Јеһова писләрә даир олан һөкмүнү јеринә јетирәҹәк
«Аллаһынызы гаршыламаға һазыр олун» (АМОС 4:12).
1, 2. Јеһованын пислијә сон гојаҹағына нәјә ҝөрә әмин ола биләрик?
ЈЕҺОВА јер үзүндәки пислик вә изтираблара нә вахтса сон гојаҹагмы? Бу ҝүн, ХХI әсрин башланғыҹында, бу суал һәмишәкиндән даһа бөјүк мә’на кәсб едир. Адама елә ҝәлир ки, амансызлыг һәр јердә баш алыб ҝедир. Инсанлар гәддарлыгдан, терроризмдән вә рүшвәтхорлугдан азад бир дүнјанын һәсрәтиндәдирләр!
2 Хошбәхтликдән, Јеһованын пислијә сон гојаҹағына инанмаг үчүн там әсасымыз вар. Аллаһын ҝөзәл хүсусијјәтләри һаггында билмәјимиз, Онун писләрә гаршы тәдбирләр ҝөрәҹәјинә әминлијимизи артырыр. Јеһова һагг-әдаләт Аллаһыдыр. Онун Кәламында Мәзмур 33:5 ајәсиндә дејилир: «Рәбб салеһлији вә әдаләти севир». Башга мәзмур исә бизи әмин едир: «[Јеһова] писә, зүлмкараса нифрәт едир» (Мәзмур 11:5). Әлбәттә ки, салеһлији вә әдаләти севән Гадир Јеһова Аллаһ нифрәт етдији шејләрә әбәдијјән сәбир етмәјәҹәк.
3. Амосун пејғәмбәрлијини нәзәрдән кечирдикҹә нәји өјрәнәҹәјик?
3 Јеһованын пислији мәһв едәҹәјинә әмин олмаг үчүн даһа бир әсасымыз вар. Онун кечмишдә ҝөрдүјү ишләр буна зәманәт верир. «Амос» китабында Јеһованын писләрлә неҹә даврандығына даир парлаг нүмунәләр тапмаг олар. Амосун пејғәмбәрлијини нәзәрдән кечирмәклә өјрәнәҹәјик ки, Аллаһын ҹәзасы үч сәҹијјәви хүсусијјәтә маликдир. Биринҹиси, Аллаһ һәмишә һаглы олараг ҹәзаландырыр. Икинҹиси, Онун ҹәзасы гачылмаздыр. Үчүнҹүсү исә, Онун ҹәзасы сечиҹидир, јә’ни Јеһова писләрин үзәриндә һөкмүнү јеринә јетирир, амма дүзҝүн әһвал-руһијјәли үрәјә малик олуб, төвбә едән инсанлара мәрһәмәт ҝөстәрир (Ромалылара 9:17-26).
Аллаһ һәмишә һаглы олараг ҹәзаландырыр
4. Јеһова Амосу һараја вә нә нәјә ҝөрә ҝөндәрмишди?
4 Амосун ҝүнләриндә гәдим Исраил артыг ики падшаһлыға бөлүнмүшдү. Бунларын бири Јәһуданын икигәбиләли ҹәнуб падшаһлығы, диҝәри исә Исраилин онгәбиләли шимал падшаһлығы иди. Јеһова Амоса пејғәмбәрлик етмәк тапшырығыны вериб, ону јашадығы Јәһуда торпағындан Исраилә ҝөндәрмишди. Орада Амос Аллаһын һөкмүнү бәјан етмәли иди.
5. Амос әввәлҹә һансы дөвләтләрә гаршы пејғәмбәрлик етди вә онлар һансы сәбәбә ҝөрә Аллаһын ҹәзасына лајиг идиләр?
5 Амос өз хидмәтини Исраилин инадҹыл шимал падшаһлығы үзәриндә Јеһованын һөкмүнү е’лан етмәклә башламыр. Әввәлҹә о, Аллаһын һөкмүнү гоншулугда јерләшән алты дөвләтә гаршы е’лан едир. Бу дөвләтләр Арам, Филишт, Сур, Едом, Аммон вә Моав иди. Бу дөвләтләр һәгигәтәнми ҹәзаја лајиг идиләр? Шүбһәсиз. Онлары үмуми бир шеј бирләшдирирди: онлар Јеһованын халгынын гәддар дүшмәни идиләр.
