Мәһәббәтлә өјрәдәрәк Исаны тәглид един
«Бу Адам кими данышан әсла олмамышдыр» (ЈӘҺ. 7:46).
1. Исанын тәлим вермә тәрзи инсанларда һансы тәәссүраты ојадырды?
ИСАНЫН тәлимләрини ешитмәјин нә гәдәр һејрәтамиз олдуғуну бир тәсәввүр ет! Мүгәддәс Китабда биз онун тәлимләринин башга адамларда һансы тәәссүраты ојатдығы барәдә охујуруг. Мисал үчүн, Лука јазыр ки, Исанын доғма шәһәриндән олан инсанлар «Онун ағзындан чыхан ләтиф кәламлара һејран олур»дулар. Маттанын јаздығына әсасән, Исанын Дағүстү тәблиғини ешидән «халг Онун тәлиминә тәәҹҹүбләнди». Јәһја исә јазыр ки, Исаны һәбс етмәк үчүн ҝөндәрилән мүһафизләр әлибош гајыданда белә дедиләр: «Бу Адам кими данышан әсла олмамышдыр» (Лука 4:22; Мат. 7:28; Јәһ. 7:46).
2. Иса һансы тәлим үсулларындан истифадә едирди?
2 Мүһафизләр јанылмырды. Һәгигәтән дә, Иса дүнјада јашамыш ән даһи Мүәллим иди. О, ајдын, садә вә данылмаз мәнтиглә өјрәдир, мәсәлләрдән вә суаллардан мәһарәтлә истифадә едирди. О, һәмсөһбәтинин јухары вә ја ашағы тәбәгәдән олмасыны нәзәрә алараг тәлим үсулларыны дәјишдирирди. Онун өјрәтдији һәгигәтләр асан баша дүшүлмәклә јанашы, ејни заманда дәрин мәна кәсб едирди. Анҹаг Исанын ән бөјүк Мүәллим олмасынын сәбәби јалныз бунлар дејилди.
Ән ваҹиб хүсусијјәт мәһәббәтдир
3. Бир мүәллим кими, Иса өз ҝүнләринин дин рәһбәрләриндән нә илә фәргләнирди?
3 Еһтимал ки, дин алимләри вә фәрисејләр арасында савадлы вә өјрәтмәк габилијјәти олан ағыллы инсанлар да вар иди. Бәс Исанын тәлим үсуллары онларынкындан нә илә фәргләнирди? О дөврүн дин рәһбәрләри садә халгы севмирди. Әксинә, онлар садә инсанлара икраһла јанашыр вә онлары ‘мәлун’ һесаб едирдиләр (Јәһ. 7:49). Онлардан фәргли олараг, Исанын бу инсанлара јазығы ҝәлирди, чүнки онлар «чобансыз гојунлар кими тагәтсиз вә дағыныг идиләр» (Мат. 9:36). О, мүлајим, шәфгәтли вә хејирхаһ инсан иди. Бундан әлавә, дин рәһбәрләриндә Аллаһа гаршы әсил мәһәббәт јох иди (Јәһ. 5:42). Лакин Иса Атасыны севир вә Онун ирадәсини јеринә јетирмәкдән зөвг алырды. Дин рәһбәрләри өз хејирләри үчүн Аллаһын Кәламыны тәһриф етдикләри һалда, Иса «Аллаһын сөзүнү» севир, ону инсанлара өјрәдир, изаһ едир вә она әсасән јашајырды (Лука 11:28). Мәсиһин бүтүн варлығына һаким кәсилән мәһәббәт өзүнү онун тәлимләриндә, инсанларла рәфтарында вә тәлим үсулларында бүрузә верирди.
4, 5. а) Мәһәббәтлә өјрәтмәк нәјә ҝөрә зәруридир? б) Нәјә ҝөрә тәлим вермәк ишиндә билик вә баҹарыг да тәләб олунур?
4 Бәс бизим барәмиздә нә демәк олар? Мәсиһин давамчылары олан бизләр хидмәтдә вә һәјатда ону тәглид етмәк истәјирик (1 Пет. 2:21). Мәгсәдимиз инсанлара садәҹә Мүгәддәс Китаб биликләрини чатдырмаг јох, һәмчинин Јеһованын кејфијјәтләрини, хүсусилә дә мәһәббәтини әкс етдирмәкдир. Билијимизин аз вә ја чох, өјрәтмәк баҹарығымызын зәиф, јахуд ҝүҹлү олмасындан асылы олмајараг, мәһәббәт тәблиғ етдијимиз инсанларын үрәјинә јол тапмагда бизә көмәк едәҹәк. Шаҝирд һазырламаг ишиндә әсил мүвәффәгијјәт газанмаг үчүн биз мәһәббәтлә өјрәдәрәк Исаны тәглид етмәлијик.
