Јашлы адамлара гајғы ҝөстәрмәк мәсиһчи мәс’улијјәтидир
“Ихтијарлығыныза гәдәр дә мән ојам вә ағ сачлы олунҹаја гәдәр сизи мән јүкләнәҹәјәм” (ИШАЈА 46:4).
1, 2. Сәмави Атамызын ҝөстәрдији гајғы, инсан валидејнләринин гајғысындан нә илә фәргләнир?
СЕВӘН валидејнләр ушагларыны көрпәликдән јенијетмә дөврүнә гәдәр бәсләјирләр. Һәтта ушаглар бөјүјүб аилә гуранда да, ата вә аналары онлара сәмими диггәт вә јардым ҝөстәрмәјә давам едирләр.
2 Буна бахмајараг, ушагларына гајғы ҝөстәрмәкдә валидејнләрин имканы мәһдуддур. Бизим сәмави Атамыз исә, Өзүнүн садиг хидмәтчиләринә һәмишә сәмими диггәт вә јардым ҝөстәрир. Гәдим заманларда Өзүнүн халгына мүраҹиәт едәрәк, Јеһова вә’д етмишдир: “Ихтијарлығыныза гәдәр дә мән ојам вә ағ сачлы олунҹаја гәдәр сизи мән јүкләнәҹәјәм” (Ишаја 46:4). Бу сөзләр јашлы мәсиһчиләрә неҹә дә тәсәлли верир! Јеһова, Она сәдагәтләрини горујуб сахлајанлары тәрк етмир. Әксинә, онлары дәстәкләмәјә, мөһкәмләндирмәјә вә бүтүн һәјатлары боју, һәтта гоҹалыгда белә онлара јол ҝөстәрмәјә сөз верир (Мәзмур 48:14).
3. Бу мәгаләдә нә нәзәрдән кечириләҹәк?
3 Биз, Јеһованы тәглид едәрәк, јашлылара неҹә гајғы ҝөстәрә биләрик? (Ефеслиләрә 5:1, 2). Ҝәлин јеткин јаша чатмыш өвладларын, јығынҹағын ағсаггалларынын вә үмумијјәтлә бүтүн мәсиһчиләрин, үмумдүнја гардашлығымызын јашлы үзвләринә неҹә гајғы ҝөстәрә биләҹәкләрини нәзәрдән кечирәк.
Өвладлар кими дашыдығымыз мәс’улијјәт
4. Валидејнләринә мүнасибәтдә мәсиһчи өвладлар һансы мәс’улијјәти дашыјырлар?
4 “Атана вә анана һөрмәт ет” (Ефеслиләрә 6:2; Чыхыш 20:12). Ибраниҹә Мүгәддәс Јазылардан олан бу садә, лакин ваҹиб сөзләри ситат ҝәтирәрәк, һәвари Павел өвладлара онларын валидејнләри гаршысында олан мәс’улијјәтләрини хатырлатды. Бәс бу сөзләри јашлылара ҝөстәрилән гајғыја неҹә тәтбиг етмәк олар? Мәсиһәгәдәрки дөврләрин тә’сирли бир нүмунәси бу суала ҹаваб вермәкдә бизә көмәк едәҹәк.
5. а) Јусифин өз оғуллуг борҹуну унутмадығы нәдән ҝөрүнүр? б) Валидејнләримизә һөрмәт ҝөстәрмәк нә демәкдир вә бу саһәдә Јусиф һансы ҝөзәл нүмунәни вермишдир?
