“Бир-биринизи шәфгәтлә севин”

“Гардашлыг севҝиси илә бир-биринизи шәфгәтлә севин” (РОМАЛЫЛАРА 12:10).

1, 2. Мүасир дөврдә јашајан миссионерин вә һәвари Павелин гардашларла һансы мүнасибәтләри варды?

УЗАГ Шәргдә 43 ил миссионер хидмәтиндә чалышан Дону меһрибанлығына вә хејирхаһлығына ҝөрә чох севирдиләр. Дон өлүмҹүл хәстәлијә тутуланда, онун Мүгәддәс Китаб һәгигәтләрини өјрәтдији кәсләр мин километрләрлә узаглардан онун јанына “камсаһамнида, камсаһамнида!” демәјә ҝәлирдиләр ки, бу да Кореја дилиндә “чох сағ ол, чох сағ ол!” демәкдир. Донун тәзаһүр етдирдији шәфгәт һисси онларын үрәјинә дәрин тә’сир бағышламышдыр.

² Мәсиһчиләр арасында Дон кими адамлар аз дејил. Ерамызын Ы әсриндә һәвари Павел инсанларла чох шәфгәтли иди. Павел онлара фәдакарлыгла хидмәт едирди. Павел өз әгидәсиндә мөһкәм олса да, “ушагларыны әмиздириб әзизләјән ана кими” мүлајим вә гајғыкеш олараг галырды. О, Салоник шәһәриндәки јығынҹаға јазырды: “Үрәкдән сизин һәсрәтинизи чәкән бизләр, сизә јалныз Аллаһын Мүждәсини дејил, өз ҹанларымызы да вермәк истәдик. Чүнки сиз бизим үчүн чох әзиз олдунуз” (1 Салониклиләрә 2:7, 8, И–93). Бир гәдәр сонрадан, Павел Ефес шәһәриндәки гардашлара бир даһа ҝөрүшмәјәҹәкләрини сөјләјәндә, “һамы чох ағлады вә Павелин бојнуна сарылыб, ону өпүрдүләр” (Һәвариләрин ишләри 20:25, 37). Ајдындыр ки, Павеллә бу гардашларын арасында мүштәрәк олан јалныз иманлары дејилди. Онлар бир-бирләринә шәфгәт һисси бәсләјирдиләр.

Шәфгәт вә мәһәббәт

3. Мүгәддәс Китабда шәфгәт һисси вә мәһәббәт бир-бири илә неҹә бағлыдыр?

³ Мүгәддәс Јазыларда шәфгәт вә мәрһәмәт ҝөстәрмәк, мәсиһчи шәхсијјәтинин ән јүксәк кејфијјәти олан мәһәббәтлә сых бағлыдыр (1 Салониклиләрә 2:8; 2 Петер 1:7). Бу илаһи кејфијјәтләрин һамысы ҝөзәл алмаза бәнзәр сурәтдә бир-бирини таразлајыр вә тамамлајыр. Бу кејфијјәтләр мәсиһчиләри јалныз өз араларында дејил, һәм дә сәмави Аталары илә јахынлашдырыр. Буна ҝөрә дә һәвари Павел һәмиманлыларыны тәшвиг едирди: “Гој мәһәббәт ријасыз олсун; [...] Гардашлыг севҝиси илә бир-биринизи шәфгәтлә севин” (Ромалылара 12:9, 10).

4. “Шәфгәт” ифадәси һансы мә’наны дашыјыр?

