Һәјат ән’амыны дүзҝүн гијмәтләндирин
“Мәсиһин ганы, јашајан Аллаһа ибадәт етмәк үчүн виҹданынызы өлүм ҝәтирән ишләрдән... тәмизләјәҹәкдир” (ИБРАНИЛӘРӘ 9:14).
1. Һәјаты јүксәк гијмәтләндирдијимизә даир һансы сүбутлар вар?
ӘҜӘР сәндән һәјатынын гијмәтини сорушсајдылар, сән нә ҹаваб верәрдин? Биз һәм өзүмүзүн, һәм дә башгаларынын һәјатыны јүксәк гијмәтләндиририк. Хәстәләнәндә һәкимә мүраҹиәт етмәјимиз вә ја мәсәлән, мүнтәзәм олараг мүајинәдән кечмәјимиз буна сүбутдур. Биз јашамаг вә сағлам олмаг истәјирик. Һәтта јашлыларын вә ја әлилләрин дә чоху өлмәк истәмир; онлар јашамаг истәјирләр.
2, 3. а) Сүлејманын мәсәлләри 23:22 ајәсиндә һансы вәзифәдән данышылыр? б) Сүлејманын мәсәлләри 23:22 ајәсиндә хатырланан вәзифәнин Аллаһа һансы аидијјаты вар?
2 Һәјаты гијмәтләндирмәјин башгаларына олан мүнасибәтинә тә’сир ҝөстәрәҹәк. Мәсәлән, Аллаһын Кәламы өјрәдир: “Доғма атана гулаг ас, гоҹа анана хор бахма” (Сүлејманын мәсәлләри 23:22, МКШ). “Гулаг ас” ифадәси садәҹә олараг ешитмәкдән чох мә’на дашыјыр; бу мәсәл ешитмәк вә итаәт етмәк мә’насыны дашыјыр (Чыхыш 15:26; Тәснијә 7:12; 13:18; 15:5; Јешу 22:2; Мәзмур 81:13). Аллаһын Кәламына әсасән валидејнләрә нәјә ҝөрә гулаг асмаг лазымдыр? Бунун сәбәби онларын сәндән јалныз бөјүк вә тәҹрүбәли олмалары дејил, сәни һәјата ҝәтирмәләридир. Башга бир тәрҹүмәдә бу ајә белә сәсләнир: “Сәнә һәјат верән атана гулаг ас”. Тамамилә ајдындыр ки, әҝәр сән һәјатыны гијмәтләндирирсәнсә, өзүнү һәјатынын гајнағына борҹлу сајырсан.
3 Сөзсүз ки, әҝәр сән Мәсиһин һәгиги давамчысысанса, Јеһованы һәјатынын башлыҹа Гајнағы һесаб едирсән. Чүнки сән ‘Онунла јашајыр, һәрәкәт едир вә варсан’ вә бунун сајәсиндә һисс едә, һәмчинин ҝәләҹәјә, о ҹүмләдән Аллаһ инсанларын “үрәјинә... әбәдијјәти гојду”ғу үчүн әбәди ҝәләҹәјә даир планлар гура билирсән (Һәвариләрин ишләри 17:28; Мәзмур 36:9; Ваиз 3:11). Сүлејманын мәсәлләри 23:22 ајәсиндә дејиләнләри нәзәрә алыб, Аллаһы баша дүшмәји вә һәјата даир һәр-һансы башга нөгтеји-нәзәрләри дејил, Онун нөгтеји-нәзәрини гәбул етмәји арзулајараг Ону ‘динләмәк’ доғру оларды.
Һәјата һөрмәт ҝөстәр
4. Бәшәр тарихинин башланғыҹында һәјата һөрмәтин бөјүк мә’на дашыдығы неҹә мә’лум олду?