5 Сөзсүз ки, јахшы мүәллим олмаг үчүн биз өз «фәннимизи» јахшы билмәли вә мүәјјән мүәллимлик баҹарығына малик олмалыјыг. Иса шаҝирдләринә бунларын һәр икисинә дә јијәләнмәкдә көмәк етмишди. Бу ҝүн Јеһова тәшкилаты васитәсилә бизә дә буну етмәјә көмәк едир. (Јешаја 54:13; Лука 12:42 ајәләрини оху.) Амма инсанлары өјрәтмәјә бизи јалныз ағлымыз јох, һәмчинин үрәјимиз сөвг етмәлидир. Билик, баҹарыг вә мәһәббәтин вәһдәти даһа чох сәмәрә ҝәтирә биләр. Бәс онда тәлим верәркән биз мәһәббәти неҹә тәзаһүр етдирә биләрик? Иса вә онун шаҝирдләри буну неҹә едирдиләр? Ҝәлин бу суаллары нәзәрдән кечирәк.
Биз Јеһованы севмәлијик
6. Севдијимиз шәхс һаггында биз, адәтән, неҹә данышырыг?
6 Адәтән, севдијимиз шејләр һагда сөһбәт етмәкдән һәзз алырыг. Бизә әзиз олан бир шеј, хүсусилә дә севдијимиз шәхс һаггында данышанда үрәјимиз ҹуша ҝәлир вә алышыб-јаныр. Биз онун һаггында билдикләримизи башгалары илә фәрәһлә бөлүшүр, ону тәрифләјир вә мүдафиә едирик. Биз истәјирик ки, һәмин шәхс вә онун кејфијјәтләри бизи ҹәлб етдији кими, башгаларыны да ҹәлб етсин.
7. Аллаһа олан мәһәббәти Исаны һансы ишләрә тәшвиг едирди?
7 Башгаларынын Јеһованы севмәсини истәјириксә, әввәлҹә өзүмүз Ону танымалы вә севмәлијик. Ахы һәгиги ибадәтин тәмәлини Аллаһа олан мәһәббәт тәшкил едир (Мат. 22:36-38). Иса бизә мүкәммәл нүмунә гојуб. О, Јеһованы бүтүн үрәји, бүтүн ҹаны, бүтүн дүшүнҹәси вә гүввәти илә севирди. Еһтимал ки, Атасы илә ҝөјләрдә милјардларла илләр јашајан Иса Ону јахындан танымышды. Буна ҝөрә дә о: «Мән Атаны севирәм», — демишди (Јәһ. 14:31). Бу мәһәббәт Исанын дедији вә етдији һәр шејдә өзүнү бүрузә верир вә ону һәмишә Аллаһы разы салан ишләри ҝөрмәјә тәшвиг едирди (Јәһ. 8:29). Еләҹә дә ону өзләрини Аллаһын тәмсилчиси адландыран икиүзлү дин рәһбәрләрини ифша етмәјә тәшвиг едирди. Вә нәһајәт, белә мәһәббәт Исаны, башгалары да Јеһованы танысын вә Ону севсин дејә, Онун һаггында данышмаға сөвг едирди.
8. Аллаһа олан мәһәббәтләри Исанын шаҝирдләрини нәјә тәшвиг едирди?
8 Иса кими, онун биринҹи әсрдәки шаҝирдләри дә Јеһованы севдикләриндән хош хәбәри ҹәсарәтлә вә сәјлә тәблиғ едирдиләр. Онлар әлиндә сәлаһијјәти олан дин рәһбәрләринин мүгавимәтләринә рәғмән тәлимләрини бүтүн Јерусәлимдә јајдылар. Шаҝирдләр ҝөрдүкләри вә ешитдикләри шејләр һагда данышмаја билмәздиләр (Һәв. иш. 4:20; 5:28). Онлар Јеһованын онларла олдуғуна вә онлары хејир-дуаландыраҹағына әмин идиләр. Јеһова онларын үмидини боша чыхармады! Исанын өлүмүндән 30 ил кечмәмишди ки, һәвари Павел хош хәбәрин ‘ҝөј алтында олан һәр мәхлуга тәблиғ едилдијини’ јазды (Колос. 1:23).
