Һәјатдакы ҝәрҝинлији азалтмаға даир практики рәһбәрлик
“Еј бүтүн зәһмәткешләр вә јүкләри ағыр оланлар, мәним јаныма ҝәлин вә мән сизә тәравәт верәрәм” (МАТТА 11:28, ЈД).
1, 2. а) Мүгәддәс Китабда јазылан һансы мә’луматлар, ҝәрҝинлији азалтмаға көмәк едәр? б) Исанын тә’лимләри нә дәрәҹәдә тә’сирли иди?
ЈӘГИН разылашаҹагсыныз ки, өзүнү ҝүҹә салмаг зијандыр, чүнки һәдсиз ҝәрҝинлик әзаблара сәбәб олур. Мүгәддәс Китабын гејд етдији кими, бәшәријјәт ағыр јүк алтында олдуғу үчүн, бир чохлары буҝүнкү ҝәрҝин һәјатдан азад олмағы сәбирсизликлә ҝөзләјирләр (Ромалылара 8:20-22). Бунунла јанашы, Мүгәддәс Китаб әзаблары артыг индидән әһәмијјәтли дәрәҹәдә јүнҝүлләшдирмәјин мүмкүн олдуғуну да ҝөстәрир. Буна, ики мин ил бундан габаг јашамыш ҝәнҹ адамын мәсләһәтинә риајәт етмәклә вә нүмунәсини тәглид етмәклә наил олмаг мүмкүндүр. Һәмин шәхс дүлҝәр иди, амма сәнәтиндән чох инсанлары севирди. О, инсанларын гәлбинә јол тапыр, онларын еһтијаҹларына гајғы ҝөстәрир, зәифләрә көмәк едир вә мә’јуслара тәсәлли верирди. Бундан әлавә, руһән инкишаф етмәкдә дә чохларына көмәк едирди. Бунун сајәсиндә, онлар јүнҝүллүк һисс едирдиләр - буна сиз дә наил ола биләрсиниз (Лука 4:16-21; 19:47, 48; Јәһја 7:46).
2 Һаггында бәһс едилән шәхс - Назаретдән олан Иса - гәдим Ромада, Афинада јахуд Исҝәндәријјәдә бә’зиләринин мәнимсәмәјә ҹәһд етдикләри елми билији рәһбәр тутмурду. Буна бахмајараг, онун тә’лимләри мәшһур иди. Онун тә’лимләринин әсасыны, Аллаһын јер үзүнү мүвәффәгијјәтлә идарә етмәк үчүн истифадә едәҹәји Падшаһлыг һаггындакы мөвзу тәшкил едирди. Иса, һәмчинин әсас һәјати принсипләри - зәманәмиздә һәгигәтән дә ваҹиб олан принсипләри изаһ едирди. Исанын тә’лимләрини өјрәнән вә тәтбиг едән кәсләр, тезликлә әлдә едилән фајдалары, о ҹүмләдән ҝәрҝинлијин азалдығыны һисс едирләр. Мәҝәр бу сизи ҹәлб етмирми?
3. Иса инсанлара һансы ҝөзәл дә’вәтлә мүраҹиәт едирди?
3 “Узун илләр бундан габаг јашамыш бир кәс, мәним һәјатыма әһәмијјәтли тә’сир ҝөстәрә биләрми?”, дејә сиздә шүбһә јарана биләр. Белә исә, ҝәлин Исанын ҝөзәл дә’вәтини динләјәк: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг [“тәравәт”, ЈД] верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр” (Матта 11:28-30). О, нәји нәзәрдә тутурду? Ҝәлин бу сөзләри әтрафлы шәкилдә нәзәрдән кечирәк вә ҝәрҝинлији арадан галдырмагда онларын неҹә көмәк етдијини мүәјјәнләшдирәк.
4. Иса кимләрә мүраҹиәт едирди вә нәјә ҝөрә онун динләјиҹиләри, дин рәһбәрләри тәрәфиндән гаршыларына гојулан тәләбләри јеринә јетирмәјә чәтинлик чәкирдиләр?
