Верин вә бундан севинҹ әлдә един!
“Вермәк алмагдан даһа бөјүк бәхтијарлыг ҝәтирир” (ҺӘВАРИЛӘРИН ИШЛӘРИ 20:35).
1. Јегова, бәхш етмәнин севинҹ ҝәтирдијини неҹә ҝөстәрир?
ҺӘГИГӘТИ билмәкдән әлдә едилән севинҹ вә бу билијин ҝәтирдији хејир-дуалар, Аллаһдан ҝәлән бәхшишдир. Јегова һаггында билик әлдә едәнләрин севинмәк үчүн чох сәбәбләри вар. Лакин һәдијјәни алмаг хош олдуғу кими, вермәк дә хошдур. Јегова — “һәр бир јахшы бәхшиш вә һәр камил һәдијјә” Бәхш едән вә һәмчинин “бәхтијар Аллаһдыр” (Јагуб 1:17; 1 Тимотејә 1:11, ЈД). Аллаһ, Ону динләјән һәр кәсә сағлам тә’лимләр тәклиф едир. Валидејнләр, онларын мәһәббәтдән ирәли ҝәлән нәсиһәтләринә өвладлары һај верәндә севиндикләри кими, Јегова да өјрәтдији кәсләрин итаәткарлығына севинир (Сүлејманын мәсәлләри 27:11).
2. а) Иса бәхш етмәк һаггында нә деди? б) Мүгәддәс Китаб һәгигәтини башгаларына өјрәдәрәк, һансы севинҹи әлдә едирик?
2 Иса Мәсиһ јер үзүндә оланда, тә’лимләринә инсанларын мүсбәт һај вермәси она да севинҹ ҝәтирирди. Һәвари Павел Исанын сөзләрини ситат ҝәтирди: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35). Инсанлара Мүгәддәс Китаб һәгигәтини өјрәтмәк бизә бөјүк севинҹ ҝәтирир. Бу исә о демәк дејил ки, онларын садәҹә олараг е’тигадларымызла разылашдығы үчүн мәмнунуг. Чүнки биз, һәгиги вә даими дәјәри олан биликләрлә бөлүшүрүк. Инсанлара руһани бәхшишләр верәрәк, онларын индики вә әбәди сәадәтләринә көмәк едирик (1 Тимотејә 4:8).
Бәхш етмәк севинҹ ҝәтирир
3. а) Һәвари Павел вә Јәһја, башгаларына руһани јардым ҝөстәрмәкдән әлдә етдикләри севинҹи неҹә ифадә етдиләр? б) Нәјә ҝөрә ушаглара Мүгәддәс Китаб һәгигәтини өјрәтмәк мәһәббәт һаггында шәһадәт едир?
3 Бәли, мәсиһчиләр Јегова вә Иса кими руһани бәхшишләр вермәкдән хошбәхтлик дујурлар. Һәвари Павел Аллаһын Кәламынын һәгигәтләрини өјрәнмәкдә башгаларына көмәк етдији үчүн севинирди. О, Салоникдәки јығынҹаға јазырды: “Рәббимиз Иса Мәсиһ гаршысында Онун ҝәлишиндә үмидимиз, севинҹимиз, јахуд ифтихар едәҹәк таҹымыз сиз дејилсинизсә, бәс кимдир? Чүнки сиз бизим иззәтимиз вә севинҹимизсиниз” (1 Салониклиләрә 2:19, 20). Һәвари Јәһја буна бәнзәр сөзләри өз руһани өвладлары һаггында јазды: “Өвладларымын һәгигәтдә јеридијини ешитмәкдән даһа бөјүк севинҹим јохдур” (3 Јәһја 4, И—93). Һәмчинин валидејнләрин, өз өвладларына руһани өвлад олмалары үчүн көмәк едәркән дујдуглары севинҹ һаггында дүшүнүн! Ушагларыны “Рәббин тәрбијә вә нәсиһәти илә бөјүдәрәк”, валидејнләр онлара мәһәббәт тәзаһүр етдирирләр (Ефеслиләрә 6:4). Оғул вә гызларынын әбәди рифаһы илә марагландыгларыны ҝөстәрирләр. Ушаглар валидејнләрин өјрәтдији кими даврананда исә, бу, валидејнләрә севинҹ вә мәмнунлуг ҝәтирир.
4. Руһани бәхш етмәнин севинҹ ҝәтирдијини һансы һадисә ҝөстәрир?