9. Аллаһа мәһәббәтимизи неҹә мөһкәмләндирә биләрик?
9 Баҹарыглы мүәллим олмаг үчүн биз дә даим Аллаһа олан мәһәббәтимизи мөһкәмләндирмәлијик. Биз буну неҹә едә биләрик? Дуада Аллаһла тез-тез сөһбәт етмәклә, Онун Кәламыны арашдырмагла, Мүгәддәс Китаба әсасланан нәшрләри охумагла вә мәсиһчи ҝөрүшләриндә иштирак етмәклә. Аллаһ һаггында биликләримиз артдыгҹа үрәјимиздә Она олан мәһәббәтимиз дә артаҹаг. Нәтиҹәдә, бу мәһәббәт өзүнү сөзләримиздә вә әмәлләримиздә бүрузә верәҹәк. Ола билсин, буну ҝөрәрәк башгалары да Јеһоваја јахынлашмаг истәјәҹәк. (Мәзмур 104:33, 34 ајәләрини оху.)
Өјрәтдијимиз һәгигәтләри севмәлијик
10. Јахшы мүәллими нәдән танымаг олар?
10 Јахшы мүәллим тәдрис етдији шејләри севмәси илә фәргләнир. О әмин олмалыдыр ки, өјрәтдикләри һәгигәт, ејни заманда ваҹиб вә дәјәрлидир. Әҝәр о, өјрәтдикләринә гаршы лагејд дејилсә, бу, өзүнү бүрузә верәҹәк вә шаҝирдләринә ҝүҹлү тәсир бағышлајаҹаг. Диҝәр тәрәфдән, мүәллим өјрәтдикләрини гијмәтләндирмирсә, буну шаҝирдләриндән неҹә ҝөзләјә биләр? Һеч вахт Аллаһын Кәламынын мүәллими кими вердијин нүмунәнин әбәс олдуғуну дүшүнмә. Иса демишдир: «Тәкмилләшдикдән сонра, һәр шаҝирд өз мүәллими кими олаҹаг» (Лука 6:40).
11. Иса өјрәтдији һәгигәтләри нәјә ҝөрә севирди?
11 Иса вердији тәлимләри севирди. О билирди ки, онда башгалары илә бөлүшмәк үчүн гијмәтли бир шеј — сәмави Атасы һаггында һәгигәт, ‘Аллаһын кәламлары’ вә «әбәди һәјатын сөзләри» вар (Јәһ. 3:34; 6:68). Исанын өјрәтдији һәгигәтләр парлаг нур тәк писин вә јахшынын нә олдуғуну үзә чыхарырды. Бу һәгигәтләр јалан дин рәһбәрләри тәрәфиндән алдадылан вә Иблисин әлиндән әзијјәт чәкән тәвазөкар инсанлара үмид вә тәсәлли верирди (Һәв. иш. 10:38). Исанын һәгигәтә олан мәһәббәти јалныз тәлимләриндә дејил, онун бүтүн әмәлләриндә дә ҝөрүнүрдү.
12. Һәвари Павел хош хәбәрә неҹә јанашырды?
12 Иса кими, шаҝирдләри дә Јеһова вә Мәсиһ һаггындакы һәгигәтләри о гәдәр севир вә гијмәтләндирирдиләр ки, дүшмәнләри бу һәгигәтләри башгалары илә бөлүшмәкдән онлары чәкиндирә билмирдиләр. Павел Ромадакы һәмиманлыларына јазмышды: «Вар ҝүҹүмлә Мүждәни тәблиғ етмәјә һазырам. Чүнки мән Мүждәдән утанмырам. О, иман едән һәр кәсин, илк әввәл јәһудинин, сонра исә јунанын хиласы үчүн Аллаһын гүдрәтидир» (Ром. 1:15, 16). Павел хош хәбәри бәјан етмәји шәрәф һесаб едирди. О јазмышды: «Мәсиһин кәшфолунмаз зәнҝинлијини јәһуди олмајанлара мүждәләмәк... мәнә бәхш едилди» (Ефес. 3:8, 9). Башгаларына Јеһова вә Онун нијјәтләри һагда өјрәдәркән Павелин неҹә шөвглә данышдығыны тәсәввүр етмәк чәтин дејил.
13. Хош хәбәри севмәк үчүн һансы сәбәбләримиз вар?