4 Иса, Гануну бүтүн гүввәләри илә иҹра етмәјә чалышан, амма Јәһуди дин рәһбәрләринин дини ағыр јүкә чевирдикләринә ҝөрә, “јүкләри ағыр олан” чох адамлара мүраҹиәт едирди (Матта 23:4). Дин рәһбәрләри, һәјатын бүтүн саһәләри үчүн сајсыз-һесабсыз гајда-ганунлар тә’јин етмәјә үстүнлүк верирдиләр. Даима “буну етмә, ону етмә” ифадәсини ешитмәк хошуна ҝәләрми? Бунун әксинә олараг, Исанын дә’вәти инсанлары һәгигәтә, әдаләтә, ону динләмәк сајәсиндә мүмкүн олан ән ҝөзәл һәјата јөнәлдирди. Бәли, һәгиги Аллаһы танымаг үчүн диггәти Иса Мәсиһә јөнәлтмәк лазым иди, чүнки ону таныјан инсанлар, Јеһованын неҹә Аллаһ олдуғуну ҝөрә биләрдиләр вә ҝөрүрләр дә. Иса деди: “Мәни ҝөрән, Атаны ҝөрмүш олур” (Јәһја 14:9).
Һәјатыныз ҝәрҝинлик ичиндәдирми?
5, 6. Исанын ҝүнләриндә вә бизим зәманәдә олан әмәји вә әмәк һаггыны мүгајисә един.
5 Әҝәр иш вә ја аиләдәки вәзијјәт сизи ағыр јүк кими нараһат едирсә, онда бу мәсәлә сизә дә аид ола биләр. Ола билсин ки, үзәринизә ағыр јүк кими дүшән башга чәтин вәзифәләри јеринә јетирмәли олурсунуз. Әҝәр бу беләдирсә, сиз, Исанын растлашдығы вә көмәк етдији сәмими адамлара бәнзәјирсиниз. Мәсәлән, доланмаг үчүн пул газанмаг проблемини нәзәрдән кечирәк. Бу, индики зәманәдә бир чохларына чәтинликлә баша ҝәлир, Исанын ҝүнләриндә дә белә иди.
6 О заман, ишчи, ҝүн әрзиндә 12 саат, һәфтәдә 6 ҝүн зәһмәт чәкир вә бир гајда олараг адәтән ҝүнә 1 динар алырды (Матта 20:2-10). Бу ҹүр әмәк һаггы сизин вә ја достларынызын маашы илә мүгајисәдә чохдур, јохса аз? Кечмишдә верилән мааш илә мүасир дөврүн маашыны мүгајисә етмәк чәтиндир. Буну јохламаг үчүн, кечмишдәки вә индики пулун дәјәрини нәзәрдән кечирмәк олар. Бир алим гејд едир ки, Исанын ҝүнләриндә 4 стәкан буғда унундан һазырланан чөрәк тәхминән бир саатлыг әмәк һаггына бәрабәр иди. Башга алим исә дејир ки, литрин дөрддәбири гәдәр јахшы шәраб үчүн, тәхминән ики саат ишләмәк лазым ҝәлирди. Бу тәфсилатлар ҝөстәрир ки, һәмин дөврдә јашамаг үчүн инсанлар ҝүнүн чох һиссәсини ағыр зәһмәт чәкмәли идиләр. Бизим кими, онларын да раһатлыға вә тәравәтә еһтијаҹлары варды. Әҝәр муздлу фәһләсинизсә, сиздән даһа чох иш тәләб едә биләрләр. Әксәр һалларда әтрафлы дүшүнәрәк гәрар гәбул етмәјә вахт чатмыр. Јәгин ки, сиз дә раһатлығын һәсрәтини чәкирсиниз.
7. Исанын сөзләринә неҹә мүнасибәт ҝөстәрилди?
7 Исанын “бүтүн зәһмәткешләр вә јүкләри ағыр оланлара” етдији дә’вәт, шүбһәсиз ки, бир чох динләјиҹиләр арасында өз әксини тапды (Матта 4:25; Марк 3:7, 8). Исанын “Мән сизә тәравәт верәрәм” — вә’дини дә хатырлајаг. Бу вә’д бу ҝүнә гәдәр гүввәдәдир. Әҝәр “зәһмәткеш” инсаныгса вә јүкү “ағыр” вәзијјәтдәјиксә, һәмин вә’д бизә, о ҹүмләдән, ејни вәзијјәтдә олан әзизләримизә дә аид ола биләр.
8. Ушагларын тәрбијәси, јашын артмасы һәјатын ҝәрҝинлијини неҹә артырыр?
8 Инсанлар башга јүкләр дә дашыјырлар. Мәсәлән, ушагларын тәрбијәси хејли вахт вә гүввә тәләб едир. Ушагларын өзләри дә аз әзијјәт чәкмирләр. Бундан әлавә, психи вә физики хәстәликләрдән мүхтәлиф јашда олан даһа чох инсанлар әзаб чәкирләр. Үмуми ҝөтүрдүкдә, инди инсанларын өмрү узун олса да, тибб саһәсиндәки наилијјәтләрә бахмајараг, гоҹалар хүсуси проблемләрлә тоггушурлар (Ваиз 12:1).
