Шаҝирдләр һазырламаг мәгсәди илә тәблиғ ет
“[Аполлосу] ешидән Акила вә Прискила ону јанларына алыб Рәбб јолуну она даһа дәгиг изаһ етдиләр” (ҺӘВАРИЛӘРИН ИШЛӘРИ 18:26).
1. Аполлос “руһда сә’јли” олса да, онун нәјә еһтијаҹы варды?
АКИЛА вә Прискила — I әсрдә јашајан мәсиһчи әр-арвад — бир дәфә Аполлосун Ефес шәһәриндәки синагогда неҹә нитг сөјләдијини мүшаһидә етмишдиләр. Бәлағәти вә инандырмаг мәһарәти сајәсиндә Аполлос динләјиҹиләринин диггәтини ҹәлб етмишди. О, “руһда сә’јли олуб Иса барәсиндәки шејләри... доғрулугла өјрәдирди”. Лакин ајдын иди ки, Аполлос “јалныз Јәһјанын вәфтизиндән хәбәрдар”дыр. Аполлосун Мәсиһ һаггында тәблиғ етдикләринин һамысы доғру иди. Проблем онда иди ки, онун билији кифајәт гәдәр там дејилди. Аполлосун, Иса Мәсиһин Јеһованын нијјәтиндә олан ролу барәсиндәки билијини артырмаға еһтијаҹы варды (Һәвариләрин ишләри 18:24-26, И–93).
2. Акила вә Прискила һансы чәтин ишин әтәјиндән јапышдылар?
2 Акила вә Прискила тәрәддүд етмәдән Аполлоса, Мәсиһин өјрәтдији “һәр шејә риајәт етмәји” баҹаран кәс олмагда јардым тәклиф етдиләр (Матта 28:19, 20). Мүгәддәс Китаб хәбәр верир ки, онлар Аполлосу “јанларына алыб Рәбб јолуну она даһа дәгиг изаһ етдиләр”. Лакин Аполлос һаггында мә’лум олан бир факта ҝөрә һәр бир кәс ону өјрәтмәк һәвәсинә дүшмәзди. Бу һансы фактдыр? Вә Аполлосла Мүгәддәс Јазылары мүзакирә етмәк истәјән Акила вә Прискиланын нүмунәсиндән биз нә өјрәнә биләрик? Бу тарихи һадисәни нәзәрдән кечирмәјимиз диггәтимизи Мүгәддәс Китаб өјрәнмәси башламаға ҹәмләшдирмәкдә бизә неҹә көмәк едә биләр?
Инсанларын тәләбатларына диггәт јетирмәк
3. Аполлосун мәншәји вә габилијјәтләри Акила вә Прискилаја ону өјрәтмәјә нәјә ҝөрә мане олмады?
3 Әсли јәһуди олан Аполлос, ҝөрүндүјү кими, Исҝәндәријјә шәһәриндә тәрбијә алмышдыр. Исҝәндәријјә о заманлар Мисирин пајтахты вә өзүнүн бөјүк китабханасы илә танынмыш јүксәк тәһсил мәркәзи иди. Шәһәрдә чохлу јәһуди јашајырды, араларында алимләр дә варды. Септуагинта — Ибраниҹә Мүгәддәс Јазыларын јунан дилинә тәрҹүмәси мәһз бурада һазырланмышдыр. Аполлосун “Мүгәддәс Јазылары јахшы билән” олмасы тәәҹҹүблү дејил! Акила вә Прискила исә чадыр һазырламагла мәшғул идиләр. Онлар Аполлосун бәлағәти гаршысында горхуја дүшдүләрми? Хејр. Мәһәббәтдән ирәли ҝәләрәк онлар инсанын өзү, онун тәләбатлары вә она неҹә көмәк етмәк һаггында дүшүндүләр.
4. Аполлос она лазым олан көмәклији һарада вә неҹә алды?
