Падшаһларын нүмунәсинә риајәт един

“Бу шәриәтин бир нүсхәсини китаба јазаҹаг; вә јанында олаҹаг вә һәјатынын бүтүн ҝүнләриндә ондан охујаҹаг” (ТӘСНИЈӘ 17:18, 19).

1. Мәсиһчи кимә бәнзәмәлидир?

ЈӘГИН ки, өзүнүзү падшаһ вә ја падшаһ арвады кими тәсәввүр етмәк чәтиндир. Садиг мәсиһчиләр вә ја Мүгәддәс Китабы өјрәнәнләрдән ким өзүнү Аллаһ горхусуна малик олан Давуд, Јошија, Һезекиел вә ја Јеһошафат кими падшаһларын јериндә тәсәввүр едә биләр? Лакин биз мүәјјән дәрәҹәдә нәдә исә онлар кими ола биләрик вә олмалыјыг да. Белә исә нәдә вә нәјә ҝөрә?

2, 3. Јеһова инсан падшаһлары илә бағлы нәји габагҹадан ҝөрүрдү вә һәмин падшаһ нә етмәли иди?

² Аллаһ Мусанын ҝүнләриндә исраиллиләрә инсанлардан падшаһ вермәздән чох әввәл, Онун халгында белә бир истәјин ојанаҹағыны габагҹадан ҝөрмүшдү. Буна ҝөрә дә, Аллаһ руһунун васитәсилә Мусаны тәшвиг етди ки, Ганун әһдинә мүвафиг тә’лиматлар дахил етсин. Бу тә’лиматлар падшаһлар үчүн тә’јин едилмишди.

³ Јеһова деди: “Аллаһын Рәббин сәнә вермәкдә олдуғу дијара ҝәлдијин... вә: “Әтрафымда олан бүтүн милләтләр кими үзәримә падшаһ гојаҹағам”, дедијин заман; мүтләг Аллаһын Рәббин сечәҹәји адамы үзәринә падшаһ гојаҹагсан... вә елә олаҹаг ки, падшаһлығынын тахты үзәринә отурдуғу заман... бу шәриәтин бир нүсхәсини китаба јазаҹаг; вә јанында олаҹаг вә һәјатынын бүтүн ҝүнләриндә ондан охујаҹаг, та ки, Аллаһы Рәбдән горхмағы, бу шәриәтин бүтүн сөзләрини вә бу ганунлары иҹра етмәк үзрә онлары тутмағы өјрәнсин” (Тәснијә 17:14-19).

4. Падшаһлар үчүн верилән тә’лиматлар өзүнә нәләри дахил едирди?

⁴ Бәли, Јеһованын өз халгына сечәҹәји падшаһ, бу ҝүн Мүгәддәс Китабда охудугларымызы өзү үчүн көчүрмәли иди. Сонра о бу сурәтләри һәр ҝүн тәкрар-тәкрар охумалы иди. Бу, һафизәни мөһкәмләтмәк үчүн мәшг дејилди, фајдалы өјрәнмә иди. Јеһованын тә’јин етдији падшаһ, үрәјиндә дүзҝүн әһвал-руһијјә инкишаф етдирмәк вә ону горујуб сахламаг үчүн белә өјрәнмә илә виҹданла мәшғул олмалы иди. Һәмчинин о, мүвәффәгијјәтли вә фәрасәтли падшаһ олмаг үчүн дә, илһам алмыш бу јазылары өјрәнмәли иди (2 Краллар 22:8-13; Сүлејманын мәсәлләри 1:1-4).

Падшаһлар кими өјрәнин

5. Давудун Мүгәддәс Китабын һансы һиссәләринин үзүнү көчүрүб, охумаг имканы варды вә бу онда һансы һиссләри ојадырды?

