Инди ојаг дурмаг һәмишә олдуғундан даһа ваҹибдир!
“Беләликлә, диҝәрләри кими јатмајаг; лакин ојаг дуруб ајыг олаг” (1 САЛОНИКИЛИЛӘРӘ 5:6).
1, 2. а) Помпеј вә Һеркуланум шәһәрләри һаггында нә мә’лумдур? б) Помпеј вә Һеркуланумун бир чох сакинләри һансы һәјәҹанлы әламәтләрә мәһәл гојмадылар вә бу нә илә нәтиҹәләнди?
ЕРАМЫЗЫН биринҹи әсриндә Везуви вулканынын јахынлығында Романын чичәкләнән Помпеј вә Һеркуланум шәһәрләри јерләширди. Бу шәһәрләр варлы ромалыларын севимли истираһәт јерләри иди. Орадакы амфитеатрлар мин нәфәрдән артыг тамашачы тутурду, Помпејдәки бөјүк амфитеатра исә, демәк олар ки, бүтүн шәһәр сығырды. Помпејдә археоложи газынтылар апаран алимләр 118 бар вә мејхана тапмышлар ки, һәмин евләр гумархана вә фаһишәханалар кими хидмәт етмишдир. Диварүстү рәсм вә галыгларын шәһадәт етдији кими, орада әхлагсызлыг вә вар-дөвләтә һәрислик ҝениш јајылмышды.
2 Ерамызын 79-ҹу илинин август ајынын 24-дә Везуви вулканы пүскүрдү. Вулканологлар ҝүман едирләр ки, һәр ики шәһәрин үзәринә пемза вә күл јағдыран илк партлајыш сакинләрин гачмасына мане ола билмәмиш вә ҝөрүнүр чохлары гачмышлар. Тәһлүкәјә диггәт јетирмәјән, јахуд һәјәҹанлы әламәтләрә садәҹә мәһәл гојмајан башгалары исә орада галмаг гәрарына ҝәлмишләр. Сонра ҝеҹәнин јарысына јахын гызғын газ, пемза вә дашлардан ибарәт ахын ҝурулту илә Һеркуланум шәһәринин үзәринә төкүлмүш вә шәһәрин бүтүн сакинләри боғулмушлар. Нөвбәти ҝүнү сәһәр тездән, һәмин ахындан Помпејин дә бүтүн сакинләри һәлак олмушлар. Јахынлашан фәлакәтин әламәтләринә мәһәл гојмамаг бу инсанлара чох баһа баша ҝәлди!
Јәһуди системинин сону
3. Јерусәлимин мәһв едилмәси илә Помпеј вә Һеркуланумун мәһви арасында һансы охшарлыг вар?
3 Помпеј вә Һеркуланум шәһәрләринин сону нә гәдәр дәһшәтли олса да, бу һадисәдән доггуз ил габаг инсанлар тәрәфиндән төрәдилән Јерусәлимин үзәрини алмыш фәлакәт даһа дәһшәтли иди. “Дүнја тарихиндә ән дәһшәтли” адланан бу мүһасирә милјондан артыг јәһудинин өлүмүнә сәбәб олду. Анҹаг, Помпеј вә Һеркуланум шәһәрләри илә олдуғу кими, Јерусәлимин дә мәһв едиләҹәјини билдирән һәјәҹанлы әламәтләр варды.
4. Иса давамчыларына, системин сонунун јахынлашмасына даир һансы пејғәмбәрлик әламәтләрини тәсвир етди вә һәмин пејғәмбәрлик илк дәфә биринҹи әсрдә неҹә јеринә јетди?
