Гүввәтли вә ҹәсарәтли олун!
“Ҹәсур олун, Мән дүнјаја галиб ҝәлдим” (ЈӘҺЈА 16:33).
1. Кән’ан дијарында исраиллиләри нә ҝөзләјирди вә онлар һансы көмәји алдылар?
ИСРАИЛЛИЛӘР Иордан чајыны кечиб, Аллаһын вә’д етдији дијара дахил олмаг үзрә олдуглары заман, Муса онлара деди: “Гүввәтли олун вә үрәкли олун, горхмајын вә онларын үзләриндән һүркмәјин; чүнки сәнинлә бәрабәр јеријән Аллаһын Рәбдир”. Сонра Муса исраиллиләри Кән’ан дијарына апармаг үчүн сечилән Јешуну чағырыб, ҹәсарәтли олмаг нәсиһәтини она шәхсән тәкрар етди (Тәснијә 31:6, 7). Даһа сонра Јеһова өзү Јешуну үрәкләндирәрәк деди: “Гүввәтли... вә үрәкли ол... анҹаг... гүввәтли ол вә чох үрәкли ол” (Јешу 1:6, 7, 9). Бу сөзләр вахтында дејилмишди. Иордан чајынын о бири саһилиндәки ҝүҹлү дүшмәнләрлә гаршылашмаг үчүн, исраиллиләрдән гүввә вә ҹәсарәт тәләб олунурду.
2. Бу ҝүн биз һансы шәраитләрдә јашајырыг вә нәјә еһтијаҹ дујуруг?
2 Бу ҝүн мәсиһчиләр дә Аллаһын вә’д етдији јени дүнјаја дахил олмаг үзрәдирләр вә Јешу кими, онлар да ҹәсарәтли олмалыдырлар (2 Петер 3:13, Вәһј 7:14). Лакин бизим вәзијјәтимиз Јешунун вәзијјәтиндән фәрглидир. О, гылынҹ вә мизрагла дөјүшүрдү. Биз исә руһани мүһарибә апарыр вә һеч заман әлимизә һәгиги силаһ алмырыг (Ишаја 2:2-4; Ефеслиләрә 6:11-17). Јешу Вә’д едилән дијара дахил олдугдан сонра да бир чох амансыз дөјүшләрдә иштирак етмишди. Биз исә инди — јени дүнјаја дахил олмаздан әввәл ҝәрҝин мүбаризә апармалы олуруг. Ҝәлин, биздән ҹәсарәт тәләб едән бә’зи вәзијјәтләри нәзәрдән кечирәк.
Биз нә үчүн мүбаризә апармалы олуруг?
3. Мүгәддәс Китабда баш дүшмәнимиз һаггында нә дејилир?
3 Һәвари Јәһја јазырды: “Билирик ки, биз Аллаһданыг, бүтүн дүнја исә шәририн һакимијјәти алтындадыр” (1 Јәһја 5:19). Бу сөзләр, мәсиһчиләрин өз иманларыны горумаг үчүн нәјә ҝөрә мүбаризә апармалы олдугларынын әсас сәбәбини ҝөстәрир. Мәсиһчи өз нөгсансызлығыны горудугда, Шејтан Иблиси мүәјјән дәрәҹәдә мәғлуб етмиш олур. Буна ҝөрә дә Шејтан, садиг мәсиһчиләри горхутмаға вә ашырмаға чалышараг, “нә’рә чәкән... аслан кими ҝәзир” (1 Петер 5:8). Доғрудан да, Шејтан мәсһ едилмиш мәсиһчиләрлә вә онларын јолдашлары илә мүһарибә апарыр (Вәһј 12:17). Бу мүһарибәдә Шејтан елә инсанлардан истифадә едир ки, онлар биләрәкдән, јахуд билмәдән онун истәјинә ујғун һәрәкәт едирләр. Шејтана вә онун тәрәфдарларына гаршы мөһкәм дурмаг үчүн ҹәсарәт тәләб олунур.
4. Иса нә барәдә хәбәрдарлыг етмишди вә мәсиһчиләр һансы кејфијјәти тәзаһүр етдирирләр?
