Мәсиһин мәһәббәти бизи севмәјә тәшвиг едир
«Иса дүнјада Өзүнә аид оланлары севмиш олараг, онлары сона гәдәр севди» (ЈӘҺ. 13:1).
1, 2. а) Исанын мәһәббәтинин ән һејрәтамиз ҹәһәти нә иди? б) Бу мәгаләдә мәһәббәтин һансы јөнләри мүзакирә олунаҹаг?
ИСА мүкәммәл мәһәббәт нүмунәсидир. Онун мәһәббәти һәр шејдә — давранышында, данышығында, тәлимләриндә вә һәјатыны гурбан вермәсиндә өзүнү бүрузә вермишди. О, сон нәфәсинәдәк ону әһатә едән һәр кәсә, хүсусилә дә шаҝирдләринә мәһәббәт ҝөстәрирди.
2 Исанын һејрәтамиз мәһәббәт нүмунәси онун давамчыларынын изләмәли олдуғу ән ҝөзәл нүмунәдир. Бу һәмчинин бизи руһани баҹы-гардашларымыза, о ҹүмләдән диҝәр инсанлара гаршы ејни мәһәббәти бәсләмәјә тәшвиг едир. Бу мәгаләдә биз ағсаггалларын сәһвләрә, һәтта ҹидди сәһвләрә јол верәнләрә гаршы мәһәббәт ҝөстәрмәләринә даир Исадан неҹә нүмунә ҝөтүрә биләҹәкләриндән сөһбәт ачаҹағыг. Биз һәмчинин Исанын мәһәббәтинин чәтин анларда, фәлакәт вә хәстәлик заманы мәсиһчиләри һәмиманлыларына көмәк етмәјә неҹә тәшвиг етдијини мүзакирә едәҹәјик.
3. Петерин ҹидди сәһвә јол вермәсинә бахмајараг, Иса онунла неҹә давранды?
3 Исанын һәјатынын сон ҝеҹәсиндә һәвариси Петер үч дәфә ону инкар етди (Марк 14:66-72). Лакин Петер тутдуғу әмәлдән пешман оланда Иса, габагҹадан дедији кими, ҝүнаһындан кечди вә она ҹидди мәсулијјәтләр һәвалә етди (Лука 22:32; Һәв. иш. 2:14; 8:14-17; 10:44, 45). Исанын ҹидди сәһвләрә јол верән кәсләрә гаршы мүнасибәтиндән биз нә өјрәнә биләрик?
Сәһв иш ҝөрәнләрә гаршы Мәсиһин дүшүнҹә тәрзини әкс етдирин
4. Хүсусилә һансы вәзијјәтләрдә Мәсиһин дүшүнҹә тәрзини әкс етдирмәк тәләб олунур?
4 Мәсиһин дүшүнҹә тәрзини әкс етдирмәк лазым ҝәлән вәзијјәтләрдән бири дә аиләдә вә ја јығынҹагда киминсә ҹидди сәһвә јол вермәсидир. Бу, бизә дөзүлмәз үрәкағрысы верә биләр. Тәәссүфләр олсун ки, Шејтан дүнјасынын сону јахынлашдыгҹа әхлаг дәјәрләри дүнјанын руһунун тәсири алтында ҝет-ҝедә ашағы дүшүр. Аллаһын әхлаг нормаларына дүнјанын бармагарасы вә ја хор бахмасы, јашымыздан асылы олмајараг, һәр биримизин дүзҝүн оланы етмәк гәтијјәтини зәифләдә биләр. Биринҹи әсрдә бәзиләри мәсиһчи јығынҹағындан кәнар едилмиш, диҝәрләри исә төһмәт алмышдылар. Ејни шејләр бизим ҝүнләрдә дә баш верир (1 Кор. 5:11-13; 1 Тим. 5:20). Бу ҹүр мәсәләләри һәлл едән ағсаггаллар Мәсиһин мәһәббәтини тәзаһүр етдирирләр ки, бу да, өз нөвбәсиндә, ҝүнаһ ишләдәнә дәрин тәсир бағышлаја биләр.
5. Ағсаггаллар ҝүнаһ ишләдәнләрә гаршы мүнасибәтдә Мәсиһин дүшүнҹә тәрзини неҹә әкс етдирә биләрләр?
5 Иса кими, ағсаггаллар да һәр заман диггәт јетирмәлидирләр ки, Јеһованын салеһ нормаларына риајәт олунсун. Белә етмәклә онлар Јеһованын һәлимлијини, лүтфкарлығыны вә мәһәббәтини әкс етдирирләр. Кимсә сәмими-гәлбдән төвбә едәндә, јәни сәһвләринә ҝөрә ‘гәлбисыныг’ вә ‘руһән әзилмиш’ оланда ‘ону һәлимлик руһу илә ислаһ етмәк’ ағсаггаллар үчүн чәтин дејил (Мәз. 34:18; Галат. 6:1). Бәс ағсаггаллар сәһвини бојнуна алмајан, аз да олса вә ја һеч бир виҹдан әзабы чәкмәјәнләрлә неҹә рәфтар етмәлидирләр?
