Исанын сөзләри дуаларымыза тәсир едирми?
«Иса бу сөзләри битирдикдән сонра, халг Онун тәлиминә тәәҹҹүбләнди» (МАТ. 7:28).
1, 2. Нәјә ҝөрә издиһам Исанын тәлим вермәк тәрзинә һејран иди?
БИЗ Аллаһын ваһид Оғлу Иса Мәсиһин сөзләрини гәбул етмәли вә һәјатымызда тәтбиг етмәлијик. Әсла онун кими данышан олмамышды. Инсанлар онун Дағүстү тәблиғиндә тәлим вермәк тәрзинә һејран идиләр! (Матта 7:28, 29 ајәләрини оху.)
2 Јеһованын Оғлу, гејри-камил инсанларын тәлимләринә әсасланараг узун-узады нитгләр сөјләјән дин алимләри кими өјрәтмирди. Мәсиһ «һакимијјәт саһиби» кими тәлим верирди, чүнки дедикләри Аллаһдан иди (Јәһ. 12:50). Ҝәлин ҝөрәк, Исанын Дағүстү тәблиғиндә сөјләдикләри дуаларымыза неҹә тәсир етмәлидир.
Һеч заман икиүзлүләр кими дуа етмәјин
3. Исанын Матта 6:5 ајәсиндәки сөзләрини гысаҹа данышын.
3 Дуа һәгиги ибадәтин ваҹиб һиссәсидир вә биз мүнтәзәм олараг Јеһоваја дуа етмәлијик. Лакин дуаларымыз Исанын Дағүстү тәблиғиндә сөјләдикләринә ујғун олмалыдыр. О демишдир: «Дуа етдијин заман... икиүзлүләр кими олма; чүнки инсанлар онлары ҝөрсүнләр дејә, синагогларда вә күчә тинләриндә дуруб дуа етмәји севирләр. Доғрусуну сизә дејирәм: онлар мүкафатларыны алдылар» (Мат. 6:5).
4-6. а) Нәјә ҝөрә фәрисејләр «синагогларда вә күчә тинләриндә дуруб дуа етмәји» хошлајырдылар? б) Һансы мәнада бу икиүзлүләр там «мүкафатларыны алдылар»?
4 Исанын шаҝирдләри дуа едәндә башга адамларын јанында өзләрини мөминлијә вуран һијләҝәр, ‘икиүзлү’, өзүндән разы фәрисејләр кими олмалы дејилдиләр (Мат. 23:13-32). Бу икиүзлүләр «синагогларда вә күчә тинләриндә дуруб дуа етмәји» хошлајырдылар. Нәјә ҝөрә? «Инсанлар онлары ҝөрсүнләр дејә». Биринҹи әсрдә јәһудиләр мәбәддә јандырма гурбанлары ҝәтирилән заман адәтән бир јығынҹаг кими дуа едәрдиләр (тәхминән сәһәр саат доггузда вә ҝүнорта саат үчдә). Јерусәлимин бир чох сакинләри мәбәдин әразисинә ибадәтә топлашан издиһамла бәрабәр дуа едәрди. Јерусәлимдән кәнарда јашајан мөмин јәһудиләр исә ҝүндә ики дәфә «синагогларда... дуруб» дуа едәрдиләр. (Лука 18:11, 13 ајәләри илә мүгајисә ет.)
5 Инсанларын әксәријјәти бу заман мәбәдин вә ја синагогун јанында олмасалар да, һарада олмаларындан асылы олмајараг, дуа едә биләрдиләр. Бәзиләри дуа заманы «күчә тинләриндә» олмаға чалышырдылар. Онлар истәјирдиләр ки, күчәдән кечән «инсанлар онлары ҝөрсүнләр». Ҝөрәнләр онлары тәрифләсин дејә икиүзлү мөминләр ‘узун-узады дуалар едирдиләр’ (Лука 20:47). Биз гәтијјән белә давранмалы дејилик.
6 Иса демишди ки, бу икиүзлүләр артыг «мүкафатларыны алдылар». Онлар инсанлар тәрәфиндән бәјәнилмәји вә тәрифләнмәји чох истәјирдиләр вә алдыглары да елә бу олду. Онлар бундан башга һеч нә алмадылар, она ҝөрә ки, Јеһова бу ријакар дуалара ҹаваб вермирди. Лакин Исанын нөвбәти сөзләриндән ҝөрдүјүмүз кими, Аллаһ Мәсиһин һәгиги давамчыларынын дуаларына ҹаваб верирди.