⁴ Павелин “шәфгәт” кими истифадә етдији јунан сөзү ики һиссәдән ибарәтдир: “достлуг мәһәббәти” вә “гоһумлуг һиссләри”. Мүгәддәс Китаб үзрә бир алимин изаһ етдији кими, бу о демәкдир ки, мәсиһчиләр “мәһәббәт, һәмрә’јлик вә гаршылыглы јардым руһунун һөкм сүрдүјү аиләдәки кими бир-биринә сых бағлылыгла фәргләнмәлидирләр”. Сән мәсиһчи баҹы-гардашларына бу һисси бәсләјирсәнми? Ахы меһрибанлыг вә гоһумлуг һисси бүтүн мәсиһчи јығынҹағыны әһатә етмәлидир (Галатијалылара 6:10). Бир тәрҹүмәдә Ромалылара 12:10 ајәси белә верилир: “Бир-биринизи гардашлар кими үрәкдән севин” (Кузнетсова В. Н.). Бәли, мәсиһчиләр арасындакы мәһәббәт садәҹә мәнтиг вә борҹ һиссиндән даһа чох мә’на кәсб едир. Мүгәддәс Китаб бизи “гардашлар үчүн ријасыз мәһәббәтә” саһиб олмаға сәсләмәклә јанашы, ‘бир-биримизи вар гүввә илә сәмими гәлбдән севмәјә’ тәшвиг едир (1 Петер 1:22).

“Аллаһ сизә бир-биринизи севмәји өјрәтмишдир”

5, 6. а) Бејнәлхалг конгресләрин васитәсилә Јеһова Өз халгына мәсиһчи мәһәббәтини неҹә өјрәдир? б) Вахт өтдүкҹә гардашлар арасындакы достлуг телләри неҹә мөһкәмләнир?

⁵ Бу дүнјада ‘чохларынын севҝиси сојуса да’ Јеһова Өз халгына ‘бир-бирини севмәји өјрәдир’ (Матта 24:12; 1 Салониклиләрә 4:9). Јеһованын Шаһидләринин бејнәлхалг конгресләри бу ҹүр мәһәббәти тәзаһүр етдирмәји өјрәнмәјә ҝөзәл шәраит јарадыр. Бу конгресләрдә Шаһидләр узаг өлкәләрдән олан гардашлары илә таныш олур, бир чохлары исә әҹнәби нүмајәндәләри өз евләриндә гәбул едирләр. Бу јахынларда кечирилән конгресләрдән биринә ҝәлән гардашларын вәтәниндә инсанлар адәтән өз һиссләрини тәзаһүр етдирмәкдән еһтијат едирләр. Нүмајәндәләри мәнзилләрә јерләшдирмәкдә көмәк едән мәсиһчи данышыр: “Бу нүмајәндәләр јени ҝәләндә чох нараһат вә утанҹаг идиләр. Лакин ҹәми алты ҝүндән сонра видалашмаг вахты ҝәлиб-чатанда, ев саһибләри вә гонаглар гуҹаглашыб ағлајырдылар. Онлар мәсиһчи мәһәббәтинин һәрарәти илә әһатә олунмушдулар. Бу исә һеч заман унудулмур”. Мәдәнијјәтләринин сәҹијјәви ҹәһәтләриндән асылы олмајараг, гардашлара ҝөстәрилән гонагпәрвәрлик һәм гонагларын, һәм дә ев саһибләринин ҝөзәл тәрәфләрини тәзаһүр етдирир (Ромалылара 12:13).

⁶ Конгресләрдән ҝәтирилән нүмунәләр һәгигәтән дә тә’сир бағышлајыр. Мәсиһчиләр Јеһоваја бир јердә хидмәт едәндә исә, онларын арасында даһа сых телләр јараныр. Гардашларымызы јахшы танымагла, онларын ҹәлбедиҹи кејфијјәтләрини — дүзҝүнлүјү, е’тибарлылығы, садиглији, хејирхаһлығы, әлиачыглығы, еһтијатлылығы, шәфгәтлилији вә тәмәннасызлығы даһа чох гијмәтләндирмәјә башлајырыг (Мәзмур 15:3-5; Сүлејманын мәсәлләри 19:22). Шәрги Африкада миссионер хидмәтиндә олан Марк демишдир: “Гардашларымызла чијин-чијинә хидмәт едәндә, мөһкәм достлуг телләри јараныр”.

