Еј ҝәнҹләр, Јеһова әмәјинизи унутмајаҹаг!
“Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (ИБРАНИЛӘРӘ 6:10).
1. “Ибраниләрә” вә “Малаки” китабындан неҹә ҝөрүнүр ки, Јеһова сәнин хидмәтини гијмәтләндирир?
ЕЛӘ олубму ки, сән достуна јахшылыг етмисән, әвәзиндә исә һеч бир миннәтдарлыг ҝөрмәмисән? Етдијин јахшылыға гијмәт верилмәдикдә вә ја бу јахшылыг унудулдугда чох аҹы олур. Амма Јеһоваја мүгәддәс хидмәти үрәкдән иҹра етдикдә вәзијјәт тамамилә башга ҹүр олур! Мүгәддәс Китабда дејилир: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10). Бунун нә демәк олдуғунун үзәриндә дүшүн. Јеһова Аллаһ һәгигәтән дә һесаб едир ки, әҝәр сәнин индијәдәк хидмәтдә етдикләрини вә һал-һазырда етмәкдә олдуғун ишләри унударса, һагсызлыг едәр, бунунла да ҝүнаһ ишләтмиш олар. Неҹә дә миннәтдар Аллаһдыр! (Малаки 3:10).
2. Јеһоваја хидмәти һәгигәтән дә надир едән нәдир?
2 Сән белә бир миннәтдар Аллаһа ибадәт вә хидмәт етмәк кими хүсуси шәрәфә лајиг ҝөрүлмүсән. Дүнјанын алты милјарда јахын әһалисинин ичиндә ҹәми алты милјон һәмиманлын олдуғуну дүшүндүкдә малик олдуғун имкан һәгигәтән дә надирдир. Бундан әлавә, мадам ки, сән хош хәбәри ешидиб она һај вермисән, демәли, Јеһова сәнинлә шәхсән марагланыр. Иса демишдир: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз” (Јәһја 6:44). Бәли, Јеһова Мәсиһин гурбанлығынын ҝәтирдији фајдалардан шәхсән һәр кәсин јарарланмасына көмәк едир.
Өз шәрәфли хидмәтини гијмәтләндир
3. Кораһын оғуллары Јеһоваја хидмәт етмәк үстүнлүјүнә ҝөрә миннәтдарлыг һиссләрини неҹә ифадә етмишләр?
3 Әввәлки мәгаләдә мүзакирә етдијимиз кими, сәнин Јеһованын үрәјини севиндирмәк кими надир имканын вар (Сүлејманын мәсәлләри 27:11). Бу имканы һәмишә јүксәк гијмәтләндирмәк лазымдыр. Кораһын оғуллары Јеһоваја хидмәт етмәк үстүнлүјүнү нә гәдәр гијмәтләндирдикләрини өзләринин илһам алмыш мәзмурларындан бириндә ифадә етмишләр: “Һәјәтләриндә бир ҝүн, мин ҝүндән јахшыдыр. Пислик чадырларында отурмагданса, Аллаһын евиндә кандарда дурмаг мәним үчүн јахшыдыр” (Мәзмур 84:10).
4. а) Нәјә ҝөрә бә’зиләринә елә ҝәлә биләр ки, Јеһоваја хидмәт онлары мәһдудлашдырыр? б) Јеһова хидмәтчиләринә диггәт јетирмәк вә онлары мүкафатландырмаг кими ҝүҹлү истәјини неҹә ҝөстәрир?
4 Сәмави Атана хидмәт етмәк имканыны сән дә белә гијмәтләндирирсәнми? Һәрдән елә ҝәлә биләр ки, Јеһоваја хидмәт сәнин азадлығыны мәһдудлашдырыр. Бу тәбиидир, чүнки Мүгәддәс Китабын нормаларына мүвафиг јашамаг үчүн нәји исә гурбан вермәк лазым ҝәлир. Нәтиҹә е’тибары илә, Јеһованын сәндән тәләб етдикләри сәнин өз хејринәдир (Мәзмур 1:1-3). Бундан савајы, Јеһова сәнин сә’јини ҝөрүр вә садиглијинә ҝөрә миннәтдарлығыны билдирир. Павел јазырды ки, Јеһова “Ону ахтаранлара мүкафат верир” (Ибраниләрә 11:6). Јеһова буну етмәк үчүн фүрсәт ахтарыр. Гәдим Исраилин салеһ бир пејғәмбәри демишдир: “Рәббин ҝөзләри, үрәкләри онунла бүтүн оланлар уғрунда гүввәтли олдуғуну ҝөстәрмәк үчүн бүтүн јер үзүндә фырланыр” (2 Тарихләр 16:9).