7. ‘Өз отағына ҝир вә дуа ет’ мәсләһәти нә демәкдир?
7 «Сән исә дуа етдијин заман өз отағына ҝир вә гапыны бағлајараг, ҝизлиндә олан Атана дуа ет; ҝизлини ҝөрән Атан сәнә ачыгҹасына әвәзини верәҹәкдир» (Мат. 6:6). Лакин Исанын отаға ҝириб, гапыны бағлајараг ҝизли дуа етмәк мәсләһәти о демәк дејил ки, һеч ким јығынҹағын адындан дуа едә билмәз. Әксинә, бурада диггәти ҹәлб етмәк вә башгаларындан иззәт алмаг мәгсәдилә инсанлар гаршысында дуа етмәјин јанлыш олдуғу вурғуланыр. Әҝәр бизә Аллаһын халгы адындан дуа етмәк шәрәфи верилибсә, буну јадда сахламалыјыг. Ҝәлин дуаја даир Исанын нөвбәти сөзләринә дә диггәт јетирәк.
8. Матта 6:7 ајәсинә әсасән, биз неҹә дуа етмәмәлијик?
8 «Дуа етдијиниз заман бүтпәрәстләр кими бош сөзләр сөјләмәјин [«бош тәкрарлар етмәјин», ЈД]; зира онлар санырлар ки, чох данышмагла ешидиләҹәкләр» (Мат. 6:7). Иса бурада дүзҝүн олмајан башга бир дуа үсулундан — ејни шеји тәкрарламагдан данышыр. О, үрәкдән ҝәлән хаһишләримизи вә миннәтдарлығымызы һеч вахт тәкрарламалы олмадығымызы нәзәрдә тутмурду. Өлүмүндән бир аз өнҹә Ҝетсамани бағында Иса дуасында «ејни сөзләри» тәкрарламышды (Марк 14:32-39).
9, 10. Һансы мәнада дуада тәкрарлара јол вермәмәлијик?
9 «Бүтпәрәстләр» кими дуада ејни сөзләри тәкрарламаг дүзҝүн олмазды. Онлар бош сөзләрдән ибарәт әзбәрләнмиш ифадәләри тәкрар-тәкрар сөјләјирләр. Бу, «сәһәрдән ҝүнортаја гәдәр “Еј Баал, бизә ҹаваб вер!”» — дејә јалваран јаланчы аллаһ олан Баалын хидмәтчиләринә көмәк етмәди (1 Пад. 18:26). Бу ҝүн милјонларла инсанлар әбәс јерә зәнн едирләр ки, узун-узады, сонсуз тәкрарлардан ибарәт дуалар етмәклә «ешидиләҹәкләр». Лакин Иса бизә баша салыр ки, Јеһованын нөгтеји-нәзәринҹә, ‘чох данышмағын’ һеч бир фајдасы јохдур. Сонра Иса дејир:
10 «Онлара бәнзәмәјин; чүнки Атаныз сизин нәләрә еһтијаҹыныз олдуғуну сиз Ондан диләмәздән әввәл билир» (Мат. 6:8). Бир чох јәһуди дин рәһбәрләри гејри-јәһудиләр кими һәддән артыг узун-узады дуа едирдиләр. Һәгиги ибадәтин ваҹиб һиссәси олан сәмими дуалара һәмд сөзләри, миннәтдарлыг вә хаһишләр дахилдир (Филип. 4:6). Санки Аллаһ унутган имиш кими, еһтијаҹ дујдуғумуз шејләри Она тәкрар-тәкрар сөјләмәк дүзҝүн олмазды. Дуа едәндә јадда сахламалыјыг ки, мүраҹиәт етдијимиз Аллаһ ‘нәләрә еһтијаҹымыз олдуғуну Ондан диләмәздән әввәл билир’.
11. Әҝәр бизә јығынҹагда дуа етмәк шәрәфи верилибсә, нәји јадда сахламалыјыг?