7. Јығынҹагда достлуг телләриндән зөвг алмаг үчүн биздән нә тәләб олунур?

⁷ Јығынҹагда достлуг телләринин јаранмасы вә мөһкәмләнмәси үчүн, јығынҹағын үзвләри бир-бири илә јахынлашмалыдырлар. Биз мүнтәзәм олараг мәсиһчи ҝөрүшләринә ҝәлдијимиз заман баҹы-гардашларымыза јахын олуруг. Биз јығынҹаға ҝәлмәклә, програмда иштирак етмәклә, һәмчинин ҝөрүшдән әввәл вә сонра үнсијјәт етмәклә бир-биримизи руһландырыр, һәм дә “мәһәббәтә вә хејирли ишләрә” тәшвиг едирик (Ибраниләрә 10:24, 25). Бирләшмиш Штатлардан бир ағсаггал дејир: “Мән өз ушаглығымы севинҹлә јада салырам. Достҹасына вә сәмими үнсијјәт бизим о гәдәр чох хошумуза ҝәлирди ки, аиләмиз һәмишә Падшаһлыг Залыны ахырынҹы тәрк едәнләрдән бири олурду”.

‘Үрәјини ҝенишләндирмәјә’ еһтијаҹ дујурсанмы?

8. а) Коринфлиләри ‘үрәкләрини ҝенишләндирмәјә’ тәшвиг етмәклә Павел нәји нәзәрдә тутурду? б) Јығынҹагда шәфгәт һиссини неҹә инкишаф етдирә биләрик?

⁸ Гардашсевәрлијимизи там дәрәҹәдә тәзаһүр етдирмәк үчүн, јәгин ки, биз ‘үрәјимизи ҝенишләндирмәлијик’. Павел Коринфдәки јығынҹаға јазырды: “Үрәјимиз ҝенишләнмишдир. Биз сиздән севҝи әсирҝәмирик”. Һәвари коринфлиләри гаршылыглы олараг ‘үрәкләрини ҝенишләндирмәјә’ тәшвиг едирди (2 Коринфлиләрә 6:11-13, И–93). Сән дә шәфгәт һиссини тәзаһүр етдирмәкдә ‘үрәјини ҝенишләндирә’ биләрсәнми? Биринҹи олараг башгаларынын аддым атмасыны ҝөзләмәк лазым дејил. Ромалылара мәктубунда Павел шәфгәт һиссиндән данышаркән белә бир мәсләһәт вермишдир: “Бир-биринизи һөрмәтдә габаглајын” (Ромалылара 12:10). Биз јығынҹагда баҹы-гардашлара биринҹи јахынлашмагла вә саламламагла онлары һөрмәтдә габагламыш олуруг. Һәм дә онлары хидмәтә дә’вәт етмәк вә ја ҝөрүшә бирликдә һазырлашмағы тәклиф етмәк олар. Бу ҹүр давранмагла биз јығынҹагда шәфгәт һиссини инкишаф етдиририк.

9. Баҹы-гардашларла јахынлашмаг үчүн бә’зиләри нә едирләр? (Ҹаваба өз нүмунәләринизи дахил един.)

⁹ Баҹы вә гардашлар, һәмчинин аиләләр бир-бирини гонаг чағырмагла, чај сүфрәсинә топлашмагла вә бирликдә һансыса хош вә фајдалы бир ишлә мәшғул олмагла ‘үрәкләрини ҝенишләндирә’ биләрләр (Лука 10:42; 14:12-14). Алекс һәрдәнбир кичик груплар топлајараг тәбиәти сејрә чыхыр. О дејир: “Һәм ҝәнҹ, һәм дә јашлы баҹы-гардашлар, о ҹүмләдән ушагларыны тәнһа тәрбијә едән валидејнләр топлашыр. Бу ҝөрүшләр бизә хош тәәссүрат бағышлајыр, һәм дә өзүмүзү бир-биримизә јахын һисс едирик”. Биз мәсиһчиләр јалныз һәмиманлы олмаға дејил, һәм дә әсл достлар олмаға чалышмалыјыг (3 Јәһја 14).

