Бу ҝүн Аллаһа иззәти кимләр верир?

“Ја Рәббимиз вә Аллаһымыз, иззәти, һөрмәти вә гүдрәти алмаға лајигсән” (ВӘҺЈ 4:11).

1, 2. а) Һансы нүмунәләр биомиметика һаггында тәсәввүрләр верир? б) Һансы суал јараныр вә тәәссүфләр олсун ки, нәји е’тираф етмәли олуруг?

БУ һадисә 1940-ҹы илләрдә баш вермишдир. Ҝүнләрин бириндә исвечрәли мүһәндис Жорж де Местрал өз ити илә ҝәзинтијә чыхмышды. Ҝәзинтидән гајытдыгдан сонра о өз палтарында, һәмчинин итинин түкүндә ајыпәнҹәси биткисинин гозаларыны ҝөрдү. Мараглы олдуғу үчүн һәмин гозалары микроскоп алтында нәзәрдән кечирмәји гәрара алды вә илҝәји олан һәр шејә илишән кичиҹик гармаглара диггәт јетирди. Бу ону, јапышган илҝәк — ајыпәнҹәсинин синтетик еквивалентини дүзәлтмәк фикринә ҝәтирди. Жорж де Местрал тәбиәти тәглид едән јеҝанә шәхс дејил. Бирләшмиш Штатларда Рајт гардашлары ири гушларын учушуну тәдгиг едәрәк аероплан дүзәлтмишләр. Франсыз мүһәндиси Александр Густав Ејфел Парисдә онун адыны дашыјан гүлләни, инсанын буд сүмүјүнә бәдәнин ағырлығына таб ҝәтирмәјә имкан јарадан принсипләр әсасында јаратмышдыр.

² Бу нүмунәләр биомиметика, тәбиәтдән техники идејалар мәнимсәмәк мәгсәди ҝүдән елм һаггында тәсәввүрләр верирa. Лакин белә бир суал јараныр: ихтирачылар, нүмунәсиндә бир чох шејләр дүзәлтдикләри ајыпәнҹәсинин хырда гармагларыны, бөјүк гушларын ганадларыны, инсанын буд сүмүјүнү вә бүтүн башга ҝөзәл варлыглары јарадан Кәсә тез-тезми лајиг олдуғу иззәти верирләр? Тәәссүфләр олсун ки, бу ҝүн Аллаһа, Онун һәгигәтән лајиг олдуғу иззәти надир һалларда верирләр.

3, 4. “Иззәт” кими тәрҹүмә олунан ибрани сөзү һансы мә’наны дашыјыр вә Јеһоваја мүнасибәтдә тәтбиг олунанда бу сөзүн алтында нә нәзәрдә тутулур?

³ Ким исә соруша биләр: “Аллаһа нәјә ҝөрә иззәт вермәк лазымдыр? Мәҝәр О, онсуз да иззәтли дејилми?” Доғрудур, Јеһова Каинатда ән бөјүк иззәтә маликдир, лакин бу о демәк дејил ки, һамы бу ҹүр дүшүнүр. Мүгәддәс Китабда “иззәт” кими тәрҹүмә олунан ибрани сөзү әсас е’тибары илә “ағырлыг” мә’насыны дашыјыр. Бу, ҹәмијјәтдә инсана нүфуз ҝәтирән бир шејә аиддир. Аллаһа тәтбиг олунанда исә, бу сөз инсанда Аллаһ гаршысында дәрин еһтирам һисси ојадыр.

⁴ Бу ҝүн аз адам Аллаһа гаршы бу һиссләри кечирир (Мәзмур 10:4; 14:1). Дүзүнү десәк, ҝөркәмли адамлар Аллаһа инанмадыглары бәс дејилмиш кими, чох вахт башгаларыны Каинатын иззәтли Јараданына һөрмәтсиз тәрздә јанашмаға тәһрик едирләр. Бу неҹә баш верир?

Онлар “үзүрсүздүрләр”

5. Алимләрин чоху мө’ҹүзәли варлыгларын мөвҹуд олмасыны неҹә изаһ едирләр?

