Ахыр ҝүнләрдә мәсиһчи битәрәфлији
“Мән дүнјадан олмадығым кими, онлар да дүнјадан дејилләр” (ЈӘҺЈА 17:16).
1, 2. Иса давамчыларынын дүнја илә мүнасибәтләри һаггында нә деди вә онун сөзләри әсасында һансы суаллар ортаја чыхыр?
ИСА камил инсан һәјатынын сон ҝеҹәсиндә, шаҝирдләринин өнүндә хејли дуа етди. Бу дуада о, һәр бир мәсиһчинин һәјатына аид олан бир мәсәләјә тохунду. Иса өз давамчыларыны нәзәрдә тутараг деди: “Мән онлара Сәнин сөзүнү вердим вә дүнја онлара нифрәт ејләди; чүнки Мән дүнјадан олмадығым кими, онлар да дүнјадан дејилләр. Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр” (Јәһја 17:14-16).
2 Иса давамчыларынын дүнјадан олмадығыны ики дәфә гејд етди. Бундан әлавә, онларын дүнјадан ајрылмалары онлара гаршы ҝәрҝин мүнасибәтә сәбәб олмалыјды, јә’ни дүнја онлара нифрәт етмәли иди. Лакин бу мәсиһчиләри сарсытмалы дејилди, чүнки Јеһова онлары горујаҹагды (Сүлејманын мәсәлләри 18:10; Матта 24:9, 13). Исанын сөзләринин әсасында нөвбәти суаллар јарана биләр: Нәјә ҝөрә Исанын һәгиги давамчылары дүнјадан дејилләр? Дүнјадан олмамаг нә демәкдир? Әҝәр дүнја мәсиһчиләрә нифрәт едирсә, бәс онлар дүнјаја неҹә јанашмалыдырлар? Хүсусилә дә, онлар бу дүнјанын һакимијјәтләринә неҹә јанашырлар? Бу суаллара Мүгәддәс Јазылардан верилән ҹаваблар ваҹибдир, чүнки онларын һәр биримизә аидијјаты вар.
“Биз Аллаһданыг”
3. а) Бизи дүнјадан ајыран нәдир? б) Нә шәһадәт едир ки, “бүтүн дүнја... шәририн һакимијјәти алтындадыр”?
3 Дүнјадан олмамағымызын сәбәбләриндән бири Јеһова илә олан сых мүнасибәтләримиздир. Һәвари Јәһја јазырды: “Билирик ки, биз Аллаһданыг, бүтүн дүнја исә шәририн һакимијјәти алтындадыр” (1 Јәһја 5:19). Јәһјанын бу дүнја һаггында дедикләри тамамилә доғрудур. Бу ҝүн һәр тәрәфдә јајылмыш мүһарибәләр, ҹинајәткарлыг, зүлмкарлыг, мә’јуслуг, виҹдансызлыг вә әхлагсызлыг Аллаһын дејил, Шејтанын тә’сиринә шәһадәт едир (Јәһја 12:31; 2 Коринфлиләрә 4:4; Ефеслиләрә 6:12). Јеһованын Шаһиди олан бир инсан, бу пис әмәлләрдә нә иштирак едәҹәк, нә дә онлардан разы галаҹагдыр, бу исә о демәкдир ки, һәмин адам бу дүнјадан дејил (Ромалылара 12:2; 13:12-14; 1 Коринфлиләрә 6:9-11; 1 Јәһја 3:10-12).
4. Јеһоваја мәхсус олдуғумузу неҹә ҝөстәририк?
