүмкүндүр. Буна ҝөрә, Јегованын сизи хилас едән бөјүк вә мисилсиз мәһәббәти барәдә дүшүнүн. Мәсиһчи гардашлығында һөкмранлыг едән һәгиги мәһәббәтә севинин. Аллаһын ҝәләҹәк јени дүнјасында олаҹаг һәјат һаггында дәриндән дүшүнүн. О заман сиз, Асаф кими, дејә биләрсиниз: “Фәгәт Аллаһа јахынлашмаг мәнә јахшыдыр; сәнин бүтүн ишләрини билдирим дејә, Рәб Јегованы өзүмә сығынаҹаг јер етдим” (Мәзмур 73:28).