4 Јеһова бәшәр тарихинин башланғыҹында ајдын ҝөстәрди ки, инсанлара һәјатларындан истәдикләри кими истифадә етмәјә иҹазә вермәјиб. Һиддәтиндән говрулан Габил өз гардашы Һабилин ҝүнаһсыз һәјатыны мәһв етди. Неҹә дүшүнүрсән, Габилин һәјата даир бу ҹүр гәрар гәбул етмәјә ихтијары вардымы? Аллаһ бу ҹүр дүшүнмүрдү. О, Габилдән ҹаваб тәләб етди: “Сән нә етдин? Гардашынын ганынын сәси торпагдан Мәнә фәрјад едир” (Јарадылыш 4:10, МКШ). Диггәт јетир ки, Һабилин јерә ахыдылмыш ганы, онун гәддарҹасына гәтлә јетирилмиш һәјатыны тәмсил едирди вә ганын сәси Аллаһа гисас үчүн “фәрјад едирди” (Ибраниләрә 12:24).
5. а) Нуһун ҝүнләриндә Аллаһ һансы гадағаны гојмушдур вә бу гадаға кимләрә аид иди? б) Бу гадаға нәдә ваҹиб аддым олду?
5 Туфандан сонра бәшәријјәт башланғыҹыны сағ галан сәккиз нәфәрдән ҝөтүрдү. Аллаһ бүтүн инсанлар үчүн олан нијјәтини е’лан едәрәк, һәјата вә гана олан мүнасибәтини даһа ајдын ҝөстәрди. О, инсанлара һејванлары јемәјә изн верди, лакин нөвбәти шәртлә: “Бүтүн ҹанлылар да сизә гида олсунлар; онларын һамысыны бүтүн ҝөј отлар кими сизә верирәм. Анҹаг әти онун ҹаны олан ганла бирҝә јемәјин” (Јарадылыш 9:3, 4, МКШ). Бә’зи јәһудиләр бу фикри белә изаһ едирләр ки, һәлә дири олан һејванын әтини јемәк вә ја ганыны ичмәк олмаз. Лакин вахт өтдүкҹә ајдын олду ки, бурада Аллаһ јашамаг үчүн гандан истифадә етмәји гадаған едирди. Бундан әлавә, Аллаһын Нуһун васитәсилә вердији ҝөстәриш, Онун ганла әлагәли олан мөһтәшәм нијјәтинин иҹра олунмасында ваҹиб аддым олду. Бу нијјәтин сајәсиндә инсанлар әбәди һәјаты ала биләрләр.
6. Нуһа сөјләдији сөзләрдә Аллаһ һәјаты гијмәтләндирдијинә даир нөгтеји-нәзәрини неҹә вурғулады?
6 Аллаһ давам едир: “Мән сизин дә ганынызын гисасыны һәр ҹанлыдан алаҹағам; һәр һејвандан ганынызы алаҹағам, һәр инсанын ганыны да онун гардашындан — башга инсандан алаҹағам. Ким инсан ганы төксә, онун да ганы инсан әли илә төкүләҹәк. Чүнки Аллаһ инсаны Өз сурәтиндә јарадыб” (Јарадылыш 9:5, 6, МКШ). Бүтүн бәшәр аиләсинә сөјләнилән бу сөзләрдән баша дүшә биләрик ки, Аллаһын ҝөзүндә инсанын ганы онун һәјатынын символу кими хидмәт едир. Һәјаты инсана Јарадан верир вә ганла тәмсил олунан бу һәјаты һеч ким алмамалыдыр. Әҝәр бир кимсә Габил кими гәтл етсә, Јараданын онун һәјатыны ‘алмаг’ ихтијары вар.
7. Аллаһын гана даир Нуһа билдирдикләри бизи нәјә ҝөрә марагландырмалыдыр?
7 Беләликлә, Аллаһ ганын истифадә олунмасына мүәјјән мәһдудијјәтләр гојду. Онун буну нә үчүн етдијинә нә вахтса тәәҹҹүбләнмисәнми? Аллаһын гана олан нөгтеји-нәзәринин архасында нә дурур? Әслиндә ҹаваб, Мүгәддәс Китабын ән ваҹиб тә’лимләриндән бири илә бағлыдыр. Бу тә’лим бир чох килсәләр тәрәфиндән инкар едилсә дә, мәсиһчи иманынын мәғзидир. Бу һансы тә’лимдир вә сәнин һәјатына, гәрарларына вә давранышларына неҹә тә’сир ҝөстәрир?
Гандан һансы мәгсәдләрдә истифадә етмәк олар?
8. Јеһова ганын истифадә олунмасына даир Ганунда һансы мәһдудијјәтләри гојмушдур?