4 Јәһја дүнјадан фәргли олараг, мәсиһчиләрин “Аллаһдан” олдугларыны сөјләди. Өзүнү Јеһоваја һәср едәнләрин һәр бири Она мәхсусдур. Һәвари Павел демишдир: “Јашајырыгса, Рәбб үчүн јашајырыг; өлүрүксә, Рәбб үчүн өлүрүк. Буна ҝөрә, јашајырыгса да, өлүрүксә дә, һәмишә Рәббиник” (Ромалылара 14:8; Мәзмур 116:15). Јеһоваја мәхсус олдуғумуз үчүн, Она хүсуси сәдагәт ҝөстәририк (Чыхыш 20:4-6). Демәли, Исанын һәгиги давамчысы һәјатыны һансыса дүнјәви ишә һәср етмир. Вә дөвләт рәмзләринә һөрмәт етсә дә, о, нә үрәјиндә, нә дә әмәлләриндә онлара баш әјмир. О, идман улдузларына, јахуд башга мүасир бүтләрә дә ситајиш етмир. Әлбәттә ки, Исанын һәгиги давамчысы, башгаларынын шәхси ирадәләринә ҝөрә һәрәкәт етмәк һаггларына һөрмәт етмәклә јанашы, јалныз вә јалныз Јарадана ибадәт едир (Матта 4:10; Вәһј 19:10). Бу, ону дүнјадан ајыран даһа бир амилдир.
“Мәним Падшаһлығым бу дүнјадан дејилдир”
5, 6. Аллаһын Падшаһлығына табе олмағымыз бизи бу дүнјадан неҹә ајырыр?
5 Мәсиһчиләри бу дүнјадан ајыран сәбәбләрдән бири, Иса Мәсиһин давамчылары вә Аллаһын Падшаһлығынын вәтәндашлары олмаларыдыр. Понти Пилат Исаны сорғу-суала тутаркән, о деди: “Мәним Падшаһлығым бу дүнјадан дејилдир; әҝәр Мәним Падшаһлығым бу дүнјадан олсајды, нөкәрләрим чалышардылар ки, мән јәһудиләрин әлинә верилмәјим; фәгәт инди Мәним Падшаһлығым бурадан дејилдир” (Јәһја 18:36, И–93). Падшаһлығын сајәсиндә Јеһованын ады иззәтләнәҹәк, һакимијјәтинә бәраәт газандырылаҹаг вә Онун ирадәси ҝөјдә олдуғу кими јер үзүндә дә јеринә јетәҹәкди (Матта 6:9, 10). Иса хидмәти бојунҹа Падшаһлыг һаггындакы хош хәбәри тәблиғ етмиш вә демишдир ки, онун давамчылары дүнјанын сонуна гәдәр бу хәбәри тәблиғ едәҹәкләр (Матта 4:23; 24:14). Вәһј 11:15 (И–93) ајәсиндәки бу пејғәмбәрлик сөзләри 1914-ҹү илдә һәјата кечди: “Дүнјанын падшаһлығы Рәббимизин вә Онун Мәсиһинин Падшаһлығы олду; вә О, әбәди олараг шаһлыг едәҹәкдир”. Чох тезликлә бу сәмави Падшаһлыг бәшәријјәт үзәриндә јеҝанә һакимијјәт олаҹагдыр (Даниел 2:44). Ҝүн ҝәләҹәк ки, бу дүнјанын рәһбәрләри дә Падшаһлығын сәлаһијјәтини е’тираф етмәк мәҹбуријјәтиндә галаҹаглар (Мәзмур 2:6-12).
6 Беләликлә, бу ҝүн Исанын һәгиги давамчылары Аллаһын Падшаһлығынын вәтәндашларыдырлар вә онлар Исанын “әввәлҹә Онун [Аллаһын] Падшаһлығыны... ахтарын” чағырышына риајәт едирләр (Матта 6:33, И–93). Бу, онларын јашадыглары дөвләтә гаршы сәдагәтсиз олдугларыны билдирмир, лакин онлар руһани мә’нада дүнјадан ајрылмышлар. Биринҹи әсрдә олдуғу кими, бу ҝүн дә мәсиһчиләрин әсас ишләри ондан ибарәтдир ки, “Аллаһын Падшаһлығыны ҹидди шәкилдә” бәјан етсинләр (Һәвариләрин ишләри 28:23). Һеч бир инсан һакимијјәтинин Аллаһ тәрәфиндән һәвалә олунмуш бу тапшырыға мане олмаға һаггы јохдур.
