Сыхынтылы анларда бүтүнлүклә Јеһоваја бел бағла
“Аллаһ бизә сығынаҹаг јер вә гүввәтдир; сыхынтыда һәмән һазыр бир јардымдыр” (МӘЗМУР 46:1).
1, 2. а) Һансы нүмунәдән ҝөрүнүр ки, Аллаһа бел бағладығымызы јалныз сөјләмәк кифајәт дејил? б) Нәјә ҝөрә биз Јеһоваја садәҹә олараг сөздә бел бағламалы дејилик?
АЛЛАҺА бел бағладығымызы сөјләмәк, буну әмәлдә ҝөстәрмәкдән даһа асандыр. Мисал үчүн, АБШ банкнотлары вә метал пуллары үзәриндә артыг чохдандыр ки, белә бир јазы мөвҹуддур: “Аллаһа ҝүвәнирик”a. 1956-ҹы илдә АБШ конгресинин гәбул етдији гануна әсасән бу ифадә Бирләшмиш Штатларын милли шүары е’лан олунду. Лакин гәрибә олса да, јалныз АБШ-да дејил, бүтүн дүнјада инсанлар Аллаһдан чох пула вә вар-дөвләтә бел бағлајырлар (Лука 12:16-21).
2 Мәсиһин һәгиги давамчылары олан бизләр Јеһоваја садәҹә олараг сөздә бел бағламалы дејилик. “Иман... әмәлләр олмадыгда” өлү олдуғу кими, Аллаһа бел бағлајырыг иддиасы да, әҝәр әмәлләримизлә ҝөстәрмириксә, фајдасыздыр (Јагуб 2:26). Әввәлки мәгаләдә дејилирди ки, биз дуаларымызы Јеһоваја үнванламагла, Онун Кәламында мәсләһәт ахтармагла вә рәһбәрлик алмаг үчүн Онун тәшкилатына мүраҹиәт етмәклә Она бел бағлајырыг. Инди ҝәлин, сыхынтылы анларда һәмин үч аддымы атмағын үсулуну нәзәрдән кечирәк.
Ишсиз галанда, јахуд вәсаит чатышмајанда
3. Јеһованын Шаһидләри бу “чәтин анларда” һансы игтисади проблемләрлә гаршылашыр вә Аллаһын бизә көмәк етмәк истәдијини һарадан билирик?
3 Бу “чәтин анларда” биз, мәсиһчиләр, башга инсанларын гаршылашдыглары ејни чәтинликләрлә гаршылашырыг (2 Тимотејә 3:1). Буна ҝөрә дә биз ҝөзләнилмәдән ја ишсиз гала биләр, ја да ки, ҝүнүн чох һиссәсини кичик мәбләғдә әмәк һаггына ишләмәјә мәҹбур ола биләрик. Бу ҹүр вәзијјәтдә ‘јахынларымызын гејдинә галмаг’ асан иш дејил (1 Тимотејә 5:8). Гадир Аллаһ бу ҹүр һалларда бизә көмәк етмәк истәјирми? Шүбһәсиз! Доғрудур, Јеһова бизи бу системдәки һәјатла әлагәли чәтинликләрдән мүдафиә етмир. Буна бахмајараг, әҝәр биз Она бел бағлајырыгса, үзәримиздә Мәзмур 46:1 ајәсиндә јазылан сөзләр јеринә јетәҹәк: “Аллаһ бизә сығынаҹаг јер вә гүввәтдир; сыхынтыда һәмән һазыр бир јардымдыр”. Бәс игтисади сыхынтылар јашајаркән Јеһоваја бүтүнлүклә бел бағладығымызы неҹә ҝөстәрә биләрик?
4. Мадди чәтинликләр јаранан заман биз нә барәдә дуа едә биләрик вә бу ҹүр дуалара Јеһова неҹә ҹаваб верир?