8 Јеһова Исраил халгына ганунлар күллијјаты вермәклә, һәјата вә гана олан нөгтеји-нәзәрини тәфсилаты илә ачыб ҝөстәрди. Ејни заманда, Өз нијјәтини јеринә јетирмәкдә нөвбәти аддымы атды. Јәгин билирсән ки, Гануна ҝөрә Аллаһа тахыл, јағ вә шәраб кими гурбанлар ҝәтирмәк тәләб олунурду (Левилиләр 2:1-4; 23:13; Сајлар 15:1-5). Һәмчинин һејванлардан да гурбан ҝәтирирдиләр. Бу барәдә Аллаһ демишдир: “Әтин ҹаны гандадыр; вә мән ону гурбанҝаһ үзәриндә ҹанларыныза кәффарә етмәк үчүн сизә вердим; чүнки ҹандан өтрү кәффарә едән гандыр. Бунун үчүн Исраил оғулларына дедим: Сиздән һеч бир ҹан ган јемәјәҹәк”. Јеһова әлавә етди ки, әҝәр ким исә гидаланмаг үчүн овда вә ја евдә һејван өлдүрәрсә, онда ганы јерә ахытмалы вә үзәрини торпагла өртмәлидир. Јер Аллаһын ‘ајагларына пајәндаз’ олдуғу үчүн, ганы јерә ахыдаркән инсан е’тираф едирди ки, һәјат Һәјатверәнә гајыдыр (Левилиләр 17:11-13; Ишаја 66:1).
9. Гануна мүвафиг олараг гандан һансы јеҝанә һалда истифадә етмәјә изн верилирди вә һансы мәгсәдлә?
9 Бу ганун мә’насыз дини ајин дејилди. Исраиллиләрин гандан гида кими истифадә етмәмәләринин сәбәбинә диггәт јетирдинми? Аллаһ деди: “Бунун үчүн Исраил оғулларына дедим: Сиздән һеч бир ҹан ган јемәјәҹәк”. Һансы сәбәбә ҝөрә? “Мән ону [ганы] гурбанҝаһ үзәриндә ҹанларыныза кәффарә етмәк үчүн сизә вердим”. Мәҝәр бу, Аллаһын Нуһ васитәсилә ганы гида кими истифадә етмәји гадаған етмәсинин сәбәбини баша дүшмәјә көмәк етмирми? Јарадан гана бөјүк мә’на вермиш вә инсанларын хиласында она хүсуси јер ајырмышдыр. Ган ҝүнаһларын өртүлмәсиндә ваҹиб рол ојнамалы иди. Ганун чәрчивәси дахилиндә Аллаһ Онун лүтфүнү ахтармағы арзулајан исраиллиләрин һәјатыны кәффарә етмәк үчүн гандан јалныз гурбанҝаһда истифадә етмәјә изн верирди.
10. Нәјә ҝөрә һејванларын ганы тамамилә бағышланмаја сәбәб ола билмирди вә Гануна мүвафиг олараг ҝәтирилән гурбанлар нәји хатырладырды?
10 Бу ҹүр анлајыш мәсиһчилијә јад дејил. Ганунун Аллаһ тәрәфиндән нәзәрдә тутулмуш бу сәҹијјәви хүсусијјәтинә әсасланараг, һәвари Павел јазмышдыр: “Мүгәддәс Гануна ҝөрә, тәгрибән һәр шеј ганла тәмизләнир вә ган төкүлмәдән бағышланма олмур” (Ибраниләрә 9:22). Лакин Павел ајдын ҝөстәрди ки, Ганунун тәләб етдији гурбанлар исраиллиләри камил вә ҝүнаһсыз етмирди. О јазырды: “Бу гурбанларла ҝүнаһлар илдән-илә јада салыныр. Чүнки буғаларын вә тәкәләрин ганы илә ҝүнаһлары арадан галдырмаг гејри-мүмкүндүр” (Ибраниләрә 10:1-4). Бунунла белә, бу ҹүр гурбанлар исраиллиләр үчүн ҝәрәкли иди. Гурбанлар исраиллиләрә, тамамилә бағышланмаг үчүн даһа артыг шејә еһтијаҹ дујан ҝүнаһлы инсанлар олдугларыны хатырлатды. Лакин әҝәр һејванларын һәјатыны тәмсил едән ган инсан ҝүнаһларыны бүтүнлүклә өртә билмирдисә, буну едә биләҹәк ган мөвҹуд идими?
