Бәдәндәки нештәрин өһдәсиндән ҝәлин

“Лүтфүм сәнә јетәр” (2 КОРИНФЛИЛӘРӘ 12:9).

1, 2. а) Чәтинликләрлә гаршылашан заман нә үчүн тәәҹҹүб етмәли дејилик? б) Сынаглар гаршысында әминлијимизи нәјә ҝөрә горуја биләрик?

“АЛЛАҺ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр” (2 Тимотејә 3:12). Нәјә ҝөрә? Шејтан иддиа едир ки, инсан Аллаһа јалныз өз мәнфәәти наминә хидмәт едир вә һаглы олдуғуну сүбута јетирмәк үчүн о, әлиндән ҝәләни едир. Бир дәфә Иса Мәсиһ садиг һәвариләрини хәбәрдар етди: “Шејтан сизләри тәләб етди ки, буғда кими хәлбирләсин” (Лука 22:31). Иса билирди ки, Аллаһ, Шејтанын бизи мүхтәлиф чәтинликләрлә сынаға чәкмәсинә јол верир. Әлбәттә, бу о демәк дејил ки, гаршылашдығымыз бүтүн чәтинликләрдә билаваситә Шејтан вә онун ҹинләри ҝүнаһкардыр (Ваиз 9:11). Лакин Шејтан бизи зәифләтмәк үчүн һәр ҹүр имкандан истифадә етмәјә ҹан атыр.

² Мүгәддәс Китабда дејиләнләр сајәсиндә, гаршылашдығымыз сынаглара тәәҹҹүб етмирик. Һәр һансы чәтинлик үз версә дә, бу бизим үчүн тәәҹҹүблү вә ҝөзләнилмәз олмалы дејил (1 Петер 4:12). Әслиндә дүнјадакы гардашларымыз да ејни әзаблара мә’руз галырлар (1 Петер 5:9). Бу ҝүн Шејтан Аллаһын һәр бир хидмәтчисинә ҝүҹлү тәзјиг ҝөстәрир. Иблис, јени-јени проблемләрдән әзијјәт чәкдијимизи ҝөрмәкдән ләззәт алыр. Бу мәгсәдлә о, бәдәнимиздәки нештәрләри артырараг вә јахуд ҝүҹләндирәрәк јашадығымыз дүнјадан истифадә едир (2 Коринфлиләрә 12:7). Лакин бу о демәк дејил ки, биз Шејтанын фитнәләринә таб ҝәтирә билмәрик. Јеһова бизә сынаглара таб ҝәтирә билмәмиз үчүн чыхыш јолу тәгдим едәрәк, көмәк едир. Буна ҝөрә дә, нештәрә бәнзәр чәтинликләрә таб ҝәтирмәкдә дә Јеһова бизә көмәк едәҹәкдир (1 Коринфлиләрә 10:13).

Гаршылашдығымыз нештәрин өһдәсиндән неҹә ҝәлмәли?

3. Павел бәдәниндәки нештәри чыхармасыны хаһиш етдикдә, Јеһова она неҹә ҹаваб верди?

³ Һәвари Павел дуа едирди ки, Аллаһ онун бәдәниндән нештәри чыхартсын. “Үч дәфә Рәббә јалвардым ки, ону мәндән узаглашдырсын”. Јеһова Павелин ҹошғун дуасына неҹә ҹаваб верди? “Лүтфүм сәнә јетәр; чүнки Мәним гүдрәтим зәифликдә камилләшир” (2 Коринфлиләрә 12:8, 9). Ҝәлин Јеһованын сөзләри үзәриндә дүшүнәк вә бизә изтираб верән нештәрә бәнзәр чәтинликләрин өһдәсиндән ҝәлмәкдә бу сөзләрин неҹә көмәк етдијини нәзәрдән кечирәк.

4. Јеһова Павелә һансы мә’нада лүтф ҝөстәрди?

