Јашајан Аллаһын рәһбәрлијини гәбул един

“Сиз... јашајан Аллаһа тәрәф дөнәсиниз. О Аллаһ ки, ҝөјү, јери, дәнизи вә онларын ичиндәки һәр шеји јаратмышдыр” (ҺӘВАРИЛӘРИН ИШЛӘРИ 14:15).

1, 2. Јеһованы “јашајан Аллаһ” кими гәбул етмәк нәјә ҝөрә мүнасибдир?

ПАВЕЛ вә Барнаба Листрада бир нәфәрә шәфа вердикдән сонра, Павел топлашан ҹамааты инандырмаға башлады: “Биз дә, дујғулары сизә бәнзәјән инсанларыг вә сизә мүждә ҝәтирдик ки, сиз бу бош шејләрдән јашајан Аллаһа тәрәф дөнәсиниз. ОАллаһ ки, ҝөјү, јери, дәнизи вә ичиндәки һәр шеји јаратмышдыр” (Һәвариләрин ишләри 14:15).

² Јеһованын ҹансыз бүт дејил, “јашајан Аллаһ” олмасы нә гәдәр дә доғрудур! (Јеремја 10:10; 1 Салониклиләрә 1:9, 10). Јеһованын јашајан Аллаһ олмасындан әлавә, О, бизим дә һәјатымызын Гајнағыдыр. “Һамыја һәјат, нәфәс вә һәр шеји верән Өзүдүр” (Һәвариләрин ишләри 17:25). О, мараг ҝөстәрир ки, биз һәм инди, һәм дә ҝәләҹәкдә һәјатдан һәзз алаг. Павел әлавә етди ки, Аллаһ “ҝөјдән бизә јағмурлар вә сәмәрәли мөвсүмләр верәрәк, үрәкләримизи гида вә севинҹлә долдуруб, јахшылыг едәрәк, Өзүнү шаһидсиз гојмамышдыр” (Һәвариләрин ишләри 14:17).

3. Биз Аллаһын вердији рәһбәрлијә нәјә ҝөрә е’тибар едә биләрик?

³ Аллаһын һәјатымыза ҝөстәрдији мараг Онун рәһбәрлијинә е’тибар етмәјимиз үчүн бизә әсас верир (Мәзмур 147:8; Матта 5:45). Буна бахмајараг, бә’зиләри Мүгәддәс Китабда онлара ајдын олмајан вә ја һәддиндән артыг сәрт ҝөрүнән ҝөстәришләрә раст ҝәлдикдә, Аллаһын рәһбәрлијиндән имтина етмәјә мејллидирләр. Лакин тәҹрүбә ҝөстәрир ки, Јеһованын рәһбәрлијинә е’тибар етмәк мүдрик давранышдыр. Мәсәлән, исраилли ганунда ҹәсәдә тохунмағын нәјә ҝөрә гадаған едилдијини баша дүшмәсә дә, итаәт ҝөстәрмәк онун рифаһына хидмәт едирди. Әввәла, бу ганун ону јашајан Аллаһа даһа да јахынлашдырырды, икинҹиси исә, хәстәликләрдән горујурду (Левилиләр 5:2; 11:24).

4, 5. а) Мәсиһчилијин јаранмасындан әввәл Јеһова гана даир һансы рәһбәрлији вермишди? б) Аллаһын гана даир рәһбәрлијинин мәсиһчиләрә дә аид олдуғуну һарадан билирик?

