Нөгсансызлыгда јеримәјин ҝәтирдији севинҹ
«Рәббин хејир-дуасы инсана сәрвәт ҝәтирәр, даһа она гүссә вермәз» (СҮЛЕЈМАНЫН МӘСӘЛЛӘРИ 10:22).
1, 2. Нәјә ҝөрә фикримизи һәддиндән артыг ҝәләҹәјә ҹәмләшдирмәмәлијик?
БИР америкалы философ јазмышды: «Инсанын өз фикрини һәддиндән артыг ҝәләҹәјә ҹәмләшдирмәси... индики заманы олдуғу кими ҝөрмәсинә мане олур». Бу, бизә ушаг вахты тез бөјүмәк истәјән, ушаглығын ләззәтини исә бөјүјәндән сонра анлајан инсанлары хатырладыр.
2 Һәтта Јеһованын хидмәтчиләриндә дә белә дүшүнҹә тәрзи ола биләр. Белә бир вәзијјәти нәзәрдән кечирәк. Биз Аллаһын јер үзүндә Ҹәннәти бәрпа етмәк вә’дини јеринә јетирмәсини арзулајырыг. Хәстәликләрин, гоҹалығын, ағры вә әзаб-әзијјәтин олмајаҹағы һәјаты сәбирсизликлә ҝөзләјирик. Бунлары ҝөзләмәк дүзҝүндүр. Бәс әҝәр фикримизи һәддиндән артыг ҝәләҹәкдә алаҹағымыз физики хејир-дуалара ҹәмләшдирир вә буна ҝөрә дә буҝүнкү руһани хејир-дуалары ҝөрмүрүксә, онда неҹә? Бу чох кәдәрли оларды! Биз асанлыгла руһдан дүшәр вә ҝөзләдијимиз вахтда һәјата кечмәдији үчүн ‘ҝеҹикән үмид үрәјимизи хәстәләндирә’ биләр (Сүлејманын мәсәлләри 13:12). Һәјатын проблем вә чәтинликләри бизи руһ дүшкүнлүјүнүн вә өзүнү јазыгламағын тәләсинә салар. Вәзијјәтдән чыхыш јолу ахтармаг әвәзинә, биз һәр шејдән шикајәтләнмәјә башлајарыг. Малик олдуғумуз хејир-дуалар үзәриндә миннәтдарлыгла дүшүнсәк, бу кими сәһв һәрәкәтләрдән гачынмаг мүмкүндүр.
3. Бу мәгаләдә диггәтимизи нәјә ҹәмләшдирәҹәјик?
3 Сүлејманын мәсәлләри 10:22 ајәсиндә дејилир: «Рәббин хејир-дуасы инсана сәрвәт ҝәтирәр, даһа она гүссә вермәз». Мәҝәр Јеһованын мүасир халгынын руһани фираванлығы севинҹ ҝәтирән хејир-дуа дејилми? Ҝәлин малик олдуғумуз хејир-дуаларын бә’зиләрини нәзәрдән кечирәк вә онларын шәхсән бизим үчүн һансы мә’на дашыдығы һагда фикирләшәк. Јеһованын, ‘нөгсансызлығында јеријән салеһә’ вердији хејир-дуалар үзәриндә дүшүнсәк, бу, сәмави Атаја хидмәтимизи севинҹлә давам етдирмәк гәрарымызы даһа да мөһкәмләндирәҹәк (Сүлејманын мәсәлләри 20:7, ЈД).
Бизә инди ‘сәрвәт ҝәтирән хејир-дуалар’
4, 5. Сән Мүгәддәс Китабын һансы тә’лимини хүсусилә гијмәтләндирирсән вә нәјә ҝөрә?
4 Мүгәддәс Китаб тә’лимләринин дүзҝүн анлајышы. Христиан дүнјасынын динләри үмумиликдә Мүгәддәс Китаба инандыгларыны иддиа етсәләр дә, онун тә’лимләри илә разы дејилләр. Һәтта ејни килсә үзвләринин Мүгәддәс Китаб тә’лимләринә даир нөгтеји-нәзәрләри бир-бириндән фәргләнир. Онларын вәзијјәти Јеһованын хидмәтчиләринин вәзијјәтиндән неҹә дә фәрглидир! Милли, мәдәни вә етник мәншәјимиздән асылы олмајараг, биз ады илә таныдығымыз Аллаһа ибадәт едирик. О, сирли Үч үгнум дејил (Ганунун тәкрары 6:4; Мәзмур 83:18; Марк 12:29). Биз, һәмчинин ону да билирик ки, ән ваҹиб мәсәлә олан Аллаһын һөкмранлыг һүгугуна даир суал һәлл олунмаг үзрәдир вә инсанларын Аллаһ гаршысында нөгсансызлығы горујуб-горумајаҹағы суалына һәр биримиз ҹәлб олунмушуг. Биз өлүләр һаггында һәгигәти билирик вә бә’зиләринин фикринҹә, инсанлара одлу ҹәһәннәмдә ишҝәнҹә верән вә ја онлары мәһшәрә ҝөндәрән Аллаһын гаршысында дәһшәтли горхудан азадыг (Ваиз 9:5, 10).