4 Делл адлы гадын таммүддәтли пионер кими хидмәт едир вә беш өвлад бөјүдүр. О дејир: “Һәвари Јәһјанын сөзләри мәнә чох доғмадыр, чүнки дөрд өвладым ”һәгигәтдә јеријир” вә мән буна ҝөрә чох миннәтдарам. Билирәм ки, һәгиги ибадәтин сајәсиндә бирләшән аиләләр Јеговаја иззәт вә шәрәф ҝәтирир. Буна ҝөрә дә, ушагларыма һәгигәти өјрәтмәк ҹәһдләримә Аллаһын хејир-дуа вермәсини ҝөрмәк чох хошдур. Аиләмлә бирликдә ҹәннәтдә сонсуз јашамаг имканымызын олмасы үрәјими үмидлә долдурур, чәтинликләрә вә манеәләрә бахмајараг сарсылмаз галмагда ҝүҹ верир”. Бәдбәхтликдән Деллин гызларындан бири Мүгәддәс Китаба зидд олан һәрәкәтинә ҝөрә јығынҹагдан кәнар едилмишдир. Буна бахмајараг, Делл, мүсбәт әһвал-руһијјәсини баҹардығы гәдәр горумаға чалышыр. О дејир: “Үмид едирәм ки, гызым нә вахтса һәлимлик ҝөстәриб, сәмимиликлә јенидән Јеговаја тәрәф дөнәҹәкдир. Ејни заманда Аллаһа миннәтдарам ки, ушагларымын чоху Она сәдагәтлә хидмәт етмәјә давам едирләр. Дујдуғум севинҹ һиссләри мәнә ҝүҹ верир” (Неһемја 8:10).
Даими достлар газанырыг
5. Вахтымызы вә ҝүҹүмүзү шаҝирдләр һазырламаға һәср едәрәк, нәдән мәмнунлуг дујуруг?
5 Иса давамчыларына, шаҝирдләр һазырламағы вә онлара Јегова вә Онун тәләбләри һаггында билик вермәји тапшырды (Матта 28:19, 20). Неҹә ки, Јегова, еләҹә дә Иса, тәмәннасыз олараг инсанлара һәгигәт јолуну өјрәнмәкдә көмәк едирләр. Буна ҝөрә дә шаҝирдләрин һазырланмасы ишинә вахтымызы вә гүввәмизи һәср едәрәк, мәмнунлуг дујуруг: ахы илк мәсиһчиләр кими, биз дә Јегованы вә Исаны тәглид едирик (1 Коринфлиләрә 11:1). Гадир Аллаһ вә Онун севимли Оғлу илә бу ҹүр әмәкдашлыг едәрәк, һәјатын һәгиги мә’насыны тапырыг. Аллаһын “әмәкдашлары” сырасында олмаг неҹә дә бөјүк хејир-дуадыр (1 Коринфлиләрә 3:9). Мәҝәр мүждәнин тәблиғ едилмәсиндә мәләкләрин иштирак етмәси сизи һејрәтләндирмирми? (Вәһј 14:6, 7).
6. Руһани бәхшишләр вермәк ишиндә иштирак едириксә, кимләрлә дост ола биләрик?
6 Бундан әлавә, башгаларына руһани бәхшишләр вермәк ишиндә иштирак едәрәк, биз Аллаһын јалныз “әмәкдашы” дејил, һәм дә даими досту олуруг. Иманына ҝөрә Ибраһим Јегованын досту адланмышды (Јагуб 2:23). Аллаһын ирадәсини виҹданла һәјата кечирмәјә чалышараг, биз дә Аллаһын досту ола биләрик. Бу заман биз Исанын да досту олуруг. О өз шаҝирдләринә демишди: “Сизә дост дедим, чүнки Атамдан ешитдијим бүтүн шејләри сизә билдирдим” (Јәһја 15:15). Чох инсанлар нүфузлу вә јүксәк вәзифәли шәхсләрлә дост олмагдан хошбәхтлик дујурлар. Бизим исә, Каинатда ики ән бөјүк шәхсијјәтин досту олмаг имканымыз вар!
7. а) Бир баҹы һәгиги рәфигәни неҹә газанды? б) Буна бәнзәр һадисә сизин һәјатынызда да баш верибми?