⁴ Ејни шеј, Аллаһын гана даир рәһбәрлијинә дә аиддир. Аллаһ Нуһа сөјләди ки, гандан гида кими истифадә етмәк олмаз. Сонра Аллаһ Ганунда ҝөстәриш верди ки, ганы јалныз гурбанҝаһла әлагәдар — ҝүнаһларын бағышланмасы үчүн истифадә етмәк олар. Беләликлә Аллаһ ганын истифадә олунмасына даир Өзүнүн мөһтәшәм нијјәтини — инсанлары Исанын фидијә гурбанлығы васитәсилә хилас етмәк нијјәтини тәдриҹән ачыглајырды (Ибраниләрә 9:14). Доғрудан да Аллаһын рәһбәрлији, Онун бизим һәјатымыз вә рифаһымызла марагландығыны ҝөстәрир. XIX әсрин Мүгәддәс Китаб алими Адам Кларк Јарадылыш 9:4 ајәсинә (МКШ) даир вердији шәрһиндә јазырды: “Шәрг килсәси [Нуһа верилмиш] бу әмрә әввәлки кими дәгигликлә риајәт едир. [...] Ганын гида кими тәтбиг олунмасы Ганунла гадаған едилирди, чүнки о, дүнјанын ҝүнаһлары үчүн төкүләҹәк гана ишарә едирди; ганын истифадә олунмасыны Инҹил дә гадаған едирди, чүнки ону һәмишә ҝүнаһларын бағышланмасы үчүн төкүлән ган һаггында хатырлатма кими нәзәрдән кечирмәк лазымдыр”.

⁵ Бу алим “Инҹил” сөзү алтында, еһтимал ки, үмуми мүждәни, јә’ни Иса һаггындакы хош хәбәри нәзәрдә тутурду. Һәмин мүждә өзүнә, Аллаһын Өз Оғлуну уғрумузда өлмәк үчүн — әбәди һәјата малик олмағымыз үчүн ган төкмәјә ҝөндәрдијинә даир мә’луматы дахил едирди (Матта 20:28; Јәһја 3:16; Ромалылара 5:8, 9). Алимин шәрһи, Мәсиһин шаҝирдләринә гандан чәкинмәји тапшыран нөвбәти ҝөстәришләри дә әһатә едир.

6. Мәсиһчиләрә гана даир һансы ҝөстәришләр верилмишдир вә нәјә ҝөрә?

⁶ Билдијимиз кими, Аллаһ исраиллиләрә јүзләрлә гајда-ганунлар вермишдир. Исанын өлүмү онун шаҝирдләрини бүтүн бунлара риајәт етмәк мәс’улијјәтиндән азад етди (Ромалылара 7:4, 6; Колослулара 2:13, 14, 17; Ибраниләрә 8:6, 13). Лакин бир вахтдан сонра ортаја кишиләрин сүннәт олунмасы кими ваҹиб бир мәсәлә чыхды. Мәсиһин ганы сајәсиндә хиласа наил олмағы арзу едән гејри-јәһудиләрә сүннәт олунмаг вә бунунла да Ганун алтында олдугларыны ҝөстәрмәк лазым идими? Бизим еранын 49-ҹу илиндә мәсиһчиләрин рәһбәрлик шурасы бу мәсәләни нәзәрдән кечирди (Һәвариләрин ишләри, 15-ҹи фәсил). Аллаһын руһунун көмәји илә һәвариләр вә ағсаггаллар белә нәтиҹәјә ҝәлдиләр ки, Ганунун ләғв олунмасы илә сүннәтин зәрури әһәмијјәти баша чатыб. Буна бахмајараг, Аллаһын бә’зи тәләбләри мәсиһчиләр үчүн дә гүввәдәдир. Јығынҹаглара мәктубунда рәһбәрлик шурасы јазмышдыр: “Мүгәддәс Руһа вә бизә, ваҹиб олан бу гајдалардан башга сизин үзәринизә јүк гојмамаг мүсбәт ҝөрүндү: бүтләрә тәгдим едилиб мурдар олмуш әтләрдән, гандан, боғулмуш һејванларын әтиндән вә ҹинси әхлагсызлыгдан чәкинин. Бунлардан гачынсаныз, јахшы иш ҝөрәрсиниз” (Һәвариләрин ишләри 15:28, 29).

7. Мәсиһчиләр үчүн ‘гандан чәкинмәк’ нә дәрәҹәдә ваҹибдир?