6. Јеһова нәјә ҝөрә е’лан едир ки, Арамын, Филиштин вә Сурун үзәринә фәлакәт ҝәтирәҹәкдир?
6 Мәсәлән, Јеһова арамлылара гаршы «Ҝилеады... вәлләрлә» дөјдүкләри үчүн һөкм чыхармышды (Амос 1:3). Арамлылар Ҝилеад әразисинин бир һиссәсини — Иордан чајынын шәргиндә јерләшән вилајәти — зәбт едиб, Аллаһын орада јашајан халгыны бәрк сыхышдырырдылар. Бәс Филишт вә Сур һаггында нә демәк олар? Филиштлиләрин дә ҝүнаһы онда иди ки, исраиллиләри әсир ҝөтүрүб едомлулара сатырдылар вә бә’зи исраиллиләр сурлу гул алверчиләринин әлинә дүшүрдүләр (Амос 1:6, 9). Тәсәввүр един, Јеһованын халгыны көлә кими сатырлар! Буна ҝөрә дә Јеһованын Арамын, Филиштин вә Сурун үзәринә фәлакәт ҝәтирәҹәји тәәҹҹүблү дејил.
7. Едом, Аммон вә Моав дөвләтләрини Исраил илә бағлајан нә иди, лакин онлар бу халгла неҹә давранырдылар?
7 Едом, Аммон вә Моав халглары Исраил үчүн һеч дә јад дејилдиләр. Онлар гоһум идиләр. Едомлулар Ибраһимдән төрәнмишдиләр вә Јагубун әкиз гардашы Исһагын нәслиндән идиләр. Мүәјјән мә’нада онлар исраиллиләрлә гардаш идиләр. Аммонлулар вә моавлылар Ибраһимин гардашы оғлу Лутдан төрәнмишдиләр. Бәс Едом, Аммон вә Моав исраиллиләрлә гардаш кими давранырдылармы? Бу һеч дә белә дејилди! Едомлулар инсафсызҹасына «өз гардаш халгыны» гылынҹла говур, аммонлулар исә Исраил әсирләри илә амансыз давранырдылар (Амос 1:11, 13). Амос моавлыларын Аллаһын халгына гаршы ҝөстәрдикләри дүшмәнчилик һаггында бирбаша демәсә дә, моавлылар да узун мүддәт иди ки, Исраилә дүшмән идиләр. Бу үч гоһум дөвләтләри шиддәтли ҹәза ҝөзләјир. Јеһова онлары одла мәһв едәҹәјини сөз вермишдир.
Аллаһын ҹәзасы гачылмаздыр
8. Нәјә ҝөрә демәк олар ки, алты халгын ҹәзасы гачылмаз иди?
8 Доғрудан да, Амосун пејғәмбәрлијинин биринҹи һиссәсинин аид олдуғу алты халгын һамысы Аллаһын ҹәзасына лајиг иди. Вә онлар бу ҹәзадан һеч ҹүр гачына билмәздиләр. «Амос» китабынын 1-ҹи фәслинин 3-ҹү ајәсиндән 2-ҹи фәслинин 1-ҹи ајәсинә гәдәр Јеһова алты дәфә: «Ҹәзасыз бурахмајаҹағам» ифадәсини тәкрар едир. Аллаһ Өз сөзүнә садиг галды вә һәмин халглара даир нијјәтиндән дөнмәди. Тарих сүбут едир ки, ахырда онларын һамысына фәлакәт үз вермишдир. Вә нәтиҹәдә онлардан дөрдү — Филишт, Моав, Аммон вә Едом — һәтта јер үзүндән тамамилә силинди!
9. Јәһудиләр нәјә лајиг идиләр вә нә үчүн?