10. Әҝәр киминләсә мүнасибәтләримиз ҝәрҝиндирсә, нә едә биләрик?

¹⁰ Лакин бә’зән гејри-камиллијимиз уҹбатындан киминләсә јахын достлуг мүнасибәтләрини инкишаф етдирмәк чәтиндир. Белә һалда нә едә биләрик? Илк әввәл гардашларла јола ҝедә билмәјимиз үчүн Јеһоваја дуа едә биләрик. Аллаһ хидмәтчиләринин сүлһ ичиндә јашамаларыны истәдији үчүн бизим сәмими дуаларымыза ҹаваб верәҹәк (1 Јәһја 4:20, 21; 5:14, 15). Һәм дә дуаларымыза мүвафиг олараг давранмалыјыг. Шәрги Африкада сәјјар хидмәтдә чалышан Рик, хасијјәтинин чох ағыр олдуғуна ҝөрә јола ҝетмәк чәтин олан гардаш һаггында данышды. Рик хатырлајыр: “Һәмин гардашдан узаглашмаг әвәзинә, мән онунла јахындан таныш олмаг гәрарына ҝәлдим. Мә’лум олду ки, онун атасы чох сәрт адам олуб. Кејфијјәтләри илә неҹә мүбаризә апардығыны дәрк едәндә вә артыг һансы наилијјәтләр әлдә етдијини ҝөрәндә мән она һејран олдум. Биз јахшы достлар олдуг” (1 Петер 4:8).

Үрәјини башгалары үчүн ач!

11. а) Јығынҹагда шәфгәт һиссини инкишаф етдирмәк үчүн нә етмәк лазымдыр? б) Нәјә ҝөрә башгаларындан ајрылмаг руһани ҹәһәтдән тәһлүкәлидир?

¹¹ Бу ҝүн бир чох инсанлар әсл достлуғун нә демәк олдуғуну билмәдән јашајырлар. Неҹә дә кәдәрлидир! Мәсиһчи јығынҹағында белә олмамалыдыр. Әсл гардашсевәрлик ади нәзакәтли сөһбәт вә әдәбли давраныш тәрзи демәк дејил. Һәддиндән артыг емосијалар да шәфгәт һиссинин тәзаһүрү дејил. Даһа доғрусу, Павел өз үрәјини коринфлиләрә ачдығы кими, биздә дә үрәјимизи баҹы-гардашларымыза ачмаг истәји олмалыдыр. Онлар ҝөрмәлидирләр ки, биз, онларын башына ҝәләнләрә е’тинасыз јанашмырыг. Хасијјәтҹә гајнајыб-гарышан вә ја сөһбәтҹил олмасаг да, өзүмүзә гапылмаг тәһлүкәлидир. Мүгәддәс Китаб хәбәрдарлыг едир: “Тәнһалығы севән нијјәтинин ардынҹа дүшүр, сағлам шүура зидд ҝедир” (Сүлејманын мәсәлләри 18:1, МКШ).

12. Јығынҹагда јахын мүнасибәтләрин олмасы үчүн нәјә ҝөрә сәмими үнсијјәт чох ваҹибдир?

¹² Сәмими үнсијјәт һәгиги достлуғун тәмәлидир (Јәһја 15:15). Биз һамымыз, мәхфи фикирләримизи вә һиссләримизи е’тибар едә биләҹәјимиз достлара еһтијаҹ дујуруг. Бир-биримизлә нә гәдәр јахындан таныш олуругса, бир-биримизә көмәк етмәк дә бир о гәдәр асандыр. Бир-биримизә бу ҹүр гајғы ҝөстәрмәклә шәфгәт һиссини инкишаф етдирир вә Исанын сөзләринин доғрулуғуна әмин олуруг: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35; Филипилиләрә 2:1-4).