13 Аллаһын Кәламындакы хош хәбәр бизә Јараданымызла таныш олмаға, һәм дә Онунла сых вә меһрибан мүнасибәт гурмаға көмәк едир. Бу хош хәбәр һәјати ваҹиб суаллара долғун ҹаваб вермәклә јанашы, һәјатымызы дәјишмәјә, үмид вермәјә вә чәтин анларда бизи мөһкәмләндирмәјә гадирдир. Бундан әлавә, бу хәбәр сонсуз вә мәналы һәјата јол ҝөстәрир. Хош хәбәрдән даһа ваҹиб вә дәјәрли билик вармы? Бизә етибар едилән вә үрәјимизи севинҹлә долдуран бу хәбәр чох гијмәтли бир әнамдыр. Бу хәбәри башгалары илә бөлүшәндә севинҹимиз бирә-беш артыр (Һәв. иш. 20:35).
14. Өјрәтдијимиз һәгигәтләрә олан мәһәббәтимизи неҹә мөһкәмләндирә биләрик?
14 Хош хәбәри даһа чох севмәк үчүн нә етмәк олар? Аллаһын Кәламыны охујаркән бир анлыға дајаныб, охудуғун һиссәнин үзәриндә дүшүн. Мисал үчүн, Исанын јерүзү хидмәти заманы ону мүшајиәт етдијини вә ја Павеллә миссионер сәјаһәтиндә олдуғуну тәсәввүр ет. Хәјалында јени дүнјада олдуғуну вә гаршында тамамилә фәргли бир һәјатын ачылдығыны ҹанландыр. Хош хәбәрә итаәт етмәјин сајәсиндә алдығын хејир-дуалар һагда фикирләш. Әҝәр хош хәбәрә олан мәһәббәтини горујуб сахласан, өјрәтдијин инсанлар буну һисс едәҹәкләр. Буна ҝөрә дә өјрәндикләримизин үзәриндә әтрафлы дүшүнмәли вә онлара диггәт јетирмәлијик. (1 Тимотејә 4:15, 16 ајәләрини оху.)
Биз инсанлары севмәлијик
15. Нәјә ҝөрә мүәллим шаҝирдләрини севмәлидир?
15 Јахшы мүәллим дәрсләрдә раһат мүһит јарадыр ки, шаҝирдләрин јени бир шеј өјрәнмәјә вә өз фикирләрини сәрбәст ифадә етмәјә һәвәсләри олсун. Севән мүәллим сәмими-гәлбдән шаҝирдләринин гајғысына галдығы үчүн онлара билик верир. О, тәдрис үсулларыны шаҝирдләринин тәләбатларына вә гаврама габилијјәтинә ујғунлашдырыр. О һәмчинин онларын баҹарығыны вә вәзијјәтини нәзәрә алыр. Мүәллимләри тәрәфиндән мәһәббәт ҝөрән шаҝирдләр дәрсләрини бөјүк мәмнунијјәтлә охујаҹаглар.
16. Иса инсанлара неҹә мәһәббәт ҝөстәрирди?
16 Исада мәһз белә мәһәббәти ҝөрмәк оларды. Онун мәһәббәтинин ән бөјүк тәзаһүрү башгаларынын хиласы наминә камил һәјатыны гурбан вермәк иди (Јәһ. 15:13). Иса јорулмадан инсанларын физики, хүсусилә дә руһани еһтијаҹларынын гајғысына галырды. Инсанларын онун јанына ҝәлмәсини ҝөзләмәк әвәзинә, пијада јүзләрлә километр гәт едәрәк хош хәбәри бәјан едирди (Мат. 4:23-25; Лука 8:1). О, сәбирли вә баша дүшән инсан иди. Шаҝирдләринә дүзәлиш вермәк лазым ҝәләндә буну мәһәббәтлә едирди (Марк 9:33-37). Иса онлары руһландырараг әмин едирди ки, онлар хош хәбәрин мәһарәтли тәблиғчиләри олаҹаг. Јер үзүндә Иса гәдәр севән вә гајғыкеш мүәллим олмајыб. Исанын мәһәббәти шаҝирдләрини ону севмәјә вә әмрләринә риајәт етмәјә тәшвиг едирди. (Јәһја 14:15 ајәсини оху.)
17. Исанын шаҝирдләри башгаларына неҹә мәһәббәт ҝөстәрирдиләр?