5 Бизим кортәбии тәкамүл нәтиҹәсиндә әмәлә ҝәлдијимизи дејил, Аллаһын сурәтиндә јарадылдығымызы билмәк неҹә севиндириҹидир! (Јарадылыш 1:26; Малаки 2:10). Мәзмурчу өз Аллаһына охујурду: «Сән мәни е’ҹазкар, әсрарәнҝиз јолла јаратмысан, она ҝөрә шүкүр едирәм. Нә гәдәр харигәли ишләр ҝөрмүсән! Буну үрәкдән јахшы дәрк едирәм» (Мәзмур 139:14).
6, 7. Сәнин вә ја танышларынын һәјатында едилән һансы дәјишикликләр хејир-дуа ҝәтириб?
6 Пис вәрдиш вә әмәлләрдән азадыг. Күтләви информасија васитәләри сигарет чәкмәјин, һәддиндән артыг ички ичмәјин вә әхлагсыз һәјат тәрзинин тәһлүкәли олдуғуна даир тез-тез хәбәрдарлыг едир. Лакин чох вахт бу хәбәрдарлыглара һеч бир әһәмијјәт верилмир. Бәс сәмими инсан садаланан әмәлләрин Аллаһа мәгбул олмадығыны вә бу ишләрлә мәшғул оланларын Ону кәдәрләндирдијини биләндә нә едир? Онда бу әмәлләрдән әл чәкмәк һәвәси ојаныр (Јешаја 63:10; 1 Коринфлиләрә 6:9, 10; 2 Коринфлиләрә 7:1; Ефеслиләрә 4:30). О буну, илк нөвбәдә Јеһова Аллаһы разы салмаг үчүн едир, ејни заманда әлавә фајдалар — јахшы сағламлыг вә гәлб раһатлығы әлдә едир.
7 Бир чохлары үчүн пис вәрдишләрдән әл чәкмәк чәтиндир. Лакин һәр ил он минләрлә инсан буну едир. Онлар өзләрини Јеһоваја һәср едир вә суда вәфтиз олунмагла һамыја, Аллаһа хош ҝәлмәјән әмәлләри һәјатларындан кәнар етдикләрини ҝөстәрирләр. Бу һамымыз үчүн неҹә дә руһландырыҹыдыр! Бизим ҝүнаһлы вә зәрәрли әмәлләрин әсарәтинә бир даһа дүшмәмәк гәтијјәтимиз мөһкәмләнир.
8. Мүгәддәс Китабын һансы ајәләри аиләнин хошбәхт олмасына көмәк едир?
8 Хошбәхт аилә һәјаты. Бир чох өлкәләрдә аилә һәјаты бөһран вәзијјәтиндәдир. Никаһларын әксәријјәти бошанма илә гуртарыр, бу исә чох вахт ушагларын үрәјинә дәрин јаралар вурур. Бә’зи Авропа өлкәләриндә натамам аиләләр мөвҹуд олан аиләләрин тәхминән 20 фаизини тәшкил едир. Јеһова аилә һәјатында нөгсансызлыг јолуну тутмагда бизә неҹә көмәк едир? Зәһмәт олмаса, Ефеслиләрә 5:22–6:4 ајәләрини охујун. Ҝөрүн Аллаһ бу ајәләрдә әр, арвад вә ушаглар үчүн неҹә дә ҝөзәл мәсләһәтләр верир. Мүгәддәс Јазыларын бу вә диҝәр ајәләринин һәјатда тәтбиги никаһ телләрини мөһкәмләндирир, валидејнләрин ушаглары дүзҝүн тәрбијә етмәсинә вә аиләнин хошбәхт олмасына көмәк едир. Мәҝәр бу хејир-дуа бизә севинмәк үчүн әсас вермирми?
9, 10. Ҝәләҹәјә бахышымыз бу дүнјадакы инсанларын бахышындан неҹә фәргләнир?