7. Исанын һәгиги давамчылары битәрәфлији нәјә ҝөрә горујурлар вә онлар буну неҹә бүрузә верирләр?
7 Јеһоваја мәхсус олан, һәмчинин Исанын давамчылары вә Аллаһын Падшаһлығынын вәтәндашлары олан бир халг кими, Јеһованын Шаһидләри ХХ вә XXI әсрләрин вәтәндаш вә дөвләтләрарасы чәкишмәләриндә битәрәфлији горумуш вә горумагдадырлар. Онлар һеч кимин тәрәфини тутмур, дөјүшмәк үчүн әлләринә силаһ ҝөтүрмүр вә һәр һансы дүнјәви һәрәкатын, јахуд идејанын тәблиғатында иштирак етмирләр. Онларын рәфедилмәз ҝөрүнән мүгавимәтләр гаршысында тәзаһүр етдирдикләри валеһедиҹи иманлары олдугҹа диггәтә лајигдир. Онлар 1934-ҹү илдә насист Алманијасынын рәһбәрләри гаршысында дејилән принсипә риајәт едирләр: “Биз сијасәтә гарышмырыг, анҹаг бүтүнлүклә Падшаһы Мәсиһ олан Аллаһын падшаһлығына бағлыјыг. Кимә исә зәрәр вурмаг нијјәтиндә дејилик. Биз сүлһ ичиндә јашамағы арзу едир вә имкан дахилиндә һамыја јахшылыг етмәјә чалышырыг”.
Мәсиһин сәфирләри вә елчиләри
8, 9. Һансы мә’нада Јеһованын Шаһидләри бу ҝүн сәфирләр вә елчиләр кими хидмәт едирләр вә бу онларын дүнја халглары илә олан мүнасибәтләринә неҹә тә’сир едир?
8 Павел өзү вә мәсһ едилмиш һәмиманлылары һаггында “Мәсиһин сәфирләри, санки Аллаһ онларын васитәсилә инсанлара мүраҹиәт едир” кими данышырды (2 Коринфлиләрә 5:20; Ефеслиләрә 6:19). 1914-ҹү илдән е’тибарән руһла мәсһ едилмиш мәсиһчиләри һаглы олараг Аллаһын Падшаһлығынын сәфирләри адландырмаг олар вә онлар бу Падшаһлығын “оғулларыдыр”лар (Матта 13:38; Филипилиләрә 3:20; Вәһј 5:9, 10). Бундан әлавә, Јеһова јер үзүндә јашамаг үмидинә малик олан ‘бөјүк бир издиһамы’, “башга гојунлары” халглар арасындан топлајыб ки, онлар сәфирлик ишиндә мәсһ едилмиш оғуллара көмәк етсинләр (Вәһј 7:9; Јәһја 10:16). Бу “башга гојунлары” Аллаһын Падшаһлығынын “елчиләри” адландырмаг олар.
9 Сәфир вә онун табелијиндә оланлар ҝөндәрилдикләри өлкәнин ишләринә мүдахилә етмирләр. Бунун кими мәсиһчиләр дә дүнја халгларынын сијаси ишләринә гаршы битәрәфлији горујурлар. Онлар һәр һансы милли, ирги, иҹтимаи, јахуд игтисади мараглары ҝүдән груплара тәрәф вә јахуд гаршы чыхмырлар (Һәвариләрин ишләри 10:34, 35). Әксинә, онлар ‘һамыја јахшылыг едирләр’ (Галатијалылара 6:10). Јеһованын Шаһидләринин битәрәф олдугларына ҝөрә, онларын милли тоггушмалар зәмининдә дүшмәнин марагларына хидмәт етдикләрини иддиа едиб, сөјләдикләри хәбәри һеч ким рәдд едә билмәз.