5 Јусиф 20 илдән артыг бир мүддәт әрзиндә гоҹа атасы илә, гәбилә башчысы олан Јагубла, әлагәни итирмишди. Буна бахмајараг, Јусиф атасына гаршы оғуллуг мәһәббәтини итирмәмишди. О, өзүнү гардашларына танытдыгдан сонра сорушду: “Атам һәлә сағдырмы?” (Јарадылыш 43:7, 27; 45:3, МКШ). Һәмин вахт Кән’ан торпағында аҹлыг һөкм сүрүрдү. Буна ҝөрә дә, Јусиф атасына хәбәр ҝөндәрди: ‘Даһа дурма, јаныма ҝәл. Ҝошен вилајәтиндә јашајарсан; мәнә јахын оларсан. Орада сәнин гајғына галарам’ (Јарадылыш 45:9-11; 47:12, МКШ). Беләликлә, јашлы валидејнләрә һөрмәт ҝөстәрмәк, өзләри өз гајғыларына гала билмәјәндә онлары мүдафиә етмәк вә мадди ҹәһәтдән тә’мин етмәк демәкдир (1 Самуел 22:1-4; Јәһја 19:25-27). Јусиф бу мәс’улијјәти мәмнунлугла гәбул етди.
6. Јусиф өз атасына сәмими мәһәббәтини неҹә тәзаһүр етдирди вә биз онун нүмунәсини неҹә тәглид едә биләрик?
6 Јеһованын хејир-дуасы илә Јусиф Мисирин ән варлы-һаллы вә нүфузлу адамларындан бири олду (Тәквин 41:40). Лакин өзүнү о дәрәҹәдә ваҹиб вә башыгарышыг һесаб етмирди ки, 130 јашлы атасына һөрмәт етмәсин. Биләндә ки, Јагуб (вә ја Исраил) артыг јахындадыр, “Јусиф арабасыны һазырлајыб, Ҝошенә, атасы Исраили гаршыламаға ҝетди. Өзүнү атасына танытдырыб онун бојнуна сарылды вә узун мүддәт ағлады” (Јарадылыш 46:28, 29, МКШ). Бу саламламаг, садәҹә олараг рәсми һөрмәт әламәти дејилди. Јусиф јашлы атасыны үрәкдән севирди вә өз севҝисини ҝөстәрмәјә утанмырды. Әҝәр бизим дә јашлы валидејнләримиз варса, онлара өз инҹә һиссләримизи ачыг-ашкар тәзаһүр етдиририкми?
7. Јагуб нәјә ҝөрә истәјирди ки, ону Кән’анда басдырсынлар?
7 Јагуб өмрүнүн сонуна гәдәр Јеһоваја садиг галды (Ибраниләрә 11:21). Аллаһын вә’дләринә олан иманла тәшвиг олунараг, Јагуб хаһиш етди ки, ону Кән’анда басдырсынлар. Бу ишин бөјүк хәрҹ вә әзијјәтләрлә бағлы олмасына бахмајараг, Јусиф атасынын хаһишини јеринә јетирмәклә она һөрмәт ҝөстәрди (Тәквин 47:29-31; 50:7-14).
8. а) Јашлы валидејнләримизин гајғысына галмаға бизи илк нөвбәдә тәшвиг едән нәдир? б) Јашлы валидејнләринин гајғысына галмаг үчүн таммүддәтли бир хидмәтчи нә етмишдир? (13-ҹү сәһифәдәки чәрчивәјә бахын.)
8 Јусифи атасынын гајғысына галмаға тәшвиг едән нә иди? Әлбәттә ки, Јусиф атасыны севирди вә атасынын она һәјат вердији вә ону бөјүтдүјү үчүн она миннәтдар иди. Һәм дә Јусиф, шүбһәсиз ки, Јеһованы разы салмағы үрәкдән арзу едирди. Биздә дә белә арзу олмалыдыр. Павел јазырды: “Әҝәр бир дул гадынын ушаглары вә ја нәвәләри варса, гој онлар габагҹа өз шәхси аиләләринә бахараг, Аллаһа һөрмәт етмәји, бөјүкләринә дә һаггыны вермәји өјрәнсинләр; чүнки бу, Аллаһа мәгбулдур” (1 Тимотејә 5:4). Һәгигәтән дә, Јеһоваја мәһәббәт вә Онун гаршысында еһтирамлы горху, бизим үчүн һансы чәтинликләрлә бағлы олса да, бизи јашлы валидејнләримизин гајғысына галмаға тәшвиг едәҹәкдирa.