4 Аполлос нә гәдәр бәлағәтлә данышса да, тә’лим алмаға еһтијаҹы варды. Лазым олан көмәклији университетләрдә алмаг мүмкүн дејилди, лакин ону мәсиһчи јығынҹағында һәмиманлылар арасында тапмаг мүмкүн иди. Аполлос хилас үчүн Аллаһын һансы тәдбир ҝөрәҹәјини даһа дәгиг баша дүшсүн дејә, әлавә мә’луматлар алмалы иди. Акила вә Прискила “ону јанларына алыб Рәбб јолуну она даһа дәгиг изаһ етдиләр”.
5. Акила вә Прискиланын руһани вәзијјәтләри барәдә нә демәк олар?
5 Акила вә Прискила руһән гүввәтли вә иманда мөһкәм тәмәлә малик олан кәсләр идиләр. Даһа доғрусу, онлар истәр варлы, истәр касыб, истәр алим вә ја көлә гаршысында, ‘үмид барәсиндә һесабат истәјән һәр кәсә һәмишә ҹаваб вермәк үчүн һазыр идиләр’ (1 Петер 3:15). Акила вә онун арвады ‘һәгигәт сөзүнү доғрулугла өјрәтмәји’ баҹарырдылар (2 Тимотејә 2:15). Еһтимал ки, онлар Мүгәддәс Јазылары ҹидди сурәтдә өјрәнирдиләр. Аллаһын “ҹанлы вә тә’сирли” кәламына әсасланан өјүд Аполлосда ҝүҹлү тәәссүрат ојатды вә онун үрәјинә јол тапды (Ибраниләрә 4:12).
6. Аполлосун алдығы көмәклијә ҝөрә миннәтдарлыг һисси дујдуғуну һарадан билирик?
6 Мүәллимләринин нүмунәләринә ҝөрә миннәтдар олан Аполлос, шаҝирдләр һазырламаг ишиндә даһа да усталашды. О, өз биликләриндән хош хәбәри тәблиғ етмәк ишиндә, хүсусилә дә јәһуди милләти арасында, мүвәффәгијјәтлә истифадә едирди. Аполлос јәһудиләри Мәсиһлә бағлы олан шејләрә инандырараг даһа бөјүк көмәклик ҝөстәрирди. О, Мүгәддәс Јазыларда “гүввәтли иди”, буна ҝөрә дә гәдимдә јашајан бүтүн пејғәмбәрләрин Мәсиһин ҝәлишини ҝөзләдикләрини онлара сүбут едә билирди (Һәвариләрин ишләри 18:24, КМ). Мүгәддәс Китабда дејилир ки, Аполлос сонра Ахајаја ҝетди вә орада “Аллаһын лүтфү илә иман етмиш оланлара чох јардым етди. Чүнки Исанын Мәсиһ олдуғуну Мүгәддәс Јазыларла сүбут едәрәк, јәһудиләрин фикирләрини үмумхалг гаршысында вар ҝүҹү илә тәкзиб едирди” (Һәвариләрин ишләри 18:27, 28).
Башга мүәллимләрин нүмунәсиндән өјрән
7. Акила вә Прискила нәјин сајәсиндә мәһарәтли мүәллимләр олдулар?
7 Неҹә олду ки, Акила вә Прискила Аллаһын Кәламынын тәҹрүбәли мүәллимләри олдулар? Шәхси өјрәнмәдә вә ҝөрүшләрдә иштирак етмәк үчүн ҝөстәрдикләри сә’јдән әлавә, бөјүк ролу, еһтимал ки, онларын һәвари Павеллә јахын үнсијјәтләри ојнамышдыр. Павел Коринфдә Акила вә Прискиланын евиндә 18 ај јашамышдыр. Онлар бир јердә ишләјәрәк чадырлар һазырлајыр вә тә’мир едирдиләр (Һәвариләрин ишләри 18:2, 3). Ҝүман етмәк олар ки, бу онлара Мүгәддәс Китаб мөвзуларында дәрин сөһбәтләр етмәјә имкан јарадырды. Павеллә бу ҹүр сөһбәтләр онларын руһани вәзијјәтләрини неҹә дә мөһкәмләндирди! Сүлејманын мәсәлләри 13:20 ајәсиндә дејилир: “Һикмәтлиләрлә јеријән адам һикмәтли олар”. Јахшы достлуг онларын руһани вәрдишләринә јахшы тә’сир ҝөстәрди (1 Коринфлиләрә 15:33).