⁷ Рәһбәрлик шурасы мә’нәви ҹәһәтдән ‘гандан чәкинмәјин’, ҹинси әхлагсызлыгдан вә бүтпәрәстликдән чәкинмәк гәдәр ваҹиб олдуғуну ајдын ҝөстәрди. Бундан ҝөрүнүр ки, гана даир гадаға ҹиддидир. Бүтпәрәстлијә вә ја ҹинси әхлагсызлыға баш гошан вә төвбә етмәјән мәсиһчиләр “Аллаһын Сәлтәнәтини [Падшаһлығыны] мирас алмајаҹаглар” — онларын “агибәти... икинҹи өлүмдүр” (1 Коринфлиләрә 6:9, 10; Вәһј 21:8; 22:15). Фәргә диггәт јетирәк: Аллаһын ганын мүгәддәслијинә даир рәһбәрлијинә е’тинасыз јанашмаг әбәди өлүмә, Исанын гурбанлығына һөрмәтлә јанашмаг исә, әбәди һәјата ҝәтириб чыхара биләр.

8. Аллаһын гана даир рәһбәрлијинә еркән мәсиһчиләрин ҹидди јанашдыглары нәдән ҝөрүнүр?

⁸ Еркән мәсиһчиләр Аллаһын гана даир рәһбәрлијини неҹә баша дүшүр вә она неҹә риајәт едирдиләр? Кларкын шәрһини хатырлајаг: “Ганын истифадә олунмасыны Инҹил дә гадаған едирди, чүнки ону һәмишә ҝүнаһларын бағышланмасы үчүн төкүлән ган һаггында хатырлатма кими нәзәрдән кечирмәк лазымдыр”. Тарих сүбут едир ки, еркән мәсиһчиләр буна ҹидди јанашырдылар. Тертуллиан јазырды: “Епилепсијадан сағалмаг үчүн гладиатор ојунлары заманы мејданда өлдүрүләнләрин тәзә ахыдылмыш ганыны аҹҝөзлүклә башына чәкәнләр һагда дүшүнүн”. Гандан гида кими истифадә едән бүтпәрәстләрдән фәргли олараг, Тертуллианын сөзләринә ҝөрә, мәсиһчиләрин “јемәкләриндә һејван ганы белә олмур... Мәсиһчиләри сынамаг үчүн онлара ган колбасасы тәклиф едирсиниз. Сиз чох ҝөзәл билирсиниз ки, [бу], мәсиһчиләр үчүн гејри-ганунидир”. Бәли, мәсиһчиләр ган јемәкдәнсә, өлмәји үстүн тутурдулар. Онлар Аллаһын рәһбәрлијини чох ваҹиб сајырдылар.

9. Гандан чәкинмәк ҝөстәриши, ганы бирбаша гидада истифадә етмәкдән савајы өзүнә нәји дахил едирди?

⁹ Ким исә дүшүнә биләр ки, рәһбәрлик шурасы садәҹә олараг мәсиһчиләрә гандан гида кими истифадә етмәмәјә вә ону ичмәмәјә, һәмчинин ган әлавә етмәклә вә ганы ахыдылмамыш һејван әтиндән һазырланмыш јемәкләри јемәмәјә даир ҝөстәриш верирди. Әслиндә Аллаһын Нуһа вердији ҝөстәришин әсас мә’насы бу иди. Һәвариләр дә өз фәрманларында мәсиһчиләрә “боғулмуш һејванларын әтиндән”, јә’ни тәркибиндә ган галан әтдән горунмағы сөјләдиләр (Јарадылыш 9:3, 4, МКШ; Һәвариләрин ишләри 21:25). Лакин еркән мәсиһчиләр билирдиләр ки, даһа артыг шеј тәләб олунур. Бә’зән ганы тибби мәгсәдләр үчүн истифадә едирдиләр. Тертуллиан диггәт јетирмишдир ки, епилепсијадан сағалмаг үчүн бүтпәрәстләр тәзә ган ичирдиләр. Ганы тәтбиг етмәјин башга үсуллары да ола биләрди ки, онларын да хәстәликләри вә сәһһәти јахшылашдырдығыны һесаб едирдиләр. Бу сәбәбдән, мәсиһчиләр үчүн гандан чәкинмәк, һәмчинин ону тибби мәгсәдләр үчүн истифадә етмәмәји дә нәзәрдә тутурду. Һәјатлары үчүн тәһлүкә јарадыб-јаратмасына бахмајараг, мәсиһчиләр өз нөгтеји-нәзәрләринә риајәт едирдиләр.