9 Амос нөвбәти дәфә диггәти једдинҹи дөвләтә — Јәһудаја јөнәлдир. Ола билсин, Исраилин шимали падшаһлығынын сакинләри үчүн Амосун өз вәтәнинә неҹә һөкм е’лан етмәсини ешитмәк гәрибә иди. Нәјә ҝөрә јәһудиләр бу гәдәр ҹидди һөкмә лајиг идиләр? Амос 2:4 ајәсиндә дејилир: «Чүнки Рәббин ганунуна хор бах»дылар. Јеһова Онун Ганунуна гәсдән е’тинасыз јанашанлара ҝөз јуммурду. Амос 2:5 ајәсинә әсасән, О, әввәлҹәдән демишди: «Јәһудаја од јағдыраҹағам ки, Јерусәлимин галаларыны јандырыб-јахсын».
10. Нәјә ҝөрә Јәһуда халгы фәлакәтдән јаха гуртара билмәди?
10 Сәдагәтсиз Јәһуда халгы јахынлашан бәдбәхтликдән гачына билмәзди. Једдинҹи дәфәдир ки, Јеһова дејир: «Ҹәзасыз бурахмајаҹағам» (Амос 2:4). Јәһуда падшаһлығы пејғәмбәрлијә әсасән, б. е. ә. 607-ҹи илдә бабиллиләрин ону виран етдикләри вахт ҹәзаландырылды. Бу бир даһа ҝөстәрир ки, писләр Аллаһын ҹәзасындан јаха гуртара билмәзләр.
11-13. Амос башлыҹа олараг һансы дөвләт һаггында пејғәмбәрлик едирди вә орадакы зүлмкарлыг һансы формалары алырды?
11 Амос пејғәмбәр Јеһованын һөкмүнү једди дөвләтә е’лан етди. Бәлкә дә бә’зиләри онун пејғәмбәрлик едиб гуртардығыны зәнн едирдиләр, лакин онлар јанылырдылар. Амосун һәлә демәјә сөзү варды! О, илк нөвбәдә Исраилин шимал падшаһлығына гаршы сәрт һөкм е’лан етмәк үчүн ҝөндәрилмишди. Исраил Аллаһын гаршысында ҝүнаһ етмишди, чүнки халг һәм мә’нәви, һәм дә руһани ҹәһәтдән аҹынаҹаглы вәзијјәтдә иди.
12 Амос пејғәмбәрлијиндә Исраил падшаһлығында јајылмыш зүлмкарлығы ифша едир. Амос 2:6, 7 ајәләриндә бу һагда дејилир: «Рәбб белә дејир: “Исраиллиләрин үч-дөрд гат ҝүнаһына ҝөрә онлары ҹәзасыз бурахмајаҹағам, чүнки онлар дүз адамлары пула, мөһтаҹлары да бир ҹүт чарыға сатыр, јохсуллары тоз-торпағын ичинә салыб әзир, мәзлумлара јол вермир».
13 Дүз адамлары, јә’ни салеһләри «пула» сатырдылар, бу, еһтимал ки, һакимләрин рүшвәт алыб ҝүнаһсызлары иттиһам етдикләрини ҝөстәрир. Кредит верәнләр, ола билсин, ҹүз’и борҹу ҝери алмаг үчүн јохсуллары «бир ҹүт чарыға» гул кими сатырдылар. Рәһмсиз инсанлар јохсуллары о гәдәр әскилдирдилә ки, онлар гәм-гүссәләринә вә алчалдылдыгларына ишарә олараг башларына тоз-торпаг сәпирдиләр. Рүшвәтхорлуг о гәдәр баш алыб ҝетмишдир ки, мәзлумларын әдаләт тапаҹагларына зәррә гәдәр дә үмид јох иди.
14. Исраилин онгәбиләли падшаһлығында кимләрә зүлм едирдиләр?
14 Диггәт јетирәк ки, зүлмә мә’руз галанлар дүз адамлар, јохсуллар вә мәзлумлардыр. Јеһова илә Исраил халгы арасында бағланан Ганун әһди зәифләрә вә мөһтаҹлара мәрһәмәт ҝөстәрмәји тәләб едирди. Лакин Исраилин онгәбиләли падшаһлығында јашајан белә инсанларын вәзијјәти һәгиги мә’нада аҹынаҹаглы иди.
