Мәләкләрин инсанларын һәјатында ролу

«Бундан сонра ҝөјдән енән башга бир мәләји ҝөрдүм. Онун бөјүк сәлаһијјәти варды... О, ҝүҹлү вә јүксәк сәслә нида едиб деди: “Јыхылды! Бөјүк фаһишә Бабил јыхылды!”» (ВӘҺЈ 18:1, 2).

1, 2. Нә ҝөстәрир ки, Јеһова ирадәсини јеринә јетирмәк үчүн мәләкләрдән истифадә едир?

ПАТМОС адасында сүрҝүндә олан јаша долмуш һәвари Јәһја вәһјләр алыр. О, ‘Руһун һакимијјәти алтында’ «Рәббин ҝүнүндә» баш верән һәјәҹанландырыҹы һадисәләри ҝөрүр. Һәмин ҝүн Иса Мәсиһин 1914-ҹү илдә тахта чыхмасы илә башлајыр вә онун Миниллик Һөкмранлығынын сонунадәк давам едир (Вәһј 1:10).

² Јеһова Аллаһ бу вәһји Јәһјаја билаваситә олараг вермәмишди. О, хүсуси каналдан истифадә етмишди. Вәһј 1:1 ајәсиндә дејилир: «Бу китаб, Иса Мәсиһин вәһјидир. Аллаһ бу вәһји Мәсиһә верди ки, тезликлә баш вермәси ваҹиб олан һадисәләри гулларына ҝөстәрсин. Вә Мәсиһ Өз мәләји васитәсилә бу вәһји ҝөндәриб, гулу Јәһјаја бәјан етди». Јеһова мәләкдән истифадә едәрәк Исанын васитәсилә Јәһјаја ‘Рәббин ҝүнү’ барәдә һејрәтамиз ачыгламалар верди. Јәһја һәм дә «ҝөјдән енән башга бир мәләји ҝөрмүшдү. Онун бөјүк сәлаһијјәти варды». Бу мәләјә һансы тапшырыг верилмишди? «О, ҝүҹлү вә јүксәк сәслә нида едиб деди: “Јыхылды! Бөјүк фаһишә Бабил јыхылды!”» (Вәһј 18:1, 2). Бу ҝүҹлү мәләјә јалан динин дүнја империјасы Бөјүк Бабилин сүгуту барәдә хәбәр вермәк һәвалә олунмушду. Беләликлә, һеч бир шүбһә ола билмәз ки, Јеһованын ирадәсинин јеринә јетирилмәсиндә мәләкләрин хүсуси ролу вардыр. Мәләкләрин Аллаһын нијјәтиндә вә бизим һәјатымызда ојнадығы ролун нәдән ибарәт олдуғуну әтрафлы арашдырмаздан габаг, ҝәлин бу руһани варлыгларын һарадан пејда олдуғуну нәзәрдән кечирәк.

Мәләкләр һарадан пејда олмушлар?

3. Инсанлар мәләкләр барәдә һансы јанлыш тәсәввүрә маликдирләр?

³ Бу ҝүн милјонларла инсан мәләкләрин варлығына инаныр. Амма чохлары мәләкләр вә онларын һарадан пејда олмасы барәдә јанлыш тәсәввүрләрә маликдирләр. Мәсәлән, бә’зи диндар инсанлар дүшүнүрләр ки, әзиз адамлары өләндә ҝөјә Аллаһын јанына галхыр вә мәләк олурлар. Бәс Аллаһын Кәламы мәләкләрин јаранмасы, һәјаты вә мәгсәди һаггында буну өјрәдирми?

4. Мүгәддәс Јазылара әсасән, мәләкләр һарадан пејда олмушлар?