Ағсаггаллар гајғыкеш олдугларыны неҹә ҝөстәрә биләрләр?
9. Сүрүнү, о ҹүмләдән јашлы мәсиһчиләри отармаг үчүн Јеһова кимләри тә’јин едиб?
9 Јагуб узун өмрүнүн сонунда Јеһова һаггында ‘бу ҝүнә гәдәр бүтүн өмрүндә ону отаран Аллаһ’ кими данышмышдыр (Тәквин 48:15). Бизим ҝүнләрдә Јеһова јер үзүндәки хидмәтчиләрини, Оғлу Иса Мәсиһин — “Баш Чобан”ын идарә етдији мәсиһчи ағсаггалларын васитәсилә отарыр (1 Петер 5:2-4). Ағсаггаллар сүрүнүн јашлы үзвләринә гајғы ҝөстәрмәкдә Јеһованы неҹә тәглид едә биләрләр?
10. Јаша долмуш мәсиһчиләрә мадди јардымын ҝөстәрилмәси үчүн нә едилир? (17-ҹи сәһифәдәки чәрчивәјә бахын.)
10 Мәсиһчи јығынҹағынын јаранмасындан тезликлә сонра һәвариләр, еһтијаҹы олан дул мәсиһчи гадынлара “ҝүндәлик јардым” ҝөстәрмәк ишинә нәзарәт етмәк үчүн, “һагларында јахшы шәһадәт олунан, Мүгәддәс Руһ вә һикмәтлә долу једди нәфәр” сечдиләр (Һәвариләрин ишләри 6:1-6). Бир гәдәр сонрадан, Павел ағсаггал олан Тимотејә, лајигли дул гадынлары мадди јардым алмаға һүгугу оланларын сијаһысына салмаг ҝөстәриши верди (1 Тимотејә 5:3, 9, 10). Ејни тәрздә бу ҝүн дә, јығынҹағын ағсаггаллары зәрури оланда јаша долмуш мәсиһчиләрә һәвәслә практики јардым тәшкил едирләр. Лакин Аллаһын јаша долмуш садиг хидмәтчиләринә гајғы ҝөстәрмәк өзүнә даһа чох шеј дахил едир.
11. Кичик мәбләғдә ианә верән јохсул дул гадын һаггында Иса нә деди?
11 Јер үзүндәки хидмәтинин сонуна јахын Иса бир дәфә мә’бәддә отуруб, “халгын дахыла пул атдығыны” мүшаһидә едирди. Бу заман ким исә онун диггәтини ҹәлб етди. Мүгәддәс Китаб хәбәр верир: “Бир дул гадын ҝәлиб бир кодрант мәбләғиндә ики лептон атды”. Иса шаҝирдләрини јанына чағырыб онлара деди: “Сизә доғрусуну дејирәм ки, бу јохсул дул гадын гутуја пул атанларын һамысындан чох атды; чүнки онларын һамысы өз варларынын артыглығындан вердиләр, бу гадын исә касыблығына бахмајараг, бүтүн варыны, доланмаг үчүн әлиндә олан бүтүн пулуну верди” (Марк 12:41-44). Дул гадынын ианәсини мәбләғинә ҝөрә гијмәтләндирсәк, о чох бөјүк дејилди. Лакин Иса билирди ки, онун сәмави Атасы садиглијин сәмими тәзаһүрүнү чох јүксәк гијмәтләндирир. Дул гадынын јашындан асылы олмајараг, онун етдији Иса үчүн әһәмијјәт кәсб едирди.
12. Ағсаггаллар јашлы мәсиһчиләрин ҝөрдүкләри иши гијмәтләндирдикләрини неҹә ҝөстәрә биләрләр?
