“Ҝедин, бүтүн халглары шаҝирдим един”

“Ҝөјдә вә јер үзүндә бүтүн һакимијјәт Мәнә верилмишдир. Беләликлә, ҝедин, бүтүн халглары шаҝирдим един” (МАТТА 28:18, 19).

1, 2. а) Иса өз давамчыларына һансы тапшырығы верди? б) Исанын тапшырығы илә әлагәдар һансы суаллары нәзәрдән кечирәҹәјик?

ЕРАМЫЗЫН 33-ҹү илидир. Исраилдә јаз фәслидир вә Исанын шаҝирдләри Галилејадакы даға топлашыблар. Онларын дирилмиш Рәббләри тезликлә ҝөјә галхаҹаг, амма әввәлҹә онлара нә исә ваҹиб бир сөз демәлидир. Исанын онлара тапшырығы вар. Бу нә тапшырыгдыр? Шаҝирдләр бу тапшырыға неҹә һај вердиләр? Вә бу тапшырығын бизә һансы аидијјаты вар?

² Исанын сөзләри Матта 28:18-20 ајәләриндә јазылыб: “Ҝөјдә вә јер үзүндә бүтүн һакимијјәт Мәнә верилмишдир. Беләликлә [“Буна ҝөрә”, ЈД], ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин; вә будур, Мән, дөврүн сонуна гәдәр һәр ҝүн сизинләјәм”. Иса деди: “Бүтүн һакимијјәт”, “бүтүн халглары”, “сизә әмр етдијим һәр шејә”, “һәр ҝүн”. Бу дөрд тапшырыгла әлагәдар дөрд ваҹиб суал јараныр: Исаја нәјә ҝөрә итаәт етмәк лазымдыр? Шаҝирдләрин һазырланмасы иши һарада јеринә јетирилмәлидир? Нәји өјрәтмәк лазымдыр? Вә буну нә вахта гәдәр етмәк лазымдыр? Бу суаллары сыра илә нәзәрдән кечирәкa.

“Бүтүн һакимијјәт Мәнә верилмишдир”

3. Исанын шаҝирдләр һазырламаг тапшырығына нәјә ҝөрә итаәт етмәлијик?

³ Биринҹиси, Исаја нәјә ҝөрә итаәт едиб, онун шаҝирдләр һазырламаг тапшырығыны јеринә јетирмәлијик? Иса демишдир: “Ҝөјдә вә јер үзүндә бүтүн һакимијјәт Мәнә верилмишдир. Беләликлә [“Буна ҝөрә”, ЈД], ҝедин, бүтүн халглары шаҝирдим един”. “Буна ҝөрә” ифадәси, табе олмағымызын зәрури олдуғуна ҹидди сәбәби ҝөстәрир. Бу сәбәб ондан ибарәтдир ки, Иса (тапшырығы верән кәс) “бүтүн һакимијјәтә” маликдир. Онун һакимијјәти нә гәдәр бөјүкдүр?

4. а) Исанын һакимијјәти нә дәрәҹәдә бөјүкдүр? б) Исанын малик олдуғу һакимијјәтә даир анлајышымыз шаҝирдләр һазырламаг тапшырығына олан мүнасибәтимизә неҹә тә’сир етмәлидир?