Бојундуруг алтында
9, 10. Кечмиш заманларда бојундуруг нәјә әламәт иди вә нәјә ҝөрә Иса инсанлары, онун бојундуруғуну ҝөтүрмәјә дә’вәт едирди?
9 Јәгин ки, Исанын, Матта 11:28, 29 ајәләриндә дедији “Бојундуруғуму үзәринизә ҝөтүрүн вә Мәндән өјрәнин” сөзләринә диггәт јетирмисиниз. О заманлар садә зәһмәткешә елә ҝәлә биләрди ки, бојундуруг алтында чалышыр. Һәлә гәдим заманларда, көләлији вә ја әсарәти тәсвир етмәк үчүн, мәҹаз кими “бојундуруг” ифадәси истифадә едилирди (Тәквин 27:40; Левилиләр 26:13; Тәснијә 28:48). Исанын гаршысына чыхан, бирҝүнлүк иш үчүн тутулан фәһләләрдән чоху, чијинләриндә ағыр јүк дашыјараг, сөзүн әсл мә’насында бојундуруг алтында чалышырдылар. Дүзәлмәсиндән асылы олараг, бојундуруг бојун вә чијиндә ја раһат дурур, ја да ки, бу һиссәләри сүртүрдү. Бир дүлҝәр кими Иса, еһтимал ки, бојундуруг да дүзәлдирди вә ону “раһат” дүзәлтмәји баҹарырды. Бәдәни даһа аз сүртсүн дејә, ола билсин, Иса бојундуруғун бәдәнә тохунан јеринә дәри вә ја парча тикирди.
10 “Бојундуруғуму үзәринизә ҝөтүрүн” дејәркән, бәлкә дә, Иса өзүнү, ишчинин бојну вә чијни үчүн “раһат” олан, кејфијјәтли бојундуруг тәклиф едән адамла мүгајисә едирди. Буна ҝөрә дә, Иса әлавә етди: “Јүкүм јүнҝүлдүр”. Бу о демәк иди ки, белә бојундуруг алтында ишләмәк хош иди, бу заман әмәк дә көлә әмәјини хатырлатмырды. Бојундуруғуну үзәрләринә ҝөтүрмәјә дә’вәт етмәклә, Иса динләјиҹиләринә, һәмин вахт мөвҹуд олан бүтүн јүкләрдән дәрһал азад олмағы тәклиф етмирди. Амма инсанлар Исанын өјрәтдији кими дүшүнмәклә бөјүк јүнҝүллүк һисс едирдиләр. Һәмчинин һәјат тәрзләриндә вә вәрдиш етдикләри ишләрдә дәјишиклик етмәкдән дә раһатлыг һисси дујурдулар. Бундан әлавә, ајдын вә әсаслы үмид, һәјатларында баш верән ҝәрҝинлији азалдырды.
Тәравәт тапмаг мүмкүндүр
11. Нәјә ҝөрә демәк олар ки, Иса бир бојундуруғу диҝәри илә әвәз етмәји тәклиф етмирди?
11 Диггәт јетирин ки, Иса бир бојундуруғу диҝәри илә әвәз етмәји тәклиф етмирди. Бу ҝүн мәсиһчиләрин јашадығы әразиләрдә һакимијјәтләр һөкмранлыг етдији кими, о заман да өлкәдә Рома рәһбәрлији һөкмранлығыны давам етдирәҹәкди. Романын верҝи өдәмә системи дә арадан ҝөтүрүлмәјәҹәкди. Хәстәликләр вә игтисади чәтинликләр јенә дә галаҹагды. Инсанлар һәмишәки кими, гејри-камиллијин вә ҝүнаһын әзабы алтында олаҹагдылар. Буна бахмајараг, Исанын тә’лиминә риајәт етмәклә, онлар тәравәт тапардылар - бу бизим үчүн дә мүмкүндүр.
12, 13. Исанын сөзләриндән ҝөрүндүјү кими, инсана тәравәт ҝәтирән нәдир вә бә’зиләри онун дә’вәтинә неҹә һај вердиләр?