5. а) Үрәјинин тамамилә Јеһоваја бағлы олдуғуну ҝөстәрмәјин ән јахшы үсулларындан бири һансыдыр? б) Нәјә ҝөрә елә ҝәлә биләр ки, башгалары илә иманын барәдә данышмаг чәтиндир?
5 Үрәјинин Јеһоваја тамамилә бағлы олдуғуну ҝөстәрмәјин ән јахшы үсулларындан бири, башгаларына Онун һаггында данышмагдыр. Һачанса синиф јолдашларындан кимәсә өз иманын һаггында данышмаг имканын олубму? Әввәлҹә бу сәнә дәһшәтли ҝәлә биләр, садәҹә белә бир фикрин өзү сәни горхуда биләр. Бәлкә дә сән дүшүнүрсән: “Бәс онлар мәнә ҝүлсәләр неҹә? Диним онлара гәрибә ҝәлсә неҹә?” Иса демишдир ки, Падшаһлыг һаггындакы хәбәри һамы динләмәјәҹәкдир (Јәһја 15:20). Лакин бу о демәк дејил ки, сән лаға гојулмаға вә инкар едилмәјә мәһкумсан. Әксинә, бир чох ҝәнҹ Шаһидләр өз е’тигадларыны мүдафиә едәрәк, марагланан кәсләри тапмыш вә һәтта һәмјашыдлары онлара даһа чох һөрмәт етмәјә башламышлар.
“Јеһова сәнә көмәк едәҹәкдир”
6, 7. а) 17 јашлы бир гыз синиф јолдашларына неҹә шәһадәтлик едә билди? б) Ҹенниферин нүмунәсиндән сән нә өјрәндин?
6 Бәс ҹәсарәтини топлајыб өз иманын һаггында неҹә даныша биләрсән? Динин һаггындакы суаллара дүзҝүн вә ачыг шәкилдә ҹаваб вермәк барәдә нә үчүн гәти гәрара ҝәлмәјәсән? 17 јашлы Ҹенниферин нүмунәсини нәзәрдән кечирәк. О дејир: “Тәнәффүс заманы наһар едирдик. Әјләшдијим столун архасындакы гызлар диндән сөһбәт ачдылар вә онлардан бири мәним һансы динә мәхсус олдуғуму сорушду”. Ҹеннифер ҹаваб вермәјә горхурдуму? “Бәли, — дејә о е’тираф едир, — чүнки мән онларын неҹә реаксија ҝөстәрәҹәкләрини билмирдим”. Бәс Ҹеннифер нә етди? “Мән онлара Јеһованын Шаһиди олдуғуму сөјләдим, — дејә о давам едир. — Әввәлҹә чох тәәҹҹүбләндиләр. Ҝөрүнүр, онлар Јеһованын Шаһидләринин гәрибә инсанлар олдуғуну зәнн едирдиләр. Ҹавабым онлары суаллар вермәјә тәшвиг етди вә мән онларын бә’зи јанлыш тәсәввүрләрини ајдынлашдыра билдим. Һәтта бу сөһбәтдән сонра онлардан бә’зиләри вахташыры мәнә јахынлашыр вә суаллар верирдиләр”.
7 Ҹеннифер фүрсәтдән истифадә едиб е’тигады һаггында данышдығы үчүн тәәссүфләндими? Әсла јох! О дејир: “Тәнәффүс баша чатанда үрәјимдә бөјүк раһатлыг дујурдум. Јеһованын Шаһидләринин әслиндә ким олдугларыны инди һәмин гызлар даһа јахшы баша дүшүрләр”. Ҹеннифер садә бир мәсләһәт верир: “Әҝәр синиф јолдашларына вә ја мүәллимләринә шәһадәт етмәкдә чәтинлик чәкирсәнсә, гысаҹа дуа ет. Јеһова сәнә көмәк едәҹәкдир. Сән имкандан истифадә едиб, шәһадәтлик етдијин үчүн шад олаҹагсан” (1 Петер 3:15).
