‘Аллаһын Кәламыны доғрулугла өјрәт’
“Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 ТИМОТЕЈӘ 2:15).
1, 2. а) Ишчиләрә аләтләр нәјә ҝөрә лазымдыр? б) Мәсиһчиләр һансы ишлә мәшғулдурлар вә онлар әввәлҹә Падшаһлығы ахтардыгларыны неҹә ҝөстәрирләр?
ИШЛӘРИНИ јеринә јетирмәк үчүн ишчиләрә аләтләр лазымдыр. Лакин әлә кечән биринҹи аләти ҝөтүрмәк кифајәт дејил. Ишчијә мүвафиг аләт ҝәрәкдир вә о, бу аләтдән дүзҝүн истифадә етмәлидир. Әҝәр сән, мисал үчүн, анбар тикәркән ики лөвһәни бири-биринә бәркитмәк истәсәјдин, сәнә јалныз чәкиҹ вә мисмар дејил, һәм дә мисмар вурмаг габилијјәти ҝәрәк оларды ки, мисмарлар әјилмәсин. Чәкиҹдән истифадә етмәји баҹармадан мисмар вурмаг чох чәтиндир, һәтта һеч нә алынмаја биләр. Лакин аләтләрдән дүзҝүн истифадә етсәк, иши мүвәффәгијјәтлә баша вурарыг.
2 Исанын давамчылары кими, бизә тапшырыг верилмишдир. Бизә олдугҹа ваҹиб иш тапшырылыб. Иса Мәсиһ давамчыларыны ‘әввәлҹә Падшаһлығы ахтармаға’ тәшвиг едирди (Матта 6:33, И–93). Буну биз неҹә едә биләрик? Үсулун биринҹиси — Падшаһлыг һаггындакы тәблиғ ишиндә вә шаҝирдләрин һазырланмасында сә’јли олмагдыр. Хидмәтимизи мөһкәм сурәтдә Аллаһын Кәламына әсасландырмаг — икинҹи үсулдур. Үчүнҹү үсул исә — нүмунәви давранышдыр (Матта 24:14; 28:19, 20; Һәвариләрин ишләри 8:25; 1 Петер 2:12). Бу мәсиһчи тапшырығыны мүвәффәгијјәтлә вә севинҹлә јеринә јетирмәк үчүн бизә мүнасиб “аләтләр” вә онлардан дүзҝүн истифадә етмәк баҹарығы лазымдыр. Бу саһәдә һәвари Павел мәсиһчи зәһмәткеши кими ҝөзәл бир нүмунәдир вә о өзү һәмиманлыларыны ону тәглид етмәјә чағырырды (1 Коринфлиләрә 11:1; 15:10). Биз, әмәкдашымыз олан Павелдән нә өјрәнирик?
Павел — Падшаһлығын чалышган тәблиғчиси
3. Нәјә ҝөрә демәк олар ки, һәвари Павел Падшаһлыг ишиндә чалышган ишчи олмушдур?
3 Павел неҹә ишчи олмушдур? Шүбһәсиз ки, чалышган. Павел гүввәсини әсирҝәмәдән хош хәбәри Аралыг дәнизини әһатә едән ҝениш әразиләрдә јајырды. Јорулмаг билмәјән бу һәвари, Падшаһлығы бу ҹүр сә’јлә тәблиғ етмәсинин сәбәбини бу ҹүр изаһ едир: “Әҝәр Мүждәни тәблиғ едирәмсә, ифтихар етмәјә һаггым јохдур; чүнки бу, мәним зәрури вәзифәмдир вә әҝәр тәблиғ етмирәмсә, вај һалыма!” (1 Коринфлиләрә 9:16). Павел јалныз өз һәјатынымы хилас етмәјә чалышырды? Хејр. О, худбин инсан дејилди. Павел арзу едирди ки, хош хәбәрин васитәсилә башга инсанлар да хилас олсунлар. О јазырды: “Һәр кәс үчүн һәр шеј олдум ки, һәр неҹә олурса-олсун бә’зиләрини хилас едим” (1 Коринфлиләрә 9:22).