12 Вахт өтдүкҹә ајдын олду ки, Исанын бојундуруг һаггында сөјләдији нүмунә чох саһәдә шаҝирдләр һазырламаға аиддир. Шүбһә јохдур ки, Иса үчүн ваҹиб шәрт, башгаларыны өјрәтмәк, хүсусилә дә, әсас диггәти Аллаһын Падшаһлығына јөнәлтмәк иди (Матта 4:23). Буна ҝөрә дә, “бојундуруғуму үзәринизә ҝөтүрүн” дедикдә, сөзсүз бу ону ҝөстәрирди ки, Исанын чалышдығы һәмин ишдә иштирак етмәклә онун ардынҹа ҝетмәк лазымдыр. Инҹилдә охујуруг ки, Иса сәмими инсанлары мәшғул олдуглары иши дәјишмәјә тәшвиг едир, буну етмәк исә, бир чохлары үчүн һәјатда бөјүк дәјишиклик демәк иди. Онун Петер, Андреј, Јагуб вә Јәһјаја: “Ардымҹа ҝәлин, Мән сизи инсан тутан балыгчылар едәҹәјәм”, дә’вәтини хатырлајаг (Марк 1:16-20). Иса, һәјатында ән ваҹиб олан ишдән һәмин балыгчыларын да мәмнунлуг дујаҹагларыны вә бу иши онун рәһбәрлији вә көмәји илә иҹра едәҹәкләрини ҝөстәрди.
13 Исаны динләјән јәһудиләрдән бә’зиләри онун сөзләрини анладылар вә ардынҹа ҝетдиләр. Ҝөлүн саһилиндә баш верән вә һаггында Лука 5:1-11 ајәләриндә бәһс едилән һадисәни тәсәввүрүмүзә ҝәтирәк. Дөрд балыгчы бүтүн ҝеҹәни чалышмыш, анҹаг һеч нә тута билмәмишләр. Бирдән онларын торлары балыгла долур! Бу тәсадүфән баш вермир; буну Иса едир. Онлар саһилә нәзәр салдыгда, Исанын тә’лимләрини динләмәк һәсрәтиндә олан издиһамы ҝөрдүләр. Иса Петерә деди: “бу ҝүндән е’тибарән инсанлары тутаҹагсан”. Петер вә диҝәр шаҝирдләр бу дә’вәтә неҹә һај вердиләр? “Гајыглары саһилә чыхарараг, һәр шеји атыб, Онун ардынҹа ҝетдиләр”.
14. а) Бизим дөврүмүздә тәравәт тапмаг неҹә мүмкүндүр? б) Иса һансы тәравәтвериҹи хош хәбәри е’лан едирди?
14 Исанын дә’вәтинә биз дә ејни тәрздә һај верә биләрик. Инсанлара Мүгәддәс Китаб тә’лимләрини өјрәтмәк иши давам едир. Бүтүн дүнјада Јеһованын алты милјона јахын Шаһиди, Исанын “бојундуруғуму үзәринизә ҝөтүрүн” дә’вәтини гәбул едиб, “инсан тутан балыгчылар” олдулар (Матта 4:19). Бу иши бә’зиләри таммүддәтли хидмәтә чевирирләр; диҝәрләри исә баҹардыглары гәдәр иҹра едирләр. Бу ишдә иштирак етмәк һамыја тәравәт ҝәтирир вә онларын һәјатында ҝәрҝинлик азалыр. Ахы онлар хошладыглары иши — башгаларына хош хәбәри, “Падшаһлығын Мүждәсини” данышмагла мәшғулдурлар (Матта 4:23, И-93). Јахшы хәбәрләр, хүсусилә дә бу ҹүр хош хәбәр һаггында данышмаг һәмишә хошдур. Мүгәддәс Китабда, бир чох инсанлары, ҝәрҝинлији аз олан һәјат тәрзи сүрмәјин мүмкүн олдуғуна әмин етмәк үчүн лазым олан әсас мә’лумат вар (2 Тимотејә 3:16, 17).
15. Исанын һәјата даир тә’лимләриндән фајда әлдә етмәк неҹә мүмкүндүр?
15 Аллаһын Падшаһлығы һагда бу јахынларда билик алмаға башлајан инсанлар, неҹә јашамаг барәдә Исанын тә’лимләриндән артыг мүәјјән дәрәҹәдә фајда әлдә едибләр. Чохлары тәсдиг едә биләр ки, Исанын тә’лимләри онлара тәравәт ҝәтирир вә јени һәјата башламаға имкан верир. Матта, Марк вә Јәһја тәрәфиндән јазылан Мүждәләрдә Исанын һәјаты вә хидмәти һаггында бәһс едилән әһвалатларда ифадә олунан бә’зи һәјат принсипләрини нәзәрдән кечирмәклә, сиз дә буна әмин ола биләрсиниз.
