Сүрүдән узаглашанлара көмәк ет
«Мәним севинҹимә шәрик олун, мән итмиш гојунуму тапдым!» (ЛУКА 15:6).
1. Гајғыкеш Чобан олдуғуну Иса неҹә ҝөстәрмишди?
ЈЕҺОВАНЫН ваһид Оғлу Иса Мәсиһ «гојунларын бөјүк Чобаны» адландырылыр (Ибр. 13:20). Мүгәддәс Јазыларда онун ҝәлиши һагда габагҹадан дејилмиш вә ҝөстәрилмишди ки, о, Исраил халгынын ‘гејб олмуш гојунларыны’ ахтаран тајы-бәрабәри олмајан Чобандыр (Мат. 2:1-6; 15:24). Үстәлик, чобан гојунларыны мүдафиә етмәк үчүн, лазым ҝәләрсә, ҹанындан кечмәјә һазыр олдуғу кими, Иса да һәјатыны гојунабәнзәр — һәлим инсанлар уғрунда фидијә олараг верди ки, онлар бу гурбанлыгдан јарарлансынлар (Јәһ. 10:11, 15; 1 Јәһ. 2:1, 2).
2. Бәзи мәсиһчиләрин гејри-фәал олмаларына нә сәбәб ола биләр?
2 Әфсуслар олсун ки, вахтилә Мәсиһин фидијә гурбанлығыны гијмәтләндирәнләрин вә һәјатларыны Аллаһа һәср едәнләрин бәзиләри артыг мәсиһчи јығынҹағы илә тәмасда дејилләр. Ола билсин, мәјуслуг, сәһһәтлә бағлы проблемләр вә ја башга амилләр онларын хидмәтдә сәјләрини азалтмыш вә гејри-фәал олмаларына сәбәб олмушду. Лакин онлар Давудун 23-ҹү мәзмурда тәсвир етдији раһатлығы вә хошбәхтлији јалныз Аллаһын сүрүсүндә олмагла дуја биләрләр. Мисал үчүн, о охујурду: «Рәбб мәним чобанымдыр, мөһтаҹ олмарам» (Мәз. 23:1). Аллаһын сүрүсүндәки гојунлар руһани ҹәһәтдән һеч бир корлуг чәкмирләр, амма ејни шеји сүрүдән узаглашанлар барәдә демәк олмаз. Онлара ким јардым едә биләр вә неҹә? Онлара сүрүјә гајытмаға көмәк етмәк үчүн конкрет нә етмәк олар?
Ким јардым едә биләр?
3. Иса Аллаһын отлағындан узаглашмыш гојуну гуртармаг үчүн нә етмәк лазым олдуғуну неҹә ҝөстәрди?
3 Аллаһын отлағындан узаглашмыш гојуну гуртармаг үчүн чохлу сәј ҝөстәрмәк ҝәрәкдир (Мәз. 100:3). Иса буну ҝөстәрмәк үчүн әјани нүмунә чәкди: «Бир адамын јүз гојуну варса вә онлардан бири јолуну азарса, дохсан доггузуну атыб дағлара, јолуну азан гојуну ахтармаға ҝетмәзми? Вә әҝәр ону тапа билсә, сизә доғрусуну дејирәм: јолуну азмајан дохсан доггузу үчүн севиндијиндән артыг онун үчүн севинәр. Беләҹә дә ҝөјләрдәки Атанызын елә бир мурады јохдур ки, бу кичикләрдән бири һәлак олсун» (Мат. 18:12-14). Сүрүдән азан гојунабәнзәр инсанлара ким көмәк едә биләр?
4, 5. Ағсаггаллар Аллаһын сүрүсүнә неҹә јанашмалыдырлар?
4 Әҝәр мәсиһчи ағсаггаллар јолуну азмыш гојуна көмәк етмәк истәјирләрсә, јадда сахламалыдырлар ки, Јеһованын сүрүсү Она һәср олунмуш инсанлардан ибарәт олан јығынҹагдыр, јәни Онун ‘отлағынын [гијмәтли] сүрүсүдүр’ (Мәз. 79:13). Бу дәјәрли гојунларын нәҹиб гајғыја еһтијаҹы вар вә бу о демәкдир ки, мәһәббәтли чобанлар онларла шәхсән марагланмалыдырлар. Онлара бир дост кими баш чәкмәк чох тәсирли ола биләр. Ағсаггалын онлары руһландырмасы, еһтимал ки, иманларыны мөһкәмләндирәҹәк вә сүрүјә гајытмаг истәкләрини ҝүҹләндирәҹәк (1 Кор. 8:1).
