Садиг мәсиһчи гадынлар Аллаһын гијмәтли хидмәтчиләридир

“Гадынын мәлаһәти алдадыҹы, ҝөзәллији фанидир, јалныз Рәбдән горхан гадын тә’рифә лајигдир” (СҮЛЕЈМАНЫН МӘСӘЛЛӘРИ 31:30, МКШ).

1. Јеһованын ҝөзәллијә олан нөгтеји-нәзәри дүнјанынкындан нә илә фәргләнир?

ДҮНЈА хариҹи ҝөрүнүшә, хүсусән дә гадынларын хариҹи ҝөрүнүшүнә даһа чох диггәт јөнәлдир. Јеһова исә илк нөвбәдә, илләр өтдүкҹә даһа да ҝөзәлләшә биләҹәк дахили шәхсијјәтә диггәт јетирир (Сүлејманын мәсәлләри 16:31). Буна ҝөрә дә Мүгәддәс Китаб гадынлара өјүд верир: “Гој сизин бәзәјиниз, сач һөрмә, гызыл тахма вә тәмтарагла ҝејинмә кими заһири шејләрдән ибарәт олмасын. Ҝизли олан дахили варлығыныз, һәлим вә сакит руһун фаниләшмәз ҝөзәллији илә сизин бәзәјиниз олсун. Бу, Аллаһын гаршысында чох гијмәтлидир” (1 Петер 3:3, 4).

2, 3. Гадынлар I әсрдә хош хәбәрин јајылмасына неҹә көмәк етмишләр вә бу барәдә әввәлҹәдән неҹә дејилмишдир?

² Бу ҹүр тә’рифәлајиг руһу Мүгәддәс Китабда адлары чәкилән бир чох гадынлар әкс етдирмишләр. I әсрдә онлардан бә’зиләри Исаја вә онун һәвариләринә хидмәт етмәк шәрәфинә малик олмушлар (Лука 8:1-3). Сонрадан исә, бә’зи мәсиһчи гадынлар чалышган мүждәчиләр олмуш, диҝәрләри, үзәринә рәһбәрлик ҝөтүрән мәсиһчи кишиләрә, о ҹүмләдән һәвари Павелә олдугҹа дәјәрли јардым ҝөстәрмиш, башгалары исә гејри-ади гонагпәрвәрлик ҝөстәрмиш, һәтта јығынҹаг ҝөрүшләринин кечирилмәси үчүн өз евләрини тәгдим етмишдиләр.

³ Өз нијјәтини јеринә јетирмәкдә Јеһованын гадынлары фәал вә ҝениш сурәтдә истифадә едәҹәји Мүгәддәс Јазыларда габагҹадан дејилмишдир. Мәсәлән, Јоел 2:28, 29 ајәләриндә әввәлҹәдән дејилирди ки, һәм кишиләр, һәм дә гадынлар — јашлылар вә ҹаванлар — мүгәддәс руһ алаҹаг вә Падшаһлыг һаггындакы хош хәбәрин јајылмасында иштирак едәҹәкләр. Бу пејғәмбәрлик ерамызын 33-ҹү илинин Пентикост ҝүнүндә јеринә јетмәјә башлады (Һәвариләрин ишләри 2:1-4, 16-18). Руһла мәсһ едилмиш гадынлардан бә’зиләринә фөвгәлтәбии ән’амлар, мәсәлән, пејғәмбәрлик етмәк ән’амы верилмишдир (Һәвариләрин ишләри 21:8, 9). Бу садиг баҹыларын бөјүк издиһамы хидмәтдәки сә’јләри илә мәсиһчилијин I әсрдәки сүр’әтли артымына көмәк етмишләр. Ерамызын тәхминән 60-ҹы илиндә һәвари Павел јазырды ки, хош хәбәр “ҝөј алтында олан һәр мәхлуга тәблиғ едилмишдир” (Колослулара 1:23).

