Аллаһ Нуһа нәјә ҝөрә лүтф ҝөстәрди? Бу, бизи нә үчүн марагландырмалыдыр?

ВАҸИБ хәбәр ешитдијимиз ҝүнү јахшы хатырлајырыг. Биз бүтүн тәфсилатлары — һәмин вахт һарада вә нә ишлә мәшғул олдуғумузу, һәмчинин хәбәрә неҹә реаксија ҝөстәрдијимизи унутмуруг. Шүбһә јохдур ки, Каинатын Һөкмдары Јеһова Аллаһдан ваҹиб хәбәр алдығы ҝүн һеч вахт Нуһун јадындан чыхмамышды. Мәҝәр бундан ваҹиб хәбәр ола биләрдими? Јеһова она ‘бүтүн ҹанлылары’ мәһв етмәк нијјәтиндә олдуғуну билдирди. Нуһ өзүнү, аиләсини вә ҹүрбәҹүр һејванлары хилас етмәк үчүн нәһәнҝ бир ҝәми тикмәли иди (Јарадылыш 6:9-21).

Нуһ Аллаһын дедикләринә неҹә мүнасибәт ҝөстәрди: севинди, јохса наразылығыны билдирди? О һәмин хәбәри арвад-ушағына неҹә чатдырды? Мүгәддәс Китабда бу барәдә һеч нә дејилмир. Орада јалныз буну охујуруг: «Нуһ һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди» (Јарадылыш 6:22).

Бу сөзләр олдугҹа ваҹибдир, чүнки онлардан Нуһун нәјә ҝөрә Аллаһын ҝөзүндә лүтф тапдығыны өјрәнирик; Нуһ Аллаһын һәр бир сөзүнү ҹанла-башла јеринә јетирмәјә һазыр иди (Јарадылыш 6:8). О, даһа нәјә ҝөрә Аллаһын лүтфүнү газанды? Бу суала ҹаваб тапмаг чох ваҹибдир, чүнки биз, Аллаһ јер үзүнү бир даһа писликләрдән тәмизләјәндә хилас олмаг үчүн Нуһ кими олмалыјыг. Илк нөвбәдә, ҝәлин ҝөрәк Дашгындан өнҹә Нуһ һансы чәтинликләрлә үзләширди.

Ҹинләр јерә енир

Нуһ бәшәр тарихинин әввәлиндә јашамышды. О, илк инсанын јарадылмасындан тәхминән мин ил сонра анадан олмушду. О заманкы адамлар бу ҝүн бир чохларынын тәсәввүр етдији кими — түклү, күтбејин, әлләриндә дәјәнәк вә габаға әјилмиш һалда ҝәзән мағара адамлары дејилдиләр. Онлар дәмирдән вә тунҹдан аләтләр дүзәлдирдиләр вә Нуһ, чох еһтимал ки, ҝәмини тикәндә бунлардан истифадә етмишди. Артыг мусиги аләтләри дә мөвҹуд иди. Инсанлар евләнир, ушаглар бөјүдүр, әкинчиликлә мәшғул олур, мал-гара сахлајыр вә алыш-вериш едирдиләр. Бу саһәләрдә о дөврдәки јашајыш бизимкинә охшајыр (Јарадылыш 4:20-22; Лука 17:26-28).

Амма мүәјјән фәргләр дә варды. Мәсәлән, о заман инсанлар олдугҹа чох јашајырдылар. Инсанын 800 илдән чох јашамасы гејри-ади сајылмырды. Нуһ 950, Адәм 930, Нуһун бабасы Метушелаһ исә 969 ил јашамышдыa (Јарадылыш 5:5, 27; 9:29).

Диҝәр фәрг Јарадылыш 6:1, 2 ајәләриндә јазылыб: «Инсанлар јер үзүндә чохалмаға башлады вә онларын гызлары доғулду. О заман Аллаһ оғуллары ҝөрдүләр ки, инсан гызлары чох ҝөзәлдир вә бәјәндикләри һәр гызы өзләринә арвад етдиләр». «Аллаһ оғуллары» ҝөјдән енән мәләкләр иди, онлар инсан донуна ҝирәрәк инсанлар арасында мәскунлашдылар. Онлар нә Аллаһ тәрәфиндән ҝөндәрилмишдиләр, нә дә инсанлара хејир ҝәтирмәк үчүн јерә етмишдиләр. Әксинә, бу мәләкләр ҝөзәл гадынларла ҹинси әлагәјә ҝирмәк мәгсәдилә ҝөјдәки ‘мәскәнләрини тәрк етдиләр’ вә ҹин олдулар (Јәһуда 6).