⁴ Исанын өз јығынҹағы үзәриндә һакимијјәти вар, 1914-ҹү илдән исә, Аллаһын һәмин илдә гурулмуш Падшаһлығы үзәриндә дә һакимијјәтә маликдир (Колослулара 1:13; Вәһј 11:15). О баш мәләкдир вә буна ҝөрә дә сәрәнҹамында јүз милјонларла мәләкләрдән ибарәт сәмави ордулар вар (1 Салониклиләрә 4:16; 1 Петер 3:22; Вәһј 19:14-16). Атасы она, адил принсипләрә итаәт етмәјән “һәр рәјасәт, һәр һакимијјәт вә гүдрәти” мәһв етмәк һакимијјәти вермишдир (1 Коринфлиләрә 15:24-26; Ефеслиләрә 1:20-23). Иса јалныз дириләрин үзәриндә һакимијјәтә малик дејил. О, һәм дә “дириләрин вә өлүләрин... Һакими”дир, белә ки, Аллаһ она өлүм јухусуна гәрг оланлары дирилтмәк гүввәси вермишдир (Һәвариләрин ишләри 10:42; Јәһја 5:26-28). Шүбһәсиз ки, бу ҹүр бөјүк һакимијјәтә малик олан шәхсин әмринә чох ҹидди јанашмаг лазымдыр. Елә бу сәбәбдән биз Мәсиһин “ҝедин, бүтүн халглары шаҝирдим един” тапшырығына итаәткарлыгла вә һәвәслә риајәт едирик.

5. а) Петер Исанын сөзләринә неҹә табе олду? б) Исанын ҝөстәришини јеринә јетирмәси Петерә һансы хејир-дуалары ҝәтирди?

⁵ Јер үзүндәки хидмәтинин башланғыҹында Иса, онун һакимијјәтини е’тираф етмәјин вә ҝөстәришләринә итаәт етмәјин хејир-дуалара ҝәтириб чыхардығыны валеһедиҹи сурәтдә өјрәтди. Бир дәфә Иса балыгчы олан Петерә деди: “Дәрин јерә сүрүн вә ов үчүн торларынызы суја атын”. Петер һәмин јердә балыг олмадығына әмин иди, буна ҝөрә дә Исаја деди: “Устад! Бүтүн ҝеҹә чалышдыг, һеч бир шеј тута билмәдик”. Лакин Петер һәлимликлә әлавә етди: “Амма Сәнин сөзүнә ҝөрә торлары атаҹағам”. Мәсиһин ҝөстәришинә риајәт етдикдән сонра Петер ‘чохлу балыг тутду’. Сарсылан Петер: “Ја Рәбб, мәндән узаглаш; чүнки мән ҝүнаһкар бир адамам”,— дејәрәк Исанын дизләринә дүшдү”. Лакин Иса ҹаваб верди: “Горхма, бу ҝүндән е’тибарән инсанлары тутаҹагсан” (Лука 5:1-10; Матта 4:18). Биз бу һадисәдән нә өјрәнирик?

6. а) Гејри-ади балыг ову һаггындакы мә’лумат Исанын нә ҹүр итаәткарлыг тәләб етдијини неҹә ҝөстәрир? б) Биз Исаны неҹә тәглид едә биләрик?

⁶ Иса Петерә, Андрејә вә диҝәр һәвариләрә “инсан тутан балыгчылар” олмаг тапшырығыны, анҹаг онларын гејри-ади тәрздә чохлу балыг тутмаларындан сонра верди (Марк 1:16, 17). Исанын кор-коранә итаәткарлыг тәләб етмәдији ајдындыр. О, балыгчылара, она гулаг асмағын инандырыҹы сәбәбини ҝөстәрди. Исанын торлары атмаға даир тапшырығына гулаг асмаг ҝөзәл нәтиҹәләр вердији кими, онун “инсанлары тутмаг” тапшырығына гулаг асмаг да бөјүк хејир-дуалара ҝәтириб чыхараҹагдыр. Там иман ҝәтирәрәк һәвариләр итаәт ҝөстәрдиләр. Сонра дејилир ки, онлар “гајыглары саһилә чыхарараг, һәр шеји атыб, Онун ардынҹа ҝетдиләр” (Лука 5:11). Бу ҝүн башгаларыны шаҝирдләр һазырламаг ишиндә иштирак етмәјә тәшвиг едәрәк, биз Исаны тәглид едирик. Биз тәләб етмирик ки, инсанлар онлара дедијимиз һәр бир шеји баша дүшмәдән етсинләр. Мәсиһин тапшырығына итаәт ҝөстәрмәјин сәбәбләринә даир инандырыҹы сәбәбләр ҝәтиририк.