Тибби мәгсәдләр үчүн истифадә олунан ган

10. Тибдә гандан неҹә истифадә олунур вә һансы суал јараныр?

¹⁰ Ганы тибби мәгсәдләр үчүн истифадә етмәк бизим ҝүнләрдә ади һала чеврилиб. Әввәлләр халис ган көчүрүрдүләр: ону донордан ҝөтүрүр, сахлајыр вә сонра пасиентә, мәсәлән, јаралы әсҝәрә көчүрүрдүләр. Бир гәдәр сонра алимләр ганы әсас компонентләрә ајырмағы өјрәндиләр. Компонентләрдән истифадә етмәјин сајәсиндә, һәкимләр донор ганыны даһа чох сајда пасиентләрин арасында бөлүшдүрә билдиләр: плазманы бир јаралыја, еритроситләри исә диҝәринә верирдиләр. Сонракы арашдырмалар ҝөстәрди ки, бир компонентдән, мәсәлән, е’мал етмәк јолу илә ганын плазмасындан чохсајлы фраксијалар әлдә етмәк олар ки, онлары да даһа артыг сајда пасиентләрин арасында бөлүшдүрмәк олар. Бу истигамәтдә ахтарышлар давам едир вә фраксијалары истифадә етмәјин јени үсуллары мүәјјән едилир. Мәсиһчи буна неҹә реаксија вермәлидир? Мәсәлән, мәсиһчи гәтијјәтлә гәрара ҝәлир ки, һеч бир һалда она ган көчүрүлмәсинә разылыг вермәјәҹәк, һәким исә ону ганын әсас компонентләриндән бирини, еһтимал ки, еритросити гәбул етмәјә инандырыр. Вә јахуд мүалиҹә ганын һансыса компонентләриндән бириндән алынмыш аз мигдарда фраксијанын тәтбиг олунмасы илә әлагәдардыр. Ганын мүгәддәслијини вә әслиндә һәјаты јалныз Мәсиһин ганынын хилас етдијини нәзәрә алараг, Аллаһын хидмәтчиси бу ҹүр һалларда һансы гәрары гәбул етмәлидир?

11. Јеһованын Шаһидләри артыг узун илләрдир ки, тибби фактлара мүвафиг олан һансы мөвгеји тутурлар?

¹¹ Јеһованын Шаһидләри өз мөвгеләрини узун илләр габаг ајдын сурәтдә ҝөстәрмишләр. Мәсәлән, онлар “Америка тибб ассосиасијасынын журналы” үчүн мәгалә јазмышлар (1981-ҹи илин 27 нојабр ајы; “Ган сәнин һәјатыны неҹә хилас едә биләр?”a брошүрасында (рус.), 27-29-ҹу сәһифәләрдә дәрҹ олунуб). Һәмин мәгаләдә “Тәквин”, “Левилиләр” вә “Һәвариләрин ишләри” китабларындан ситатлар ҝәтирилирди. Сонра дејилирди: “Бу ајәләр тибби дилдә јазылмаса да, Јеһованын Шаһидләринин фикринә ҝөрә, онлар халис ганын, еритросит күтләсинин вә плазманын, һәмчинин лејкоситләрин вә тромбоситләрин јеридилмәсини гадаған едир”. 2001-ҹи илдә дәрҹ олунмуш “Тә’хирәсалынмаз јардым” адлы рәһбәрлик китабында, “Ганын тәркиби” адлы башлыг алтында дејилир: “Ган бир нечә компонентдән ибарәтдир: плазма, еритроситләр, лејкоситләр вә тромбоситләр” (“Емерҝенҹј Ҹаре”). Беләликлә, тибби фактларла әлагәдар, Јеһованын Шаһидләри халис ганы вә онун дөрд әсас компонентини көчүрмәкдән имтина едирләр.