Һәјатверәнин ҹавабы
11. Һејван ганынын гурбан ҝәтирилмәсинин символик мә’на дашыдығыны һарадан билирик?
11 Әслиндә Ганун Аллаһын ирадәсинин јеринә јетирилмәсиндә даһа бөјүк тә’сири олан бир шејә ишарә едирди. Павел сорушду: “Бәс Ганун нә үчүндүр?” Бу суала өзү ҹаваб верди: “Ганун, ҹинајәтләри ортаја чыхартмаг үчүн әһдә әлавә едилмишдир. Вә’ди алан вә Ибраһимин нәслиндән олан Мәсиһ ҝәлинҹәјә гәдәр гүввәдә галаҹагды. Мәләкләр васитәсилә, бир васитәчи [Мусанын] әли илә тәртиб едилмишдир” (Галатијалылара 3:19). Павел һәмчинин јазырды: “Мүгәддәс Ганун, ҝәләҹәк не’мәтләрин әсл сурәтинә дејил, көлҝәсинә малик”дир (Ибраниләрә 10:1).
12. Аллаһын ганла бағлы нијјәти неҹә ачылырды?
12 Јекун олараг хатырлајаг ки, Нуһун ҝүнләриндә Аллаһ јашамаг үчүн инсанлара һејван әти јемәјә изн вермиш, лакин гандан гида кими истифадә етмәји гадаған етмишдир. Бир гәдәр сонрадан Аллаһ билдирди ки, “әтин ҹаны гандадыр”. Бәли, О Өзү ганы һәјат тимсалы кими нәзәрдән кечирмәји гәрара алды вә деди: “Мән ону гурбанҝаһ үзәриндә ҹанларыныза кәффарә етмәк үчүн сизә вердим”. Лакин Аллаһын ирадәси илә бағлы нөвбәти тәәҹҹүблү ачыгламалар мә’лум олмалы иди. Ганун “ҝәләҹәк не’мәтләрин” көлҝәси кими хидмәт едирди. Һансы “ҝәләҹәк не’мәтләрин”?
13. Исанын өлүмү нәјә ҝөрә ваҹиб әһәмијјәт кәсб едирди?
13 “Ҝәләҹәк не’мәтләрин әсл сурәти” Иса Мәсиһин өлүмүнә ишарә едирди. Исаја ишҝәнҹә верилдијини, сонра исә дирәкдә асылдығыны билирсән. О, бир ҹинајәткар кими өлдү. Павел јазырды: “Биз һәлә ҝүҹсүз икән, Мәсиһ мүәјјән заманда аллаһсызлар уғрунда өлдү... Алаһ бизә олан Өз мәһәббәтини бунунла сүбут едир ки, биз һәлә ҝүнаһкар икән Мәсиһ бизим уғрумузда өлдү” (Ромалылара 5:6, 8). Уғрумузда өләрәк, Мәсиһ ҝүнаһларымызы кәффарә етмәк үчүн фидијә тәгдим етди. Бу фидијә мәсиһчи иманынын мәғзидир (Матта 20:28; Јәһја 3:16; 1 Коринфлиләрә 15:3; 1 Тимотејә 2:6). Фидијәнин гана вә һәјата һансы аидијјәти вар вә бу сәнин һәјатына неҹә тә’сир ҝөстәрир?
14, 15. а) Бә’зи тәрҹүмәләр Ефеслиләрә 1:8 ајәсиндә диггәти Исанын өлүмүнә неҹә јөнәлдир? б) Ефеслиләрә 1:8 ајәсини нәзәрдән кечирәркән нәји нәзәрдән гачырмаг олар?