«Аллаһынызы гаршыламаға һазыр олун»
15, 16. а) Исраиллиләр нәјә ҝөрә: «Аллаһынызы гаршыламаға һазыр олун» хәбәрдарлығыны алмышдылар? б) Амос 9:1, 2 ајәләриндән неҹә ҝөрүнүр ки, писләр Јеһованын ҹәзасындан јаха гуртара билмәјәҹәкләр? в) Б. е. ә. 740-ҹы илдә Исраилин онгәбиләли падшаһлығы илә нә баш вермишди?
15 Исраил халгы әхлагсызлыға вә башга ҝүнаһлара да дүчар олдуғу үчүн, Амос пејғәмбәрин инадкар халга: «Аллаһынызы гаршыламаға һазыр олун» дејә, хәбәрдарлыг етмәјә бүтүн әсасы варды (Амос 4:12). Сәдагәтсиз Исраил халгы Аллаһын јахынлашан һөкмүндән гачына билмәзди, чүнки Јеһова сәккизинҹи дәфәдир ки: «Ҹәзасыз бурахмајаҹағам» дејә е’лан едир (Амос 2:6). Ондан ҝизләнмәк истәјән пис инсанлар һаггында Аллаһ дејир: «Онлардан һеч ким гачыб гуртула билмәз. Өлүләр дијарына ҝирсәләр белә, онлары орада әлә кечирәҹәјәм. Ҝөјләрә галхсалар белә, онлары ендирәҹәјәм» (Амос 9:1, 2).
16 Писләр «өлүләр дијарына», башга сөзләрлә десәк, һәтта ән дәрин јерләрә ҝирмәјә чалышсалар да, Јеһованын ҹәзасындан јаха гуртара билмәјәҹәкләр. Онлар сығынаҹаг тапмаг үчүн «ҝөјләрә», јә’ни дағларын јүксәкликләринә галхмаға чалышсалар да, Аллаһын ҹәзасындан гуртула билмәјәҹәкләр. Јеһова кифајәт гәдәр ајдын хәбәрдарлыг едир: Ондан һеч јердә ҝизләнмәк мүмкүн дејил. Аллаһын әдаләти тәләб едирди ки, Исраил падшаһлығы төрәтдији пис әмәлләринә ҝөрә ҹаваб версин. Вә артыг ҹаваб вермәјин вахты ҝәлмишди. Б. е. ә. 740-ҹы илдә, Амосун пејғәмбәрлији јазылдыгдан тәхминән 60 ил сонра, Исраил ашшурлулар тәрәфиндән зәбт едилди.
Аллаһын ҹәзасы сечиҹидир
17, 18. «Амос» китабынын 9-ҹу фәслиндән Аллаһын мәрһәмәтинә даир нә өјрәнирик?
17 Амосун пејғәмбәрлији Аллаһын һәмишә һаглы олараг ҹәзаландырдығыны вә Онун ҹәзасынын гачылмаз олдуғуну ҝөрмәкдә бизә көмәк етди. Лакин «Амос» китабындан Аллаһын ҹәзасынын һәм дә сечиҹи олдуғуну өјрәнирик. Бәли, писләрин һарада ҝизләнмәләриндән асылы олмајараг, Аллаһ онлары тапыб, үзәрләриндә Өз һөкмүнү јеринә јетирмәјә гадирдир. О һәм дә салеһ олан вә төвбә едән, јә’ни мәрһәмәтә лајиг инсанлары да тапа биләр. Бу фикир «Амос» китабынын сонунҹу фәслиндә чох ҝөзәл вурғуланыр.
18 Бу китабын 9-ҹу фәслинин 8-ҹи ајәсинә әсасән Јеһова дејир: «Јагуб нәслини тамамилә силиб-атмајаҹағам». 13-15-ҹи ајәләрдә гејд олундуғу кими, Јеһова сөз верир ки, Өз халгыны «әсирликдән гајтараҹаг». Гајыданлара мәрһәмәт едиләҹәк вә онлар тәһлүкәсизликдә вә боллуг ичиндә јашајаҹаглар. Јеһова сөз верир ки: «Котан сүрән бичинчијә јетишәҹәк». Бу лап мө’ҹүзәјә охшајыр. Мәһсул о гәдәр чох олаҹаг ки, ону јығыб гуртармамыш, јенидән јери шумлајыб, тохум сәпмәли олаҹаглар!