4 Јеһоваја бел бағладығымызы ҝөстәрмәјин бир үсулу, Она дуада мүраҹиәт етмәкдир. Бәс нә барәдә дуа етмәк олар? Әҝәр мадди чәтинликләрин јараныбса, һал-һазырда сәнә әввәлкиндән даһа чох мүдриклик лазымдыр. Белә исә бу барәдә дуа ет! Јеһованын Кәламы бизи әмин едир: “Әҝәр сизләрдән биринин һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан диләсин, она вериләҹәкдир” (Јагуб 1:5). Бәли, Јеһовадан мүдриклик: билији, дүшүнҹәни вә анлајышы тәтбиг етмәк габилијјәти истә ки, дүзҝүн гәрар гәбул едиб, әдаләтли сечим едә биләсән. Севән сәмави Атамыз бизи әмин едир ки, бу ҹүр дуалары динләјәҹәк. О, бүтүн үрәји илә Она ҝүвәнәнләрин аддымларына истигамәт вермәјә һәмишә һазырдыр (Мәзмур 65:2; Сүлејманын мәсәлләри 3:5, 6).
5, 6. а) Игтисади чәтинликләрин өһдәсиндән ҝәлмәкдә көмәк үчүн нәјә ҝөрә Аллаһын Кәламына мүраҹиәт едә биләрик? б) Әҝәр ишсиз галмышыгса, нараһатчылығымызы азалтмаг үчүн нә едә биләрдик?
5 Јеһоваја бел бағладығымызы ҝөстәрмәјин диҝәр үсулу исә, рәһбәрлији Онун Кәламында ахтармагдыр. Аллаһын Мүгәддәс Китабда јазылан мүдрик өјүдләри “чох садигдир” (Мәзмур 93:5). Аллаһдан илһам алмыш бу китабын тәхминән 1 900 ил бундан әввәл јазылыб гуртармасына бахмајараг, орада бизә игтисади чәтинликләрин өһдәсиндән даһа јахшы ҝәлмәјә көмәк едән е’тибарлы мәсләһәтләр вә мүдрик фикирләр вар. Мүгәддәс Китаб мүдриклијинә даир бә’зи нүмунәләри нәзәрдән кечирәк.
6 Мүдрик Сүлејман падшаһ чохдан гејд етмишдир: “Аз јесин јахуд чох јесин, чалышан адамын јухусу шириндир; фәгәт зәнҝинин тохлуғу ону јатмаға гојмаз” (Ваиз 5:12). Мадди әмлакыны тә’мир етмәк, тәмизләмәк, горумаг вә ја она гуллуг етмәк үчүн вахт вә вәсаит лазымдыр. Буна ҝөрә дә, әҝәр ишсиз галмышыгса, фүрсәтдән истифадә едәрәк, еһтијаҹымызы истәјимиздән фәргләндирмәк үчүн һәјат тәрзимизи јенидән ҝөтүр-гој едә биләрдик. Нараһатчылығы азалтмаг үчүн, бә’зи дәјишикликләри етмәк ағыллы иш оларды. Мисал үчүн, даһа садә јашајыш јери ахтармагла вә ја лазымсыз әшјалардан ҹанымызы гуртармагла һәјатымызы садәләшдирә билмәрикми? (Матта 6:22).
7, 8. а) Гејри-камил инсанларын мадди шејләр барәдә һәддиндән артыг гајғы чәкмәјә мејлли олдугларындан хәбәрдар олдуғуну Иса неҹә ҝөстәрди? (Һәмчинин һашијәјә бахын.) б) Һәддиндән артыг нараһатчылыгдан јаха гуртармағымыза көмәк етмәк үчүн Иса һансы мүдрик мәсләһәти верди?