4 Иса билирди ки, Шејтан вә онун тәрәфдарлары хош хәбәрә ҝүҹлү мүгавимәт ҝөстәрәҹәкләр, буна ҝөрә дә өз давамчыларына хәбәрдарлыг етди: “Сизә әзијјәт вериб өлдүрәҹәкләр; вә Мәним адыма ҝөрә бүтүн халглар сизә нифрәт едәҹәкләр” (Матта 24:9). Бу сөзләр биринҹи әсрдә јеринә јетмиш вә инди дә јеринә јетмәкдәдир. Доғрудан да, Јеһованын мүасир Шаһидләриндән бә’зиләринин таб ҝәтирдикләри тә’гибләр, тарих әрзиндә баш вермиш башга тә’гибләр кими сәрт олмушдур. Лакин мәсиһчиләр бу ҹүр чәтинликләрин гаршысында ҹәсарәтсизлик ҝөстәрмирләр. Онлар билирләр ки, “инсандан горхан өзүнү тәләјә салар”, онлар исә бу тәләјә дүшмәк истәмирләр (Сүлејманын мәсәлләри 29:25, МКШ).
5, 6. а) Һансы һалларда биздән ҹәсарәт тәләб олунур? б) Ҹәсарәт тәләб олунан вәзијјәтләрдә садиг мәсиһчиләр неҹә давранырлар?
5 Биз тә’гибләрдән савајы, ҹәсарәт тәләб едән башга сынагларла да гаршылашырыг. Бә’зи тәблиғчиләр үчүн хош хәбәри танымадыглары инсанлара чатдырмаг сынагдыр. Бә’зи мәктәблиләрдән дөвләтә сәдагәтли олдугларыны бәјан етмәји вә ја бајраға тә’зим етмәји тәләб етдикдә, бу онлар үчүн бөјүк сынаға чеврилир. Бу ҹүр һаллар әслиндә дини характер дашыдығы үчүн ҝәнҹ мәсиһчиләр ҹәсарәтлә өз мөвгеләрини горујурлар — онлар өзләрини Аллаһа мәгбул тәрздә апарырлар вә онларын ҝөзәл давраныш тәрзләри бизи чох севиндирир.
6 Дүшмәнләрин тәһрики илә күтләви информасија васитәләри бизим һаггымызда јалан мә’лумат јајдыгда, јахуд онларын өзләри “ганун илә пислик” едәрәк мәсиһчиләрин дининә мәһдудијјәт гојмаға чалышдыгда да биздән ҹәсарәт тәләб олунур (Мәзмур 94:20). Мәсәлән, гәзет, радио вә ја телевизија васитәсилә инсанлара Јеһованын Шаһидләри һаггында тәһриф олунмуш мә’лумат вә ја ағ јалан чатдырылдыгда биз неҹә мүнасибәт ҝөстәрмәлијик? Биз буна тәәҹҹүб етмәлијикми? Хејр. Биз белә шејләрин баш верәҹәјини ҝөзләјирик (Мәзмур 109:2). Һәмчинин бизи бә’зиләринин тәһриф едилмиш мә’луматлара, јахуд јаланлара инанмалары да тәәҹҹүбләндирмир, чүнки “тәҹрүбәсиз адам һәр сөзә инанар” (Сүлејманын мәсәлләри 14:15). Лакин садиг мәсиһчиләр онларын гардашлары һаггында дејиләнләрә инанмыр вә һеч заман јол вермирләр ки, јалан мә’луматлар онлары мәсиһчи ҝөрүшләрини бурахмаға, тәблиғ хидмәтиндә аз иштирак етмәјә вә иманда бүдрәмәјә вадар етсин. Әксинә, онлар ‘өзләрини Аллаһын хидмәткарлары кими тәгдим едирләр... шәрәф вә шәрәфсизликлә, мәзәммәт вә тә’рифлә. Јаланчы сајылырлар [дүшмәнләрин иддиасына ҝөрә]’, амма [әслиндә] дүзүнү сөјләјирләр’ (2 Коринфлиләрә 6:4, 8).
7. Һансы суалларла өзүмүзү јохлаја биләрик?