Тәравәт тапмағын јолу
16, 17. а) Исанын әсас тә’лимләриндән бә’зиләрини һарада тапмаг олар? б) Исанын тә’лимләринә риајәт едәрәк, тәравәт алмаг үчүн нә лазымдыр?
16 Иса, ерамызын 31-ҹи илинин јазында, буҝүнә гәдәр бүтүн дүнјада мәшһур олан мә’рузә илә чыхыш етди. Һәмин мә’рузәни чох вахт Дағүстү тәблиғ адландырырлар. Бу мә’рузә Маттанын јаздығы Мүждәнин 5-дән 7-дәк фәсилләриндә, еләҹә дә Луканын јаздығы Мүждәнин 6-ҹы фәслиндә јазылыб. Бу тәблиғдә Исанын тә’лимләриндән бир чоху үмумиләшдирилир. Исанын диҝәр тә’лимләрини Инҹилин башга һиссәләриндә тапмаг олар. Онун дедикләринин чоху там ајдынлыгла баша дүшүлсә дә, буну һәјатда тәтбиг етмәк асан олмур. Нәјә ҝөрә һәмин фәсилләри диггәтлә, үзәриндә дүшүнәрәк охумајасыныз? Гој Исанын сөјләдији идејаларын гүввәси сизин дүшүнҹә вә әһвал-руһијјәнизә тә’сир етсин.
17 Сөзсүз ки, Исанын тә’лимләрини мүхтәлиф ҹүр груплашдырмаг олар. Ҝәлин әсас тә’лимләри елә ајыраг ки, үзәриндә дәриндән дүшүнәрәк тәтбиг едә биләк дејә, һәр аја бири дүшсүн. Буну неҹә етмәк олар? Тә’лимләри садәҹә олараг ҝөздән кечирмәк дүзҝүн олмазды. Иса Мәсиһдән: “Әбәди һәјаты мирас алмаг үчүн нә етмәлијәм?” - дејә, сорушан зәнҝин ҝәнҹ рәиси хатырлајаг. Иса, Аллаһын Ганунунун әсас тәләбләрини садалајанда, рәис һәмин тәләбләри артыг јеринә јетирдијини билдирди. Лакин ҝәнҹ рәис, бунун кифајәт етмәдијини баша дүшүрдү. Иса ону, Аллаһын принсипләринә практикада әмәл етмәјә вә онун фәал шаҝирди олмаға дә’вәт етди. Ҝөрүндүјү кими, һәмин адам белә фәдакарлыға һазыр дејилди (Лука 18:18-23). Демәли, бу ҝүн Исанын тә’лимләрини мәнимсәмәк истәјәнләрин һамысы, һәмин тә’лимләрлә јалныз разылашмағын вә онлары практикада тәтбиг едәрәк һәјатдакы ҝәрҝинлији азалтмағын арасында фәргин олдуғуну јадда сахламалыдырлар.
18. Әлавә чәрчивәнин неҹә фајдалы ола биләҹәјини изаһ един.
18 Исанын тә’лимләрини нәзәрдән кечириб, онлара риајәт етмәк үчүн, әлавә чәрчивәдә верилән биринҹи бәндә диггәт јетирин. Һәмин бәнд бизи Матта 5:3-9 кими ајәләринә истигамәтләндирир. Ачығыны десәк, бизләрдән һәр биримиз, бу ајәләрдәки ҝөзәл нәсиһәтләр үзәриндә дәриндән дүшүнмәјә хејли вахт сәрф едә биләрик. Лакин онлары үмуми ҝөтүрдүкдә һансы нәтиҹәјә ҝәлирсиниз, әһвал-руһијјәмиз неҹә олмалыдыр? Әҝәр лүзумсуз ҝәрҝинликдән доғрудан да азад олмаг истәјирсинизсә, сизә нә көмәк едәр? Фикринизин даһа чох руһани ишләрлә мәшғул олмасына јол вермәклә, руһани дәјәрләрә даһа артыг диггәт јетирмәјиниз һансы хејирли сәмәрәләри ҝәтирәҹәкдир? Руһани дәјәрләр барәдә даһа чох дүшүнмәк үчүн, һәјатынызда аз әһәмијјәт вериләси шејләр вармы? Белә давранараг, артыг индидән хошбәхт олаҹагсыныз.
19. Билик вә анлајышынызы неҹә дәринләшдирә биләрсиниз?