⁵ Бир чох алимләр гәтијјәтлә иддиа едирләр ки, Аллаһ јохдур. Белә исә, онда онлар, инсанлар да дахил олмагла, ҹанлы варлыгларын јаранмасыны неҹә изаһ едирләр? Онларын фикринҹә, бүтүн бу мө’ҹүзәләр кор тәсадүф, тәкамүл просеси нәтиҹәсиндә әмәлә ҝәлиб. Мәсәлән, тәкамүл нәзәријјәси тәрәфдары Стивен Ҹеј Гулд јазырды: “Биз јалныз она ҝөрә мөвҹудуг ки, гәрибә бир балыг групунун хүсуси үзҝәҹләри олмуш, һәмин үзҝәҹләрдән исә гуру һејванларынын әл-ајаглары инкишаф етмишдир... Биз еһтимал ки, даһа “јүксәк” сәбәб тапмаға чалышырыг, о исә мөвҹуд дејил”. Ричард Лики вә Роҹер Луин дә буна бәнзәр бир шеј јазмышлар: “Ола биләр ки, инсан ҹинси садәҹә олараг тәбиәтин кобуд сәһвидир”. Јарадылан шејләрин ҝөзәллији вә мүрәккәблијиндән һејран олан алимләр дә Аллаһа иззәт вермирләр.

6. Дүнјанын Аллаһ тәрәфиндән јарандығына чохлары нәјә ҝөрә инанмырлар?

⁶ Али тәһсилли адамлар тәкамүл нәзәријјәсини факт кими мүдафиә едәндә, санки дејирләр ки, бу тә’лимә јалныз ҹаһил адамлар инанмаја биләр. Бу нәјә ҝәтириб чыхарыр? Чох илләр габаг тәкамүл нәзәријјәсинин тәрәфдары олан бир нәфәр бу нәзәријјәни гәбул едәнләрин фикирләри илә марагланмышды. О, дејир: “Мә’лум олду ки, тәкамүл тәрәфдарларынын чохунун буна инанмаларына сәбәб, онлара дејилдији кими, буна бүтүн дәрракәли инсанларын инанмаларыдыр”. Бәли, елм хадимләри өз атеист нөгтеји-нәзәрләрини ифадә едәндә, чохларыны дүнјанын Аллаһ тәрәфиндән јарандығы фикриндән дашындырырлар (Сүлејманын мәсәлләри 14:15, 18).

7. Ромалылара 1:20 ајәсинә әсасән бизи әһатә едән дүнјада нә ајдын ҝөрүнүр вә сиз нәјә ҝөрә бу ҹүр ҹаваб верирсиниз?

⁷ Алимләрин бу ҹүр әминликләри фактлара вә ја дәлилләрә әсасланырмы? Чәтин ки! Бизи әһатә едән һәр бир шеј Јараданын мөвҹудлуғундан бәһс едир. Һәвари Павел јазырды: “Дүнја [бәшәријјәт] јаранандан бәри Онун [Аллаһын] ҝөзлә ҝөрүлмәз хүсусијјәтләри, јә’ни әбәди гүдрәти вә илаһилији Онун јаратдыглары илә анлашылараг, ачыгҹа ҝөрүнүр. Буна ҝөрә дә [имансызлар] үзүрсүздүрләр” (Ромалылара 1:20). Јараданын әл ишләринин үзәриндә Онун мөвҹудлуғунун сүбутларыны ҝөрмәк олар. Буна ҝөрә дә Павел дејир ки, бәшәр тарихинин илк ҝүнләриндән инсанлар Аллаһы Онун јаратдыгларынын васитәсилә “анлаја” билирдиләр. Аллаһын мөвҹудлуғуна даир сүбутлары һарада ҝөрмәк олар?

8. а) Ҝөјләр Аллаһын гүввәси вә мүдриклији һаггында неҹә шаһидлик едир? б) Нәдән ҝөрүнүр ки, Каинатын Илк Сәбәби олмушдур?

