Онлар ‘Гузунун ардынҹа ҝедирләр’
«Бунлар Гузу һара ҝедәрсә, ардынҹа ҝедәнләрдир» (ВӘҺЈ 14:4).
1. Исанын әсил шаҝирдләри онун ардынҹа ҝетмәк мәсәләсинә неҹә јанашырдылар?
ХИДМӘТИНИН тәхминән ики ил јарымыны Иса ‘Кефернаһумда синагогда тәлим верирди’. Онун сөзләриндән дәһшәтә ҝәлән «шаҝирдләрдән бир чоху Ондан ајрылыб, артыг Онунла ҝәзмирди». Иса 12 һәварисиндән онларын да ҝетмәк истәјиб-истәмәдикләрини сорушанда Шимон Петер ҹаваб верди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир. Биз дә иман етдик вә билирик ки, Јашајан Аллаһын Оғлу Мәсиһ Сәнсән» (Јәһ. 6:48, 59, 60, 66-69). Исанын әсил шаҝирдләри онун ардынҹа ҝетмәкдән имтина етмәдиләр. Онлар мүгәддәс руһла мәсһ едилдикдән сонра да Исанын ҝөстәришләринә риајәт етмәјә давам едирдиләр (Һәв. иш. 16:7-10).
2. а) «Садиг вә ағыллы гул» вә ја «садиг... нөкәрбашы» кимдир? б) Гул синфинин ‘Гузу һара ҝедәрсә, ардынҹа ҝетмәси’ нәдән ҝөрүнүр?
2 Бәс бизим дөврдә јашајан мәсһ олунмуш мәсиһчиләр һаггында нә демәк олар? Иса ‘ҝәлишинин [«иштиракынын», ЈД] вә дөврүн сонунун әламәтинә’ даир пејғәмбәрлијиндә јер үзүндәки руһла мәсһ олунмуш давамчыларындан ибарәт групу «садиг вә ағыллы гул» вә ја «садиг... нөкәрбашы» адландырды (Мат. 24:3, 45; Лука 12:42). Гул синфи бир груп шәклиндә ‘Гузу һара ҝедәрсә, ардынҹа ҝедир’. (Вәһј 14:4, 5 ајәләрини оху.) Онун үзвләри өзләрини јалан динин дүнја империјасы олан ‘Бөјүк Бабилин’ тәлимләриндән вә әмәлләриндән тәмиз сахламагла руһани мәнада бакир галырлар (Вәһј 17:5). Онларын дилиндә тәлимләрлә бағлы һеч бир ‘јалан тапылмајыб’ вә онлар өзләрини Шејтанын дүнјасындан ‘ләкәсиз’ сахлајырлар (Јәһ. 15:19). Мәсһ олунмушларын јер үзүндәки галығы ҝәләҹәкдә Гузунун ардынҹа ҝөјә ҝедәҹәк (Јәһ. 13:36).
3. Гул синфинә етибар етмәјимиз нәјә ҝөрә ваҹибдир?
3 Иса садиг вә ағыллы гулу өз «нөкәрләри», јәни гул синфинин ајры-ајры үзвләри үзәринә тәјин едиб ки, онлара ‘вахтлы-вахтында јемәк версин’. О, һәмчинин «бүтүн маликанәсинин идарәсини» гула тапшырыб (Мат. 24:45-47). Бу ‘маликанәјә’ сајы артмагда олан ‘башга гојунлардан’ ибарәт «бөјүк бир издиһам» дахилдир (Вәһј 7:9; Јәһ. 10:16). Бәс мәсһ олунмушларын вә ‘башга гојунларын’ ајры-ајры үзвләри онларын үзәринә тәјин олунан гула етибар етмәли дејилләрми? Гул синфинин етибарымыза лајиг олмасына чохлу сәбәбләр вар. Ән ваҹиб сәбәбләрдән икиси бунлардыр: 1) Јеһова гул синфинә етибар едир. 2) Гул синфинә һәмчинин Иса да етибар едир. Ҝәлин һәм Јеһова Аллаһын, һәм дә Иса Мәсиһин садиг вә ағыллы гула там етибар етдијини ҝөстәрән сүбутлара нәзәр салаг.
Јеһова гула етибар едир
4. Биз нәјә ҝөрә садиг вә ағыллы гулун тәгдим етдији руһани гидаја әмин ола биләрик?