⁴ Диггәт јетирин: Аллаһ Павели тәшвиг етди ки, артыг Мәсиһ васитәсилә әлдә етдији лүтфү гијмәтләндирсин. Доғрудан да, Павел бол-бол хејир-дуалара нәсиб олмушду. Вахтилә Иса Мәсиһин давамчыларыны фанатикҹәсинә тә’гиб етмәсинә бахмајараг, Аллаһ Павелә мәһәббәтлә имкан верди ки, Мәсиһин давамчысы олсун (Һәвариләрин ишләри 7:58; 8:3; 9:1-4). Даһа сонра Јеһова Павелә хидмәтдә бир чох мараглы тапшырыглары јеринә јетирмәјә лүтфкарлыгла имкан верди. Бу бизим үчүн јахшы дәрсдир. Һәтта ән ағыр анларда белә, миннәтдар олмағымыз үчүн чохлу хејир-дуалара маликик. Гој һеч бир сынаг Јеһовадан ҝәлән бол-бол лүтфү бизә һеч заман унутдурмасын (Мәзмур 31:19).

5, 6. а) Јеһова “гүдрәтинин зәифликдә камилләшдијини” Павелә неҹә ҝөстәрди? б) Павелин нүмунәси Шејтанын јаланчы олдуғуну неҹә сүбут етди?

⁵ Даһа һансы мә’нада Јеһованын лүтфү бизә јетәр? Аллаһ, гаршылашдығымыз сынаглара таб ҝәтирмәкдә көмәк етмәк үчүн кифајәт гәдәр гүввәјә маликдир (Ефеслиләрә 3:20). Јеһова Павелә ҝөстәрди ки, Онун “гүдрәти зәифликдә камилләшир”. О, буну неҹә етди? Сынагларын өһдәсиндән ҝәлмәк үчүн Аллаһ мәһәббәтлә Павелә ҝүҹ верди. Павелин сарсылмазлығы вә Јеһоваја олан мөһкәм әминлији исә һамыја ҝөстәрди ки, Аллаһын ҝүҹү бу зәиф вә ҝүнаһлы инсанын васитәсилә фәалијјәт ҝөстәрәрәк зәфәр чалыр. Инсанларын јалныз һәјатлары раһат вә асан олан заман Аллаһа хидмәт етдикләрини иддиа едән Шејтана бу неҹә дә тә’сир едирди! Павелин сарсылмазлығы бу бөһтанчынын үзүнә вурулан силлә кими иди.

⁶ Аллаһа гаршы чыхмагда Шејтанын кечмиш мүттәфиги олан, мәсиһчиләри тәкәббүрлә тә’гиб едән вә сә’јли фәрисеј Павелин анадан оландан имтијазлы синифә мәнсуб олдуғуна вә зинәт ичиндә јашадығына шүбһә јох иди. Инди исә “һәвариләрин ән кичији” кими Јеһова вә Мәсиһә хидмәт едирди (1 Коринфлиләрә 15:9). О, биринҹи әср мәсиһчиләринин рәһбәрлик шурасына тәвазөкарлыгла табе олурду. Бәдәниндәки нештәрә бахмајараг, бүтүн чәтинликләрин өһдәсиндән ҝәлирди. Һәјатын чәтинликләри Павелин сә’јини сөндүрмәди, бу исә Шејтанын бөјүк кәдәринә сәбәб олду. О, сәмави дә’вәтини вә Мәсиһин Падшаһлығына бәсләдији үмидини һеч заман унутмурду (2 Тимотејә 2:12; 4:18). Нә гәдәр әзаблы олса да, һеч бир нештәр Павелин хидмәтдәки сә’јини зәифләдә билмәди. Гој бизим дә сә’јимиз һеч заман сөнмәсин! Јеһова, сынаглар заманы дајағымыз олмагла бизи, Шејтанын јаланчы олдуғуну сүбут етмәк шәрәфинә лајиг ҝөрүр (Сүлејманын мәсәлләри 27:11).

Јеһованын гијмәтли көмәји

7, 8. а) Јеһова бу ҝүн өз хидмәтчиләрини неҹә мөһкәмләндирир? б) Нештәрә бәнзәр сынагларын өһдәсиндән ҝәлә билмәјимиз үчүн, Мүгәддәс Китабы ҝүндәлик охујуб өјрәнмәк нәјә ҝөрә ваҹибдир?

⁷ Јеһова, бу ҝүн Исанын садиг давамчыларыны Кәламы, мүгәддәс руһу вә мәсиһчи гардашлығы васитәсилә мөһкәмләндирир. Һәвари Павел кими, биз дә дуада гајғыларымызы Јеһоваја һәвалә едә биләрик (Мәзмур 55:22). Аллаһ гаршылашдығымыз сынаглары арадан галдырмаса да, бизә, һәтта ән ағыр сынагларын белә өһдәсиндән ҝәлә билмәмиз үчүн мүдриклик верир. Јеһова һәмчинин бизә мөһкәмлик - “ән үстүн гүдрәт” верир ки, һәр шејә дөзмәјимизә көмәк етсин (2 Коринфлиләрә 4:7).

