Рәббин Хатирә ҝеҹәси сәнин үчүн нә мә’на кәсб едир?
“Ким лајиг олмајан тәрздә Рәббин бу чөрәјини јејиб, јахуд бу касасындан ичәрсә, Рәббин бәдәнинә вә ганына гаршы ҝүнаһкар олур” (1 КОРИНФЛИЛӘРӘ 11:27).
1. Һансы һадисә 2003-ҹү илдә ән ваҹиб һадисә олаҹагдыр вә бу бајрам нә вахтдан е’тибарән гејд олунур?
АПРЕЛ ајынын 16-да ҝүн батандан сонра, 2003-ҹи илин ән ваҹиб һадисәси ҝөзләнилир. Һәмин вахт Јеһованын Шаһидләри Иса Мәсиһин өлүмүнүн Хатирә Ҝеҹәсини гејд етмәк үчүн бир јерә топлашаҹаглар. Әввәлки мәгаләдә ҝөстәрилдији кими, ерамызын 33-ҹү илинин 14 нисанында Иса садиг һәвариләри илә бирликдә Пасха бајрамыны гејд етдикдән сонра, Рәббин Хатирә Ҝеҹәси адланан бу бајрамы тә’сис етди. Хатирә Ҝеҹәсинин символлары олан мајасыз чөрәк вә гырмызы шәраб, Мәсиһин ҝүнаһсыз бәдәнини вә төкүлән ганыны — бәшәријјәти мирас алынмыш ҝүнаһ вә өлүмдән гуртаран јеҝанә гурбаны тәмсил едир (Ромалылара 5:12; 6:23).
2. 1 Коринфлиләрә 11:27 ајәсиндә нә һагда хәбәрдарлыг олунур?
2 Хатирә Ҝеҹәсиндә символлардан гәбул едәнләр буну лајигли тәрздә етмәлидирләр. Һәвари Павел буну, гәдим Коринфдә јашајан вә Рәббин Хатирә Ҝеҹәсини лајиг олмајан тәрздә гејд едән мәсиһчиләрә мәктубунда ајдын шәкилдә ҝөстәрмишдир (1 Коринфлиләрә 11:20-22). Павел јазырды: “Ким лајиг олмајан тәрздә Рәббин бу чөрәјини јејиб, јахуд бу касасындан ичәрсә, Рәббин бәдәнинә вә ганына гаршы ҝүнаһкар олур” (1 Коринфлиләрә 11:27). Бу сөзләр нә мә’на дашыјыр?
Хатирә Ҝеҹәсинин лајиг олмајан тәрздә гејд едилмәси
3. Коринф мәсиһчиләринин бир чоху Рәббин Хатирә Ҝеҹәсиндә өзләрини неҹә апарырдылар?
3 Коринф мәсиһчиләринин бир чоху Хатирә Ҝеҹәсиндә лајиг олмајан тәрздә иштирак едирдиләр. Онларын арасында парчаланма варды, бә’зиләри исә мүәјјән мүддәт өзләри илә шам јемәји ҝәтирир, чох вахт да јемәкдә вә ичмәкдә таразлығы унудараг, ҝөрүшә гәдәр, јахуд ҝөрүш вахты јејирдиләр. Онлар руһани вә мә’нәви ҹәһәтдән ајыг дејилдиләр. Бунунла онлар “Рәббин бәдәнинә вә ганына гаршы ҝүнаһкар” олурдулар. Шам јемәјини јемәјәнләр исә аҹ галдыгларындан диггәтләрини топлаја билмирдиләр. Бәли, чохлары бу һадисәнин ҹиддилијинә вармадан, она һөрмәтсиз шәкилдә јанашырдылар. Онларын мүһакимәјә лајиг олмалары һеч дә тәәҹҹүблү дејил! (1 Коринфлиләрә 11:27-34).
4, 5. Адәтән Хатирә Ҝеҹәсиндә символлардан гәбул едәнләрин өзләрини јохламалары нәјә ҝөрә ваҹибдир?