7 Бундан әлавә, Аллаһла достлуг әлдә етмәләри үчүн көмәк етдијимиз инсанлар бизимлә дә дост олурлар, бу исә хүсуси севинҹ ҝәтирир. Бирләшмиш Штатларда јашајан Ҹоан адлы бир баҹы, Телма адлы гадынла Мүгәддәс Китабы өјрәнмәјә башлады. Телма аиләдә мүгавимәтлә гаршылашды, амма тәслим олмады вә бир илдән сонра вәфтиз олунду. Ҹоан јазыр: “Мүнасибәтимиз бунунла битмәди. Әксинә, достлуғумуз даһа да мөһкәмләнди вә артыг 35 илдән чохдур ки, достлуг едирик. Биз тез-тез бирликдә хидмәт едәр вә конгресләрә ҝедәрдик. Сонра мән, јашадығымыз әразидән 800 километр аралыда јерләшән башга јерә көчдүм. Анҹаг Телма һәлә дә мәнә сәмими вә үрәк исиндирән мәктублар јазыр. Мәни хош хатирәләрлә хатырладығыны сөјләјир, онунла достлуг едиб јахшы нүмунә вердијим вә Мүгәддәс Китаб һәгигәтини өјрәтмиш олдуғум үчүн миннәтдарлығыны билдирир. Јегова һаггында билик әлдә етсин дејә, сәрф етдијим ҹәһдләрә ҝөрә белә бир јахын рәфигә газанмағым чох ҝөзәл мүкафатдыр”.
8. Хидмәтдә бизә һансы мүсбәт әһвал-руһијјә көмәк едәҹәкдир?
8 Чохлары Јегованын Кәламына ја һеч мараг ҝөстәрмир, ја да ки, бу мараг олдугҹа аздыр. Буна бахмајараг, һәгигәти билмәк истәјән инсанлары тапмаг имканы, сарсылмаз галмагда бизә көмәк едәҹәкдир. Белә бир е’тинасызлыг, иманымыз вә сарсылмазлығымыз үчүн сынагдыр. Лакин дүзҝүн әһвал-руһијјә бизә көмәк едәҹәкдир. Гватемаладан олан Фаусто адлы бир киши дејир: “Тәблиғ едәркән дүшүнүрәм: сөһбәт етдијим адам руһани баҹымыз вә ја гардашымыз олсајды неҹә дә јахшы оларды. Мән үмидими итирмирәм ки, гаршылашдығым адамлардан һеч олмазса ким исә нәтиҹәдә Аллаһын Кәламындан олан һәгигәти гәбул едәҹәкдир. Бу фикир мәнә ҝүҹ верир вә бөјүк севинҹ ҝәтирир”.
Ҝөјдә хәзинәләр јығырыг
9. Иса ҝөјдә јығылан хәзинәләр һаггында нә деди вә биз бундан нә өјрәнә биләрик?
9 Неҹә ушагларымыздан, еләҹә дә башга инсанлардан шаҝирдләр һазырламаг һәр вахт асан олмур. Бунун үчүн вахт, сәбир вә сарсылмазлыг тәләб олунур. Лакин чохлары адәтән һеч бир севинҹ ҝәтирмәјән вә мүвәггәти олан мадди сәрвәтләр топламаг үчүн гүввәләрини әсирҝәмирләр. Иса динләјиҹиләринә руһани сәрвәтләрә ҝөрә әмәк сәрф етмәјин даһа јахшы олдуғуну ҝөстәрмәк үчүн белә деди: “Јер үзүндә өзүнүзә хәзинәләр јығмајын; орада ҝүвә вә пас онлары мәһв едәр; вә орада оғрулар ҝирәр вә оғурларлар. Лакин өзүнүзә ҝөјдә хәзинәләр јығын ки, орада нә ҝүвә, нә пас мәһв едәр вә нә оғрулар ораја ҝирәрләр, нә дә оғурларлар” (Матта 6:19, 20). Шаҝирдләр һазырламаг кими ваҹиб ишдә иштирак етмәји дә дахил етмәклә, руһани мәгсәдләр ҝүдәркән мәмнунлуг дујаҹағыг, чүнки Аллаһын ирадәсини јеринә јетиририк вә О, бизи мүкафатландыраҹагдыр. Һәвари Павел јазырды: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10).
10. а) Исада руһани хәзинәләр һарадан иди? б) Иса өзүнү башгалары наминә неҹә фәда етди вә бу онлара һансы бөјүк фајданы ҝәтирди?