5 Јолуну азмыш гојунлары ахтармаг вә онлара көмәк ҝөстәрмәјә чалышмаг Аллаһын сүрүсүнүн чобанларынын борҹудур. Һәвари Павел гәдим Ефес шәһәриндәки мәсиһчи ағсаггаллара гојунлары отармаг мәсулијјәтләрини хатырладараг демишди: «Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тәјин етмишдир ки, Рәббин вә Аллаһын ҹәмијјәтини, Өз ганы баһасына әлдә етдији ҹәмијјәти ҝүдәсиниз» (Һәв. иш. 20:28). Һәвари Петер дә мәсһ олунмуш ағсаггаллара буна бәнзәр нәсиһәт вермишди: «Аллаһын сизә һәвалә олунан сүрүсүнү отарын. Она мәҹбури дејил, көнүллү вә Аллаһа мәгбул олан шәкилдә, биабырчы газанҹ үчүн дејил, шөвглә нәзарәт един. Сизә тапшырыланлара гаршы зүлмкар јох, сүрүјә нүмунә олун» (1 Пет. 5:1-3).
6. Нәјә ҝөрә Аллаһын гојунлары чобанларын гајғысына бу ҝүн хүсусилә еһтијаҹ дујурлар?
6 Мәсиһчи ағсаггаллар ‘јахшы чобан’ олан Исадан нүмунә ҝөтүрмәлидирләр (Јәһ. 10:11). Иса Шимон Петерә: «Гојунларымы отар», — демәклә Аллаһын гојунларына ҝөрә чох нараһат олдуғуну ҝөстәрмиш вә гајғыларына галмағын ваҹиблијини вурғуламышды. (Јәһја 21:15-17 ајәләрини оху.) Гојунларын белә гајғыја бу ҝүн хүсусилә еһтијаҹлары вар, чүнки Аллаһа һәср олунмуш инсанларын нөгсансызлығыны сындырмаг үчүн Иблис даһа чох сәј ҝөстәрир. Јеһованын гојунларыны ҝүнаһлы әмәлләрә сүрүкләмәк үчүн Шејтан онларын ҹисмани зәифликләриндән вә дүнјадан истифадә едир (1 Јәһ. 2:15-17; 5:19). Гејри-фәаллары әлә кечирмәк даһа асан олдуғундан онлар ‘руһа ҝөрә рәфтар един’ нәсиһәтинә әмәл етмәк үчүн көмәјә еһтијаҹ дујурлар (Галат. 5:16-21, 25). Бунун үчүн ағсаггаллар Аллаһдан рәһбәрлик вә мүгәддәс руһ диләмәли вә Онун Кәламындан мәһарәтлә истифадә етмәлидирләр (Сүл. мәс. 3:5, 6; Лука 11:13; Ибр. 4:12).
7. Ағсаггалларын онлара һәвалә олунан Аллаһын сүрүсүнүн гајғысына галмалары нә гәдәр ваҹибдир?
7 Гәдим Исраилдә чобанлар сүрүләрини отармаг үчүн узун чомагдан вә ја дәјәнәкдән истифадә едирдиләр. Гојунлар ағыла ҝириб-чыханда чобан онлары ‘дәјәнәјинин алтындан кечирәрәк’ сајырды (Лев. 27:32; Мик. 2:12; 7:14). Јығынҹағын чобанлары да онлара һәвалә олунмуш Аллаһын сүрүсүнү танымалы вә онун нә илә мәшғул олдуғундан хәбәрдар олмалыдырлар. (Сүлејманын мәсәлләри 27:23 ајәси илә мүгајисә ет.) Буна ҝөрә дә, гејри-фәаллара баш чәкмәк ағсаггаллар шурасынын мүзакирә етдији ән ваҹиб мәсәләләрдән биридир. Буна јолуну азмыш гојунлара көмәк етмәк мәгсәдилә мүәјјән тәдбирләрин ҝөрүлмәси дахилдир. Јеһованын Өзү демишдир ки, гојунларыны ахтараҹаг вә лазыми гајғыны ҝөстәрәҹәк (Јез. 34:11). Буна ҝөрә, ағсаггаллар сүрүдән узаглашанлара ҝери гајытмаға көмәк етмәјә чалышанда Аллаһ разы галыр.