Ҹәсарәтләринә, сә’јләринә вә гонагпәрвәрликләринә ҝөрә тә’рифәлајиг ҝөрүлмүшләр

4. Павел I әсрин мәсиһчи јығынҹағында олан бә’зи гадынлары һансы ҹидди әсаслара ҝөрә тә’рифләјирди?

⁴ Һәвари Павел бә’зи гадынларын хидмәтләри барәдә бөјүк һөрмәтлә данышдығы кими, мәсиһчи нәзарәтчиләри дә бу ҝүн сә’ј ҝөстәрән баҹыларын хидмәтләрини гијмәтләндирирләр. Павелин адларыны чәкдији гадынларын арасында “Рәбб үчүн зәһмәт чәкән Трифена вә Трифоса”, һәмчинин “Рәбб үчүн чох зәһмәт чәкмиш севимли Персис” дә варды (Ромалылара 16:12). Павел јазырды ки, Еводија вә Синтихи “[онунла бәрабәр]... Мүждәни јајмаг үчүн ҹәһд ҝөстәрмиш”ләр (Филипилиләрә 4:2, 3). Әри Акила илә јанашы Прискила да Павеллә бирликдә хидмәт етмишди. Бу әр-арвад һәтта Павелин уғрунда “өз башларыны гојдулар”, бу да Павели нөвбәти сөзләри демәјә тәшвиг етди: “Онлара, јалныз мән дејил, диҝәр милләтләрдән оланларын бүтүн ҹәмијјәтләри тәшәккүр едирләр” (Ромалылара 16:3, 4, И–93; Һәвариләрин ишләри 18:2).

5, 6. Прискила һансы саһәләрдә буҝүнкү баҹылар үчүн ҝөзәл нүмунә кими хидмәт едир?

⁵ Прискила нәјә ҝөрә бу ҹүр сә’јли вә ҹәсарәтли иди? Ҹавабы Һәвариләрин ишләри 18:24-26 ајәләриндә тапырыг. Орада дејилир ки, Прискила әри Акила илә бирликдә Аполлоса, габилијјәтли натигә Аллаһын ачдығы һәгигәтлә ајаг-ајаға јеримәкдә көмәк етди. Буна ҝөрә дә, мәнтиги нәтиҹә чыхара биләрик ки, Прискила Аллаһын Кәламыны сә’јлә өјрәнир вә һәвари тә’лими илә мәшғул олурду. Бу, Прискиланы Аллаһын вә әринин ҝөзүндә уҹалдан, һәмчинин ону еркән мәсиһчи јығынҹағынын дәјәрли үзвү едән ҝөзәл кејфијјәтләри јетишдирмәкдә она көмәк етди. Мүгәддәс Китабы чалышганлыгла тәдгиг едән вә “садиг вә ағыллы нөкәрбашы” васитәсилә Јеһованын тәгдим етдији руһани гиданы гәбул едән, чалышган бир чох мүасир мәсиһчи баҹыларымыз да аз дәјәрли дејилләр (Лука 12:42).

⁶ Акила вә Прискила хүсуси тәрздә гонагпәрвәр идиләр. Онларла бирликдә чадыр һазырлајаркән Павел Коринф шәһәриндә онларын евиндә јашајырды (Һәвариләрин ишләри 18:1-3). Бу әр-арвад әввәл Ефесә, бир гәдәр сонра исә Ромаја көчәндә мәсиһчи гонагпәрвәрлији ҝөстәрмәјә давам едирдиләр вә һәтта евләрини јығынҹаг ҝөрүшләри кечирмәк үчүн тәгдим едирдиләр (Һәвариләрин ишләри 18:18, 19; 1 Коринфлиләрә 16:8, 19). Нимфанын, һәмчинин Марк ләгәбли Јәһјанын анасы Мәрјәмин евиндә дә јығынҹаг ҝөрүшләри кечирилирди (Һәвариләрин ишләри 12:12; Колослулара 4:15).

Буҝүнкү гијмәтли хәзинә

7, 8. Мүгәддәс хидмәтлә әлагәдар бир чох мүасир мәсиһчи гадынлар һансы ады газанмышлар вә онлар нәдә әмин ола биләрләр?

