Әзабвериҹи һиссләрлә мүбаризә

ЛИНА һәјатынын чох һиссәсини әзабвериҹи һиссләрлә мүбаризә апармышдыр. О дејир: «Ушаглыг илләриндә мә’руз галдығым ҹинси тәһгирләр шәхси ләјагәт һиссими о гәдәр тапдаламышды ки, өзүмү тамамилә лазымсыз һисс едирдим». Симона да ҝәнҹлик илләрини белә хатырлајыр: «Дахилимдә бошлуг һисси дујурдум вә һеч нәјә јарамадығыма әмин идим». Бу гәдәр дәрин мә’јуслуг һисси бу ҝүн чох ҝениш јајылыб. Јенијетмәләрә көмәк етмәклә мәшғул олан бир телефон хидмәти хәбәр верир ки, онлара зәнҝ вуран јенијетмәләрин јарыдан чоху «даима “натамамлыг комплекси” илә мүбаризә апардыгларыны» сөјләјирләр.

Бир чох експертләрин фикринҹә инсанларда өзүнә инамсызлыг адәтән башгаларынын тә’сири алтында јараныр. Адәтән белә һиссләр, инсан даима тәһгирләрә мә’руз галанда, ҝүҹлү тәнгидин вә кобуд давранышын гурбаны оланда јараныр. Сәбәбләрдән асылы олмајараг, нәтиҹәләр нәинки кәдәрли, һәтта тәһлүкәли ола биләр. Бу јахынларда апарылан тибби тәдгигатлара әсасән, өзләрини дәјәрсиз һесаб едән инсанлар һәм өзләринә, һәм дә башгаларына инанмамаға мејлли олур, бунунла да истәр-истәмәз јахын достлуг мүнасибәтләрини тәһлүкә алтына атырлар. Тәдгигатын һесабатында дејилир: «Бу инсанлар ән чох горхдуглары вәзијјәтләри мүәјјән мә’нада елә өзләри “јарадырлар”».

Адәтән өзләринә гаршы бу ҹүр һиссләрлә јашајан инсанлар, Мүгәддәс Китабда дејилдији кими, дахилдә олан нараһатчылыгдан әзијјәт чәкирләр (Мәзмур 94:19). Онлара елә ҝәлир ки, һеч вахт ләјагәтли инсан ола билмәјәҹәкләр. Һәр һансы бир иш баш тутмајанда, белә инсанлар гејри-иради олараг илк нөвбәдә өзләрини ҝүнаһландырырлар. Башгалары онлары тә’рифләјәндә белә, дахилдә өзләрини әввәл-ахыр ич үзү ачылаҹаг бир фырылдагчы кими һисс едирләр. Чохлары хошбәхтлијә лајиг олмадыгларына әминдирләр вә һеч вахт дүзәлмәјәҹәкләрини дүшүнүб зәифликләринә вә нөгсанларына ҝөз јуммаға башлајырлар. Өзүнә һөрмәт һиссинин чатышмазлығындан әзијјәт чәкән Линанын гидаланма илә ҹидди проблемләри јаранды. О дејир: «Һәјатымда дәјишиклик етмәјә ҝүҹүм јох иди».

Ҝөрәсән, бу ҹүр һиссләрлә јашајан инсанлар онларла өмүр боју мүбаризә апармағамы мәһкум едилибләр? Белә һиссләрин өһдәсиндән ҝәлмәк үчүн нә исә етмәк олармы? Мүгәддәс Китабда јазылмыш принсипләр вә практики мәсләһәтләр бир чохларына бу мүбаризәдә уғур газанмаға көмәк етмишдир. Бу принсипләрдән бә’зиләри һансылардыр вә онлар бизә һәјатдан севинҹ дујмаға неҹә көмәк едә биләр? Буну нөвбәти мәгаләдән өјрәнәҹәксиниз.