⁵ Неҹә дүшүнүрсүнүз, Давуд Исраилин падшаһы олан заман ондан нә тәләб олунурду? О, Төвратын (Тәквин, Чыхыш, Левилиләр, Сајлар, Тәснијә) үзүнү көчүрмәли иди. Давудун Гануну шәхсән охујуб, өз әлләри илә көчүрмәсинин онун һафизәсинә вә үрәјинә неҹә тә’сир бағышладығыны тәсәввүр един. Еһтимал ки, Муса, һәмчинин Ејуб китабыны вә Мәзмурун 90, 91-ҹи фәсилләрини дә јазмышды. Давуд онлары көчүрдүмү? Бәлкә дә. Еһтимал ки, Давудда Јешу, Һакимләр вә Рут китаблары да варды. Ҝөрдүјүмүз кими Давуд, охујуб мәнимсәмәк үчүн, Мүгәддәс Китабын чох һиссәсинә малик иди. Онун мәһз бу ҹүр даврандығына инанмаг үчүн там әсасымыз вар. Мәзмур 19:7-11 ајәләриндә Аллаһын ганунлары һаггында Давудун дедикләри сөзләрә диггәт јетирин.

6. Улу бабасы Давуд кими, Исанын да Мүгәддәс Јазылара мараг ҝөстәрдијинә неҹә әмин ола биләрик?

⁶ Бөјүк Давуд, јә’ни “Давуд Оғлу” Иса да бу ҹүр давранырды. Һәр һәфтә јерли синагога ҝетмәк Исанын адәти иди. О, орада Мүгәддәс Јазылары неҹә охујуб изаһ етдикләрини динләјирди. Бундан әлавә, Исанын өзү дә Аллаһын Кәламыны уҹадан охујур вә ону изаһ едирди (Лука 4:16-21). Онун Мүгәддәс Јазылары јахшы билмәси дәрһал нәзәрә чарпыр. “Инҹил” китабында Исанын “јазылмышдыр” дедијини вә јахуд һәр һансы башга јолла Мүгәддәс Јазыларын мүхтәлиф парчаларындан ситат ҝәтирдијини хатырлајын. Маттанын Мүждәсинә әсасән, Иса Дағүстү тәблиғиндә Ибраниҹә Мүгәддәс Јазылардан 21 дәфә ситат ҝәтирир (Матта 4:4-10; 7:29; 11:10; 21:13; 26:24, 31; Јәһја 6:31, 45; 8:17).

7. Иса дин рәһбәрләриндән нә илә фәргләнирди?

⁷ Иса, Мәзмур 1:1-3 ајәләриндә јазылан мәсләһәтә риајәт едирди: “Нә бәхтијардыр о адам ки, писләрин өјүдү илә јеримәз... Анҹаг зөвгү Рәббин шәриәтиндәдир. Вә ҝеҹә-ҝүндүз онун шәриәтини дәрин дүшүнүр... Етдији һәр иш дә јахшы ҝедәр”. “Мусанын күрсүсүндә” отуруб, амма “Рәббин шәриәтинә” диггәт јетирмәјән һәмин дөврүн дин рәһбәрләри бу сөзләрдән неҹә дә узаг идиләр (Матта 23:2-4).

8. Мүгәддәс Јазылары охумаг вә өјрәнмәк јәһуди дин рәһбәрләринә нәјә ҝөрә фајда ҝәтирмирди?

⁸ Лакин Мүгәддәс Китабын бир парчасы бә’зиләрини чашдыра биләр: санки бурада Иса Мүгәддәс Китабы өјрәнәнләри фикирләриндән дашындырмаг истәјир. Јәһја 5:39, 40 ајәләриндә Исанын өз мүасирләринә дедији сөзләри охујуруг: “Мүгәддәс Јазылары арашдырырсыныз, чүнки әбәди һәјата онларла малик олаҹағынызы фикирләширсиниз; Мәним һаггымда шәһадәт едәнләр дә онлардыр. Сиз исә һәјатынызын олмасы үчүн Мәнә тәрәф ҝәлмәк истәмирсиниз”. Бунунла Иса демәк истәмирди ки, ону динләјән јәһудиләр Мүгәддәс Јазылары өјрәнмәли дејилләр. Бу сөзләрлә Иса онларын сәмими вә ардыҹыл олмадыгларыны ҝөстәрирди. Онлар дәрк едирдиләр ки, Мүгәддәс Јазылар әбәди һәјата апаран јолу ҝөстәрир, фәгәт тәдгиг етдикләри елә һәмин Мүгәддәс Јазылар Мәсиһә — Исаја да ишарә едирди. Онлар исә Исаны Мәсиһ кими гәбул етмәкдән имтина едирдиләр. Онлар гејри-сәмими вә өјрәтмәјә габилијјәтсиз олдуглары үчүн, бу ҹүр өјрәнмә онлара фајда ҝәтирмирди (Тәснијә 18:15; Лука 11:52; Јәһја 7:47, 48).

