Мәјуслуға бахмајараг, хошбәхт ола биләрсиниз

МӘЈУСЛУҒУ дадмајан адам вармы?! Һәтта сәмави Атамыз Јеһова Аллаһ да мәјуслуғун аҹысыны дадмышдыр. Мәсәлән, О, исраиллиләри Мисир көләлијиндән азад едиб бол-бол хејир-дуаландырмышды. Лакин Мүгәддәс Китабын дедикләринә диггәт јетирин: «Аллаһы дөнә-дөнә сынадылар, Исраилин Мүгәддәсинин хатиринә дәјдиләр» (Мәзмур 78:41). Буна бахмајараг, Јеһова һәмишә «хошбәхт Аллаһ» олмушдур (1 Тимотејә 1:11, ЈД).

Әслиндә, мәјуслуға чох шеј сәбәб олур. Белә һалларда хошбәхтлијимизи неҹә горуја биләрик? Јеһова Аллаһын мәјуслуғун өһдәсиндән ҝәлмәсиндән нә өјрәнирик?

Мәјуслуғун сәбәбләри

Аллаһын Кәламында дејилир ки, һамынын гаршысына ‘вахт вә тәсадүф чыхыр’ (Ваиз 9:11, ЈД). Ҝөзләнилмәдән баш верән ҹинајәт, бәдбәхт һадисә вә ја хәстәлик бизә бөјүк кәдәр вә мәјуслуг ҝәтирә биләр. Мүгәддәс Китаб һәмчинин дејир: «Ҝеҹикән үмид үрәји хәстәләндирир» (Сүлејманын мәсәлләри 13:12). Јахшы бир шеји сәбирсизликлә ҝөзләмәк бизә севинҹ ҝәтирир, лакин о ҝеҹикирсә, биз үмидсизлијә вә мәјуслуға гапыла биләрик. Мәсәлән, миссионер хидмәтиндә галмаг истәјән Дунканa, арвады илә бәрабәр узун илләр хидмәт етдикдән сонра евләринә гајытмалы олду. О дејир: «Биринҹи дәфә иди ки, нә едәҹәјими билмирдим. Һеч бир мәгсәдим јох иди. Һәр шеј әһәмијјәтини итирмишди». Клара илә олдуғу кими, инсан мәјуслуғун аҹысыны узун мүддәт чәкә биләр. О данышыр: «Һамиләлијимин једдинҹи ајында ушағымы салдым. Бу чохдан баш вериб, амма сәһнәдә чыхыш едән оғлан ушағыны ҝөрәндә һәлә дә өз-өзүмә фикирләширәм: “Оғлум сағ галсајды, о да бу јашда оларды”».

Ҝөрүшдүјү кәслә ајрылмаг, никаһын дағылмасы, ушағын үсјанкарлығы, әмәкдашын хаинлији, јахуд достун нашүкүрлүјү инсана үрәкағрысы ҝәтирә биләр. Гејри-камил инсанлар арасында вә чәтин зәманәдә јашадығымыз үчүн, мәјуслуг ҝәтирән шејләр сајсыз-һесабсыздыр.

Мүәјјән шејләрә мүвәффәг олмајанда да мәјус олуруг. Мисал үчүн, имтаһандан кәсиләндә, иш тапмајанда вә ја киминсә мәһәббәтини газанмајанда өзүмүзү дәјәрсиз һисс едә биләрик. Әзизләримиздән киминсә руһән зәифләмәси дә бизи мәјуслуға сала биләр. Мери дејир: «Мәнә елә ҝәлирди ки, гызым һәгигәтдә чичәкләнир. Онун үчүн јахшы нүмунә олдуғуму дүшүнүрдүм. Амма о, Јеһова Аллаһы вә аиләмизин нормаларыны инкар едәндә өзүмү тамамилә уғурсуз һисс етдим. Һәјатда газандығым һеч бир наилијјәт мәнә тәскинлик ҝәтирмирди. Тамам руһдан дүшмүшдүм».

Мәјуслуғун өһдәсиндән неҹә ҝәлә биләрик? Бу суала ҹаваб тапмаг үчүн, ҝәлин Јеһованын мәјуслуғун өһдәсиндән ҝәлмәкдә бизә гојдуғу нүмунәјә нәзәр салаг.

Диггәтинизи мәсәләнин һәллинә јөнәлдин

Јеһова Аллаһ мәһәббәтлә илк инсанларын гајғысына галса да, онлар нашүкүр вә үсјанкар чыхдылар (Јарадылыш, 2 вә 3-ҹү фәсилләр). Сонра онларын оғлу Габил пис хүсусијјәт тәзаһүр етдирмәјә башлады. Габил, Јеһованын хәбәрдарлығына әһәмијјәт вермәјиб, доғма гардашыны гәтлә јетирди (Јарадылыш 4:1-8). Тәсәввүр едә биләрсинизми, Јеһова неҹә дә мәјус олмушду?