7 Дағүстү тәблиғиндә Иса мәсләһәт ҝөрүрдү: “Нә јејәҹәксиниз, јахуд нә ичәҹәксиниз дејә ҹанынызын, нә ҝејәҹәксиниз дејә бәдәнинизин гајғысына галмајын”b (Матта 6:25). Иса билирди ки, һәјат үчүн зәрури олан шејләрин гајғысына галмаг гејри-камил инсанларын тәбиәтинә хасдыр. Бәс биз бу шејләрин ‘гајғысына’ неҹә галмаја биләрик? Иса демишдир: ‘Әввәлҹә Падшаһлығы ахтарын’. Һансы чәтинликләрлә гаршылашсаг да, бундан сонра да һәјатымызда Јеһоваја ибадәтә үстүнлүк вермәлијик. Әҝәр бу ҹүр давранырыгса, онда һәјатымыз үчүн зәрури олан һәр шеј бизә сәмави Атамыз тәрәфиндән “артырылаҹагдыр”. Һәр неҹә олурса-олсун, О, бизә лазым олан һәр шејин гајғысына галаҹагдыр (Матта 6:33, И-93).
8 Даһа сонра Иса белә бир мәсләһәт верди: “Сабаһ үчүн гајғы чәкмәјин; она ҝөрә ки, сабаһкы ҝүн өзү үчүн гајғы чәкәҹәкдир” (Матта 6:34). Сабаһ баш верә биләҹәк шејин һәддиндән артыг гајғысыны чәкмәк мүдриклик дејил. Бир Мүгәддәс Китаб алими гејд етмишдир: “Ҝәләҹәк надир һалларда бизим тәсәввүр етдијимиз кими пис олур”. Әҝәр биз Мүгәддәс Китабын әсас шејә үстүнлүк вермәк вә јалныз бир ҝүн һаггында гајғы чәкмәк барәсиндәки мәсләһәтинә тәвазөкарлыгла риајәт едириксә, һәддиндән артыг нараһатчылыгдан јаха гуртармаг бизим үчүн асан олаҹаг (1 Петер 5:6, 7).
9. Малијјә чәтинликләри јаранан заман “садиг вә ағыллы гул”ун нәшрләриндә һансы көмәји тапа биләрик?
9 Малијјә чәтинликләрилә гаршылашанда, Јеһоваја бел бағладығымызы, көмәк үчүн “садиг вә ағыллы гул”ун нәшрләринә мүраҹиәт етмәклә ҝөстәрә биләрик (Матта 24:45). “Ојанын!” журналында вахташыры олараг игтисади чәтинликләрин өһдәсиндән ҝәлмәјә даир гијмәтли мәсләһәтләр верән мәгаләләр дәрҹ олунур. 1991-ҹи ил 8 сентјабр сајлы (рус.) бурахылышында дәрҹ олунан “Ишсизлик — бунун өһдәсиндән неҹә ҝәлмәли?” адлы мәгаләдә, ишсиз галан бир чох адамлара мадди вә емосионал сабитлијини горујуб сахламаға көмәк едән сәккиз практики мәсләһәт верилирдиc. Шүбһәсиз ки, бу мәсләһәтә риајәт едәндә, пулун һәгиги дәјәринә гаршы дүзҝүн нөгтеји-нәзәрә малик олмаг лазымдыр. Бу фикир, “Ојанын!” журналынын һәмин бурахылышында дәрҹ едилмиш “Пулдан даһа ваҹиб олан шеј” мәгаләсиндә мүзакирә едилирди (Ваиз 7:12).
Сағламлыгла әлагәдар проблемләр јарананда
10. Давуд падшаһын нүмунәси неҹә ҝөстәрир ки, ағыр хәстәликдән әзијјәт чәкәркән Јеһоваја бел бағламаг мәнтигә ујғундур?
10 Ҹидди хәстәликдән әзијјәт чәкәркән Јеһоваја бел бағламаг мәнтигә ујғундурму? Шүбһәсиз! Хидмәтчиләри хәстәләнәндә Јеһова онлара аҹыјыр. Бундан әлавә, О көмәк етмәјә һазырдыр. Мәсәлән, Давуд падшаһын нүмунәсини нәзәрдән кечирәк. Еһтимал ки, Аллаһын хәстәликдән әзијјәт чәкән салеһ кәслә неҹә даврандығы һаггында јазаркән Давуд өзү ҹидди хәстә иди. О дејир: “Рәбб она дәстәк олар; хәстәлијиндә бүтүн јатағыны сән дүзәлдәрсән” (Мәзмур 41:1, 3, 7, 8). Давуд Аллаһа даһа чох бел бағлады вә нәтиҹәдә сағалды. Сағламлығымыз бизи нараһат едән заман Аллаһа бел бағладығымызы неҹә ҝөстәрә биләрик?