⁷ Биринҹи әсрдә олдуғу кими бу ҝүн дә садиг мәсиһчи гадынлар Аллаһын ирадәсинин јеринә јетирилмәсиндә, хүсусилә дә тәблиғ ишиндә апарыҹы рол ојнајырлар. Бу баҹылар неҹә дә ҝөзәл ад газанмышлар! 2002-ҹи илдә вәфат едәнә гәдәр Јеһоваја 50 илдән артыг сәдагәтлә хидмәт едән Гвенин нүмунәсини нәзәрдән кечирәк. Онун әри дејир: “Тәблиғдәки сә’јинә ҝөрә Гвен, демәк олар ки, бүтүн шәһәрдә шөһрәт газанмышдыр. О, һәр бир кәсә Јеһованын мәһәббәтинә вә вә’динә һај верә билән адам кими бахырды. Гвенин Аллаһа, Онун тәшкилатына вә аиләмизә олан садиглији, һәм дә биз кефсиз олан заман һәвәсләндириҹи руһу, мәним вә ушагларымыз үчүн бирҝә јашадығымыз долғун вә мәмнунедиҹи һәјатымыз боју бөјүк дајаг олуб. Онун үчүн чох дарыхырыг”. Гвен әри илә бирликдә 61 ил һәјат сүрмүшдүр.

⁸ Әрдә вә ја субај олан он минләрлә мәсиһчи гадынлар пионер вә миссионер кими хидмәт едир вә анҹаг зәрури шејләрлә кифајәтләнәрәк Падшаһлыг һаггындакы хәбәри ән мүхтәлиф јерләрдә — сәсли-күјлү шәһәрләрдән тутмуш Јер күрәсинин уҹгар јерләринә кими јајырлар (Һәвариләрин ишләри 1:8). Бир чохлары Јеһоваја даһа артыг дәрәҹәдә хидмәт етмәк үчүн евә вә ушаға саһиб олмаг имканындан имтина етмишләр. Бу, сәјјар нәзарәтчи кими хидмәт едән әрләрини сәдагәтлә дәстәкләјән вә ја дүнја үзрә Бејт-Ел евләриндә чалышан минләрлә баҹылардыр. Һеч бир шүбһә јохдур ки, бу фәдакар баҹылар, Јеһованын евини иззәтлә долдуран “бүтүн милләтләрин дәјәрли шејләри” сырасына дахилдирләр (Һаггај 2:7).

9, 10. Мәсиһчи гадынларын вә аналарын ҝөзәл нүмунәләринә ҝөрә аилә үзвләри өз миннәтдарлыгларыны неҹә билдирдиләр?

⁹ Бир чох мәсиһчи гадынлар чијинләри үзәриндә аилә мәс’улијјәти дашысалар да, әввәлҹә Падшаһлығы ахтарырлар (Матта 6:33). Субај олан пионер баҹы јазмышдыр: “Мәним анам, сарсылмаз иманы вә ҝөзәл нүмунәси илә мәним пионер олмағымда башлыҹа рол ојнамышдыр. О, һәтта мәним ән јахшы хидмәт јолдашларымдан бири олмушдур”. Әр өз арвады, јеткин јаша чатмыш беш гызынын анасы барәсиндә дејир: “Евимиздә һәмишә тәмизлик вә сәлигә олуб. Бонни нәзарәт едирди ки, евдә садә шәраит олсун вә лазымсыз шејләр олмасын, буна ҝөрә дә аиләмиз руһани шејләрә үстүнлүк верә билирди. Гәнаәтҹил евдар гадын олмасынын сајәсиндә, мән 32 ил мүддәтиндә натамам иш ҝүнү ишләјиб, аиләјә вә руһани ишләрә даһа чох вахт ајыра билмишәм. Арвадым ушаглара да ишҝүзар олмағы өјрәтмишдир. Һәјат јолдашым анҹаг тә’рифләнмәјә лајигдир”. Бу ҝүн һәмин әр-арвад Јеһованын Шаһидләринин үмумдүнја мәркәзи идарәсиндә хидмәт едирләр.