19. Исраилин вә Јәһудејанын галығы илә нә баш верди?
19 Биз дејирик ки, Јеһова Јәһудејада вә Исраилдә јашајан пис инсанлары сечиҹи сурәтдә ҹәзаландырды, белә ки, Аллаһ үрәји дүзҝүн әһвал-руһијјәјә малик олан вә төвбә едән инсанлара мәрһәмәт ҝөстәрди. «Амос» китабынын 9-ҹу фәслиндә јазылмыш бәрпа һаггындакы вә’д, б. е. ә. 537-ҹи илдә Исраилин вә Јәһудејанын төвбә етмиш галығынын Бабил әсирлијиндән гајытдығы заман јеринә јетди. Исраиллиләр өз севимли вәтәнләриндә Аллаһа һәгиги ибадәти бәрпа едирләр. Өзләрини тәһлүкәсизликдә һисс едән исраиллиләр, јенидән евләр тикир, бағлар вә үзүмлүкләр салырдылар.
Јеһованын һөкмү тезликлә јеринә јетәҹәк
20. Амосун бәјан етдији Аллаһын һөкмләри үзәриндә дүшүнәркән нәјә әмин олуруг?
20 Амосун бәјан етдији Аллаһын һөкмләри үзәриндә дүшүнәркән, Јеһованын бизим ҝүнләрдә дә пислијә сон гојаҹағына әминлијимиз артыр. Буна нәјә ҝөрә инанмаг олар? Биринҹиси, Јеһованын кечмишдә јашамыш пис инсанларла даврандығына даир нүмунә, Онун бизим ҝүнләрдә неҹә давранаҹағыны тәсәввүр етмәјә көмәк едир. Икинҹиси исә, дөнүк Исраил падшаһлығы үзәриндә Аллаһын һөкмүнүн неҹә јеринә јетдијини ҝөрәркән әмин олуруг ки, Аллаһ јалан динләрин үмумдүнја империјасы олан ‘Бөјүк Бабилдән’ ән ҹидди мүһакимәјә лајиг олан Христиан дүнјасыны да мәһв едәҹәкдир (Вәһј 18:2).
21. Нәјә ҝөрә Христиан дүнјасы Аллаһын ҹәзасына лајигдир?
21 Сөзсүз ки, Христиан дүнјасы Аллаһын ҹәзасына лајигдир. Өзләрини Мәсиһин давамчысы адландыранларын мә’нәви вә руһани ҹәһәтдән аҹынаҹаглы олан вәзијјәтләри артыг чох шеј дејир. Јеһова Христиан дүнјасына вә Шејтан дүнјасынын галан һиссәсинә гаршы һөкм чыхармагда һаглыдыр. Бу һөкмүн јеринә јетмәси гачылмаздыр. Јеһова Өз һөкмүнү иҹра етдији заман «Амос» китабынын 9-ҹу фәслинин 1-ҹи ајәсинин сөзләри јеринә јетәҹәкдир: «Сағ галанлары Мән гылынҹдан кечирәҹәјәм. Онлардан һеч ким гачыб гуртула билмәз». Бәли, писләрин һарада ҝизләнмәләриндән асылы олмајараг, Јеһова онлары тапаҹаг.
22. 2 Салониклиләрә 1:6-8 ајәләриндән Аллаһын ҹәзасынын һансы сәҹијјәви хүсусијјәтләри ҝөрүнүр?