4 Шәһәрин мәһв едиләҹәји барәдә Иса Мәсиһ пејғәмбәрлик етмишди. О, бу дәһшәтли һадисәдән әввәл олаҹаг мүһарибәләр, гида чатышмазлығы, зәлзәләләр вә ганунсузлуг кими һәјәҹан доғуран һадисәләри габагҹадан демишди. Јаланчы пејғәмбәрләр фәалијјәт ҝөстәрмәли, Аллаһын Падшаһлығы һаггындакы хош хәбәр исә бүтүн дүнјада тәблиғ едилмәли иди (Матта 24:4-7, 11-14). Бахмајараг ки, Исанын сөзләри ҝениш мигјасда бу ҝүн јеринә јетир, һәмин сөзләр биринҹи әсрдә дә кичик мигјасда јеринә јетмишдир. Тарихи мә’луматлара әсасән, Јәһудејада шиддәтли аҹлыг јаранмышды (Һәвариләрин ишләри 11:28). Јәһуди тарихчиси Иосиф Флавинин дедијинә ҝөрә, шәһәрин мәһв едилмәсинә гәдәр Јерусәлимин әтрафында аз-аз зәлзәләләр баш верирди. Јерусәлимин сону јахынлашдыгҹа фасиләсиз үсјанлар, Јәһудејанын сијаси фраксијалары арасында дахили мүһарибәләр, јәһуди вә гејри-јәһудиләрин јашадығы бир нечә шәһәрләрдә күтләви гырғынлар баш верирди. Бүтүн бунлара бахмајараг, Падшаһлыг һаггындакы хош хәбәр “ҝөј алтында олан һәр мәхлуга тәблиғ едилмишдир” (Колослулара 1:23).
5, 6. а) Ерамызын 66-ҹы илиндә Исанын дедији һансы пејғәмбәрлик сөзләри јеринә јетди? б) Ерамызын 70-ҹи илиндә Јерусәлим мәһв едилән заман нәјә ҝөрә бу гәдәр инсан һәлак олду?
5 Ерамызын 66-ҹы илиндә јәһудиләр Ромаја гаршы үсјан галдырдылар. Бунун ардынҹа Сестиј Галлын команданлығы алтында гошунлар Јерусәлими мүһасирәјә алдылар вә бу заман Исанын давамчылары онун сөзләрини хатырладылар: “Гошунларын Јерусәлими мүһасирә етдијини ҝөрдүјүнүз заман билин ки, онун виранәлијинин вахты јахынлашмышдыр. О заман Јәһудејада оланлар дағлара гачсынлар; шәһәрдә оланлар орадан чыхсынлар вә әтрафда оланлар ораја ҝирмәсинләр” (Лука 21:20, 21). Јерусәлими тәрк етмәјин вахты чатмышды — бәс буну неҹә етмәк оларды? Ҝөзләнилмәдән Сестиј Галл гошунларыны ҝери чәкди, бу исә Јерусәлимдә вә Јәһудејада јашајан мәсиһчиләрә Исанын сөзләринә табе олуб, дағлара гачмаға имкан јаратды (Матта 24:15, 16).
6 Дөрд илдән сонра, тәхминән Пасха бајрамы вахты Рома гошунлары бу дәфә јәһудиләрин үсјаныны јатырмаг нијјәтиндә олан ҝенерал Титин команданлығы алтында гајытдылар. Онун гошунлары Јерусәлими мүһасирәјә алды вә ‘сәнҝәрләрлә әһатә етди’, буна ҝөрә дә шәһәрдән гачмаг мүмкүн дејилди (Лука 19:43, 44). Мүһарибә тәһлүкәсинә бахмајараг, јәһудиләр Рома империјасынын һәр јериндән Јерусәлимә Пасха бајрамына ахышырдылар. Онлар тәләјә дүшдүләр. Иосиф Флавинин хәбәр вердији кими, Рома мүһарибәсиндә һәлак оланларын әксәријјәтини һәмин заваллы зијарәтчиләр тәшкил едирдиa. Јерусәлим ахырда мәһв едилдикдә Рома империјасында јашајан јәһудиләрин једдидә бир һиссәси һәлак олду. Јерусәлим вә онун мә’бәдинин дағыдылмасы Јәһуди дөвләтинин вә Мусанын ганунуна әсасланан дини системин сону демәк идиb (Марк 13:1, 2).
7. Нәјә ҝөрә садиг мәсиһчиләр Јерусәлим мәһв едилән заман сағ галдылар?