4 Адәтән символлардан гәбул едәнләр һәр ил Хатирә Ҝеҹәсинин јахынлашмасы илә әлагәдар өзләрини јохламалыдырлар. Бу үмуми сүфрәдә лајигли тәрздә иштирак етмәк үчүн онлара руһани ҹәһәтдән сағлам олмаг ҝәрәкдир. Мурдар олдуғу һалда сүлһ тәгдимәләри гурбанынын әтиндән јејән, јә’ни үмуми сүфрәдә иштирак едән исраилли кими, Исанын гурбанлығына һөрмәтсизлик ҝөстәрән, һәтта она нифрәт едән һәр бир кәси Аллаһын ‘халгындан атылмаг’ тәһлүкәси ҝөзләјир (Левилиләр 7:20; Ибраниләрә 10:28-31).
5 Павел Хатирә Ҝеҹәсини гәдим Исраилдәки үмуми сүфрә илә, јә’ни сүлһ тәгдимәләринин гурбаныны дадмагла мүгајисә етди. О, сүфрәнин иштиракчыларынын Мәсиһә говушмалары һаггында јазараг дејир: “Сиз һәм Рәббин касасындан, һәм дә ҹинләрин касасындан ичә билмәзсиниз; һәм Рәббин, һәм дә ҹинләрин сүфрәсинә ортаг ола билмәзсиниз” (1 Коринфлиләрә 10:16-21). Адәтән символлардан гәбул едән шәхс ағыр ҝүнаһ ишләдәрсә, буну Јеһованын гаршысында е’тираф етмәли, һәмчинин јығынҹағын ағсаггалларындан руһани көмәк истәмәлидир (Сүлејманын мәсәлләри 28:13; Јагуб 5:13-16). Әҝәр һәмин инсан һәгигәтән дә төвбә едир вә төвбәјә лајиг сәмәрәләр ҝәтирирсә, онун сүфрәдә иштиракы налајиг һесаб едилмәјәҹәкдир (Лука 3:8).
Һөрмәтҹил мүшаһидәчиләр
6. Аллаһ Рәббин Хатирә Ҝеҹәсиндә иштирак етмәк имтијазыны кимләр үчүн нәзәрдә тутуб?
6 Бу ҝүн Мәсиһин 144 мин гардашынын галығына јахшылыг едән кәсләр Рәббин Хатирә Ҝеҹәсиндә символлардан гәбул етмәлидирләрми? (Матта 25:31-40; Вәһј 14:1). Хејр. Сүфрәдә иштирак етмәји Аллаһ јалныз ‘Мәсиһин һәмварисләри’, јә’ни мүгәддәс руһла мәсһ етдији кәсләр үчүн нәзәрдә тутуб (Ромалылара 8:14-18; 1 Јәһја 2:20). Бәс Падшаһлығын рәһбәрлији алтында јер үзү ҹәннәтдә әбәди јашамаг үмиди олан кәсләр һаггында нә демәк олар? (Лука 23:43; Вәһј 21:3, 4). Онлар Исанын сәмави үмидә малик олан һәмварисләри олмадыглары үчүн, Хатирә Ҝеҹәсиндә һөрмәтҹил мүшаһидәчиләр кими иштирак едирләр (Ромалылара 6:3-5).
7. Биринҹи әсрин мәсиһчиләри Хатирә Ҝеҹәсиндә символлардан гәбул едиб-етмәјәҹәкләрини һансы әламәтләрә әсасән мүәјјән едирдиләр?
7 Исанын һәгиги давамчылары биринҹи әсрдә мүгәддәс руһла мәсһ едилмишдиләр. Онларын чоху мүгәддәс руһдан башга дилләрдә данышмаг кими бир вә ја даһа артыг фөвгәлтәбии бәхшишләр алмышдылар. Онлара мәсһ олундугларыны вә Хатирә Ҝеҹәсиндә символлардан гәбул едиб-едә билмәјәҹәкләрини мүәјјән етмәк чәтин дејилди. Бизим ҝүнләрдә исә инсанын руһла мәсһ олунуб-олунмадығыны Аллаһдан илһам алмыш бу сөзләрин әсасында мүәјјән етмәк олар: “Аллаһын Руһу илә идарә олунанларын һамысы Аллаһын оғулларыдыр. Чүнки сиз јенә дә горху ичиндә јашамаг үчүн көләлик руһуну алмадыныз, оғуллуг руһуну алдыныз. Бу руһла, “Абба, Ата!”,— дејә сәсләнирик” (Ромалылара 8:14, 15).