⁸ Биз бу ҹүр көмәји неҹә әлдә едирик? Бунун үчүн Аллаһын Кәламыны диггәтлә өјрәнмәлијик, чүнки Онун е’тибарлы тәсәллисини орадан алырыг (Мәзмур 94:19). Мүгәддәс Китабдан, Аллаһын хидмәтчиләринин көмәк үчүн етдикләри сәмими дуалар һаггында охујуруг. Онлара ҹаваб верәркән, Јеһова чох вахт үзәриндә дүшүнүлмәси ҝәрәк олан тәсәлливериҹи сөзләр истифадә едирди. Аллаһын Кәламыны өјрәнмәк бизи мөһкәмләдәҹәк, биз исә, ән үстүн гүдрәтин биздән дејил, Аллаһдан олдуғуну ҝөрәҹәјик. Бәдәнимиздә гүввәт олсун дејә, һәр ҝүн физики ҹәһәтдән гидаландығымыз кими, Аллаһын сөзләри илә дә мүнтәзәм сурәтдә гидаланмалыјыг. Буну едирикми? Әҝәр едириксә, бәдәнимиздә нештәр олан һәр һансы сынаға таб ҝәтирмәкдә “ән үстүн гүдрәтин” бизә көмәк етдијини ҝөрәҹәјик.

9. Мүхтәлиф проблемләрлә гаршылашан кәсләрә ағсаггаллар неҹә көмәк едә биләрләр?

⁹ Аллаһ горхусуна малик олан ағсаггаллар бизим үчүн “јелдән сахланаҹаг бир јер”, јә’ни һәјатын чәтинликләриндән вә сынагларындан мүдафиә кими хидмәт едирләр. Илһамланмыш бу тәсвирә мүвафиг олмаға чалышан ағсаггаллар Јеһоваја тәвазөкарлыгла вә сәмимијјәтлә дуа едирләр ки, сыхынты ичиндә оланлара лазыми сөзләри демәк үчүн онлара “шаҝирдләрин дилини” версин. Ағсаггалларын сөзләри, һәјатын чәтин анларында бизим үчүн хошаҝәлән тәсәлливериҹи јағмур ола биләр. Ағсаггаллар “ҹәсарәтсизләри руһландырараг”, еһтимал ки, бәдәнләриндәки һәр һансы нештәрдән әзијјәт чәкән вә ја мә’јус олан руһани баҹы-гардашларына үрәкдән көмәк едирләр (Ишаја 32:2; 50:4; 1 Салониклиләрә 5:14).

10, 11. Аллаһын хидмәтчиләри ағыр сынаглара таб ҝәтирән кәсләри неҹә руһландыра биләрләр?

¹⁰ Јеһованын бүтүн хидмәтчиләри бирләшмиш мәсиһчи аиләсинин үзвләридир. Бәли, биз “ајры-ајрылыгда... бир-биримизә бағлы үзвүк” вә “бир-биримизи севмәлијик” (Ромалылара 12:5; 1 Јәһја 4:11). Биз буну неҹә јеринә јетиририк? 1 Петер 3:8 ајәсинә әсасән һәмиманлыларымызын дәрдинә шәрик олмагла, онлара гардаш севҝиси вә шәфгәт ҝөстәрмәклә. Бәдәнләриндәки нештәрдән даһа чох әзијјәт чәкәнләрә исә, истәр јашлы, истәрсә дә ҹаван олсун, һәр биримиз хүсусилә диггәтли олмалыјыг. Неҹә?

¹¹ Чәтинликләр ичиндә олан инсанлара гаршы һәссас олмаға чалышмалыјыг. Сојуг, дашүрәкли вә лагејд инсан, онсуз да ағрылы јараны зәдәләјә биләр. Инсанын изтираб чәкдијини билмәјимиз, она дејәҹәјимиз сөзләрдә, һәмчинин онунла давранышымызда еһтијатлы олмаға тәшвиг етмәлидир. Мүсбәт әһвал-руһијјәмиз вә вердијимиз тәсәлли бә’зиләринин бәдәнләриндәки нештәрдән чәкдији гәлб ағрысына раһатлыг верә биләр. Бу ҹүр давранмагла онлара гүввә вә дајаг ола биләрик (Колослулара 4:11).