13. Гардашларымызы һәгигәтән севдијимизи неҹә ҝөстәрә биләрик?

¹³ Башгалары бизим мәһәббәтимизи һисс етсинләр дејә, ону тәзаһүр етдирмәк лазымдыр (Сүлејманын мәсәлләри 27:5). Шәфгәт һисси сәмими сурәтдә тәзаһүр олунанда, бизим үзүмүз буну әкс етдирәҹәк вә инсанларын үрәји мәһәббәтимизә һај верәҹәк. Мүдрик бир инсан јазмышдыр: “Нурлу ҝөзләр гәлби севиндирәр” (Сүлејманын мәсәлләри 15:30, МКШ). Гајғыкешлик дә шәфгәт һиссини инкишаф етдирир. Әсл достлуғу сатын алмаг мүмкүн олмаса да, сәмими гәлбдән верилән һәдијјә чох мә’на кәсб едә биләр. Шәфгәт һиссини открытка, мәктуб вә ја “јериндә дејилән сөзләр” васитәсилә ифадә етмәк олар (Сүлејманын мәсәлләри 25:11, МКШ; 27:9). Әлдә едилмиш достлуғу даима тәмәннасыз мәһәббәтлә гидаландырмаг лазымдыр. Хүсусилә дә чәтин дәгигәләрдә достларымыз үчүн дајаг олмағымыз ваҹибдир. Мүгәддәс Китаб дејир: “Дост һәр вахт севәр; вә сыхынты үчүн гардаш доғулмушдур” (Сүлејманын мәсәлләри 17:17).

14. Әҝәр ким исә бизим шәфгәт һиссимизә ҹаваб вермирсә, нә едә биләрик?

¹⁴ Доғрудур ки, јығынҹагда һамы илә јахын достлуг инкишаф етдирмәк мүмкүн дејил. Еһтимал ки, киминләсә даһа јахын мүнасибәтләримиз олаҹаг. Буна ҝөрә дә әҝәр сәнә елә ҝәлсә ки, ким исә сәнинлә лазыми гәдәр меһрибан дејил, ја сәнә, ја да һәмән адама нә исә олдуғуна даир гәрар вермәјә тәләсмә. Һәмин адамы сәнинлә јахындан дост олмаға мәҹбур етмәјә чалышма. Садәҹә олараг онунла јол вердији гәдәр меһрибан ол. Белә давранмагла һәмишә јахын мүнасибәтләр үчүн ачыг олдуғуну ҝөстәрәҹәксән.

“Сәндән чох мәмнунам!”

15. Тә’рифин олуб-олмамасы инсана неҹә тә’сир едир?

¹⁵ Еһтимал ки, Иса вәфтиз олундуғу заман ҝөјдән, “Сәндән чох мәмнунам” сөзләрини ешитдијинә ҝөрә чох севинмишди! (Марк 1:11). Шүбһәсиз ки, бу сөзләр, Атасынын ону севдијинә даир Исанын әминлијини даһа да ҝүҹләндирди (Јәһја 5:20). Тәәссүф ки, бә’зи кәсләр һөрмәт етдикләри вә севдикләри адамлардан бу ҹүр хош сөзләри ешитмирләр. Енн дејир: “Мәним кими, јығынҹагдакы чох ҝәнҹләрин валидејнләри һәгигәтдә дејил. Евдә биз јалныз тәнгид ешидирик. Бу бизи чох кәдәрләндирир”. Бу ҹүр ҝәнҹләр јығынҹаға ҝәләндә, онлар үчүн севән аиләнин үзвләринә чеврилән руһани аталарын, аналарын, гардаш вә баҹыларын севҝи вә гајғыларыны һисс едирләр (Марк 10:29, 30; Галатијалылара 6:10).