9 Биз дүнја проблемләринин тезликлә һәлл олунаҹағына әминик. Елми вә техники тәрәггијә вә мүәјјән рәһбәрләрин сәмими ҹәһдләринә бахмајараг, мүасир һәјатын ән ҹидди проблемләри һәлә дә һәлл олунмамыш галыр. Дүнја игтисади форумунун баниси Клаус Шваб бу јахынларда гејд етмишдир: «Дүнјанын үзләшдији проблемләрин сајы артыр, онларын һәлл олунмасына галан вахт исә азалыр». О, һәмчинин демишдир ки, «терроризм, әтраф мүһитин чиркләнмәси вә игтисадијјатын гејри-сабитлији кими тәһлүкәләр артыг үмумдүнја характери дашыјыр». Сонда Шваб әлавә етмишдир: «Дүнја индијә кими ҝөрүнмәмиш проблемләрлә үзләшир ки, онларын һәлл олунмасы үчүн мүштәрәк вә гәтијјәтли сә’ј тәләб олунур». ХХЫ әсрдә јашамағымыза бахмајараг, бәшәријјәтин ҝәләҹәји һәлә дә үрәкачан дејил.
10 Јеһованын, дүнја проблемләрини һәлл едәҹәк Хиласкар Падшаһлығы тә’сис етдијини билмәк неҹә дә севиндириҹидир! Онун васитәсилә һәгиги Аллаһ ‘дөјүшләри дајандыраҹаг’ вә бүтүн дүнјада сүлһ вә әмин-аманлыг һөкм сүрәҹәк (Мәзмур 46:9). Мәсһ олунмуш Падшаһ Иса Мәсиһ ‘фәгирләри, мәзлумлары гуртараҹаг. Јохсула рәһм едәҹәк’ (Мәзмур 72:12-14). Падшаһлығын рәһбәрлији алтында әрзаг гытлығы олмајаҹаг (Мәзмур 72:16). Јеһова бизим ‘ҝөзләримиздән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди’ (Вәһј 21:4). Падшаһлыг ҝөјләрдә артыг тә’сис едилиб вә тезликлә бәшәријјәтин бүтүн проблемләрини һәлл етмәк үчүн лазыми аддымлар атаҹаг (Даниел 2:44; Вәһј 11:15).
11, 12. а) Зөвг далынҹа гачмаг даими хошбәхтлик ҝәтирирми? Изаһ един. б) Һәгиги хошбәхтлик нәдән асылыдыр?
11 Нәјин һәгиги хошбәхтлик ҝәтирдијини билирик. Һәгиги хошбәхтлик нәдән асылыдыр? Бир психологун сөзләринә ҝөрә, хошбәхтлик ҝәтирән үч шеј вар: зөвг, нә илә исә мәшғул олмаг (иш вә ја аилә) вә мә’на (шәхси тәләбләрини тә’мин етмәкдән даһа бөјүк мәгсәдләрә ҹан атмаг). О, зөвгү үчүнҹү јерә гојмуш вә демишдир: «Буну хүсусилә гејд етмәк лазымдыр, чүнки бир чох инсанлар һәјатда јалныз зөвг далынҹа гачырлар». Бәс Мүгәддәс Китаб бу һагда нә дејир?
12 Гәдим Исраил падшаһы Сүлејман јазырды: «Мән үрәјимдә дедим: “Ҝәл инди дә шадлыг етмәји сынагдан кечир вә кефә бах”. Амма ҝөрдүм ки, бу да пучдур. Ҝүлмәк һаггында “Дәлиликдир!”, шадлыг һаггында “Нә фајдасы вар?” дедим» (Ваиз 2:1, 2). Мүгәддәс Јазылара әсасән, зөвг верән ишләрин ҝәтирдији хошбәхтлик ән јахшы һалда мүвәггәтидир. Бәс ишлә мәшғул олмаг барәдә нә демәк олар? Биз ән мә’налы ишлә — Падшаһлығын тәблиғи вә шаҝирдләр һазырламаг иши илә мәшғулуг (Матта 24:14; 28:19, 20). Хилас хәбәрини һамы илә бөлүшәрәк биз һәм өзүмүзү, һәм дә бизә гулаг асан инсанлары хилас едә биләрик (1 Тимотејә 4:16). ‘Аллаһын әмәкдашлары’ олан бизләр шәхси тәҹрүбәмиздән билирик ки, «вермәк алмагдан даһа бөјүк бәхтијарлыг ҝәтирир» (1 Коринфлиләрә 3:9; Һәвариләрин ишләри 20:35). Бу иш һәјатымызы мә’на илә долдурур вә Јараданымыза Она истеһза едән Шејтан Иблисә ҹаваб вермәк үчүн әсас верир (Сүлејманын мәсәлләри 27:11). Бәли, Јеһова бизи аҝаһ едир ки, Она садиглик һәгиги вә даими хошбәхтлик ҝәтирир (1 Тимотејә 4:8).