12 Исаја бәнзәр тәрздә, ағсаггаллар да јаша долмуш мәсиһчиләрин һәгиги ибадәтин мараглары уғрунда етдикләри һәр бир иши гијмәтләндирирләр. Хидмәтә ҝетдикләринә, мәсиһчи ҝөрүшләриндә иштирак етдикләринә, јығынҹаға мүсбәт тә’сир ҝөстәрдикләринә вә мәтин олдугларына ҝөрә ағсаггаллар һаглы олараг јашлылары тә’рифләјә биләрләр. Ағсаггалларын сәмими гәлбдән сөјләдикләри руһландырыҹы тә’риф сөзләри сајәсиндә, јашлылар мүгәддәс хидмәтдә өзләри илә “ифтихара сәбәб” тапа биләр вә өзләрини башга мәсиһчиләрлә вә ја өзләринин әввәлки һалы илә руһдан салан мүгајисәдән гачына биләрләр (Галатијалылара 6:4).
13. Ағсаггаллар јашлыларын габилијјәт вә тәҹрүбәләриндән неҹә истифадә едә биләрләр?
13 Ағсаггаллар јашлы мәсиһчиләрин тәҹрүбә вә габилијјәтләриндән истифадә етмәклә дә онларын ишләринин гијмәтләндирилдијини ҝөстәрә биләрләр. Нүмунәви јашлы тәблиғчиләри јери ҝәлдикҹә сәһнәҹикләрдә иштирак етмәјә вә мүсаһибә вермәјә дә’вәт етмәк олар. Бир ағсаггал гејд едир: “Мән өвладларыны һәгигәтдә бөјүдән јашлы гардашдан вә ја баҹыдан мүсаһибә ҝөтүрәндә, бүтүн зал сакитҹә отурур вә гулаг асыр”. Башга бир јығынҹағын ағсаггаллары хәбәр верирләр ки, 71 јашлы пионер бир баҹы Падшаһлығын тәблиғчиләринин тәблиғ хидмәтиндә мүнтәзәм олараг иштирак етмәләринә мүвәффәгијјәтлә көмәк едир. Баҹы һәмчинин һәмән тәблиғчиләри, Мүгәддәс Китабы вә ҝүндәлик ајәни охумаг вә үзәриндә дәриндән дүшүнмәк кими “тәмәлләрдән” мөһкәм јапышмаға тәшвиг едир.
14. Бир јығынҹағын ағсаггаллары јашлы бир ағсаггалын ҝөрдүјү иши гијмәтләндирдикләрини неҹә ҝөстәрдиләр?
14 Ағсаггаллар ејни заманда јашлы ағсаггалларын да јардымларыны гијмәтләндирирләр. Артыг 70-дән јухары јашы олан вә узун илләр ағсаггал хидмәт едән Жозе бу јахынларда ҹидди ҹәрраһијјә әмәлијјатына мә’руз галмышдыр. Онун сағалмасы үчүн узун мүддәт тәләб олундуғундан, о дүшүндү ки, сәдрлик вәзифәсини тәһвил версин. Жозе дејир: “Диҝәр ағсаггалларын реаксијасы мәни тәәҹҹүбләндирди. Онлар мәним тәклифими гәбул етмәк әвәзинә, бундан сонра да өз вәзифәми јеринә јетирә билим дејә мәнә һансы көмәклијин лазым олдуғуну сорушдулар”. Ҝәнҹ ағсаггалын көмәклији сајәсиндә Жозе сәдрлик едән нәзарәтчи хидмәтини севинҹлә давам етдирди, бу исә һамы үчүн хејир-дуа олду. Ағсаггаллардан бири дејир: “Жозенин ағсаггал кими етдикләрини гардашлар јүксәк гијмәтләндирирләр. Онлар Жозени тәҹрүбәсинә вә иман нүмунәсинә ҝөрә севир вә она һөрмәт едирләр. О, бизим јығынҹағы зәнҝинләшдирир”.
Бир-биринә гајғы
15. Нәјә ҝөрә бүтүн мәсиһчиләр јашлы һәмиманлыларынын рифаһы үчүн гајғы ҝөстәрмәлидирләр?