8. а) Неһемја ҝөзләнилмәз вәзијјәтә дүшдүкдә дуа она неҹә көмәк етди? б) Мәктәбдә һансы вәзијјәтләрдә Јеһоваја гысаҹа дуа етмәк тәләб олуна биләр?
8 Диггәт јетир ки, Ҹеннифер, иманын һаггында данышмаг имканын јарандыгда Јеһоваја “гысаҹа дуа етмәји” мәсләһәт ҝөрүр. Фарс падшаһы Артаксерксин сагиси Неһемја ҝөзләнилмәз вәзијјәтә дүшдүкдә мәһз бу ҹүр давранды. Неһемја чох кәдәрли иди, чүнки о, јәһудиләрин аҹынаҹаглы вәзијјәтдә олдугларыны вә Јерусәлимин дивар вә дарвазаларынын дағыдылдығыны ешитмишди. Падшаһ, Неһемјанын тәлаш ичиндә олдуғуну ҝөрдү вә нә баш вердијини сорушду. Ҹаваб вермәмишдән әввәл Неһемја рәһбәрлик алмаг үчүн дуа етди. Сонра о, Јерусәлимә гајытмаг вә дағылмыш шәһәрин бәрпасына көмәк етмәк үчүн падшаһдан ҹәсарәтлә иҹазә истәди. Артаксеркс Неһемјанын хаһишини јеринә јетирди (Неһемја 2:1-8). Сән бу һадисәдән һансы ибрәт дәрсини ҝөтүрә биләрсән? Әҝәр иманын һаггында данышмаг үчүн фүрсәт јаранырса, амма сән горхурсанса Јеһоваја үрәјиндә дуа етмәк имканына е’тинасыз јанашма. Петер јазмышдыр: “Бүтүн гајғынызы... [Јеһованын] үзәринә гојун, чүнки сизин гајғыныза галан Одур” (1 Петер 5:7; Мәзмур 55:22).
Ҹаваб вермәјә һазыр оланлар
9. 13 јашлы Лија “Ҝәнҹләрин суаллары” китабындан 23 нүсхә пајламаға неҹә наил олду?
9 Даһа бир нүмунәни нәзәрдән кечирәк. 13 јашлы Лија тәнәффүс заманы “Ҝәнҹләрин суаллары. Практики мәсләһәтләр”a китабыны охујурду. О сөјләјир: “Башгалары мәнә ҝөз гојурдулар вә бир аз кечмәмиш әтрафыма бир дәстә шаҝирд топлашды. Онлар бу китабын нәдән бәһс етдијини билмәк истәјирдиләр”. Елә о ҝүн дөрд гыз һәмин китабдан истәдиләр. Сонра онлар бу китабы башгаларына охумаға вердиләр вә онлар да һәмин китабдан истәдикләрини билдирдиләр. Нөвбәти бир нечә һәфтә әрзиндә Лија синиф јолдашларына вә онларын достларына “Ҝәнҹләрин суаллары” китабындан 23 нүсхә пајлады. Тәнәффүс заманы башгалары ондан нә охудуғуну сорушдугда Лијаја ҹаваб вермәк асан идими? Әлбәттә, асан дејилди! “Әввәлҹә мән чох һәјәҹанландым, — дејә о е’тираф едир. — Лакин дуа етдим вә Јеһованын мәнимлә олдуғуну билирдим”.
10, 11. Балаҹа исраилли гыз Суријанын орду башчысына Јеһова һаггында билмәјә неҹә көмәк етди вә бундан сонра На’ман өз һәјатыны неҹә дәјишди?
10 Јәгин диггәт јетирдин ки, Лија илә баш верән һадисә суријалылара әсир дүшән балаҹа исраилли гызын дүшдүјү вәзијјәтә охшардыр. Суријанын орду башчысы На’ман ҹүзам хәстәлијинә тутулмушду. Еһтимал ки, онун арвады бир дәфә сөһбәт заманы елә бир шеји хатырлатды ки, бу балаҹа гызы иманы һаггында данышмаға тәшвиг етди. “Каш ки, әфәндим Самаријадакы пејғәмбәрин өнүндә олајды! О заман ону ҹүзамындан азад едәрди” — дејә, балаҹа гыз нида етди (2 Краллар 5:1-3).