Үсјанкар, позғун вә фөвгәлбәшәри ҝүҹә вә зәкаја малик олан бу ҹин мәләкләр инсанлара чох пис тәсир ҝөстәрирдиләр. Ҝөрүнүр, онлар инсан ҹәмијјәти үзәриндә һөкмранлыг едирдиләр. Ҹинләр, кимлијини ҝизләдән вә ишләрини ҝизлиҹә ҝөрән ҹинајәткар кими фәалијјәт ҝөстәрмирдиләр. Әксинә, һеч бир виҹдан әзабы чәкмәдән ачыг-ашкар Аллаһын гајда-ганунларына гаршы чыхырдылар.

Аллаһын бу сәмави оғулларынын гадынларла ҹинси әлагәси нәтиҹәсиндә доғулан ушаглар бөјүјүб гејри-ади ҝүҹә малик олурдулар. Онлар ибрани сөзү олан «Нефилим» ады илә танынырдылар. Биз охујуруг: «Һәмин дөврдә вә Аллаһ оғуллары инсан гызларыны арвад алыб өвладлары доғулан дөврдә дә јер үзүндә бөјүк адамлар [‘Нефилимләр’, КМ] јашајырды. Бунлар гәдим дөврүн гәһрәман вә адлы-санлы адамлары иди» (Јарадылыш 6:4). Нефилимләр чох горхулу идиләр. Бу сөзүн мәнасы «јыханлар», јәни башгаларынын јыхылмасына сәбәб оланлар демәкдир. Онлар, гәддар әмәлләри гәдим әфсанә вә нағылларда әкс олунан гатилләр иди.

Салеһ инсанын әзабы

Мүгәддәс Китаб ҝөстәрир ки, һәмин нәслин позғунлуғу дәрин көк салмыш вә ҝениш јајылмышды. Орада јазылыб: «Јер үзүндәки инсанларын шәр әмәлләри чохдур вә һәр заман онларын үрәјиндәки фикирләр вә нијјәтләр пислијә доғру јөнәлир... Дүнја зоракылыгла долмушду... Бүтүн бәшәр јолуну азмышды» (Јарадылыш 6:5, 11, 12).

Нуһ белә дүнјада јашајырды. Әтрафындакы инсанлардан фәргли олараг, «Нуһ салеһ... бир адам иди. О, Аллаһа јахын иди» (Јарадылыш 6:9). Салеһ инсана салеһ олмајан ҹәмијјәтдә јашамаг асан дејил. Инсанларын сөзләри вә әмәлләри Нуһу неҹә дә мүтәәссир етмәли иди! Чох еһтимал ки, о, Дашгындан сонра јашамыш салеһ Лутун кечирдији һиссләри кечирирди. Содомун әхлагсыз сакинләри арасында јашајан Лут ‘позғун адамларын сәфаһәтә дүшкүн һәјат тәрзиндән әзијјәт чәкирди’ вә «онларын һагсыз ишләри барәсиндә ешидиб, онлары ҝөрүрдү вә өз салеһ ҹанына ҝүндән-ҝүнә әзаб верирди» (2 Петер 2:7, 8). Бу һиссләри Нуһ да кечирмәмиш олмазды.

Хәбәрләрдә ешитдијиниз дәһшәтли һадисәләр вә ја аллаһсыз инсанларын ијрәнҹ һәрәкәтләри сизи нараһат едирми? Әҝәр беләдирсә, Нуһун кечирдији һиссләри баша дүшә биләрсиниз. Дашгын баш верәндә Нуһ 600 јашында иди. Бу гәдәр вахт гејри-салеһләрин арасында јашамағын нә гәдәр чәтин олдуғуну бир тәсәввүрүнүзә ҝәтирин! Нуһ бүтүн писликләрдән азад олмағын һәсрәтини чәкирди (Јарадылыш 7:6).