17 Исанын шаҝирдләри дә тәблиғ етдикләри инсанлара дәрин мәһәббәт ҝөстәрирдиләр. Онлар тәгибләрә таб ҝәтирәрәк вә һәјатларыны тәһлүкәјә атараг башгаларына хидмәт едир вә хош хәбәрин тәблиғиндә мүвәффәгијјәт газанырдылар. Онлар руһани ҹәһәтдән көмәк етдији инсанлары неҹә дә севирдиләр! Һәвари Павелин јаздығы нөвбәти сөзләр үрәкләримизи риггәтә ҝәтирир: «Биз, ушагларыны бағрына басыб әмиздирән ана кими, сизинлә мүлајим даврандыг. Бу јолла үрәкдән сизин һәсрәтинизи чәкән бизләр, сизә јалныз Аллаһын Мүждәсини дејил, өз ҹанларымызы да вермәк истәдик. Чүнки сиз бизим үчүн чох әзиз олдунуз» (1 Салон. 2:7, 8).
18, 19. а) Нәјә ҝөрә биз тәблиғ ишиндә фәдакарлыг ҝөстәрмәјә һазырыг? б) Ҝөстәрдијимиз мәһәббәтин башгаларынын диггәтиндән јајынмадығыны ҝөстәрән бир нүмунә чәкин.
18 Ејнилә, бу ҝүн дә Јеһованын Шаһидләри бүтүн дүнјада әсаслы сурәтдә тәблиғ едәрәк Аллаһы танымағы вә Она хидмәт етмәји арзулајан инсанлары ахтарырлар. Сон 17 ил әрзиндә биз тәблиғ вә шаҝирд һазырламаг ишинә һәр ил бир милјарддан чох саат сәрф етмишик; бу иши һал-һазырда да давам етдиририк. Тәблиғ иши чохлу вахт, вәсаит вә гүввә тәләб етсә дә, биз ону ҹанла-башла јеринә јетиририк. Иса кими, биз дә дәрк едирик ки, севән сәмави Атамыз инсанларын әбәди һәјата апаран биликләрә јијәләнмәсини истәјир (Јәһ. 17:3; 1 Тим. 2:3, 4). Мәһәббәт бизи тәшвиг едир ки, сәмими инсанларын Јеһованы бизим кими севмәсинә вә танымасына көмәк едәк.
19 Ҝөстәрдијимиз мәһәббәт башгаларынын нәзәриндән јајынмыр. Мәсәлән, Бирләшмиш Штатларда хидмәт едән бир пионер баҹы әзизләрини итирән инсанлара тәскинлик вермәк үчүн онлара мәктуб јазыр. Бир киши ҹавабында она јазды: «Дүзүнү десәм, мәктубунузу аланда әввәлҹә тәәҹҹүбләндим. Чүнки киминсә тамамилә танымадығы адамын дәрдинә шәрик олмасы вә она көмәк етмәк үчүн мәктуб јазмасы, һәгигәтән дә, һејрәтамиздир. Јалныз ону дејә биләрәм ки, сиз инсанлары вә онлары һәјат јолуна јөнәлдән Аллаһы севирсиниз».
20. Мәһәббәтлә өјрәтмәк нәјә ҝөрә ваҹибдир?
20 Бир нәфәрин сөзләринә әсасән, инсан өз ишини севәндә вә онун устасы оланда, еһтимал ки, шаһ әсәр әрсәјә ҝәләҹәк. Биз Мүгәддәс Китабы өјрәтдијимиз инсанлара Јеһова һаггында билик вә Она мәһәббәт ашыламаға чалышырыг. Бәли, мәһарәтли мүәллим олмаг үчүн биздә Аллаһа, һәгигәтә вә инсанлара гаршы мәһәббәт олмалыдыр. Бу мәһәббәти гәлбимиздә јетишдирмәјин вә хидмәтдә тәзаһүр етдирмәјин сајәсиндә вермәкдән севинҹ дујмагла јанашы, һәм дә Исаны тәглид етдијимизи вә Јеһованы разы салдығымызы билмәкдән мәмнунлуг дујуруг.
Неҹә ҹаваб верәрдиниз?
• Башгаларына хош хәбәри өјрәдәркән нәјә ҝөрә...
Аллаһы севмәлијик?
өјрәтдијимиз һәгигәтләри севмәлијик?
өјрәтдијимиз инсанлары севмәлијик?
[15-ҹи сәһифәдәки шәкил]
Исанын тәлим үсуллары дин алимләринин вә фәрисејләрин үсулларындан нә илә фәргләнирди?
[18-ҹи сәһифәдәки шәкил]
Јахшы мүәллим олмаг үчүн билик, баҹарыг, ән ваҹиби исә мәһәббәт лазымдыр