4. Мәсиһчи ишчиләр Падшаһлыг ишиндә даһа чох һансы “аләти” гијмәтләндирирләр?
4 Һәвари Павел тәвазөкар ишчи иди вә јалныз өз шәхси габилијјәтинә архалана билмәјәҹәјини баша дүшүрдү. Дүлҝәрә чәкиҹ лазым олдуғу кими, Павелә дә, Аллаһын һәгигәтини өз динләјиҹиләринә ашыламаг үчүн мүвафиг “аләт” лазым иди. Бәс онун әсас “аләти” нә иди? Аллаһын Кәламы олан Мүгәддәс Јазылар. Биз бүтөв Мүгәддәс Китаба маликик вә шаҝирдләр һазырламаг ишиндә о бизим башлыҹа “аләтимиздир”.
5. Јахшы мүәллимләр олмаг үчүн Мүгәддәс Китаб ајәләрини ситат ҝәтирмәкдән әлавә биз нә етмәлијик?
5 Павел билирди ки, Аллаһын Кәламыны доғрулугла өјрәтмәк, ондан садәҹә олараг ситат ҝәтирмәкдән даһа бөјүк мә’на дашыјыр. О, өз динләјиҹиләрини “инандырмаға чалышырды” (Һәвариләрин ишләри 28:23, И–93). О, буну неҹә едирди? Павел бир чох инсанлара Падшаһлыг һаггындакы һәгигәти гәбул етмәкдә көмәк едәркән Аллаһын јазылы Кәламыны мүвәффәгијјәтлә истифадә едирди. О, онларла мүлаһизә јүрүдүрдү. Павел Ефесдәки синагогда үч ај әрзиндә “чәкинмәдән Аллаһын Падшаһлығы һаггында мүбаһисә едир, инсанлары игна ејләјирди”. Бә’зиләри ‘инадҹыл олуб инанмаг истәмәсәләр дә’, башгалары гулаг асырдылар. Павелин Ефесдәки хидмәти сајәсиндә “Рәббин кәламы гүдрәтлә јајылыб нүфуз газанырды” (Һәвариләрин ишләри 19:8, И–93; 9, 20).
6, 7. Павел хидмәтини неҹә иззәтләндирирди вә буну биз неҹә едә биләрик?
6 Падшаһлығын чалышган тәблиғчиси кими Павел хидмәтини иззәтләндирирди (Ромалылара 11:13). О, буну неҹә едирди? О, јүксәлмәјә ҹан атмырды вә һәр јердә Аллаһын әмәкдашы кими танынмагдан да утанмырды. Әксинә, хидмәтини јеринә јетирмәји јүксәк шәрәф сајырды. Павел Аллаһын Кәламыны усталыгла вә еффектлә өјрәдирди. Онун мәһсулдар фәалијјәти башгалары үчүн дә стимул иди вә онлары хидмәтләрини там сурәтдә јеринә јетирмәјә тәшвиг едирди. Онун хидмәти бунунла да иззәтләнирди.
7 Павел кими биз дә Аллаһын Кәламыны тез-тез вә еффектлә истифадә едәрәк хидмәтимизи иззәтләндирә биләрик. Бизим мәгсәдимиз тәблиғ хидмәтинин мүхтәлиф саһәләриндә Мүгәддәс Јазылардакы фикирләри даһа чох инсанларла бөлүшмәк олмалыдыр. Бәс бу заман онлары неҹә инандырмаг олар? Үч ваҹиб үсулу мүзакирә едәк: 1) Инсанын диггәтини Аллаһын Кәламына елә јөнәлт ки, она һөрмәтлә јанашсын. 2) Охудуғуну нәзакәтлә изаһ ет вә онун сөһбәтә неҹә аид олдуғуну ҝөстәр. 3) Мүгәддәс Јазыларын көмәји илә инандырыҹы тәрздә мүлаһизә јүрүт.
8. Тәблиғ иши үчүн бу ҝүн һансы “аләтләр” вар вә сиз онлардан неҹә истифадә едирсиниз?