9. Һәвариләр вә гәдим пејғәмбәрләр һансы ҝөзәл нүмунәни вермишләр?

⁹ Исанын шаҝирдләри, о ҹүмләдән һәвариләри онлардан неҹә дә фәргләнирдиләр! Онлар “Мүгәддәс Јазылары... хилас ҝәтирән һикмәти вермәјә” гадир олан бир китаб кими өјрәнирдиләр (2 Тимотејә 3:15). Бунунла онлар сә’јлә “арашдырма вә тәдгигатлар” апаран гәдим пејғәмбәрләри хатырладырдылар. Һәмин пејғәмбәрләр арашдырмаја бир нечә ај вә јахуд бир ил һәср етмәјин кифајәт олдуғуну дүшүнмүрдүләр. Һәвари Петер, онларын арашдырма илә фасиләсиз мәшғул олдугларыны, хүсусилә дә Мәсиһлә вә онун бәшәријјәти хилас едәҹәји шәрәфли ишләрилә бағлы мә’луматларла марагландыгларыны гејд едирди. Петерин биринҹи мәктубунда Мүгәддәс Јазыларын 10 китабындан 34 ситата раст ҝәлинир (1 Петер 1:10, 11).

10. Нәјә ҝөрә һәр биримиз Мүгәддәс Китабын өјрәнилмәсинә мараг ҝөстәрмәлијик?

¹⁰ Ајдын олдуғу кими, гәдим Исраилдә падшаһлара Аллаһын Кәламыны диггәтлә өјрәнмәк һәвалә олунмушду. Иса да бу ҝөстәришә риајәт едирди. Мәсиһлә бәрабәр ҝөјдә идарә едәҹәк кәсләр дә Аллаһын Кәламыны өјрәнирдиләр (Лука 22:28-30; Ромалылара 8:17; 2 Тимотејә 2:12; Вәһј 5:10; 20:6). Падшаһлығын јер үзүндә идарә едәҹәји заман хејир-дуа алмаға үмид едән кәсләрин дә, падшаһларын нүмунәсинә риајәт етмәләри ејни дәрәҹәдә ваҹибдир (Матта 25:34, 46).

Падшаһлара вә бизләрә верилән тапшырыг

11. а) Мүгәддәс Китабын өјрәнилмәси илә әлагәдар мәсиһчиләр үчүн һансы тәһлүкә вар? б) Өзүмүзә һансы суаллары вермәјимиз јахшы оларды?

¹¹ Ҹәсарәтлә вә там әминликлә демәк олар ки, һәр бир мәсиһчи Мүгәддәс Китабы шәхсән тәдгиг етмәлидир. Бу јалныз Мүгәддәс Китабы Јеһованын Шаһидләри илә өјрәнмәјә башлајанлар үчүн зәрури дејил. Һәвари Павелин мүасирләри вахтилә шәхси өјрәнмәјә е’тинасыз јанашмаға башладылар. Биз онлара охшамамагда гәрарлы олмалыјыг. Онлар “Аллаһын сөзләринин ибтидаи гајдаларыны”, мәсәлән, “Мәсиһ һаггындакы ибтидаи елми” өјрәнмишләр. Лакин онлар өјрәнмәјә давам етмәдиләр, демәли, “камиллијә доғру” тәрәгги етмәјә тәләсмирдиләр (Ибраниләрә 5:12-6:3). Бунунла әлагәдар өзүмүздән соруша биләрик: “Аллаһын Кәламыны шәхси олараг өјрәнмәјә мән неҹә јанашырам?” Бу, һәм мәсиһчи јығынҹағына јениҹә гошуланлара, һәм дә онилләрлә артыг бу јығынҹаға мәхсус оланлара аиддир. Павел дуа едирди ки, мүасирләри олан мәсиһчиләр “Аллаһы танымагда” тәрәгги етмәјә давам етсинләр. Белә бир истәјә малик олдуғуму мән дә ҝөстәрирәмми? (Колослулара 1:9, 10).