Инандырыҹы сәбәбләр вә дүзҝүн мејлләр

7, 8. а) Падшаһлыг һаггындакы хош хәбәри тәблиғ етмәк вә шаҝирдләр һазырламаг үчүн, Мүгәддәс Китабдан һансы сәбәбләр ҝөстәрилир? б) Сәни тәблиғ ишини давам етдирмәјә Мүгәддәс Јазыларын һансы һиссәләри хүсуси олараг тәшвиг едир? (Һәмчинин һашијәјә бахын.)

⁷ Биз Мәсиһин һөкмранлығыны гәбул етдијимиз үчүн Падшаһлыг һаггындакы хош хәбәрин тәблиғиндә вә шаҝирдләр һазырламаг ишиндә иштирак едирик. Хејирхаһ ишләрә тәшвиг етмәк истәдијимиз адамлара Мүгәддәс Китабдан даһа һансы дәлилләри ҝәтирә биләрдик? Мүхтәлиф өлкәләрдән олан садиг Шаһидләрин нә дедикләринә бахаг вә Мүгәддәс Китабдан ҝәтирилмиш ајәләрин онларын сөзләрини неҹә тәсдиг етдијинә диггәт јетирәк.

⁸ 1951-ҹи илдә вәфтиз олунмуш Рој демишдир: “Өзүмү Јеһоваја һәср едәркән, Она әбәдијјән хидмәт едәҹәјими вә’д етдим. Мән бу вә’димин үстүндә дурмаг истәјирәм” (Мәзмур 50:14; Матта 5:37). 1962-ҹи илдә вәфтиз олунмуш Хетер дејир: “Јеһованын мәним үчүн етдији һәр бир шеј һаггында дүшүнәндә, Она олан миннәтдарлығымы садиг хидмәтимлә тәзаһүр етдирмәк истәјирәм” (Мәзмур 9:1, 9-11; Колослулара 3:15). 1954-ҹү илдә вәфтиз олунмуш Ханнелора дејир: “Һәр дәфә хидмәтә чыханда, бизи мәләкләр дәстәкләјир. Бу исә бөјүк үстүнлүкдүр!” (Һәвариләрин ишләри 10:30-33; Вәһј 14:6, 7). 1969-ҹу илдә вәфтиз олунмуш Онор бөлүшүр: “Јеһованын һөкм ҝүнү ҝәләндә истәмирәм ки, гоншулугда јашајан инсанлардан ким исә Јеһованы вә Онун Шаһидләрини е’тинасызлыгда ҝүнаһландырыб, десин: “Мәни хәбәрдар едән олмајыб!” (Һезекиел 2:5; 3:17-19; Ромалылара 10:16, 18). 1974-ҹү илдә вәфтиз олунмуш Клаудио гејд едир: “Биз хидмәтдә “Аллаһын һүзурунда” вә “Мәсиһдә” иштирак едирик. Бирҹә тәсәввүр ет! Биз хидмәтдә оланда, ики ән јахшы Достумуз бизимлә олур” (2 Коринфлиләрә 2:17, И–93)b.

9. а) Петерин вә диҝәр һәвариләрин нүмунәсиндән ҝөрүндүјү кими, Мәсиһә һансы мејлләрдән итаәт етмәк лазымдыр? б) Инсанлары бу ҝүн Аллаһа вә Мәсиһә итаәт етмәјә нә тәшвиг етмәлидир вә нәјә ҝөрә?