Таб ҝәтирәнләрин нүмунәси

12-14. а) Хәрчәнҝ хәстәлијинә тутулан бир баҹы нә етди? б) Руһани баҹы-гардашлар она неҹә көмәк едир вә руһландырырдылар?

¹² Ахыр ҝүнләрин сону јахынлашдыгҹа, “ағрыларын” сајы ҝүнү-ҝүндән артмагдадыр (Матта 24:8). Бу минвалла, јер үзүндә јашајан һәр бир инсан, хүсусилә дә Јеһованын ирадәсини јеринә јетирмәјә чалышан садиг хидмәтчиләри сынаглара мә’руз галырлар. Таммүддәтли хидмәт едән бир баҹынын нүмунәсини нәзәрдән кечирәк. Онда хәрчәнҝ хәстәлији ашкар едилдији үчүн, ҹәрраһи әмәлијјат васитәсилә түпүрҹәк вәзләрини вә лимфа дүјүнләрини кәсмәк лазым ҝәлмишдир. Онлар әри илә бирликдә бу хәстәлик барәдә ешидәндә, Аллаһа үрәкдән чохлу дуа етдиләр. Баҹы сөјләјир ки, бир аз кечдикдән сонра онлар үрәкләриндә гејри-ади раһатлыг һисс етдиләр. Баҹы мүалиҹәнин әлавә тә’сириндән әзијјәт чәкән заман хүсусилә чохлу чәтинликләрин өһдәсиндән ҝәлмәли олду.

¹³ Бу баҹы јаранан вәзијјәтин өһдәсиндән ҝәлмәк үчүн, хәстәлији барәдә даһа чох мә’лумат әлдә етмәјә чалышыр вә һәкимләри илә мәсләһәтләширди. “Ҝөзәтчи Гүлләси”, “Ојанын!” журналларында вә Мүгәддәс Китаба әсасланан диҝәр нәшрләрдә бу ҹүр хәстәлијә бахмајараг, руһдан дүшмәјән инсанларын тәрҹүмеји-һалларыны охујурду. Бундан әлавә, чәтин анларында Мүгәддәс Китабдан, Јеһованын өз халгына көмәк етмәјә гадир олдуғуну ҝөстәрән мүвафиг ајәләри, һәмчинин диҝәр фајдалы мә’луматлары охујурду.

¹⁴ Бир мәгаләдә үмидсизлијин өһдәсиндән ҝәлмәк үчүн ашағыдакы ајә ситат ҝәтирилмишди: “Тәнһалығы севән нијјәтинин ардынҹа дүшмүш олар” (Сүлејманын мәсәлләри 18:1, МКШ). Буна ҝөрә дә мәгаләдә “адамлардан гачмајын”a дејә, мәсләһәт олунурду. Баҹы сөјләјир: “Чохлары мәним үчүн дуа етдикләрини сөјләјир; башгалары телефон едирди. Ики ағсаггал даима мәним вәзијјәтимдән хәбәр тутурду. Мән ҝүл вә чохлу мәктублар алырдым. Бә’зи баҹы-гардашлар мәним үчүн, һәтта јемәк дә һазырлајырдылар. Һәмчинин, чохлары проседура үчүн хәстәханаја апармағы тәклиф едирдиләр”.

15-17. а) Бир баҹы бәдбәхт һадисә нәтиҹәсиндә јаранан чәтинликләрин өһдәсиндән неҹә ҝәлирди? б) Јығынҹаг она һансы көмәји ҝөстәрди?