15 Јашлыларын гајғысына јалныз онларын өвладлары вә тә’јин олунмуш хидмәтчиләр галмалы дејилләр. Мәсиһчи јығынҹағыны инсан бәдәни илә мүгајисә едәрәк Павел јазырды: “Аллаһ аз е’тибарлы үзвә даһа чох е’тибар ҝөстәрәрәк, бәдәни елә тәртиб етди ки, бәдәндә ајрылыг олмасын, әксинә бүтүн үзвләр бир-биринин гајғысына галсын” (1 Коринфлиләрә 12:24, 25). Мәсиһчи јығынҹағы јекдилликлә фәалијјәт ҝөстәрсин дејә, онун һәр бир үзвү өз һәмиманлысынын, о ҹүмләдән јашлы оланларын рифаһы үчүн гајғы ҝөстәрмәлидир (Галатијалылара 6:2).
16. Мәсиһчи ҝөрүшләриндә јашлы оланлара неҹә мараг ҝөстәрә биләрик?
16 Мәсиһчи ҝөрүшләри, јаша долмуш һәмиманлылара мараг ҝөстәрмәјимиз үчүн ҝөзәл имкан јарадыр (Филипилиләрә 2:4; Ибраниләрә 10:24, 25). Ҝөрүшдән әввәл вә ја сонра јашлыларла үнсијјәт етмәк үчүн вахт ајырырыгмы? Онлардан сағламлыглары барәдә сорушмаг мүнасиб олса да, руһландырыҹы һадисә данышмагла вә ја Мүгәддәс Китабдан һансыса фикирлә бөлүшмәклә, онлара ‘руһани бир ән’ам бәхш едә’ биләрикми? Бә’зи јашлылара һәрәкәт етмәк чәтин олдуғундан, онларын бизә јахынлашаҹагларыны ҝөзләмәк әвәзинә, бизим онлара јахынлашмағымыз јахшы оларды. Әҝәр баҹы вә ја гардаш пис ешидирсә, биз јаваш-јаваш вә ајдын сурәтдә даныша биләрик. Вә һәгигәтән дә гаршылыглы сурәтдә “тәшвиг олунаг” дејә, јашлы адамын нә дедијинә диггәтлә гулаг асмалыјыг (Ромалылара 1:11, 12).
17. Евдән чыха билмәјән јашлы мәсиһчиләрә неҹә гајғы ҝөстәрмәк олар?
17 Бәс әҝәр јашлылардан ким исә мәсиһчи ҝөрүшләринә ҝәлә билмирсә неҹә? Јагуб 1:27 ајәсиндән ајдын олур ки, бизим вәзифәмиз “јетимләри вә дуллары онларын мәшәггәтли анларында зијарәт етмәк”дир. Јашлы инсанлары зијарәт етмәк онлар үчүн неҹә дә хошдур! Ерамызын тәхминән 65-ҹи илиндә Ромада мәһбус олдуғу заман “гоҹа Павел”, демәк олар ки, тәнһа галмышды. О, әмәкдашы Тимотејлә ҝөрүшмәји үрәкдән арзулајырды вә јазырды: “Чалыш ки, јаныма тез ҝәләсән” (Филимона 9; 2 Тимотејә 1:3, 4; 4:9). Һәгиги мә’нада әсир олмасалар да, бә’зи јашлы адамлар пис сәһһәтләри уҹбатындан евдән чыха билмирләр. Онлар санки дејирләр: “Хаһиш едирәм, чалышын ки, мәни тезликлә зијарәт едәсиниз”. Биз бу ҹүр хаһишләрә һај веририкми?
18. Јашлылары зијарәт етмәјин һансы фајдасы вар?
18 Јашлы баҹы вә гардашларын һәмиманлыларын зијарәтиндән әлдә етдикләри фајданы гијмәтләндирмәмәк олмаз. Онисифор адлы бир мәсиһчи Ромада оланда, Павели сә’јлә ахтарды, тапды вә сонра ‘дәфәләрлә [она] үрәк-дирәк верди’ (2 Тимотејә 1:16, 17). Јашлы бир баҹы дејир: “Ҝәнҹләрлә вахт кечирмәји чох севирәм. Ән чох хошума ҝәлән одур ки, онлар мәнимлә аиләләринин үзвү кими давранырлар. Бу мәним әһвал-руһијјәми јахшылашдырыр”. Башга јашлы бир мәсиһчи баҹы е’тираф едир: “Ким исә мәнә ачыгҹа ҝөндәрәндә, бир аз телефонла данышанда вә ја бир нечә дәгигәлик гонаг ҝәләндә, мән чох миннәтдар олурам. Бу тәмиз һава кими тәравәт ҝәтирир”.