10 Әҝәр шаҝирдләр һазырламаг ишиндә иштирак едәрәк сә’јлә чалышырыгса, Исанын сөзләринә мүвафиг олараг өзүмүзә “ҝөјдә хәзинәләр” јығмыш олуруг. Бу, бизә алмагла әлагәдар севинҹ ҝәтирир, чүнки әҝәр биз тәмәннасыз олараг веририксә, нәтиҹәдә өзүмүзү зәнҝинләшдиририк. Иса өзү артыг милјард илләрдир ки, Јеговаја сәдагәтлә хидмәт едир. Онун ҝөјдә нә гәдәр хәзинә јығдығы барәдә дүшүнүн! Буна бахмајараг, Иса јенә дә өз мәнфәәтини ҝүдмүрдү. Һәвари Павел јазырды: “Атамыз Аллаһын ирадәсинә ҝөрә, Мәсиһ ҝүнаһларымыз үчүн Өзүнү фәда етди ки, бизи индики шәр дөврүндән гуртарсын” (Галатијалылара 1:4). Өзүнү тәмәннасыз олараг хидмәтә һәср етмәдән әлавә, Иса һәтта һәјатыны фидијә олараг верди ки, башгаларынын да ҝөјдә хәзинә јығмаг имканы олсун.
11. Нәјә ҝөрә руһани бәхшишләр мадди бәхшишләрдән даһа јахшыдыр?
11 Инсанлара Аллаһ һаггында һәгигәти өјрәдәрәк, јох олмајан руһани хәзинәләри онларын өзләринин неҹә јыға биләҹәкләрини ҝөрмәјә көмәк едирик. Онлара бундан бөјүк һәдијјә вермәк мүмкүндүрмү? Әҝәр достумуза баһалы саат, машын вә ја һәтта ев һәдијјә етмишиксә, еһтимал ки, достумуз миннәтдар вә хошбәхт олаҹагдыр, биз исә бәхш етмәкдән севинҹ дујаҹағыг. Бәс бу һәдијјә 20 илдән сонра һансы вәзијјәтдә олаҹаг? Бәс 200 илдән сонра? Бәс 2 000 илдән сонра? Әҝәр биз вахтымызы вә гүввәмизи инсанларын Јеговаја хидмәт етмәсинә јардым ҝөстәрмәк үчүн сәрф едириксә, бу әбәди фајда ҝәтирәҹәкдир.
Һәгигәти тапмаг истәјәнләри ахтарырыг
12. Башгаларына руһани ҹәһәтдән көмәк етмәк үчүн чохлары вахтларыны вә гүввәләрини неҹә сәрф етмишләр?
12 Руһани бәхшишләр вермәк вә бундан севинҹ әлдә етмәк үчүн, Јегованын халгы јерин уҹларына гәдәр тәблиғ едир. Башга өлкәләрдә миссионер кими хидмәт етмәк үчүн минләрлә инсанлар евләрини вә аиләләрини тәрк етмишләр. Онлар орада јени дил өјрәнмәли вә јени мәдәнијјәтә алышмалы олмушлар. Диҝәрләри исә јашадыглары өлкәнин дахилиндә, Падшаһлығын тәблиғчиләри даһа чох тәләб олунан әразиләрә көчмүшләр. Еләләри дә вардыр ки, онларын вәтәнләринә ҝәлмиш мүһаҹирләрә тәблиғ етмәк үчүн хариҹи дил өјрәнмишләр. Мәсәлән, Нју-Ҹерсидән (АБШ) олан әр-арвад, һал-һазырда Јегованын Шаһидләринин үмумдүнја мәркәзи идарәсиндә хидмәт едән ики өвладыны бөјүтдүкдән сонра, пионер хидмәтинә башламыш вә чин дилини өјрәнмишдир. Үч ил әрзиндә онлар коллеҹин чин дилиндә данышан 74 тәләбәси илә Мүгәддәс Китаб өјрәнмәси кечирмишләр. Шаҝирдләр һазырламаг ишиндә даһа чох севинҹ әлдә етмәк үчүн, сиз дә хидмәтинизи ҝенишләндирә билмәзсинизми?
13. Хидмәтинизин даһа да сәмәрәли олмасыны истәјирсинизсә, нә етмәк лазымдыр?