¹⁵ Нју-Мексикада (АБШ) узун мүддәт Јеһоваја хидмәт едән бир баҹы ики дәфә автомобил гәзасына уғрамышдыр. О, бојун вә чијниндән хәсарәт алмышдыр, бу исә 25 ил әзијјәт чәкдији ојнаг илтиһабы хәстәлијини даһа да ҝүҹләндирди. Баҹы сөјләјир: “Башымы дүз тутмаг вә ики килограмдан артыг јүк дашымаг мәнә чох чәтин иди. Лакин Јеһоваја үрәкдән етдијим дуалар мәнә чох көмәк олурду. Һәмчинин, “Ҝөзәтчи Гүлләси” журналындан өјрәндијимиз мәгаләләрин дә бөјүк көмәји дәјирди. Онлардан бириндә Мика 6:8 ајәси ситат ҝәтирилир вә гејд олунурду ки, Аллаһ гаршысында тәвазөкарлыгла јеримәк, имканларынын мәһдудијјәтини дәрк етмәк демәкдир. Бу мәгаләләр, истәдијимдән аз тәблиғ етсәм дә мәһдудијјәтләрими нәзәрә алараг, руһдан дүшмәмәјимә көмәк етди. Ән ваҹиби, Аллаһа тәмиз мәгсәдлә хидмәт етмәкдир”.

¹⁶ Баҹы әлавә едир: “Јығынҹаг ҝөрүшләринә вә тәблиғә ҝетмәјә чалышдығым үчүн ағсаггаллар һәмишә мәни тә’рифләјирдиләр. Јығынҹағын ҝәнҹләри мәни гуҹаглајырдылар. Пионерләр мәнә сәбир едир вә вәзијјәтимлә әлагәдар тез-тез өз планларыны дәјиширдиләр. Һава пис оланда гајғыкешликлә мәни тәкрар башчәкмәләрә вә ја Мүгәддәс Китаб өјрәнмәсинә дә’вәт едирдиләр. Хидмәтдә чанта дашыја билмәдијимә ҝөрә исә, баҹы-гардашлар хидмәт үчүн олан шәхси чанталарында мәним әдәбијјатымы дашыјырдылар”.

¹⁷ Ики баҹынын бәдәнинә нештәр кими санҹылан зәифлијә таб ҝәтирмәкдә јығынҹағын ағсаггаллары вә башга һәмиманлыларын неҹә көмәк етдијинә диггәт јетирин. Онлар баҹыларын руһани, физики вә емосионал ҹәһәтдән хүсуси тәләбатларыны нәзәрә алараг, гајғыкешликлә практики көмәк тәклиф едирдиләр. Бу сизи, чәтинлик чәкән баҹы-гардашлара ејнилә көмәк ҝөстәрмәјә тәшвиг етмирми? Ҝәнҹләр, сиз дә јығынҹагда бәдәнләриндәки нештәрдән изтираб чәкәнләрә көмәк едә биләрсиниз (Сүлејманын мәсәлләри 20:29).

18. “Ҝөзәтчи Гүлләси” вә “Ојанын!” журналларында чап олунан тәрҹүмеји-һаллар бизи неҹә руһландыра биләр?

¹⁸ “Ҝөзәтчи Гүлләси” вә “Ојанын!” журналларында, мүхтәлиф ҹүр сынаглара таб ҝәтирмиш, јахуд һәлә дә таб ҝәтирмәкдә олан бир чох Шаһидләрин тәрҹүмеји-һалы вә һәјатларында баш верән һадисәләр чап олунур. Бу журналлары охудугда ҝөрәҹәксиниз ки, бүтүн дүнјада јашајан баҹы-гардашларымызын чоху игтисади чәтинликләрә таб ҝәтирир, мүхтәлиф бәдбәхтликләр нәтиҹәсиндә јахынларыны итирир, һәмчинин ағыр мүһарибә шәраитләриндә јашајырлар. Кимиси үзүҹү хәстәликдән әзаб чәкир. Чохлары сағлам инсан үчүн асан олан садә ишин өһдәсиндән ҝәлә билмир. Бу ҹүр хәстәликләр, хүсусилә дә әҝәр инсан онун уҹбатындан истәдији гәдәр мәсиһчи фәалијјәтиндә иштирак едә билмирсә, ағыр сынаглара чеврилир. Бу ҹүр инсанлар баҹы-гардашларын, ҝәнҹләрин вә јашлыларын ҝөстәрдији көмәјә неҹә дә дәриндән миннәтдарлыг едирләр!

Сарсылмазлыг хошбәхтлик ҝәтирир

19. Бәдәнинә нештәр кими санҹылан сынаг вә зәифликләрә бахмајараг, Павел нә үчүн севинә билирди?