Мәһәббәтдән танынырлар
10. Мәһәббәт мәсиһчи үчүн нә дәрәҹәдә ваҹибдир?
10 Мәсиһчиләрин бу дүнјанын ишләриндә битәрәфлији горумаларынын даһа бир сәбәби, һәмиманлылары илә олан мүнасибәтләридир. Иса давамчыларына демишдир: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:35). Гардашлыг мәһәббәти мәсиһчиләри фәргләндирән башлыҹа амилдир (1 Јәһја 3:14). Мәсиһчинин Јеһоваја вә Исаја олан мәһәббәти гардашлыг мәһәббәти илә сых бағлыдыр, буна ҝөрә дә мәсиһчи һәмиманлылары илә чох јахын мүнасибәтдә олур. Мәсиһчинин мәһәббәти јалныз өз јығынҹағынын үзвләри илә мәһдудлашмыр. Онун мәһәббәти ‘дүнјадакы гардашларыны’ да әһатә едир (1 Петер 5:9).
11. Јеһованын Шаһидләринин бир-бирләринә олан севҝиси онларын давранышларына неҹә тә’сир ҝөстәрир?
11 Бу ҝүн Јеһованын Шаһидләри гардашлыг мәһәббәтини Ишаја 2:4 ајәсиндә јазылмыш сөзләри јеринә јетирмәклә ҝөстәрирләр: “Гылынҹларыны котан дәмирләри вә мизрагларыны бағча бычаглары едәҹәкләр; милләт милләтә гаршы гылынҹ галдырмајаҹаг вә артыг ҹәнҝ етмәји өјрәнмәјәҹәкләр”. Јеһованын тә’лим етдији мәсиһчиләр һәм Аллаһла, һәм дә бир-бирләри илә сүлһ ичиндәдирләр (Ишаја 54:13). Онлар Аллаһы вә гардашларыны севдикләри үчүн, әлләринә силаһ алыб һәмиманлыларына гаршы, јахуд үмумијјәтлә башга өлкәдә јашајан инсанлара гаршы дөјүшмәји ағласығмаз һесаб едирләр. Онларын арасында һөкм сүрән сүлһ вә бирлик ибадәтләринин мүһүм бир һиссәсидир. Бу, онларда доғрудан да Аллаһын руһунун олдуғуну ҝөстәрир (Мәзмур 133:1; Мика 2:12; Матта 22:37-39; Колослулара 3:14). Мәсиһчиләр ‘Рәббин ҝөзләринин салеһләрә’ јөнәлдијини биләрәк ‘сүлһү арајыр вә онун ардынҹа гачырлар‘ (Мәзмур 34:14, 15).
Мәсиһчиләрин дүнјаја бахышы
12. Јеһованын дүнјадакы инсанлара гаршы һансы мүнасибәтини Јеһованын Шаһидләри тәглид етмәјә чалышырлар вә неҹә?
12 Јеһова артыг дүнјаја гаршы һөкм сүрсә дә, һәләлик инсанлары ајры-ајрылыгда мүһакимә етмәјиб. Вахты ҝәлдикдә О, буну Исанын васитәсилә едәҹәкдир (Мәзмур 67:3, 4; Матта 25:31-46; 2 Петер 3:10). Бу арада исә О, бәшәријјәтә олан бөјүк мәһәббәтини ҝөстәрир. Аллаһ, һәтта ваһид Оғлуну да гурбан верди ки, һәр кәсин әбәди һәјата наил олмаг имканы олсун (Јәһја 3:16). Јеһованын бизим хиласымыз үчүн етдикләрини башгаларына данышараг, бир мәсиһчи кими, биз Онун мәһәббәтини тәглид етмиш олуруг вә адәтән үзләшдијимиз кәскин е’тиразлар бизи бу ишдән сахламыр.