8 Падшаһлығын мүасир тәблиғчиләри Павелин малик олмадығы “аләтләрә” — вәсаитләрә маликдирләр. Бунларын арасында китаблар, журналлар, брошүралар, мә’лумат вәрәгәләри, трактатлар, аудио-видео јазылар мөвҹуддур. Өтән јүзилликдә биз һәм дә шаһидлик үчүн вәрәгәләрдән, фонографлардан, радиодан вә үзәриндә сәсуҹалдан гурғулар гурулмуш машынлардан истифадә едирдик. Шүбһәсиз ки, ән јахшы “аләтимиз” Мүгәддәс Китабдыр вә әвәзи олмајан бу “аләтдән” фәал сурәтдә вә дүзҝүн истифадә етмәлијик.
Хидмәтимиз мөһкәм сурәтдә Аллаһын Кәламына әсасланмалыдыр
9, 10. Павелин Тимотејә вердији нәсиһәтдән Аллаһын Кәламыны истифадә етмәјә даир нә өјрәнирик?
9 Неҹә едәк ки, Аллаһын Кәламы әлимиздә јахшы “аләтә” чеврилсин? Бунун үчүн Павелин өз әмәкдашы Тимотејә дедији сөзләрә диггәт јетирмәк лазымдыр: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:15). “Һәгигәт сөзүнү доғрулугла өјрәдән” нә демәкдир?
10 “Доғрулугла өјрәтмәк” кими тәрҹүмә олунан јунан сөзү, һәрфи мә’нада “дүз кәсмәк” вә ја “дүз хәтт үзрә јол салмаг” демәкдир. Јунанҹа Мүгәддәс Јазыларда бу сөзү јалныз Павелин Тимотејә үнванладығы нәсиһәтдә тапмаг олар. Бу сөзлә тарлада дүз ачылан шырымы тәсвир етмәк олар. Әҝәр тәҹрүбәли ҹүтчүнүн ачдығы шырым әјри олсајды, әлбәттә ки, о утанарды. Тимотеј “утанмаға әсасы олмајан... ишчи” олсун дејә, Павел она хатырладырды ки, Аллаһын Кәламынын һәгиги тә’лимләриндән узаглашмаг јолверилмәздир. Тимотеј чалышмалы иди ки, онун нөгтеји-нәзәрләри өјрәтдији тә’лимләрә тә’сир етмәсин. О, тәблиғ етдији вә өјрәтдији һәр шеји тамамилә Мүгәддәс Јазылара әсасландырмалы иди (2 Тимотејә 4:2-4). Белә олан һалда сәмими инсанлар ағылларыны дүнјәви фәлсәфәләрлә долдурмаз, Јеһованын нөгтеји-нәзәрини гәбул едә биләрдиләр (Колослулара 2:4, 8). Вәзијјәт бу ҝүн дә ејни ҹүрдүр.
Давранышымыз нүмунәви олмалыдыр
11, 12. Давранышымыз Аллаһын Кәламыны доғрулугла өјрәтмәк габилијјәтимизә неҹә тә’сир едир?
11 Биз Аллаһын Кәламыны доғрулугла өјрәтмәкдән даһа артыг иш ҝөрмәлијик. Бизим давранышымыз өјрәтдикләримизә мүвафиг олмалыдыр. ‘Биз Аллаһын әмәкдашлары’ олдуғумуз үчүн икиүзлү ишчиләр олмалы дејилик (1 Коринфлиләрә 3:9). Аллаһын Кәламында дејилир: “Бәс нә үчүн сән башгаларыны өјрәдәрәк, өзүнү өјрәтмирсән? Оғурламамағы вә’з едиб, оғурлајырсанмы? “Зина етмә”, — дејәрәк, зина едирсәнми? Бүтләрә нифрәт едиб, мә’бәдләри сојурсанмы?” (Ромалылара 2:21, 22). Буна ҝөрә дә Аллаһын мүасир ишчиләри олан бизләрә Аллаһын Кәламыны доғрулугла өјрәтмәк, нөвбәти нәсиһәтә риајәт етмәк демәкдир: “Бүтүн үрәјинлә Рәббә ҝүвән вә өз анлајышына архаланма; бүтүн јолларында ону таны, о да сәнин јолларыны доғрулдар” (Сүлејманын мәсәлләри 3:5, 6).