⁹ Гејри-ади балыг ову һаггындакы мә’лумат ҝөстәрир ки, Мәсиһә дүзҝүн мејлләрдән — мәһәббәтдән итаәт етмәк лазымдыр. Петер: “Ја Рәбб, мәндән узаглаш” дејәндә, Иса узаглашмады; о, Петери һансыса ҝүнаһларда да иттиһам етмәди (Лука 5:8). Ҝетмәси барәдә јалвардығына ҝөрә Иса Петери мәзәммәт дә етмәди. Әксинә, Иса меһрибанлыгла деди: “Горхма”. Мәсиһә гејри-ади горху һиссиндән табе олмаг дүзҝүн олмазды. Иса деди ки, Петер вә онун достлары “инсан тутан балыгчылар” олаҹаглар. Бу ҝүн биз дә горхутмагла вә ја мәнфи фикирләр, мәсәлән, ҝүнаһ һисси ојатмаг вә ја утандырмагла һеч кими Мәсиһә итаәт етмәјә мәҹбур етмирик. Јеһованын үрәјинә јалныз Она вә Мәсиһә гаршы мәһәббәтә әсасланан сәмими итаәткарлыг севинҹ ҝәтирир (Матта 22:37).

“Бүтүн халглары шаҝирдим един”

10. а) Исанын ҝөстәришинин һансы һиссәси шаҝирдләрин гаршысында чәтин вәзијјәт јарадырды? б) Шаҝирдләр Исанын ҝөстәришинә неҹә һај вердиләр?

¹⁰ Мәсиһин ҝөстәриши илә бағлы јаранан икинҹи суал ондан ибарәтдир ки, шаҝирдләрин һазырланмасы иши һарада јеринә јетирилмәлидир? Иса өз давамчыларына деди: “Бүтүн халглары шаҝирдим един”. Иса хидмәтинә башламаздан әввәл, башга халглардан олан инсанлар, әҝәр Јеһоваја хидмәт етмәк үчүн ҝәлирдиләрсә, Исраилдә меһрибанлыгла гаршыланырдылар (1 Краллар 8:41-43). Исанын өзү әсасән јәһудиләрә тәблиғ едирди, лакин инди шаҝирдләринә тапшырмышдыр ки, бүтүн халглардан олан инсанларын јанына ҝетсинләр. Әслиндә онун шаҝирдләринин балыг тута биләҹәкләри јер вә ја тәблиғ саһәләри балаҹа “ҝөлмәчә” илә — тәбии јәһудиләрлә мәһдуд иди, лакин бу саһә тезликлә өзүнә бәшәријјәтин бүтүн “дәнизини” дахил едәрәк ҝенишләнди. Бу ҹүр дәјишикликләр бөјүк сә’јләр тәләб етсә дә, шаҝирдләр Исанын тапшырығына һәвәслә итаәт етдиләр. Исанын өлүмүндән 30 ил кечмәмиш һәвари Павел Мүждәнин тәкҹә јәһудиләрә дејил, ‘ҝөј алтында олан һәр мәхлуга тәблиғ едилдијини’ сөјләјә билди (Колослулара 1:23).

11. ХХ әсрин башланғыҹындан е’тибарән “тор атмаг” иши нә гәдәр ҝенишләнди?

¹¹ Тәблиғ саһәсинин буна бәнзәр ҝенишләнмәси мүасир дөврүмүздә баш верди. ХХ әсрин әввәлләриндә јалныз ајры-ајры өлкәләрдә “тор атылырды”. Бунунла белә, Мәсиһин һәмән дөврдә јашајан шаҝирдләри Ы әсрин мәсиһчиләринин нүмунәсини тәглид едир вә тәблиғ етдикләри әразини фәал сурәтдә ҝенишләндирирдиләр (Ромалылара 15:20). ХХ әсрин 30-ҹу илләринин әввәлләринә јахын онлар тәхминән јүз өлкәдә шаҝирдләр һазырлајырдылар. Бу ҝүн биз 235 өлкәдә вә әразиләрдә “тор атырыг” (Марк 13:10).

“Милләтләрин һәр чешид дилләриндән”

12. Зәкарја 8:23 ајәсиндәки пејғәмбәрлик диггәти нәјә јөнәлдир?

