Иса Мәсиһ — ән бөјүк Миссионер
«Мән... Онданам вә О Мәни ҝөндәрди». ЈӘҺ. 7:29
1, 2. «Миссионер» сөзүнүн мәнасы нәдир вә кими ән бөјүк Миссионер адландырмаг олар?
«МИССИОНЕР» сөзүнү ешидәндә ағлына нә ҝәлир? Бәзиләри тәсәввүрүнә, хидмәт етдији өлкәләрин сијаси вә игтисади ишләринә гарышан Христиан дүнјасынын миссионерләрини ҝәтирир. Ҝүман ки, сән Јеһованын Шаһиди кими, Рәһбәрлик Шурасынын дүнјанын мүхтәлиф өлкәләриндә хош хәбәри тәблиғ етмәк үчүн ҝөндәрдији миссионерләри дүшүнүрсән (Мат. 24:14). Бу миссионерләр тәмәннасыз олараг вахтларыны вә гүввәләрини инсанларын Јеһова Аллаһа јахынлашмаларына вә Онунла хүсуси мүнасибәт јаратмаларына көмәк етмәк кими шәрәфли ишә сәрф едирләр (Јаг. 4:8).
2 «Миссионер» вә «миссионерләр» сөзләринә «Мүгәддәс Јазыларын Јени Дүнја Тәрҹүмәси»нин әсас мәтниндә раст ҝәлинмир. Лакин «Гејдләрлә олан Мүгәддәс Китаб»да (инҝ.) Ефеслиләрә 4:11 ајәсинә верилән һашијәдә јазылыб ки, «мүждәчиләр» кими тәрҹүмә олунан јунан сөзүнү «миссионерләр» кими дә тәрҹүмә етмәк олар. Јеһова ән бөјүк Мүждәчи олса да, кимсә тәрәфиндән һеч вахт ҝөндәрилмәдији үчүн Ону ән бөјүк Миссионер адландырмаг олмаз. Иса Мәсиһ сәмави Атасы һаггында демишди: «Мән... Онданам вә О Мәни ҝөндәрди» (Јәһ. 7:29). Бәшәријјәтә бөјүк мәһәббәтиндән ирәли ҝәләрәк, Јеһова ваһид Оғлуну јер үзүнә ҝөндәрди (Јәһ. 3:16). Јер үзүнә ҝөндәрилмәсинин сәбәбләриндән бири ‘һәгигәтә шәһадәт етмәк’ олдуғу үчүн, Иса ән бөјүк, ән јахшы Миссионер адландырыла биләр (Јәһ. 18:37). О, Падшаһлыг һаггында хош хәбәри там мүвәффәгијјәтлә бәјан етмишди вә онун хидмәтиндән бу ҝүн биз дә фајдаланырыг. Мәсәлән, миссионер тәјин олунуб-олунмасаг да, Исанын тәлим үсулларындан хидмәтимиздә истифадә едә биләрик.
3. Һансы суаллары нәзәрдән кечирәҹәјик?
3 Исанын Падшаһлығын тәблиғчиси кими фәалијјәт ҝөстәрмәси биздә нөвбәти суаллары доғурур: Иса јер үзүндә хидмәт едәркән нәләрлә гаршылашмышды? Онун тәлимләри нә үчүн сәмәрә ҝәтирмишди? Вә онун хидмәтини мүвәффәгијјәтли едән нә иди?
Јени әразидә фәдакарлыг руһу
4-6. Иса јер үзүнә ҝөндәриләндә һәјатында һансы дәјишикликләр баш верди?
4 Мүасир миссионерләр, еләҹә дә Падшаһлығын тәблиғчиләринә бөјүк еһтијаҹ олан әразиләрә көчән бәзи мәсиһчиләр әввәлләр јашадыгларындан ашағы һәјат сәвијјәсинә ујғунлашмалы олмушлар. Амма биз Исанын тәмиз нијјәтлә Јеһоваја хидмәт едән мәләкләр арасында Атасы илә ҝөјдә јашајаркән олдуғу шәраити илә јердәки шәраити арасындакы фәрги тәсәввүрүмүзә белә ҝәтирә билмәрик (Әјј. 38:7). Позулмуш дүнјада ҝүнаһлы инсанлар арасында јашамаг неҹә дә фәргли иди! (Марк 7:20-23). Иса, һәтта онун ән јахын шаҝирдләри арасындакы рәгабәтә сәбир етмәли олмушду (Лука 20:46; 22:24). Тәбии ки, о, јер үзүндә гаршылашдығы һәр бир чәтинлијин өһдәсиндән мүкәммәл сурәтдә ҝәлирди.
