Јеһова итаәткар оланлара хејир-дуа верир вә мүдафиә едир
“Мәни динләјән тәһлүкәсизликдә јашајаҹагдыр. Вә писликләрдән горхусу олмајыб раһатлыг тапаҹагдыр” (СҮЛЕЈМАНЫН МӘСӘЛЛӘРИ 1:33).
1, 2. Аллаһа итаәткар олмаг нә үчүн ваҹибдир? Нүмунә чәкин.
ЈУМШАГ түклү сары ҹүҹәләр, гырғынын һавада дөврә вурмасындан хәбәрсиз һалда башлары чәмәнликдә јем дәнләмәјә гарышмышды. Бирдән күрт тојуг мөһкәм вә һәјәҹанла гаггылдајараг ганадларыны ачмаға башлајыр. Ҹүҹәләр она сары гачыр вә ананын ганадлары алтында ҝизләнирләр. Гырғы һүҹумуну дајандырырa. Бурадан һансы ибрәт дәрсини ҝөтүрмәк олар? Итаәткарлыг һәјаты хилас едир!
2 Бу ибрәт дәрси бу ҝүн мәсиһчиләр үчүн хүсусилә ваҹибдир. Чүнки Шејтан вар ҝүҹү илә чалышыр ки, Аллаһын хидмәтчиләриндән даһа чох адамы өз тәләсинә салсын (Вәһј 12:9, 12, 17). Онун мәгсәди, Јеһова илә мүнасибәтимизи позараг бизи Онун илтифатындан вә әбәди һәјата олан үмиддән мәһрум етмәкдир (1 Петер 5:8). Лакин әҝәр биз Аллаһла сых мүнасибәти горујур, Онун Кәламы вә ҹәмијјәти васитәсилә алдығымыз рәһбәрлијә дәрһал һај веририксә, Онун мүдафиәсинә әмин ола биләрик. Мәзмурчу јазмышдыр: “Сәни ганадлары илә өртәр вә ҹинаһлары алтына сығынарсан” (Мәзмур 91:4).
Итаәтсиз халг гәнимәт олур
3. Исраил халгынын дәфәләрлә итаәтсизлик етмәсинин нәтиҹәси нә олду?
3 Исраил халгы Јеһоваја итаәткарлыг ҝөстәрәндә, һәмишә Онун диггәтли гајғысындан фајда әлдә едирди. Әфсуслар олсун ки, халг дәфәләрлә Јарадандан үз дөндәриб, ағаҹдан вә дашдан олан ‘бош, фајда вермәз вә гуртармаз’ танрылара ибадәт едирди (1 Самуел 12:21). Јүз илләрлә давам едән бу ҹүр үсјанкар давраныш нәтиҹәсиндә халг дөнүклүјә о гәдәр гапылмышды ки, тамамилә ислаһолунмаз вәзијјәтә дүшмүшдү. Буна ҝөрә дә Иса ҝилејләнди: “Еј Јерусәлим! Пејғәмбәрләри өлдүрән вә она ҝөндәриләнләри даша басан Јерусәлим! Тојуг өз ҹүҹәләрини ганадлары алтына топладығы кими, Мән дә сәнин өвладларыны нечә дәфә топламаг истәдим, амма сиз истәмәдиниз! Будур, евиниз бош галыр” (Матта 23:37, 38).
4. Јеһованын Јерусәлими тәрк етмәси ерамызын 70-ҹи илиндә неҹә ашкар олду?