7 Павел, Тимофејә мүраҹиәт едәрәк јазырды: “Аллаһ бизә горхаглыг руһуну дејил, фәгәт гүдрәт... руһуну вермишдир. Рәббимизин шәһадәтиндән... утанма” (2 Тимотејә 1:7, 8, КМ; Марк 8:38). Бу сөзләри охујаркән өзүмүздән соруша биләрик: “Дини е’тигадларыма ҝөрә утаныраммы, јохса ону ҹәсарәтлә мүдафиә едирәм? Бир јердә ишләдијим (јахуд охудуғум) кәсләрә Јеһованын Шаһиди олдуғуму демишәмми, јохса бу һагда сусмаға чалышырам? Башгаларындан сечилмәјә утанырам, јохса Јеһова илә мүнасибәтимин мәни башгаларындан фәргләндирдији үчүн фәхр едирәм?” Әҝәр ким исә хош хәбәри тәблиғ етмәјә горхурса вә ја популјар олмајан нөгтеји-нәзәрә малик олдуғуна ҝөрә утанырса, гој Јеһованын Јешуја дедијини хатырласын: “Гүввәтли... вә үрәкли ол”. Унутмајын ки, ән ваҹиби иш вә синиф јолдашларымызын дејил, Јеһова илә Иса Мәсиһин рә’јидир (Галатијалылара 1:10).
Ҹәсарәти неҹә инкишаф етдирә биләрик?
8, 9. а) Бир дәфә илк мәсиһчиләрин ҹәсарәти неҹә сынаға мә’руз галды? б) Петер вә Јәһја һәдә-горхуја неҹә ҹаваб вердиләр вә сонрадан онларла вә онларын гардашлары илә нә баш верди?
8 Бу чәтин ҝүнләрдә нөгсансызлығымызы горумаг үчүн, ҹәсарәти неҹә инкишаф етдирә биләрик? Бәс ҹәсарәти илк мәсиһчиләр неҹә инкишаф етдирирдиләр? Јерусәлимин баш каһинләри вә ағсаггаллары Петер вә Јәһјаја Исанын адындан тәблиғ етмәји гадаған етдикдә нә баш вердијини хатырлајаг. Шаҝирдләр онлары динләмәкдән имтина етдиләр, каһин вә ағсаггаллар исә онлары һәдәләјиб бурахдылар. Сонра онлар гардашларынын јанына ҝәлиб, бирликдә дуа етдиләр: “Ја Рәбб, онларын тәһдидләринә бах вә Өз гулларына гүввә вер ки, Сәнин сөзүнү там ҹәсарәтлә сөјләсинләр” (Һәвариләрин ишләри 4:13-29). Ҹаваб олараг Јеһова онлары мүгәддәс руһла мөһкәмләндирди вә сонрадан јәһуди рәһбәрләринин шәһадәт етдикләри кими, онлар тә’лимләрини “Јерусәлимин һәр јеринә” јајдылар (Һәвариләрин ишләри 5:28).
9 Ҝәлин баш вермиш һадисәни анализ едәк. Јәһуди рәһбәрләринин һәдә-горху ҝәлмәләринә бахмајараг, шаҝирдләр тәслим олмаг фикриндә дејилдиләр. Әксинә, тәблиғи давам етдирмәкдә ҹәсарәтли олмаг үчүн дуа етдиләр. Сонра дуаларына ујғун даврандылар вә Јеһова руһунун васитәсилә онлары мөһкәмләндирди. Онларла баш верән һадисәдән ҝөрүнүр ки, Павелин бир гәдәр сонра башга бир контекстдә јазылан сөзләри тә’гиб олунан мәсиһчиләрә тәтбиг едиләндир. Павел дејирди: “Мәни мөһкәмләндирән... васитәсилә һәр шеји етмәјә гадирәм” (Филипилиләрә 4:13).
10. Тәбиәтҹә утанҹаг олан кәсләрә Јеремјанын нүмунәси неҹә көмәк едир?
10 Әҝәр инсан тәбиәтҹә утанҹагдырса, бәс онда неҹә? Белә инсан мүгавимәтләрә бахмајараг, ҹәсарәтлә Јеһоваја хидмәт едә биләрми? Әлбәттә, едә биләр! Јеһова Јеремјаны пејғәмбәр тә’јин едәндә, бу ҝәнҹин реаксијасыны хатырлајын. О деди: Мән “ушағам”. Ҝөрдүјүмүз кими, о, өзүнү бу ишә јарарлы сајмырды. Лакин Јеһова ону бу сөзләрлә үрәкләндирди: “Мән ушағам, демә; чүнки кимә сәни ҝөндәрсәм ҝедәҹәксән вә сәнә әмр етдијим һәр шеји сөјләјәҹәксән. Онларын үзүндән горхма; чүнки сәни гуртармаг үчүн мән сәнинлә бәрабәрәм” (Јеремја 1:6-10). Јеремја Јеһоваја е’тибар едирди вә буна ҝөрә дә Онун ҝүҹү сајәсиндә гәтијјәтсизлијинә галиб ҝәлди вә Исраилдә сон дәрәҹә ҹәсарәтли шаһид олду.