12 Аллаһын Кәламыны доғрулугла өјрәдириксә, һансы нәтиҹәни ҝөзләјә биләрик? Аллаһын јазылы Кәламынын гүввәсинин сәмими инсанларын һәјатына неҹә тә’сир ҝөстәрмәјә гадир олдуғуну нәзәрдән кечирәк.
Аллаһын Кәламы һәјаты көкүндән дәјишмәјә гадирдир
13. Аллаһын Кәламыны тәтбиг етмәк инсана неҹә тә’сир едир?
13 Инсан Аллаһын Кәламына е’тибар едирсә, бу Кәлам она ҝүҹлү тә’сир ҝөстәрир вә һәјатында тәәҹҹүблү дәјишикликләр етмәјә көмәк едир. Павел Аллаһын кәламынын тә’сирини ҝөрмүш вә гәдим Салоникдә мәсиһчи оланлара онун мүсбәт тә’сиринә шәһадәт етмишдир. Павел онлара демишдир: “Биз Аллаһа даим шүкүр едирик ки, сиз Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз; сиз иманлылара тә’сир едән дә һәмин кәламдыр” (1 Салониклиләрә 2:13). Һәмин мәсиһчиләр үчүн — үмумијјәтлә, Мәсиһин бүтүн һәгиги давамчылары үчүн — инсан мәнтиги, һәр шејдән үстүн олан Аллаһын мүдриклији илә мүгајисәјәҝәлмәздир (Ишаја 55:9). Салониклиләр ‘бөјүк сыхынты ичиндә Мүгәддәс Руһ севинҹи илә тәблиғи гәбул етдиләр’ вә башга иманлылар үчүн нүмунә олдулар (1 Салониклиләрә 1:5-7).
14, 15. Аллаһын Кәламындакы хәбәр нә гәдәр тә’сирлидир вә нәјә ҝөрә?
14 Аллаһын Кәламы, онун Мәнбәји олан Јеһованын Өзү кими бөјүк гүввәјә маликдир. О, “јашајан Аллаһдан” ҝәлир. “Ҝөјләр Рәббин сөзү илә” јарадылмышдыр. Һәм дә бу сөз етмәси үчүн ҝөндәрилдији иши һәр заман баҹараҹаг (Ибраниләрә 3:12; Мәзмур 33:6; Ишаја 55:11). Бир Мүгәддәс Китаб алими гејд етмишдир: “Аллаһ Өзүнү Кәламындан ајырмыр. О, Кәламындан јад бир шеј кими бојун гачырмыр. [...] Буна ҝөрә дә Кәлам һеч вахт өлмүр, онунла баш верәнләрә гаршы һиссини итирмир; о јашајан Аллаһла гырылмаз телләрлә бағлыдыр”.
15 Аллаһын Кәламындакы хәбәр нә гәдәр тә’сирлидир? О бөјүк гүввәјә маликдир. Павел бу барәдә јазырды: “Аллаһын кәламы ҹанлы вә тә’сирли, һәр ҹүр икиағызлы гылынҹдан итидир; о, ҹанла руһу, ојнагларла илији бир-бириндән ајыраҹаг гәдәр дәлиб кечир вә үрәјин дүшүнҹә вә нијјәтләрини ајырд едир” (Ибраниләрә 4:12).
16. Аллаһын Кәламы инсаны нә дәрәҹәдә дәјишмәјә гадирдир?
16 Аллаһын јазылы Кәламындакы хәбәр “һәр ҹүр икиағызлы гылынҹдан итидир”. Бу хәбәр о гәдәр кәскин гүввәјә маликдир ки, инсанлар тәрәфиндән јарадылан һеч бир силаһ, һеч бир аләт онунла мүгајисә едилә билмәз. Аллаһын Кәламы үрәјин ән ҝизли ҝушәләрини дәлиб кечир вә инсанын дүшүнҹә тәрзинә, һәмчинин мејлләринә тә’сир ҝөстәрәрәк мә’нәвијјатыны дәјишир вә ону Аллаһа мәгбул олан ишчијә чевирир. Неҹә дә ҝүҹлү аләтдир!