¹⁰ Ики бөјүк ушагларынын анасы барәдә бир әр бунлары дејир: “Сјузанда һәр шејдән чох хошума ҝәлән, онун Аллаһа вә инсанлара ҹошғун мәһәббәти, һәмчинин анлајышы, шәфгәти вә доғрулуғудур. О һәмишә һесаб едиб ки, Јеһова, бизим малик олдуғумуз һәр шејин ән јахшысына лајигдир вә о бу принсипи һәм Аллаһын хидмәтчиси кими, һәм дә ана кими өзүнә тәтбиг едирди”. Арвадынын көмәји сајәсиндә бу киши јығынҹагда чохсајлы вәзифәләри јеринә јетирә билирди: һәр шејдән әлавә о ағсаггал, пионер, рајон нәзарәтчисинин мүавини вә Хәстәханаларла әлагә комитәсинин үзвү кими хидмәт едирди. Бу ҹүр гадынлар әрләринин, һәмиманлыларынын вә һәр шејдән өнҹә Јеһованын ҝөзүндә неҹә дә гијмәтлидирләр! (Сүлејманын мәсәлләри 31:28, 30).

Дәјәрли субај баҹылар

11. а) Јеһова садиг гадынларла, хүсусилә дә дул гадынларла марагландығыны неҹә билдирирди? б) Дул мәсиһчи гадынлар вә субај олан диҝәр садиг баҹылар нәдә әмин ола биләрләр?

¹¹ Јеһова дул гадынларын рифаһы илә марагландығыны тез-тез билдирирди (Тәснијә 27:19; Мәзмур 68:5; Ишаја 10:1, 2). О, дәјишилмәјиб. О, дул гадынларла вә јалныз онларла дејил, тәнһа аналар, һәмчинин өз ирадәсинә ҝөрә, ја да ки, мәсиһчиләр арасында мүнасиб ҝәлән һәјат јолдашы тапмадыглары үчүн әрә ҝетмәјән гадынларла да әввәлки кими дәриндән марагланыр (Малаки 3:6; Јагуб 1:27). Әҝәр сән дә Јеһоваја мәсиһчи һәјат јолдашынын көмәји олмадан хидмәт едирсәнсә, әмин ола биләрсән ки, Аллаһ сәни чох гијмәтләндирир.

12. а) Бә’зи мәсиһчи баҹылар Јеһоваја сәдагәтләрини неҹә сүбут едирләр? б) Баҹыларымыздан бә’зиләри һансы һиссләрлә мүбаризә апарырлар?

¹² Јеһованын јалныз “Рәббә бағлы” олан кәсләрлә аилә гурмаг өјүдүнә сәдагәтлә итаәт етдикләри үчүн субај галан мәсиһчи баҹыларымызын нүмунәсини нәзәрдән кечирәк (1 Коринфлиләрә 7:39; Сүлејманын мәсәлләри 3:1). Аллаһын Кәламы онлары әмин едир: ‘[Јеһова] сәдагәтли илә сәдагәтлә давраныр’ (2 Самуел 22:26, ЈД). Јенә дә, онлардан чохлары үчүн субај галмаг әсл сынагдыр. Бир баҹы дејирди: “Анҹаг Рәббә бағлы олан кәслә аилә гурмаг нијјәтиндә олсам да, рәфигәләримин ҝөзәл мәсиһчиләрлә аилә гурдугларыны, өзүмүн исә тәнһа галдығымы ҝөрүб чох ҝөз јашлары төкмүшәм”. Башга бир баҹы гејд едир: “Артыг 25 илдир ки, Јеһоваја хидмәт едирәм. Она садиг галмаг гәрарында гәтијјәтлијәм, лакин чох вахт тәнһалыг һисси мәни кәдәрләндирир”. О әлавә едир: “Мәним кими баҹылар руһландырылмағын һәсрәтини чәкирләр”. Биз бу ҹүр садиг баҹылара неҹә көмәк едә биләрик?