⁴ Ән гүдрәтли вә ән бөјүк сәлаһијјәти олан мәләк баш мәләк Микајылдыр (Јәһуда 9). Бу, мәһз Иса Мәсиһдир (1 Салоникилиләрә 4:16). Чох-чох әввәлләр Јеһова јаратмаға башлајанда, илк олараг бу мәләји јаратды (Вәһј 3:14). Сонралар Јеһова ваһид Оғлунун васитәсилә бүтүн башга руһани варлыглары јаратды (Колослулара 1:15-17). Бу мәләкләри оғлу адландырараг Јеһова Әјјубдан сорушмушду: «Мән јерин тәмәлини гојаркән һарадајдын? Анлајышын варса, сөјлә... Ким онун ҝушәдашыны гојду? Онда дан улдузлары бирҝә нәғмә охујурду, бүтүн илаһи варлыглар [«Аллаһ оғуллары», КМ] севинҹдән һарај салырды» (Әјјуб 38:4, 6, 7). Ајдындыр ки, мәләкләри Аллаһ јарадыб, өзү дә инсанлардан чох-чох әввәл.

5. Мәләкләр неҹә тәшкил олунмушлар?

⁵ Мүгәддәс Китабда дејилир ки, «Аллаһ гарышыглыг дејил, сүлһ Аллаһыдыр» (1 Коринфлиләрә 14:33). Буна мүвафиг олараг Јеһова руһани оғулларыны үч әсас група бөлүб: Онун тахты өнүндә хидмәт едән, мүгәддәслијини бәјан едән вә халгынын руһани тәмизлијини горујан серафлар; әзәмәтини дәстәкләјән керувлар; ирадәсини јеринә јетирән диҝәр мәләкләр (Мәзмур 103:20; Јешаја 6:1-3; Језекел 10:3-5; Даниел 7:10). Бу руһани варлыглар инсанларын һәјатында һансы ролу ојнајыр? (Вәһј 5:11).

Мәләкләрин ролу нәдән ибарәтдир?

6. Јеһова Еден бағында керувлара нә тапшырмышды?

⁶ Илк дәфә руһани варлыглардан Јарадылыш 3:24 ајәсиндә данышылыр: «Рәбб Аллаһ инсаны говду. О, Еден бағынын шәргинә керувларыны вә һәр тәрәфә фырланан одлу гылынҹыны гојду ки, һәјат ағаҹына ҝедән јолу горусунлар». Керувлар Адәм вә Һәвваны илк евләри олан Ҹәннәт бағына ҝирмәјә гојмурдулар. Бу бәшәр тарихинин башланғыҹында иди. Бәс сонра онлар нә илә мәшғул олурдулар?

7. «Мәләк» кими тәрҹүмә олунан сөзүн ибрани вә јунан дилләриндә мә’насы мәләкләрин ролу һаггында нә ачыглајыр?

⁷ Мүгәддәс Китабда мәләкләрин ады тәхминән 400 дәфә чәкилир. «Мәләк» кими тәрҹүмә олунан ибрани вә јунан сөзләри «елчи» мә’насыны дашыјыр. Беләликлә, Аллаһ мәләкләр васитәсилә инсанларла үнсијјәт едирди. Бу мәгаләнин илк ики абзасында гејд едилдији кими, Јеһова һәвари Јәһјаја хәбәр чатдырмаг үчүн мәләкдән истифадә етмишди.

8, 9. а) Мәләјин ҝәлиши Маноаһа вә онун арвадына неҹә тә’сир бағышлады? б) Валидејнләр Маноаһла Аллаһын мәләјинин сөһбәтиндән нә өјрәнә биләрләр?

⁸ Мәләкләр, һәмчинин Аллаһын јердәки хидмәтчиләрини руһландырыр, онлара дајаг олурлар. Мәсәлән, Исраилдә һакимләрин дөврүндә Маноаһ вә онун сонсуз арвады өвлад һәсрәтиндә идиләр. Јеһова мәләјини ҝөндәриб Маноаһын арвадына хәбәр верди ки, онун оғлу олаҹаг. Мүгәддәс Китабда нәгл олунур: «Сән һамилә олуб бир оғул доғаҹагсан вә гој онун башына үлҝүҹ дәјмәсин. Чүнки ушаг ана бәтниндән Аллаһа һәср олунмуш Нәзири олаҹаг. О, Исраили Филиштлиләрин әлиндән гуртармаға башлајаҹаг» (Һакимләр 13:1-5).