4 Ҝәлин ҝөрәк, садиг вә ағыллы гул нәјин сајәсиндә бизи вахтлы-вахтында бәсләјиҹи руһани гида илә тәмин едир. Јеһова дејир: «Сәнә тәлим верәҹәјәм, ҝедәҹәјин јолу өјрәдәҹәјәм». Сонра әлавә едир: «Нәсиһәт верәҹәјәм, ҝөзүм сәнин үстүндә олаҹаг» (Мәз. 32:8). Бәли, Јеһова гул синфинә рәһбәрлик верир. Буна ҝөрә дә биз гул синфинин Мүгәддәс Јазылара даир изаһатынын дүзҝүнлүјүнә вә она әсасән вердији рәһбәрлијә там етибар едә биләрик.
5. Гул синфинә Аллаһын руһунун сәлаһијјәт вердији нәдән ҝөрүнүр?
5 Јеһова гул синфини һәмчинин мүгәддәс руһу илә дә хејир-дуаландырыр. Бу руһ ҝөзәҝөрүнмәз олса да, фәалијјәт ҝөстәрдији инсанларда јетишдирдији бәһрәләри ачыгҹа ҝөрмәк олар. Садиг вә ағыллы гулун Јеһова Аллаһ, Онун Оғлу вә Падшаһлыг һаггында вердији үмумдүнја шаһидлик ишиндә нәләрә наил олдуғуну дүшүнәк. Јеһованын хидмәтчиләри Падшаһлыг һаггында мүждәни 230-дан чох өлкә вә әразидә бәјан едирләр. Мәҝәр бу иши ҝөрмәкдә гул синфинә Јеһованын руһунун сәлаһијјәт вердији данылмаз сүбут дејилми? (Һәвариләрин ишләри 1:8 ајәсини оху.) Гул синфи Јеһованын бүтүн дүнјадакы халгыны вахтлы-вахтында руһани гида илә тәмин етмәк үчүн чохлу ваҹиб гәрарлар гәбул етмәлидир. Бу гәрарлары гәбул едәркән вә һәјата кечирәркән гул руһун сәмәрәсинә дахил олан мәһәббәт, һәлимлик вә диҝәр хүсусијјәтләри тәзаһүр етдирир (Галат. 5:22, 23).
6, 7. Јеһова садиг гула нә дәрәҹәдә етибар едир?
6 Јеһованын садиг гула нә дәрәҹәдә етибар етдијини анламаг үчүн онун үзвләринә вердији вәдин үзәриндә дүшүнәк. Һәвари Павел јазыб: «Шејпур чалынаҹаг вә өлүләр гејри-фани шәкилдә дириләҹәкләр, биз исә дәјишиләҹәјик. Чүнки бу фани варлығымыз гејри-фанилији ҝејмәли, бу өлүмлү варлығымыз өлмәзлији ҝејмәлидир» (1 Кор. 15:52, 53). Мәсиһин Аллаһа фани инсан бәдәниндә сәдагәтлә хидмәт едән вә өлән мәсһ олунмуш давамчылары әбәди јашајан ади руһани варлыглар кими дирилмирләр. Онлара өлмәзлик — сонсузлуг вә мәһведилмәзлик верилир. Үстәлик, онлар чүрүмәјән, өзү-өзүнү тәмин едән бәдән алараг гејри-фанилији алырлар. Вәһј 4:4 ајәсиндә дирилән мәсһ едилмишләр тахтлар үзәриндә отуран вә башларында гызыл таҹ оланлар кими тәсвир олунурлар. Мәсһ олунмуш мәсиһчиләри падшаһлыг иззәти ҝөзләјир. Анҹаг Аллаһын онлара етибар етмәсинә башга сүбутлар да вар.
7 Вәһј 19:7, 8 ајәләриндә дејилир: «Гузунун тој сааты ҝәлди. Онун ҝәлини өзүнү һазырлады; вә ҝејмәк үчүн она тәмиз, парлаг, зәриф кәтан верилди. Зәриф кәтан исә мүгәддәсләрин салеһ ишләридир». Јеһова мәсһ олунмуш мәсиһчиләри Оғлу үчүн ҝәлин олараг сечиб. Гејри-фанилик, өлмәзлик, падшаһлыг һакимијјәти, Гузуја әрә ҝетмәк имканы — бунлар неҹә дә мөһтәшәм әнамлардыр! Бүтүн бунлар ‘Гузу һара ҝедәрсә, ардынҹа ҝедән’ мәсһ олунмуш мәсиһчиләрә Аллаһын етибар етдијини ҝөстәрән дәлилләрдир.