8. Ағсаггаллар јығынҹагдан узаглашмыш һәмиманлыларына неҹә көмәк едә биләрләр?
8 Јығынҹагдан кимсә физики ҹәһәтдән хәстәләнәндә ағсаггалын она баш чәкмәси ону руһландырыр вә севиндирир. Ағсаггалларын руһани ҹәһәтдән насаз баҹы вә ја гардаша шәхсән диггәт јетирмәси дә она ејни ҹүр тәсир ҝөстәрә биләр. Ағсаггаллар гејри-фәал оланла бирҝә ајәләр охуја, ҝөрүшдә сәсләнән ваҹиб фикирләри мүзакирә едә, һансыса мәгаләни нәзәрдән кечирә, дуа едә вә башга ҹүр көмәклик ҝөстәрә биләрләр. Онлар гејри-фәал тәблиғчијә дејә биләрләр ки, јығынҹағын үзвләри ону ҝөрүшләрдә ҝөрмәјә шад олардылар (2 Кор. 1:3-7; Јаг. 5:13-15). Башчәкмәнин, бир телефон зәнҝинин вә ја мәктубун һәгигәтән дә бөјүк көмәји дәјә биләр! Ағсаггалын јығынҹагдан узаглашана шәхсән көмәк ҝөстәрмәси онунла әмәкдашлыг едән ағсаггала да севинҹ ҝәтирә биләр.
Бирҝә сәј ҝөстәрмәли
9, 10. Нәјә ҝөрә демәк олар ки, јығынҹагдан узаглашмыш һәмиманлымыза көмәк ҝөстәрмәк јалныз ағсаггалларын иши дејил?
9 Јашадығымыз зәманә нараһат вә чәтин олдуғу үчүн һәмиманлымызын јығынҹагдан јаваш-јаваш неҹә узаглашдығыны нәзәрдән гачыра биләрик (Ибр. 2:1). Лакин Јеһова Өз сүрүсүнү чох гијмәтләндирир. Инсан үчүн бәдәнин һәр үзвү дәјәрли олдуғу кими, онларын да һәр бири әһәмијјәтлидир. Буна ҝөрә һамымыз баҹы-гардашларымызла марагланмалы вә әмәлдә бир-биримизин гејдинә галмалыјыг (1 Кор. 12:25). Бәс сән неҹә, белә едирсәнми?
10 Сүрүдән узаглашмыш гојуну ахтармаг вә она көмәк етмәк башлыҹа олараг ағсаггалларын мәсулијјәти олса да, бу ишдә башгалары онларла әмәкдашлыг едә биләрләр. Биз белә баҹы-гардашларымыза јығынҹаға гајытмаға көмәк едә вә руһландыра биләрик — бу бизим борҹумуздур. Бу көмәклији неҹә ҝөстәрмәк олар?
11, 12. Гејри-фәала көмәк етмәклә бағлы сәнә һансы хүсуси иши тапшыра биләрләр?
11 Бәзи һалларда ағсаггаллар тәҹрүбәли тәблиғчидән хаһиш едә биләрләр ки, көмәк истәјән гејри-фәал илә Мүгәддәс Китаб өјрәнмәси кечирсин. Мәгсәд онларда ‘илк мәһәббәти’ јенидән аловландырмагдыр (Вәһј 2:1, 4). Ҝөрүшләрә ҝәлмәдикләри мүддәт әрзиндә арашдырылан материаллары онларла нәзәрдән кечирмәк онлары руһландыра вә иманларыны мөһкәмләндирә биләр.
12 Әҝәр ағсаггал руһани көмәјә еһтијаҹы олан һәмиманлынла өјрәнмә кечирмәји сәндән хаһиш едирсә, Јеһовадан рәһбәрлик вә хејир-дуа дилә. «Ҝөрәҹәјин ишләри Рәббә вер, онда нијјәтләрин јеринә јетәр» (Сүл. мәс. 16:3). Руһани көмәјә еһтијаҹы оланла Мүгәддәс Китабдан арашдыраҹағын ајәләри вә иманы мөһкәмләндирән фикирләри нәзәрдән кечир. Һәвари Павелин ҝөзәл нүмунәси үзәриндә дүшүн. (Ромалылара 1:11, 12 ајәләрини оху.) Павел Ромадакы мәсиһчиләри мөһкәмләндирәҹәк руһани бир әнам бәхш етмәк үчүн онлары ҝөрмәји чох арзулајырды. О, һәм онлары руһландырмаг, һәм дә өзү руһланмаг истәјирди. Аллаһын сүрүсүндән узаглашмыш һәмиманлымыза көмәк едәндә биз дә ејни руһу тәзаһүр етдирмәли дејиликми?