5 Иса мөҹүзәли сурәтдә инсан дилиндә данышмаға башламады: о буну көрпәликдән өјрәнмәли олду. Исанын ҝөјдә мәләкләрә ҝөстәришләр вердијини нәзәрә алсаг, бу доғрудан да бөјүк дәјишиклик иди! Иса јер үзүндә ән азы бир ‘инсан дилиндән’ истифадә едирди. Бу, ‘мәләк дилиндән’ тамамилә фәргләнирди (1 Кор. 13:1). Ләтиф кәламлара ҝәлдикдә исә, һеч ким Иса кими данышмамышды (Лука 4:22).
6 Ҝәлин ҝөрәк Аллаһын Оғлу јер үзүнә ҝәләндә һәјатында даһа һансы бөјүк дәјишикликләр олду. Иса Адәмдән ҝүнаһы мирас алмаса да, сонрадан онун ‘гардашлары’, јәни мәсһ едилмиш давамчылары оланлар кими, инсан олду. (Ибраниләрә 2:17, 18 ајәләрини оху.) Јер үзүндәки һәјатынын ахырынҹы ҝеҹәсиндә Иса сәмави Атасындан ‘он ики леҝиондан чох мәләк’ ҝөндәрмәсини риҹа етмәди. Амма тәсәввүрүнә ҝәтир: Баш мәләк Микајыл олан Исанын сәрәнҹамында нә гәдәр мәләк варды! (Мат. 26:53; Јәһуда 9). Дүздүр, Иса мөҹүзәләр ҝөстәрирди, лакин јер үзүндә етдикләри ҝөјдә едә билдикләри илә мүгајисәдә нисбәтән мәһдуд иди.
7. Јәһудиләр Ганунла бағлы мәсәләләрдә неҹә давранырдылар?
7 Иса инсан кими јер үзүнә ҝәлмәздән әввәл «Кәлам» олдуғу мүддәтдә, чох еһтимал ки, Аллаһын сәһрада исраиллиләрә јол ҝөстәрән Нүмајәндәси иди (Јәһ. 1:1; Чых. 23:20-23). Буна бахмајараг, онлар мәләкләр васитәсилә алдыглары Гануна ‘риајәт етмәдиләр’ (Һәв. иш. 7:53; Ибр. 2:2, 3). Биринҹи әсрдә јашамыш јәһуди дин рәһбәрләри дә Ганунун әсл мәнасыны сезмәдиләр. Мисал үчүн, Шәнбә һаггындакы гануна нәзәр салаг. (Марк 3:4-6 ајәләрини оху.) Дин алимләри вә фәрисејләр ‘Ганунун даһа ваҹиб ишләрини, әдаләти, мәрһәмәти вә иманы атырдылар’ (Мат. 23:23). Лакин Иса руһдан дүшмүрдү вә һәгигәти бәјан етмәјә давам едирди.
8. Нә үчүн Иса бизә јардым едә биләр?
8 Иса фәдакарлыг руһуна малик иди. О, инсанлары севир вә онлара көмәк етмәји бәрк арзулајырды. О, мүждәчи руһуну һеч вахт итирмирди. Вә јер үзүндә хидмәт едәркән Јеһоваја садиг галдығына ҝөрә, Иса она «итаәт едәнләрин һамысы үчүн әбәди гуртулуш сәбәби олду». Үстәлик, «Өзү имтаһан олунуб әләм чәкдији үчүн, [бизим кими] имтаһан олунанлара јардым едә биләр» (Ибр. 2:18; 5:8, 10).
Јахшы тәлим алмыш Мүәллим
9, 10. Јер үзүнә ҝөндәрилмәздән әввәл, Иса неҹә тәлим алмышдыр?