14 Бә’зи килсәләр Исанын өлүмүнә хүсуси әһәмијјәт верир вә онлардан белә сөзләр ешитмәк олар: “Иса мәним уғрумда өлүб”. Мүгәддәс Китабын бә’зи тәрҹүмәләриндә Ефеслиләрә 1:8 ајәсинин неҹә сәсләндијини нәзәрдән кечирәк. “Онда вә онун өлүмү васитәсилә хиласа, даһа доғрусу, ҝүнаһларымызын әфвинә маликик” (“Тһе Америҹан Библе”, Френк Шејл Белинтајн, 1902-ҹи ил). “Мәсиһин өлүмү илә азад олунмушуг вә ҝүнаһларымыз бағышланыб” (“Today’s English Version”, 1966-ҹы ил). “Мәсиһин вә онун һәјатынын гурбан ҝәтирилмәси васитәсилә азад олмушуг вә азадлығымыз ҝүнаһларын бағышланмасы демәкдир” (“The New Testament”, Уилјам Баркли, 1969-ҹу ил). “Онун өлүмү васитәсилә ҝүнаһларымыздан азадлыг әлдә етмишик” (“Мүасир тәрҹүмә”, 2000-ҹи ил). Мүгәддәс Китабын бу тәрҹүмәләриндә Исанын өлүмүнә ишарә олундуғуну ҝөрә биләрсән. Бә’зиләри дејә биләр: “Ахы Исанын өлүмү һәгигәтән дә ваҹиб мә’на дашыјыр. Белә исә бу тәрҹүмәләрдә һансы чатышмазлыг вар?”
15 Әҝәр сән јалныз бу ҹүр тәрҹүмәләрә малик олсајдын, Мүгәддәс Китабы баша дүшмәк үчүн зәрури олан чох ваҹиб бир фикри нәзәрдән гачыра биләрдин. Бу тәрҹүмәләр бир факты ҝизләдир ки, орижинал мәтндә Ефеслиләрә 1:8 ајәсиндә “ган” мә’насыны дашыјан јунан сөзү вар. Мүгәддәс Китабын бир чох башга тәрҹүмәләри, мәсәлән, азәрбајҹанҹа олан “Инҹил” китабы орижинала јахындыр: “Там һикмәтлә вә анлајышла бизә бол-бол ҝөстәрдији Өз лүтфүнүн зәнҝинлијинә ҝөрә, Мәсиһдә, Мәсиһин ганы васитәсилә хиласа, ҝүнаһларымызын әфвинә маликик” (Ефеслиләрә 1:7, 8).
16. “Мәсиһин ганы” ифадәси бизә нә барәдә хатырлатмалыдыр?
16 “Мәсиһин ганы” ифадәси дәрин мә’на дашыјыр вә бизә чох шеји хатырладыр. Садәҹә өлүм — һәтта камил инсан олан Исанын өлүмү — кифајәт дејилди. Исанын үзәриндә, Ганунда олан сурәтләр, хүсусилә дә, Кәффарә ҝүнү илә бағлы олан сурәтләр јеринә јетди. Хүсуси сајылан һәмин ҝүн мүәјјән һејванлар гурбан ҝәтирилирди. Сонра баш каһин онларын ганыны чадырын вә ја мә’бәдин Ән мүгәддәс јеринә апарыр вә ону Аллаһын гаршысында имиш кими Она тәгдим едирди (Чыхыш 25:22; Левилиләр 16:2-19).
17. Кәффарә ҝүнү илә бағлы олан сурәтләр Исанын үзәриндә неҹә јеринә јетди?
17 Павелин изаһ етдији кими, Исанын үзәриндә Кәффарә ҝүнү илә бағлы сурәтләр јеринә јетмишдир. Әввәлҹә Павел хатырладыр ки, Исраилдә баш каһин илдә бир дәфә “өзү үчүн вә халгын билмәјәрәк ишләтдији ҝүнаһлары үчүн” ҝәтирилән ганла Ән мүгәддәс јерә дахил олурду (Ибраниләрә 9:6, 7). Бу нүмунә әсасында, Иса руһ кими дирилдикдән сонра ҝөјүн өзүнә ҝирди. Бәдәнә вә гана малик олмајан руһ кими, о, “Аллаһын һүзурунда” дура билди. О, Аллаһа нә тәгдим етди? Мадди олмајан, лакин чох гијмәтли бир шеј. Павел давам едир: “Ҝәләҹәк не’мәтләрин Баш Каһини олан Мәсиһ зүһур едәндә... кечи вә дана ганы илә дејил, өз ганы илә Мүгәддәс Јерә бир дәфә әбәди ҝирмиш вә бизим үчүн әбәди гуртулуш әлдә етмишдир. Чүнки әҝәр кечиләрин вә буғаларын ганы... мурдар оланларын үстүнә сәпиләндә, онлар тәгдис олунуб, бәдәнләри тәмиз олурса, демәли, әбәди Руһ васитәсилә Өзүнү гүсурсуз олараг Аллаһа тәгдим етмиш Мәсиһин ганы, јашајан Аллаһа ибадәт едә билмәниз үчүн виҹданынызы өлүм ҝәтирән ишләрдән нә гәдәр артыг тәмизләјәҹәкдир!” Бәли, Иса Аллаһа өз ганынын гијмәтини тәгдим етди (Ибраниләрә 9:11-14, 24, 28; 10:11-14; 1 Петер 3:18).