7 Ерамызын 70-ҹи илиндә шәһәрә топлашан башга инсанларла бәрабәр, јәһудиләрдән олан мәсиһчиләр дә өлдүрүлә, јахуд көлә едилә биләрдиләр. Лакин тарихи сүбутларын ҝөстәрдији кими, онлар Исанын 37 ил әввәл вердији хәбәрдарлыға диггәт јетирмишдиләр. Һәмин мәсиһчиләр шәһәри тәрк етмиш вә ораја гајытмамышдылар.
Һәвариләр тәрәфиндән вахтында едилән хәбәрдарлыг
8. Петер нәјин зәрурилијини ҝөрүрдү вә еһтимал ки, Исанын һансы сөзләрини нәзәрдә тутурду?
8 Инди дүнјаны, мөвҹуд олан системә тамамилә сон гојаҹаг даһа ҹидди фәлакәт ҝөзләјир. Јерусәлимин мәһв едилмәсиндән алты ил әввәл, һәвари Петер вахтында, һәм дә олдугҹа ваҹиб бир мәсләһәт вермишдир ки, бу да инди јашајан мәсиһчиләр үчүн хүсусилә фајдалыдыр. О демишдир: “Ојаг дурун!” Петер ҝөрүрдү ки, мәсиһчиләрә ‘Рәббин [Иса Мәсиһин] әмрини’ нәзәрдән гачырмамаг үчүн ‘пак дүшүнҹәләрини’ ҹанландырмаг лазым иди (2 Петер 3:1, 2). Петер мәсиһчиләри ојаг дурмаға тәшвиг едәрәк, еһтимал ки, Исанын өз һәвариләринә өлүмүндән бир нечә ҝүн әввәл дедији сөзләри нәзәрдә тутурду: “Диггәтли вә ојаг олун! Дуа един! Чүнки о вахтын нә заман ҝәләҹәјини билмәзсиниз” (Марк 13:33).
9. а) Бә’зиләриндә һансы тәһлүкәли нөгтеји-нәзәр јарана биләрди? б) Нәјә ҝөрә шүбһәли мүнасибәт олдугҹа тәһлүкәлидир?
9 Бу ҝүн бә’зиләри истеһза илә сорушурлар: “Бәс Онун вә’д едилмиш зүһуру һаны?” (2 Петер 3:3, 4). Ҝөрүнүр, бу инсанлар елә дүшүнүрләр ки, әслиндә һеч бир шеј дәјишмир, һәр шеј дүнја јаранандан бәри неҹә вардыса, елә дә галмагдадыр. Бу ҹүр шүбһәли мүнасибәт тәһлүкәлидир. Шүбһәләр һансы зәманәдә јашадығымызы дәркетмә габилијјәтимизи күтләшдирә вә өз истәкләримизи јеринә јетирмәјә тәшвиг едә биләр (Лука 21:34). Бундан башга, Петерин гејд етдији кими, бу ҹүр ришхәндчиләр, Нуһун ҝүнләриндә бүтүн дүнја системини мәһв етмиш Туфаны јаддан чыхарырлар. Мәҝәр о заман һеч нә дәјишмәдими? (Тәквин 6:13, 17; 2 Петер 3:5, 6).
10. Петер, ола билсин, сәбри түкәнән кәсләри һансы сөзләрлә руһландырыр?
10 Петер мәктубуну үнванладығы һәмиманлыларына, Аллаһын бә’зән нәјә ҝөрә дәрһал фәалијјәт ҝөстәрмәдијини хатырладараг, сәбир инкишаф етдирмәјә көмәк едир. Әввәлҹә Петер дејир: “Рәббин ҝөзүндә бир ҝүн мин ил, мин ил дә бир ҝүн кимидир” (2 Петер 3:8). Јеһова әбәди јашадығы үчүн, бүтүн амилләри нәзәрә алыб, фәалијјәт ҝөстәрмәк үчүн даһа мүнасиб вахт сечә биләр. Петер һәмчинин вурғулајыр ки, Јеһова дүнјада јашајан бүтүн инсанларын төвбә етмәјини истәјир. Аллаһын сәбри сајәсиндә чохлары хилас ола биләр, анҹаг Аллаһ тез-тәләсик фәалијјәт ҝөстәрсәјди, һәмин инсанлар мәһв олардылар (1 Тимотејә 2:3, 4; 2 Петер 3:9). Лакин Јеһованын сәбри о демәк дејил ки, О, һеч заман фәалијјәт ҝөстәрмәјәҹәкдир. Петер јазырды: “Рәббин Ҝүнү исә, ҝеҹә ҝәлән оғру кими ҝәләҹәкдир” (2 Петер 3:10).