9 Мүасир мәсиһчиләр миссионер кими ҝөндәрилмәздән өнҹә, Рәһбәрлик Шурасы онларын тәлим алмасынын гејдинә галыр. Бәс Иса Мәсиһ дә тәлим алмышдымы? Бәли, амма о, Мәсиһ кими мәсһ олунмаздан әввәл нә дини мәктәбдә охумуш, нә дә ки һансыса танынмыш мүәллимин шаҝирди олмушду. (Јәһ. 7:15; мүгајисә ет: Һәвариләрин ишләри 22:3.) Белә исә, Исада тәлим вермәк габилијјәтинин олдуғуну нәјә әсасән дејә биләрик?
10 Анасы Мәрјәмдән вә өҝеј атасы Јусифдән нә өјрәндијиндән асылы олмајараг, о, хидмәт үчүн тәлими ән јүксәк Мәнбәдән алмышды. Буна ҝөрә Иса демишдир: «Мән Өзүмдән сөјләмәдим; Мәни ҝөндәрән Ата Өзү нә дејәҹәјими вә нә сөјләјәҹәјими Мәнә әмр етди» (Јәһ. 12:49). Диггәт јетирин ки, Оғул вердији тәлим һагда хүсуси ҝөстәришләр алмышды. Шүбһәсиз ки, Иса јер үзүнә ҝәлмәздән әввәл, Атасынын тәлиматларыны динләмәјә чох вахт ајырмышды. Мәҝәр о бундан јахшы тәлим ала биләрдими?
11. Атасынын инсанлара мүнасибәтини Иса нә дәрәҹәдә әкс етдирирди?
11 Оғул јарадылдығы вахтдан бәри Атасы илә јахын мүнасибәтдә олмушду. Иса јерә ҝәлмәздән әввәл, Јеһованын инсанларла давранышыны мүшаһидә етмәклә онлара неҹә јанашдығыны ҝөрүрдү. Аллаһын бәшәријјәтә мәһәббәти Оғулда о дәрәҹәдә әкс олунурду ки, о, һикмәтин тәҹәссүмү кими дејә билди: «Бәшәр өвладларына ҝөрә фәрәһләнирдим» (Сүл. мәс. 8:22, 31).
12, 13. а) Иса Атасынын исраиллиләрлә мүнасибәтини мүшаһидә етмәкдән нә өјрәнди? б) Иса алдығы тәлими неҹә тәтбиг едирди?
12 Оғул хошаҝәлмәз вәзијјәтләрдә Атасынын неҹә даврандығыны мүшаһидә етмәклә дә өјрәнмишди. Мисал үчүн, ҝәлин Јеһованын инадҹыл исраиллиләрлә неҹә даврандығына нәзәр салаг. Неһемја 9:28 ајәсиндә дејилир: «Раһат олан кими јенә Сәнин [Јеһованын] нәзәриндә пис ишләр ҝөрдүләр. Буна ҝөрә дә Сән онлары дүшмәнә тәслим етдин, дүшмәнләри дә онлара һөкм етди. Онлар јенә дә Сәнә фәрјад етди, Сән дә онлары ҝөјләрдән ешидиб Өз бөјүк мәрһәмәтинә ҝөрә дәфәләрлә гуртардын». Јеһова илә әмәкдашлығы вә ишләрини мүшаһидә етмәси сајәсиндә, Иса јер үзүндә хидмәт едәркән инсанлара ејни шәфгәт һисси илә јанашырды (Јәһ. 5:19).
13 Иса шаҝирдләринә шәфгәтлә јанашмагла өјрәндикләрини тәтбиг едирди. Өлүмүндән әввәлки ҝеҹә Исанын чох севдији һәвариләринин ‘һамысы ону тәрк едиб гачды’ (Мат. 26:56; Јәһ. 13:1). Һәвари Петер һәтта Мәсиһи үч дәфә инкар етди! Амма Иса һәвариләринә онун јанына гајытмаға имкан верди. О, Петерә деди: «Мән сәнин үчүн дуа етдим ки, иманын азалмасын; сән дә бир заман дөнүб өз гардашларына гүввәт вер» (Лука 22:32). Руһани Исраил «һәвариләрлә пејғәмбәрләрин» тәмәли үзәриндә мөһкәм тикилмишдир вә Јени Јерусәлимин диварынын он ики тәмәл дашынын үстүндә Гузунун — Иса Мәсиһин он ики садиг һәварисинин адлары вар иди. Бизим ҝүнләрдә дә, мәсһ олунмуш мәсиһчиләр һәср олунмуш әмәкдашлары олан ‘башга гојунларла’ бирликдә Аллаһын гүдрәтли әли вә севимли Оғлунун рәһбәрлији алтында Падшаһлыг һаггында хош хәбәри тәблиғ едән бир тәшкилат кими чичәкләнир (Ефес. 2:20; Јәһ. 10:16; Вәһј 21:14).