13. Бу дүнјанын һакимијјәтинә неҹә јанашмалыјыг?
13 Бәс бу дүнјанын һөкмдарларына неҹә јанашмалыјыг? Бу суала Павел нөвбәти сөзләрлә ҹаваб вермишдир: “Һәр адам өз үзәриндә олан һакимләрә табе олсун; чүнки Аллаһ тәрәфиндән олмајан һаким јохдур, мөвҹуд олан һакимләр дә Аллаһ тәрәфиндән тә’јин олунмушдур” (Ромалылара 13:1, 2). Инсанлар, Гадир Аллаһын изн вермәсинин сајәсиндә (бир-бирләри илә мүгајисәдә јүксәк вә ја ашағы рүтбәләрә, лакин һәмишә Јеһованын табелијиндә олан) рүтбәләрә саһибдирләр. Мәсиһчи дүнјәви һакимләрә табе олур, чүнки бу Јеһоваја ибадәтин бир һиссәсидир. Бәс Аллаһын тәләбләри илә инсан һакимијјәтләринин тәләбләри арасында зиддијјәт јаранарса неҹә?
Аллаһын Гануну вә гејсәрин гануну
14, 15. а) Даниел итаәткарлыгла бағлы зиддијјәтдән неҹә гачына билди? б) Итаәткарлыгла бағлы тоггушмадан гачынмаг гејри-мүмкүн олан заман үч јәһуди һансы мөвгеји тутдулар?
14 Даниел вә онун үч јолдашы, инсан һакимијјәтләринә вә Аллаһын һакимијјәтинә таразлы шәкилдә табе олмаға даир ҝөзәл нүмунә вердиләр. Бу дөрд ҝәнҹ јәһуди Бабил әсарәтиндә икән, Бабилин ганунларына табе олурдулар. Аз сонра онлары хүсуси тә’лим үчүн сечдиләр. Даниел бу тә’лимин һансыса саһәдә Јеһованын Ганунуна зидд ҝедә биләҹәјини анлајараг, үзәрләринә гојулмуш нәзарәтчи илә данышды. Бунун сајәсиндә дөрд јәһудинин виҹданы нәзәрә алынараг дәјишикликләр едилди (Даниел 1:8-17). Јеһованын Шаһидләри, лазымсыз проблемләрдән гачынмаг мәгсәди илә, өз мөвгеләрини һакимијјәт нүмајәндәләринә нәзакәтлә изаһ етдикдә, Даниелин нүмунәсини тәглид етмиш олурлар.
15 Лакин бир гәдәр сонра елә бир вәзијјәт јаранды ки, табечилик зәмининдә баш верән тоггушмалардан гачынмаг гејри-мүмкүн олду. Бабил падшаһы Дура дүзәнлијиндә бөјүк бир бүт уҹалтды вә вилајәт хадимләрини дә дахил етмәклә, бүтүн мәс’ул шәхсләрә тәнтәнәли ачылыша топлашмағы әмр етди. О вахта гәдәр артыг Даниелин үч јолдашына Бабил вилајәти үзрә ишләр һәвалә олунмушду, буна ҝөрә дә һәмин әмр онлара да аид иди. Ачылыш заманы мүәјјән бир вахтда ораја топлашанларын һамысы бүт гаршысында әјилмәли идиләр. Лакин јәһудиләр билирдиләр ки, бу, Аллаһын Ганунуна зиддир (Тәснијә 5:8-10). Буна ҝөрә башгалары әјилән заман онлар әјилмәдиләр. Падшаһын әмринә табе олмамагла онлар дәһшәтли өлүмлә өлмәјә риск едирдиләр, сағ галмалары да елә мө’ҹүзә сајәсиндә олду. Буна бахмајараг, Јеһоваја итаәткарлығы һәјатларыны тәһлүкәјә атмагдан үстүн тутдулар (Даниел 2:49-3:29).