¹² Бүтүн халглардан шаҝирд һазырламаг јалныз әрази һәҹминә ҝөрә дејил, һәм дә дилләрин чохлуғуна ҝөрә бөјүк сә’јләр тәләб едән ишдир. Зәкарја пејғәмбәрин васитәсилә Јеһова габагҹадан демишдир: “О ҝүнләрдә милләтләрин һәр чешид дилләриндән он адам бир Јәһудинин әтәјинә јапышаҹаглар вә: Сизинлә ҝедирик, чүнки Аллаһын сизинлә бәрабәр олдуғуну ешитдик, дејәрәк јапышаҹаглар” (Зәкарја 8:23). Бу пејғәмбәрлијин бөјүк иҹрасында “Јәһуди” — мәсһ едилмиш мәсиһчиләрин галығыны, “он адам” исә, ‘бөјүк издиһамы’ тәмсил едирc (Вәһј 7:9, 10; Галатијалылара 6:16). Зәкарјанын гејд етдији кими, Мәсиһин шаҝирдләринин бөјүк издиһамыны милләтләрин һәр чешид дилләриндән топламаг лазым иди. Аллаһын халгынын мүасир тарихи буну тәсдиг едирми? Бәли, едир.

13. а) Мүасир дөврдә Аллаһын халгы арасында дилләрә даир һансы дәјишиклик баш верди? б) Садиг гул синфи мүхтәлиф дилләрдә руһани гидаја артан тәләбата неҹә реаксија ҝөстәрир? (“Кор инсанлар үчүн нәшрләр” чәрчивәсиндән фикирләри дахил един.)

¹³ 1950-ҹи илдә, бүтүн дүнјада јашајан Јеһованын Шаһидләринин 5-дән 3-нүн ана дили инҝилис дили иди. 1980-ҹи ил үчүн нисбәт 5-дән 2-јә гәдәр дәјишди, бу ҝүн исә инҝилис дили 5 Шаһиддән јалныз 1-нин ана дилидир. “Садиг вә ағыллы гул” бу ҹүр дәјишиклијә неҹә реаксија ҝөстәрди? О, руһани гиданы даһа чох дилләрдә тәгдим етмәјә башлады (Матта 24:45). Мәсәлән, 1950-ҹи илдә бизим әдәбијјат 90 дилдә дәрҹ олунурду, бу ҝүн исә дилләрин сајы тәхминән 400-ә гәдәр артыб. Мүхтәлиф дилләрдә данышан инсанлара ҝөстәрилән бу ҹүр бөјүк диггәт сәмәрә ҝәтирдими? Әлбәттә! Бүтүн ил боју һәр һәфтә “бүтүн... дилләрдән” тәхминән 5 000 адам Мәсиһин шаҝирди олур! (Вәһј 7:9). Артым исә давам едир. Ајры-ајры өлкәләрдә зәнҝин “балыг ову” мүшаһидә едилир! (Лука 5:6; Јәһја 21:6).

Сән мәмнунлуг ҝәтирән хидмәтә гошула биләрсәнми?

14. Бизим тәблиғ етдијимиз әразидә јашајан әҹнәбидилли адамлара неҹә көмәк етмәк олар? (“Жест дили вә шаҝирдләрин һазырланмасы” чәрчивәсиндән фикирләри дә дахил един.)

¹⁴ Бир чох гәрб өлкәләринә мүһаҹирләрин ҝәлиши илә һәмән өлкәләрдә ‘һәр дилдә’ данышан инсанлар арасында шаҝирдләр һазырламаг имканы јараныб (Вәһј 14:6). Бизим тәблиғ етдијимиз әразидә јашајан әҹнәбидилли адамлара неҹә көмәк етмәк олар? (1 Тимотејә 2:4). Биз, мәҹази диллә десәк, дүзҝүн балыгчылыг аләтләриндән истифадә едә биләрик. Бу ҹүр инсанлара өз ана дилләриндә әдәбијјат тәклиф ет. Әҝәр мүмкүндүрсә, гајғы ҝөстәр ки, һәмин адамлара бу дили билән Шаһид баш чәксин (Һәвариләрин ишләри 22:2). Буну етмәк инди даһа асандыр, чүнки бир чох Шаһидләр башгаларына Мәсиһин шаҝирдләри олмагда көмәк етмәк үчүн башга дил өјрәнибләр. Һесабатлар ҝөстәрир ки, бу ҹүр көмәк әли узатмаг тәблиғчиләрә мәмнунлуг ҝәтирир.