4 Јеһованын дөнүк чыхан халгыны тәрк етмәси, ерамызын 70-ҹи илиндә фаҹиәви шәкилдә ашкар олду. Һәмин ил әлләриндә гартал шәкилли бајраглар тутан рома ордулары чохсајлы инсан һәјатыны мәһв едәрәк, вәһши гуш кими, Јерусәлимин үзәринә тәҹавүз етди. Һәмин вахт шәһәрдә Пасха бајрамына топлашан чохлу адамлар варды. Чохсајлы гурбанлары илә Аллаһын илтифатыны газанмаг онлара мүјәссәр олмады. Бу фаҹиә, Самуелин итаәтсиз Шаул падшаһа дедикләрини хатырладырды: “Рәбб өз сөзүнүн динләнмәсиндән хошландығы гәдәр јандырылан тәгдимәләрдән вә гурбанлардан хошланырмы? Будур, итаәт етмәк гурбандан вә динләмәк гочларын ич јағындан даһа јахшыдыр” (1 Самуел 15:22).
5. Јеһова һансы итаәти тәләб едир вә белә итаәтин мүмкүн олдуғуну һарадан билирик?
5 Јеһова итаәткарлыг тәләб етсә дә, Она чох јахшы мә’лумдур ки, инсанлара гејри-камиллик мане олур (Мәзмур 130:3, 4). О, инсанлардан сәмими үрәк вә имана, мәһәббәтә, һәмчинин Ону разы салмамаг горхусуна әсасланан итаәти тәләб едир (Тәснијә 10:12, 13; Сүлејманын мәсәлләри 16:6; Ишаја 43:10; Мика 6:8; Ромалылара 6:17). Бу ҹүр итаәтин мүмкүн олдуғуна, Исадан әввәлки дөврләрдә јашамыш “бөјүк шаһидләр булуду” шәһадәт етди. Онлар дәһшәтли сынаглар гаршысында, һәтта өлүмлә үз-үзә ҝәлдикдә белә нөгсансызлыгларыны горујурдулар (Ибраниләрә 11:36, 37; 12:1). Онлар Јеһованын үрәјини неҹә дә севиндирирдиләр! (Сүлејманын мәсәлләри 27:11). Лакин башгалары, әввәлҹә сәдагәтлә јеримәјә башласалар да, ахыраҹан итаәткар галмамышлар. Бунлардан бири, гәдим јәһуди падшаһы Јоаш иди.
Пис достлар тәрәфиндән јолдан чыхарылан падшаһ
6, 7. Јеһојаданын сағлығында Јоаш неҹә падшаһ иди?
6 Јоаш падшаһ ушаглыгда гатилләрин әлиндән зорла гуртармышды. Онун једди јашы оланда баш каһин Јеһојада ону ҝизләдилдији јердән ҹәсарәтлә ҝәтирмиш вә падшаһ етмишди. Аллаһ горхусуна малик олан Јеһојада Јоаш үчүн бир ата вә мәсләһәтчи иди, бунун да сајәсиндә ҝәнҹ һөкмдар “каһин Јеһојаданын бүтүн ҝүнләриндә... Рәббин ҝөзүндә доғру оланы етди” (2 Тарихләр 22:10-23:1, 11; 24:1, 2).
7 Јоашын хејирхаһ ишләриндән бири, Јеһованын мә’бәдини бәрпа етмәси иди. Бу иши јеринә јетирмәји Јоаш ‘үрәјинә гојмушду’. О, баш каһин Јеһојадаја, ‘Мусанын гојдуғу’ верҝини — мә’бәдин бәрпа едилмәси үчүн лазым олан верҝини Јәһудејадан вә Јерусәлимдән топламағы хатырлатды. Ајдындыр ки, Јеһојада ҝәнҹ падшаһы Аллаһын ганунуну өјрәнмәјә вә она табе олмаға әбәс јерә тәшвиг етмәмишди. Нәтиҹәдә, мә’бәд вә мә’бәдин аваданлыглары илә бағлы ишләр тезликлә баша чатды (2 Тарихләр 24:4, 6, 13, 14; Тәснијә 17:18).
8. а) Јоашын руһани ҹәһәтдән зәифләмәси илк нөвбәдә нә илә изаһ олунур? б) Падшаһын итаәтсизлији ахырда онун һансы һәрәкәтинә сәбәб олду?
