Инсанлар танымадыглары Аллаһа инанырлар
АЛМАНЛАРЫН үчдә ики һиссәси Аллаһа инаныр. Лакин миндән артыг адамдан инандыглары Аллаһы тәсвир етмәләрини хаһиш етдикдә, демәк олар ки, һамысы фәргли ҹаваблар вердиләр. “Фокус” адлы иҹтимаи-сијаси журналда гејд едилир ки, “алманларын Аллаһ һаггында олан тәсәввүрләри фәрди вә онларын өзләри кими мүхтәлифдир”. Әлбәттә ки, инсанларын Аллаһа инанмалары тә’рифә лајигдир. Анҹаг кәдәрли дејилми ки, инандыглары Аллаһын неҹә шәхсијјәт олдуғуну билмирләр?
Аллаһын шәхсијјәти һаггында бу ҹүр гејри-мүәјјәнлик тәк Алманијада дејил, бүтүн Авропада да мүшаһидә олунур. Австријада, Бөјүк Британијада вә Нидерландда кечирилән сорғу ҝениш јајылмыш нөгтеји-нәзәри ашкар етмишдир. Бу нөгтеји-нәзәрә ҝөрә Аллаһ “али гүввә, тәсвиредилмәз бир сиррдир”. Хүсусилә дә ҝәнҹләр арасында, һәтта Она инананлар арасында белә Аллаһ бир сирр олараг галыр.
Сиз Аллаһы таныјырсынызмы?
Киминсә һаггында билмәк вә кимисә шәхсән танымаг ејни мә’на дашымыр. Киминсә һаггында — гәдимдә јашамыш һөкмдар, мәшһур идманчы вә ја кино улдузу һаггында билмәк, онун барәсиндә мүәјјән мә’луматы олмаг вә онун мөвҹуд олдуғуну билмәк демәкдир. Лакин кимисә шәхсән танымаг өзүнә даһа чох шеј дахил едир. Бу, өзүнә инсанын хасијјәти, давраныш тәрзи, һиссләри, онун хошладығы вә хошламадығы шејләр вә ҝәләҹәјә даир планлары һаггында мә’луматлы олмағы дахил едир. Кимисә шәхсән танымаг, онунла сых мүнасибәтдә олмаға јол ачыр.
Јүз минләрлә инсанлар белә бир нәтиҹәјә ҝәлмишләр ки, Аллаһ һаггында думанлы тәсәввүрләрә малик олмаг вә ја садәҹә Онун мөвҹудлуғуну билмәк кифајәт дејил. Бундан әлавә онлар Аллаһла даһа јахындан таныш олмаг гәрарына ҝәлмишләр. Бунун фајдасы олмушдурму? Алманијанын шималында јашајан Паул адлы бир кишинин әввәлләр Аллаһ һаггында үмуми тәсәввүрү вар иди. Лакин бир дәфә о, Аллаһы даһа јахшы танымаг гәрарына ҝәлди. Паул дејир: “Аллаһы јахшы танымаг үчүн сә’ј вә вахт тәләб олунур, анҹаг әлдә едилән нәтиҹә буна дәјәр. Јараданла сых мүнасибәт инсанын һәјатыны әһәмијјәтли дәрәҹәдә јахшылашдырыр”.
Аллаһла јахындан таныш олмаг үчүн сәрф едилән вахт вә сә’ј буна дәјәрми? Бу суалын ҹавабыны сиз нөвбәти мәгаләдә тапаҹагсыныз.
[3-ҹү сәһифәдәки јазы]
Киминсә һаггында билмәк вә кимисә шәхсән танымаг ејни мә’на дашымыр.