13. а) Теократик Хидмәт Мәктәби һансы мә’нада севинҹ бәхш едән хејир-дуадыр? б) Теократик Хидмәт Мәктәби шәхсән сәнә һансы фајданы ҝәтирир?
13 Ваҹиб вә еффектив тә’лим програмы. Герһард Јеһованын Шаһидләринин јығынҹагларынын бириндә ағсаггалдыр. Ҹаванлығыны хатырлајараг о дејир: «О вахтлар нитглә бағлы бөјүк проблемләрим вар иди. Һәјәҹанлананда ҝүҹ-бәла илә данышыр, пәлтәкләјирдим. Буна ҝөрә өзүмү чох пис һисс едирдим вә данышмаға чәкинирдим. Валидејнләрим мәни логопедин јанына апардылар, анҹаг бунун көмәји олмады, чүнки проблемим физики јох, психоложи иди. Амма Јеһованын тәгдим етдији ҝөзәл васитә олан Теократик Хидмәт Мәктәбинин мәнә бөјүк көмәји олду. Бу мәктәбдә алдығым тә’лим мәнә ҹәсарәт верди. Өјрәндикләрими вар ҝүҹүмлә һәјатымда тәтбиг етмәјә чалышырдым. Бу мәнә һәгигәтән дә көмәк етди! Өзүмү даһа сәрбәст һисс етмәјә башладым, горхум јох олду вә хидмәтдә даһа ҹәсарәтли олдум. Һазырда мән һәтта ачыг мә’рузәләрлә чыхыш едирәм. Бу мәктәб васитәсилә мәнә јени һәјат бәхш едән Јеһоваја дәриндән миннәтдарам». Ишини ҝөрмәк үчүн Јеһованын бизә тә’лим вермәси мәҝәр севинмәк үчүн сәбәб дејилми?
14, 15. Чәтинликләрә дүшәндә һансы көмәк әлчатандыр? Нүмунә ҝәтирин.
14 Јеһова илә шәхси мүнасибәтләр вә үмумдүнја гардашлығын дәстәји. Алманијада јашајан Катрин ҹәнуб-шәрги Асијада баш верән ҝүҹлү зәлзәлә вә сунами һагда хәбәри ешидәндә дәһшәтә ҝәлди. Фәлакәт баш верән заман онун гызы Таиландда иди. 32 саат әрзиндә бу ана гызынын сағ олуб-олмадығындан хәбәрсиз иди, өләнләрин сајы исә ҝет-ҝедә артырды. Нәһајәт телефонла она гызынын сағ олдуғу хәбәри вериләндә, Катринин үрәји неҹә дә раһат олду!
15 Тәшвиш ичиндә кечирдији саатларда Катринә нә көмәк едирди? О јазыр: «Демәк олар ки, бүтүн бу вахт әрзиндә Јеһоваја дуа едирдим. Һәр дәфә бунун мәнә нә гәдәр ҝүҹ вә гәлб раһатлығы вердијини ҝөрүрдүм. Бундан әлавә, севән руһани баҹы-гардашлар мәнә баш чәкир вә дајаг олурдулар» (Филипилиләрә 4:6, 7). Әлбәттә, дуа етмәдән вә севән һәмиманлыларын тәсәллиси олмадан бу саатлары јашамаг Катрин үчүн даһа чәтин оларды. Јеһова вә Онун Оғлу илә јахын мүнасибәт вә һәмчинин мәсиһчи гардашлығы илә сых үнсијјәт о гәдәр надир вә дәјәрли хејир-дуадыр ки, она ади бир шеј кими јанашмаг олмаз.
16. Дирилмә үмидинин дәјәрли олдуғуну ҝөстәрән нүмунә ҝәтирин.