8. “Матта” китабынын 13-ҹү фәслиндә бәһс едилән “буғда” вә “дәлиҹәләр” кимләри тәмсил едир?
8 Әсрләр боју һәгиги мәсһ едилмишләр, јаланчы мәсиһчиләри тәмсил едән “тарладакы дәлиҹәләр” арасында “буғда” кими бөјүјүрдүләр” (Матта 13:24-30, 36-43). XIX әсрин 70-ҹи илләриндән е’тибарән “буғда” даһа чох сечилмәјә башлады вә бундан бир нечә ил сонра, мәсһ едилмиш мәсиһчи нәзарәтчиләринә ашағыдакы ҝөстәришләр верилди: “Ағсаггаллар... [Хатирә Ҝеҹәсинә] топлашанларын гаршысына нөвбәти шәртләри гојмалыдырлар: 1) [Мәсиһин] ганына иман ҝәтирмәк вә 2) Рәббә һәср олунараг өләнә гәдәр өзүнү мүгәддәс хидмәтә һәср етмәјә һазыр олмаг ҝәрәкдир. Бу ҹүр әһвал-руһијјәјә малик олан вә өзүнү Аллаһа там һәср едән һәр бир кәси Рәббин өлүмүнүн Хатирә Ҝеҹәсиндә иштирак етмәјә дә’вәт етмәк лазымдыр” (“Мүгәддәс Јазыларын тәдгигаты”, VI ҹилд, “Јени Јарадылыш”, сәһ. 473, инҝ.)a.
“Башга гојунлар”ын ахтарышы
9. “Бөјүк издиһамын” кимләри тәмсил етдији 1935-ҹи илдә неҹә изаһ олунду вә символлардан гәбул едәнләрин бә’зиләринә бу неҹә тә’сир ҝөстәрди?
9 Вахтилә Јеһованын тәшкилаты јалныз Мәсиһин мәсһ едилмиш давамчыларына дејил, башга инсанлара да диггәт јетирмәјә башлады. Бунунла бағлы 1930-ҹу илләрин ортасында ваҹиб һадисә баш верди. О вахта гәдәр Аллаһын халгы Вәһј 7:9 ајәсиндә тәсвир едилән “бөјүк... издиһамы” ҝөјләр һәјатына дирилдилән 144 мин мәсһ едилмишләрлә бирликдә Мәсиһин ҝәлининин рәфигәләри вә ја јолдашлары тимсалында ҝөјдә јашајаҹаг икинҹи дәрәҹәли руһани синиф һесаб едирди (Мәзмур 45:14, 15; Вәһј 7:4; 21:2, 9). Лакин 1935-ҹи ил мај ајынын 31-дә Јеһованын Шаһидләринин Вашингтонгда (АБШ) кечирилән конгресиндә сәсләнән мә’рузәдә Мүгәддәс Китаб әсасында ҝөстәрилди ки, “бөјүк издиһам” сонун вахтында јашајан “башга гојунлара” аиддир (Јәһја 10:16). Бу конгресдән сонра, әввәлләр Хатирә Ҝеҹәсиндә символлардан гәбул едәнләр сәмави үмидә дејил, јер үзүндә әбәди јашамаг үмидинә малик олдугларыны анлајараг буна сон гојдулар.
10. Мүасир “башга гојунларын” үмидини вә мәс’улијјәтләрини неҹә тәсвир едәрдиниз?