11 Исанын гејри-мәгбул дуа һаггында дедикләри бизә хатырладыр ки, ибарәли вә бош сөзләрлә Аллаһа тәәссүрат бағышламаг мүмкүн дејил. Һәмчинин баша дүшмәлијик ки, јығынҹагда дуа едәркән мәгсәдимиз динләјиҹиләрдә тәәссүрат ојатмаг олмамалыдыр, ејни заманда дуаларымыз о гәдәр узун чәкмәмәлидир ки, динләјиҹиләр нә вахт «амин» дејәҹәкләрини сәбирсизликлә ҝөзләсинләр. Һәмчинин дуа васитәсилә еланлар етмәк вә ја динләјиҹиләрә мәсләһәт вермәк Исанын Дағүстү тәблиғиндә сөјләдикләринин руһуна ујғун дејил.
Иса бизә дуа етмәји өјрәдир
12. «Адын мүгәддәс тутулсун» хаһишинин мәнасыны неҹә изаһ едәрдиниз?
12 Иса дуа етмәк шәрәфиндән намүнасиб тәрздә истифадә етмәјә гаршы хәбәрдарлыг етмәклә јанашы, бизә неҹә дуа етмәји дә өјрәтди. (Матта 6:9-13 ајәләрини оху.) Онун нүмунәви дуасыны әзбәрләјиб, тәкрар-тәкрар сөјләмәк лазым дејил. Әксинә, бу неҹә дуа етмәјимизә даир бир нүмунә кими верилиб. Мәсәлән, Иса дуасына: «Еј ҝөјләрдә олан Атамыз, адын мүгәддәс тутулсун» сөзләри илә башламагла Аллаһы биринҹи јерә гојду (Мат. 6:9). Буна ҝөрә биз дә Јеһоваја ‘Ата’ дејә мүраҹиәт едирик, чүнки О, јердән јүксәкләрдә, «ҝөјләрдә» јашајан Јараданымыздыр (Ганун. т. 32:6; 2 Салн. 6:21; Һәв. иш. 17:24, 28). Ҹәмдә ишләнән «бизим» сөзү ҝөстәрир ки, һәмиманлыларымызын да Аллаһла јахын мүнасибәтләри вар. «Адын мүгәддәс тутулсун» сөзләри Јеһованын Өз адыны Еден бағында галдырылмыш үсјандан етибарән јахылан бүтүн ләкәләрдән тәмизләјәрәк Өзүнү тәгдис етмәсинә даир хаһишдир. Бу дуаја ҹавабында Јеһова јер үзүндән пислији силәҹәк вә бунунла да Өзүнү тәгдис едәҹәк (Јез. 36:23).
13. а) «Сәлтәнәтин ҝәлсин» хаһиши неҹә јеринә јетириләҹәк? б) Аллаһын ирадәсинин јер үзүндә јеринә јетмәсинә нә дахилдир?
13 «Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун» (Мат. 6:10). Исанын нүмунәви дуада һаггында данышдығы ‘Сәлтәнәт’ Мәсиһин вә дирилмиш «мүгәддәсләри»н әлиндә олан һөкумәтдир (Дан. 7:13, 14, 18; Јешаја 9:6, 7). Онун ‘ҝәлиши’ барәдә дуа етмәк исә о демәкдир ки, биз Аллаһын Падшаһлығынын јер үзүндә илаһи рәһбәрлијә гаршы чыханларын һамысына гаршы тәдбир ҝөрмәсини хаһиш едирик. Бу, тезликлә баш верәҹәк вә бүтүн дүнјада салеһлијин, әмин-аманлығын вә фираванлығын һөкм сүрәҹәји Ҹәннәт бәрпа олунаҹаг (Мәз. 72:1-15; Дан. 2:44; 2 Пет. 3:13). Јеһованын ирадәси һал-һазырда ҝөјләрдә јеринә јетир вә онун јердә дә јеринә јетмәси барәдә едилән дуа, гәдимдә олдуғу кими, Аллаһын бүтүн мүасир дүшмәнләринин мәһв едилмәси дә дахил олмагла, Онун Јер күрәсинә даир нијјәтини јеринә јетирмәси барәдә јалварышдыр. (Мәзмур 83:1, 2, 13-18 ајәләрини оху.)
14. Нәјә ҝөрә ‘ҝүндәлик чөрәк’ үчүн дуа етмәк мүнасибдир?