11. Хәстәлик заманы сәмави Атамыздан нә диләјә биләрик?
11 Хәстәлијимиз заманы Јеһоваја бел бағладығымызы онунла ҝөстәрә биләрик ки, һәр шејә таб ҝәтирә билмәјимизә көмәклик етсин дејә Она үрәкдән дуа едәк. Бизә, сағламлығымызы имканларымызын јол вердији реал сәвијјәдә сахламағымыз үчүн ‘сағлам шүурлу’ олмағымыза көмәк етмәси һаггында дуа едә биләрик (Сүлејманын мәсәлләри 3:21, МКШ). Һәм дә Аллаһдан хәстәлијин өһдәсиндән ҝәләк дејә, сәбир вә сарсылмазлыг тәзаһүр етдирмәјимиз үчүн көмәклик етмәси барәдә хаһиш едә биләрик. Ән башлыҹасы исә, бизи дәстәкләмәси үчүн, һәр нә баш версә дә мүвазинәти итирмәмәк вә Она садиг галмағымыз үчүн бизә ҝүҹ вермәсини хаһиш етмәлијик (Филипилиләрә 4:13). Аллаһа мүнасибәтдә нөгсансызлығымызы горујуб сахламағымыз, бизә буҝүнкү һәјатымызы горумағымыздан даһа ваҹибдир. Әҝәр нөгсансызлығы горујарыгса, бөјүк Аллаһымыз бизи әбәди һәјат, камиллик вә сағламлыгла мүкафатландыраҹаг (Ибраниләрә 11:6).
12. Мүалиҹә мәсәләләриндә мүдрик гәрарлар гәбул етмәкдә бизә Мүгәддәс Китабын һансы принсипләри көмәк едә биләр?
12 Јеһоваја бел бағламағымыз бизи, һәмчинин практики рәһбәрлик үчүн Онун Кәламы олан Мүгәддәс Китаба мүраҹиәт етмәјә тәшвиг едир. Мүгәддәс Китаб принсипләри бизә тибби мүалиҹә мәсәләләриндә дүзҝүн гәрарлар гәбул етмәјә көмәк едир. Мәсәлән, Мүгәддәс Китабын “сеһрбазлығы” мүһакимә етдијини биләрәк, онунла әлагәли олан диагностик вә терапевтик мүајинәләрдән гачынмаг истәјирик (Галатијалылара 5:19-21; Тәснијә 18:10-12). Мүгәддәс Китабын е’тибара лајиг мүдриклијинә даир башга бир нүмунә: “Ҹаһил һәр сөзә инанар, узагҝөрән һәр аддымына нәзәр салар” (Сүлејманын мәсәлләри 14:15, МКШ). Буна ҝөрә дә, мүалиҹә олунмағы планлашдыран заман “һәр сөзә инанмаг” әвәзинә, е’тибарлы мә’лумат ахтармағымыз мүдрик давраныш оларды. Бу ҹүр “тәмкинли” олмағымыз бизә һәр үсулу диггәтлә ҝөтүр гој етмәкдә вә әсаслы гәрар гәбул етмәкдә көмәк едәҹәк (Титуса 2:12).
13, 14. а) “Ҝөзәтчи Гүлләси” вә “Ојанын!” журналларында сағламлыг һаггында һансы әтрафлы мәгаләләр дәрҹ олунмушдур? (29–ҹу сәһифәдәки чәрчивәјә бахын.) б) 2001-ҹи илин 22 јанвар сајлы “Ојанын!” журналында хроники хәстәликләрә даир һансы мәсләһәтләр верилирди?