16. Башгаларына гаршы тәнгиди мүнасибәт тәзаһүр етдирмәк нәјә ҝөрә фајда ҝәтирмир?

¹⁶ Бә’зи мәдәнијјәтләрдә, ушагларын тәкәббүрлү вә мәғрур олаҹагларындан еһтијат едәрәк, валидејнләр, јашлы кәсләр вә мүәллимләр ҝәнҹләри надир һалда сәмими гәлбдән тә’рифләјирләр. Бу кими фикирләр һәтта мәсиһчи аиләләринә вә јығынҹағына да дахил ола биләр. Ҝәнҹләрдән киминсә чыхышы барәдә фикирләрини сөјләјәрәк бөјүкләр белә дејә биләр: “Пис дејил, амма даһа да јахшы етмәк оларды”. Вә ја өз наразылыгларыны башга ҹүр билдирә биләрләр. Онларын фикринҹә, белә етмәклә ҝәнҹләри бүтүн потенсиалларыны истифадә етмәјә тәшвиг едирләр. Лакин бу ҹүр мүнасибәт чох вахт әкс нәтиҹә верир. Ушаглар өзләринә гапылыр вә ја бөјүкләрин үмидләрини доғрултмаг үчүн аҹиз олдугларыны һисс едирләр.

17. Нәјә ҝөрә башгаларыны тә’рифләмәк үчүн имканлар ахтармалыјыг?

¹⁷ Лакин јалныз мәсләһәт вермәјә һазырлашаркән тә’рифләмәк лазым дејил. Үрәкдән ҝәлән тә’риф аиләдәки вә јығынҹагдакы мүнасибәтләри меһрибан вә сәмими едир. Ҝәнҹләри тәҹрүбәли баҹы-гардашларла мәсләһәтләшмәјә тәшвиг едир. Буна ҝөрә дә јерли адәт-ән’әнәләрин тә’сири алтына дүшәрәк онларын башгаларына мүнасибәтинизә даир ҝөстәриш вермәсинә јол вермәјин, бунун әвәзинә “Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинин”. Ҝәлин, Јеһованын етдији кими, биз дә башгаларыны тә’рифләјәк (Ефеслиләрә 4:24).

18. а) Сиз ҝәнҹләр бөјүкләрин вердији мәсләһәтә неҹә јанашмалысыныз? б) Нәјә ҝөрә бөјүкләр мәсләһәт вермәк үчүн јахшы-јахшы ҝөтүр-гој едирләр?

¹⁸ Сиз ҝәнҹләр исә, бөјүкләр сизә дүзәлиш вә ја мәсләһәт верәндә, онларын сиздән разы галмадыгларыны дүшүнмәјә тәләсмәјин (Ваиз 7:9). Бу белә дејил! Чох ҝүман ки, онлары һәрәкәтә ҝәтирән сизә олан мәһәббәт вә гајғыларыдыр. Әкс тәгдирдә, онлар сизә мәсләһәтлә јахынлашмаг үчүн нәјә ҝөрә вахт вә гүввә сәрф едирләр? Сөзләрин һансы гүввәјә малик олдуғуну биләрәк бөјүкләр — хүсусилә дә јығынҹағын ағсаггаллары — мәсләһәт вермәздән әввәл адәтән һәр шеји јахшы-јахшы ҝөтүр-гој едир вә дуа едирләр, чүнки онлар сизин анҹаг јахшылығынызы истәјирләр (1 Петер 5:5).

“Рәбб чох шәфгәтлидир”

19. Нәјә ҝөрә гәлб ағрысы јашајанлар Јеһованын јардымына үмид едә биләр?