12. Аллаһын Кәламына сөнмәз мәһәббәт бәсләмәк нә үчүн ваҹибдир?

¹² Мүгәддәс Китабы мүнтәзәм сурәтдә вә диггәтлә өјрәнмәк үчүн, Аллаһын Кәламына дәрин мәһәббәт инкишаф етдирмәк чох ваҹибдир. Мәзмур 119:14-16 ајәләриндән ҝөрүндүјү кими, Аллаһын Кәламындан мәмнунлуг дујмағы өјрәнмәк үчүн, охудугларымыз үзәриндә мүнтәзәм вә мәгсәдјөнлү дүшүнмәк лазымдыр. Јенә дә, нә гәдәр вахт мәсиһчи олмағымыз ваҹиб дејил. Тимотејин нүмунәси бу фикри вурғулајыр. Мәсиһчи ағсаггалы олан Тимотеј артыг “Исанын јахшы әсҝәри кими” хидмәт етсә дә, Павел ону тәшвиг едирди ки, “һәгигәт сөзүнү доғрулугла” өјрәтмәк үчүн әлиндән ҝәләни етсин (2 Тимотејә 2:3, 15; 1 Тимотејә 4:15). “Әлимиздән ҝәләни етмәк” үчүн биз дә Мүгәддәс Китабы мүнтәзәм вә диггәтлә өјрәнмәлијик.

13. а) Мүгәддәс Китабы өјрәнмәк үчүн даһа чох вахты неҹә тапмаг олар? б) Өјрәнмәјә даһа чох вахт ајырмаг үчүн һансы дәјишикликләри едә биләрсиниз?

¹³ Мүгәддәс Китабы мүнтәзәм сурәтдә вә сә’јлә өјрәнмәк үчүн хүсуси вахт ајырмаг лазымдыр. Бу саһәдә сиз нә едирсиниз? Вердијиниз ҹавабдан асылы олмајараг, шәхси өјрәнмәјә даһа чох вахт һәср етмәк имканыныз вармы? Сиз соруша биләрсиниз: “Ахы вахты неҹә тапа биләрәм?” Бә’зиләри, өјрәнмәнин кејфијјәтини артырмаг үчүн, сәһәрләр бир аз тез дурурлар. Онлар 15 дәгигә әрзиндә ја Мүгәддәс Китабы охујур, ја да она даир һәр һансы бир мөвзуну өјрәнирләр. Бәлкә, һәфтәлик планынызда кичик дәјишиклик етмәјә дәјәр? Мәсәлән, әҝәр һәр ҝүн гәзет охумаг вә ахшамлар хәбәрләрә бахмаг кими адәтиниз варса, һеч олмаса, һәфтәдә бир дәфә дә олса бу мәшғулијјәтләри өјрәнмәјә гурбан верә билмәзсинизми? Әлдә едилән вахт сајәсиндә Мүгәддәс Китаб өјрәнмәсини даһа да ҝенишләндирмәк олар. Әҝәр һәфтәдә бир дәфә хәбәрләрә бахмағын әвәзинә јарым саата јахын шәхси өјрәнмә илә мәшғул олсаныз, илдә 25 саатдан артыг алынаҹагдыр. Тәсәввүр едирсинизми Мүгәддәс Китабы 25 саат әлавә охумаг вә ја шәхси өјрәнмә илә мәшғул олмаг неҹә бөјүк фајда ҝәтирә биләр! Даһа бир мәсләһәт: нөвбәти һәфтә әрзиндә һәр ахшам ҝүн әрзиндә нә илә мәшғул олдуғунуз һаггында дүшүнүн. Мүгәддәс Китабы охумаг вә ја шәхси өјрәнмә илә мәшғул олмаг үчүн нәји исә тә’хирә салмаг, јахуд нәдәнсә имтина етмәк олмазмы? (Ефеслиләрә 5:15, 16).