16 Өлән әзизләримизи бир даһа ҝөрмәк үмиди (Јәһја 5:28, 29). Маттиас адлы бир ҝәнҹ Јеһованын Шаһиди кими тәрбијә алырды. Бунун нә дәрәҹәдә гијмәтли олдуғуну анламајараг, о, јенијетмәлик дөврүндә јығынҹагдан узаглашды. Инди о јазыр: «Атамла һеч вахт ачыг үнсијјәт етмирдик. Чохлу мүбаһисәләримиз олурду. Амма атам һәмишә мәним јахшылығымы истәјиб. О мәни чох севирди, анҹаг о вахт мән буну баша дүшмүрдүм. 1996-ҹы илдә онун чарпајысынын јанында отуруб, әлини тутараг аҹы-аҹы ағлајыр, ону чох севдијими дејирдим. Лакин һушу өзүндә олмадығындан, мәни ешитмирди. О, узун сүрмәјән хәстәликдән сонра вәфат етди. Әҝәр јени дүнјада јашајыб дирилмә заманы атамла ҝөрүшсәм, кечмишин әвәзини чыхаҹағыг. О, әлбәттә ки, мәним ағсаггал олдуғуму вә јолдашымла бирҝә пионер кими хидмәт етдијимизи ешидәндә, чох севинәҹәк». Дирилмәјә олан үмид неҹә дә ҝөзәл хејир-дуадыр!
«Она гүссә вермәз»
17. Јеһованын хејир-дуалары үзәриндә дүшүнмәјимиз бизә неҹә көмәк едир?
17 Сәмави Атасы Јеһова һагда Иса Мәсиһ демишди: «О, Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир» (Матта 5:45). Әҝәр Јеһова салеһ олмајан вә пис адамлара хејир-дуа верирсә, ҝөрүн нөгсансызлыг јолу илә јеријәнләри нә гәдәр хејир-дуаландыраҹаг? Мәзмур 84:11 ајәсиндә дејилир: «Рәбб... хејирхаһлығыны дүз јолла ҝедәнләрдән әсирҝәмир». Јеһованын Ону севәнләрә ҝөстәрдији хүсуси гајғы вә мәһәббәти һаггында дүшүнәндә, үрәкләримиз миннәтдарлыг вә севинҹлә долур.
18. а) Нә үчүн демәк олар ки, Јеһованын хејир-дуалары изтираб ҝәтирмир? б) Аллаһын бир чох садиг хидмәтчиләри нә үчүн әзијјәтләрлә үзләширләр?
18 Мәһз Јеһованын хејир-дуасы сајәсиндә Онун халгы руһани фираванлыг ичиндә јашајыр. Аллаһ бизи әмин едир ки, Онун хејир-дуалары «гүссә вермәз» (Сүлејманын мәсәлләри 10:22). Бәс онда нәјә ҝөрә Јеһованын бир чох садиг хидмәтчиләринин пајына ағры вә изтираб ҝәтирән сынаглар дүшүр? Бунун үч сәбәби вар: 1) ҝүнаһа мејлли олмағымыз (Јарадылыш 6:5; 8:21; Јагуб 1:14, 15); 2) Шејтан вә онун ҹин мәләкләри (Ефеслиләрә 6:11, 12); 3) пис дүнја (Јәһја 15:19). Јеһова чәтинликләрлә үзләшмәјимизә јол версә дә, онларын сәбәбкары дејил. «Һәр бир јахшы бәхшиш вә һәр камил һәдијјә јухарыдан, нурлар Атасындан ҝәлир. Онда нә дәјишиклик вар, нә дә дөнүклүк көлҝәси» (Јагуб 1:17). Јеһованын хејир-дуалары изтираб ҝәтирмир.
19. Нөгсансызлыгда јеримәјә давам едәнләри нә ҝөзләјир?
19 Руһани фираванлыг ичиндә јашамаг үчүн даима Аллаһа јахынлашмалыјыг. Она јахынлашмагла, ‘өзүмүзә ҝәләҹәк үчүн јахшы тәмәл олаҹаг бир хәзинә топлајырыг ки, әбәди һәјата наил олаг’ (1 Тимотејә 6:12, 17-19). Јеһованын ҝәләҹәк јени дүнјасында руһани хејир-дуаларымыза физики хејир-дуалар да әлавә едиләҹәкдир. ‘Рәббин сөзләрини динләмәјә’ давам едәнләр һәгиги һәјата говушаҹаглар (Ганунун тәкрары 28:2). Ҝәлин нөгсансызлыг јолу илә јеримәкдә гәти гәрарлы олаг!
Сиз нә өјрәндиниз?
• Фикримизи һәддиндән артыг ҝәләҹәјә ҹәмләшдирмәк нәјә ҝөрә мүдриклик дејил?
• Бизим һал-һазырда һансы хејир-дуаларымыз вар?
• Аллаһын садиг хидмәтчиләри нәјә ҝөрә әзијјәтләрлә үзләширләр?