¹⁹ Шәфгәт һиссини тәзаһүр етдирәркән хошаҝәлмәз һалла гаршылашан кәс нөвбәти дәфә бу ҹүр һалла гаршылашмагдан еһтијат едиб өзүнә гапыла биләр. Јенидән өз үрәјини башгаларына ача билсин дејә, она ҹәсарәт вә мөһкәм иман лазымдыр. Лакин һәмишә хатырламаг лазымдыр ки, Јеһова “һеч биримиздән узаг дејил”. О бизи, Она јахынлашмаға дә’вәт едир (Һәвариләрин ишләри 17:27; Јагуб 4:8). О, һәм дә баша дүшүр ки, биз јени гәлб ағрысындан горхуруг, буна ҝөрә дә бизи мүдафиә едәҹәјинә, һәм дә дәстәкләјәҹәјинә даир вә’д верир. Мәзмурчу Давуд бизи әмин едир: “Рәбб үрәји гырыг оланлара јахындыр вә руһу әзилмиш оланлары гуртарар” (Мәзмур 34:18).

20, 21. а) Һарадан мә’лумдур ки, биз Јеһова илә јахын мүнасибәтләрә малик ола биләрик? б) Јеһова илә достлуг ахтаранлардан нә тәләб олунур?

²⁰ Јеһова илә чох јахын достлуг, һәјатымызда ола биләҹәк ән гијмәтли шејдир. Бәс бу ҹүр достлуғу јаратмаг мүмкүндүрмү? Бәли. Мүгәддәс Китабда сәмави Аталары илә чох јахын мүнасибәтдә олан салеһ киши вә гадынлар һаггында данышылыр. Онларын гәдим дөврдән бизә ҝәлиб чатан сәмими сөзләрини охудугҹа әмин олуруг ки, биз дә Јеһоваја јахынлаша биләрик (Мәзмурлар 23, 34, 139; Јәһја 16:27; Ромалылара 15:4).

²¹ Аллаһла достлуг мүмкүн олмајан бир шеји тәләб етмир. Давуд сорушурду: “Ја Рәбб, чадырында ким галаҹаг? Мүгәддәс дағында ким отураҹаг? Камал илә јеријән вә салеһ иш ҝөрән вә үрәјиндән һәгигәти сөјләјән” (Мәзмур 15:1, 2). Аллаһа хидмәтин ҝәтирдији хош бәһрәләри вә Онун бизә вердији рәһбәрлик вә мүдафиәни ҝөрдүкҹә баша дүшүрүк ки, “Рәбб [Јеһова] чох шәфгәтлидир” (Јагуб 5:11).

22. Бизим Јеһова илә вә бир-биримизлә һансы мүнасибәтләримиз олмалыдыр?

²² Јеһованын гејри-камил инсанларла достлуг етмәк истәмәси неҹә дә бөјүк хејир-дуадыр! Белә исә биз дә бир-биримизә шәфгәт һисси бәсләмәли дејиликми? Јеһованын көмәклији илә бизләрдән һәр биримиз шәфгәт һиссини тәзаһүр етдирә вә ону өз үзәримиздә һисс едә биләрик, ахы мәһз бу кејфијјәтләр бизим мәсиһчи гардашлығымызын фәргләндириҹи ҹәһәтидир. Аллаһын Падшаһлығынын рәһбәрлији алтында исә, јер үзүндә јашајан бүтүн инсанлар бир-биринә бу һисси бәсләјәҹәкләр.

Изаһ едә биләрсинизми?

• Мәсиһчи јығынҹағында һансы һиссләр һөкм сүрмәлидир?

• Бизләрдән һәр биримиз јығынҹагда шәфгәт һиссини неҹә инкишаф етдирә биләр?

• Сәмими тә’риф мәсиһчиләри неҹә јахынлашдырыр?

• Јеһованын шәфгәт һисси бизи неҹә мөһкәмләндирир вә дәстәкләјир?

[25-ҹи сәһифәдәки шәкил]

Мәсиһчиләр арасындакы мәһәббәт ади борҹ һисси дејил.