13. а) Јефтаһын гызынын јанына ҝедәнләрин нүмунәси бизә нә өјрәдир? б) Јығынҹағымыздакы субај баҹыларын гајғыларына галдығымызы даһа һансы үсулла ҝөстәрә биләрик?

¹³ Буну етмәјин үсулларындан бирини бизә гәдим дөврүн нүмунәси ҝөстәрир. Јефтаһын гызы әрә ҝетмәк имканындан имтина едәндә, бу, инсанларын ҝөзүндә бөјүк бир гурбан иди. Ону неҹә руһландырырдылар? “Илдән илә Исраил гызлары Ҝилеадлы Јефтаһын гызы үчүн дөрд ҝүн јас тутмаға [“гызыны дөрд ҝүн мәдһ етмәјә”, ЈД] ҝедәрдиләр” (Һакимләр 11:30-40). Биз дә Аллаһын ганунуна сәдагәтлә итаәт едән субај баҹыларымызы үрәкдән тә’рифләмәлијикa. Биз онларын гајғыларына галдығымызы даһа һансы үсулла ҝөстәрә биләрик? Хидмәтләрини сәдагәтлә давам етдирән бу севимли, садиг баҹылары дәстәкләмәси һаггында дуада Јеһовадан хаһиш етмәклә. Онлар Јеһова вә мәсиһчи јығынҹағы тәрәфиндән һәрарәтлә севилдикләринә вә јүксәк гијмәтләндирилдикләринә даир зәманәтә лајигдирләр (Мәзмур 37:28).

Тәнһа аналар тәрк едилмәјибләр

14, 15. а) Ушагларыны тәнһа бөјүдән мәсиһчи гадынлар көмәк үчүн нәјә ҝөрә Јеһоваја мүраҹиәт етмәлидирләр? б) Тәнһа валидејнләр өз дуаларына әсасән неҹә даврана биләрләр?

¹⁴ Ушагларыны тәнһа бөјүдән мәсиһчи гадынлар да бир чох чәтинликләрлә гаршылашырлар. Буна бахмајараг, ушагларыны Мүгәддәс Китаб принсипләри әсасында бөјүтмәк үчүн онлар Јеһованын көмәјинә үмид бәсләјә биләрләр. Сөзсүз ки, әҝәр сәнин әрин јохдурса, сән һәр ҹәһәтдән һәм атанын, һәм дә ананын вәзифәләрини јеринә јетирә билмәзсән. Бунунла белә, әҝәр сән Јеһованы иманла чағырырсанса, О сәнә, чохсајлы вәзифәләринин өһдәсиндән ҝәлмәјә көмәк едәҹәк. Буна бир нүмунәнин әсасында бахаг: Тәсәввүр ет ки, евә, 9-ҹу мәртәбәјә галдыраҹағын әрзагла долу чантан вар. Әҝәр лифт ишләјирсә, өзүнү әлдән салараг пилләкәнлә галхарсанмы? Сөзсүз ки, јох! Ејни тәрздә, Јеһовадан көмәк етмәси үчүн хаһиш едә биләҹәјин һалда, ағыр емосионал јүкү тәнһа дашымаға чалышма. Әслиндә Јеһова Өзү сәни Она мүраҹиәт етмәјә дә’вәт едир. Мәзмур 68:19 ајәсиндә дејилир: “Һәр ҝүн јүкүмүзү дашыјан Рәбб... мүбарәк олсун”. Ејни заманда 1 Петер 5:7 ајәси дә сәни, бүтүн јүкләрини Јеһованын үзәринә гојмаға тәшвиг едир, ‘чүнки сәнин гајғына галан Одур’. Буна ҝөрә дә, проблемләр вә нараһатчылыглар сәни үзәндә, “дурмадан” һәр шеј барәсиндә сәмави Атана даныш (1 Салониклиләрә 5:17; Мәзмур 18:6; 55:22).