6. Ҝүнаһкарларла мүнасибәтдә ағсаггаллар нәдән гачынмалыдырлар вә нәјә ҝөрә?
6 Ҝүнаһкар Мүгәддәс Китаб мәсләһәтини рәдд едәндә, јахуд сәһвини бојнундан атмаға чалышанда бу, ағсаггалларын вә башгаларынын һиддәтинә сәбәб ола биләр. Һәмин шәхсин вурдуғу зәрәрдән хәбәрдар олан бу гардашлар һиссләрини ҹиловлаја билмәјиб онун һәрәкәтләри вә мөвгеји барәдә дүшүндүкләрини бирбаша үзүнә сөјләјә биләрләр. Анҹаг ајдындыр ки, гәзәб зәрәрдән башга һеч нә ҝәтирә билмәз вә белә давраныш ‘Мәсиһин ағлына’, јәни дүшүнҹә тәрзинә зиддир. (1 Кор. 2:16; Јагуб 1:19, 20 ајәләрини оху.) Дүздүр, Иса да бәзиләринә гәти хәбәрдарлыг едирди, лакин о, һеч вахт сөзләри илә киминсә гәлбини сындырмаз, ја да гылынҹ кими јараламазды (1 Пет. 2:23). Әксинә, о, сөзләри вә әмәлләри илә ҝөстәрирди ки, ҝүнаһкарлар төвбә етмәклә јенидән Јеһованын лүтфүнү газана биләрләр. Бир сөзлә, Исанын јер үзүнә ҝәлмәсинин әсас сәбәбләриндән бири дә «ҝүнаһкарлары хилас етмәк» иди (1 Тим. 1:15).
7, 8. Интизам тәдбирләри ҝөрәркән ағсаггаллар нәји әлдә рәһбәр тутмалыдырлар?
7 Исанын бу саһәдә гојдуғу нүмунә јығынҹагда ҹәза тәдбири алмалы олан инсанлара гаршы мүнасибәтимизә неҹә тәсир ҝөстәрмәлидир? Јадда сахлајын ки, Мүгәддәс Китаба әсасән ҝөрүлән интизам тәдбири сүрүнү мүдафиә етмәклә јанашы, ҝүнаһкары төвбә етмәјә дә тәшвиг едә биләр (2 Кор. 2:6-8). Тәәссүф ки, бәзиләри төвбә етмир вә онлары јығынҹагдан кәнар етмәк лазым ҝәлир. Анҹаг севиндириҹи һалдыр ки, сонрадан онларын бир чоху Јеһоваја вә јығынҹаға јенидән гајыдыр. Ағсаггалларын Мәсиһин дүшүнҹә тәрзини тәзаһүр етдирмәләри сајәсиндә ҝүнаһ ишләдән адама үрәјиндә дәјишиклик етмәк вә сүрүјә дөнмәк даһа асан олаҹаг. Ҝәләҹәкдә ҝүнаһ ишләдәнләрдән бәзиләри ағсаггалларын Мүгәддәс Китаба әсасланан мәсләһәтләрини унутсалар белә, онларын һөрмәтҹил рәфтарыны вә ҝөстәрдикләри мәһәббәти мүтләг јадда сахлајаҹаглар.
8 Буна ҝөрә дә ағсаггаллар ‘руһун сәмәрәсини’, әсасән дә Мәсиһин мәһәббәтини һәтта чәтин вәзијјәтләрдә белә тәзаһүр етдирмәлидирләр (Галат. 5:22, 23). Онлар һеч вахт ҝүнаһ ишләдәни јығынҹагдан кәнар етмәјә тәләсмәмәлидирләр. Ағсаггаллар һәмин адама ҝөстәрмәлидирләр ки, онун Јеһоваја дөнмәсини истәјирләр. Беләликлә, ҝүнаһ ишләдән кәс, бир чохларынын етдији кими, сонрадан тутдуғу әмәлдән пешман оланда һәм Јеһоваја, һәм дә онун јығынҹаға гајытмасыны асанлашдыран ‘инсанлар тимсалында һәдијјәләрә’ (ЈД), јәгин ки, үрәкдән миннәтдар олаҹаг (Ефес. 4:8, 11, 12).
Ахыр ҝүнләрдә Мәсиһин мәһәббәтини тәзаһүр етдирин
9. Исанын шаҝирдләринә әмәлдә ҝөстәрдији мәһәббәтә даир нүмунә ҝәтирин.