8. Павелин хидмәтини мүшаһидә едәрәк Акила вә Прискила нә өјрәндиләр?
8 Акила вә Прискила Падшаһлығын тәблиғчиси олан Павелдә јахшы мүәллимин ҹанлы нүмунәсини ҝөрә билдиләр. “Һәвариләрин ишләри” китабында дејилир ки, Павел һәр шәнбә ҝүнү Коринфдәки синагогда нитг сөјләјиб, “јәһудиләри вә јунанлары инандырмаға чалышырды” (И–93). Сонра Сила вә Тимотеј она гошулдугда, Павел “өзүнү тамамилә Аллаһын кәламыны јајмаг ишинә һәср едир вә јәһудиләрә Исанын Мәсиһ олдуғуна шәһадәт едирди”. Синагог үзвләринин зәиф мараг ҝөстәрдикләри ајдын оланда, Акила вә Прискиланын мүшаһидә етдикләри кими, Павел ораны тәрк едиб диггәтини даһа мүнасиб олан јерә — синагога битишик олан евә јөнәлтди. Орада Павел “синагог рәиси” олан Криспуса шаҝирд олмагда көмәк едә билди. Чох еһтимал ки, Акила вә Прискила Криспусун шаҝирд олмасынын јерли әһалијә ҝүҹлү тә’сир бағышладығына вә чохлу бәһрәләр ҝәтирдијинә диггәт јетирдиләр. Биз охујуруг: “Криспус бүтүн ев әһли илә бәрабәр Рәббә иман етди; вә коринфлиләрдән бир чоху буну ешидәрәк иман едиб вәфтиз олдулар” (Һәвариләрин ишләри 18:4-8).
9. Павелин нүмунәси Акила вә Прискилаја неҹә тә’сир ҝөстәрди?
9 Падшаһлығын Акила вә Прискила кими диҝәр тәблиғчиләри Павелин тәблиғ хидмәтиндәки нүмунәсини тәглид етмәјә башладылар. Һәвари һәмиманлыларыны дә’вәт едирди: “Мән Мәсиһи тәглид етдијим кими, сиз дә мәни тәглид един” (1 Коринфлиләрә 11:1). Павели тәглид едәрәк, Акила вә Прискила мәсиһчи тә’лимләрини даһа дәгиг баша дүшмәкдә Аполлоса көмәк етдиләр. О исә, өз нөвбәсиндә, башгаларына көмәк етди. Шүбһәсиз ки, Акила вә Прискила Ромада, Коринфдә вә Ефесдә шаҝирдләрин һазырланмасында иштирак едирдиләр (Һәвариләрин ишләри 18:1, 2, 18, 19; Ромалылара 16:3-5).
10. “Һәвариләрин ишләри” китабынын 18-ҹи фәслиндән шаҝирдләрин һазырланмасы ишиндә фајдалы олан һансы ибрәт дәрсләрини әлдә етдиниз?
10 “Һәвариләрин ишләри” китабынын 18-ҹи фәслиндән биз нә өјрәнә биләрик? Илк өнҹә, Акила вә Прискиланын Павелдән өјрәнә билдикләри кими, биз дә Аллаһын Кәламынын јахшы мүәллимләринин нүмунәсини тәглид едәрәк шаҝирдләр һазырламаг габилијјәтимизи тәкмилләшдирә биләрик. Биз, ‘өзүнү тамамилә Аллаһын кәламыны јајмаг ишинә һәср едән’ вә башгаларына әсаслы сурәтдә шаһидлик едән кәсләрлә үнсијјәт едә биләрик (Һәвариләрин ишләри 18:5). Онларын инандырмаг мәһарәтинин көмәји илә инсанларын үрәкләрини неҹә әлә алдыгларына диггәт јетирә биләрик. Әҝәр биз бу ҹүр габилијјәтә малик оларыгса, мүвәффәгијјәтлә шаҝирдләр һазырлаја биләрик. Киминләсә Мүгәддәс Китаб өјрәнмәси кечирәндә, һәмин адама тәклиф едә биләрик ки, өјрәнмәјә аиләсинин үзвләрини вә ја гоншуларыны дә’вәт етсин. Јахуд, Мүгәддәс Китаб өјрәнмәси тәклиф едә биләҹәјимиз инсанлары бизә танытмасыны хаһиш едә биләрик (Һәвариләрин ишләри 18:6-8).