11. Руһән ојаг галмагда бизә нә көмәк едә биләр вә бу, Јеһованын ҝүнүнүн јахынлашмасыны неҹә “тезләшдирә” биләр?
11 Петерин мүгајисәси диггәтәлајигдир. Һәгигәтән дә оғруну јахаламаг бир о гәдәр асан дејил, лакин буну етмәк үчүн бүтүн ҝеҹәни ојаг дуран ҝөзәтчинин вахташыры мүрҝүләјән кәсдән даһа чох шансы вар. Ојаг галмаг үчүн ҝөзәтчи нә етмәлидир? Ән јахшысы бүтүн ҝеҹәни ҝәзмәкдир, чүнки бу, ојаг галмаға көмәк едир. Буна бәнзәр шәкилдә, әҝәр мәсиһчиләр руһани фәалијјәтлә мәшғулдурларса, ојаг галмаг онлар үчүн асан олаҹагдыр. Бу сәбәбдән Петер бизи “мүгәддәс вә Аллаһа ихласкар” давраныша шәһадәт едән ишләрә тәшвиг едир (2 Петер 3:11). Бу ҹүр фәалијјәт Јеһованын ҝүнүнүн зүһуруну ‘јаддашымызда мөһкәм сахламаға’ көмәк едәҹәкдир. “Јаддашымызда мөһкәм сахлајараг” кими тәрҹүмә олунмуш јунан сөзү һәрфи мә’нада “тезләшдирмәк” демәкдир (2 Петер 3:11, ЈД). Доғрудур ки, биз Јеһованын нә заман фәалијјәт ҝөстәрәҹәјинә тә’сир едә билмәрик. Јеһованын ҝүнү Онун тә’јин етдији саатда ҝәләҹәкдир. Лакин әҝәр Аллаһа хидмәтлә мәшғулугса, вахт һисс олунмадан кечәҹәкдир (1 Коринфлиләрә 15:58).
12. Јеһованын сәбри һәр биримизә неҹә фајда ҝәтирир?
12 Беләликлә, Јеһованын ҝүнүнүн ҝеҹикдијини дүшүнән һәр кәс, Петерин мәсләһәтинә диггәт јетирмәли вә Јеһованын тә’јин етдији вахты сәбирлә ҝөзләмәлидир. Јеһованын сәбри сајәсиндә јердә галан вахтымызы мүдрикликлә истифадә едә биләрик. Мәсәлән, биз ән ваҹиб мәсиһчи кејфијјәтләрини јахшылашдырмаға, һәмчинин һәлә бир чох инсанларла хош хәбәри бөлүшмәјә давам едә биләрик, лакин сон ҝәлсәјди, бүтүн бунлар мүмкүн олмазды. Әҝәр ојаг дурсаг, Јеһова бу дүнја системинин сонунда бизи “нөгсансыз, ләкәсиз вә сүлһ ичиндә” тапаҹагдыр (2 Петер 3:14, 15). Бу неҹә дә бөјүк хејир-дуа олаҹагдыр!
13. Павелин Салоник шәһәриндәки мәсиһчиләрә дедији һансы сөзләр бу ҝүн хүсусилә тәтбиг едиләндир?