12. а) Ганын әсас компонентләриндән алынан фраксијалара даир мөвгејимиз һаггында нә дејилирди? б) Һәмин суалла әлагәдар әлавә мә’луматы һарада тапмаг олар?

¹² Һәмән тибб журналында олан мәгаләдә сонра дејилир: “Шаһидләрин дини анлајышлары албумин, иммуноглобулин кими компонентләрдән вә һемофилија хәстәлијинә тутулмуш адамлар үчүн дәрманлардан истифадә етмәји тәмиз гадаған етмир; һәр бир Шаһид онлары гәбул едиб-етмәмәјә даир шәхсән өзү гәрар гәбул етмәлидир”. 1981-ҹи илдән е’тибарән тибби мәгсәдләр үчүн чохлу фраксијалар (дөрд әсас компонентдән алынмыш хырда тәркиб һиссәләр) ајрылмышдыр. Буна ҝөрә дә “Ҝөзәтчи Гүлләси”нин 2000-ҹи ил 15 ијун сајында (рус.) “Охуҹуларын суаллары” рубрикасында бу суала даир фајдалы мә’лумат дәрҹ едилмишдир. Милјонларла буҝүнкү охуҹулар үчүн һәмин ҹаваб “Ҝөзәтчи Гүлләси”нин 2004-ҹү ил 15 ијун сајынын (рус.) 29-31-ҹи сәһифәләриндә тәкрар дәрҹ едилиб. Һәмин мәгаләдә мүхтәлиф тәфсилат вә мәнтиги аргументләр ҝәтирилсә дә, диггәт јетирмәк олар ки, о, 1981-ҹи илдә ифадә едилмиш әсас принсипләрә мүвафиг ҝәлир.

Виҹданымызын ролу

13, 14. а) Виҹдан нәдир вә гана даир гәрара неҹә тә’сир едир? б) Аллаһ исраиллиләрә гидада әтдән истифадә етмәјә даир һансы рәһбәрлији верди вә һансы суаллар јарана биләрди?

¹³ Бу мәсәләдә гәрарын гәбул едилмәси виҹданла бағлыдыр. Нәјә ҝөрә? Бүтүн мәсиһчиләр разылашаҹаглар ки, Аллаһын рәһбәрлијинә риајәт етмәк лазымдыр, лакин ајры-ајры һалларда өз виҹданыны нәзәрә алараг шәхси гәрарлар гәбул етмәк лазымдыр. Виҹдан — доғулдуғумуз вахтдан, хүсусилә дә әхлаг мәсәләләриндә гијмәт вермәк вә сечим етмәк габилијјәтидир (Ромалылара 2:14, 15). Мә’лум олдуғу кими, һамынын виҹданы мүхтәлифдирb. Мүгәддәс Китабда дејилир ки, бә’зиләринин “зәиф виҹданы” вар; демәли, виҹданы гүввәтли олан кәсләр дә вар (1 Коринфлиләрә 8:12). Мәсиһчиләр Аллаһын ирадәсини дәрк етмәкдә, Онун дүшүнҹә тәрзини мәнимсәмәкдә вә гәрар гәбул едәркән биликләрини истифадә етмәкдә мүхтәлиф сүр’әтә маликдирләр. Буну јәһудиләрин әтдән гида кими истифадә етмәләринин нүмунәси илә тәсвир етмәк олар.