13 Јәгин ки, сиз киминләсә Мүгәддәс Китаб өјрәнмәсини кечирмәји чох арзулајырсыныз, амма буна наил ола билмирсиниз. Бә’зи өлкәләрдә марагланан инсанлары тапмаг асан дејил. Ола билсин ки, гаршылашдығыныз инсанлар Мүгәддәс Китабла марагланмырлар. Јегованын вә Исанын шаҝирдләр һазырламаг ишинә дәриндән мараг ҝөстәрдикләрини вә онларын сизи һәлим инсанлара тәрәф јөнәлдәҹәкләрини биләрәк, истәјиниз барәдә тез-тез дуа един. Мәсләһәт алмаг үчүн, јығынҹагда даһа чох тәҹрүбәси олан вә ја хидмәти даһа сәмәрәли олан баҹы гардашлара мүраҹиәт един. Мәсиһчи ҝөрүшләриндә алдығымыз тә’лим вә мәсләһәтләри һәјата кечирин. Сәјјаһ нәзарәтчиләрин вә онларын арвадларынын нәсиһәтләринә риајәт един. Ән башлыҹасы — руһдан дүшмәјин. Бир мүдрик инсан белә сөзләр јазмышдыр: “Тохумуну сәһәр сәп вә ахшама гәдәр әлинә раһатлыг вермә; чүнки һансынын, бунун, јохса о бирисинин јахшы олаҹағыны... билмәзсән” (Ваиз 11:6). Бундан әлавә, Нуһ вә Јеремја кими садиг инсанлары хатырлајын. Онларын тәблиғинә олдугҹа аз адам һај версә дә, онларын хидмәтини уғурлу һесаб етмәк олар. Ән ваҹиби исә, бу хидмәт Јегованы севиндирирди.
Ҝүҹүмүз чатан һәр шеји едирик
14. Јегова, Она хидмәт едәрәк гоҹа јашларына чатмыш инсанлара неҹә мүнасибәт бәсләјир?
14 Ола билсин, шәраитиниз истәдијиниз гәдәр хидмәт етмәјә имкан вермир. Мисал үчүн, гоҹалыг, Јеговаја етдијимиз хидмәти мәһдудлашдыра биләр. Лакин мүдрик инсанын дедији сөзләри хатырлајын: “Ағармыш сачлар ҝөзәллик таҹыдыр; салеһлик јолунда тапылыр” (Сүлејманын мәсәлләри 16:31). Јеговаја хидмәтдә кечирилән өмүр, Онун ҝөзүндә ҝөзәлдир. Бундан әлавә, Мүгәддәс Китабда дејилир: “Ихтијарлығыныза гәдәр дә мән ојам вә ағ сачлы олунҹаја гәдәр сизи мән јүкләнәҹәјәм; буну мән етдим вә мән дашыјаҹағам; бәли, мән јүкләнәҹәјәм вә гуртараҹағам” (Ишаја 46:4). Севән сәмави Атамыз вә’д едир ки, өзүнүн һәдсиз сәдагәтли олан хидмәтчиләрини мөһкәмләндирәҹәк вә онлара көмәк едәҹәкдир.
15. Јегованын сизин вәзијјәтинизи баша дүшдүјүнә инанырсынызмы? Нәјә ҝөрә?
15 Ола билсин, сиз һансыса хәстәликдән әзаб чәкир, иманда олмајан һәјат јолдашыныз тәрәфиндән мүгавимәтә мә’руз галыр, аилә вәзифәләринин ағыр јүкүнү дашыјыр вә јахуд башга ҹидди чәтинликләрлә гаршылашырсыныз. Јегова имканларымызын мәһдуд олдуғуну баша дүшүр, вәзијјәтимизи ҝөрүр вә хидмәтдә башгалары биздән артыг етсәләр дә, виҹданла сә’ј ҝөстәрдијимизә ҝөрә бизи севир (Галатијалылара 6:4). Јегова гејри-камил олдуғумузу билир вә биздән һәддиндән артыг тәләб етмир (Мәзмур 147:11). Әҝәр шәраитимиздән асылы олараг әлимиздән ҝәләни едириксә, Аллаһын ҝөзүндә дәјәрли олдуғумуза вә иман уғрунда етдијимиз ишләри унутмајаҹағына әмин ола биләрик (Лука 21:1—4).
16. Һансы мә’нада бүтүн јығынҹаг бир шаҝирдин һазырланмасында иштирак едир?