13 Садиг гулун нәшрләрини тәдгиг етмәклә дә Јеһоваја бел бағладығымызы ҝөстәририк. “Ҝөзәтчи Гүлләси” вә “Ојанын!” журналларында вахташыры олараг мүхтәлиф хәстәликләр вә онларла бағлы проблемләр һаггында әтрафлы мәгаләләр дәрҹ олунурd. Бә’зән бу журналларда мүхтәлиф хәстәликләрин өһдәсиндән мүвәффәгијјәтлә ҝәлән вә ја мүбаризә апаран кәсләрин шәрһләри дәрҹ олунур. Бундан әлавә, бә’зи мәгаләләрдә хроники хәстәликләрлә јашамаға даир Мүгәддәс Китаба әсасланан вә ја диҝәр практики мәсләһәтләр гејд олунур.
14 Мәсәлән, 2001-ҹи илин 22 јанвар (рус.) сајлы “Ојанын!” журналындакы ҝириш мәгаләләрдә, “Хәстә оланлар үчүн тәсәлли” адлы мөвзу мүзакирә едилирди. Орада Мүгәддәс Китабын фајдалы принсипләри, һәмчинин узун илләр әрзиндә хроники хәстәликләрлә јашајан вә онлар һаггында чох мә’луматлары олан инсанларла мүсаһибәјә әсасланан мә’лумат дәрҹ олунмушду. “Ағыр хәстәликлә неҹә јашамалы?” адлы мәгаләдә бу ҹүр мәсләһәтләр тәклиф едилирди: хәстәлијин һаггында даһа чох мә’лумат топла (Сүлејманын мәсәлләри 24:5); гаршына практики мәсләһәтләр, о ҹүмләдән инсанлара көмәк етмәк мәгсәди гој, лакин унутма ки, бәлкә дә башгаларынын едә билдији гәдәр едә билмәјәҹәксән (Һәвариләрин ишләри 20:35; Галатијалылара 6:4); өзүнү әтрафындакы инсанлардан тәҹрид етмә (Сүлејманын мәсәлләри 18:1); чалыш ки, сәнин јанына ҝәлмәк башгалары үчүн хош олсун (Сүлејманын мәсәлләри 17:22); ән башлыҹасы исә, Јеһова илә вә јығынҹагла сых әлагәдә гал (Наһум 1:7; Ромалылара 1:11, 12). Мәҝәр Јеһованын Өз тәшкилаты васитәсилә вердији е’тибарлы рәһбәрлијә ҝөрә миннәтдар дејиликми?
Ҹисмани зәифликлә мүбаризә апаранда
15. Гејри-камил бәдәнин зәифликләринә гаршы мүбаризәдә Павел гәләбәни неҹә газана билди вә бунунла әлагәдар биз нәјә әмин ола биләрик?
15 Һәвари Павел јазырды: “Ҹисмани тәбиәтимдә јахшы шеј јашамыр” (Ромалылара 7:18). Павел гејри-камил бәдәнин арзулары вә зәифликләри илә мүбаризә апармағын нә демәк олдуғуну шәхси тәҹрүбәсиндән билирди. Амма Павел галиб ҝәләҹәјинә әмин иди (1 Коринфлиләрә 9:26, 27). Неҹә? Јеһоваја бүтүнлүклә бел бағламагла. Павел буна ҝөрә дејирди: “Нә заваллы адамам! Өлүмә апаран бу бәдәндән мәни ким хилас едәҹәк? Рәббимиз Иса Мәсиһ васитәси илә Аллаһа шүкүр едирәм!” (Ромалылара 7:24, 25). Бәс бизим һаггымызда нә демәк олар? Биз дә ҹисмани зәифликләрә гаршы мүбаризә апарырыг. Бу ҹүр мүбаризә апарараг, әминлијимизи итирмәк вә һеч нә едә билмәјәҹәјимизи дүшүнмәк асандыр. Лакин Павел кими, биз дә Јеһоваја һәгигәтән бел бағлајыр вә өз ҝүҹүмүзә ҝүвәнмириксә, О, бизә көмәк едәҹәкдир.
16. Ҹисмани зәифлијимизлә мүбаризә апараркән нә барәдә дуа етмәк лазымдыр вә әҝәр јенидән сәһвә јол веририксә, нә етмәлијик?