14 «Ҝүндәлик чөрәјимизи бизә бу ҝүн вер» (Мат. 6:11; Лука 11:3). Бу һагда дуа едәндә Аллаһдан бизи лазыми «ҝүндәлик» гида илә тәмин етмәсини хаһиш едирик. Бу ҝөстәрир ки, биз Аллаһын һәр ҝүн гајғымыза галмаға гадир олдуғуна инанырыг. Биз еһтијаҹларымызын артыгламасы илә тәмин олунмасыны хаһиш етмирик. Ҝүндәлик тәләбатларымыза даир бу хаһиш Аллаһын исраиллиләрә «һәр ҝүн... лазыми мигдарда» манна топламаг әмрини хатырлада биләр (Чых. 16:4).
15. «Бизә борҹлу оланлары бағышладығымыз кими, бизим борҹларымызы да бағышла» хаһишинин мәнасы нәдир?
15 Нүмунәви дуадакы нөвбәти хаһиш диггәтимизи нә етмәли олдуғумуза јөнәлдир. Иса демишди: «Бизә борҹлу оланлары бағышладығымыз кими, бизим борҹларымызы да бағышла» (Мат. 6:12). «Луканын Мүждәси» бу ‘борҹларын’ ‘ҝүнаһлар’ олдуғуну ҝөстәрир (Лука 11:4). Јалныз бизә гаршы ҝүнаһ ишләдәнләри ‘бағышладығымыз’ тәгдирдә Јеһованын бизи бағышлајаҹағына үмид едә биләрик. (Матта 6:14, 15 ајәләрини оху.) Биз башгаларыны бүтүн үрәкдән бағышламалыјыг (Ефес. 4:32; Колос. 3:13).
16. Матта 6:13 ајәсиндә јазылан ики хаһиши неҹә баша дүшмәлијик?
16 «Бизи имтаһана чәкмә, лакин бизи шәрдән хилас ет» (Мат. 6:13). Бир-бири илә әлагәли олан бу ики хаһиши неҹә баша дүшмәлијик? Бир шеј данылмаздыр: Јеһова бизи ҝүнаһла имтаһана чәкмир. (Јагуб 1:13 ајәсини оху.) Бизи ҝүнаһа тәһрик едән шәририн, Шејтанын өзүдүр (Мат. 4:3). Лакин Мүгәддәс Китабда Јеһованын јол вердији ишләр һагда санки Онун Өзү едирмиш кими данышылыр (Рут 1:20, 21; Ваиз 11:5). Демәли, «бизи имтаһана чәкмә» дедикдә Јеһовадан хаһиш едирик ки, Она итаәтсизлијә тәһрик олунанда тәслим олмамағымыза көмәк етсин. Нәһајәт, «бизи шәрдән хилас ет»мәси барәдә дуа едәндә Јеһовадан Шејтанын бизә үстүн ҝәлмәсинә јол вермәмәсини хаһиш етмиш олуруг. Вә биз әмин ола биләрик ки, О, ‘ҝүҹүмүздән артыг имтаһан олунмамыза разылыг вермәз’. (1 Коринфлиләрә 10:13 ајәсини оху.)
‘Диләјин, ахтарын, гапыны дөјүн’
17, 18. ‘Диләјин, ахтарын, гапыны дөјүн’ нә демәкдир?
17 Һәвари Павел һәмиманлыларыны ‘дуада мәтанәтли олмаға’ тәшвиг едирди (Ром. 12:12). Буна бәнзәр фикри Иса да сөјләмишди: «Диләјин, сизә вериләҹәк; ахтарын, тапаҹагсыныз; гапыны дөјүн, сизә ачылаҹаг. Чүнки һәр диләјән алыр, ахтаран тапыр вә гапы ону дөјәнә ачылыр» (Мат. 7:7, 8). Аллаһын ирадәсинә ујғун олан һәр шеји ‘диләмәк’ мүнасибдир. Исанын сөзләринә ујғун олараг һәвари Јәһја демишди: «Аллаһын гаршысында малик олдуғумуз ҹәсарәт исә бундан ибарәтдир ки, әҝәр биз Онун ирадәсинә ујғун шәкилдә бир шеј диләјириксә, О бизи ешидир» (1 Јәһ. 5:14).