11. Бу ҝүн мәсиһчиләр нәјин сајәсиндә Јеремја кими ҹәсарәтли ола биләрләр?
11 Бу ҝүн мәсһ едилмиш мәсиһчиләр, демәк олар ки, Јеремја кими, ејни тапшырыға маликдирләр вә онлар е’тинасызлыға, истеһзалара, тә’гибләрә бахмајараг, “башга гојунлардан” ибарәт олан “бөјүк издиһамын” көмәји илә Јеһованын нијјәтләри һаггында бәјан етмәкдәдирләр (Јәһја 10:16; Вәһј 7:9). Онлары Јеһованын Јеремјаја дедији: “Горхма” кәлмәси үрәкләндирир. Онлар тапшырыгларынын Аллаһдан олдуғуну вә Онун хәбәрини тәблиғ етдикләрини бир ан белә унутмурлар (2 Коринфлиләрә 2:17).
Тәглид едилмәјә лајиг ҹәсарәт нүмунәләри
12. Иса ҹәсарәтли олмаға даир һансы ҝөзәл нүмунәни верди вә өз давамчыларыны неҹә мөһкәмләндирди?
12 Ҹәсарәт инкишаф етдирмәк ҹәһдимиздә Јеремја кими ҹәсарәтли давранан инсанларын нүмунәси үзәриндә дүшүнмәк бизә көмәк олаҹагдыр (Мәзмур 77:12). Мәсәлән, Исанын хидмәтини тәдгиг едәркән, онун Шејтан тәрәфиндән сынаға чәкиләндә вә јәһуди рәһбәрләринин кәскин мүгавимәтләри илә гаршылашанда ҝөстәрдији ҹәсарәтә һејран олуруг (Лука 4:1-13; 20:19-47). Јеһованын гүввәси сајәсиндә Иса сарсылмаз иди вә өлүмүндән бир аз әввәл шаҝирдләринә белә демишди: “Дүнјада кәдәриниз олаҹагдыр; амма ҹәсур олун, Мән дүнјаја галиб ҝәлдим” (Јәһја 16:33; 17:16). Исанын нүмунәсини тәглид етмәклә, онун шаҝирдләри дә дүнјаја галиб ҝәлә биләрдиләр (1 Јәһја 2:6; Вәһј 2:7, 11, 17, 26). Лакин онлар “ҹәсур” олмалы идиләр.
13. Павел филипилиләри неҹә руһландырды?
13 Исанын өлүмүндән бир гәдәр сонра Павел вә Силаны Филипи шәһәриндәки зиндана салдылар. Сонра Павел бу шәһәрдәки јығынҹағы нөвбәти сөзләрлә руһландырды: “Сиз бир руһда сабит дурурсунуз, Мүждәјә иман үчүн јекдилликлә сә’ј ҝөстәрирсиниз. Вә һеч вәҹһлә әлејһдарларыныздан горхмурсунуз”. Бу саһәдә онлары мөһкәмләтмәк үчүн Павел јазырды: “Бу да [мәсиһчиләрин тә’гиб едилмәси] онлар [тә’гибчиләр] үчүн һәлак әламәти, сизин үчүн исә хилас әламәтидир бу да Аллаһдандыр. Чүнки Мәсиһ наминә јалныз Она иман етмәк дејил, Онун уғрунда әзаб чәкмәк имтијазы да сизә еһсан олунду” (Филипилиләрә 1:27-29).
14. Павелин ҹәсарәти Ромадакы гардашлара неҹә тә’сир ҝөстәрди?
14 Павел Филипи шәһәриндәки јығынҹаға мәктуб јазанда јенидән — бу дәфә исә Ромада — зинданда иди. Лакин о, ҹәсарәтлә тәблиғ етмәјә давам едирди. Бу һансы нәтиҹәләри верди? О јазырды: “Бүтүн сарај мүһафизләринә вә диҝәрләринин һамысына мә’лум олду ки, мәним һәбсим Мәсиһ үчүндүр. Вә гардашлардан чоху, һәбсимдән өтрү Рәббә ҝүвәнәрәк, Аллаһын кәламыны горхусуз бәјан етмәк үчүн даһа чох ҹәсарәт ҝөстәрдиләр” (Филипилиләрә 1:13, 14).