16 Бундан әлавә, јадда сахлајын ки, шаҝирдләр һазырламаг, коллектив ҝөрүлән ишдир. Бир јағыш дамласы биткини сувара билмәдији кими, бир нәфәрин дә шаҝирд һазырлаја билмәси гејри-мүмкүндүр. Тутаг ки, Шаһидләрдән бири марагланан инсан тапыр вә онунла Мүгәддәс Китабы өјрәнмәјә башлајыр. Һәмин инсан Падшаһлыг Залына ҝәләндә исә, һәгигәтин һарада олдуғуну баша дүшмәкдә она бүтүн јығынҹаг көмәк едир. Мәсиһчи гардашлығынын сәмимилији Аллаһын руһунун тә’сири һаггында шәһадәт едир (1 Коринфлиләрә 14:24, 25). Ушаглар вә јенијетмәләр руһландырыҹы ҹаваблар верирләр вә марагланан адам ҝәнҹләримизин дүнјәвиләрдән фәргләндијини ҝөрүр. Хәстәләр, зәифләр вә јығынҹағын јашлы үзвләри јени ҝәләнләрә сәбир вә сарсылмазлығын нә демәк олдуғуну өјрәдирләр. Јашымыздан вә имканларымызын мәһдудлуғундан асылы олмајараг, биз һамымыз, јени ҝәләнләрин Мүгәддәс Китаб һәгигәтинә олан мәһәббәтләрини артырмаға вә вәфтизә һазырлашмаға көмәк етмәкдә ваҹиб рол ојнајырыг. Хидмәтдә кечирдијимиз һәр саат, һәр тәкрар баш чәкмә, Падшаһлыг Залында марагланан инсанла етдијимиз һәр сөһбәт — бүтүн бунлар ајры-ајрылыгда әһәмијјәтсиз ҝөрүнә биләр, анҹаг бунлар Јегованын һәјата кечирдији бөјүк ишин бир зәррәсидир.
17, 18. а) Шаҝирдләр һазырламаг ишиндә иштирак етмәкдән әлавә, вермәкдән севинҹ әлдә етмәјин даһа һансы үсуллары вар? б) Вермәкдән севинҹ әлдә етдијимиз заман, кими тәглид етмиш олуруг?
17 Шаҝирдләрин һазырланмасы кими ваҹиб ишдә иштирак етмәкдән савајы, биз мәсиһчиләр, сөзсүз ки, вермәјин башга нөвләриндән дә севинҹ әлдә едирик. Мәсәлән, тәмиз ибадәтин јајылмасына вә еһтијаҹ дујанлара јардым етмәк үчүн мадди вәсаит ајырмаг олар (Лука 16:9; 1 Коринфлиләрә 16:1, 2). Гонагпәрвәрлик ҝөстәрмәк үчүн фүрсәт ахтармаг олар (Ромалылара 12:13). “Һамыја, хүсусән иманлылар аиләсинә јахшылыг” етмәјә сә’ј ҝөстәрмәк олар (Галатијалылара 6:10). Мәктуб, телефон зәнҝи, һәдијјә, практики көмәк, руһландырыҹы сөзләр — бүтүн бунлар, вермәк истәјимизин садә, лакин мүһүм тәзаһүрү ола биләр.
18 Вермәклә, сәмави Атамызы тәглид етдијимизи ҝөстәририк. Биз һәмчинин гардашлыг мәһәббәти тәзаһүр етдиририк, бу исә мәсиһчиләрин фәргләндириҹи әламәтидир (Јәһја 13:35). Әҝәр биз бу барәдә унутмуругса, вермәкдән севинҹ әлдә етмәк асан олаҹагдыр.
Изаһ едә биләрсинизми?
• Руһани бәхшиш вермәјә аид Јегова вә Иса Мәсиһ неҹә нүмунә верирләр?
• Даими достлары неҹә газанмаг олар?
• Хидмәтимизин даһа сәмәрәли олмасы үчүн һансы аддымлары атмаг олар?
• Јығынҹағын бүтүн үзвләри вермәкдән неҹә севинҹ әлдә едә биләрләр?
[25-ҹи сәһифәдәки шәкилләр]
Ушаглар валидејнләрин өјрәтдији кими даврандыглары заман, валидејнләр бөјүк севинҹ вә мәмнунлуг дујурлар.
[27-ҹи сәһифәдәки шәкил]
Шаҝирдләр һазырлајараг, әсл достлар газана биләрик.
[28-ҹи сәһифәдәки шәкил]
Јегова гоҹаланлары “дашыјыр”.
[29-ҹу сәһифәдәки шәкилләр]
Вермәјин садә, лакин мүһим үсуллары бизә севинҹ ҝәтирир.