Нәјә ҝөрә бу мәјуслуг Аллаһы хошбәхтликдән мәһрум етмәди? Чүнки О, Јер күрәсини камил инсанларла долдурмаг нијјәтиндә иди вә Өз мәгсәдинә наил олмаг үчүн һәр шеји етмәјә давам едир (Јәһја 5:17). Бу мәгсәдлә О, фидијә гурбанлығы тәгдим етди вә Өз Падшаһлығыны тәсис етди (Матта 6:9, 10; Ромалылара 5:18, 19). Јеһова Аллаһ диггәтини проблемә јох, онун һәллинә јөнәлтди.

Аллаһын Кәламы бизи тәшвиг едир ки, диггәтимизи кечмишдә етдијимиз сәһвләрә јох, һал-һазырда едә биләҹәјимиз шејләрә јөнәлдәк. Орада дејилир: «Доғру, еһтирамлы, әдаләтли, пак, ҹазибәли, етибарлы олан нә варса, әҝәр бир фәзиләт вә тәрифә лајиг бир шеј варса, бунлары дүшүнүн» (Филипилиләрә 4:8).

Мәјуслуға дүзҝүн мүнасибәт

Һәјатымызда ҝөзләнилмәз һадисәләр ола биләр. Мәсәлән, гәфләтән ишимизи, һәјат јолдашымызы, јығынҹагда мүәјјән үстүнлүјүмүзү, сағламлығымызы, евимизи вә ја достларымызы итирә биләрик. Бу кими дәјишикликләрин өһдәсиндән неҹә ҝәлмәк олар?

Бәзиләри ҝөрмүшләр ки, нәјин даһа ваҹиб олдуғуну мүәјјән етмәјин фајдасы вар. Јухарыда хатырланан Дункан дејир: «Арвадымла мән әввәлки хидмәтимизә һеч вахт гајыда билмәјәҹәјимизи анлајанда мүтәәссир олдуг. Нәһајәтдә биз мүәјјәнләшдирдик ки, инди ән ваҹиби гајынанама гуллуг етмәк вә имкан дахилиндә таммүддәтли хидмәти давам етдирмәкдир. Гәрар гәбул етмәли оланда, онун бу ики мәсулијјәтимизә неҹә тәсир едәҹәјини нәзәрә алырдыг. Вә һәр шеј өз гајдасына дүшдү».

Бир чохларымыз мәјус оланда вәзијјәтин хошаҝәлмәз ҹәһәтләрини шиширтмәјә мејллијик. Мәсәлән, ушағын тәрбијәсиндә, ишдә пүхтәләшмәкдә, јахуд әҹнәби саһәдә хош хәбәри тәблиғ едәндә истәдијимиз нәтиҹәјә наил олмаја биләрик. Онда биздә белә фикир јарана биләр: «Әлимдән һеч нә ҝәлмир». Лакин бәшәр тарихинин башланғыҹында мәјуслуг доғуран һадисәнин Аллаһын мүвәффәгијјәтсиз олдуғуну ҝөстәрмәдији кими, илк ҹәһдләримизин јахшы нәтиҹә вермәмәси дә, әлимиздән бир шеј ҝәлмәдијини ҝөстәрмир (Ганунун тәкрары 32:4, 5).

Инсанлар бизи мәјус едәндә асанлыгла өзүмүздән чыхырыг. Јеһова исә белә давранмыр. Давуд падшаһ әхлагсызлыг едәндә вә һәмин гадынын әрини өлдүртдүрәндә Јеһованы мәјус етди. Амма Јеһова Давудун төвбәсинин сәмими олдуғуну ҝөрдү вә ондан үз дөндәрмәди. Аллаһын дүшмәнләри илә мүттәфиг олмагла садиг падшаһ Јеһошафат да сәһвә јол вермишди. Јеһованын пејғәмбәри деди: «Бундан өтрү Рәббин гәзәби сәнин үзәриндәдир. Лакин сәнин јахшы ишләрин дә вар» (2 Салнамәләр 19:2, 3). Јеһова билирди ки, Јеһошафатын бурахдығы бир сәһв онун хаин олдуғуну ҝөстәрмир. Ејнилә, биз дә достларымызын сәһвинә кәскин реаксија вермәсәк, онлары итирмәрик. Достларымызын бизи мәјус етмәси онларын јахшы хүсусијјәтләрини итирдикләрини ҝөстәрмир (Колослулара 3:13).

