Киши вә гадын бир-бири үчүн јарадылыблар
КИШИ вә гадын һәмишә бир јердә олмаға ҹан атмышлар. Бу арзуну онларын үрәјинә гојан Аллаһдыр. Јеһова илк инсан Адәми јарадандан сонра ҝөрдү ки, онун тәк олмасы јахшы дејил. Буна ҝөрә дә, Аллаһ кишијә «мүнасиб олан бир көмәкчи» јаратды.
Јеһова Адәмә дәрин јуху ҝөндәриб, габырғасынын бирини ҝөтүрәрәк ондан «гадыны дүзәлтди вә ону инсанын јанына ҝәтирди». Адәм Јеһованын јаратдығы бу ҝөзәл мәхлуга елә мәфтун олду ки, севинҹлә деди: «Бах, нәһајәт, бунун сүмүјү мәним сүмүјүмдән, бәдәни мәним бәдәнимдәндир». Гадынлыг кејфијјәтләри камил Һәвваны һәгигәтән дә ҹазибәдар едирди. Камил Адәм исә өз кишилик ләјагәтинә ҝөрә һөрмәтә лајиг иди. Онлар бир-бири үчүн јарадылмышдылар. Мүгәддәс Китабда дејилир: «Буна ҝөрә дә киши өз ата-анасыны тәрк едиб, гадынына говушаҹаг вә онлар бир бәдән олаҹаг» (Јарадылыш 2:18-24).
Бизим ҝүнләрдә исә аиләләр дағылыр, киши-гадын мүнасибәтләриндә тәһгирамиз рәфтар вә худбинлик мүшаһидә олунур. Онлар арасындакы рәгабәт мүнагишәләрә сәбәб олур. Бүтүн бунлар Аллаһын киши илә гадын үчүн олан нијјәтинә дахил дејилди. Јеһова кишијә јер үзүндә ҝөзәл бир рол ајырмышды. Гадын исә онун јанында өз хүсуси вә ләјагәтли јерини тутмалы иди. Онлар чијин-чијинә вәһдәтдә чалышмалы идиләр. Инсанын јарандығы ҝүндән бәри Аллаһын рәһбәрлијинә риајәт едән киши вә гадынлар Јеһованын онлар үчүн нәзәрдә тутдуғу ролу сәдагәтлә иҹра етмәјә чалышмышлар. Буна ҝөрә дә, онларын һәјаты даһа хошбәхт вә мәмнунедиҹи олмушдур. Бу роллар нәдән ибарәтдир вә һәр биримиз онлары неҹә иҹра едә биләрик?
[3-ҹү сәһифәдәки шәкил]
Аллаһын гурулушунда һәм кишинин, һәм дә гадынын лајигли ролу вардыр.