8 Тәәссүфләр олсун ки, Јоаш Јеһоваја итаәт етмәјә сон гојду. Нәјә ҝөрә? Аллаһын Кәламында дејилир: “Јеһојаданын өлүмүндән сонра Јәһуда рәисләри ҝәлиб падшаһа әјилдиләр. О заман падшаһ онлары динләди. Вә аталарынын Аллаһы Рәббин евини бурахдылар вә Ашерләрә вә бүтләрә гуллуг етдиләр вә онларын бу ҝүнаһындан өтрү Јәһуда илә Јерусәлим үзәринә гәзәб ҝәлди”. Бундан башга, Јәһуда рәисләринин позуҹу тә’сири уҹбатындан падшаһ Аллаһын пејғәмбәрләринә, о ҹүмләдән Јоашы вә халгы итаәтсизлик үзүндән ҹәсарәтлә мәзәммәт едән Јеһојаданын оғлу Зәкәријјәјә гулаг асмаға сон гојду. Јоаш нәинки төвбә етмәди, һәтта Зәкәријјәни даша басыб өлдүрмәји дә әмр етди. Јоаш нә гәдәр рәһмсиз вә итаәтсиз инсан олду! Вә бүтүн бунлар онун пис достларын тә’сири алтына дүшмәсиндән ирәли ҝәлирди (2 Тарихләр 24:17-22; 1 Коринфлиләрә 15:33).
9. Јоашын вә рәисләрин агибәти итаәтсизлијин ағылсыз һәрәкәт олдуғуну неҹә вурғулајыр?
9 Јеһованы тәрк едән Јоашын вә онун пис достларынын агибәти нә олду? Аз сајлы адамлардан ибарәт олан Сурија ордусу Јәһудејаја тәҹавүз етди вә “халгын арасындан бүтүн халг рәисләрини һәлак етди”. Үстәлик ишғалчылар падшаһы һәм өз малыны, һәм дә мә’бәдин гызыл вә ҝүмүшүнү вермәјә мәҹбур етдиләр. Онлар Јоашы өлдүрмәсәләр дә, ону зәиф вә ағыр хәстә вәзијјәтдә гојдулар. Бир аз кечмәмиш, өз гулларындан бир нечәси сөзләшиб она суи-гәсд етдиләр (2 Тарихләр 24:23-25; 2 Краллар 12:17, 18). Јеһованын Исраил халгына сөјләдикләри неҹә дә доғру чыхды: “Аллаһын Рәббин бүтүн әмрләрини вә ганунларыны јеринә јетирмәк үзрә онун сөзүнү динләмәсән, бүтүн бу лә’нәтләр сәнин үзәринә ҝәләҹәкләр вә сәнә чатаҹаглар” (Тәснијә 28:15).
Итаәткарлыг сајәсиндә хилас олан мирзә
10, 11. а) Јеһованын Барука вердији мәсләһәти үзәриндә дүшүнмәк нә үчүн фајдалыдыр? б) Јеһова Барука һансы мәсләһәти верди?
10 Тәблиғ хидмәтиндә раст ҝәлдијин инсанлардан чоху хош хәбәрә һај вермәјәндә бә’зән мә’јус олурсанмы? Јахуд, јахшы јашајанлара вә өзүнә һеч нәји әсирҝәмәјән кәсләрә һәрдән гәлбиндә һәсәд апарырсанмы? Әҝәр еләдирсә, онда Јеремјанын мирзәси олан Барук вә Јеһованын она вердији мәһәббәт долу өјүдү үзәриндә дүшүн.
11 Барук пејғәмбәрлик сөзләрини јазаркән Јеһова онун өзүнә диггәт јетирди. Нәјә ҝөрә? Она ҝөрә ки, Барук һәјатындан наразылыг етмәјә вә Аллаһа хидмәтиндәки хүсуси имтијаздан даһа јахшы шејләр арзуламаға башламышды. Барукун дүшүнҹәсиндә бу ҹүр дәјишиклији ҝөрән Јеһова она ајдын, амма хејирхаһ мәсләһәт верди: “Сән өзүн үчүн бөјүк шејләрми ахтарырсан? Ахтарма; чүнки будур, мән бүтүн бәшәрин үзәринә фәлакәт ҝәтирәҹәјәм... фәгәт ҝедәҹәјин бүтүн јерләрдә ҹаныны сәнә гәнимәт малы олараг верәҹәјәм” (Јеремја 36:4; 45:5).