Иса гула етибар едир
8. Иса мәсһ олунмуш давамчыларына етибар етдијини неҹә ҝөстәрир?
8 Исанын өз мәсһ олунмуш давамчыларына тамамилә етибар етдијинә һансы сүбутлар вар? Јер үзүндәки һәјатынын сон ахшамы Иса 11 садиг һәварисинә вәд верәрәк деди: «Кечирдијим сынагларда Мәнимлә бәрабәр оланлар сизсиниз, вә Атам Мәнә бир сәлтәнәт тапшырдығы кими Мән дә сизә бир сәлтәнәт тапшырырам ки, Мәним Сәлтәнәтимдә сүфрәмдә јејиб-ичәсиниз вә Исраилин он ики гәбиләсинә һөкм етмәк үчүн тахтларда отурасыныз» (Лука 22:28-30). Исанын о вахт 11 һәвариси илә кәсдији әһд 144 000 мәсһ олунмуш мәсиһчинин һамысына аиддир (Лука 12:32; Вәһј 5:9, 10; 14:1). Иса онлара етибар етмәсәјди, өзү илә бирликдә Падшаһлыгда һөкмранлыг етмәк үчүн әһд бағлајардымы?
9. Мәсиһин ‘бүтүн маликанәсинә’ нәләр дахилдир?
9 Үстәлик, Иса Мәсиһ «бүтүн маликанәсинин идарәсини» — јер үзүндә Падшаһлыға мәхсус олан һәр шеји садиг вә ағыллы гула тапшырыб (Мат. 24:47). Бу маликанәјә Јеһованын Шаһидләринин үмумдүнја мәркәзи идарәси, мүхтәлиф өлкәләрдә јерләшән филиаллар, Конгрес вә Падшаһлыг Заллары, һәмчинин Падшаһлыг һаггында хош хәбәрин тәблиғи вә шаҝирд һазырламаг иши дахилдир. Мәҝәр кимсә етибар етмәдији адама гијмәтли шејләринин гејдинә галмағы вә ондан истифадә етмәји һәвалә едәрдими?
10. Иса Мәсиһин өз мәсһ олунмуш давамчылары илә олдуғуну нә ҝөстәрир?
10 Ҝөјә галхмаздан бир гәдәр әввәл Иса садиг шаҝирдләри гаршысында пејда олуб онлара белә бир вәд верди: «Будур, Мән, дөврүн сонуна гәдәр һәр ҝүн сизинләјәм» (Мат. 28:20). Иса өз вәдини јеринә јетирдими? Сон 15 ил әрзиндә Јеһованын Шаһидләринин јығынҹагларынын сајы бүтүн дүнјада 70 000-дән 100 000-ә гәдәр артыб, бу исә 40 фаиздән чох артымы тәшкил едир. Бәс јени шаҝирдләр һагда нә демәк олар? Сон 15 ил әрзиндә тәхминән 4,5 милјон шаҝирд вәфтиз олунуб, белә ки, ҝүнә орта һесабла 800-дән чох адам дүшүр. Бу валеһедиҹи артым Мәсиһин мәсһ олунмуш давамчыларына јығынҹаг ҝөрүшләриндә рәһбәрлик етдијинә вә шаҝирд һазырламаг ишиндә онлары дәстәкләдијинә ајдын сүбутдур.
Гул һәм садиг, һәм дә ағыллыдыр
11, 12. Гул һәм садиг, һәм дә ағыллы олдуғуну неҹә ҝөстәрир?
11 Јеһова Аллаһ вә Иса Мәсиһ садиг вә ағыллы гула тамамилә етибар едирләрсә, биз дә белә етмәли дејиликми? Ахы гул она тапшырылан иши јеринә јетирәркән сәдагәтли олдуғуну ҝөстәрмишдир. Мәсәлән, «Ҝөзәтчи Гүлләси» 130 илдир ки, дәрҹ едилир. Јеһованын Шаһидләринин јығынҹаг ҝөрүшләри вә конгресләри руһанилијимизи инкишаф етдирмәјә давам едир.