17. Изаһ един: Аллаһын Кәламы инсаны неҹә дәјишә биләр?
17 Инсан өзү барәдә нә дүшүнсә дә вә өзүнү әтрафдакылара неҹә танытса да, Аллаһын Кәламы инсанын дахили варлығыны үзә чыхарыр (1 Самуел 16:7). Һәтта пис инсан белә бә’зән өзүнүн дахили мәнлијини хејирхаһлыг вә ја диндарлыг өртүјү алтында ҝизләдә биләр. Бу ҹүр зијанкар инсанлар өзләринин пис мәгсәдләрини ҝүдәрәк хејирхаһ инсан ҹилдинә ҝирирләр. Мәғрур инсанлар башгаларынын онларла фәхр етмәләрини истәјәрәк, өзләрини тәвазөкар инсан кими гәләмә верирләр. Үрәјин әсл вәзијјәтини ифша едәрәк, Аллаһын Кәламы тәвазөкар инсанлара өзләриндән көһнә мәнлији чыхарыб, “Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији” ҝејинмәк үчүн ҝүҹлү стимул верә биләр (Ефеслиләрә 4:22-24). Аллаһын Кәламынын тә’лимләри һәм дә ҹәсарәтсиз инсанлара дәјишилмәкдә вә Јеһованын ҹәсарәтли Шаһидләри, һәмчинин Падшаһлығын чалышган тәблиғчиләри олмагда көмәк етмәјә гадирдир (Јеремја 1:6-9).
18, 19. Бу абзасларын вә ја сизин хидмәтиниздә баш верән һадисәнин әсасында, Мүгәддәс Китаб һәгигәтинин инсанын бахышларыны неҹә дәјишдијини сөјләјин.
18 Һарада јашамаларындан асылы олмајараг, Аллаһын Кәламы инсанлара мүсбәт тә’сир ҝөстәрир. Мәсәлән, Падшаһлығын Пномпендән (Камбоҹа) олан тәблиғчиләри Кампонгсаом вилајәтиндә ајда ики дәфә тәблиғ едирдиләр. Бир пастор гадын, килсәнин диҝәр үзвләринин Јеһованын Шаһидләринин әлејһинә данышдыгларыны ешидиб, ҝәлән дәфә Шаһидләр вилајәтдә тәблиғ едәндә онларла сөһбәт етмәк гәрарына ҝәлди. Ҝөрүш заманы гадын онлара бајрамлара даир чохлу суаллар верир вә онларын Мүгәддәс Јазылара әсасланан ҹавабларыны диггәтлә динләјирди. Сонра о, уҹадан деди: “Инди мән билирәм ки, јолдашларым сизин барәниздә дүз данышмајыблар! Онлар иддиа едирдиләр ки, сиз Мүгәддәс Китабдан истифадә етмирсиниз, амма сиз бу ҝүн анҹаг ондан истифадә етдиниз!”
19 Бу гадын, ону пастор вәзифәсиндән азад етмәк һәдәләринә бахмајараг, Шаһидләрлә Мүгәддәс Китаб әсасында мүзакирәләри давам етдирди. О, бу мүзакирәләр барәсиндә рәфигәсинә данышды вә нәтиҹәдә о да Мүгәддәс Китабы Шаһидләрлә өјрәнмәјә башлады. Әлдә етдији биликләр гадынын рәфигәсинә елә тә’сир бағышлады ки, бир дәфә килсә хидмәти заманы о, уҹадан гышгырды: “Ҝедин Мүгәддәс Китабы Јеһованын Шаһидләри илә өјрәнин!” Бундан тезликлә сонра, гадын килсәнин үзвлүјүндән чыхды. Кечмиш пастор, онун рәфигәси вә башгалары Мүгәддәс Китабы Јеһованын Шаһидләри илә өјрәнмәјә башладылар.
20. Ганадан олан гадынын нүмунәси әсасында Аллаһын Кәламынын ҝүҹү неҹә ҝөрүнүр?