12. Нәјә ҝөрә бу системдә өзүмүзә “бөјүк шејләр” ахтармалы дејилик?
12 Јеһованын Барука дедији сөзләрдә, Онун Јеремја илә бирликдә сәдагәтлә вә ҹәсарәтлә хидмәт едән бу ҝөзәл инсанын рифаһы үчүн дујдуғу дәрин нараһатчылығы ҝөрүрсәнми? Јеһова бу ҝүн дә, индики системдә даһа чох мадди не’мәтләр әлдә етмәк һәвәсиндә оланларын рифаһы үчүн чох нараһат олур. Хошбәхтликдән, белә инсанлардан чоху мәс’ул руһани гардашларын хејирхаһ нәсиһәтләринә, Барук кими һај верирләр (Лука 15:4-7). Бәли, һәр биримиз дәрк етмәлијик ки, бу дүнјада өзүнә “бөјүк шејләр” ахтаранларын ҝәләҹәји јохдур. Онлар инди һәгиги хошбәхтлији тапмырлар вә ән писи дә одур ки, бу инсанлар јахын ҝәләҹәкдә дүнја вә онун бүтүн ҹисмани еһтираслары илә бирликдә јох олаҹаглар (Матта 6:19, 20; 1 Јәһја 2:15-17).
13. Барукла баш верән һадисә тәвазөкарлыға даир бизим үчүн һансы ибрәт дәрсини верир?
13 Барукла баш верән һадисә тәвазөкарлыға даир бизә ҝөзәл ибрәт дәрси верир. Барука Јеһованын өзү дејил, мәһз Јеремјанын васитәсилә нәсиһәт вердијинә диггәт јетирәк. Һәр һалда Јеремјанын гејри-камиллији вә бир гәдәр гәрибә хүсусијјәт вә вәрдишләри Барука јахшы бәлли иди (Јеремја 45:1, 2). Буна рәғмән, Барук гүррәләнмәди; верилән өјүдүн әслиндә Јеһовадан ҝәлдијини тәвазөкарлыгла гәбул етди (2 Тарихләр 26:3, 4, 16; Сүлејманын мәсәлләри 18:12; 19:20). Буна ҝөрә дә, әҝәр биз дәрк етмәдән һансыса сәһв аддымы атмышыгса вә Аллаһын Кәламындан лазыми мәсләһәт алмышыгса, ҝәлин јеткинликдә, руһани бәсирәтдә вә тәвазөкарлыгда Барукдан нүмунә ҝөтүрәк (Галатијалылара 6:1).
14. Бизә рәһбәрлик едәнләрә итаәткар олмаг нәјә ҝөрә фајдалыдыр?
14 Бу ҹүр тәвазөкарлыг әһвал-руһијјәси өјүд верәнләрә дә көмәк едир. Ибраниләрә 13:17 ајәсиндә дејилир: “Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз”. Ағсаггаллар чобанлыг фәалијјәтинин бу мүрәккәб саһәсинин тәләб етдији ҹәсарәт, мүдриклик вә нәзакәт үчүн дуа едәрәк, үрәкләрини Јеһоваја неҹә дә тез-тез ачырлар! Ҝәлин ‘беләләринә һөрмәт едәк’ (1 Коринфлиләрә 16:18).
15. а) Јеремја Барука е’тибар етдијини неҹә ҝөстәрди? б) Барук тәвазөкарлыгла итаәт етдијинә ҝөрә неҹә мүкафатланды?