Шаҝирдләр һазырламаг үчүн имканлар ахтар
11. Јени шаҝирдләри һарадан тапмаг олар?
11 Павел вә башга мәсиһчиләр евдән-евә, базарда, јолда — бир сөзлә һәр јердә тәблиғ етмәклә шаҝирдләр һазырламаг үчүн имканлар ахтарырдылар. Шаҝирдләр һазырламаға сә’ј ҝөстәрән Падшаһлығын чалышган тәблиғчиси кими, сән хидмәтдәки иштиракыны артыра биләрдинми? Ләјагәтли инсанлары ахтарыб, онлара тәблиғ етмәк үчүн мүнасиб имканлардан истифадә едә биләрдинми? Хош хәбәрин диҝәр тәблиғчиләри шаҝирдләр тапмаға неҹә мүвәффәг олурлар? Әввәлҹә телефон васитәсилә шаһидлијә диггәт јетирәк.
12-14. Ја өз нүмунәнизин, ја да абзасларда ҝәтирилән нүмунәләрдән биринин әсасында телефон васитәсилә шаһидлик етмәјин еффектли олдуғуну ҝөстәрин.
12 Бразилијада евдән-евә шаһидлик едәркән бир мәсиһчи гадын — ону Марија адландыраг — чохмәнзилли евдә јашајан ҹаван бир гадына трактат верди. Марија трактатын адында олан суалы верди: “Мүгәддәс Китаб һаггында даһа чох билмәк истәјәрдинизми?” Гадын ҹаваб верди: “Буну чох истәрдим. Лакин мәсәлә ондадыр ки, мән мүәллимәјәм вә иш бүтүн вахтымы алыр”. Марија деди ки, онлар Мүгәддәс Китаба даир суаллары телефон васитәсилә мүзакирә едә биләрләр. Гадын она телефон нөмрәсини верди вә елә һәмин ахшам Марија гадынла “Аллаһ биздән нә тәләб едир?”a брошүрасынын көмәји илә телефон васитәсилә өјрәнмә башлады”.
13 Ефиопијада јашајан, таммүддәтли хидмәтдә чалышан гадын телефон васитәсилә тәблиғ едәркән бир киши илә сөһбәтә башлады. Телефонун дәстәјиндән ешидилән сәс гадыны һәјәҹанландырды. Киши хаһиш етди ки, бир гәдәр сонра зәнҝ вурсун. Нөвбәти сөһбәт заманы киши үзр истәди вә деди ки, кечән дәфә гадын зәнҝ вуранда онунла арвады арасында дава-далаш варды. Онун сөзләрини нәзәрә алараг, баҹымыз аилә проблемләрини һәлл етмәк үчүн Мүгәддәс Китабын вердији мүдрик рәһбәрлијә диггәт јөнәлтди. Баҹы она Јеһованын Шаһидләри тәрәфиндән дәрҹ олунан “Аилә хошбәхтлијинин сирри” китабынын бир чох аиләләрә көмәк етдијини сөјләди. Китабы кишијә ҝөндәрдикдән бир нечә ҝүн сонра баҹы она јенидән зәнҝ вурду. Киши уҹадан деди: “Бу китаб аиләми хилас етди!” Мә’лум олду ки, о аиләсини башына топлајыб, китабдан өјрәндији дәјәрли фикирләри онларла бөлүшүб. Мүгәддәс Китаб өјрәнмәси башланды вә тезликлә һәмин киши мүнтәзәм олараг мәсиһчи ҝөрүшләринә ҝәлмәјә башлады.