Иса неҹә өјрәдирди?
14, 15. Исанын тәлим үсулу дин алимләри вә фәрисејләринкиндән нәдә фәргләнирди?
14 Иса давамчыларына тәлим верәркән өјрәндикләрини неҹә тәтбиг едирди? Исанын вә јәһуди дин рәһбәрләринин тәлим үсулларыны мүгајисә едәндә, Исанын тәлим үсулларынын онларынкындан гат-гат үстүн олдуғуну ҝөрүрүк. Дин алимләри вә фәрисејләр ‘өз әнәнәләри наминә Аллаһын әмрини тәсирсиз едирдиләр’. Онлардан фәргли олараг, Иса өзүндән данышмырды, һәмишә Аллаһын сөзүнү вә ја хәбәрини чатдырырды (Мат. 15:6; Јәһ. 14:10). Биз дә белә етмәлијик.
15 Исаны дин рәһбәрләриндән тамамилә фәргләндирән башга бир амил дә варды. О, дин алимләри вә фәрисејләр һагда деди: «Сизә әмр етдикләри һәр шејә риајәт вә әмәл един; лакин онларын әмәлләринә ҝөрә етмәјин, чүнки сөјләрләр, амма әмәл етмәзләр» (Мат. 23:3). Иса өјрәтдикләринә өзү дә риајәт едирди. Ҝәлин бунун һәгигәтән дә белә олдуғуну ҝөстәрән бир нүмунәјә нәзәр салаг.
16. Нәјә ҝөрә дејә биләрик ки, Иса Матта 6:19-21 ајәләриндә дедији сөзләрә әсасән јашајырды?
16 Иса шаҝирдләрини ‘ҝөјдә хәзинәләр јығмаға’ тәшвиг едирди. (Матта 6:19-21 ајәләрини оху.) Бәс Исанын өзү бу нәсиһәтә мүвафиг јашајырдымы? Бәли, о өзү һаггында һаглы олараг дејә билди: «Түлкүләрин һини вә ҝөј гушларынын јувасы вардыр; Инсан Оғлу исә башыны сөјкәмәјә јер тапмыр» (Лука 9:58). Иса садә һәјат тәрзи сүрүрдү. О, әсасән Падшаһлыг һагда хош хәбәри бәјан етмәклә мәшғул иди вә јер үзүндә хәзинәләр јығмаг нәтиҹәсиндә јаранан гајғылардан азад олмағын нә демәк олдуғуну ҝөстәрди. Иса ҝөјдә хәзинәләр јығмағын даһа јахшы олдуғуну, ‘нә ҝүвә, нә пас мәһв едәр вә нә оғрулар ораја ҝирәр, нә дә оғурларлар’ демәклә гејд етди. Бәс сән Исанын ҝөјләрдә хәзинәләр јығмаг нәсиһәтинә әмәл едирсәнми?
Инсанлары Исаја ҹәлб едән хүсусијјәтләр
17. Исаны мөһтәшәм мүждәчи едән һансы хүсусијјәтләр иди?
17 Исаны мөһтәшәм мүждәчи едән һансы хүсусијјәтләр иди? Онлардан бири, көмәк етдији инсанлара мүнасибәти иди. Иса Јеһованын ҝөзәл хүсусијјәтләриндән олан тәвазөкарлығы, мәһәббәти вә шәфгәти дә әкс етдирирди. Ҝәлин ҝөрәк бу хүсусијјәтләр бир чохларыны Исаја неҹә ҹәлб едирди.