15 Ајдындыр ки, Барук өз дүшүнҹә тәрзиндә дәјишиклик етмишди. Чүнки бундан сонра Јеремја она чох ҹидди тапшырыг һәвалә етмишди. О, мә’бәдә ҝетмәли вә Јеремјанын диктәси алтында јаздығы һәмин һөкмү охумалы иди. Барук Јеремјаја гулаг асдымы? Бәли, “пејғәмбәр Јеремјанын она әмр етдији һәр шеји јеринә јетирди”. Бундан әлавә, Барук һәмин тумары Јерусәлимин рәисләринә охуду вә бу, шүбһәсиз ки, даһа чох ҹәсарәт тәләб едирди (Јеремја 36:1-6, 8, 14, 15). Шәһәр 18 илдән сонра бабиллиләр тәрәфиндән зәбт едилди. Јеһованын хәбәрдарлығына һај верәрәк, “бөјүк шејләр” ахтармаға сон гојуб сағ-саламат галдығына ҝөрә Барукун неҹә миннәтдар олдуғуну тәсәввүр един! (Јеремја 39:1, 2, 11, 12; 43:6).
Мүһасирә заманы итаәткарлыг һәјатлары хилас етди
16. Ерамыздан әввәл 607-ҹи илдә Бабил мүһасирәси заманы Јеһова Јерусәлимдәки јәһудиләрә неҹә шәфгәт ҝөстәрди?
16 Ерамыздан әввәл 607-ҹи илдә Јерусәлимин сону ҝәлдији заман, Аллаһ итаәткар инсанлара јенидән шәфгәт ҝөстәрди. Мүһасирәнин ән гызғын вахтында Јеһова јәһудиләрә деди: “Будур, јашама јолуну вә өлүм јолуну өнүнүзә гојурам. Бу шәһәрдә галан гылынҹла вә гытлыгла вә вәба илә өләҹәк; фәгәт сизи мүһасирәјә алан Ҝилданиләрә тәслим олан адам сағ галаҹаг вә ҹаны өзү үчүн бир гарәт мал олаҹаг” (Јеремја 21:8, 9). Јерусәлимин сакинләри өлүмә лајиг олсалар да, Јеһова Она итаәт едән кәсләрә, һәтта чыхылмаз ҝөрүнән ағыр бир вәзијјәтдә дә шәфгәт ҝөстәрдиb.
17. а) Јеһованын ҝөстәриши илә, мүһасирәјә алынан јәһудиләри ҝилданиләрә тәслим олмаға чағыран заман, Јеремјанын итаәткарлығы һансы ики саһәдә сынаға мә’руз галды? б) Јеремјанын ҹәсарәтлә ҝөстәрдији итаәткарлыг нүмунәси бизим үчүн неҹә фајдалы ола биләр?
17 Јәһудиләри тәслим олмаға чағырмаг тапшырығы, сөзсүз ки, Јеремјанын да итаәткарлығыны сынаға чәкирди. Бир тәрәфдән о, Аллаһын адына шөвглә јанашыр вә истәмирди ки, гәләбәләрини ҹансыз бүтләрә јазан дүшмәнләр Аллаһын адына ләкә ҝәтирсинләр (Јеремја 50:2, 11; Јеремјанын мәрсијәләри 2:16). Диҝәр тәрәфдән исә, Јеремја баша дүшүрдү ки, онун халгы тәслим олмаға чағырмасы өз һәјатыны тәһлүкә алтына гојмаг демәкдир, чүнки чохлары буну сатгынлыг кими гијмәтләндирә биләрдиләр. Буна бахмајараг, Јеремја горхаглыг ҝөстәрмир, итаәткарлыгла Аллаһын адындан данышырды (Јеремја 38:4, 17, 18). Јеремја кими, биз дә һамыја мә’лум олмајан хәбәри тәблиғ едирик. Бу хәбәрә ҝөрә Исаја да нифрәт етдиләр (Ишаја 53:3; Матта 24:9). Ҝәлин, “инсан горхусу”на гапылмадан, Јеремја кими, биз дә Јеһоваја там е’тибар едәрәк, ҹәсарәтлә Она итаәт едәк (Сүлејманын мәсәлләри 29:25).