14 Данимаркада јашајан вә телефон васитәсилә шаһидлик едәркән Мүгәддәс Китаб өјрәнмәси башлајан Падшаһлыг хидмәтчиси данышыр: “Хидмәти нәзарәтчи мәни телефон васитәсилә шаһидлик етмәјә һәвәсләндирирди. Әввәлҹә истәмирдим, чүнки дүшүнүрдүм: “Бу мәним ишим дејил”. Лакин бир дәфә ҹәсарәтими топлајыб биринҹи нөмрәни јығдым. Сонја адлы бир гадын ҹаваб верди вә гыса сөһбәтдән сонра Мүгәддәс Китаба әсасланан әдәбијјат ҝөтүрмәјә разылыг верди. Бир ахшам дүнјанын јарадылмасы барәсиндәки суалы мүзакирә едирдик вә о, “Һәјат неҹә әмәлә ҝәлиб? Тәкамүл, јохса јарадылма јолу илә?”b китабыны охумаг истәдијини билдирди. Сөјләдим ки, шәхсән ҝөрүшүб бу мөвзуда сөһбәт етмәјимиз јахшы оларды. О разылашды. Мән ҝәләндә Сонја өјрәнмәјә һазыр иди вә елә һәмин вахтдан биз һәр һәфтә өјрәнмә кечиририк”. Сонда мәсиһчи баҹымыз буну сөјләди: “Мән Мүгәддәс Китаб өјрәнмәси тапмаг үчүн узун илләр дуа етмишәм, амма һеч заман дүшүнмүрдүм ки, ону телефон васитәсилә шаһидлик едәрәк тапаҹағам”.
15, 16. Мүгәддәс Китаб өјрәнмәси башламаг үчүн мүхтәлиф үсуллардан истифадә етмәјин фајдалы олдуғуна даир сиз һансы һадисәләри даныша биләрсиниз?
15 Бир чохлары, һарада олмаларындан асылы олмајараг, инсанлара тәблиғ етмәк мәсләһәтләринә риајәт едәрәк ҝөзәл бәһрәләр әлдә едирләр. Бирләшмиш Штатларда бир баҹымыз машыныны тиҹарәт фургонунун јанында сахлады. Фургонда олан гадын баҹымызы ҝөрәндә, баҹымыз она Мүгәддәс Китаб әсасында маарифләндириҹи ишимиз барәдә данышмаға башлады. Баҹымызы динләдикдән сонра гадын фургондан чыхды вә баҹымызын машынына јахынлашды. О деди: “Мәнимлә сөһбәт етмәк үчүн дајандығыныза ҝөрә чох шадам. Артыг чохдандыр ки, сизин Мүгәддәс Китаба әсасланан әдәбијјатыныз әлимә кечмир. Бир дә ону дејим ки, мән јенидән Мүгәддәс Китабы өјрәнмәк истәјирәм. Сиз мәнә көмәк едә биләрдинизми?” Баҹымыз шаһидлик етмәк үчүн имканлар ахтардығы үчүн хош хәбәри бөлүшә билди.
16 Бирләшмиш Штатларда бир баҹымыз гоҹалар евинә баш чәкди вә орадакы фәалијјәт үчүн ҹавабдеһ олан кәслә данышды. Баҹы она билдирди ки, бурада јашајан инсанлара руһани көмәклик ҝөстәрмәк истәјәрди. Вә әлавә етди ки, арзу едән һәр бир кәслә һәфтәдә бир дәфә пулсуз Мүгәддәс Китаб өјрәнмәси кечирмәјә шад оларды. Она сакинләрә баш чәкмәјә изн вердиләр. Бир гәдәр сонра баҹымыз үмуми һесабла 26 сакинлә һәфтәдә үч дәфә Мүгәддәс Китаб өјрәнмәси кечирирди. Онлардан бири исә мүнтәзәм олараг ҝөрүшләримизә ҝәлә билир.