⁹ Маноаһын арвады бир оғлан, Мүгәддәс Китабдан јахшы таныдығымыз Шимшону дүнјаја ҝәтирди (Һакимләр 13:24). Ушаг дүнјаја ҝәлмәздән әввәл Маноаһ хаһиш етди ки, һәмин мәләк гајыдыб, ушағы тәрбијә етмәји онлара өјрәтсин. Маноаһ сорушду: «Ушағын һәјат тәрзи вә иши нә олаҹаг?» Јеһованын мәләји онун арвадына вердији ҝөстәришләри бир дә тәкрар етди (Һакимләр 13:6-14). Бу, Маноаһы неҹә дә руһландырды! Бу ҝүн мәләкләр адамларын јанына ҝәлмирләр, амма валидејнләр Маноаһдан нүмунә ҝөтүрәрәк ушагларынын тәрбијәсиндә Јеһованын рәһбәрлијини ахтара биләрләр (Ефеслиләрә 6:4).

10, 11. а) Сурија ордусу Елишаны тутмаг үчүн ҝәләндә Елиша вә гуллугчусу өзләрини неҹә апардылар? б) Бу һадисә үзәриндә дүшүнәрәк биз һансы фајданы ала биләрик?

¹⁰ Мәләкләрин инсанлара көмәк етдијини Елиша пејғәмбәрин ҝүнләриндә баш верән һадисәдән ҝөрмәк олар. Елиша Исраилин Дотан шәһәриндә галырды. Бир ҝүн Елишанын гуллугчусу сәһәр еркән галхыб бајыра баханда шәһәрин атларла вә дөјүш арабалары илә мүһасирә олундуғуну ҝөрдү. Суријанын падшаһы Елишаны тутмаг үчүн бөјүк орду ҝөндәрмишди. Елишанын гуллугчусу нә етди? О, тәлаш ичиндә гышгырды: «Вај, ағам, нә едәҹәјик?» Она елә ҝәлирди ки, артыг һәр шеј битиб. Анҹаг Елиша она ҹаваб верди: «Горхма, чүнки бизимлә оланлар онларла оланлардан чохдур». О нәји нәзәрдә тутурду? (2 Падшаһлар 6:11-16).

¹¹ Мәләкләрин ордусунун онлара көмәк етмәк үчүн орада олдуғундан Елишанын хәбәри вар иди. Лакин онун гуллугчусу һеч нә ҝөрмүрдү. Буна ҝөрә дә «Елиша дуа едиб деди: “Ја Рәбб, онун ҝөзләрини ач ки, ҝөрсүн”. Рәбб нөкәрин ҝөзләрини ачды вә о ҝөрдү ки, дағ одлу атлар вә дөјүш арабалары илә долудур. Онлар Елишаны әһатәјә алмышдылар» (2 Падшаһлар 6:17). Гуллугчу бир орду мәләји ҝөрә билди. Биз дә мәләкләрин Јеһованын вә Мәсиһин рәһбәрлији алтында Јеһованын халгына дајаг дуруб, ону мүдафиә етдијини руһани ҝөзләрлә ҝөрә биләрик.

Мәсиһин ҝүнләриндә мәләкләрин көмәји

12. Ҹәбрајыл мәләк Мәрјәмә неҹә үрәк-дирәк верди?

¹² Ҝәлин ҝөрәк јәһуди гызы бакирә Мәрјәм «һамилә галыб бир Оғул доғаҹаг вә Онун адыны Иса гојаҹагсан» хәбәрини аланда мәләк она неҹә үрәк-дирәк верди. Һејрәтләндириҹи хәбәри чатдырмаздан габаг Аллаһын ҝөндәрдији Ҹәбрајыл мәләк она деди: «Горхма, Мәрјәм; чүнки Аллаһ гаршысында лүтф тапдын» (Лука 1:26, 27, 30, 31). Аллаһын лүтфүнү газандығыны ешидән Мәрјәм неҹә дә руһланмыш вә мөһкәмләнмишди!

13. Мәләкләр Исаја неҹә дајаг олдулар?