16 Әҝәр ҹисмани зәифлик бизи нараһат едирсә, дуада Јеһоваја мүраҹиәт етмәклә Она бел бағладығымызы ҝөстәрә биләрик. Биз Јеһоваја Өз мүгәддәс руһу илә бизә көмәк етмәси үчүн мүраҹиәт етмәли, һәтта јалвармалыјыг (Лука 11:9-13). Биз Аллаһын руһунун сәмәрәси олан өзүнә һаким олмаг хүсусијјәтини истәјә биләрик (Галатијалылара 5:22, 23). Әҝәр јенидән сәһвә јол вердиксә, онда нә етмәли? Гәтијјән тәслим олмалы дејилик. Ҝәлин, мәрһәмәтли Аллаһымыза тәвазөкарлыгла дуа едәрәк ҝүнаһымыздан кечмәсини вә көмәк етмәсини јалвармагдан һеч заман јорулмајаг. Јеһова, виҹдан әзабындан ағырлашан “гырылмыш вә әзилмиш үрәји” һеч заман рәдд етмәз (Мәзмур 51:17). Әҝәр биз сәмимиликлә төвбә едир вә Јеһоваја дуа едириксә, О, бизә ширникләндириҹи һәвәсләрә гаршы дурмаға көмәк едәҹәк (Филипилиләрә 4:6, 7).
17. а) Јеһованын мүбаризә апардығымыз зәифлијә гаршы нөгтеји-нәзәри үзәриндә дүшүнмәјимиз нәјә ҝөрә фајдалыдыр? б) Әҝәр тез әсәбиләшмәјин өһдәсиндән ҝәлмәјә, дилимизи јүјәнләмәјә, јарамаз әјләнҹәләрә олан мејлимизә гаршы мүбаризә апармаға чалышырыгса һансы ајәләри јадда сахлаја биләрдик?
17 Һәмчинин рәһбәрлик үчүн Јеһованын Кәламына мүраҹиәт етмәклә дә Она бел бағладығымызы ҝөстәрә биләрик. Мүгәддәс Китаб симфонијасынын вә ја “Ҝөзәтчи Гүлләси нәшрләринин индекси”нин көмәји илә биз нөвбәти суала ҹаваб ахтара биләрик: мүбаризә апардығымыз зәифлијә Јеһова неҹә бахыр? Јеһованын бизим вәзијјәтимизә бәсләдији нөгтеји-нәзәри үзәриндә дүшүнмәјимиз, Ону разы салмаг истәјимизи ҝүҹләндирир. О заман биз һәр шејә Онун ҝөзләри илә бахар вә Онун нифрәт етдији шејләрә нифрәт едәрик (Мәзмур 97:10). Бә’зиләринә, онларын мүбаризә апардыглары зәифликләрә аид олан Мүгәддәс Китаб ајәләрини әзбәрләмәк көмәк едир. Тез әсәбиләшмәјә гаршымы мүбаризә апарырыг? Онда Сүлејманын мәсәлләри 14:17 вә Ефеслиләрә 4:31 ајәләрини әзбәрләмәк олар. Дилимизи јүјәнләмәк чәтиндирми? Сүлејманын мәсәлләри 12:18 вә Ефеслиләрә 4:29 ајәләрини јадда сахламаг олар. Јарамаз әјләнҹәләрәми мејлимиз вар? О заман Ефеслиләрә 5:3 вә Колослулара 3:5 ајәләрини јадымызда сахлаја биләрик.
18. Ҹисмани зәифлијин өһдәсиндән ҝәлмәкдә ағсаггаллардан көмәк истәмәк үчүн нәјә ҝөрә утанмаг лазым дејил?