13 Павел Салоник шәһәриндә јашајан мәсиһчиләрә јаздығы биринҹи мәктубунда да ојаг дурмағын ҝәрәклијиндән данышырды. О, онлара мәсләһәт верирди: “Диҝәрләри кими јатмајаг; лакин ојаг дуруб ајыг олаг” (1 Салониклиләрә 5:2, 6). Ојаг дурмаг, бу ҝүн, бүтүн дүнја системинин сону јахынлашан дөврдә неҹә дә ваҹибдир! Јеһованын хидмәтчиләри руһани шејләрә лагејдликлә долу бир дүнјада јашајырлар вә бу әһвал-руһијјә онлара да тә’сир ҝөстәрә биләр. Павел буну нәзәрә алараг мәсләһәт верирди: “Ајыг олаг, көксүмүзә иман вә мәһәббәт зиреһини, башымыза дәбилгә олараг хилас үмидини ҝејәк” (1 Салониклиләрә 5:8). Павелин мәсләһәтинә диггәтли олмаға вә ојаг дурмаға бизә Аллаһын Кәламыны мүнтәзәм олараг өјрәнмәк вә гардашларымызла јығынҹаг ҝөрүшләриндә мүнтәзәм үнсијјәтдә олмаг көмәк едәҹәкдир (Матта 16:1-3).
Милјонларла инсанлар ојаг дурурлар
14. Һансы рәгәмләр ҝөстәрир ки, бу ҝүн чохлары Петерин мәсләһәтинә риајәт едир вә ојаг дурурлар?
14 Бу ҝүн Аллаһдан илһам алмыш мәсләһәтләрә диггәт јетириб ојаг дуранлар чохдурму? Бәли, чохдур. 2002-ҹи хидмәт или әрзиндә тәблиғчиләрин јүксәк сајы 6 304 645-ә чатмышдыр, бу исә 2001-ҹи илә нисбәтән 3,1 фаиз чохдур. Онларын һамысы руһән ојагдырлар. Бу ондан ҝөрүнүр ки, онлар инсанлара Аллаһын Падшаһлығы һаггында данышмаға 1 202 381 302 саат һәср етмишләр. Онлар өз ишләринә е’тинасыз јанашмырлар. Бу иш һәјатларында ән ваҹиб јери тутур. Онларын әксәријјәти өз хидмәтләринә Салвадордан олан Ноеми вә Едуардо кими јанашырлар.
15. Салвадорда баш верән һансы һадисәдән ҝөрүнүр ки, чохлары руһани ҹәһәтдән ојаг дурурлар?
15 Бир нечә ил габаг Едуардо вә Ноеми Павелин “дүнјанын индики сурәти кечиб ҝедир” сөзләринә диггәт јетирдиләр (1 Коринфлиләрә 7:31). Онлар јашајыш тәрзләрини садәләшдирдиләр вә таммүддәтли пионер хидмәтинә башладылар. Вахт кечдикҹә чохлу хејир-дуа газандылар, мәсәлән, рајон вә вилајәт ишләриндә иштирак етдиләр. Едуардо вә Ноеми ҹидди проблемләрлә гаршылашсалар да, әминдирләр ки, таммүддәтли хидмәт наминә мадди имканларыны гурбан вермәклә дүзҝүн гәрар гәбул етмишләр. 2 454 пионери дә дахил етмәклә, Салвадорда јашајан 29 269 тәблиғчинин чоху бу ҹүр фәдакарлыг ҝөстәрир. Бу исә сон ил әрзиндә тәблиғчиләрин 2 фаиз артмасына сәбәб олан амилләрдән биридир.
16. Кот-д’Ивуарда бир ҝәнҹ гардашымыз һансы руһу тәзаһүр етдирди?
16 Кот-д’Ивуарда јашајан бир ҝәнҹ мәсиһчи дә бу ҹүр әһвал-руһијјәјә саһибдир. О, филиала белә бир мәктуб јазыб: “Мән хидмәти көмәкчијәм. Лакин мән гардашлары пионер хидмәтинә тәшвиг едә билмирдим, чүнки өзүм бу саһәдә јахшы нүмунә дејилдим. Буна ҝөрә дә мән јахшы ҝәлирли ишдән чыхдым вә инди анҹаг өзүмү тә’мин етмәк үчүн ишләјирәм, бунун сајәсиндә дә хидмәт үчүн даһа чох вахтым олур”. Бу ҝәнҹ Кот-д’Ивуарда хидмәт едән 983 пионердән биридир. Бу өлкәдә кечән ил 6 701 тәблиғчи варды, бу исә артымын 5 фаизини тәшкил едир.