10 1935-ҹи илдән е’тибарән, фидијә гурбанлығына иман ҝәтирән, Аллаһа һәср олунан вә Падшаһлығын тәблиғи үчүн мәсһ едилмиш “кичик сүрү”јә көмәк едән “башга гојунлар” сырасына дахил олан кәсләрин ахтарышына хүсуси диггәт јетирилир (Лука 12:32). Бу башга гојунлар јер үзү ҹәннәтдә әбәди јашамаг үмидинә маликдирләр, амма Падшаһлығы мирас алан мүасир галыгдан башга һеч бир саһәдә фәргләнмирләр. Гәдим Исраилдә Јеһоваја ибадәт едән вә Гануна табе олан ҝәлмәләр кими, буҝүнкү башга гојунлар да хош хәбәрин тәблиғи кими мәсиһчи вәзифәсини руһани Исраилин үзвләри илә бирликдә иҹра едирләр (Галатијалылара 6:16). Лакин гәдим Исраилдә ҝәлмәләрдән һеч ким падшаһ, јахуд каһин ола билмәзди, ејни илә башга гојунлардан да һеч ким сәмави Падшаһлыгда идарә едә вә ја каһин кими хидмәт едә билмәз (Тәснијә 17:15).
11. Инсанын вәфтиз олунма тарихи онун һансы үмидә малик олмасына нәјә ҝөрә тә’сир едә биләр?
11 1930-ҹу илләр үчүн ајдын олду ки, сәмави синфин әксәријјәти артыг сечилиб. Инди исә, артыг бир нечә онилликдир ки, јер үзүндә јашамаг үмидинә малик олан башга гојунларын ахтарышы ҝедир. Әҝәр мәсһ едилмишләрдән ким исә садиг галмазса, 144 минин арасында онун јерини, еһтимал ки, “башга гојунлардан” артыг узун илләрдир ки, Аллаһа хидмәт едән кәс тутаҹагдыр.
Јанлыш фәрзијјәләр неҹә јараныр?
12. Һансы һалларда символлардан гәбул етмәјә сон гојмаг лазымдыр вә нәјә ҝөрә?
12 Мәсһ едилмиш мәсиһчиләр сәмави дә’вәтә малик олдугларына тамамилә әминдирләр. Бәс белә дә’вәтә малик олмајан кәс Хатирә Ҝеҹәсиндә символлардан гәбул едәрсә, онда неҹә? Әлбәттә, онлар инди һеч вахт сәмави дә’вәтә малик олмадыгларыны биләндә виҹданлары тәшвиг едәҹәк ки, бу ишә сон гојсунлар. Белә дә’вәтә малик олмадығыны биләрәк өзүнү сәмави падшаһ вә каһин кими тәгдим едән кәсә Аллаһ илтифат ҝөстәрмәјәҹәкдир (Ромалылара 9:16; Вәһј 20:6). Һарунун евинә мәхсус олан каһинлији өзүндән разы һалда әлдә етмәјә ҹан атдығы үчүн, Јеһова леви нәслиндән олан Кораһы өлүмә мәһкум етди (Чыхыш 28:1; Сајлар 16:4-11, 31-35). Әҝәр мәсиһчиләрдән ким исә Хатирә Ҝеҹәсиндә символлардан гәбул етмәјә һаггы олмадығыны анлајарса, бу ишә сон гојмалы вә бағышласын дејә, Јеһоваја тәвазөкарҹасына дуа етмәлидир (Мәзмур 19:13).
13, 14. Нәјә ҝөрә бә’зиләриндә сәмави дә’вәтә малик олдугларына даир јанлыш фәрзијјәләр јарана биләр?
13 Бә’зиләриндә сәмави дә’вәтә малик олдугларына даир јанлыш фәрзијјә неҹә јарана биләр? Һәјат јолдашынын өлүмү, јахуд башга бир фаҹиә уҹбатындан инсан јер үзүндәки һәјата олан марағыны итирә биләр. Башгасы исә, ола билсин, өзүнү мәсһ едилмиш мәсиһчи һесаб едән јахын достунун сәмави үмидинә шәрик олмаг истәјир. Лакин Аллаһ руһла мәсһ едилмишләрин сырасыны долдурмағы һеч кимә һәвалә етмәјиб. Вә кими исә Падшаһлығын вариси кими мәсһ едәркән, бу хәбәри һәмин инсана һансыса сәсләрин васитәсилә билдирмир.