Нуһ башгаларындан фәргләнмәјә горхмурду

Нуһ «өз нәсли арасында гүсурсуз бир адам иди» (Јарадылыш 6:9). Фикир верин ки, Мүгәддәс Китаб Нуһун өз мүасирләринин ҝөзүндә јох, онларын арасында гүсурсуз олдуғуну дејир. Башга сөзләрлә десәк, о, Аллаһын ҝөзүндә гүсурсуз иди, лакин Дашгындан өнҹә јашамыш инсанлар ону гәрибә һесаб едирдиләр. Биз әмин ола биләрик ки, о, нә мүасирләринин дүшүнҹә тәрзини мәнимсәмиш, нә дә ки әхлагсыз әјләнҹәләрә вә ишләрә баш гошмушду. Тәсәввүр един, Нуһ ҝәми тикмәјә башлајанда инсанлар она неҹә бахырдылар! Чох еһтимал ки, ону лаға гојуб, ришхәнд едирдиләр. Онлар Нуһу ҹидди гәбул етмирдиләр.

Бундан әлавә, Нуһ Аллаһа иман ҝәтирир вә билдикләрини өзүндә сахламырды. Мүгәддәс Китаб ону «салеһлик тәблиғчиси» адландырыр (2 Петер 2:5). Шүбһә јохдур ки, Нуһ мүгавимәтләрлә гаршылашаҹағыны билирди. Аллаһын писләрә гаршы чыхартдығы һөкмләри бәјан едән улу бабасы Ханок да салеһ адам иди. Ҝөрүнүр, мәһз буна ҝөрә писләр ону тәгиб етмәјә башладылар, амма Аллаһ јол вермәди ки, дүшмәнләри Ханоку өлдүрсүнләр (Јарадылыш 5:18, 21-24; Ибраниләрә 11:5; 12:1; Јәһуда 14, 15). Шејтан, ҹинләр, Нефилимләр вә инсанларын әксәријјәти Нуһун тәблиғ етдији хәбәрә лагејд јанашырдылар, јахуд она мүгавимәт ҝөстәрирдиләр. Буна ҝөрә дә Нуһдан ҹәсарәт вә Јеһованын ону горујаҹағына инам тәләб олунурду.

Аллаһа хидмәт етмәјән инсанлар һәр заман Онун хидмәтчиләринә мүгавимәт ҝөстәрибләр. Һәтта Иса Мәсиһ вә онун давамчылары да нифрәтлә гаршыланмышдылар (Матта 10:22; Јәһја 15:18). Чохларынын хошуна ҝәлмәсә дә, Нуһ Аллаһа хидмәт етмәк үчүн кифајәт гәдәр ҹәсарәтли иди. О анлајырды ки, Аллаһын лүтфүнү газанмаг, Онун дүшмәнләрини разы салмагдан даһа ваҹибдир. Буна ҝөрә дә Аллаһ Нуһа лүтф ҝөстәрирди.

Нуһ фикир верди

Ҝөрдүјүмүз кими, Нуһ инсанлара ҹәсарәтлә тәблиғ едирди. Бәс онлар буна неҹә һај верирдиләр? Мүгәддәс Китабда дејилир ки, Дашгындан габаг инсанлар ‘јејиб, ичиб, евләниб, әрә ҝедирдиләр вә туфан ҝәлиб һамысыны апарынҹаја гәдәр бихәбәр идиләр’, јәни Нуһун хәбәрдарлығына фикир вермирдиләр (Матта 24:38, 39).

Иса бизим ҝүнләрдә дә вәзијјәтин белә олаҹағыны сөјләмишди. Артыг јүз илдән чохдур ки, Јеһованын Шаһидләри инсанлара салеһлијин өмүр сүрәҹәји јени дүнја гурмаг вәдини јеринә јетирмәк үчүн Јеһованын тезликлә гәти тәдбирләр ҝөрәҹәји барәдә хәбәрдарлыг едирләр. Милјонларла инсанлар бу хәбәрә мүсбәт һај версәләр дә, милјардларла инсанлар она фикир вермирләр. Онлар Дашгынын јер үзүндә һәгигәтән дә баш вердијинә вә онун һансы мәна кәсб етдијинә «гәсдән» (И–93) мәһәл гојмурлар (2 Петер 3:5, 13).