¹⁴ Мүгәддәс Китаб ајдын шәкилдә ҝөстәрир ки, Аллаһа итаәткар олан инсан, ганы ахыдылмамыш әти јемәз. Бу тапшырыг о гәдәр ҹидди иди ки, һәтта исраил әсҝәрләри бөһран вәзијјәтини нәзәрә алараг әти ‘ганы илә јејәндә’ белә онлар ҹидди сәһвә — ҝүнаһа јол вермәкдә тәгсиркар олмушдулар (Тәснијә 12:15, 16; 1 Самуел 14:31-35). Буна бахмајараг, суаллар јарана биләрди. Мәсәлән, исраилли гојун кәсәндә, онун ганыны нә гәдәр вахт әрзиндә ахытмалы иди? Ганы ахмаг үчүн боғазыны ахыраҹанмы кәсмәк лазым иди? Гојуну арха ајагларындан асмаг лазым идими? Нә гәдәр мүддәтә? Бәс бөјүк инәклә нә етмәк лазым иди? Һәтта ганы ахыдылса да, онун һансыса мигдары әтдә гала биләрди. Бу ҹүр әти јемәк ҹаиз идими? Буна ким гәрар вермәли иди?

15. Әт јемәјә даир мәсәләјә бә’зи јәһудиләр неҹә јанашырдылар вә Аллаһ һансы принсипләри вермишдир?

¹⁵ Бу ҹүр суалларла гаршылашан гејрәтли јәһудини тәсәввүр едәк. О дүшүнә биләрди ки, ән тәһлүкәсиз аддым әт базарында сатылан әти јемәмәкдир. Башга бир јәһуди исә бүтә ҝәтирилдији еһтимал олунан әти јемәзди. Диҝәр јәһудиләр, еһтимал ки, әти, ганы ахытмаг үчүн јалныз мүәјјән ән’әнәләр јеринә јетирилдикдән сонра јејирдиләрc (Матта 23:23, 24). Сән бу ҹүр мүхтәлиф мүнасибәтләр барәсиндә нә дүшүнүрсән? Бундан әлавә, Аллаһ бу ҹүр һәрәкәтләри тәләб етмәдијинә ҝөрә, јәһудиләр, чохсајлы суалларынынын һәр бири үчүн гәрар гәбул едилсин дејә, онлары раввинләр шурасына ҝөндәрсәјдиләр, даһа јахшы олмаздымы? Иудаизмдә бу ҹүр ән’әнә јаранса да биз шадыг ки, Јеһова Өзүнүн һәгиги хидмәтчиләринә ган һаггындакы суаллары бу үсулла һәлл етмәји бујурмајыб. Аллаһ Гануна әсасән тәмиз сајылан һејванлары кәсмәјә вә онларын ганыны ахытмаға даир әсас принсипләрдән артыг мә’лумат вермәјиб (Јәһја 8:32).

16. Нәјә ҝөрә ганын компонентинин һәр-һансы хырда фраксијасынын инјексијасына даир, мәсиһчиләрин мүхтәлиф нөгтеји-нәзәрләри ола биләр?

¹⁶ Артыг 11 вә 12-ҹи абзасларда гејд олундуғу кими, Јеһованын Шаһидләри халис ганын вә онун дөрд әсас компонентинин — плазманын, еритроситләрин, лејкоситләрин вә тромбоситләрин көчүрүлмәсинә разылыг вермирләр. Бәс ганын әсас компонентләриндән алынан хырда фраксијалар, мәсәлән, хәстәликлә мүбаризәдә көмәк едән вә ја илан зәһәринин әлејһинә хидмәт едән, тәркибиндә антиҹисимләр олан зәрдаблар барәсиндә нә демәк олар? (“Ҝөзәтчи Гүлләси”нин 2004-ҹү ил 15 ијун сајынын (рус.) 30-ҹу сәһифәсиндәки 4-ҹү абзаса бахын.) Бә’зиләри белә фикрә ҝәлирләр ки, бу ҹүр хырда фраксијалара артыг ган демәк олмаз вә буна ҝөрә дә бу, “гандан... чәкинин” ҝөстәришинә дахил дејил (Һәвариләрин ишләри 15:29; 21:25; һәмин журналын 31-ҹи сәһифәси, абз. 1). Бу мәсиһчиләр гәбул етдикләри гәрарлар үчүн өзләри мәс’улијјәт дашыјырлар. Башгаларынын исә виҹданы гандан (һејван вә ја инсан ганындан) алынмыш һәр бир шеји, һәтта әсас компонентләрин бириндән алынмыш хырда фраксијалары белә рәдд етмәјә тәшвиг едирd. Диҝәрләри дәрман вә ја зәһәр әлејһинә зәрдаб кими плазма зүлалларынын инјексија едилмәсинә разылыг верә, лакин диҝәр хырда фраксијалары рәдд едә биләрләр. Бундан әлавә, дөрд әсас компонентин бириндән алынан бә’зи препаратлар өз тә’сиринә ҝөрә компонентин өзү илә о гәдәр охшар ола биләр вә һәјаты горумаг үчүн о гәдәр ваҹиб рол ојнајыр ки, мәсиһчиләрин әксәријјәти онларын тәтбиг едилмәсини јолверилмәз һесаб едәрләр.