19 Инди исә давам едәк. Нәјә ҝөрә бу ајәләри Аллаһын башга бир хидмәтчиси илә, мәсәлән, һәјат јолдашыныз, јахын гоһумунуз вә ја достунузла мүзакирә етмәјәсиниз? (Сүлејманын мәсәлләри 18:24; 20:5). Унутмајаг ки, зәнҝин рәис бу суалы башга бир кәслә - Иса илә мүзакирә етмәк гәрарына ҝәлди. Исанын ҹавабы, она, даһа хошбәхт ҝәләҹәјә вә узунөмүрлү һәјата малик олмаг имканы верди. Бу ајәләри мүзакирә едәҹәјиниз гардаш вә ја баҹы Исанин сәвијјәсиндә олмаса да, онун тә’лимләри һаггында апардығыныз сөһбәт һәм сизә, һәм дә мүсаһибинизә фајда ҝәтирәҹәкдир. Тезликлә бу мөвзуда сөһбәт етмәјә чалышын.
20, 21. Исанын тә’лимләрини һансы програм әсасында мәнимсәмәк олар вә өз наилијјәтләримизи неҹә мүәјјән едә биләрик?
20 Ҝәлин, “Көмәк едән тә’лимләр” адлы әлавә чәрчивәјә бир даһа нәзәр салаг. Бу тә’лимләр елә груплашдырылыб ки, ҝүн әрзиндә ән азы бирини нәзәрдән кечирмәк мүмкүн олсун. Әввәлҹә, ҝәтирилән ајәләрдә Исанын дедикләрини охуја биләрсиниз. Сонра онун сөзләри үзәриндә дәриндән фикирләшин. Һәјатда онлара неҹә риајәт едәҹәјинизи әтрафлы дүшүнүн. Әҝәр онлара артыг әмәл етдијинизи санырсынызса, онда, јухарыдан верилән бу тә’лимә даһа ҝениш өлчүдә неҹә риајәт етмәк барәдә ҝөтүр-гој един. Ҝүн әрзиндә бу тә’лим әсасында давранмаға чалышын. Әҝәр һәр һансы тә’лими анламагда вә ја ону практикада тәтбиг етмәкдә чәтинлик чәкирсинизсә, һәмин тә’лимә әлавә бир ҝүн дә сәрф един. Нөвбәти тә’лимә кечмәк үчүн, әввәлкини мүкәммәл өјрәнмәк мәҹбури дејил. Сәһәри ҝүн башга тә’лими нәзәрдән кечирмәк олар. Һәфтәнин сонунда, Исанын тә’лимләриндән дөрдүнә вә ја бешинә нә дәрәҹәдә јахшы риајәт етдијинизи јохлаја биләрсиниз. Икинҹи һәфтәдә, ҝүнү-ҝүндән нөвбәти тә’лимләрә диггәт јетирин. Әҝәр һансыса тә’лими һәјата кечирмәјә мүвәффәг олмамысынызса, руһдан дүшмәјин. Бу һәр мәсиһчинин башына ҝәлир (2 Тарихләр 6:36; Мәзмур 130:3; Ваиз 7:20; Јагуб 3:8). Үчүнҹү вә дөрдүнҹү һәфтә үчүн тәклиф олунан плана риајәт етмәјә давам един.
21 Еһтимал ки, ај әрзиндә 31 бәндин һәр биринә диггәт јетирә биләҹәксиниз. Һәтта буна мүвәффәг олмасаныз белә, сиз икинҹи ајын әввәлиндә өзүнүзү неҹә һисс едәҹәксиниз? Мәҝәр ҝөстәрдијиниз сә’јә ҝөрә хошбәхтлијиниз бир гәдәр артмајаҹагмы? Ҝәрҝинлијиниз азалмајаҹагмы? Бөјүк дәјишиклик олмаса да, еһтимал ки, ҝәрҝинлик азалаҹаг. Һәр һалда сиз онун өһдәсиндән ҝәлмәји өјрәнәҹәксиниз. Бундан башга, планлашдырмағы өјрәнәҹәксиниз. Унутмајын ки, Исанын тә’лимләриндәки ҝөзәл фикирләрин бир чоху бу сијаһыја дахил олмајыб. Нәјә ҝөрә онлары ахтармаға вә практикада тәтбиг етмәјә сә’ј ҝөстәрмәјәсиниз? (Филипилиләрә 3:16).
22. Исанын тә’лимләринә риајәт етмәклә нәјә наил олмаг мүмкүндүр вә һансы суалы дәриндән арашдырмаг лазымдыр?