15, 16. а) Һансы нүмунәләр ҝөстәрир ки, башга дилдә данышан адамлара көмәк етмәк мәмнунлуг ҝәтирир? б) Әҹнәбидилли әразидә хидмәт етмәклә бағлы олан һансы суалларын үзәриндә дүшүнмәјә дәјәр?

¹⁵ Падшаһлыг һаггындакы тәблиғ ишинин мүтәшәккил сурәтдә 34 дилдә јеринә јетирилдији өлкәдә — Нидерландда баш верән ики нүмунәни нәзәрдән кечирәк. Шаһид әр-арвад полјакдилли мүһаҹирләр арасында шаҝирдләр һазырламаг чағырышына һај вердиләр. Онларын ҹәһдинә елә јахшы һај вердиләр ки, әр һәфтә әрзиндә даһа бир ҝүнү марагланан адамларла Мүгәддәс Китабын өјрәнмәсинә ајырмаг үчүн дүнјәви ишинә аз вахт һәср етмәјә башлады. Тезликлә бу әр-арвад һәр һәфтә 20-дән артыг Мүгәддәс Китаб өјрәнмәси кечирирдиләр. Онлар гејд едирләр: “Хидмәтимиз бизә бөјүк севинҹ ҝәтирир”. Шаҝирд һазырламаг ишиндә иштирак едәнләр Мүгәддәс Китаб һәгигәтләрини өз ана дилиндә ешидән инсанлардан миннәтдарлыг ешидәндә, хүсуси севинҹ һисси дујурлар. Мәсәлән, вјетнам дилиндә кечирилән ҝөрүш заманы јашлы бир киши ајаға галхыб сөз истәди. Ҝөзләри јашлы, Шаһидләрә деди: “Чох сағ олун ки, мәним чәтин дилими өјрәнмәк үчүн сә’ј ҝөстәрирсиниз. Гоҹа вахтымда чох ҝөзәл Мүгәддәс Китаб һәгигәтләрини өјрәнмәјимә чох хошбәхтәм”.

¹⁶ Буна ҝөрә дә тәәҹҹүблү дејил ки, әҹнәбидилли јығынҹагларда хидмәт едәнләр бөјүк мәмнунлуг һисси дујурлар. Бөјүк Британијадан олан бир әр-арвад бунлары сөјләдиләр: “Әҹнәбидилли әразидә тәблиғ етмәк, јәгин ки, 40 ил әрзиндә Падшаһлығын мараглары үчүн етдијимиз хидмәтин ән руһландырыҹысы олмушдур”. Хидмәтин шөвгләндириҹи бу нөвүндә иштирак етмәк үчүн сән һәјатында нәји исә дәјишә биләрдинми? Әҝәр мәктәбдә охујурсанса, әҹнәби дил өјрәнәрәк бу ҹүр хидмәтә һазырлаша биләрдинми? Бу, хејир-дуаларла долу мәмнунедиҹи һәјата јол ача биләр (Сүлејманын мәсәлләри 10:22). Бу барәдә нәјә ҝөрә валидејнләринлә данышмајасан?

Мүхтәлиф үсуллардан истифадә едирик

17. Нәјин сајәсиндә јығынҹағымызын әразисиндә даһа чох инсанлар тапмаг олар?