17. Чох вахт Мүгәддәс Китаб өјрәнмәси башламаг үчүн һансы үсул мүвәффәгијјәтә ҝәтириб чыхарыр?
17 Падшаһлығын бә’зи тәблиғчиләри бирбаша олараг Мүгәддәс Китаб өјрәнмәси тәклиф етмәклә мүвәффәгијјәтә наил олурлар. Бир сәһәр, 105 тәблиғчидән ибарәт олан бир јығынҹаг бүтүн сакинләрә Мүгәддәс Китаб өјрәнмәси тәклиф етмәк үчүн хүсуси сә’ј ҝөстәрди. Тәблиғ хидмәтиндә 86 тәблиғчи иштирак едирди вә ики саатлыг тәблиғдән сонра ән азы 15 Мүгәддәс Китаб өјрәнмәси башланылды.
Ләјагәтли оланлары ахтармаға давам ет
18, 19. Исанын һансы ваҹиб тапшырығыны јадда сахламалыјыг вә бунунла әлагәдар нә етмәлијик?
18 Падшаһлығын тәблиғчиси кими, еһтимал ки, сән бу мәгаләдә хатырланан мүхтәлиф үсуллардан истифадә етмәк истәјәҹәксән. Сөзсүз ки, шаһидлик етмәк үсуллары сечәркән јерли адәтләри нәзәрә алмаг мүдрик давраныш оларды. Лакин илк әввәл Исанын вердији, ләјагәтли оланлары ахтармаг вә онлара шаҝирдләр олмагда көмәк етмәк тапшырығыны јадда сахламаг лазымдыр (Матта 10:11; 28:19).
19 Буна ҹан атараг, ҝәлин ‘һәгигәт сөзүнү доғрулугла өјрәдәк’. Буна, инандырмаға чалышмагла вә сөзләримизи әсаслы сурәтдә Мүгәддәс Јазылара әсасландырмагла наил ола биләрик. Бу бизә, сәмими инсанларын үрәјинә јол тапмагда вә онлары һәрәкәтә тәшвиг етмәкдә көмәк едәр. Дуа едәрәк Јеһоваја ҝүвәнсәк, кимә исә Иса Мәсиһин шаҝирди олмагда көмәк едә биләрик. Бу иш нә гәдәр дә мүкафатландырыҹыдыр! Буна ҝөрә дә һәр заман шаҝирдләр һазырламаг мәгсәди илә тәблиғ едән Падшаһлығын чалышган тәблиғчиләри кими Јеһоваја иззәт вермәк вә ‘өзүмүзү Аллаһа сынагдан чыхмыш бир ишчи кими тәгдим етмәк’ үчүн ҝәлин әлимиздән ҝәләни едәк (2 Тимотејә 2:15).
[Һашијәләр]
a Јеһованын Шаһидләри тәрәфиндән дәрҹ олунмушдур.
b Јеһованын Шаһидләри тәрәфиндән дәрҹ олунмушдур.
Хатырлајырсынызмы?
• Аполлоса Аллаһын јолу нәјә ҝөрә даһа дәгиг изаһ олунмалы иди?
• Акила вә Прискила Павелдән нә өјрәндиләр?
• “Һәвариләрин ишләри” китабынын 18-ҹи фәслиндән шаҝирдләрин һазырланмасына даир сиз нә өјрәндиниз?
• Шаҝирдләр һазырламаг имканларыны сиз неҹә ахтара биләрсиниз?
[17-ҹи сәһифәдәки шәкил]
Акила вә Прискила Аполлоса “Рәбб јолуну... даһа дәгиг изаһ етдиләр”.
[18-ҹи сәһифәдәки шәкил]
Аполлос шаҝирдләр һазырламаг ишиндә усталашды.
[19-ҹу сәһифәдәки шәкил]
Павел ҝетдији һәр јердә тәблиғ едирди.