¹³ Башга бир һалда исә Шејтан Исаны сәһрада үч дәфә имтаһана чәкәндән сонра мәләкләр она дајаг олмушду. Мүгәддәс Јазылардан охујуруг ки, сынагларын сонунда «иблис Ону тәрк етди; вә будур, мәләкләр ҝәлиб Она хидмәт едирдиләр» (Матта 4:1-11). Исанын өлүмүндән габагкы ҝеҹә дә буна охшар һадисә баш верди. Иса әзаб ичиндә диз үстә чөкүб дуа етди: «“Еј Ата, әҝәр истәјирсәнсә, бу касаны Мәндән узаглашдыр; амма Мәним ирадәм дејил, гој Сәнинки олсун”... Ҝөјдән бир мәләк Она ҝөрүндү вә Она гүввәт верди» (Лука 22:42, 43). Бәс бу ҝүн мәләкләр бизә неҹә көмәк едирләр?

Мүасир дөврдә мәләкләрин көмәји

14. Јеһованын Шаһидләри мүасир дөврдә һансы тә’гибләрлә үзләшмиш вә бунун нәтиҹәси нә олмушдур?

¹⁴ Јеһованын Шаһидләринин тәблиғ ишинин мүасир тарихинә нәзәр саланда мәләкләрин көмәјини ајдын ҝөрмүрүкмү? Мәсәлән, Јеһованын халгы Икинҹи Дүнја мүһарибәсиндән (1939-1945) әввәл вә мүһарибә заманы Алманија вә Гәрби Авропада насизмин гәзәбли һүҹумларына таб ҝәтирә билмишдир. Италија, Испанија вә Португалијада католик фашист режими алтында исә онлар даһа узун мүддәт тә’гибләрә мә’руз галмышлар. Онилликләр бојунҹа Јеһованын Шаһидләри кечмиш Совет Иттифагында вә ондан асылы республикаларда, һәмчинин бә’зи Африка өлкәләриндә тә’гибләрлә үзләшмишләрa. Бу јахынларда исә Јеһованын Шаһидләри Ҝүрҹүстанда амансыз тә’гибләрә мә’руз галмышлар. Шејтан Јеһованын хидмәтчиләрини сусдурмаг үчүн бүтүн васитәләрдән истифадә етмишдир. Буна бахмајараг, онлар бир тәшкилат кими белә мүгавимәтләрә таб ҝәтирмиш вә чичәкләнмишләр. Бу, гисмән мәләкләрин мүдафиә етмәси сајәсиндә мүмкүн олмушдур (Мәзмур 34:7; Даниел 3:28; 6:22).

15, 16. Мәләкләр үмумдүнја тәблиғ ишиндә Јеһованын Шаһидләринә неҹә көмәк едирләр?

¹⁵ Јеһованын Шаһидләри онлара ­һәвалә олунмуш Аллаһын Падшаһлығы һаггында мүждәни бүтүн дүнјада тәблиғ етмәк вә һәр јанда марагланан инсанлара Мүгәддәс Китаб тә’лимләрини өјрәдәрәк шаҝирд һазырламаг ишинә ҹидди јанашырлар (Матта 28:19, 20). Анҹаг онлар јахшы баша дүшүрләр ки, мәләкләрин көмәји олмадан бу ишин өһдәсиндән ҝәлә билмәзләр. Буна ҝөрә дә Вәһј 14:6, 7 ајәләриндә дејиләнләр онлары даима руһландырыр. Бурада һәвари Јәһја јазыр: «Ҝөјүн ортасында учан башга бир мәләји дә ҝөрдүм. Онун әбәди бир Мүждәси вар иди ки, јер үзүндә јашајанлара, һәр милләтә, һәр гәбиләјә, һәр дилә вә һәр халга тәблиғ етсин. Вә о, јүксәк сәслә дејирди: “Аллаһдан горхун! Она иззәт верин! Чүнки Онун һөкмүнүн вахты ҝәлди. Ҝөјү, јери, дәнизи вә су булагларыны Јарадана сәҹдә един!”»

¹⁶ Бу сөзләрдән ајдын ҝөрүнүр ки, Јеһованын Шаһидләринин үмумдүнја тәблиғ иши мәләкләрин рәһбәрлији вә көмәји илә һәјата кечирилир. Јеһова мәләкләрдән истифадә едәрәк Өз хидмәтчиләринә сәмими инсанлары тапмаға көмәк едир. Мәләкләр, һәмчинин Шаһидләри лајиг оланлара јөнәлдирләр. Јеһованын Шаһидләринин чәтинликдә олан вә руһани көмәјә еһтијаҹы олан инсанлара дүз вахтында раст ҝәлмәләринин сәбәби мәһз будур. Белә һадисәләр о гәдәр тез-тез баш верир ки, онлары садәҹә тәсадүф һесаб етмәк олмаз.