17. Белчикадан олан ҝәнҹ баҹымыз, әтрафдакыларын габагҹадан јаранмыш јанлыш фикирләринин ону горхутмадығыны әмәлдә неҹә ҝөстәрди?
17 Белчикада хидмәт едән 24 961 тәблиғчи јенә дә дөзүлмәзлик, габагҹадан јаранмыш јанлыш фикирләр вә һүгуг тапдаланмасы уҹбатындан әзијјәт чәкир. Лакин онлар горхуја гапылмыр вә сә’јлә хидмәт едирләр. Мәктәбдә етика дәрсиндә Јеһованын Шаһидләри тәригәтләрлә бир сыраја гојулдугда, 16 јашлы баҹымыз мүәллимдән иҹазә алды ки, бу мәсәләнин диҝәр тәрәфи һаггында данышсын. “Јеһованын Шаһидләри. Адына лајиг тәшкилат” видеофилминин вә “Јеһованын Шаһидләри. Онлар кимдирләр?” брошүрасынын көмәклији илә баҹымыза нәсиб олду ки, Јеһованын Шаһидләринин әслиндә ким олдугларыны изаһ етсин. Онун изаһаты јахшы гаршыланды вә нөвбәти һәфтә шаҝирдләрә јохлама иши верилди. Орада бүтүн суаллар Јеһованын Шаһидләринин мәсиһчи дининә аид иди.
18. Нәдән ҝөрүнүр ки, чәтин шәраитләр Арҝентина вә Мозамбик кими өлкәләрдә јашајан тәблиғчиләри Јеһоваја хидмәтдән јајындыра билмир?
18 Мәсиһчиләрин чоху бу сон ҝүнләрдә ҹидди чәтинликләрлә гаршылашырлар. Анҹаг онлар өз әсас ишләриндән јајынмамаға чалышырлар. Арҝентинада ҝениш јајылмыш игтисади проблемләрә бахмајараг, кечән ил тәблиғчиләрин јени јүксәк сајы — 126 709 нәфәр мүшаһидә олунмушдур. Мозамбикдә әввәл олдуғу кими јенә дә һәр јанда јохсуллугдур. Бунунла белә тәблиғ ишиндә 37 563 адам фәалијјәт ҝөстәрмишдир ки, бу да кечән илә нисбәтән 4 фаиз чохдур. Албанијада чохлары чәтинлик ичиндә јашајыр, лакин бу өлкәдә тәблиғчиләрин сајы 12 фаиз артмыш вә 2 708-ә чатмышдыр. Ајдындыр ки, әҝәр Аллаһын хидмәтчиләри Падшаһлығын марагларыны биринҹи јерә гојурларса, чәтин шәраитләр Јеһованын руһуна мане ола билмәз (Матта 6:33).
19. а) Нәдән ҝөрүнүр ки, Мүгәддәс Китаб һәгигәтләринә сусајан һәлим инсанлар һәлә чохдур? б) Иллик һесабатын бә’зи һансы тәфсилатларындан ҝөрүнүр ки, Јеһованын хидмәтчиләри руһән ојаг дурурлар? (20-23-ҹү сәһифәләрдәки һесабата бахын.)
19 Кечән ил әрзиндә бүтүн дүнјада һәр ај 5 309 289 Мүгәддәс Китаб өјрәнмәси кечирилмишдир. Бурадан ҝөрүнүр ки, Мүгәддәс Китаб һәгигәтләринә сусајан һәлим инсанлар һәлә чохдур. Хатирә Ҝеҹәсинә ҝәлән 15 597 746 инсандан — бу исә јени јүксәк сајдыр — һәлә чохлары Јеһованын фәал хидмәтчиләри дејилләр. Гој онлар биликдә, Јеһоваја вә гардашлыға мәһәббәтдә бөјүсүнләр. “Башга гојунлар”дан ибарәт олан “бөјүк издиһам”ын мәсһ едилмиш гардашлары илә бирликдә “ҝеҹә-ҝүндүз” Јарадана хидмәтдә сәмәрә ҝәтирмәјә давам етдикләрини ҝөрмәк неҹә дә севиндириҹидир! (Вәһј 7:9, 15; Јәһја 10:16).
