Әлләринизи гүввәтләндирин
ӘЛЛӘР ифадәси Мүгәддәс Китабда тәхминән 1 800 дәфә хатырланыр. Орада биз “әл” вә ја “әлләр” ифадәси ишләнән мүхтәлиф идиомлар тапа биләрик. Мисал үчүн, “әлләрин тәмизлији” ҝүнаһсызлығы тәмсил едир (2 Самуел 22:21; Мәзмур 24:3, 4). “Әлини ачмаг” сәхавәт ҝөстәрмәк демәкдир (Тәснијә 15:11; Мәзмур 145:16). Ибрани дилиндә ким исә “ҹаныны овҹуна алыб” дедикдә, онун өз һәјатыны тәһлүкәјә атдығы нәзәрдә тутулур (1 Самуел 19:5). “Әлләрин зәифлији” инсанын руһдан дүшмәсинә ишарә едир (2 Тарихләр 15:7). Киминсә “әлини гүввәтләндирмәк” исә, ону мөһкәмләндирмәк вә һансыса бир иши ҝөрмәк үчүн ҝүҹ вермәк демәкдир (1 Самуел 23:16).
Бу ҝүн әлләримизи гүввәтләндирмәк олдугҹа ваҹибдир. Биз “чәтин анлар”да јашајырыг (2 Тимотејә 3:1). Нәјә исә наил ола билмәдикдә, тәслим олмаға вә әлләримизи јанымыза салмаға мејллијик. Јенијетмәләрин мәктәби бурахмалары, әрләрин аиләләрини тәрк етмәләри вә аналарын өз ушагларыны атмалары артыг һеч кими тәәҹҹүбләндирмир. Биз мәсиһчиләр әлләримизи гүввәтләндирмәлијик ки, Аллаһа етдијимиз хидмәтдә гаршылашдығымыз бүтүн сынаглара таб ҝәтирәк (Матта 24:13). О заман биз Јеһованын үрәјини севиндирмиш оларыг (Сүлејманын мәсәлләри 27:11).
Әлләримизи неҹә гүввәтләндирә биләрик?
Езранын ҝүнләриндә јәһудиләрә, Јеһованын Јерусәлимдәки мә’бәдинин бәрпа ишләрини баша вурмаг үчүн әлләрини гүввәтләндирмәк лазым иди. Онларын әлләри неҹә гүввәтләндирилди? Мүгәддәс Китабда дејилир: “Севинҹлә једди ҝүн мајасыз чөрәк бајрамы кечирдиләр; чүнки Рәбб онлары севиндирмишди вә Исраилин Аллаһы, Аллаһын евинин ишиндә онларын әлләрини гүввәтләндирмәк үчүн Ассурија падшаһынын үрәјини онлара дөндәрмишди” (Езра 6:22). Еһтимал ки, Јеһова фәал гүввәсинин васитәсилә Ассурија падшаһынын үрәјиндә рәғбәт һисси ојатды ки, падшаһ Онун халгынын өз вәтәнләринә дөнмәләринә разылыг версин. Һәмчинин Аллаһ јәһудиләри башладыглары иши сона чатдырмаға тәшвиг етди.
Сонрадан Јерусәлимин диварларыны тә’мир етмәк тәләб олундугда, Неһемја бу иш үчүн гардашларынын әлләрини гүввәтләндирди. Биз охујуруг: “Аллаһымын әли үзәримдә инајәтли олдуғуну, һәм дә падшаһын мәнә сөјләмиш олдуғу сөзләри онлара билдирдим вә: Галхаг вә бина едәк, дедиләр. Вә бу јахшы иш үчүн әлләрини гүввәтләндирдиләр”. Неһемја вә диҝәр јәһудиләр гүввәтләнәрәк, Јерусәлимин диварларыны ҹәми 52 ҝүнә бәрпа едә билдиләр! (Неһемја 2:18; 6:9, 15).
Јеһова бу ҝүн бизим әлләримизи гүввәтләндирир ки, Падшаһлыг һаггындакы хош хәбәри тәблиғ едәк (Матта 24:14). О, буну ‘Өз ирадәсини һәјата кечирмәјимиз үчүн һәр јахшы әмәллә’ тәҹһиз етмәклә едир (Ибраниләрә 13:21). О, әлимизә ә’ла кејфијјәтли аләтләр вериб. Бизим Мүгәддәс Китабымыз вә она әсасланан китабларымыз, журналларымыз, брошүраларымыз, трактатларымыз, аудио вә видео јазыларымыз вар. Бу вәсаитләрин көмәји илә бүтүн дүнјада олан инсанлара тәблиғ едә билирик. Бизим нәшрләри 380-дән артыг дилдә охумаг мүмкүндүр. Бундан әлавә, Јеһова бизә јығынҹаг ҝөрүшләриндә вә конгресләрдә теократик тә’лим тәгдим едир вә бу ҝөзәл вәсаитләри хидмәтдә неҹә истифадә етмәји өјрәдир.