17. а) Ганын фраксијалары барәсиндә олан мәсәләләрдә виҹдан неҹә көмәк едә биләр? б) Бу мәсәләләрин һәллинә нәјә ҝөрә чох ҹидди јанашмаг лазымдыр?

¹⁷ Белә гәрарлар гәбул едәндә, Мүгәддәс Китабда виҹдан һаггында дејиләнләр көмәк едә биләр. Әввәлҹә Аллаһын Кәламынын нөгтеји-нәзәрини өјрәнмәк вә бу биликләрин сәнин виҹданына тә’сир етмәсинә јол вермәк лазымдыр. Бу, кимдәнсә сәнин јеринә гәрар гәбул етмәји хаһиш етмәк әвәзинә, сәнин өзүнә Аллаһын рәһбәрлијинә мүвафиг гәрар гәбул етмәјә көмәк едәҹәк (Мәзмур 25:4, 5). Ганын фраксијалары барәсиндә бә’зиләри дүшүнүрләр: “Әҝәр бу виҹдан мәсәләсидирсә, демәли, неҹә давранмағым фәрг етмәз”. Бу ҹүр дүшүнмәк дүзҝүн дејил. Әҝәр һансыса мәсәлә виҹданын үмидинә бурахылырса, бу онун аз әһәмијјәтли олмасына дәлаләт етмир. Әксинә, бу ән ваҹиб мәсәлә ола биләр. Ахы бизим гәрарымыз, виҹданы бизимки кими олмајан кәсләрә тә’сир едә биләр. Биз буну, Павелин, базара чыхарылмаздан әввәл, еһтимал ки, бүтләрә ҝәтирилән әт һаггында вердији нәсиһәтдән ҝөрүрүк. Мәсиһчи, гардашларынын ‘зәиф виҹданына тохунмагдан’ еһтијат етмәлидир. Әҝәр о, башгаларыны бүдрәдәрсә, уғрунда Мәсиһин өлдүјү гардашыны һәлак едәр вә бунунла да Мәсиһә гаршы ҝүнаһ ишләтмиш олар. Беләликлә, ганын хырда фраксијалары һаггында олан суаллар өз өһдәмизә бурахылса да, онларын һәлл едилмәсинә чох ҹидди јанашмаг лазымдыр (1 Коринфлиләрә 8:8, 11-13; 10:25-31).

18. Мәсиһчи гана даир мәсәләләрдә виҹданынын күтләшмәмәси үчүн нә етмәлидир?