22 Ҝөрдүјүмүз кими, Исанын бојундуруғу јүнҝүл олмаса да, чох раһатдыр. Онун тә’лимләрини дашымаг вә шаҝирди олмаг асандыр. Исанын јахын досту олан вә онун тә’лимләринә 60 илдән артыг риајәт едән һәвари Јәһја бу фикирлә разылашараг јазырды: “Чүнки Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир” (1 Јәһја 5:3). Буна биз дә әмин ола биләрик. Исанын тә’лимләринә нә гәдәр чох риајәт едириксә, бир о гәдәр дә ајдын олур ки, бу ҝүн чох инсанларын һәјатыны олдугҹа ҝәрҝин едән амилләр, бизә ејни тәрздә әзаб вермир. Јашамаг хејли асанлашыр (Мәзмур 34:8). Лакин Исанын раһат бојундуруғу илә әлагәдар, даһа бир мәсәләни нәзәрдән кечирмәлијик. Иса һәмчинин, “һәлим вә гәлбдән тәвазөкар”олдуғуну сөјләди. Бу, Исадан тә’лим алмағымызла вә ону тәглид етмәјимизлә неҹә бағлыдыр? Бу һагда нөвбәти мәгаләдә бәһс олунаҹагдыр (Матта 11:29).
Сиз неҹә ҹаваб верәрдиниз?
• Һәјатын ҝәрҝинлијини бир гәдәр азалтмаг үчүн, нәјә ҝөрә Исаја диггәт јетирмәк лазымдыр?
• Бојундуруг нәји тәмсил едирди вә нәјә ҝөрә?
• Иса нә үчүн инсанлары, онун бојундуруғуну ҝөтүрмәјә дә’вәт едирди?
• Руһани тәравәти неҹә тапмаг олар?
[9-ҹу сәһифәдәки јазы]
Јеһованын Шаһидләринин 2002-ҹи ил үчүн иллик ајәси бу олаҹагдыр: “Мәним јаныма ҝәлин вә мән сизә тәравәт верәрәм” (Матта 11:28, ЈД).
[10 вә 11-ҹи сәһифәләрдәки чәрчивә/шәкил]
Көмәк едән тә’лимләр
Маттанын Мүждәси 5-дән 7-јә кими олан фәсилләрдән биз һансы фајданы әлдә едә биләрик? Бу фәсилләрә, Бөјүк Мүәллим олан Исанын, Галилеја дағынын әтәјиндә сөјләдији тә’лимләр дахилдир. Ашағыда ҝәтирилән ајәләри шәхси Мүгәддәс Китабыныздан охујун вә онларла әлагәдар өзүнүзә суаллар верин.
5:3-9 Бу ајәләрә әсасән мәним дүшүнҹә тәрзим неҹә олмалыдыр? Даһа чох хошбәхтлијә наил олмаг үчүн нә едә биләрәм? Руһани тәләбатларыма даһа чох диггәт јетирә биләрәмми?
5:25, 26 Бир чохларына хас олан рәгиблик руһуну әкс етдирмәк әвәзинә, һансы давраныш тәрзи даһа јахшы оларды? (Лука 12:58, 59).
5:27-30 Исанын сөзләри, шәһвани һиссләрлә әлагәдар нәји вурғулајыр? О һиссләрә јол вермәмәклә, хошбәхтлијимә вә гәлб раһатлығыма неҹә көмәк етмиш оларам?
5:38-42 Мүасир ҹәмијјәтдә нормал бир һал кими гијмәтләндирилән кобудлугдан нәјә ҝөрә гачынмалыјам?
5:43-48 Тәмасда олдуғум вә дүшмән һесаб етдијим инсанларла даһа јахшы таныш олсам, нәјә наил ола биләрәм? Бу, ҝәрҝинлијин зәифләмәсинә вә ја арадан галхмасына неҹә тә’сир ҝөстәрә биләр?
6:14, 15 Бә’зән киминсә сәһвини бағышламаға чәтинлик чәкирәмсә, бунун сәбәби һәсәд вә һиддәт ола биләрми? Онларын өһдәсиндән неҹә ҝәлмәк олар?
6:16-18 Дахили ҹәһәтдән неҹә олдуғума диггәт јетирмәк әвәзинә, даһа чох хариҹи ҝөрүнүшүм барәдә дүшүнмәјә мејиллијәмми? Мән нәјә даһа чох фикир вермәлијәм?
6:19-32 Әҝәр һәддиндән артыг пул вә мадди вәсаит һаггында дүшүнүрәмсә, бунун нәтиҹәси нә ола биләр? Бу мәсәләдә дүшүнҹәми таразлашдырмаға мәнә нә көмәк едә биләр?