18 Исанын «диләјин... [вә] ахтарын» мәсләһәти ҝөстәрир ки, биз сәјлә дуа етмәли вә тәслим олмамалыјыг. Падшаһлыға дахил олмаг, онун ҝәтирәҹәји хејир-дуалары вә мүкафатлары алмаг үчүн биз һәмчинин ‘дөјмәјә’ давам етмәлијик. Бәс Аллаһын дуаларымыза ҹаваб верәҹәјинә әмин ола биләрикми? Бәли, әҝәр Јеһоваја садигиксә, биләрик, чүнки Мәсиһ демишдир: «Һәр диләјән алыр, ахтаран тапыр вә гапы ону дөјәнә ачылыр». Јеһованын хидмәтчиләринин башына ҝәлән бир чох һадисәләр Аллаһын һәгигәтән дә ‘дуалары ешитдијини’ ҝөстәрир (Мәз. 65:2).
19, 20. Исанын Матта 7:9-11 ајәләриндәки сөзләри Јеһованын гајғыкеш Ата олдуғуну неҹә ҝөстәрир?
19 Иса Јеһованы өвладларына јахшы һәдијјәләр верән гајғыкеш Ата илә мүгајисә етди. Тәсәввүр ет ки, Иса Дағүстү тәблиғини сөјләјәндә сән дә орадасан вә онун бу сөзләрини ешидирсән: «Аранызда елә бир адам вармы ки, оғлу ондан чөрәк истәдикдә, она даш версин? Јахуд балыг истәдикдә, она илан версин? Беләликлә, әҝәр сиз пис олдуғунуз һалда өз өвладларыныза јахшы һәдијјәләр верә билирсинизсә, ҝөјләрдә олан Атанызын Ондан диләјәнләрә јахшы шејләр верәҹәји нә гәдәр јәгиндир!» (Мат. 7:9-11).
20 Ҝүнаһы мирас алмыш инсан нисбәтән «пис» олса да, тәбии ки, өвладыны севир. Ата өз ушағыны алдатмајаҹаг, әксинә, она ‘јахшы һәдијјәләр’ вермәјә чалышаҹаг. Бизә ата мәһәббәти илә јанашан гајғыкеш сәмави Атамыз мүгәддәс руһ кими «јахшы һәдијјәләр» бәхш едир (Лука 11:13). Мүгәддәс руһ бизи «һәр бир јахшы бәхшиш вә һәр камил һәдијјә» верән Аллаһа мәгбул тәрздә ибадәт етмәк үчүн мөһкәмләндирә биләр (Јаг. 1:17).
Исанын сөзләриндән даим фајдаланын
21, 22. Дағүстү тәблиғи бу гәдәр дәјәрли едән нәдир вә Исанын мәсләһәтләри барәдә сән нә дүшүнүрсән?
21 Дағүстү тәблиғ дүнјада ән мөһтәшәм нитг олмушдур. Ону бу гәдәр дәјәрли едән ајдын руһани инҹиләрлә зәнҝин олмасыдыр. Бу мәгаләләр силсиләсиндән өјрәндијимиз фикирләрдән ҝөрдүјүмүз кими, бу нитгдәки мәсләһәтләрә әмәл етмәјин бизә бөјүк фајдасы дәјәҹәк. Исанын бу мәсләһәтләри һал-һазырда һәјатымызы јахшылашдыра вә хошбәхт ҝәләҹәк үчүн үмид верә биләр.
22 Бу мәгаләләрдә Исанын Дағүстү тәблиғиндән јалныз бәзи ҝөзәл фикирләри мүзакирә етдик. Тәәҹҹүблү дејил ки, Исанын нитгини ешидән «халг Онун тәлиминә тәәҹҹүбләнди» (Мат. 7:28). Шүбһәсиз ки, биз дә зеһнимизи вә үрәјимизи Бөјүк Мүәллим олан Иса Мәсиһин бу вә ја диҝәр дәјәрли сөзләри илә долдурсаг, бу бизә дә ејни тәәссүраты бағышлајаҹаг.
Неҹә ҹаваб верәрдиниз?
• Иса ријакарҹасына едилән дуалар һаггында нә демишдир?
• Нәјә ҝөрә биз дуа едәркән узун-узады тәкрарлардан гачмалыјыг?
• Исанын нүмунәви дуасына һансы хаһишләр дахилдир?
• ‘Диләјин, ахтарын, гапыны дөјүн’ мәсләһәтинә неҹә әмәл едә биләрик?
[15-ҹи сәһифәдәки шәкил]
Иса өзләрини ҝөстәрмәк үчүн дуа едән икиүзлүләри мүһакимә едирди
[17-ҹи сәһифәдәки шәкил]
Ҝүндәлик чөрәк үчүн дуа етмәјин нә үчүн мүнасиб олдуғуну билирсәнми?