14 Бүтүн јахшы инсанларын ҝөјә ҝетмәси кими јанлыш дини тәсәввүрләрин тә’сири алтында ким исә елә дүшүнә биләр ки, сәмави дә’вәтә маликдир. Буна ҝөрә дә еһтијатлы олмаг лазымдыр ки, кечмишдә малик олдуғумуз, јахуд башга јанлыш нөгтеји-нәзәрләр бизә тә’сир ҝөстәрмәсин. Мәсәлән, ким исә өзүндән соруша биләр: “Емосионал вәзијјәтимә тә’сир едән дәрманлар гәбул едирәмми? Јанлыш гәрар гәбул етмәјимә сәбәб олаҹаг дәрәҹәдә ҝүҹлү һиссләр кечирмәјә мејллијәмми?”
15, 16. Нәјә ҝөрә бә’зиләри јанлыш олараг өзләринин мәсһ олундугларыны ҝүман едә биләрләр?
15 Башгалары өзләриндән соруша биләрләр: “Јүксәк мөвге тутмаға ҹан атыраммы? Инди, јахуд ҝәләҹәкдә Мәсиһин һәмвариси кими һакимијјәтә наил олмаг арзусунда олараг шөһрәтпәрәстлик ахтармырам ки?” Гејд етмәк лазымдыр ки, биринҹи әсрдә дә’вәт олунан Падшаһлығын варисләринин һамысы јығынҹагда мәс’улијјәтли вәзифәјә малик дејилдиләр. Бундан савајы, сәмави дә’вәтә малик оланлар јүксәк мөвге ахтармыр вә мәсһ едилдикләринә ҝөрә ловғаланмырлар. Онлар, “Мәсиһин ағлына” малик олан кәсләрдән ҝөзләнилән тәвазөкарлығы тәзаһүр етдирирләр (1 Коринфлиләрә 2:16).
16 Бә’зиләри ҝениш Мүгәддәс Китаб билијинә саһиб олдугларына ҝөрә дә елә гәрара ҝәлә биләрләр ки, сәмави дә’вәтә маликдирләр. Лакин руһла мәсһ олунмаг о демәк дејил ки, инсан гејри-ади анлајышлара саһибдир; Павел бә’зи мәсһ едилмишләрә тә’лим вә мәсләһәт вермәли олмушдур (1 Коринфлиләрә 3:1-3; Ибраниләрә 5:11-14). Аллаһ бүтүн халгыны руһани гида илә тә’мин етмәк үчүн тәдбир ҝөрүб (Матта 24:45-47). Буна ҝөрә дә дүшүнмәк лазым дејил ки, мәсһ едилмишләр јер үзүндә јашамаг үмидинә малик оланлардан даһа чох һикмәтлидирләр. Мүгәддәс Китаба әсасланан суаллара ҹаваб вермәкдә, шаһидлик етмәкдә вә ја Мүгәддәс Китаба әсасланан мә’рузәләр илә чыхыш етмәкдә мәһарәтли олмаг инсанын мүгәддәс руһла мәсһ олунмасына ишарә дејил. Бүтүн бунлары јер үзүндә јашамаг үмидинә малик олан мәсиһчиләр дә јахшы баҹарыр.
17. Руһла мәсһ олунмаг нәдән вә кимдән асылыдыр?
17 Әҝәр һәмиманлымыз сәмави дә’вәт һаггында сорушурса, ағсаггал, јахуд башга бир јеткин мәсиһчи бу суалы онунла мүзакирә едә биләр. Лакин башгасынын јеринә гәрар гәбул етмәк олмаз. Һәгигәтән сәмави дә’вәтә малик олан инсанын бу һагда башгалары илә мәсләһәтләшмәјә еһтијаҹы јохдур. Мәсһ едилмишләрә “фани тохумдан дејил, фани олмајандан, Аллаһын һәјатбәхш вә әбәдијјәтә гәдәр баги олан кәламы васитәсилә” јенидән доғулмаг верилиб (1 Петер 1:23). Аллаһ мүгәддәс руһунун вә Кәламынын васитәсилә инсанда санки “тохум” јарадыр, бу исә инсаны сәмави үмидә малик олан “јени мәхлуг” едир (2 Коринфлиләрә 5:17). Мәсһ едилмишләри Јеһова Өзү сечир. Мәсһ олунмаг “арзу едән, јахуд сә’ј ҝөстәрән инсандан дејил, анҹаг... Аллаһдан асылыдыр” (Ромалылара 9:16). Бәс инсан сәмави дә’вәтә малик олдуғуна неҹә әмин ола биләр?