¹⁵ Мисал үчүн, сәни бир ана кими, шүбһәсиз ки, мәктәбдә тај-тушларынын ушагларына ҝөстәрдикләри тә’сир вә ја иманлары илә әлагәдар гаршылашдыглары сынаглар нараһат едир (1 Коринфлиләрә 15:33). Бу ҹүр нараһатчылыглар әсаслыдыр. Лакин бу мәсәләләр дә сәнин дуаларынын мөвзусуна чеврилә биләр. Нәјә ҝөрә бу барәдә ушаглар мәктәбә ҝетмәздән әввәл онларла бир јердә, мәсәлән, Мүгәддәс Китабын ҝүндәлик ајәсини бирликдә мүзакирә етдикдән сонра дуа етмәјәсән? Сәмими вә конкрет дуалар ушагларын ҝәнҹ ағлында ҝүҹлү тәәссүрат јарада биләр. Бундан әлавә, әҝәр сән Аллаһын Кәламыны сәбирлә ушагларына өјрәтмәјә чалышырсанса, сәни Јеһованын хејир-дуалары ҝөзләјир (Тәснијә 6:6, 7; Сүлејманын мәсәлләри 22:6). Јадда сахла ки, “Рәббин ҝөзләри салеһләрә, гулаглары онларын дуаларына тәрәф јөнәлмишдир” (1 Петер 3:12; Филипилиләрә 4:6, 7).

16, 17. а) Бир гардаш анасынын мәһәббәти һаггында нә демишдир? б) Һәмин баҹынын руһани әһвал-руһијјәси ушагларына неҹә тә’сир ҝөстәрмишдир?

¹⁶ Алты ушаг анасы олан Оливијанын нүмунәсини нәзәрдән кечирәк. Онун, иманына шәрик олмајан әри, демәк олар ки, сонунҹу ушаг доғуландан дәрһал сонра аиләни тәрк етмишдир, лакин гадын ушагларына Аллаһын јолуну өјрәтмәк вәзифәсини һазырлыгла өз үзәринә ҝөтүрмүшдүр. Оливијанын һал-һазырда мәсиһчи ағсаггалы вә пионер кими хидмәт едән оғлу Дарренин о заман 5 јашы варды. Оливијанын бүтүн гајғыларынын үзәринә даһа бир дәрд, Даррени индијәдәк нараһат едән ҹидди хәстәлији әлавә олунду. Һал-һазырда 31 јашында олан Даррен ушаглығыны јада салараг јазыр: “Хәстәхана чарпајысында отуруб сәбирсизликлә анамы ҝөзләдијими инди дә хатырлајырам. О, һәр ҝүн јаныма ҝәлир, мәнимлә отуруб Мүгәддәс Китабы охујурду. Сонра да “Јеһова, шүкр олсун сәнә” адлы Падшаһлыг маһнысыны охујурдуb. Бу маһны индијәдәк мәним ән севдијим маһныдыр”.

¹⁷ Јеһоваја ҝүвәнмәси вә Она олан мәһәббәти, аналыг вәзифәсинин өһдәсиндән мүвәффәгијјәтлә ҝәлмәкдә Оливијаја көмәк етди (Сүлејманын мәсәлләри 3:5, 6). Онун ҝөзәл әһвал-руһијјәси, ушагларынын гаршысына гојдуғу мәгсәдләрдә әкс олунмушдур. Даррен дејир: “Анам бизи һәмишә таммүддәтли хидмәтә ҹан атмаға тәшвиг едирди. Вә будур, беш баҹымдан дөрдү вә мән таммүддәтли хидмәтдә чалышырыг. Лакин буна ҝөрә анам башгаларынын гаршысында һеч заман өјүнмәјиб. Мән онун ҝөзәл кејфијјәтләрини тәглид етмәјә чох чалышырам”. Е’тираф етмәк лазымдыр ки, Оливијанын ушаглары кими, бүтүн ушаглар Аллаһын хидмәтчиләри кими бөјүмүрләр. Лакин ана Мүгәддәс Китаб принсипләринә әсасән јашамаг үчүн әлиндән ҝәләни едирсә, Јеһованын вердији рәһбәрлијә вә севән јардымына әмин ола биләр (Мәзмур 32:8).