Гогун тәҹавүзү гаршысында итаәткарлыг
18. Ҝәләҹәкдә Јеһованын хидмәтчиләри итаәткарлыға даир һансы сынагларла гаршылашаҹаглар?
18 Бир аздан Шејтанын бүтүн пис системи ҝөрүнмәмиш “бөјүк мәшәггәт”дә мәһв едиләҹәк (Матта 24:21). Һәм бу һадисәдән әввәл, һәм дә бу һадисәнин ҝедишаты заманы Аллаһын халгынын иман вә итаәткарлығынын сынаға чәкиләҹәјинә шүбһә јохдур. Мәсәлән, Мүгәддәс Китабда дејилир ки, Шејтан “Магог дијарындан олан... Гог” ролунда Јеһованын хидмәтчиләринә һәртәрәфли һүҹум едәҹәк вә бу заман ‘дијары булуд кими өртмәјә’ һазыр олан ‘гүввәтли бир орду’ кими тәсвир едилән издиһам топлајаҹагдыр (Һезекиел 38:2, 14-16). Аллаһын сајҹа аз вә силаһсыз олан халгы, Јеһованын итаәткарлар үчүн ачылмыш “ганадлары” алтында өзләринә сығынаҹаг ахтараҹаглар.
19, 20. а) Нәјә ҝөрә Гырмызы дәниздә баш верән һадисәдә исраиллиләрин итаәткар олмасы һәлледиҹи рол ојнајырды? б) Гырмызы дәниздә баш верән һадисәнин үзәриндә дуа едәрәк дүшүнмәк бу ҝүн бизә һансы фајданы ҝәтирә биләр?
19 Бу вәзијјәт бизә исраиллиләрин Мисирдән чыхмасыны хатырладыр. Мисирә он мәһведиҹи бәла илә зәрбә вурдугдан сонра, Јеһова халгыны Вә’д едилән дијара гыса јолла дејил, һүҹум едән ордуларын онлары асанлыгла әлә кечирә биләҹәји Гырмызы дәнизә тәрәф јөнәлтди. Бу, һәрби нөгтеји-нәзәриндән фаҹиәјә јол ачан бир аддым иди. Әҝәр сән орада олсајдын, Вә’д едилән дијарын башга сәмтдә јерләшдијини билдијин һалда, Јеһованын Муса васитәсилә дедијинә итаәт едиб, сарсылмаз әминликлә Гырмызы дәнизә сары јола дүшәрдинми? (Чыхыш 14:1-4).
20 “Чыхыш” китабынын 14-ҹү фәслини охудугда биз Јеһованын өз ҝүҹүнү фөвгәл’адә шәкилдә нүмајиш етдирәрәк халгыны неҹә азад етдијини ҝөрүрүк. Әлбәттә, әҝәр бу ҹүр һадисәләри өјрәнмәк вә үзәриндә дүшүнмәк үчүн вахт ајырырыгса, иманымыз неҹә дә мөһкәмләнир! (2 Петер 2:9). Мөһкәм иман исә, һәтта инсан нөгтеји-нәзәриндән мәнтигә ујғун ҝөрүнмәсә дә, бизә Јеһоваја итаәткар олмаг үчүн ҝүҹ верир (Сүлејманын мәсәлләри 3:5, 6). Буна ҝөрә дә өзүндән соруш: Мүгәддәс Китабы лазымынҹа өјрәнмәк, дуа етмәк вә өјрәндикләримин үзәриндә дүшүнмәк, һәмчинин Аллаһын халгы илә мүнтәзәм үнсијјәтин васитәсилә иманымы мөһкәмләтмәјә виҹданламы чалышырам? (Ибраниләрә 10:24, 25; 12:1-3).
Итаәткарлыг үмид верир
21. Јеһоваја итаәт едән кәсләр инди вә ҝәләҹәкдә һансы хејир-дуалары алаҹаглар?