13. Гејри-фәал илә нәји мүзакирә етмәк олар?
13 Гејри-фәал илә өјрәнмә заманы ондан соруша биләрсән: «Һәгигәти неҹә өјрәнмисән?» Ҝөрүшләрдә, тәблиғдә вә конгресләрдә онунла баш верән мараглы һадисәләри хатырламаға тәшвиг едәрәк Јеһоваја хидмәтлә бағлы кечмиш хош анлары јадына салмаға көмәк ет. Ола билсин, сиз нә вахтса бирликдә тәблиғдә олмусунуз, о севинҹли анлары да хатырлат. Јеһоваја јахынлашмағын сәнә ҝәтирдији севинҹдән даныш (Јаг. 4:8). Аллаһын Өз халгынын неҹә гајғысына галдығына, хүсусилә дә чәтин анларда бизә тәсәлли вә үмид вердијинә ҝөрә миннәтдар олдуғуну сөјлә (Ром. 15:4; 2 Кор. 1:3, 4).
14, 15. Гејри-фәаллара һансы хејир-дуалары хатырлатмаг фајдалы оларды?
14 Јығынҹагда фәал олдуғу мүддәтдә алдығы бәзи хејир-дуалары гејри-фәал тәблиғчијә хатырлатмаг фајдалы ола биләр. Мәсәлән, Аллаһын Кәламыны вә нијјәтләрини дәриндән өјрәнмәк һәмин хејир-дуалардан бири иди (Сүл. мәс. 4:18). Шүбһәсиз, ‘руһа ҝөрә рәфтар етдији’ заман ҝүнаһ ишләтмәк тәһлүкәсиндән гачмаг она даһа асан иди (Галат. 5:22-26). Буна ҝөрә дә, тәмиз виҹданы сајәсиндә дуада Јеһоваја јахынлаша билирди вә онун ‘үрәјини вә дүшүнҹәсини горујан’ «Аллаһын һәр ҹүр ағылдан үстүн олан сүлһү» варды (Филип. 4:6, 7). Бу мәсләһәтләри јадда сахла, сәмими мараг ҝөстәр вә руһани баҹы вә ја гардашына сүрүјә гајытмаға көмәк етмәк үчүн әлиндән ҝәлән һәр шеји ет. (Филипилиләрә 2:4 ајәсини оху.)
15 Тутаг ки, сән јығынҹағын ағсаггалысан вә гејри-фәал әр-арвада баш чәкирсән. Онлары илк дәфә Аллаһын Кәламындан һәгигәти өјрәндикләри вахты хатырламаға тәшвиг етмәк олар. Һәгигәт неҹә дә ҝөзәл, ағлабатан, мәмнунедиҹи иди вә онлары руһани әсирликдән азад етмишди! (Јәһ. 8:32). Јеһова Аллаһ, Онун мәһәббәти вә мөһтәшәм нијјәти һагда өјрәндикләри онларын үрәкләрини неҹә дә бөјүк миннәтдарлыгла долдурмушду! (Лука 24:32 ајәси илә мүгајисә ет.) Онлара хатырлат ки, һәср олунан мәсиһчиләр Јеһова илә сых мүнасибәтләрә вә дуа етмәк шәрәфинә маликдирләр. Хидмәтдә гејри-фәал оланлары «мүбарәк Аллаһын... иззәтли Мүждәсинә» јенидән һај вермәјә сәмими-гәлбдән тәшвиг ет (1 Тим. 1:11).
Онлара мәһәббәт ҝөстәрмәјә давам ет
16. Руһани көмәјин фајдалы олдуғуну ҝөстәрән бир нүмунә ҝәтир.