18. Мүгәддәс Китабда ган һаггында дејиләнләр бу ҝүн мәсиһчиләри нәјә ҝөрә марагландырмалыдыр?
18 Аллаһдан ҝәлән бу һәгигәт Мүгәддәс Китабда ган һаггында дејиләнләрин бүтүн мө’ҹүзәли дәринлијини — Аллаһын гана нәјә ҝөрә бу ҹүр әһәмијјәт вердијинә вә онун тәтбиг олунмасына даир Аллаһ тәрәфиндән гојулан мәһдудијјәтләрә нәјә ҝөрә һөрмәт етмәјә борҹлу олдуғумузу дәрк етмәкдә көмәк едир. Јунанҹа Мүгәддәс Јазылары охујаркән, Мәсиһин ганы һаггында чохсајлы хатырлатмалара раст ҝәлирик. (Чәрчивәјә бахын.) Бу хатырлатмалар ајдын ҝөстәрир ки, һәр бир мәсиһчи үчүн Исанын “ганына” иман ҝәтирмәк зәруридир (Ромалылара 3:25). Ҝүнаһларын бағышланмасы вә Аллаһла сүлһдә олмаг јалныз “Онун [Исанын]... ахыдылан ганы” васитәсилә мүмкүндүр (Колослулара 1:20). Бу, шүбһәсиз ки, Иса илә ҝөјдә идарә етмәләри үчүн онун хүсуси әһд бағладығы кәсләр үчүн доғрудур (Лука 22:20, 28-30; 1 Коринфлиләрә 11:25; Ибраниләрә 13:20). Бу, һәм дә гаршыдан ҝәлән “бөјүк мәшәггәтдән” сағ чыхаҹаг вә јер үзүндәки Ҹәннәтдә әбәдијјән јашајаҹаг ‘бөјүк издиһамын’ үзвләри үчүн дә доғрудур. Мәҹази диллә десәк, онлар ‘либасларыны Гузунун ганында јујублар’ (Вәһј 7:9, 14).
19, 20. а) Аллаһ нәјә ҝөрә ганын тәтбиг олунмасына даир мәһдудијјәтләр гојуб вә биз буна неҹә јанашмалыјыг? б) Буну нәзәрә алараг бизи нә марагландырмалыдыр?
19 Ајдындыр ки, ган Аллаһын ҝөзүндә хүсуси мә’на дашыјыр. Бу бизим үчүн дә белә олмалыдыр. Һәјата ҹидди мүнасибәт бәсләјән Јараданын, ганы истифадә етмәјә даир инсанлара ҝөстәриш вермәјә ихтијары вар. Аллаһ бизим һәјатымыза јахындан мараг ҝөстәрдији үчүн, ганын хүсуси бир үсулла истифадә олунмасына гәрар верди. Бу, әбәди һәјата јол ачан јеҝанә јолдур. Бу јол Исанын гијмәтли ганы илә бағлыдыр. Онун ганыны бизим рифаһымыз үчүн истифадә едәрәк бизә хилас вердији үчүн Јеһова Аллаһа неҹә дә миннәтдарыг! Өзүнү гурбан верәрәк бизим уғрумузда ганыны төкән Исаја да чох миннәтдар олмалыјыг! Шүбһәсиз ки, биз һәвари Јәһјанын һиссләринә шәрик олуруг: “Бизи севән, Өз ганы илә ҝүнаһларымыздан бизи тәмизләјән, бизи Өз Атасы Аллаһын хидмәтиндә һөкмдарлар вә каһинләр тә’јин едән Мәсиһә әбәди олараг иззәт вә гүдрәт олсун. Амин” (Вәһј 1:5, 6).