15. Ҹәсарәтли олмаг гәтијјәтимизи мөһкәмләдән ҝөзәл иман нүмунәләрини һарадан тапа биләрик?
15 Павелин нүмунәси бизи мөһкәмләндирир. Буну, һакимијјәт диктатор вә руһаниләрин әлиндә олан өлкәләрдә индијәдәк тә’гибләрә дөзән мүасир мәсиһчиләрин ҝөзәл нүмунәләри һаггында да демәк олар. Бу мәсиһчиләрин чохунун тәрҹүмеји-һаллары “Ҝөзәтчи Гүлләси” вә “Ојанын!” журналларында, һәмчинин “Јеһованын Шаһидләринин иллик мәҹмуәси”ндә дәрҹ олунмушдур. Бу ҹүр мәгаләләри охудугда јадда сахламаг лазымдыр ки, тәрҹүмеји-һаллары јазылан һәмин гардашлар да бизим кими ади адамлардыр, лакин онлар чох чәтин вәзијјәтләрә дүшдүкдә, Јеһова онлара ән үстүн гүдрәти вермиш вә онлар таб ҝәтирә билмишләр. Биз дә әмин ола биләрик ки, әҝәр вәзијјәт тәләб едәрсә, Јеһова буну бизим үчүн дә едәҹәкдир.
Ҹәсарәтимиз Јеһоваја севинҹ вә шәрәф ҝәтирир
16, 17. Бу ҝүн ҹәсарәти неҹә инкишаф етдирмәк олар?
16 Әҝәр мәсиһчи горху һисси кечирмәсинә бахмајараг, һәгигәт вә дүзҝүнлүк тәрәфиндә мөһкәм дурурса, ону ҹәсарәтли адландырмаг олар. Бәли, һәр бир мәсиһчи, әҝәр сидги-үрәкдән Јеһованын ирадәсини јеринә јетирмәји арзу едирсә, садиг галмагда гәтијјәтлидирсә вә Јеһованын кечмишдә онун кими сајсыз-һесабсыз инсанлары мөһкәмләндирдијини бир ан да олса унутмурса, ҹәсарәтли ола биләр. Бундан әлавә, әҝәр ҹәсарәтимизин Јеһоваја севинҹ вә шәрәф ҝәтирдијини унутмуругса, бу зәифләмәмәк үчүн бизә даһа чох гәтијјәт верәҹәкдир. Биз ришхәндләрә вә даһа кәскин давранышлара дөзмәјә һазырыг, чүнки Аллаһы дәрин мәһәббәтлә севирик (1 Јәһја 2:5; 4:18).
17 Һеч вахт унутмајын ки, әҝәр иманымыз уғрунда әзаб чәкириксә, бу о демәк дејил ки, биз нә исә пис иш ҝөрмүшүк (1 Петер 3:17). Биз Јеһованын һакимијјәтинин тәрәфиндә олдуғумуза, јахшылыг етдијимизә вә дүнјадан олмадығымыза ҝөрә әзаб чәкирик. Бу һагда һәвари Петер јазмышды: “Әҝәр сиз јахшы иш ҝөрәрәк, әләм чәкиб, тәһәммүл етсәниз, бу Аллаһ гаршысында мәгбулдур”. Петер һәмчинин јазыр: “Гој Аллаһын ирадәсинә ҝөрә әзаб чәкәнләр јахшылыг едәрәк, ҹанларыны садиг олан Јарадана тапшырсынлар” (1 Петер 2:20; 4:19). Бәли, иманымыз севән Атамыз Јеһованы севиндирир вә Она шәрәф ҝәтирир. Ҹәсарәтли олмаг үчүн бу неҹә дә ваҹиб амилдир!
Һаким даирәләри гаршысында
18, 19. Ҹәсарәт тәзаһүр етдирдикдә, әслиндә һакимләрә нәји билдирмиш олуруг?