Онлар нәјә ҝөрә әминдирләр?
18. Һансы мә’нада Аллаһын руһу мәсһ едилмишләрин руһуна шәһадәт едир?
18 Аллаһын руһунун шәһадәти, мәсһ едилмиш мәсиһчиләри сәмави дә’вәтә малик олдугларына әмин едир. Павел јазырды: “Сиз... оғуллуг руһуну алдыныз. Бу руһла, “Абба, Ата!”, — дејә сәсләнирик. Елә һәмин Руһ биздәки руһа шәһадәт едир ки, биз Аллаһын өвладларыјыг. Вә әҝәр өвладыјыгса, демәли, ејни заманда варисләрик, Аллаһын варисләријик; вә әҝәр Мәсиһлә бәрабәр иззәт газанмаг үчүн Онунла изтираб чәкириксә, Мәсиһин һәмварисләријик” (Ромалылара 8:15-17). Мүгәддәс руһ елә тә’сир ҝөстәрир ки, мәсһ олунмушлардакы руһ, јә’ни һөкм сүрән әһвал-руһијјә Мүгәддәс Јазыларда Јеһованын руһани өвладлары һаггында дејиләнләри өзләринә аид етмәјә тәшвиг едир (1 Јәһја 3:2). Аллаһын руһу онлары Аллаһын оғуллары олдуғуна әмин едир вә онларда хүсуси үмид ојадыр (Галатијалылара 4:6, 7). Камил бир инсан кими јер үзүндә әбәди олараг доғма вә әзизләрин әһатәсиндә јашамаг чох ҝөзәлдир, лакин Аллаһын мәсһ едилмишләрә вердији үмид бундан ибарәт дејил. Аллаһ өз мүгәддәс руһунун васитәсилә онларда сәмави үмидә гаршы о гәдәр ҝүҹлү истәк һасил едир ки, онлар јер үзүндәки бүтүн севинҹ вә үмидләри гурбан вермәјә һазырдырлар (2 Коринфлиләрә 5:1-5, 8; 2 Петер 1:13, 14).
19. Јени әһд мәсһ едилмиш мәсиһчиләрин һәјатында һансы ролу ојнајыр?
19 Мәсһ едилмиш мәсиһчиләр сәмави дә’вәтә малик олдугларына, онларла јени әһд бағландығына там әминдирләр. Хатирә Ҝеҹәсини тә’сис едәркән Иса бу һагда деди: “Бу каса Мәним сизин үчүн төкүлән ганымла ҝерчәкләнән Әһди-Ҹәдиддир [јени әһддир]” (Лука 22:20). Јени әһд Аллаһла мәсһ едилмишләр арасында бағланыб (Јеремја 31:31-34; Ибраниләрә 12:22-24). Иса вәсатәтчидир. Јени әһд Мәсиһин ганы төкүлән заман гүввәјә минди вә бу әһдә јалныз јәһудиләр дејил, башга халглардан олан инсанлар да гошулду. Вә онларын һамысы Јеһованын ады наминә халг тәшкил етдиләр вә Ибраһимин “нәсли”нин бир һиссәси олдулар (Галатијалылара 3:26-29; Һәвариләрин ишләри 15:14). Бу “әбәди әһдин” сајәсиндә руһани исраиллиләрин һәр биринин ҝөјләр һәјатына дирилмәси вә әбәдилијә наил олмасы мүмкүн олур (Ибраниләрә 13:20).
20. Мәсиһлә мәсһ едилмишләр арасында һансы әһд бағланмышдыр?
20 Мәсһ едилмишләр малик олдуглары үмидә әминдирләр. Онларла даһа бир әһд — Падшаһлыг әһди кәсилмишдир. Иса шаҝирдләринин онунла шәриклији һагда демишдир: “Кечиртдијим сынагларда Мәнимлә бәрабәр оланлар сизсиниз вә Атам Мәнә Падшаһлығы вәсијјәт етдији кими, Мән дә сизә вәсијјәт едирәм” (Лука 22:28-30, И–93). Мәсиһ вә онунла бирликдә падшаһлыг едәҹәк кәсләр арасында бағланан бу әһд әбәдидир (Вәһј 22:5).