¹⁸ Гана даир гәрар гәбул едәркән, аз әһәмијјәти олмајан даһа бир амилә диггәт јетирмәк лазымдыр: сәнин гәрарын сәнин өзүнә неҹә тә’сир едәҹәкдир. Әҝәр ганын хырда фраксијаларынын тәтбиг едилмәси сәнин Мүгәддәс Китабын принсипләри әсасында тәрбијә едилмиш виҹданыны нараһат едирсә, буна е’тинасыз јанашма. Киминсә — “онлары гәбул етмәк олар, чохлары белә едир”, сөзләринә ҝөрә өз виҹданыны боғма. Јадда сахла: милјонларла мүасирләримиз өз виҹданларына диггәт јетирмирләр вә онларын виҹданы күтләшиб, бунун нәтиҹәсиндә исә, онлар виҹдан әзабы чәкмәдән јалан данышыр вә башга пис ишләрлә мәшғул олурлар. Шүбһәсиз ки, мәсиһчиләр бу ҹүр давранмаг истәмирләр (2 Самуел 24:10; 1 Тимотејә 4:1, 2).

19. Ганла әлагәдар олан мәсәләләрдә гәрар гәбул едәркән илк нөвбәдә нәји әлдә рәһбәр тутмалыјыг?

¹⁹ “Ҝөзәтчи Гүлләси”нин 2004-ҹү ил 15 ијун сајынын (рус.) 29-31-ҹи сәһифәләриндә тәкрарән дәрҹ олунан ҹавабын ахырында дејилир: “Мәсиһчиләрин виҹданы әлдә рәһбәр тутараг гәбул етдикләри гәрарлар мүхтәлифдир. Лакин бу, мәсәләнин әһәмијјәтсиз олдуғуна дәлаләт едирми? Хејр. Мәсәлә чох ҹиддидир”. Бу мәсәлә хүсусән дә она ҝөрә ҹиддидир ки, сәнин ‘јашајан Аллаһла’ мүнасибәтләринә тә’сир едир. Исанын төкүлмүш ганы сајәсиндә јалныз бу мүнасибәтләр әбәди һәјата ҝәтириб чыхара биләр. Аллаһын гана олан нөгтеји-нәзәринә дәрин һөрмәт һисси инкишаф етдир, чүнки Аллаһ инсанларын һәјатыны ганла хилас едир. Һәвари Павел бу барәдә јахшы јазмышдыр: “[Сизин] һеч бир үмидиниз јох иди вә дүнјада Аллаһдан мәһрум идиниз. Инди исә, Мәсиһ Иса сајәсиндә, бир заманлар узаг олан сизләр Мәсиһин ганы сәбәбилә јахын олдунуз” (Ефеслиләрә 2:12, 13).

[Һашијәләр]

Хатырлајырсынызмы?

• Аллаһ гана даир Нуһа, исраиллиләрә вә мәсиһчиләрә һансы рәһбәрлији верди?

• Ганла әлагәдар Јеһованын Шаһидләри нәдән тамамилә имтина едирләр?

• Ганын әсас компонентләринин хырда фраксијалары барәсиндәки мәсәлә һансы мә’нада виҹданла бағлы олан мәсәләдир, лакин бу нә демәк дејил?

• Нәјә ҝөрә гәрар гәбул едәркән, илк нөвбәдә Аллаһла олан мүнасибәтләримизи хатырламалыјыг?

[16-ҹы сәһифәдәки ҹәдвәл]

(Ҹәдвәлә нәшрин өзүндә бахын)

ГАНА ДАИР ӘСАС МӨВГЕЈИМИЗ

ХАЛИС ГАН

▾ ▾ ▾ ▾

ЈОЛВЕРИЛМӘЗДИР Еритроситләр Лејкоситләр Тромбоситләр Плазма

МӘСИҺЧИНИН ▾ ▾ ▾ ▾

ШӘХСИ ГӘРАРЫ Еритроситләрдән Лејкоситләрдән Тромбоситләрдән Плазмадан

алынан фраксијалар алынан фраксијалар алынан фраксијалар алынан фраксијалар

[14-ҹү сәһифәдәки шәкил]

Рәһбәрлик шурасы гәрара ҝәлди ки, мәсиһчиләр ‘гандан чәкинмәлидирләр’.

[17-ҹи сәһифәдәки шәкил]

Ганын фраксијалары барәсиндәки мәсәләни һәлл едәндә виҹданынын сәсинә е’тинасыз јанашма.