18 Иса давамчыларынын тә’гиб олунаҹаглары һаггында дејәркән, һәмчинин әлавә етди: “[Инсанлар] сизи мәһкәмәләрә верәҹәк, синагогларында дөјәҹәкләр; онлара вә диҝәр халглара шәһадәт үчүн Мәнә ҝөрә валиләрин вә һөкмдарларын јанына апарылаҹагсыныз” (Матта 10:17, 18). Һаким вә ја рәһбәрләр гаршысында јалан иттиһамлара ҹаваб вермәк үчүн ҹәсарәт тәләб олунур. Лакин чәтин вәзијјәтә бахмајараг, шаһидлик етмәк үчүн фүрсәтдән истифадә едәриксә, ваҹиб иш ҝөрмүш оларыг. Әслиндә бизи мүһакимә едән кәсләрә Јеһованын “Мәзмур” китабынын 2-ҹи фәслиндә јазылмыш сөзләрини чатдырырыг: “Еј падшаһлар, артыг ағлынызы башыныза алын; еј дүнја һакимләри, ибрәт алын. Рәббә горху илә гуллуг един” (Мәзмур 2:10, 11). Чох вахт мәһкәмәдә Јеһованын Шаһидләринә гаршы јалан иттиһамлар ирәли сүрүлдүкдә, һакимләр дин азадлығыны мүдафиә едирләр, биз дә бунун үчүн онлара миннәтдарыг. Анҹаг бә’зи һакимләр дүшмәнләрин тә’сиринә дүшүрләр. Мүгәддәс Китабда онлара дејилир: “Ибрәт алын”.
19 Һакимләр билмәлидирләр ки, ән јүксәк ганун Јеһова Аллаһын ганунудур. Онлар јадда сахламалыдырлар ки, бүтүн инсанлар, о ҹүмләдән һакимләр дә, Јеһова Аллаһа вә Иса Мәсиһә һесабат верәҹәкләр (Ромалылара 14:10). Буна ҝөрә дә, инсан һакимләри әдаләтли гәрар гәбул едиб-етмәсәләр дә, ҹәсарәтли олмаға әсасымыз чохдур, чүнки бизи Јеһова дәстәкләјир. Мүгәддәс Китабда дејилир: “Бүтүн она сығынанлар нә бәхтијардыр!” (Мәзмур 2:12).
20. Тә’гиб вә бөһтанлара таб ҝәтирмәли олсаг да, нәјә ҝөрә севинә биләрик?
20 Дағүстү тәблиғиндә Иса демишдир: “Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман, сиз нә бәхтијарсыныз! Севинин вә шадланын! Чүнки ҝөјләрдә мүкафатыныз бөјүкдүр; чүнки сиздән габаг пејғәмбәрләри дә белә тә’гиб етмишләр” (Матта 5:11, 12). Әлбәттә ки, тә’гиб олунмаг һеч дә хош дејил, лакин тә’гибләрә, о ҹүмләдән күтләви информасија васитәсилә верилән јанлыш мә’луматлара бахмајараг, мөһкәм мөвге тутуругса, севинә биләрик. Бу о демәкдир ки, биз Јеһованы мәмнун едирик вә мүкафат алаҹағыг. Ҹәсарәт ҝөстәрмәклә сүбут едирик ки, һәгиги имана маликик вә Аллаһын илтифатына әминлик әлдә едирик. Һәмчинин ҹәсарәтимизлә ҝөстәририк ки, биз тамамилә Јеһоваја ҝүвәнирик. Нөвбәти мәгаләдән ҝөрәҹәјимиз кими, Јеһоваја бу ҹүр ҝүвәнмәк мәсиһчи үчүн олдугҹа ваҹибдир.
Нә өјрәндиниз?
• Бу ҝүн һансы вәзијјәтләрдә ҹәсарәт тәләб олунур?
• Ҹәсарәти неҹә инкишаф етдирә биләрик?
• Ҹәсарәтә даир кимләр ҝөзәл нүмунә верирләр?
• Ҹәсарәтли олмағы нә үчүн арзулајырыг?
[20-ҹи сәһифәдәки шәкилләр]
Биз хош хәбәрә ҝөрә утанмырыг.
[21-ҹи сәһифәдәки шәкилләр]
Алманијада Симон Арнолд (инди Либстер), Малавидә Уиддас Мадона, Украјнада Лидија вә Алексеј Курдас ҹәсарәт ҝөстәрмиш вә шәрә галиб ҝәлмишләр.
[22-ҹи сәһифәдәки шәкил]
Мүгәддәс Јазылара әсасланан мөвгејимизи һакимә ҹәсарәтлә изаһ едириксә, ваҹиб мәгсәдә чатырыг.
[23-ҹү сәһифәдәки шәкил]
Павелин зинданда ҝөстәрдији ҹәсарәт хош хәбәрин јајылмасына әһәмијјәтли дәрәҹәдә тә’сир етди.