⁸ Биз Аллаһын мөвҹуд олдуғуна даир сүбутлары улдузлу ҝөјләрдә ҝөрүрүк. Мәзмур 19:1 ајәсиндә дејилир: “Ҝөјләр Аллаһын иззәтини бәјан едәр”. “Ҝөјләр” — ҝүнәш, ај вә улдузлар — Аллаһын мүдриклији вә гүввәси барәдә шаһидлик едир. Тәкҹә улдузларын сајы бизи еһтирам һисси илә долдурур. Вә бүтүн бу сәмави ҹисимләр космосда низамсыз сурәтдә дејил, физики ганунлара мүвафиг олараг һәрәкәт едирләрb (Ишаја 40:26). Бу ҹүр һармонијаны кор тәсадүфә аид етмәк мүдрикликдирми? Диггәтәлајиг факт одур ки, бир чох алимләрин фикринҹә Каинатын башланғыҹы олмушдур. Бундан ирәли ҝәлән нәтиҹә барәсиндә бир профессор јазмышдыр: “Каинатын әбәди мөвҹуд олмасы барәсиндәки фикир атеистләрин вә агностикләрин үрәјинҹәдир. Лакин Каинатын башланғыҹа малик олмасы, ҝөрүнүр ки, илк сәбәбин олмасыны тәләб едир. Мәҝәр бу ҹүр нәтиҹәни кифајәт гәдәр сәбәбсиз тәсәввүр етмәк олармы?”

9. Һејванат аләми Јеһованын мүдриклијинә неҹә шаһидлик едир?

⁹ Аллаһын мөвҹудлуғунун сүбутларыны јердә дә ҝөрүрүк. Мәзмурчу нида едир: “Ја Рәбб, әмәлләрин чохдур! Һәр бирини мүдрикликлә етмисән, јаратдыгларын јер үзүнү долдуруб” (Мәзмур 104:24, МКШ). Јеһованын “јаратдыглары”, о ҹүмләдән һејванлар, Онун мүдриклијинә шаһидлик едирләр. Мәгаләнин әввәлиндә гејд олундуғу кими, тәбиәт о гәдәр ҝөзәл јарадылыб ки, алимләр чох вахт ондан техники идејалары мәнимсәјирләр. Даһа бир нечә нүмунәни нәзәрдән кечирәк. Алимләр маралын бујнузларыны тәдгиг едирләр ки, даһа мөһкәм каскалар дүзәлдә билсинләр; јахшы ешитмә габилијјәти олан милчәк нөвләрини өјрәнирләр ки, ешитмә гурғуларыны тәкмилләшдирсинләр; бајгушун ләләкләрини диггәтлә нәзәрдән кечирирләр ки, ҝөзәҝөрүнмәз тәјјарәләрин характеристикасыны тәкмилләшдирсинләр. Лакин инсан нә гәдәр чалышса да, тәбиәтдә ҝөрдүјү шаһ әсәрләри ејнилә тәкрарлаја билмәз. Бир китабда гејд олунур: “Инсанын ҹәһд ҝөстәрәрәк етмәк истәдикләрини ҹанлы тәбиәт артыг чохдан едир, лакин бу заман јанаҹаг еһтијатыны түкәндирмир, планети чиркләндирмир вә өз ҝәләҹәјини тәһлүкә алтына атмыр” (“Biomimicry—Innovation Inspired by Nature”). Бу әсл мүдрикликдир!

10. Даһи Јараданын мөвҹуд олдуғуну инкар етмәк нәјә ҝөрә мәнтигсиздир? Нүмунә әсасында изаһ един.

¹⁰ Ҝөјә вә ја јердәки варлыглардан һансына нәзәр салсаг, һәр шеј Јараданын мөвҹудлуғундан бәһс едир (Јеремја 10:12). Бурада руһани варлыгларын сөзләри илә разылашмамаг мүмкүн дејил: “Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды” (Вәһј 4:11). Лакин бир чох алимләр ҝөзләри илә ҝөрдүкләриндән һәзз алсалар да, ‘үрәкләринин ҝөзләри’ илә бүтүн бунларда Аллаһын әлини ҝөрә билмирләр (Ефеслиләрә 1:18). Белә бир нүмунә ҝәтирмәк олар: тәбиәтин ҝөзәллијиндән валеһ олмаг вә ејни заманда Даһи Јараданын мөвҹуд олдуғуну инкар етмәк, тәмиз кәтаны шаһ әсәринә чевирән рәссамын јаратдығы ҝөзәл шәкилдән зөвг алараг, онун мөвҹудлуғуну инкар етмәк гәдәр мәнтигсиздир. Аллаһа иман ҝәтирмәкдән имтина едән инсанларын “үзүрсүз” олдугларына тәәҹҹүб етмәк лазымдырмы?