Јеһова әлләримизи мүхтәлиф үсулларла гүввәтләндирсә дә, бизим дә сә’ј ҝөстәрмәјимизи ҝөзләјир. Суријалыларла мүһарибәдә она көмәк етмәји диләмәјә ҝәлән Иоас падшаһа Елиша пејғәмбәрин вердији ҹавабы јада салын. Елиша Иоас падшаһа бир нечә ох ҝөтүрмәји вә онлары јерә вурмағы бујурду. Мүгәддәс Китабда дејилир: “Үч кәрә вуруб дурду. Вә Аллаһ адамы она гаршы гәзәбләниб деди: Беш јахуд алты кәрә вурмалы идин; о заман Суријаны битиринҹәјә гәдәр ону вурмуш олардын; фәгәт инди Суријаны үч кәрә вураҹагсан” (2 Краллар 13:18, 19). Иоас ҹидд-ҹәһд ҝөстәрмәдијинә ҝөрә, суријалыларла мүһарибәдә там мүвәффәгијјәтә наил олмады.
Әҝәр Јеһованын бизә һәвалә етдији иши баша вурмаг истәјириксә, бу нүмунәдән ибрәт ҝөтүрмәлијик. Јолумузда дуран чәтинликләрә ҝөрә нараһат олуб, јахуд бизә һәвалә олунмуш ишин неҹә дә чәтин олдуғуну һәјәҹанла дүшүнмәк әвәзинә, сә’ј вә чалышганлыгла ишә ҝиришмәк лазымдыр. Әлләримизи гүввәтләндирмәли вә Јеһованын көмәјинә ҝүвәнмәлијик (Ишаја 35:3, 4).
Јеһова әлләримизи гүввәтләндирәҹәк
Јеһова бизи наүмид етмәјәҹәк. Ирадәсини јеринә јетирмәмиз үчүн Аллаһ бизә көмәк едәҹәк вә әлләримизи гүввәтләндирәҹәкдир. Әлбәттә, Аллаһ мө’ҹүзә ҝөстәрмәјәҹәк вә һәр шеји бизим әвәзимизә етмәјәҹәкдир. О, биздән сә’ј ҝөстәрмәјимизи, јә’ни Мүгәддәс Китабы ҝүндәлик охумағымызы, мүнтәзәм олараг јығынҹаг ҝөрүшләринә һазырлашмағымызы вә бу ҝөрүшләрә мүнтәзәм ҝәлмәјимизи, хидмәтдә даһа чох иштирак етмәјимизи вә һәр заман дуада олмағымызы ҝөзләјир. Әҝәр биз баҹардығымыз һәр иши сәдагәтлә вә ҹидд-ҹәһдлә едириксә, Јеһова биздән ҝөзләдији иши јеринә јетирмәјимиз үчүн ҝүҹ верәҹәкдир (Филипилиләрә 4:13).
Бир ил мүддәтиндә арвадыны вә анасыны итирән бир мәсиһчинин нүмунәси үзәриндә дүшүнүн. Гәлб ағрысы һәлә сакитләшмәмишди ки, ҝәлини онун оғлуну вә мәсиһчи һәјатыны тәрк етди. Гардаш дејир: “Баша дүшдүм ки, биз гаршылашдығымыз сынаглары, онларын вахтыны вә бизимлә неҹә тез-тез баш верәҹәјини сечә билмирик”. Сынаглара давам ҝәтирмәкдә она нә көмәк олду? О дејир: “Дуа вә шәхси өјрәнмә хиласедиҹи жилет олуб, мәни батмаға гојмады. Еләҹә дә руһани баҹы вә гардашларым мәнә бөјүк тәсәлли олдулар. Һәмчинин чәтинликләрлә гаршылашмадан өнҹә Јеһова илә јахшы гаршылыглы мүнасибәт јаратмағын нә дәрәҹәдә ваҹиб олдуғуну анладым”.
Малик олдуғумуз һәјат тәҹрүбәсиндән асылы олмајараг, бүтүнлүклә Јеһоваја ҝүвәнмәјә вә әлләримизи гүввәтләндирмәк үчүн Онун тәгдим етдији һәр шејдән фајдаланмаға там гәрарлы олмалыјыг. О заман Јеһоваја хидмәтимиз јүксәк кејфијјәтли олаҹаг вә Онун гијмәтли адына иззәт вә шәрәф ҝәтирәҹәјик (Ибраниләрә 13:15).
[31-ҹи сәһифәдәки шәкил]
Иоас ҹидд-ҹәһд ҝөстәрмәдијинә ҝөрә, суријалыларла мүһарибәдә там мүвәффәгијјәтә наил олмады.