¹⁷ Ајдындыр ки, шәраитләр бизләрдән әксәријјәтимизә әҹнәбидилли әразиләрдә “тор атмаға” имкан вермир. Лакин биз, еһтимал ки, даһа чох инсанлары јығынҹағымызын әразисиндә тапа биләрдик. Неҹә? Чатдырдығымыз хәбәрә дејил, тәблиғ үсулларымыза дәјишиклик дахил етмәклә. Бир чох өлкәләрдә инсанларын даһа чох һиссәси јахшы мүһафизә олунан биналарда јашајыр. Бир чох башгалары, хидмәтимиз заманы онлара ҝәләркән евдә олмурлар. Буна ҝөрә биз, ҝүнүн мүхтәлиф вахтларында вә мүхтәлиф јерләрдә “тор атмалыјыг”. Беләликлә биз Исаны тәглид етмиш олаҹағыг. О, мүхтәлиф шәраитләрдә инсанларла сөһбәт етмәк үчүн үсуллар тапырды (Матта 9:9; Лука 19:1-10; Јәһја 4:6-15).

18. Мүхтәлиф јерләрдә тәблиғ етмәк нә гәдәр еффектлидир? (“Ишҝүзар әразидә шаҝирдләрин һазырланмасы” чәрчивәсиндән фикирләри дахил един.)

¹⁸ Дүнјанын бә’зи һиссәләриндә гардашларымыз инсанлар олан һәр јердә шаһидлик етмәклә еффектли сурәтдә шаҝирдләр һазырлајырлар. Шаҝирдләрин һазырланмасында бөјүк тәҹрүбәси оланлар, тәблиғләри илә даһа чох мүхтәлиф әразиләри әһатә етмәјә чалышырлар. Артыг тәблиғчиләр јалныз евдән-евә дејил, лакин һава лиманларында, идарәләрдә, мағазаларда, автомобил вә автобус дајанаҹагларында, күчәләрдә, паркларда, чимәрликләрдә вә диҝәр јерләрдә шаһидлик едирләр. Һавајада јени вәфтиз олунмуш Шаһидләрдән олдугҹа чоху һәгигәтлә тәблиғин мәһз бу ҹүр нөвү сајәсиндә таныш олмушлар. Мүхтәлиф үсулларын истифадә олунмасы бизә, Исанын шаҝирдләр һазырламаг тапшырығыны там сурәтдә јеринә јетирмәјә көмәк едир (1 Коринфлиләрә 9:22, 23).

19. Нөвбәти мәгаләдә һансы суаллар нәзәрдән кечириләҹәк?

¹⁹ Исанын шаҝирдләр һазырламаг тапшырығы өзүнә јалныз нәјә ҝөрә вә һарада шаҝирдләр һазырламағын тәфсилатларыны дахил етмир, һәм дә нәји өјрәтмәли вә буну нә вахта гәдәр етмәли олдуғумузу ҝөстәрир. Бу суаллар нөвбәти мәгаләдә нәзәрдән кечириләҹәк.

[Һашијәләр]

Хатырлајырсынызмы?

• Биз Падшаһлыг һаггындакы тәблиғ вә шаҝирдләрин һазырланмасы ишиндә һансы сәбәбләрдән вә һансы мејлләрлә иштирак едирик?

• Бизим ҝүнләрдә Јеһованын хидмәтчиләри Исанын бүтүн халглардан шаҝирдләр һазырламаг тапшырығыны һансы дәрәҹәдә јеринә јетирирләр?

• “Балыг овламаг ишиндә” мүхтәлиф үсуллардан неҹә истифадә едә биләрик вә буну етмәк нә үчүн лазымдыр?

