Охуҹуларымыз сорушур
Адәм камил олдуғу һалда неҹә ҝүнаһ ишләдә биләрди?
Адәмин ҝүнаһ ишләтмәси мүмкүн иди, чүнки Аллаһ ону ирадә азадлығы илә јаратмышды. Бу әнам Адәмин камил олмасына һеч дә зидд дејилди. Әслиндә, јалныз Аллаһ мүтләг мәнада камилдир (Ганунун тәкрары 32:3, 4; Мәзмур 18:30; Марк 10:18). Киминсә вә ја нәјинсә камиллији нисбидир. Мәсәлән, бычаг әти доғрамаг үчүн мүкәммәл аләтдир, анҹаг онунла шорба ичмәк олармы? Һәр шеј јалныз өз мәгсәди үчүн истифадә олундугда мүкәммәлдир.
Бәс Аллаһ Адәми һансы мәгсәдлә јаратмышды? Аллаһын нијјәти о иди ки, Адәмдән ирадә азадлығына малик олан шүурлу инсанлар төрәсин. Инсанлар Аллаһа вә Онун јолларына мәһәббәтләрини артырмаг истәдикләрини Онун ганунларына табе олмагла ҝөстәрмәли идиләр. Беләликлә, итаәткарлыг инсанын дүшүнҹәсинә јерләшдирилмәмишди, инсаны буна үрәји тәшвиг етмәли иди (Ганунун тәкрары 10:12, 13; 30:19, 20). Демәли, Адәмдә итаәтсизлији сечмәк габилијјәти олмасајды, о, ирадә азадлығына малик инсан кими, натамам — гејри-камил оларды. Адәмин ирадә азадлығындан неҹә истифадә етмәси барәдә Мүгәддәс Китабда гејд едилир ки, о, арвадына гошулараг Аллаһын ‘хејирлә шәри билмә ағаҹы’ илә бағлы ганунуна итаәт етмәди (Јарадылыш 2:17; 3:1-6).
Бәс онда елә чыхмырмы ки, Аллаһ Адәми әхлаги ҹәһәтдән зәиф јаратмышды, буна ҝөрә дә, о, мүдрик гәрарлар гәбул етмәји вә ширникдириҹи тәсирләрә гаршы дурмағы баҹармырды? Адәм итаәтсизлик ҝөстәрмәмишдән габаг Јеһова Аллаһ јер үзүндә јаратдыгларынын һамысына, еләҹә дә илк инсан ҹүтүнә бахыб белә нәтиҹәјә ҝәлди ки, һәр шеј «чох јахшыдыр» (Јарадылыш 1:31). Буна ҝөрә дә, Адәмин ҝүнаһ ишләтмәси онун јарадылмасында һәр һансы гүсура јол верилдијини ҝөстәрмир, ҝүнаһын бүтүн мәсулијјәтини Адәм өзү дашыјырды (Јарадылыш 3:17-19). Адәм Аллаһа вә Онун салеһ нормаларына мәһәббәт тәзаһүр етдирмәди, бунунла да илк нөвбәдә итаәт етмәли олдуғу Аллаһын итаәтиндән чыхды.
Һәмчинин диггәт јетирин ки, јер үзүндә јашајанда Иса да, Адәм кими, камил инсан иди. Анҹаг Адәмин диҝәр өвладларындан фәргли олараг, Иса мүгәддәс руһ васитәсилә анасынын бәтнинә дүшдү вә беләликлә дә ширникдириҹи тәсирләр гаршысында зәифлији мирас алмады (Лука 1:30, 31; 2:21; 3:23, 38). Сон дәрәҹә ҝүҹлү тәсирләрә бахмајараг, Иса өз ирадәси илә Атасына садиг галды. Адәм ирадә азадлығындан истифадә едәрәк Јеһованын әмриндән чыхдығы үчүн өзү мәсулијјәт дашыјырды.
Бәс онда нәјә ҝөрә Адәм Аллаһа итаәтсизлик етди? О, вәзијјәтини неҹәсә јахшылашдыра биләҹәјиними дүшүнүрдү? Хејр, чүнки һәвари Павел јазыр ки, Адәм алданмамышдыр (1 Тимотејә 2:14). Лакин Адәм гадаған олунмуш ағаҹын мејвәсиндән јејән арвадынын арзусуна тәслим олду. Онун арвадыны разы салмаг арзусу, Јарадана табе олмаг арзусундан ҝүҹлү иди. Әлбәттә, гадаған олунмуш мејвәдән јемәк тәклиф олунанда, Адәм дајаныб, бу итаәтсизлијин Аллаһла мүнасибәтинә неҹә тәсир ҝөстәрәҹәји барәдә дүшүнмәли иди. Аллаһа дәрин вә сөнмәз мәһәббәти олмајан Адәм истәнилән тәсир, о ҹүмләдән арвадынын тәсири гаршысында зәиф иди.
Адәм ҝүнаһ ишләдәндә һәлә өвладлары олмамышды, буна ҝөрә дә онун бүтүн нәсли гејри-камил доғулду. Лакин Адәм кими, биз дә ирадә азадлығына маликик. Ҝәлин Јеһованын хејирхаһлығы үзәриндә миннәтдарлыгла дүшүнәк вә бизим Она итаәт вә ибадәт етмәјимизә лајиг олан Аллаһа мәһәббәтимизи аловландыраг (Мәзмур 63:6; Матта 22:36, 37).