14, 15. а) Шәхси өјрәнмәдә мәгсәдләр нәјә ҝөрә ваҹибдир? б) Мүгәддәс Китабы охумагла бағлы гаршымыза һансы мәгсәдләри гојмаг олар?

¹⁴ Неҹә етмәк олар ки, өјрәнмә даһа асан вә мараглы олсун? Гаршымыза мәгсәдләр гојараг. Бәс гаршымыза һансы реал мәгсәдләри гоја биләрик? Чохларынын илк вә тә’рифә лајиг мәгсәди Мүгәддәс Китабы бүтүнлүклә охумаг олмушдур. Ола билсин ки, сиз Мүгәддәс Китабын ајры-ајры һиссәләрини охумагла фајда әлдә етмисиниз. Бәс нәјә ҝөрә Мүгәддәс Китабы бүтүнлүклә охумағы гәрара алмајасыныз? Әввәлҹә дөрд Мүждәни, сонра исә бүтүнлүклә Јунанҹа Мүгәддәс Јазылары охумаға ҹан атмаг олар. Бундан мәмнунлуг дујуб, фајда әлдә етдикдә, гаршымыза нөвбәти мәгсәди гоја биләрик: Мусанын бүтүн китабларыны вә Естер дә дахил олмагла галан тарихи китаблары охумаг олар. Бу мәгсәдә чатдыгда ҝөрәҹәксиниз ки, Мүгәддәс Китабы бүтүнлүклә охујуб баша вурмаг мүмкүндүр. Тәхминән 65 јашында мәсиһчи олан бир гадын Мүгәддәс Китабын өн вәрәгиндә ону охумаға башладығы вә гуртардығы тарихләри гејд етмишдир. Инди һәмин вәрәгдә беш ҹүт тарих дурур! (Тәснијә 32:45-47). Үстәлик, о гадын Мүгәддәс Китабы компүтерин екранындан вә ја вәрәгдән дејил, мәһз әлиндә тутараг охумағы үстүн тутур.

¹⁵ Мүгәддәс Китабы бүтүнлүклә охумаға наил олан кәсләрин бә’зиләри, мүнтәзәм өјрәнмәләрини даһа сәмәрәли вә хошаҝәлән етмәк үчүн јени тәдбирләр ҝөрүрләр. Мәсәлән, Мүгәддәс Јазыларын һәр һансы китабыны охумаға башламаздан әввәл, она ујғун материал тапыб үзәриндә ишләмәк олар. “Һәр Мүгәддәс Јазы Аллаһдан илһам алыб вә фајдалыдыр” вә “Мүгәддәс Јазыларын дәрк едилмәси” кими нәшрләрдә Мүгәддәс Јазыларын һәр китабынын тарихи шәраитләри, үслуб вә фајдасы һаггында дәјәрли мә’лумат тапмаг оларa.

16. Мүгәддәс Китабы өјрәнән заман кимләрин нүмунәсини тәглид етмәкдән гачынмалыјыг?

¹⁶ Өјрәнмә заманы Мүгәддәс Китаб үзрә бир чох алимләрә хас олан үсулдан гачынмаг лазымдыр. Онлар, Мүгәддәс Китаб инсан әсәри имиш кими, мәтнләрин тәһлилинә һәддиндән артыг диггәт јетирирләр. Онлардан бә’зиләри Мүгәддәс Јазыларын һәр бир китабынын мүәјјән груп охуҹулар үчүн тә’јин едилдијини зәнн едир, ја да һәмин китаблары јазан мүәллифин гаршысына гојдуғу мәгсәди вә мә’луматы һансы нөгтеји-нәзәрлә вердијини өзләри гәрара алырлар. Бу ҹүр сырф инсани дүшүнҹәләр сајәсиндә, Мүгәддәс Китаб садәҹә тарихи дәјәрләрә малик олан вә ја дини фикирләрин инкишафыны әкс етдирән әсәр кими тәгдим едилир. Диҝәр алимләр, Мүгәддәс Китабын филолоҝијасы илә мәшғул олараг, бүтүнлүклә сөзләрин тәдгигатына гапылырлар. Онлары Аллаһын нә демәк истәдијиндән чох, гәдим ибрани вә јунан сөзләринин мәншәји вә мә’насы марагландырыр. Мүгәддәс Китабы өјрәнмәјә бу ҹүр јанашмаг, фәалијјәтә тәшвиг едән дәрин иман инкишаф етдирмәјә көмәк едәҹәкми? (1 Салониклиләрә 2:13).