18 Јеһоваја бел бағладығымызы ҝөстәрмәјин даһа бир јолу — көмәк үчүн јығынҹағын мүгәддәс руһла тә’јин олунмуш ағсаггалларына мүраҹиәт етмәкдир (Һәвариләрин ишләри 20:28). Јада салаг ки, “инсанлар тимсалында һәдијјәләр” [ЈД] сајылан бу ағсаггаллары, Өз гојунларыны мүдафиә етмәк вә онлара гајғы ҝөстәрмәк үчүн Мәсиһин васитәсилә Јеһова вермишдир (Ефеслиләрә 4:7, 8, 11-14). Сөзсүз ки, мүәјјән ҹисмани зәифлијин оланда көмәк үчүн мүраҹиәт етмәк асан дејил. Ағсаггалларын бизим һаггымызда пис фикрә дүшәҹәјиндән еһтијат едәрәк утана биләрик. Лакин руһән јеткин олан бу кишиләр, ҹәсарәтимизи топлајыб көмәк истәдијимиз үчүн бизә һөрмәт едәҹәкләр. Бундан әлавә, ағсаггаллар сүрү илә мүнасибәтиндә Јеһованын хүсусијјәтләрини әкс етдирмәјә чалышырлар. Онларын Аллаһын Кәламына әсасланан тәсәлливериҹи, практики мәсләһәтләри вә өјүдләри, әминлијимизи мөһкәмләтмәк вә ҹисмани зәифлијин өһдәсиндән ҝәлмәк үчүн мәһз бизә лазым олан шеј ола биләр (Јагуб 5:14-16).
19. а) Шејтан бу системдәки бош һәјатдан неҹә истифадә едир? б) Бел бағламағымыз нә илә әлагәлидир вә нәдә там гәтијјәтли олмалыјыг?
19 Һеч заман унутма ки, Шејтан вахтынын аз олдуғуну билир (Вәһј 12:12). Бизи руһдан салмаг вә тәслим олмаға мәҹбур етмәк үчүн, о, бу дүнјадакы бош һәјатдан истифадә етмәк истәјир. Ромалылара 8:35-39 ајәләриндә дејиләнләрә там әмин олаг: “Бизи Мәсиһин мәһәббәтиндән ким мәһрум едәҹәк? Гәм-гүссәми, сыхынтымы, тә’гибләрми, аҹлыгмы, үрјанлыгмы, тәһлүкәми, гылынҹмы? [...] Амма бизи Севәнин гүдрәти илә бүтүн бунлара тамамилә галиб ҝәлирик. Чүнки мән әминәм ки, нә өлүм, нә һәјат, нә мәләкләр, нә рәјасәтләр, нә гүдрәтләр, нә индики, нә ҝәләҹәк шејләр, нә һүндүрлүк, нә дәринлик, нә дә башга мәхлуг бизи Рәббимиз Мәсиһ Исада олан Аллаһын мәһәббәтиндән мәһрум етмәјә гадир олмајаҹагдыр”. Јеһоваја бел бағламаға даир неҹә дә ҝөзәл фикирдир! Бу ҹүр бел бағлама — садәҹә һиссдән даһа артыгдыр. Бу, ҝүндәлик һәјатымызда гәбул етдијимиз дүшүнҹәли гәрарларла әлагәлидир. Буна ҝөрә дә ҝәлин, сыхынтылы анларымызда бүтүнлүклә Јеһоваја бел бағламаға там гәтијјәтли олаг.
[Һашијәләр]
a АБШ-ын Сиккәханасына үнванланан 1681-ҹи ил 20 нојабр тарихли мәктубунда Малијјә назири Салмон Чејз јазырды: “Һеч бир халг Аллаһдан гүввә алмадан гүввәтли ола билмәз, Онун мүдафиәси алтында олмадан тәһлүкәсиз ола билмәз. Халгымызын Аллаһа бел бағламасы бизим пулларын үзәриндә әкс олунмалыдыр”. Нәтиҹәдә, 1864-ҹү илдә дөвријјәјә бурахылан пулларын үзәриндә “Аллаһа ҝүвәнирик” шүары пејда олду.
b Бурада хатырланан “гајғысына галмајын” ифадәси “севинҹдән тамамилә мәһрум едән һәјәҹанлы горху” кими мүәјјән едилир. Бу ҹүр ифадә ону нәзәрдә тута биләр ки, биз нараһат олмаға вә ја гајғы чәкмәјә башламалы дејилик. Лакин бир арајыш китабчасына әсасән, “јунан фе’ли әмр формасында дурдуғу үчүн, артыг мүәјјән мүддәт давам едән һәрәкәти дајандырмаг әмрини билдирир”.