“Кор башчылар” чохларыны аздырырлар

11, 12. Алын јазысы һаггындакы еһкам һансы фәрзијјәјә әсасланыр вә нәјә ҝөрә Аллаһы һөрмәтдән салыр?

¹¹ Бир чох дини инсанлар сәмими гәлбдән дүшүнүрләр ки, өз ибадәт үсуллары илә Аллаһа иззәт верирләр (Ромалылара 10:2, 3). Лакин үмуми ҝөтүрдүкдә дин, милјонларла инсанларын Аллаһа иззәт вермәсинә манечилик төрәдән бәшәр ҹәмијјәтинин тәркиб һиссәсиндән биридир. Мәҝәр бу мүмкүндүрмү? Ики нүмунәни нәзәрдән кечирәк.

¹² Биринҹиси, бу дүнјанын динләри өз тә’лимләри илә Аллаһы һөрмәтдән салырлар. Нүмунә үчүн алын јазысы һаггындакы тә’лими ҝөтүрәк. Бу еһкам она әсасланыр ки, әҝәр Аллаһ ҝәләҹәји ҝөрмәјә гадирдирсә, демәли бүтүн һадисәләрин нәтиҹәсини билир. Беләликлә, бу тә’лим ону нәзәрдә тутур ки, Аллаһ һәр бир инсанын талејини — јахшы ја пис — габагҹадан тә’јин едиб. Бу ҹүр нөгтеји-нәзәрә әсасән бу ҝүн дүнјада баш верән изтираб вә писликләрдә Аллаһ ҝүнаһкардыр. Әслиндә Аллаһын баш дүшмәни, Мүгәддәс Китабда “дүнјанын рәиси” адланан Шејтанын ҝүнаһкар олдуғу шејләрдә Аллаһы ҝүнаһландырырларса, Ону иззәтләндирмәкдән данышмаг олмаз (Јәһја 14:30; 1 Јәһја 5:19).

13. Нәјә ҝөрә Аллаһын ҝәләҹәји ҝөрмәк габилијјәтини идарә едә билмәдијини дүшүнмәк ағылсызлыг оларды? Нүмунә әсасында изаһ един.

¹³ Алын јазысы — Мүгәддәс Китабда олмајан, Аллаһа ләкә ҝәтирән тә’лимдир. Бу тә’лимдә Аллаһын едә билдикләри вә Онун, әслиндә етдикләри барәсиндәки анлајышлар долашыг дүшүр. Иш ондадыр ки, Аллаһ ҝәләҹәји ҝөрмәк габилијјәтинә маликдир, бу һагда Мүгәддәс Китабда ајдын дејилир (Ишаја 46:9, 10). Лакин Онун Өз габилијјәтини идарә едә билмәдијини вә ја бүтүн һадисәләрин ҝедишаты үчүн ҹавабдеһ олдуғуну дүшүнмәк мәнтигәујғун дејил. Ҝәлин дүшүнәк: бизләрдән ким бөјүк физики гүввәјә малик олдуғу һалда јолда гаршысына чыхан бүтүн ағырлыглары галдырарды? Әлбәт ки, һеч ким! Еләҹә дә Аллаһын ҝәләҹәји ҝөрмәк габилијјәти дә ону габағы ҝөрмәјә вә һәр шеји габагҹадан тә’јин етмәјә вадар етмир. О, габағы ҝөрмәк габилијјәтиндән мүдрикликлә, Өз гәрарына әсасән истифадә едирc. Тамамилә ајдындыр ки, алын јазысы кими јалан тә’лимләр Аллаһа иззәт ҝәтирмир.

14. Бу дүнјанын динләри һансы тәрздә Аллаһы рүсвај едир?