17. Мүгәддәс Китабын һамы үчүн тә’јин едилдијини дүшүнмәјә һансы әсасларымыз вар?

¹⁷ Бәс алимләрин чыхардыглары нәтиҹәләрлә разылашмаг олармы? Һәгигәтәнми Мүгәддәс Јазыларын һәр китабы јалныз бир әсас фикрә маликдир вә доғрудурму ки, һәр китаб јалныз кичик груп охуҹулар үчүн тә’јин едилиб? (1 Коринфлиләрә 1:19-21). Әслиндә Аллаһын Кәламына дахил олан китаблар мүхтәлиф јашлы, мәншәли вә мәшғулијјәтли инсанлар үчүн сөнмәз дәјәрләрә маликдир. Һәр һансы китаб, әввәлҹә Тимотеј вә ја Титус кими шәхсләр, јахуд мүәјјән груп инсанлар, мәсәлән, Галатија вә ја Филип шәһәриндәки мәсиһчиләр үчүн нәзәрдә тутулса да, һәмин китаблары өјрәнмәк һәр биримизә нәинки фајдалы оларды, һәтта зәруридир дә. Һәр биримиз үчүн бу китаблар ваҹибдир. Бундан әлавә, бир китаб өзүнә бир нечә мөвзу дахил едә биләр вә мүхтәлиф охуҹулар үчүн фајдалы ола биләр. Бәли, Мүгәддәс Китаб һәр бир инсан үчүн јарарлыдыр, бу исә, онун нәјә ҝөрә аз гала дүнјанын бүтүн дилләринә тәрҹүмә олундуғуну анламагда бизә көмәк едир (Ромалылара 15:4).

Сизин үчүн вә башгалары үчүн олан фајда

18. Аллаһын Кәламыны охујаркән нәјин үзәриндә дүшүнмәлијик?

¹⁸ Өјрәнмә илә мәшғул оларкән ҝөрәҹәксиниз ки, Мүгәддәс Китабы анламаға сә’ј ҝөстәрмәк вә тәфәррүатлар арасындакы бағлылығы дүзҝүн мүәјјән етмәк нә гәдәр фајдалыдыр (Сүлејманын мәсәлләри 2:3-5; 4:7). Јеһованын Кәламы васитәсилә ашкар етдији шејләр Онун нијјәти илә сых бағлыдыр. Бу сәбәбдән оху заманы Мүгәддәс Китаб фактларыны вә мәсләһәтләрини Аллаһын нијјәти илә әлагәләндирин. Бу вә ја диҝәр һадисәнин, фикрин вә ја пејғәмбәрлијин Јеһованын нијјәтләри илә неҹә бағлы олдуғу барәдә дүшүнүн. Өзүнүзә белә суаллар верин: “Бу, Јеһова һаггында мәнә нәји чатдырыр? Бу, Аллаһын сәмави Падшаһлыг васитәсилә һәјата кечирилән нијјәти илә неҹә бағлыдыр?” Нөвбәти суалларын да үзәриндә дүшүнмәк олар: “Бу мә’лумат мәним үчүн неҹә фајдалы ола биләр? Башгаларына Мүгәддәс Китаб әсасында тә’лим вә нәсиһәт вердикдә, бу мә’луматы неҹә тәтбиг етмәк олар?” (Јешу 1:8).

19. Өјрәндикләринизи башгаларына данышдыгда кимләр фајдаланаҹаг? Изаһ един.