12 Садиг гул һәм дә ағыллыдыр: о нә Јеһовадан габаға гачараг мәғрурлуг ҝөстәрир, нә дә ки Аллаһ ајдын ҝөстәришләр верән заман ҝеридә галыр. Мәсәлән, јалан дин рәһбәрләри бу дүнјанын худбин, аллаһсыз һәрәкәтләри илә динмәз-сөјләмәз разылашдыглары, јахуд онлара ачыг-ајдын бәраәт газандырдыглары һалда, гул Шејтан системинин тәләләринә гаршы вахтлы-вахтында мүдрик хәбәрдарлыглар верир. Бу, Јеһова Аллаһын вә Иса Мәсиһин ону хејир-дуаландырмасы сајәсиндә мүмкүндүр. Буна ҝөрә дә садиг вә ағыллы гул бизим етибарымыза лајигдир. Она етибар етдијимизи бәс биз неҹә ҝөстәрә биләрик?
Гузунун ардынҹа ҝедән мәсһ олунмушларла ҝедин
13. Зәкәријјәнин пејғәмбәрлијинә әсасән, садиг вә ағыллы гула етибар етдијимизи неҹә ҝөстәрә биләрик?
13 Мүгәддәс Јазыларын «Зәкәријјә» китабында ‘бир Јәһудијә’ јахынлашан вә: «Гој сизинлә ҝедәк» дејән «он адам» һаггында данышылыр. (Зәкәријјә 8:23 ајәсини оху.) Он адамын ‘Јәһудијә’ «сиз» дејә мүраҹиәт етмәси онун бир груп инсаны тәмсил етдијини ҝөстәрир. Бизим ҝүнләрдә јәһуди мәсһ олунмуш мәсиһчиләрин галығыны — ‘Аллаһын Исраилинин’ бир һиссәсини тәмсил едир (Галат. 6:16). «Мүхтәлиф дилләрдә данышан милләтләрдән олан он адам» исә башга гојунлардан ибарәт олан бөјүк издиһамы тәмсил едир. Мәсһ олунмуш мәсиһчиләр, Мәсиһ һара ҝедәрсә, онун ардынҹа ҝетдикләри кими, бөјүк издиһам да садиг вә ағыллы гулла ҝедир, јәни ону мүшајиәт едир. Бөјүк издиһамын үзвләри һеч вахт өзләрини «сәмави дәвәтә ортаг оланлар»ын әмәкдашлары адландырмагдан утанмамалыдырлар (Ибр. 3:1). Иса мәсһ олунмушлары «гардаш» адландырмаға утанмыр (Ибр. 2:11).
14. Мәсиһин гардашларыны неҹә дәстәкләјә биләрик?
14 Иса Мәсиһ гардашларына сәдагәтлә ҝөстәрилән көмәји өзүнә ҝөстәрилән көмәк кими гијмәтләндирир. (Матта 25:40 ајәсини оху.) Белә исә, јерүзү үмиди оланлар Мәсиһин руһла мәсһ олунмуш гардашларыны неҹә дәстәкләјә биләрләр? Әсас етибарилә Падшаһлыг һаггында хош хәбәрин тәблиғиндә көмәк етмәклә (Мат. 24:14; Јәһ. 14:12). Онилликләр әрзиндә мәсһ олунмушларын сајы јер үзүндә азалдығы һалда, башга гојунларын сајы артыб. Јерүзү үмидинә малик оланлар имкан дахилиндә таммүддәтли хидмәтчиләр кими хидмәт едәрәк шаһидлик верәндә руһла мәсһ олунмушлара шаҝирд һазырламаг тапшырыгларыны јеринә јетирмәкдә дәстәк олурлар (Мат. 28:19, 20). Гејд етмәк лазымдыр ки, бу иши мүхтәлиф үсулларла ианәләр етмәклә дә дәстәкләјә биләрик.
15. Һәр бир мәсиһчи гулун вахтлы-вахтында вердији гидаја вә тәшкилати гәрарлара неҹә мүнасибәт ҝөстәрмәлидир?
15 Бәс садиг гулун Мүгәддәс Китаб нәшрләри вә јығынҹаг ҝөрүшләри васитәсилә вахтлы-вахтында тәгдим етдији руһани гида һагда ајры-ајрылыгда һәр биримиз нә дүшүнүрүк? Биз ону миннәтдарлыгла гәбул едәрәк өјрәндикләримизи ҹанла-башла тәтбиг едирикми? Садиг вә ағыллы гулун тәшкилати гәрарларына неҹә мүнасибәт ҝөстәририк? Верилән ҝөстәришләрә һазырлыгла табе олмағымыз ҝөстәрир ки, биз Јеһованын Өз рәһбәрлијини мәһз бу ҹүр тәгдим етдијинә инанырыг (Јаг. 3:17).