Јеһова гајғыкеш адамлары мүкафатландырыр
19. Јашлыларын гајғысына галмаг һансы хејир-дуалары ҝәтирир?
19 Јашлылара гајғы ҝөстәрмәк чохлу хејир-дуалар ҝәтирир. Јаша долмуш инсанларла үнсијјәт етмәк вә онларын билик вә тәҹрүбәләриндән истифадә етмәк өзү-өзлүјүндә бөјүк үстүнлүкдүр. Јашлыларын гајғысына галанлар нөвбәти сөзләрин доғрулуғуна әмин олурлар: “Вермәк... даһа бөјүк бәхтијарлыг ҝәтирир”, онлар һәм дә Мүгәддәс Китаб мәс’улијјәтләрини јеринә јетирдикләринә ҝөрә үрәкләриндә мәмнунлуг вә сүлһ дујурлар (Һәвариләрин ишләри 20:35). Јашлыларын гајғысына галанлар өзләри јашлашанда тәрк едиләҹәкләриндән горхмамалыдырлар. Аллаһын Кәламы бизә зәманәт верир: “Ҹомәрд боллуға јетишәр, су верәнә су вериләр” (Сүлејманын мәсәлләри 11:25, МКШ).
20, 21. Јашлы инсанларын гајғысына галан кәсләрә Јеһова неҹә јанашыр вә биз бундан сонра да нә етмәјә гәрарлыјыг?
20 Јеһова, јашлы һәмиманлыларынын еһтијаҹларына тәмәннасыз гајғы ҝөстәрдикләринә ҝөрә Аллаһ горхусуна малик олан өвладлары, ағсаггаллары вә диҝәр гајғыкеш мәсиһчиләри мүкафатландырыр. Бу ҹүр руһу нөвбәти мәсәлин сөзләриндә тапырыг: “Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр” (Сүлејманын мәсәлләри 19:17, МКШ). Әҝәр мәһәббәт бизи касыба сәхавәт ҝөстәрмәјә тәшвиг едирсә, Аллаһ буну, хејир-дуа һалында гајтарылаҹаг борҹ сајыр. О, һәм дә бизә бир чоху “дүнјанын јохсуллары” сајылан, лакин “иманда зәнҝин” олан јашлы һәмиманлыларымыза ҝөстәрдијимиз мәһәббәт долу гајғынын әвәзини верир (Јагуб 2:5).
21 Аллаһ бунун әвәзини неҹә дә сәхавәтлә верир! Онун вердији мүкафат өзүнә әбәди һәјаты дахил едир. Бу, Јеһованын хидмәтчиләриндән чоху үчүн илк ҝүнаһын нәтиҹәләринин арадан галдырылаҹағы вә јашлы садиг инсанларын јенидән ҝәнҹлик гүввәләринин бәрпа олунаҹағы јер үзүндәки Ҹәннәтдә сонсуз һәјат олаҹагдыр (Вәһј 21:3-5). Севинҹ ҝәтирән бу вахты ҝөзләјәрәк, ҝәлин бундан сонра да јашлыларын гајғысына галмаг кими мәсиһчи мәс’улијјәтимизи јеринә јетирәк.
[Һашијә]
a Јашлы валидејнләрә гајғы ҝөстәрмәјә даир практики мәсләһәтләри “Аилә хошбәхтлијинин сирри” китабынын 173-182-ҹи сәһифәләриндә, һәмчинин “Ојанын!” журналынын 1994-ҹү ил 8 феврал сајынын, 3-10-ҹу сәһифәләриндә (инҝ.) тапа биләрсиниз.