¹⁹ Башгалары һаггында дүшүнмәк даһа бир сәбәбә ҝөрә дә фајдалыдыр. Сиз Мүгәддәс Китабы охујуб тәдгиг едәрәк, јени шејләр өјрәнәҹәк вә анлајаҹагсыныз. Чалышын буну доғмаларынызла вә башга инсанларла үнсијјәт заманы јарадыҹы сөһбәтләрә дахил едәсиниз. Әҝәр буну мүвафиг вахтда вә тәвазөкарлыгла етсәниз, белә сөһбәтләр, шүбһәсиз ки, фајда ҝәтирәҹәк. Өјрәндијинизи, јахуд мараглы бир шеји сәмимиликлә вә руһ јүксәклији илә данышмағыныз исә, чох еһтимал ки, һәмсөһбәтләринизә даһа чох тәәссүрат бағышлајаҹаг. Бундан башга, бу сизин өзүнүз үчүн дә фајдалы олаҹаг. Нәјә ҝөрә? Мүтәхәссисләр мүшаһидә едибләр ки, инсан мүәјјән мә’луматы јаддашында һәлә јени икән практикада тәтбиг едәрсә, јахуд башгаларына данышмагла тәкрар едәрсә, өјрәнилән шеј онун јаддашында даһа чох галарb.

20. Мүгәддәс Китабы тәкрар-тәкрар охумаг нәјә ҝөрә фајдалыдыр?

²⁰ Һәр дәфә Мүгәддәс Јазыларын бир китабыны тәкрар охудугда, өзүнүз үчүн јени мә’лумат әлдә едәҹәксиниз. Әввәлләр хүсуси бир шеј ҝөрмәдијиниз парчалар инди сизи валеһ едәҹәк. Онлар сизин үчүн јени мә’на кәсб едәҹәк. Бу бир даһа вурғулајыр ки, Мүгәддәс Јазылара дахил олан китаблар садәҹә инсанлар тәрәфиндән јарадылан әдәбијјат дејил, сизин үчүн тә’јин едилмиш хәзинәдир. Бу китаблары тәкрар-тәкрар тәдгиг етмәк вә һәр дәфә нә исә дәјәрли бир шеј әлдә етмәк олар. Унутмајын ки, падшаһлара, мәсәлән, Давуда “бүтүн ҝүнләриндә ондан [Мүгәддәс Китабдан]” охумаг әмр едилмишди.

21. Аллаһын Кәламыны даһа чох өјрәнсәниз, сизи һансы мүкафат ҝөзләјир?

²¹ Бәли, Мүгәддәс Китабын дәриндән тәдгиг едилмәсинә вахт ајыранлар бөјүк фајда әлдә едирләр. Онлар руһани хәзинә вә анлајыш әлдә едирләр. Онларын Аллаһла мүнасибәтләри мөһкәмләнир, зәнҝинләшир. Үстәлик, онлар јахынлары үчүн, мәсиһчи јығынҹағындакы баҹы-гардашлар үчүн, еләҹә дә һәлә Јеһованын хидмәтчиләри олаҹаг кәсләр үчүн даһа гијмәтли олурлар (Ромалылара 10:9-14; 1 Тимотејә 4:16).

[Һашијәләр]

Јадыныздадырмы?

• Исраил падшаһларындан нә ҝөзләнилирди?

• Мүгәддәс Китабы тәдгиг етмәклә бағлы Иса вә һәвариләр һансы нүмунәни вердиләр?

• Шәхси өјрәнмәјә даһа чох вахт сәрф етмәк үчүн һансы дәјишиклији етмәк олар?

• Аллаһын Кәламыны өјрәнмәјә неҹә јанашмаг лазымдыр?

[11-ҹи сәһифәдәки чәрчивә]

“Әлимиздә тутараг”

“Әҝәр бизә Мүгәддәс Китабла бағлы һәр һансы ајәни вә ја сөзү тапмаг лазымдырса... Интернетдән истифадә етмәк даһа јахшыдыр. Амма әҝәр Мүгәддәс Китабы охумаг, өјрәнмәк вә үзәриндә дәриндән дүшүнмәк истәјириксә, ону әлимиздә тутмалыјыг ки, үрәјимизә вә әглимизә тә’сир етсин” (Qertrud Himmelfarb, исте’фада олан әмәкдар профессор, Siti Universiteti Nyu-York ştatı).