16 Нәзәрдән кечирдијимиз мәсләһәтләр практикидирми? Бәли. Мисал олараг бир гардашын нүмунәсинә бахаг. О, 12 јашында тәблиғчи олду, амма 15 јашында хидмәтдә зәифләјәрәк гејри-фәал олду. Лакин бир мүддәтдән сонра јығынҹаға гајытды вә 30 илдән чох таммүддәтли хидмәтдә олду. Онун јығынҹагда јенидән фәал олмасында әсас етибарилә ағсаггалын ҝөстәрдији көмәјин бөјүк ролу варды. О, белә көмәјә ҝөрә һәмин ағсаггала чох миннәтдар иди.
17, 18. Аллаһын сүрүсүндән узаглашана көмәк етмәк үчүн сән һансы хүсусијјәтләри тәзаһүр етдирмәлисән?
17 Гејри-фәаллара јығынҹаға гајытмаға көмәк етмәјә мәсиһчиләри тәшвиг едән мәһәббәтдир. Иса давамчыларына демишди: «Сизә бир-биринизи севәсиниз дејә јени бир әмр верирәм: сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһ. 13:34, 35). Бәли, мәһәббәт һәгиги мәсиһчиләрин фәргләндириҹи хүсусијјәтидир. Мәҝәр гејри-фәал мәсиһчиләрә белә мәһәббәт ҝөстәрмәли дејиликми? Әлбәттә, ҝөстәрмәлијик! Онлара көмәк едәркән мүхтәлиф мәсиһчи хүсусијјәтләри тәзаһүр етдирмәлијик.
18 Аллаһын сүрүсүндән узаглашана көмәк етмәк истәјирсәнсә, сән һансы хүсусијјәтләри ҝөстәрмәлисән? Мәһәббәт тәзаһүр етдирмәклә јанашы, шәфгәтли, хејирхаһ, мүлајим вә чох сәбирли олмалысан. Вәзијјәтдән асылы олараг, бағышламаг лазым ҝәлә биләр. Павел јазмышды: «Үрәкдән шәфгәт, хејирхаһлыг, тәвазөкарлыг, һәлимлик вә сәбирлилик ҝејин; бир-биринизә тәһәммүл един вә биринизин диҝәриндән шикајәти варса, бағышласын. Мәсиһ [«Јеһова», ЈД] сизи бағышладығы кими, сиз дә бир-биринизи бағышлајын. Бүтүн бунларла јанашы, камил бирлијин бағы олан мәһәббәти ҝејин» (Колос. 3:12-14).
19. Нәјә ҝөрә Јеһованын сүрүсүндән узаглашанлара јығынҹаға гајытмагда ҝөстәрдијимиз сәјләр чох дәјәрлидир?
19 Нөвбәти мәгаләдә бәзиләринин Аллаһын сүрүсүндән узаглашмаларынын сәбәбләрини арашдыраҹағыг. Һәмчинин ҝөстәриләҹәк ки, онлар јығынҹаға гајыданда өзләринә гаршы һансы мүнасибәти ҝөзләјә биләрләр. Индики мәгаләнин үзәриндә дүшүнәндә вә нөвбәти мәгаләни арашдыранда әмин ол ки, гејри-фәаллара јығынҹаға гајытмаға көмәк етмәкдә үмидлә ҝөстәрдијин бүтүн сәјләр чох дәјәрлидир. Буҝүнкү системдә бир чохлары өз һәјатларыны вар-дөвләт јығмаға һәср едирләр, амма бир инсанын һәјаты дүнјанын бүтүн хәзинәләриндән гат-гат гијмәтлидир. Иса бу фикри гејб олмуш гојун мәсәлиндә вурғуламышды (Мат. 18:12-14). Јеһова Өз сүрүсүндә оланлары гијмәтләндирир вә сүрүдән узаглашанлара јығынҹаға гајытмаларына сәјлә вә тәхирә салмадан көмәк едәркән буну унутма.
Неҹә ҹаваб верәрдиниз?
• Сүрүдән узаглашмыш инсанлара даир ағсаггалларын һансы мәсулијјәти вар?
• Гејри-фәаллара неҹә көмәк едә биләрсән?
• Сүрүдән узаглашанлара көмәк етмәк үчүн һансы хүсусијјәтләри тәзаһүр етдирә биләрик?
[10-ҹу сәһифәдәки шәкил]
Гајғыкеш ағсаггаллар Аллаһын сүрүсүндән узаглашанлара көмәк етмәјә сәј ҝөстәрирләр