Неҹә ҹаваб верәрдиниз?
• Өвладлар јашлы валидејнләринә неҹә һөрмәт ҝөстәрә биләрләр?
• Ағсаггаллар сүрүнүн јашлы үзвләринин сә’јләринә ҝөрә олан миннәтдарлыгларыны неҹә ҝөстәрирләр?
• Ајры-ајры мәсиһчиләр јашлылара неҹә сәмими мараг ҝөстәрә биләрләр?
• Јашлы мәсиһчиләрә гајғы ҝөстәрмәк һансы хејир-дуалары ҝәтирир?
[13-ҹү сәһифәдәки чәрчивә]
Валидејнләри јардыма еһтијаҹ дујанда
Филип 1999-ҹу илдә Либеријада тикинтидә көнүллү ишчи кими хидмәт едәндә, атасынын ағыр хәстә олдуғу һагда хәбәр алды. Анасынын бүтүн чәтинликләрин өһдәсиндән тәк ҝәлә билмәјәҹәјинә әмин олдуғу үчүн гәрара ҝәлди ки, евә гајытсын вә атасына тибби јардым ҝөстәрилмәсинин гајғысына галсын.
Филип јадына салыр: “Гајытмаг асан дејилди, лакин мән билирдим ки, валидејнләримә гајғы ҝөстәрмәк мәним биринҹи дәрәҹәли борҹумдур”. Нөвбәти үч ил әрзиндә Филип валидејнләрини даһа раһат евә көчүртдү вә һәмиманлыларынын көмәји илә һәмин еви атасынын хүсуси тәләбатларына мүвафиг олараг дүзәлтди.
Филипин анасы, атасынын пис сәһһәти илә бағлы олан чәтинликләрин өһдәсиндән ҝәлмәк үчүн инди даһа јахшы тәҹһиз едилиб. Тәзәликҹә Филип Јеһованын Шаһидләринин Македонијадакы филиалында көнүллү ишчи кими хидмәт етмәк дә’вәтини гәбул едә билмишдир.
[17-ҹи сәһифәдәки чәрчивә]
Онун еһтијаҹларына е’тинасыз јанашмадылар
Австралијада јашајан 85 јашлы мәсиһчи Ада, писләшән сәһһәтинә ҝөрә евдән бајыра чыха билмәјәндә, јығынҹағын ағсаггаллары она јардым ҝөстәрмәк үчүн өлчү ҝөтүрдүләр. Онлар һәмин баҹыја көмәк едә биләҹәк груп тәшкил етдиләр. Бу баҹы-гардашлар сәлигә-саһман јаратмаға, палтар јумаға, гида һазырламаға вә јашлы баҹынын башга ҝөстәришләрини јеринә јетирмәјә шад идиләр.
Бу јардым ишинә он ил бундан габаг башланылмышдыр. Бүтүн бу илләр әрзиндә Ада баҹыја, онун 30-дан артыг һәмиманлысы, Јеһованын Шаһидләри гајғы ҝөстәрмишдир. Онлар әввәлки кими ону зијарәт едир, она Мүгәддәс Китаб нәшрләрини охујур, јығынҹағын үзвләринин руһани наилијјәтләриндән данышыр вә онунла бирликдә дуа едирләр.
Ағсаггаллардан бири вурғуламышдыр: “Ада баҹынын гајғысына галанлар, она көмәк етмәји шәрәф сајырлар. Бир чохларыны онун чохиллик садиг хидмәти руһландырыр вә һәтта онлар үчүн бу баҹынын гајғысына галмамаг ағласығмаз ишдир”.
[15-ҹи сәһифәдәки шәкил]
Јашлы валидејнләримизә инҹә һиссләримизи сәхавәтлә тәзаһүр етдиририкми?
[16-ҹы сәһифәдәки шәкилләр]
Јығынҹағын бүтүн үзвләри јашлы һәмиманлыларына мәһәббәт тәзаһүр етдирә биләрләр.