7:1-5 Башгаларыны мүһакимә вә тәнгид едән, онларда һәмишә сәһв ахтаран кәсләрин әһатәсиндә өзүмү неҹә һисс едирәм? Белә инсанлара бәнзәмәмәк нәјә ҝөрә ваҹибдир?
7:7-11 Дуада тә’кидли олмаг јахшыдыр, бәс һәјатын башга саһәләри һагда нә демәк олар? (Лука 11:5-13).
7:12 Гызыл гануну билмәјимә бахмајараг, башгалары илә мүнасибәтимдә бу гануна һәмишә риајәт едирәмми?
7:24-27 Һәјатымы өзүм идарә етдијим үчүн, баш верә биләҹәк фыртына вә һәјәҹанлара неҹә һазырлаша биләрәм? Нәјә ҝөрә бунлар һаггында индидән дүшүнмәлијәм? (Лука 6:46-49).
Нәзәрдән кечириләси әлавә тә’лимләр.
8:2, 3 Иса чәтин вәзијјәтдә оланлара даима мәрһәмәт ҝөстәрирди, бәс мән буну неҹә едә биләрәм?
9:9-38 Башгаларына мәрһәмәт ҝөстәрмәк һәјатымда һансы јери тутур вә бу кејфијјәти даһа ҝениш тәрздә неҹә әкс етдирә биләрдим?
12:19 Иса һаггында пејғәмбәрликдә дејилдији кими, мүбаһисәдән узаглашмаға чалышыраммы?
12:20, 21 Башгаларыны сөзлә вә ја һәр һансы һәрәкәтимлә “гырмамагла”, нә гәдәр јахшы иш ҝөрмүш олурам?
12:34-37 Сөһбәтләримдә әсас јери нә тутур? Әҝәр портағалы сыхарыгса ондан портағал ширәси алынаҹаг. Бу мисалы нәзәрә алараг, мән нә үчүн дахилимдә вә үрәјимдә оланлар һаггында дүшүнмәлијәм? (Марк 7:20-23).
15:4-6 Исанын сөзләриндән јашлылара гајғы ҝөстәрмәјә даир нә өјрәнирәм?
19:13-15 Мән даһа чох нәјә вахт ајырмалыјам?
20:25-28 Нәјә ҝөрә мәгсәдим, һакиммијјәтә јијәләнмәк олмалы дејил? Бу ҹәһәтдән Исаны неҹә тәглид едә биләрәм?
Марк тәрәфиндән гәләмә алынмыш әлавә фикирләр.
4:24, 25 Башгалары илә давранышым мәним үчүн нә мә’на кәсб едир?
9:50 Данышығымда вә ја һәрәкәтләримдә әдәб гајдаларыны горујурамса, еһтимал ки, бу һансы јахшы сәмәрәләр ҝәтирәҹәк?
Нәһајәт, Лука тәрәфиндән гәләмә алынмыш, нәзәрдән кечириләси бир нечә тә’лим.
8:11, 14 Әҝәр һәјатым бүтүнлүклә гајғылара, вар-дөвләтә вә әјләнҹәләрә табедирсә, бу, үрәјимдә олан Аллаһын Кәламына өз тә’сирини неҹә ҝөстәрә биләр?
9:1-6 Иса хәстәләри сағалтмаг гүввәсинә малик олса да, о, даһа чох нәјә диггәт јетирирди?
9:52-56 Мән тез инҹијирәм? Интигам руһундан гачыныраммы?
9:62 Аллаһын Падшаһлығы һаггында тәблиғ етмәк вәзифәмә неҹә јанашырам?
10:29-37 Башгаларына гаршы јад дејил, јахын олдуғуму неҹә сүбут едә биләрәм?
11:33-36 Һәјатымы садәләшдирмәк үчүн һансы дәјишикликләр етмәк имканым вар?
12:15 Һәјат вә вар-дөвләт бир-бири илә неҹә әлагәлидир?
14:28-30 Әҝәр гәрарларымы дәриндән ҝөтүр-гој етмәк үчүн вахт ајырырамса, нәдән гачынарам вә бу һансы фајданы ҝәтирә биләр?
16:10-12 Һәр шејдә дүзҝүнлүјү горумаг нәјә ҝөрә фајдалыдыр?
[8-ҹи сәһифәдәки шәкилләр]
Исанын бојундуруғуну үзәримизә ҝөтүрәрәк, хиласедиҹи ишдә иштирак етмәк бизә тәравәт ҝәтирир.