¹⁹ Павел, Аллаһын она неҹә мөһкәмлик вермәсинә валеһ олурду. О дејирди: “Даһа чох өз зәифликләримлә мәмнунијјәтлә өјүнәҹәјәм ки, Мәсиһин гүдрәти ичимдә сакин олсун. Бу сәбәбдән мән, Мәсиһ уғрунда зәифликләрә, тәһгирләрә, еһтијаҹа, тә’гибләрә вә сыхынтылара таб ҝәтирмәјә разыјам; чүнки мән зәиф олдуғум заман гүввәтлијәм” (2 Коринфлиләрә 12:9, 10). Шәхси тәҹрүбәси әсасында Павел әминликлә дејирди: “Еһтијаҹ дујдуғум үчүн бунлары сөјләмирәм, зира јашадығым шәраитдән мәмнун галмаға алышмышам. Мән јохсуллуг шәраитиндә дә, фираванлыг шәраитиндә дә јашамағы баҹарырам. Һәр шејдә вә һәр шәраитдә тох олуб аҹ галмаг, фираван јашамаг вә еһтијаҹ дујмаг сиррини өјрәнмишәм. Мәни Мөһкәмләндирән васитәсилә һәр шеји етмәјә гадирәм” (Филипилиләрә 4:11-13, И-93).

20, 21. а) Ҝөрүнмәјән үзәриндә дүшүнәрәк нә үчүн севинҹ әлдә едә биләрик? б) Һазырда ҝөрүнмәјән һансы хејир-дуалары јер үзү ҹәннәтдә ҝөрмәк истәјәрдиниз?

²⁰ Бу сәбәбдән, бәдәнимиздәки һәр ҹүр нештәрә таб ҝәтирәрәк севинҹ әлдә едир вә бунунла да башгаларына Јеһованын гүдрәтинин зәифликдә камилләшдијини ҝөстәририк. Павел јазырды: “Биз руһдан дүшмүрүк... дахили варлығымыз ҝүндән-ҝүнә тәзәләнир. Амма мүвәггәти вә јүнҝүл сыхынтыларымыз бизим үчүн ағырлыгда һеч бир шејлә мүгајисә едилмәз дәрәҹәдә бөјүк, әбәди иззәт һасил едир. Чүнки биз... ҝөрүнмәјәнә бахырыг... ҝөрүнмәјән исә әбәдидир” (2 Коринфлиләрә 4:16-18).

²¹ Бу ҝүн Јеһованын хидмәтчиләринин әксәријјәти јер үзү ҹәннәтдә јашамаға вә Аллаһын вә’д етдији хејир-дуалары дадмаға үмид едирләр. Бу ҹүр хејир-дуалар инди бизә ҝөрүнмәз ҝәлә биләр. Өз ҝөзләримизлә бүтүн бу хејир-дуалары ҝөрәҹәјимиз вә онлардан әбәдијјән һәзз алаҹағымыз вахт сүр’әтлә јахынлашыр. Бу ҹүр хејир-дуалардан бири дә одур ки, бир даһа нештәрә бәнзәр проблем долу һәјат олмајаҹаг! Аллаһын Оғлу “иблисин әмәлләрини пуч” едәҹәк вә “өлүм үзәриндә һакимијјәтә малик оланы... тә’сирсиз һала” ҝәтирәҹәкдир (1 Јәһја 3:8; Ибраниләрә 2:14).

22. Биз һансы әминлијә вә гәтијјәтә малик олмалыјыг?

²² Буна ҝөрә дә һәр һансы нештәрин бизә әзаб вермәсинә бахмајараг, ҝәлин руһдан дүшмәјәк вә сарсылмаз галаг. Павел кими биз дә, бизи мөһкәмләндирән Јеһованын сајәсиндә гүввә алырыг. Јер үзү Ҹәннәтдә јашајан заман, бизим үчүн етдији һејрәтләндириҹи ишләринә ҝөрә Аллаһымыз Јеһоваја һәр ҝүн иззәт ҝәтирәҹәјик (Мәзмур 103:2).

[Һашијә]

Сиз неҹә ҹаваб верәрдиниз?

• Иблис бизи нәјә ҝөрә вә неҹә зәифләтмәјә чалышыр?

• Јеһованын “гүдрәти зәифликдә” неҹә камилләшир?

• Мүхтәлиф чәтинликләрдән әзијјәт чәкәнләри ағсаггаллар вә диҝәр һәмиманлылар неҹә руһландырырлар?

[13-ҹү сәһифәдәки шәкил]

Павел үч дәфә Аллаһа јалварды ки, бәдәниндәки нештәри чыхарсын.