c Һәмин сәккиз мәсләһәт ашағыда садаланыр: 1) тәлаша дүшмә, 2) мүсбәт нөгтеји-нәзәри горујуб сахла, 3) јени иш нөвләриндә гүввәни сынамаға горхма, 4) имканына ҝөрә јаша вә башгалары илә бәһс етмә, 5) борҹ аларкән еһтијатлы ол, 6) аилә бирлијини гору, 7) өзүнә һөрмәт һиссини итирмә вә 8) бүдҹә јарат.
d Мүгәддәс Китаба әсасланан бу журналлар, бу мәсәләнин һәр бир кәсин шәхси иши олдуғуну е’тираф едәрәк, һеч бир мүалиҹә нөвүнү дәстәкләмир. Һәр һансы бир хәстәликләри вә позунтулары нәзәрдән кечирән мәгаләләр, охуҹулара һазыркы вахт үчүн мә’лум олан фактлары чатдырмаг үчүн мүәјјән олунуб.
Хатырлаја биләрсинизми?
• Игтисади чәтинлик чәкәркән Јеһоваја бел бағладығымызы неҹә ҝөстәрә биләрик?
• Сағламлығымыз бизи нараһат едән заман Јеһоваја неҹә ҝүвәнә биләрик?
• Ҹисмани зәифлијимизлә мүбаризә апаранда Јеһоваја һәгигәтән дә бел бағладығымызы неҹә ҝөстәрә биләрик?
[29-ҹу сәһифәдәки чәрчивә]
Бу мәгаләләри хатырлајырсанмы?
Сағламлығымыз нараһат едәндә, мүхтәлиф хәстәликләрин өһдәсиндән мүвәффәгијјәтлә ҝәлән инсанлар һаггында охујараг тәсәлли тапа биләрик. Ашағыда “Ҝөзәтчи Гүлләси” вә “Ојанын!” (рус.) журналларында дәрҹ олунмуш бир нечә мәгаләјә истинад едилир.
“Бә’зиләри мәнфи емосијаларын өһдәсиндән неҹә ҝәлмәјин үсулуну өјрәндиләр” (“Ојанын!”, 1992-ҹи ил 8 нојабр сајы).
“Мән зәиф олдуғум заман, гүввәтлијәм” адлы мәгаләдә, ојнаг ревматизми хәстәлијиндән әзијјәт чәкән гадын һаггында данышылырды (“Ојанын!”, 1997-ҹи ил 22 јанвар сајы).
“Сабаһ нә баш верәҹәјини билмирсиниз” адлы мәгаләдә икигүтблү позулма хәстәлији тәсвир олунур (“Ҝөзәтчи Гүлләси”, 2000-ҹи ил 1 декабр сајы).
“Сүкут әсарәтиндән гуртулуш” адлы мәгаләдә бејинин зәдәләнмәси нәтиҹәсиндә төрәнмиш ифлиҹ хәстәлијинә тутулмуш Лоидадан данышылыр (“Ојанын!”, 2000-ҹи ил 8 мај сајы).
“Ендометриозла мүбаризәм” (“Ојанын!”, 2000-ҹи ил 22 ијул сајы).
“Мәгсәдјөнлүлүк тәслим олмамаға көмәк едир” адлы мәгаләдә гыртлағында хәрчәнҝ хәстәлији олан вә ифлиҹә тутулмуш адам һаггында бәһс едилир (“Ојанын!”, 2001-ҹи ил 22 јанвар сајы).
“Склеродермија илә мүбаризә апарырам” (“Ојанын!”, 2001-ҹи ил 8 август сајы).
“Доғумдан сонракы депрессија илә апардығым мүбаризә” (“Ојанын!”, 2002-ҹи ил 22 ијул сајы).
[32-ҹи сәһифәдәки шәкил]
Ишсиз галаркән һәјат тәрзимизи јенидән нәзәрдән кечирмәк мүдриклик оларды.