18. Јеһованын бизә вердији мәсиһчи јығынҹағына ҝөрә олан миннәтдарлығымызы неҹә ҝөстәрә биләрик?

¹⁸ Чох вахт Јеһова бизи мәсиһчи јығынҹағы, јығынҹағын мүнтәзәм руһани гидаланма програмы, мәсиһчи гардашлығы вә руһән јеткин “инсанлар тимсалында һәдијјәләр” васитәсилә мүдафиә едир (Ефеслиләрә 4:8, ЈД). Садиг ағсаггаллар ‘јетимләрә вә дуллара мәшәггәтли анларында’ хүсуси диггәт ајырмагла, јығынҹағын бүтүн үзвләрини инкишаф етдирмәк үчүн сә’јлә чалышырлар (Јагуб 1:27). Буна ҝөрә дә Аллаһын халгына јахынлаш, ондан узаглашма (Сүлејманын мәсәлләри 18:1; Ромалылара 14:7).

Табечилик ҝөзәлләшдирир

19. Гадынын табечилији нәјә ҝөрә ону алчалтмыр вә буну Мүгәддәс Китабын һансы нүмунәси сүбут едир?

¹⁹ Јеһова гадыны кишијә мүнасиб олан бир көмәкчи јаратмышдыр (Јарадылыш 2:18, МКШ). Буна ҝөрә дә гадынын әринә табечилији ону һеч ҹүр алчалтмыр. Әксинә, гадынын чохсајлы исте’дад вә габилијјәтләрини Аллаһын ирадәсинә мүвафиг тәрздә истифадә етмәсинә имканлар јарадараг, ону јүксәлдир. “Сүлејманын мәсәлләри” китабынын 31-ҹи фәслиндә гәдим Исраилдә хејирхаһ арвадын ҝөрдүјү ишләр ҝениш тәсвир едилир. О, еһтијаҹы оланлара көмәк едир, үзүм бағлары салыр вә торпаг әлдә едирди. “Әринин гәлби ондан архајындыр, дајанмадан бәрәкәт газаныр” (11, 16, 20-ҹи ајәләр, МКШ).

20. а) Мәсиһчи гадын Аллаһдан алдығы баҹарыглара неҹә бахмалыдыр? б) Естер һансы ҝөзәл кејфијјәтләрә саһиб иди вә бунун сајәсиндә Јеһова ону неҹә истифадә етди?

²⁰ Тәвазөкар, Аллаһ горхусуна малик олан гадын шөһрәтпәрәст дејил вә әрини өзүнә рәгабәтчи санмыр (Сүлејманын мәсәлләри 16:18). О, ҹәмијјәт арасында да өз габилијјәтләри илә башгаларындан үстүн олмаға ҹан атмыр, лакин Аллаһын она вердији исте’дад вә баҹарыглардан илк нөвбәдә башгаларына — аиләсинә, һәмиманлыларына, јахынларына вә ән башлыҹасы исә Јеһоваја хидмәт етмәк үчүн истифадә едир (Галатијалылара 6:10; Титуса 2:3-5). Мүгәддәс Китабдан шаһзадә Естерин нүмунәсини нәзәрдән кечирәк. Заһири ҝөзәллијинә бахмајараг, о, тәвазөкар вә итаәткар иди (Естер 2:13, 15). Әрә ҝетдикдән сонра, о, әри Аһашверош падшаһа, онун әввәлки арвады Ваштидән фәргли олараг еһтирам бәсләјирди (Естер 1:10-12; 2:16, 17). Естер һәм дә өзүндән бөјүк олан әмиси оғлу Мордекаја һөрмәт едир вә шаһзадә оландан сонра да она гулаг асырды. Лакин о һеч дә зәиф ирадәли адам дејилди! О, Һаманы, јәһудиләри мәһв етмәк үчүн суи-гәсд һазырлајан гүдрәтли вә инсафсыз шәхси, ҹәсарәтлә ифша етди. Јеһова Естери, Өз халгыны хилас етмәк кими бөјүк ишдә истифадә етди (Естер 3:8–4:17; 7:1-10; 9:13).