Лутун нүмунәсиндән ибрәт дәрси ҝөтүрүрүк
20. Лутун вә онун арвадынын нүмунәсиндән биз нә өјрәнирик?
20 Әлбәттә ки, һәтта Аллаһын садиг хидмәтчиләри дә бир анлыг ојаглығы итирә биләрләр. Ибраһимин гардашы оғлу Лут һагда дүшүнәк. Лут јанына ҝәлән ики мәләкдән өјрәнди ки, Аллаһ Содом вә Һоморраны мәһв етмәјә һазырлашыр. Бу мә’лумат Луту тәәҹҹүбләндирә билмәзди, чүнки о, “позғун адамларын сәфаһәтә дүшкүн һәјат тәрзиндән” әзијјәт чәкирди (2 Петер 2:7). Анҹаг мәләкләр ону Содомдан чыхаранда о, “јаваш давранды”. Мәләкләр ону вә аиләсини, демәк олар ки, ҝүҹлә шәһәрдән чыхармалы олдулар. Нәтиҹәдә, Лутун арвады мәләкләрин хәбәрдарлығына гулаг асмады вә архаја бахды. Гадынын диггәтсизлији она баһа баша ҝәлди (Тәквин 19:14-17, 26). “Лутун арвадыны хатырлајын!” дејә, Иса хәбәрдарлыг етди (Лука 17:32).
21. Нәјә ҝөрә бу ҝүн ојаг дурмаг һәмишә олдуғундан даһа чох ваҹибдир?
21 Помпеј вә Һеркуланум шәһәрләриндә баш вермиш фәлакәт, Јерусәлимин мәһв едилмәси, Нуһун ҝүнләриндәки Туфан вә Лутун нүмунәси ҝөстәрир ки, хәбәрдарлыглара ҹидди јанашмаг олдугҹа ваҹибдир. Јеһованын хидмәтчиләри олан бизләр, дөврүн сонунун әламәтләрини ҝөрүрүк (Матта 24:3). Јалан диндән ајрылмышыг (Вәһј 18:4). Биринҹи әсрин мәсиһчиләри кими, биз дә Јеһованын ҝүнүнү ‘јаддашымызда мөһкәм сахламалыјыг’ (2 Петер 3:11, ЈД). Бәли, биз бу ҝүн һәмишә олдуғундан даһа ојаг дурмалыјыг. Бундан сонра да ојаг дурмаг үчүн һансы аддымлары атмалы вә һансы кејфијјәтләри инкишаф етдирмәлијик? Бу, нөвбәти мәгаләдә мүзакирә олунаҹагдыр.
[Һашијәләр]
a Биринҹи әсрдә Јерусәлимин әһалисинин 120 000-дән артыг олдуғуна ҝүман аздыр. Јевсевинин һесабламаларына ҝөрә, ерамызын 70-ҹи илиндә Јерусәлимә Пасха бајрамына Јәһудеја әјаләтинин 300 000 сакини ҝәлмишди. Галан һәлак оланлар исә, ҝөрүнүр, империјанын башга һиссәләриндән ҝәләнләр иди.
b Әлбәттә, Јеһованын нөгтеји-нәзәриндән ерамызын 33-ҹу илиндә Мусанын гануну јени әһдлә әвәз едилмишди (Ефеслиләрә 2:15).
Сиз неҹә ҹаваб верәрдиниз?
• Һадисәләр заманы һансы дәјишикликләр јәһудиләрдән олан мәсиһчиләрә гачмаға имкан јаратды?
• Һәвари Петерин вә Павелин јаздыглары һансы мәсләһәтләр бизә ојаг дурмагда көмәк едир?
• Бу ҝүн кимләр ојаг дурур вә фәалијјәт ҝөстәрирләр?
• Лутун вә онун арвадынын нүмунәсиндән һансы ибрәт дәрсини ҝөтүрә биләрик?
[20-23-ҹү сәһифәләрдәки ҹәдвәлә нәшрин өзүндә бахын]
2002 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ
[24-ҹү сәһифәдәки шәкилләр]
Фәаллыг мәсиһчиләрә ојаг дурмагда көмәк едир.