16, 17. Тәблиғ етмәјә сон гојмаг әмр едилдикдә һәвариләр неҹә даврандылар вә нәјә ҝөрә?
16 Биринҹи әсрдә Иса Мәсиһин һәвариләри Јерусәлимдәки јәһуди рәһбәрләринин јанына ҝәтирилдиләр вә онлара әмр едилди ки, Исанын адындан тәблиғ етмәјә сон гојсунлар. Белә бир вәзијјәтдә онлар неҹә даврандылар? Иса онлара, Јәһудејаны да дахил етмәклә, бүтүн халглардан шаҝирдләр һазырламағы әмр етмишди. Иса һәмчинин демишди ки, онлар һәм Јерусәлимдә, һәм дә бүтүн дүнјада онун шаһидләри олаҹаглар (Матта 28:19, 20; Һәвариләрин ишләри 1:8). Һәвариләр билирдиләр ки, Исанын әмрләриндә Аллаһын ирадәси изһар олунур (Јәһја 5:30; 8:28). Буна ҝөрә дә онлар дедиләр: “Инсанлардан артыг, Аллаһа итаәт етмәк ҝәрәкдир” (Һәвариләрин ишләри 4:19, 20; 5:29).
17 Һәвариләр үсјанчы дејилдиләр (Сүлејманын мәсәлләри 24:21). Лакин онлар инсан рәһбәрләри Аллаһын ирадәсини јеринә јетирмәји гадаған етдикдә, “инсанлардан артыг, Аллаһа итаәт” етмәк лазым ҝәлдијини билдирәрәк, е’тираз етмәли олурдулар. Иса “гејсәринкини гејсәрә, Аллаһынкыны Аллаһа” вермәји демишди (Марк 12:17). Инсанлара итаәт едәрәк, Аллаһын әмрини позуругса, онда Аллаһа мәхсус оланы инсанлара вермиш олуруг. Биз исә гејсәрин һаггыны верир, лакин Јеһованын һакимијјәтини ән јүксәк һакимијјәт һесаб едирик. О, Каинатын Һөкмдары, Јарадан вә һакимијјәт Мәнбәјидир (Вәһј 4:11).
Мөһкәм дајанырыг
18, 19. Бир чох гардашларымыз һансы ҝөзәл мөвгеји тутмушлар вә биз онлары неҹә тәглид едә биләрик?
18 Һал-һазырда бир чох өлкәләрин һакимијјәти Јеһованын Шаһидләринин битәрәфлијини е’тираф едирләр вә биз бунун үчүн миннәтдарыг. Лакин бә’зи өлкәләрдә Шаһидләр һәлә дә ҹидди мүгавимәтләрлә гаршылашырлар. ХХ әср бојунҹа бә’зи баҹы-гардашларымыз “иман уғрунда... мүбаризә” апарараг, руһани мә’нада ҹәсарәтлә дөјүшмүшләр вә бу, индијәдәк давам етмәкдәдир (1 Тимотејә 6:12).
19 Онлар кими мөһкәм дурмагда бизә нә көмәк едәр? Әввәла, биз мүгавимәтләр олаҹағыны унутмуруг. Мүгавимәтләрлә гаршылашан заман бу бизи сарсытмалы, јахуд тәәҹҹүбләндирмәли дејил. Павел Тимотеји хәбәрдар етди: “Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр” (2 Тимотејә 3:12; 1 Петер 4:12). Дүнјаја Шејтан рәһбәрлик едирсә, мүгавимәтлә гаршылашмамаг мүмкүндүрмү? (Вәһј 12:17). Нә гәдәр ки, сәдагәтимизи горујуруг, бизә ‘тәәҹҹүб едән вә бизи сөјән’ кәсләр тапылаҹагдыр (1 Петер 4:4).