¹⁴ Икинҹиси, бу дүнјанын динләринин пәрәстишкарлары өз давранышлары илә Аллаһы рүсвај едирләр. Мәсиһчиләр Иса Мәсиһин тә’лимләринә риајәт етмәлидирләр. Башга шејләрлә јанашы Иса өз давамчыларына ‘бир-бирини севмәји’ вә ‘дүнјадан олмамағы’ өјрәдирди (Јәһја 15:12; 17:14-16). Бәс Христиан дүнјасынын руһаниләри һаггында нә демәк олар? Онлар бу тә’лимләрә әмәлдә риајәт едирләрми?

15. а) Руһаниләрин һәрби мүнагишәләрдәки ролу нәдән ибарәтдир? б) Руһаниләрин давранышы инсанлара неҹә тә’сир едиб?

¹⁵ Руһаниләрин һәрби мүнагишәләрдәки ролуну нәзәрдән кечирәк. Онлар мүһарибәләрә тәрәф чыхыр, онлара дәстәк верир, һәтта милләтләрин бир чох мүһарибәләринә рәһбәрлик едирдиләр. Онлар гошунлара хејир-дуа верир вә инсан өлүмүнә бәраәт газандырырдылар. Гејри-ихтијари олараг суал јараныр: “Мәҝәр онлар һеч заман дүшүнмәјибләрми ки, дүшмән тәрәфдә олан бу ҹүр каһинләр дә ејни шеји едирләр?” (“Аллаһ кимин тәрәфиндәдир?” адлы чәрчивәјә бахын.) Дин рәһбәрләри ганлы мүһарибәләрдә Аллаһын онлары дәстәкләдијини иддиа едәндә, Ону рүсвај едирләр. Онлар һәм дә Мүгәддәс Китаб нормаларыны көһнәлмиш е’лан етмәклә вә һәр нөв әхлагсызлыға ҝөз јуммагла да Аллаһы рүсвај едирләр. Буҝүнкү руһаниләр Иса Мәсиһин “һагсызлыг едәнләр” вә “кор башчылар” адландырдығы гәдим дин рәһбәрләрини неҹә дә хатырладырлар! (Матта 7:15-23; 15:14). Руһаниләрин давранышлары уҹбатындан бир чох инсанларын Аллаһа олан мәһәббәти сојујуб (Матта 24:12).

Әслиндә Аллаһа иззәти кимләр верир?

16. Әслиндә Аллаһа кимләрин иззәт вердијинә даир суалын ҹавабындан өтрү нәјә ҝөрә Мүгәддәс Китаба мүраҹиәт етмәк лазымдыр?

¹⁶ Әҝәр инсан ҹәмијјәтинин ҝөркәмли вә нүфузлу нүмајәндәләри үмумиликдә Аллаһа иззәт вермирләрсә, бәс онда буну кимләр едир? Бу суалын ҹавабы үчүн Мүгәддәс Јазылара мүраҹиәт етмәк лазымдыр. Мәнтигидир ки, Аллаһ Өзү Ону неҹә иззәтләндирмәји сечмәк һүгугуна маликдир вә Өз нөгтеји-нәзәрини Кәламы олан Мүгәддәс Китабда билдирир (Ишаја 42:8). Ҝәлин Аллаһа иззәт вермәјин үч үсулуну нәзәрдән кечирәк вә әслиндә бу ҝүн Аллаһа кимләрин иззәт вердијини мүәјјән едәк.

17. Јеһова, адынын мәдһ едилмәсинин Онун үчүн ваҹиб олдуғуну неҹә ҝөстәрди вә Аллаһын адыны бу ҝүн бүтүн дүнјада кимләр иззәтләндирир?

¹⁷ Биринҹиси, Аллаһы — Онун адыны мәдһ етмәклә иззәтләндирмәк олар. Бунун Аллаһын ирадәси олдуғуну, Јеһованын Исаја дедији сөзләриндән ҝөрмәк олар. Өлүмүнә бир нечә ҝүн галмыш Иса дуа едирди: “Еј Ата, адыны иззәтләндир!” О заман сәс ҹаваб вермишди: “Һәм иззәтләндирдим, һәм дә иззәтләндирәҹәјәм” (Јәһја 12:28). Әҝәр Јеһованын Өзү ирадәсини бу ҹүр билдирмишдирсә, ајдын олур ки, адынын иззәтләнмәси Онун үчүн ваҹибдир. Аллаһын адыны бүтүн дүнјада һәм бәјан, һәм дә мәдһ едәрәк, бу ҝүн Она иззәти верән кимләрдир? Јеһованын Шаһидләри. Онлар буну дүнјанын 235 өлкәсиндә едирләр (Мәзмур 86:11, 12).