11 Бу балаҹа гызын ҹәсарәти сајәсиндә На’ман өјрәнди ки, “бүтүн дүнјада Аллаһ јохдур, анҹаг Исраилдә вардыр”. О, һәтта гәрара ҝәлди ки, “башга илаһиләрә дејил, анҹаг Јеһоваја јандырылан тәгдимә вә гурбан” әрз едәҹәк (2 Краллар 5:15, 17). Ҝөрдүјүн кими, Јеһова бу балаҹа гызын ҹәсарәтинә хејир-дуа верди. О, буҝүнкү ушагларын да сә’јинә хејир-дуа верир. Лија буна өз тәҹрүбәсиндә әмин олду. Вахт кечдикҹә синиф јолдашларынын бә’зиләри она јахынлашыб, “Ҝәнҹләрин суаллары” китабынын дүзҝүн давранмагда онлара көмәк етдијини сөјләјирдиләр. Лија дејир: “Мән башгаларына Јеһова һаггында даһа чох билмәјә вә һәјатларыны дәјишмәјә көмәк етдијими билдијим үчүн севинирдим”.
12. Өз иманыны мүдафиә етмәк үчүн ҹәсарәти неҹә әлдә етмәк олар?
12 Ҹеннифер вә Лија кими сән дә севинҹ дуја биләрсән. Бунун үчүн Петерин мәсиһчиләрә јаздығы, о ҹүмләдән сәнә дә аид олан мәсләһәтини динлә: “Малик олдуғунуз үмид барәсиндә сиздән һесабат истәјән һәр кәсә һәмишә мүлајимликлә вә еһтирамла ҹаваб вермәк үчүн һазыр олун” (1 Петер 3:15). Сән буну неҹә едә биләрсән? Илк мәсиһчиләр кими Јеһоваја дуа ет ки, “там ҹәсарәтлә” тәблиғ етмәкдә сәнә көмәк етсин (Һәвариләрин ишләри 4:29). Сонра башгаларына өз е’тигадын барәдә ҹәсарәтлә сөјлә. Нәтиҹә сәни тәәҹҹүбләндирә биләр. Ән башлыҹасы исә, сән Јеһованын үрәјини севиндирәҹәксән.
Видеофилмләр вә мәктәб тапшырыглары
13. Шаһидлик етмәк үчүн бә’зи мәктәблиләр һансы имканлардан истифадә едирләр? (14 вә 15-ҹи сәһифәләрдәки чәрчивәләрә бахын.)
13 Бир чох мәктәблиләр видеофилмләрдән истифадә едәрәк синиф јолдашларына вә мүәллимләринә өз иманлары һаггында данышырлар. Бә’зи һалларда мәктәб тапшырыгларынын сајәсиндә дә Јеһованы иззәтләндирмәк имканы јараныр. Мәсәлән, һәр икиси Јеһованын Шаһиди олан 15 јашлы ҝәнҹләр тарих дәрсиндә дүнја динләриндән биринә аид мә’рузә һазырламаг тапшырығыны алдылар. Онлар Јеһованын Шаһидләри һаггында јазмаг гәрарына ҝәлдиләр вә “Јеһованын Шаһидләри — Аллаһын Падшаһлығынын мүждәчиләри”b китабындакы материалдан истифадә етдиләр. Һәмчинин онлар 5 дәгигәлик ҝириш сөзләри илә чыхыш етмәли идиләр. Һәм мүәллимин, һәм дә шаҝирдләрин о гәдәр суаллары варды ки, онлар планлашдырылдығындан 20 дәгигә артыг чыхыш етмәли олдулар. Бундан сонра бир нечә һәфтә әрзиндә синиф јолдашлары Јеһованын Шаһидләри һаггында суаллар вермәјә давам едирдиләр!
14, 15. а) Нәјә ҝөрә инсан гаршысындакы горху тәләдир? б) Нәјә ҝөрә әминликлә өз дини е’тигадларынла бөлүшә биләрсән?
14 Нәзәрдән кечирдијимиз һадисәләр ҝөстәрир ки, әҝәр сән башгаларына өз дини е’тигадларын һаггында данышыр вә Јеһованын Шаһиди олдуғуна ҝөрә утанмырсанса, бөјүк хејир-дуалара саһиб ола биләрсән. Јол вермә ки, инсан гаршысындакы горху һисси сәни севинҹдән вә кимәсә Јеһова һаггында өјрәнмәјә көмәк етмәк кими шәрәфдән мәһрум етсин. Мүгәддәс Китаб хәбәрдарлыг едир: “Инсандан горхан өзүнү тәләјә салар, амма Рәббә ҝүвәнән архајын јашар” (Сүлејманын мәсәлләри 29:25, МКШ).