Мәләкләрин јахын ҝәләҹәкдәки мөһтәшәм ролу

17. Бир мәләк Ассурија ордусуна нә етди?

¹⁷ Елчи кими хидмәт етмәкдән вә Јеһоваја ибадәт едәнләрә дајаг олмагдан савајы, мәләкләр башга иши дә јеринә јетирирләр. Кечмиш заманларда онлар Аллаһын һөкмләрини јеринә јетирирдиләр. Мәсәлән, б. е. ә. сәккизинҹи әсрдә ассуријалылар бөјүк орду илә Јерусәлими ишғал етмәјә һазырлашырдылар. Јеһова нә етди? О деди: «Мән бу шәһәри Өзүм үчүн, гулум Давудун хатиринә горујуб хилас едәҹәјәм». Сонра баш верәнләр Мүгәддәс Китабда белә тәсвир олунур: «О ҝеҹә Рәббин мәләји чыхыб Ашшур ордуҝаһында јүз сәксән беш мин нәфәри гырды. Сәһәр еркән галхыб ҝөрдүләр ки, онларын һамысы өлдүрүлүб» (2 Падшаһлар 19:34, 35). Бәли, инсан ордусу бир мәләјин ҝүҹү илә мүгајисәдә неҹә дә зәифдир!

18, 19. Мәләкләр јахын ҝәләҹәкдә һансы мөһтәшәм иши ҝөрәҹәкләр вә бу, бәшәријјәтдә өз әксини неҹә тапаҹаг?

¹⁸ Мәләкләр јахын ҝәләҹәкдә дә Аллаһын һөкмүнү иҹра едәҹәкләр. Чох тезликлә Иса «гүдрәтли мәләкләри илә аловлу атәш ичәрисиндә» ҝәләҹәк. Онларын мәгсәди ‘Аллаһы танымајан вә Өзү [Иса Мәсиһ] барәсиндәки Мүждәјә итаәт етмәјәнләрә ҹәза вермәк’ олаҹагдыр (2 Салониклиләрә 1:7, 8). Бунун бәшәријјәтдә неҹә дәрин из бурахаҹағыны бир тәсәввүрүнүзә ҝәтирин! Аллаһын һазырда бүтүн дүнјада тәблиғ олунан хош хәбәринә биҝанә јанашанлар мәһв олунаҹаглар. Јеһоваја, салеһлијә вә тәвазөкарлыға мејл саланлар исә Онун ‘гәзәб ҝүнүндә гуртулаҹаг’ вә зәрәр алмајаҹаглар (Сефанја 2:3).

¹⁹ Биз миннәтдарыг ки, Јеһова гүдрәтли мәләкләринин васитәсилә јер үзүндәки хидмәтчиләринә дајаг олур вә онлары мөһкәмләндирир. Мәләкләрин Аллаһын нијјәтиндә ојнадығы ролу баша дүшмәјимиз хүсусилә тәсәлливериҹидир, чүнки елә мәләкләр вардыр ки, Јеһоваја гаршы үсјан галдырмыш вә Шејтанын рәһбәрлији алтына дүшмүшләр. Бәс һәгиги мәсиһчиләр Шејтан Иблисин вә онун ҹинләринин ҝүҹлү тә’сириндән неҹә горуна биләрләр? Бу суал нөвбәти мәгаләдә мүзакирә олунаҹаг.

[Һашијә]

Сиз нә өјрәндиниз?

• Мәләкләр һарадан пејда олмушлар?

• Аллаһ кечмишдә мәләкләрдән неҹә истифадә едирди?

• Вәһј 14:6, 7 ајәләри мәләкләрин бу ҝүнки фәалијјәти һаггында һансы мә’луматы верир?

• Мәләкләр јахын ҝәләҹәкдә һансы мөһтәшәм иши ҝөрәҹәкләр?

[13-ҹү сәһифәдәки шәкил]

Мәләк Маноаһы вә онун арвадыны руһландырды.

[15-ҹи сәһифәдәки шәкил]

«Бизимлә оланлар онларла оланлардан чохдур».