16. Нәјә ҝөрә бүтүн мәсиһчиләр Мәсиһин гардашларына гулаг асмалыдырлар?
16 Иса демишдир: «Гојунларым сәсимә гулаг асырлар, мән дә онлары таныјырам, вә ардымҹа ҝәлирләр» (Јәһ. 10:27). Мәсһ олунмуш мәсиһчиләр мәһз белә давранырлар. Бәс онларла ҝедәнләр һагда нә демәк олар? Онлар Исаја гулаг асмалыдырлар. Онун гардашларына да гулаг асмаг ваҹибдир. Чүнки Аллаһын халгынын руһани фираванлығынын әсас мәсулијјәти онларын үзәринә гојулуб. Мәсиһин гардашларынын сәсинә гулаг асмаг өзүнә нәји дахил едир?
17. Гул синфинә гулаг асмаг өзүнә нәји дахил едир?
17 Бу ҝүн садиг вә ағыллы гулу бүтүн дүнјада Падшаһлығын тәблиғ ишини тәшкил едән вә она рәһбәрлик едән Рәһбәрлик Шурасы тәмсил едир. Рәһбәрлик Шурасынын үзвләри руһла мәсһ олунмуш тәҹрүбәли ағсаггаллардыр. Онлары арамызда рәһбәрлији өз үзәрләринә ҝөтүрәнләр кими тәсвир етмәк олар (Ибр. 13:7). Бүтүн дүнјада 100 000-дән чох јығынҹағы тәшкил едән Падшаһлығын 7 000 000-дан чох тәблиғчисинин гејдинә галан бу мәсһ олунмуш нәзарәтчиләрин ‘Рәббин ишиндә’ ҝөрмәли ишләри чохдур (1 Кор. 15:58). Гул синфинә гулаг асмаг ону тәмсил едән Рәһбәрлик Шурасы илә там әмәкдашлыг етмәк демәкдир.
Гул синфинә гулаг асанлар хејир-дуа алырлар
18, 19. а) Садиг вә ағыллы гул синфинә гулаг асанлар һансы хејир-дуалары алырлар? б) Биз нәјә гәти гәрарлы олмалыјыг?
18 Садиг вә ағыллы гул тәјин олундуғу андан етибарән ‘чохларыны салеһлијә дөндәриб’ (Дан. 12:3). Бура, јашадығымыз бу пис систем мәһв олунан заман сағ галмаға үмид едәнләр дахилдир. Аллаһ гаршысында салеһ ада малик олмаг неҹә дә бөјүк хејир-дуадыр!
19 Ҝәләҹәкдә ‘мүгәддәс шәһәр, [144 миндән ибарәт олан] јени Јерусәлим өз әри үчүн һазырланмыш бәзәкли бир ҝәлин кими ҝөјдән, Аллаһын јанындан енәндә’ гул синфинә гулаг асанлары нә ҝөзләјир? Мүгәддәс Китабда дејилир: «Аллаһын Өзү онларла олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:2-4). Беләликлә, ҝәлин һәмишә Мәсиһин руһла мәсһ олунмуш етибарлы гардашларына гулаг асаг.
Нә өјрәндиниз?
• Јеһованын садиг вә ағыллы гула етибар етдијинә һансы сүбутлар вар?
• Мәсиһин гул синфинә тамамилә етибар етдији нәдән ҝөрүнүр?
• Нәјә ҝөрә садиг нөкәрбашы етибарымыза лајигдир?
• Гул синфинә етибар етдијимизи неҹә ҝөстәрә биләрик?
[25-ҹи сәһифәдәки шәкил]
Билирсәнми, Јеһова Өз Оғлу үчүн ҝәлин хүсусунда кими сечиб?
[26-ҹы сәһифәдәки шәкилләр]
Иса Мәсиһ өз «маликанәсинин» идарәсини садиг вә ағыллы гула тапшырыб
[27-ҹи сәһифәдәки шәкил]
Шаһидлик ишиндә иштирак едәндә мәсһ олунмуш мәсиһчиләри дәстәкләмиш олуруг