Хатирә Ҝеҹәси әрәфәси ҝөзәл вахтдыр
21. Хатирә Ҝеҹәси әрәфәси бизә бөјүк фајда ҝәтирсин дејә нә едә биләрик?
21 Хатирә Ҝеҹәси әрәфәси өзү илә бир чох хејир-дуалар ҝәтирир. Бу вахт үчүн планлашдырылан Мүгәддәс Китаб һиссәләринин охунмасындан фајда әлдә едә биләрик. Бундан башга, бу әрәфә, дуа етмәк, Исанын јер үзүндәки һәјаты вә өлүмү үзәриндә дүшүнмәк, һәмчинин Падшаһлыг һаггындакы тәблиғ ишиндә иштирак етмәк үчүн хүсусилә мүнасиб вахтдыр (Мәзмур 77:12; Филипилиләрә 4:6, 7). Бу бајрамы гејд етмәк бизә, фидијә гурбанлығы илә бағлы Аллаһын вә Мәсиһин ҝөстәрдикләри мәһәббәти хатырладыр (Матта 20:28; Јәһја 3:16). Онларын бизим үчүн етдикләри бизә үмид вә тәсәлли верир, һәмчинин Мәсиһин јолу илә јеримәкдә гәтијјәтимизи мөһкәмләтмәлидир (Чыхыш 34:6; Ибраниләрә 12:3). Хатирә Ҝеҹәси, Аллаһа һәср олунмағымыза мүвафиг јашамагда вә Онун әзиз Оғлунун сәдагәтли давамчылары олмагда бизи мөһкәмләндирмәлидир.
22. Аллаһын инсанлара вердији ән бөјүк бәхшиш һансыдыр вә бу бәхшишә ҝөрә миннәтдарлығы неҹә ҝөстәрмәк олар?
22 Јеһова бизә неҹә дә ҝөзәл бәхшишләр тәгдим едир! (Јагуб 1:17). Биз Онун Кәламындан рәһбәрлијә, Онун руһунун көмәјинә вә әбәди һәјат үмидинә маликик. Аллаһын ән бөјүк бәхшиши исә, мәсһ едилмишләрин вә иман ҝәтирән башга инсанларын ҝүнаһлары үчүн верилән Исанын гурбанлығыдыр (1 Јәһја 2:1, 2). Бәс Исанын өлүмү сәнин үчүн нә мә’на кәсб едир? Рәббин Хатирә Ҝеҹәсини гејд етмәк үчүн 2003-ҹү ил апрелин 16-да ҝүн батандан сонра јығылаҹаг миннәтдар инсанларын арасында олаҹагсанмы?
[Һашијә]
a Әсәр Јеһованын Шаһидләри тәрәфиндән дәрҹ олунмушдур, артыг нәшр едилмир.
Сиз неҹә ҹаваб верәрдиниз?
• Хатирә Ҝеҹәсиндә символлардан кимләр гәбул етмәлидир?
• Нәјә ҝөрә “башга гојунлар” Хатирә Ҝеҹәсиндә садәҹә олараг һөрмәтҹил мүшаһидәчиләр кими иштирак едирләр?
• Мәсһ едилмиш мәсиһчиләр һарадан билирләр ки, Мәсиһин өлүмүнүн Хатирә Ҝеҹәсиндә символлардан гәбул етмәлидирләр?
• Хатирә Ҝеҹәси әрәфәси һансы ишләр үчүн ҝөзәл вахтдыр?
[14-ҹү сәһифәдәки диаграм/шәкилләр]
(Диаграма нәшрин өзүндә бахын)
Хатирә Ҝеҹәсиндә топлашанлар
МИЛЈОНЛАРЛА
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[14-ҹү сәһифәдәки шәкил]
Бу ил Рәббин Хатирә Ҝеҹәсинә ҝәләҹәксинизми?
[17-ҹи сәһифәдәки шәкилләр]
Хатирә Ҝеҹәси әрәфәси — Мүгәддәс Китабы даһа чох охумаг вә Падшаһлыг һаггындакы тәблиғ ишиндә даһа чох иштирак етмәк үчүн мүнасиб вахтдыр.