15 Јадында сахла ки, бир мәсиһчи кими сәндә һәмјашыдларынын һәддиндән артыг еһтијаҹ дујдуглары бир шеј вар. Бу, индики дөврдә ән јахшы һәјат тәрзи һаггында билик, ҝәләҹәкдә исә Аллаһын вә’д етдији әбәди һәјата үмиддир (1 Тимотејә 4:8). Мисал үчүн, Бирләшмиш Штатлары ҝөтүрәк. Сән фикирләшә биләрсән ки, бу өлкәдә инсанлар үмумиликдә руһани шејләрә гаршы е’тинасызлыг ҝөстәрир вә даһа чох мадди шејләрлә марагланырлар. Лакин бир сорғу ҝөстәрди ки, орада јашајан јенијетмәләрин, демәк олар ки, јарысы динә чох ҹидди јанашыр, ҝәнҹләрин үчдә бир һиссәси үчүн исә Аллаһа иман һәјатларында “ән ваҹиб” јери тутур. Јәгин ки, бу ҹүр вәзијјәт дүнјанын башга өлкәләриндә дә мүшаһидә олунур. Буна ҝөрә дә, чох еһтимал ки, мәктәбдәки һәмјашыдларын сәнин Мүгәддәс Китаб һаггында билдикләрини ешитмәјә шад олаҹаглар.
Јеһоваја ҝәнҹлијиндә јахынлаш
16. Јеһованы мәмнун етмәк үчүн, башгалары илә Онун һаггында данышмагдан савајы, даһа нә етмәк лазымдыр?
16 Сөзсүз ки, Јеһованын үрәјини севиндирмәк үчүн садәҹә Онун һаггында данышмаг кифајәт етмир. Сән һәм дә Онун нормаларына ујғун јашамалысан. Һәвари Јәһја јазмышдыр: “Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир” (1 Јәһја 5:3). Јеһоваја јахынлашсан, сән буна әмин олаҹагсан. Бәс Она неҹә јахынлашмаг олар?
17. Сән Јеһоваја неҹә јахынлаша биләрсән?
17 Мүгәддәс Китабы вә она әсасланан нәшрләри охумаг үчүн вахт ајыр. Јеһова һаггында нә гәдәр чох өјрәнсән, Она табе олмаг вә башгаларына Онун һаггында данышмаг бир о гәдәр сәнә асан олаҹагдыр. Иса демишдир: “Јахшы адам үрәјинин јахшылыг хәзинәсиндән јахшы шејләр чыхарыр... чүнки онун ағзы үрәјиндән ҝәләни сөјләјир” (Лука 6:45). Буна ҝөрә дә, үрәјини “јахшы шејләрлә” долдур. Нәјә ҝөрә бу саһәдә гаршына мәгсәдләр гојмајасан? Мәсәлән, гаршына нөвбәти һәфтәдә олаҹаг јығынҹаг ҝөрүшләринә һазырлашмаг кими мәгсәд гоја биләрсән. Сонракы мәгсәдин гыса, лакин үрәкдән ҝәлән шәрһи вермәклә ҝөрүшдә иштирак етмәк ола биләр. Әлбәттә, өјрәндикләрини һәјата кечирмәк дә чох ваҹибдир (Филипилиләрә 4:9).
18. Һәрдән мүгавимәтлә гаршылашсан белә, нәјә әмин ола биләрсән?
18 Јеһоваја хидмәт кечиб-ҝетмәјән, һәтта әбәди олан хејир-дуалар ҝәтирир. Дүздүр, Јеһованын Шаһиди олдуғун үчүн һәрдән мүгавимәт вә истеһза илә гаршылашаҹагсан. Лакин Мусаны јадына сал. Мүгәддәс Китабда дејилир ки, о, “алаҹағы мүкафаты ҝөзләјирди” (Ибраниләрә 11:24-26). Сән дә әмин ола биләрсән ки, Јеһова һаггында өјрәнмәјә вә башгаларына Онун һаггында данышмаға чалышдығын үчүн О, сәни мүкафатландыраҹаг. Јеһова, Онун ады наминә ҝөрдүјүн иши вә ҝөстәрдијин мәһәббәти һеч заман унутмајаҹаг (Ибраниләрә 6:10).