20 Бизим мүдрик Аллаһымыз вә Һәјатверәнимиз лап кечмишдән гана хиласедиҹи рол ајырмышдыр. Һәр бир кәс өзүндән соруша биләр: “Бу мәним гәрарларыма вә давранышларыма неҹә тә’сир етмәлидир?” Бу суал нөвбәти мәгаләдә нәзәрдән кечириләҹәк.
Неҹә ҹаваб верәрдиниз?
• Һабил вә Нуһла баш верән һадисәләрдән Аллаһын гана олан нөгтеји-нәзәри һаггында нә өјрәнирик?
• Аллаһ Ганунда ганын истифадә олунмасына һансы мәһдудијјәти гојду вә нәјә ҝөрә?
• Кәффарә ҝүнү илә бағлы олан сурәтләр Исанын үзәриндә неҹә јеринә јетди?
• Исанын ганы бизим һәјатымызы неҹә хилас едә биләр?
[12-ҹи сәһифәдәки чәрчивә]
Кимин ганы һәјаты хилас едир?
“Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир ки, Рәббин вә Аллаһын ҹәмијјәтини, Өз ганы баһасына әлдә етдији ҹәмијјәти ҝүдәсиниз” (Һәвариләрин ишләри 20:28).
“Беләликлә, Онун ганы илә инди салеһ сајылдығымыза ҝөрә, Онун васитәси илә Аллаһын гәзәбиндән хилас олаҹағымыз даһа чох гәтидир” (Ромалылара 5:9).
“[Сизин] һеч бир үмидиниз јох иди вә дүнјада Аллаһдан мәһрум идиниз. Инди исә, Мәсиһ Иса сајәсиндә, бир заманлар узаг олан сизләр Мәсиһин ганы сәбәбилә јахын олдунуз” (Ефеслиләрә 2:12, 13).
“Аллаһ Онда бүтүн долғунлуғу илә јашамаға вә Онун васитәсилә, чармыхда ахыдылан ганы илә сүлһ јарадараг, һәм јердә, һәм дә ҝөјләрдә олан һәр шеји Өзү илә барышдырмаға разы олду” (Колослулара 1:19, 20).
“Беләликлә, еј гардашлар, Исанын ганы сајәсиндә Ән Мүгәддәс Јерә ҝирмәјә ҹәсарәтимиз вардыр” (Ибраниләрә 10:19).
“Сиз, әҹдадымыздан мирас алдығыныз бош јашајыш тәрзиндән... гүсурсуз вә ләкәсиз гузуја бәнзәјән Мәсиһин гијмәтли ганы фидијәси илә хилас олдунуз” (1 Петер 1:18, 19).
“Әҝәр О, нурда олдуғу кими, биз дә нурда ҝәзириксә, онда бир-биримизлә үнсијјәтимиз вардыр вә Онун Оғлу Иса Мәсиһин ганы бизи һәр ҝүнаһдан тәмизләјир” (1 Јәһја 1:7).
“Тумары ҝөтүрмәјә вә онун мөһүрләрини ачмаға Сән лајигсән. Чүнки боғазландын вә Өз ганынла һәр гәбиләдән, дилдән, халгдан вә милләтдән бизи Аллаһ үчүн сатын алдын” (Вәһј 5:9).
“Гардашларымызын иттиһамчысы... деврилди. Онлар она Гузунун ганы васитәсилә вә шәһадәт етдикләри тәблиғ илә галиб ҝәлдиләр” (Вәһј 12:10, 11).
[10-ҹу сәһифәдәки шәкил]
Ганунун васитәсилә Аллаһ ганын ҝүнаһларын бағышланмасына аидијјаты олдуғуну ајдын сурәтдә ҝөстәрди.
[11-ҹи сәһифәдәки шәкил]
Исанын ганы сајәсиндә бир чох инсанлар хилас әлдә едә биләр.