20 Аллаһын Кәламынын ҝүҹүнү һәм дә Ганада јашајан Паулина адлы гадынын нүмунәсиндән ҝөрмәк олар. Падшаһлығын таммүддәтли хидмәтчиси онунла “Әбәди һәјата апаран билик” китабынын әсасында Мүгәддәс Китаб өјрәнмәси кечирирдиa. Паулинанын әри чохарвадлы киши иди вә Паулина баша дүшүрдү ки, һәјатында дәјишиклик етмәлидир. Лакин әри вә гоһумлары она ҝүҹлү мүгавимәт ҝөстәрирдиләр. Онун бабасы — јүксәк вәзифәли һаким вә килсәнин кешиши — Матта 19:4-6 ајәләрини јанлыш сурәтдә изаһ едәрәк, ону фикриндән дашындырмаға чалышды. Онун сөзләри нүфузлу сәсләнирди, лакин Паулина дәрһал баша дүшдү ки, Шејтан Иса Мәсиһи сынаға чәкәркән Јазылары тәһриф етдији кими, бабасы да ејни ҹүр давраныр (Матта 4:5-7). Гадын Исанын никаһ һаггында ајдын сөјләдији — Аллаһ инсанлары киши вә гадынлар дејил, киши вә гадын јаратмышдыр вә үчү јох икиси бир бәдән олаҹаглар — сөзләрини јадына салды. О, өз гәрарынын үзәриндә мөһкәм дајанды вә нәһајәтдә јерли адәтләрә мүвафиг олан бошанмаја наил олуб, полигамик никаһдан азад олду. Тезликлә, Падшаһлығын вәфтиз олунмуш севинҹли тәблиғчиси олду.
Аллаһын Кәламыны дүзҝүн өјрәтмәјә давам ет
21, 22. а) Падшаһлығын тәблиғчиләри кими нә етмәк истәјирик? б) Нөвбәти мәгаләдә нәји нәзәрдән кечирәҹәјик?
21 Аллаһын јазылы Кәламы, башгаларынын Јеһоваја јахынлаша билмәләри үчүн һәјатларында дәјишиклик етмәләринә көмәк едәркән, истифадә едә биләҹәјимиз һәгигәтән дә ҝүҹлү аләтдир (Јагуб 4:8). Аләтләрин көмәји илә јахшы нәтиҹәләр һасил едән баҹарыглы ишчиләр кими, ҝәлин бүтүн гүввәмизи сәрф едәрәк Аллаһын Кәламы олан Мүгәддәс Китабы, Аллаһын һәвалә етдији Падшаһлығы бәјан етмәк ишиндә мәһарәтлә истифадә едәк.
22 Шаҝирдләрин һазырланмасы ишиндә Мүгәддәс Јазылары даһа неҹә мүвәффәгијјәтлә истифадә етмәк олар? Үсуллардан бири, мүәллимләр үчүн зәрури олан инандырмаг габилијјәтини инкишаф етдирмәкдир. Ҝәлин нөвбәти мәгаләни диггәтлә нәзәрдән кечирәк: һәмин мәгалә бизә инсанлары өјрәтмәјин вә онлара Падшаһлыг һаггындакы хәбәри гәбул етмәкдә көмәк етмәјин үсулуну ҝөстәрәҹәк.
[Һашијә]
a Јеһованын Шаһидләри тәрәфиндән дәрҹ олунур.
Хатырлајырсынызмы?
• Падшаһлығын тәблиғчиләри һансы “аләтләрә” маликдирләр?
• Павел һансы саһәләрдә Падшаһлыг ишчиси кими јахшы нүмунә вермишдир?
• Аллаһын Кәламыны доғрулугла өјрәтмәк нә демәкдир?
• Аллаһын јазылы Кәламы нә гәдәр ҝүҹлү тә’сирә маликдир?
[8-ҹи сәһифәдәки шәкилләр]
Падшаһлығы бәјан етмәк ишиндә мәсиһчиләрин истифадә етдикләри “аләтләрдән” бә’зиләри.