[Һашијәләр]
a Јеһованын Шаһидләри тәрәфиндән нәшр едилиб.
b Јеһованын Шаһидләри тәрәфиндән нәшр едилиб.
Хатырлајырсанмы?
• Нәјә ҝөрә әмин ола биләрсән ки, Јеһова сәнин хидмәтини гијмәтләндирир?
• Мәктәбдә шаһидлик етмәк бә’зиләринә неҹә мүјәссәр олур?
• Синиф јолдашларына шаһидлик етмәк үчүн ҹәсарәти неҹә әлдә едә биләрсән?
• Јеһоваја неҹә јахынлаша биләрсән?
[14-ҹү сәһифәдәки чәрчивә/шәкилләр]
Һәтта ушаглар да Јеһоваја иззәт ҝәтирирләр!
Һәтта ушаглара белә мәктәбдә шаһидлик етмәк мүјәссәр олур. Бә’зи нүмунәләри нәзәрдән кечирәк.
5-ҹи синифдә охујан он јашлы Амберин синиф јолдашлары дәрсдә Икинҹи Дүнја мүһарибәси заманы алман фашистләринин јәһудиләрә неҹә зүлм етдикләри барәдә китаб охујурдулар. Амбер мүәллимәсинә “Бәнөвшәји үчбуҹаглар” видеофилмини ҝәтирмәји гәрара алды. Мүәллимә насист режими заманы Јеһованын Шаһидләринин дә тә’гиб олундугларыны биләндә тәәҹҹүбләнди. О, видеофилми бүтүн синфә ҝөстәрди.
8 јашлы Алекса охудуғу синфә мәктуб јазмышды. Бу мәктубда һамы илә бирликдә Милад бајрамыны гејд едә билмәмәсинин сәбәбини изаһ едирди. Мәктуб онун мүәллимәсинә елә тәәссүрат бағышлады ки, о, Алексадан мәктубу синиф гаршысында, үстәлик башга ики синиф гаршысында уҹадан охумағы хаһиш етди! Алекса ахырда деди: “Әгидәси мәним әгидәмдән фәргли олан кәсләрә һөрмәт етмәји өјрәнмишәм вә сағ олун ки, сиз дә мәним Милад бајрамыны гејд етмәмәк гәрарыма һөрмәтлә јанашырсыныз”.
Ерик биринҹи синфә ҝедән кими мәктәбә “Мәним Мүгәддәс Китаб һекајәләри китабым” нәшрини ҝәтирди вә ону синиф јолдашларына ҝөстәрмәк үчүн иҹазә истәди. Мүәллимәси она деди: “Мәним даһа јахшы тәклифим вар. Бу һекајәләрдән бирини синиф үчүн оху.” Ерик елә дә етди. Сонра о хаһиш етди ки, ким һәмин китабдан истәјирсә әлини галдырсын. Он сәккиз ушаг, о ҹүмләдән мүәллимә дә әлини галдырды! Ерик һесаб едир ки, шаһидлик етмәк үчүн инди онун хүсуси саһәси вар.
9 јашлы Уитни “Јеһованын Шаһидләри вә тәһсил”c брошүрасына ҝөрә чох миннәтдардыр. О дејир: “Адәтән бу брошүраны мүәллимләримә һәр ил анам верирди, амма бу ил буну өзүм етдим. Бу брошүранын сајәсиндә мүәллимәм мәни “һәфтәнин шаҝирди” сечди”.
[Һашијә]
c Хатырланан бүтүн нәшрләр Јеһованын Шаһидләри тәрәфиндән нәшр олунуб.
[15-ҹи сәһифәдәки чәрчивә/шәкилләр]
Өз е’тигадлары барәдә данышмаг үчүн бә’зи ҝәнҹләрин малик олдуглары имканлар
Мә’рузә һазырламаг тапшырығы алдыгда, бә’зиләри шаһидлик етмәјә имкан јарадан мөвзу сечирләр.
Чохлары мүәллимләринә дәрсин мөвзусу илә бағлы олан видеофилм, јахуд әдәбијјат верирләр.
Башгалары исә тәнәффүс заманы Мүгәддәс Китабы, јахуд она әсасланан нәшрләри охујурлар вә бә’зән елә олур ки, башга ҝәнҹләр онлара суалларла мүраҹиәт едирләр.