Нуһ исә Јеһова Аллаһын дедикләринә фикир верир вә инанырды. Итаәткарлыг Нуһу хилас етди. Һәвари Павел јазмышды: «Нуһ иман васитәсилә, һәлә заһир олмајан шејләр һаггында Аллаһ тәрәфиндән хәбәрдар едилиб, өз аиләсини хилас етмәк үчүн ихласкарлыгла ҝәми һазырлады» (Ибраниләрә 11:7).

Тәглид едилмәли нүмунә

Нуһун тикдији ҝәми нәһәнҝ иди — футбол мејданчасындан узун, һүндүрлүјү исә тәхминән бешмәртәбәли бина гәдәр иди. О, ән бөјүк јелкәнли тахта ҝәми һесаб едилән «Вајоминг» шхунасындан 30 метр узун олмушду. Әлбәттә, Нуһун тикдијини там мәнада ҝәми адландырмаг олмаз, о, јалныз сујун үзәриндә галмаг үчүн дүзәлдилмишди. Лакин онун тикинтисиндә о дөврүн габагҹыл тикинти үсулларындан истифадә едилмәли иди. Она ичәридән вә бајырдан гатран вурмаг лазым иди. Еһтимал ки, ҝәминин тикинтиси 50 илдән чох чәкди (Јарадылыш 6:14-16).

Һәлә ҝөрүләси чох иш варды. Дашгындан әввәл Нуһ аиләси вә һејванлар үчүн бириллик азугә топламалы, һејванлары ҝәмијә јығмалы иди. «Рәбб Нуһа неҹә әмр етмишдисә, о да һәр шеји еләҹә јеринә јетирди». Һәр шеј һазыр оланда вә Јеһова ҝәминин гапысыны өртәндә онлар неҹә дә раһатландылар! (Јарадылыш 6:19-21; 7:5, 16).

Нәһајәт Дашгын башлады. 40 ҝүн, 40 ҝеҹә јағыш јағды. Ҝәмидә оланларын һамысы сулар чәкиләнәдәк бир ил орада галмалы идиләр (Јарадылыш 7:11, 12; 8:13-16). Бүтүн пис инсанлар мәһв олду. Писликләрдән тәмизләнмиш јер үзүндә јалныз Нуһ вә аиләси сағ галды.

Мүгәддәс Китабда дејилир ки, Нуһун ҝүнләриндә баш вермиш Үмумдүнја дашгыны «ҝәләҹәк шејләри ҝөстәрән бир ибрәт»дир. Һансы мәнада? Биз охујуруг: «Индики ҝөјләр вә јер исә ода верилмәк үчүн ејни кәлам илә сахланыб, аллаһсыз адамларын мәһкәмә вә һәлак ҝүнүнә гәдәр һифз олунурлар». Нуһун ҝүнләриндә олдуғу кими, јенә дә сағ галанлар олаҹаг. Әмин олун ки, Јеһова «Она ихлас едәнләри [јәни сәдагәтли оланлары] имтаһандан неҹә хилас етмәји... билир» (2 Петер 2:5, 6, 9; 3:7).

Нуһ пис мүасирләриндән фәргли олараг, сәдагәтли вә салеһ инсан иди. О, һәр шејдә Аллаһа итаәт едирди. Нуһ Аллаһа хидмәт етмәк истәмәјән инсанларын гәзәбинә дүчар олаҹағыны билдијинә бахмајараг, дүзҝүн оланы етмәк үчүн кифајәт гәдәр ҹәсарәтә малик иди. Биз Нуһу тәглид етмәклә Аллаһын лүтфүнү газанаҹағыг, һәмчинин хилас олмаға вә тезликлә ҝәләҹәк јени дүнјада јашамаға үмидимиз олаҹаг (Мәзмур 37:9, 10).

[Һашијә]

[5-ҹи сәһифәдәки чәрчивә]

Нефилимләрин гәддарлығы гәдим әфсанәләрдә өз әксини тапыб

[7-ҹи сәһифәдәки шәкил]

Нуһун иманыны тәглид етмәклә Аллаһын лүтфүнү газана биләрик

[Иҹазә илә]

Alinari/Art Resource, NY