18. Аллаһа һәгигәтән кимләрин ибадәт етдијини неҹә билмәк олар вә Мүгәддәс Китаб һәгигәтләрини јүз илдән чох мүддәт әрзиндә һансы груп инсанлар өјрәдирләр?

¹⁸ Икинҹиси, Аллаһы, башгаларына Онун һаггындакы һәгигәти өјрәтмәклә иззәтләндирмәк олар. Иса демишдир ки, һәгиги ибадәтчиләр Аллаһа ‘һәгигәтән ибадәт едәҹәкләр’ (Јәһја 4:24). Аллаһа “һәгигәтән” ибадәт едән инсанлары неҹә танымаг олар? Онлар Мүгәддәс Китаба зидд ҝедән, Аллаһ вә Онун ирадәси һаггындакы тәсәввүрләри тәһриф едән тә’лимләри рәдд етмәлидирләр. Бунун әвәзинә Аллаһын Кәламында олан тәмиз һәгигәтләри, о ҹүмләдән Јеһованын Һагг-Тәала мөвгејинә ҝөрә иззәтә лајиг олдуғуну (Мәзмур 83:18); Иса Мәсиһин Јеһованын оғлу вә Аллаһын Хиласкар Падшаһлығынын тә’јин олунмуш Рәһбәри олдуғуну (1 Коринфлиләрә 15:27, 28); Аллаһын Падшаһлығынын Јеһованын адыны мүгәддәс едәҹәјини вә Онун јерә вә инсанлара даир нијјәтини һәјата кечирәҹәјини (Матта 6:9, 10); Падшаһлыг һаггындакы бу хош хәбәрин бүтүн дүнјада тәблиғ едилмәли олдуғуну өјрәтмәлидирләр (Матта 24:14). Артыг јүз илдән чохдур ки, бу гијмәтли һәгигәтләри сәдагәтлә өјрәдән бир груп инсанлар вар ки, бу да Јеһованын Шаһидләридир.

19, 20. а) Мәсиһчинин нүмунәви давранышы Јеһованы нәјә ҝөрә иззәтләндирә биләр? б) Аллаһы јахшы давранышлары илә кимләрин иззәтләндирдијини мүәјјән етмәкдә һансы суаллар көмәк едә биләр?

¹⁹ Үчүнҹүсү, Јеһованы, Онун нормаларына мүвафиг јашамагла иззәтләндирмәк олар. Һәвари Петер јазырды: “Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12). Мәсиһчинин давранышы онун иманыны әкс етдирир. Әтрафдакылар бу әлагәни — мәсиһчинин јахшы давранышынын онун иманынын бәһрәси олдуғуну ҝөрәндә, бу, Аллаһа иззәт ҝәтирир.

²⁰ Бу ҝүн Аллаһы јахшы давранышы илә кимләр иззәтләндирир? Мәсәлән, бир чох өлкәләрдә һаким даирәләр һансы динин нүмајәндәләрини сүлһпәрвәр, гануна итаәткар вә нүмунәви верҝи өдәјәнләр кими тә’рифләјирләр? (Ромалылара 13:1, 3, 6, 7). Бүтүн дүнјада ирги, милли вә етник манеәләри дәф едән бирликләри илә кимләр мәшһурдурлар? (Мәзмур 133:1; Һәвариләрин ишләри 10:34, 35). Бүтүн дүнја үзрә һансы груп инсанлар ганунлара, аилә дәјәрләринә вә Мүгәддәс Китабын әхлаг нормаларына һөрмәтлә јанашмаға тәшвиг едән, Мүгәддәс Китабын маарифләндириҹи фәалијјәти илә танынырлар? Давранышлары бу вә ја диҝәр саһәләрдә өзү-өзүнә шаһидлик едән јалныз бир груп вардыр ки, бу да Јеһованын Шаһидләридир!