[20-ҹи сәһифәдәки чәрчивә/шәкилләр]

Кор инсанлар үчүн нәшрләр

Алберт АБШ-да јашајыр. О, мәсиһчи ағсаггал вә таммүддәтли хидмәтчидир. Онун ҝөзләри кордур. Брајл шрифти илә дәрҹ олунан Мүгәддәс Китаб нәшрләри она өз хидмәтини, о ҹүмләдән хидмәти нәзарәтчи вәзифәсини даһа еффектли сурәтдә јеринә јетирмәјә көмәк едир. О, јығынҹагдакы тапшырыгларынын өһдәсиндән неҹә ҝәлир?

Сәдрлик едән нәзарәтчи Ҹејмс дејир: “Бизим јығынҹагда һеч заман Алберт кими јахшы хидмәти нәзарәтчи олмајыб”. Алберт АБШ-да јашајан, узун илләр әрзиндә Брајл шрифти илә инҝилис вә ја испан дилләриндә чап едилмиш нәшрләр алан тәхминән 5 000 кордан биридир. Гејд етмәјә дәјәр ки, 1912-ҹи илдән садиг гул синфи Брајл шрифти илә јүздән артыг әдәбијјат чап етмишдир. Һал-һазырда, мүасир технолоҝијаларын сајәсиндә Јеһованын Шаһидләринин типографијаларында һәр ил ондан артыг дилдә Брајл шрифти илә милјонларла сәһифәләр һазырланыр. Бу сәһифәләр сонра 70-дән артыг өлкәјә ҝөндәрилир. Кор оланлар үчүн Брајл шрифти илә чап едилмиш нәшрләрдән истифадә едә билән кими исә таныјырсанмы?

[21-ҹи сәһифәдәки чәрчивә/шәкил]

Жест дили вә шаҝирдләрин һазырланмасы

Бүтүн дүнјада чалышган ҝәнҹ тәблиғчиләр дә дахил олмагла, минләрлә Шаһидләр карлара Мәсиһин шаҝирдләри олмагда көмәк етмәк үчүн жест дилини өјрәнмишләр. Нәтиҹәдә јалныз Бразилијада сон бир ил әрзиндә 63 кар адам вәфтиз олунмуш вә 35 кар Шаһид исә таммүддәтли мүждәчи кими хидмәт едир. Бүтүн дүнјада жест дилиндә 1 200-дән артыг јығынҹаг вә груплар мөвҹуддур. Русијадакы жест дилиндә олан теократик рајон әразисинә ҝөрә дүнјада ән бөјүк рајондур, чүнки өзүнә бүтүн өлкәни дахил едир!

[22-ҹи сәһифәдәки чәрчивә]

Ишҝүзар әразидә шаҝирдләрин һазырланмасы

Ишҝүзар адамлара онларын иш јерләриндә баш чәкәрәк, Һавајада баҹымыз нәглијјат компанијасынын мүдиријјәтинин јанына ҝәлди. Мәшғул олдуғуна бахмајараг, киши Мүгәддәс Китабы һәр һәфтә 30 дәгигә әрзиндә өз офисиндә өјрәнмәјә разылыг верди. Һәр чәршәнбә ҝүнү сәһәр о өз әмәкдашларына она зәнҝ вурмамағы тапшырыр, сонра исә диггәтини бүтүнлүклә өјрәнмәјә јөнәлдир. Башга бир баҹы Һавајада Мүгәддәс Китабы һәфтәдә бир дәфә ајаггабы тә’мири е’малатханасынын саһибәси илә өјрәнир. Өјрәнмә бирбаша пиштахтанын архасында кечирилир. Мүштәри ҝәләндә баҹы кәнара чәкилир. Мүштәри ҝетдикдән сонра исә өјрәнмәни давам едирләр.

Һәм мүдир, һәм дә е’малатхананын саһибәси Мүгәддәс Китабы она ҝөрә өјрәнмәјә башламышлар ки, Шаһидләр тәшәббүс ҝөстәрәрәк мүхтәлиф јерләрдә “тор атырлар”. Евдә чәтин тапылан адамларла јығынҹағынын әразисиндә башга һарада гаршылашмағын мүмкүн олдуғуну билирсәнми?