21 Јеһованын јоллары илә ҝедән кәсләр Сүлејманын мәсәлләри 1:33 ајәсиндә јазылмыш сөзләрин һәгигәт олдуғуну артыг индидән ҝөрүрләр: “Мәни динләјән тәһлүкәсизликдә јашајаҹагдыр. Вә писликләрдән горхусу олмајыб раһатлыг тапаҹагдыр”. Јеһованын јахынлашан гисас ҝүнү заманы бу тәсәлливериҹи сөзләр неҹә дә ҝөзәл тәрздә јеринә јетәҹәкдир! Иса шаҝирдләринә демишдир: “Бу ишләр јеринә јетмәјә башладыгда јухары бахын вә башынызы галдырын, чүнки гуртулушунуз јахынлашыр” (Лука 21:28). Бәли, јалныз Аллаһа итаәткар кәсләр бу сөзләрә әминликлә риајәт едә биләҹәкләр (Матта 7:21).
22. а) Әминлик үчүн Јеһованын халгынын һансы сәбәбләри вар? б) Нөвбәти мәгаләдә сөһбәт нәдән ҝедәҹәкдир?
22 Әминлијимизә сәбәб олан даһа бир амил бундан ибарәтдир ки, “Рәбб Јеһова пејғәмбәр гулларына сиррини ачмајынҹа бир шеј етмәз” (Амос 3:7). Бу ҝүн Јеһова гәдим вахтларда олдуғу кими пејғәмбәрләр васитәсилә данышмыр. Лакин Онун ев халгына вахтлы-вахтында руһани гида вермәји бу ҝүн ағыллы гула тапшырыб (Матта 24:45-47). Бу “гула” итаәт ҝөстәрмәк олдугҹа ваҹибдир! Нөвбәти мәгаләдә мүзакирә олунаҹағы кими, бу ҹүр итаәткарлыг бизим Исаја, јә’ни “гулун” ағасына олан мүнасибәтимизи ҝөстәрир. Мәһз Иса ‘милләтләрин итаәт едәҹәји’ Кәсдир (Тәквин 49:10).
[Һашијәләр]
a Тојуғу адәтән үркәк гуш кими тәсвир етсәләр дә, һејванларын мүһафизәси үзрә бир ҹәмијјәтин нәшриндә гејд едилир ки, “күрт тојуг ҹүҹәләриндән өтрү ҹанындан кечмәјә һазырдыр”.
b Јеремја 38:19 ајәсиндә бә’зи јәһудиләрин ҝилданиләрә ‘тәслим олмагла’ ҹанларыны гуртардыглары, лакин әсир дүшдүкләри дејилир. Онларын Јеремјанын сөзләринә ҝөрәми тәслим олдуглары мә’лум дејил. Буна бахмајараг, онларын сағ галмалары пејғәмбәрин сөзләринин һәгигәт олдуғуну тәсдиг едир.
Хатырлајырсынызмы?
• Исраил халгынын дәфәләрлә итаәткарлыг ҝөстәрмәдикләринин нәтиҹәси нә олду?
• Јоаш падшаһа һәм ҝәнҹликдә, һәм дә сонрадан достлары неҹә тә’сир ҝөстәрди?
• Барукун һадисәси бизә һансы ибрәт дәрсләрини верир?
• Нәјә ҝөрә индики системин сону јахынлашдығы заман Јеһованын итаәткар халгына һеч нәдән горхмаг лазым дејил?
[20-ҹи сәһифәдәки шәкил]
Јеһојаданын рәһбәрлијинә риајәт едәрәк Јоаш Јеһоваја итаәт едирди.
[22-ҹи сәһифәдәки шәкил]
Јоаш пис достларын тә’сири алтында Аллаһын пејғәмбәрини өлдүрмәји әмр етди.
[23-ҹү сәһифәдәки шәкил]
Сән, Аллаһа итаәт едиб вә Онун валеһедиҹи хиласкар гүввәсини ҝөрәрдинми?