Сән Аллаһа иззәт верирсәнми?

21. Нәјә ҝөрә бизләрдән һәр биримиз Аллаһа иззәт вериб-вермәдији үзәриндә дүшүнмәлидир?

²¹ Бизләрдән һәр биримиз өзүмүздән сорушмалыјыг: “Шәхсән мән Јеһоваја иззәт верирәмми?” 148-ҹи Мәзмурдан ҝөрүндүјү кими, јарадылан варлыгларын демәк олар ки, һамысы Аллаһа иззәт верир. Мәләкләр, ҝөјләр, јер вә ону тәшкил едән һејванлар — онларын һамысы Јеһоваја иззәт верир (1-дән 10-а кими ајәләр). Чох һејиф ки, буну инсанларын чоху етмирләр! Аллаһа һәјатымызла иззәт вермәјә чалышараг, биз бүтүн варлыглара гошулур вә Јеһоваја бирҝә һәмд едирик (11-дән 13-ә кими ајәләр). Һәјатымызы бундан јахшы гурмағын үсулу мөвҹуд дејил.

22. Аллаһа иззәт верәнләр һансы хејир-дуалары алырлар вә нәјә гәти гәрарлы олмаг лазымдыр?

²² Аллаһа иззәт верәнләр чохлу хејир-дуалар алырлар. Мәсиһин фидијә гурбанлығына иман ҝәтирәрәк биз Аллаһла, сәмави Атамызла барышыр вә Онунла, бизә хејир-дуа вә севинҹ ҝәтирән сәмими мүнасибәтләр инкишаф етдиририк (Ромалылара 5:10). Әҝәр Аллаһын иззәтә лајиг олмасы үзәриндә дүшүнсәк, үрәјимиз севинҹлә вә Она миннәтдарлыг һисси илә долаҹаг (Јеремја 31:12). Белә олан һалда бизим башгаларына да хошбәхт, мә’налы һәјат сүрмәјә көмәк етмәкдә гүввәмиз олаҹаг вә бундан даһа да хошбәхт олаҹағыг (Һәвариләрин ишләри 20:35). Сиз дә Аллаһа һәм инди, һәм дә әбәдијјән иззәт вермәјә гәти гәрарлы олан кәсләрин арасында олун!

[Һашијәләр]

Хатырлајырсынызмы?

• Нәјә ҝөрә демәк олар ки, алимләр үмумиликдә инсанлара Аллаһа иззәт вермәкдә көмәк етмирләр?

• Дүнјанын динләри һансы ики мә’нада инсанлара Аллаһа иззәт вермәкдә манечилик төрәдирләр?

• Аллаһы неҹә иззәтләндирмәк олар?

• Бизләрдән һәр биримиз Јеһоваја иззәт вериб-вермәдији үзәриндә нәјә ҝөрә дүшүнмәлијик?

[21-ҹи сәһифәдәки чәрчивә]

“Аллаһ кимин тәрәфиндәдир?”

Икинҹи Дүнја мүһарибәси заманы Алманијанын һәрби һава гүввәләриндә хидмәт едән, сонрадан исә Јеһованын Шаһиди олан бир киши хатырлајыр:

“Бүтүн бу мүһарибә илләриндә демәк олар ки, бүтүн динләрин — католикләрин, лүтеранларын, англиканларын вә башга динләрин руһаниләринин тәјјарәләрә вә онларын екипажларына мәһведиҹи јүкләрини атмаға ҝетмәздән әввәл хејир-дуа вердикләрини ҝөрәндә нараһат олурдум. Чох вахт дүшүнүрдүм: “Аллаһ кимин тәрәфиндәдир?”

Алман әсҝәрләри тоггасында “Gott mit uns” (“Аллаһ бизимләдир”) сөзләри јазылан кәмәр ҝәздирсәләр дә, мән өзүмдән, “нәјә ҝөрә Аллаһ әкс тәрәфдә олуб, һәмән динә мәнсуб олан вә һәмән Аллаһа дуа едән әсҝәрләрлә олмасын?” — дејә сорушурдум”.