20. Һансы гүввәтләндириҹи һәгигәтләр бизә хатырланды?
20 Икинҹиси, биз әминик ки, Јеһова вә Онун мәләкләри бизи мүдафиә едәҹәкләр. Елишанын дедији кими “бизимлә оланлар, онларла оланлардан чохдур” (2 Краллар 6:16; Мәзмур 34:7). Ола билсин, Јеһова һансыса дәјәрли мәгсәди үчүн мүгавимәтләрә бир мүддәт јол верир. Лакин таб ҝәтирә биләк дејә, О, һәмишә бизә лазыми гүввә верир (Ишаја 41:9, 10). Бә’зиләри һәјатларыны итирмишләр, анҹаг бу бизи горхутмур. Иса демишдир: “Бәдәни өлдүрүб ҹаны өлдүрә билмәјәнләрдән дә горхмајын; анҹаг даһа артыг ҹәһәннәмдә һәм бәдәни, һәм ҹаны һәлак етмәјә гадир Оландан горхун” (Матта 10:16-23, 28). Биз бу дүнјада садәҹә ‘гәрибләрик’. Вә јашадығымыз мүддәтдә биз ‘әбәди һәјата наил олмаға’, јә’ни Аллаһын јени дүнјасындакы әбәди һәјата јетишмәјә ҹан атырыг (1 Петер 2:11; 1 Тимотејә 6:19). Әҝәр Аллаһа садиг галсаг, һеч ким бизи бу мүкафатдан мәһрум едә билмәјәҹәкдир.
21. Һәр заман нәји јадда сахламалыјыг?
21 Ҝәлин, Јеһова Аллаһла олан дәјәрли мүнасибәтимизи һәмишә јадда сахлајаг. Мәсиһин давамчылары вә Падшаһлығын вәтәндашлары олмаг кими ҝөзәл имканы гијмәтләндирмәји унутмајаг. Гардашларымызы сидги-үрәкдән севәк вә онларын бизә ҝөстәрдикләри мәһәббәтә һәмишә севинәк. Ән башлыҹасы исә, ҝәлин мәзмурчунун сөзләринә диггәт јетирәк: “Рәбби ҝөзлә, гүввәтли ол вә үрәјин ҹәсарәтли олсун; бәли, Рәбби ҝөзлә” (Мәзмур 27:14; Ишаја 54:17). О заман биз, әввәлләр јашамыш сајсыз-һесабсыз мәсиһчиләр кими, үмидимизә әмин олараг мөһкәм дураҹағыг. Бунунла бәрабәр, мәсиһчи битәрәфлијини горујуб дүнјадан ајры галаҹағыг.
Изаһ едә биләрсинизми?
• Јеһова илә олан мүнасибәтимиз бизи дүнјадан неҹә ајырыр?
• Аллаһын Падшаһлығынын вәтәндашлары олан бизләр бу дүнјада битәрәфлији неҹә горујуруг?
• Гардашларымыза олан мәһәббәтимиз бизи һансы саһәләрдә битәрәфлији горумаға вә дүнјадан ајры галмаға мәс’ул едир?
[25-ҹи сәһифәдәки шәкил]
Аллаһын Падшаһлығына табе олмағымыз дүнја илә олан мүнасибәтимизә неҹә тә’сир ҝөстәрир?
[26-ҹы сәһифәдәки шәкил]
Һуту вә тутси бирликдә меһрибанҹасына ишләјирләр.
[27-ҹи сәһифәдәки шәкил]
Јәһуди вә әрәб мәсиһчи гардашлары.
[27-ҹи сәһифәдәки шәкил]
Серб, боснија вә хорват мәсиһчиләри үчүн бирликдә олмаг хошдур.
[28-ҹи сәһифәдәки шәкил]
Рәһбәрләр Аллаһын Ганунуну позмағы әмр етдикдә биз неҹә давранмалыјыг?