21. Мәсиһчи гадын Јеһова үчүн даһа неҹә дәјәрли ола биләр?

²¹ Ајдындыр ки, кечмишдә олдуғу кими, Аллаһ горхусуна малик олан гадынлар бу ҝүн дә Јеһоваја һәдсиз сәдагәт ҝөстәрир вә Она фәдакарлыгла хидмәт едирләр. Буна ҝөрә дә онлар Јеһованын ҝөзүндә дәјәрлидирләр. Әзиз баҹылар, јол верин ки, Јеһова мүгәддәс руһу васитәсилә сизи тәдриҹән даһа арзу едилән, “һәр хејирли иш үчүн һазырланмыш” ‘габа’ чевирсин (2 Тимотејә 2:21; Ромалылара 12:2). Аллаһын бу ҹүр гијмәтли хидмәтчиләри барәдә Мүгәддәс Китабда дејилир: “Она әлинин бәһрәсини верин, гој шәһәр дарвазасында әмәлләри она тә’риф ҝәтирсин” (Сүлејманын мәсәлләри 31:31, МКШ). Гој бу сөзләр сизләрдән һәр биринизин үзәриндә јеринә јетсин.

[Һашијәләр]

Хатырлајырсынызмы?

• I әсрин бә’зи мәсиһчи гадынлары нәјин сајәсиндә Јеһованын ҝөзүндә дәјәрли идиләр?

• Бизим дөврдә бир чох баҹылары Аллаһ үчүн дәјәрли едән нә олмушдур?

• Тәнһа аналары вә әри олмајан диҝәр баҹылары Јеһова неҹә дәстәкләјир?

• Гадын башчылыға олан сәмими һөрмәтини неҹә ҝөстәрә биләр?

[27-ҹи сәһифәдәки чәрчивә]

ҮЗӘРИНДӘ ДҮШҮНМӘК ҮЧҮН НҮМУНӘЛӘР

Аллаһа садиг олан, Мүгәддәс Китабда адлары чәкилән башга гадынларын да нүмунәләрини нәзәрдән кечирмәк истәјәрдинизми? Әҝәр еләдирсә, онда ашағыда ҝөстәрилән ајәләри охујун. Адлары садаланан гадынларын нүмунәләри үзәриндә дүшүнәрәк онлары даһа артыг дәрәҹәдә нәдә тәглид едә биләҹәјинизи ҝөрмәјә чалышын (Ромалылара 15:4).

❖ Сара. Тәквин 12:1, 5; 13:18а; 21: 9-12; 1 Петер 3: 5, 6.

❖ Сәхавәтли исраилли гадынлар. Чыхыш 35:5, 22, 25, 26; 36: 3-7; Лука 21: 1-4.

❖ Дебора. Һакимләр 4:1–5:31.

❖ Рут. Рут 1:4, 5, 16, 17; 2:2, 3, 11-13; 4:15.

❖ Шунемдән олан гадын. 2 Краллар 4:8-37.

❖ Кән’анлы гадын. Матта 15:22-28.

❖ Марта вә Мәрјәм. Марк 14:3-9; Лука 10:38-42; Јәһја 11:17-29; 12:1-8.

❖ Табита. Һәвариләрин ишләри 9:36-41.

❖ Филипин дөрд гызы. Һәвариләрин ишләри 21:9.

❖ Фиби. Ромалылара 16:1, 2.

[25-ҹи сәһифәдәки шәкил]

Аллаһын ганунуна сәдагәтлә итаәт едән субај баҹылары тә’рифләјирсинизми?

[26-ҹы сәһифәдәки шәкил]

Ушаглары мәктәбә јола саларкән конкрет олараг нә барәдә дуа етмәк олар?