Мәјуслуға мүвәффәгијјәтә ҝедән јолда гачылмаз бир һал кими јанашмаг олар. Ҝүнаһ ишләтдијимизә ҝөрә мәјуслуға гапыла биләрик. Лакин дүзҝүн вә мәгсәдјөнлү аддымлар атыб ирәлијә ҝетсәк, һәр шеј өз гајдасына дүшәр. Давуд падшаһ сәһвинә ҝөрә өзүнү гынајанда јазмышды: «Бүтүн ҝүн налә чәкмәкдән сүмүкләрим тагәтдән дүшдү... Сонра Сәнә [Јеһоваја] ҝүнаһымы етираф етдим... [Сән] тәгсирими, ҝүнаһымы бағышладын» (Мәзмур 32:3-5). Аллаһын ирадәсинә зидд даврандығымызы анладығымыз тәгдирдә, Ондан үзр истәмәли, јолумузу дәјишмәли вә ҝәләҹәкдә Аллаһын мәсләһәтләринә даһа ҹидди риајәт етмәјә гәти гәрарлы олмалыјыг (1 Јәһја 2:1, 2).

Истәнилән мәјуслуға һазыр ол

Шүбһә јохдур ки, мәјуслуг һеч кимдән јан кечмәјәҹәк. Өзүмүзү буна неҹә һазырламалы? Бруно адлы јашлы мәсиһчинин үзләшдији бәдбәхт һадисә онун һәјатыны дәјишмишди. Ҝөрүн о бу һагда нә дејир: «Дүшдүјүм вәзијјәтдә, мәјуслуғун өһдәсиндән ҝәлмәкдә мәнә ән чох көмәк едән о иди ки, әввәлләр олдуғу кими, инди дә Аллаһла мүнасибәтими мөһкәмләндирирдим. Мән Аллаһын бу амансыз системин давам етмәсинә јол вермәсинин сәбәбини билирдим. Узун илләр әрзиндә Јеһова илә мүнасибәтими мөһкәмләндирирдим. Белә даврандығым үчүн чох хошбәхтәм. Аллаһын мәнимлә олдуғуну билмәк мәнә тәсәлли верди, бунун сајәсиндә исә депрессијаја таб ҝәтирдим».

Ҝәләҹәк һаггында дүшүнәндә бир шејә әмин ола биләрик: өзүмүз өзүмүзү, јахуд башгалары бизи мәјус етсә дә, Јеһова бизи һеч вахт мәјус етмәз. Јеһова Аллаһ адынын мәнасыны белә изаһ етди: «Мән олмаг истәдијим Кәс олаҹағам» (Чыхыш 3:14, ЈД). Бу бизә әминлик верир ки, вәдләрини һәјата кечирмәк үчүн Аллаһ лазым олан Кәс ола биләр. О вәд етмишдир ки, Онун ирадәси Падшаһлығы васитәсилә «ҝөјдә олдуғу кими, Јердә дә» олаҹаг. Елә буна ҝөрә дә һәвари Павел јазмышды: «Мән әминәм ки, нә өлүм, нә һәјат, нә мәләкләр, нә рәјасәтләр... нә дә башга мәхлуг бизи... Мәсиһ Исада олан Аллаһын мәһәббәтиндән мәһрум етмәјә гадир олмајаҹагдыр» (Матта 6:10; Ромалылара 8:38, 39).

Биз Аллаһын Јешаја пејғәмбәрин васитәсилә вердији вәдинин јеринә јетмәсини әминликлә ҝөзләјә биләрик: «Мән јени ҝөјләр вә јени јер јарадырам. Әввәлки ишләр бир даһа хатырланмајаҹаг, һеч јада дүшмәјәҹәк» (Јешаја 65:17). Мәјуслугла бағлы бүтүн хатирәләрин тезликлә кечмишдә галаҹағы неҹә дә ҝөзәл үмиддир!

[Һашијә]

[11-ҹи сәһифәдәки чәрчивә]

Илк ҹәһдләримизин јахшы нәтиҹә вермәмәси, әлимиздән бир шеј ҝәлмәдијини ҝөстәрмир

[12-ҹи сәһифәдәки чәрчивә]

Аллаһын Кәламы бизи тәшвиг едир ки, диггәтимизи кечмишдә етдијимиз сәһвләрә јох, һал-һазырда едә биләҹәјимиз шејләрә јөнәлдәк

[13-ҹү сәһифәдәки шәкилләр]

Инсанларын Аллаһы мәјус етмәләринә бахмајараг, Аллаһ хошбәхтдир, чүнки Өз нијјәтини мүтләг јеринә јетирәҹәјинә әминдир

[14-ҹү сәһифәдәки шәкил]

Руһани ишләрә үстүнлүк вермәк мәјуслуғун өһдәсиндән ҝәлмәјә көмәк едир