18. Исанын тәвазөкар олдуғуну нәјә әсасән дејә биләрик?
18 Иса јерә ҝәлмәк тапшырығыны гәбул етмәклә «Өзүнү һеч едәрәк Өзүнү гул сурәтинә салыб, инсанлара охшар олду» (Филип. 2:7). Бу, тәвазөкарлыг әламәти иди. Бундан әлавә, Иса инсанлара јухарыдан ашағы бахмырды. О белә дүшүнмүрдү: «Мән ҝөјдән ҝәлмишәм, буна ҝөрә мәнә гулаг асмалысыныз». Фырылдагчы мәсиһләрдән фәргли олараг, Иса өзүнүн һәгиги Мәсиһ олдуғу барәдә ҹар чәкмирди. Бәзән о, инсанлара онун ким олдуғуну вә етдикләрини башгаларына данышмағы гадаған едирди (Мат. 12:15-21). Иса истәјирди ки, адамлар онун ардынҹа ҝетмәк гәрарына шәхси мүшаһидәләри әсасында ҝәлсинләр. О өз шаҝирдләриндән, ҝөјләрдә әмәкдашлыг етдији камил мәләкләр кими олмағы ҝөзләмирди вә бу онлар үчүн әсл хејир-дуа иди.
19, 20. Мәһәббәт вә шәфгәт Исаны башгаларына көмәк етмәјә неҹә тәшвиг едирди?
19 Иса Мәсиһ сәмави Атасынын әсас хүсусијјәти олан мәһәббәти дә тәзаһүр етдирирди (1 Јәһ. 4:8). О, халга мәһәббәтдән ирәли ҝәләрәк тәлим верирди. Мисал үчүн, онун бир ҝәнҹ рәисә неҹә мүнасибәт ҝөстәрдијинә бахаг. (Марк 10:17-22 ајәләрини оху.) Иса «она мәһәббәтлә бахды» вә она көмәк етмәк истәди, амма ҝәнҹ рәис Мәсиһин давамчысы олмаг үчүн мал-дөвләтини бурахмаг истәмәди.
20 Исанын ҹәлбедиҹи хүсусијјәтләриндән бири дә шәфгәт иди. Онун тәлиминә һај верәнләр, бүтүн гејри-камил инсанлар кими, проблемләрин ағыр јүкүнү дашыјырдылар. Буну билән Иса онлары шәфгәт вә рәһмлә өјрәдирди. Мәсәлән, бир дәфә о вә һәвариләри о гәдәр мәшғул идиләр ки, һәтта јемәк јемәјә белә вахтлары јох иди. Бәс Иса ону динләмәјә ҝәлән издиһамы ҝөрәндә неҹә давранды? Исанын «онлара јазығы ҝәлди; чүнки чобансыз гојунлар кими идиләр. Вә онлара чох шејләр өјрәтмәјә башлады» (Марк 6:34). Иса хидмәт етдији әразидәки инсанларын аҹынаҹаглы вәзијјәтинә диггәт јетирирди вә өз гүввәсини онлара тәлим вермәјә вә рифаһлары үчүн мөҹүзәләр ҝөстәрмәјә сәрф етдирди. Исанын ҝөзәл хүсусијјәтләри бәзи инсанлары ҹәлб едир, сөзләри исә һәрәкәтә тәшвиг едирди вә онлар онун шаҝирдләри олурдулар.
21. Нөвбәти мәгаләдә нәји мүзакирә едәҹәјик?
21 Нөвбәти мәгаләдә Исанын јер үзүндәки хидмәтиндән даһа чох шеј өјрәнә биләҹәјимизи ҝөрәҹәјик. Биз ән бөјүк Миссионер олан Иса Мәсиһи даһа неҹә тәглид едә биләрик?
Неҹә ҹаваб верәрдиниз?
• Иса јер үзүнә ҝәлмәздән әввәл неҹә тәлим алмышды?
• Исанын тәлим үсуллары дин алимләри вә фәрисејләрин тәлиминдән нәдә үстүн иди?
• Исанын һансы хүсусијјәтләри инсанлары ҹәлб едирди?
[15-ҹи сәһифәдәки шәкил]
Иса халгы неҹә өјрәдирди?