22 Аллаһ һәмишә һаглы олараг ҹәзаландырыр, Онун ҹәзасы гачылмаз вә сечиҹидир. Бу, һәвари Павелин сөзләриндән ҝөрүнүр: «Сизә әзаб верәнләрә әзабла вә әзаб чәкән сизләрә бизимлә бирликдә раһатлыгла әвәзини вермәк Аллаһ өнүндә доғру ишдир. Бу, Рәбб Исанын гүдрәтли мәләкләри илә аловлу атәш ичәрисиндә ҝөјдән зүһур етдији заман олаҹагдыр. Рәббимиз Иса Мәсиһ Аллаһы танымајан вә Өзү барәсиндәки Мүждәјә итаәт етмәјәнләрә ҹәза верәҹәкдир» (2 Салониклиләрә 1:6-8). Аллаһын мәсһ едилмиш хидмәтчиләринә хәтәр јетирәнләрә әвәзини вермәк Јеһованын өнүндә доғру ишдир, она ҝөрә дә беләләри ҹәзаја лајигдир. Бу ҹәза гачылмаздыр, чүнки писләр «Рәбб Исанын гүдрәтли мәләкләри илә аловлу атәш ичәрисиндә... зүһур етдији заман» хилас олмајаҹаглар. Аллаһын ҹәзасы һәм дә сечиҹи олаҹагдыр, белә ки, «Аллаһы танымајан вә... Мүждәјә итаәт етмәјән» кәсләрдән Иса гисас алаҹагдыр. Аллаһын һөкмүнүн јеринә јетмәси изтираблара дөзүб, Аллаһа мәгбул горхуја малик олан инсанлара тәсәлли ҝәтирәҹәкдир.
Салеһләр үчүн үмид
23. «Амос» китабындан биз һансы үмид вә тәсәллини әлдә едә биләрик?
23 Амосун пејғәмбәрлијиндә дүзҝүн әһвал-руһијјәли үрәјә малик олан инсанлар үчүн дә үмид вә тәсәлли һагда ҝөзәл хәбәр вар. Әввәлҹәдән дејилдији кими, Јеһова гәдим зәманәдә Өз халгыны тамамилә мәһв етмәмишди. Сонда Аллаһ исраиллиләри әсирликдән вәтәнә гајтарыб, онлары сүлһ вә тәрәгги илә хејир-дуаландырды. Бу бизим ҝүнләр үчүн нә демәкдир? Биз әмин ола биләрик ки, Јеһова һөкмүнү јеринә јетирән заман писләрин һарада ҝизләнмәләриндән асылы олмајараг, онлары үзә чыхараҹаг вә Өз мәрһәмәтинә лајиг билдији инсанлары јерин истәнилән јериндән тапаҹагдыр.
24. Јеһованын хидмәтчиләри бу ҝүн һансы хејир-дуалара саһибдирләр?
24 Биз, Јеһованын садиг хидмәтчиләри, Аллаһын писләр үзәриндә һөкмүнүн јеринә јетәҹәји вахты ҝөзләјәрәк, һансы һиссләри кечиририк? Биз руһани чичәкләнмәјә вә бол-бол хејир-дуалара саһибик! Аллаһа ибадәтимиз Христиан дүнјасынын јалан тә’лимләриндән азаддыр. Јеһова бизи бол-бол руһани гида илә тә’мин едир. Лакин јадда сахлајаг ки, бу хејир-дуаларла бәрабәр үзәримизә һәм дә бөјүк мәс’улијјәт дүшүр. Јеһова ҝөзләјир ки, биз башгаларыны гаршыдан ҝәлән һөкм һаггында хәбәрдар едәк. Биз «әбәди һәјата мејлли оланлары» тапмаг үчүн әлимиздән ҝәләни етмәјә чалышырыг (Һәвариләрин ишләри 13:48, ЈД). Бәли, истәјирик ки, бизимлә бәрабәр мүмкүн гәдәр даһа чох инсанлар руһани чичәкләнмәјә севинсинләр. Вә истәмирик ки, Аллаһ бир аздан һөкмүнү јеринә јетирән заман онлар писләрлә бирҝә мәһв олсунлар. Сөзсүз ки, белә хејир-дуалары әлдә етмәк үчүн, ҝәрәк биз дүзҝүн әһвал-руһијјәли үрәјә малик олаг. Нөвбәти мәгаләдән ҝөрәҹәјимиз кими, Амосун пејғәмбәрлијиндә бу фикир дә гејд олунур.
Сиз неҹә ҹаваб верәрдиниз?
• Амосун пејғәмбәрлији неҹә ҝөстәрир ки, Јеһова һәмишә һаглы олараг ҹәзаландырыр?
• Амос Аллаһын ҹәзасынын гачылмаз олдуғуну неҹә сүбут едир?
• «Амос» китабындан Аллаһын Өз һөкмүнү сечиҹи сурәтдә јеринә јетирдији неҹә ҝөрүнүр?