9 Лука өз Мүждәсиндә Исанын әмәлдә ҝөстәрдији мәһәббәтин ҝөзәл нүмунәсини гәләмә алыб. Иса билирди ки, вахт ҝәләҹәк, Рома әсҝәрләри мәһкум олунмуш Јерусәлим шәһәрини мүһасирәјә алаҹаг вә һеч кимин гачмасына имкан вермәјәҹәкләр. Буна ҝөрә дә о, шаҝирдләрини мәһәббәтлә хәбәрдар етди: «Гошунларын Јерусәлими мүһасирә етдијини ҝөрдүјүнүз заман билин ки, онун виранәлијинин вахты јахынлашмышдыр». Бәс бу заман онлар нә едә биләрдиләр? Буна даир Иса ајдын вә конкрет ҝөстәриш верди: «О заман Јәһудејада оланлар дағлара гачсынлар; шәһәрдә оланлар орадан чыхсынлар вә әтрафда оланлар ораја ҝирмәсинләр. Чүнки бунлар, бүтүн јазыланларын јеринә јетәҹәји гисас ҝүнләридир» (Лука 21:20-22). Рома әсҝәрләри ерамызын 66-ҹы илиндә Јерусәлими мүһасирәјә алдыгдан вә ҝөзләнилмәдән ҝери чәкилдикдән дәрһал сонра итаәткар инсанлар бу ҝөстәришә ујғун даврандылар.
10, 11. Еркән мәсиһчиләрин Јерусәлимдән гачмасыны нәзәрдән кечирмәк ‘бөјүк мәшәггәтә’ һазырлашмағымыза неҹә көмәк едә биләр?
10 Јерусәлимдән гачан заман мәсиһчиләр бир-бирләринә мәсиһчи мәһәббәти, һәтта Мәсиһин онлара ҝөстәрдији мәһәббәти ҝөстәрмәли идиләр. Әлбәттә, онлар әлләриндә олан һәр шеји бир-бирләри илә бөлүшмәли идиләр. Лакин Исанын пејғәмбәрлијинин иҹрасы јалныз бу гәдим шәһәрин мәһв едилмәси илә битмир. Чүнки о демишди: «О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр» (Мат. 24:17, 18, 21). Ола билсин, гаршыда ҝөзләнилән ‘бөјүк мәшәггәтдән’ өнҹә вә һәмин заман бизим дә чәтинликләримиз вә корлуг чәкәҹәјимиз шејләр олаҹаг. Мәсиһин дүшүнҹә тәрзи онларын һамысына таб ҝәтирмәкдә бизә көмәк едәҹәк.
11 О заман бизә тәмәннасыз мәһәббәт ҝөстәрәрәк Исанын нүмунәсини изләмәк лазым ҝәләҹәк. Бу сәбәбдән, Павел мәсләһәт ҝөрүрдү: «Һәр биримиз јахшылыг наминә өз гоншумузун гајғысына галмалыјыг ки, о руһән инкишаф етсин. Она ҝөрә ки, Мәсиһ дә Өз гајғысына галмамышды... Гој тәһәммүл вә тәсәлли верән Аллаһ, Мәсиһ Исаја әсасән сизә, өз аранызда һәмфикир олмағы еһсан етсин» (Ром. 15:2, 3, 5).
12. Һал-һазырда бизә һансы мәһәббәти инкишаф етдирмәк лазымдыр вә нә үчүн?
12 Исадан мәһәббәт ҝөрән Петер мәсиһчиләри дә ‘гардашлара ријасыз мәһәббәт’ инкишаф етдирмәјә вә ‘һәгигәтә итаәт етмәјә’ тәшвиг едирди. Онлар ‘бир-бирини вар гүввә илә сәмими гәлбдән севмәли’ идиләр (1 Пет. 1:22). Бу ҝүн мәсиһчи кејфијјәтләрини инкишаф етдирмәк һәмишәкиндән даһа зәруридир, она ҝөрә ки, Аллаһын бүтүн хидмәтчиләринә ҝөстәрилән тәзјигләр ҝет-ҝедә артыр. Бу јахынларда дүнјанын малијјә системиндә баш верән бөһрандан ајдын ҝөрүндүјү кими, һеч биримиз бу көһнә дүнјанын истәнилән һиссәсинә бел бағламамалыјыг. (1 Јәһја 2:15-17 ајәләрини оху.) Әксинә, бу дүнја сонуна доғру ирәлиләдикҹә биз јығынҹагда әсил достлуг мүнасибәтләри гурараг Јеһоваја вә бир-биримизә даһа сых бағланмалыјыг. Павел мәсләһәт едирди: «Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын» (Ром. 12:10). Һәмин фикри бир даһа вурғулајараг Петер дејир: «Һәр шејдән әввәл бир-биринизә ҹошғун мәһәббәтиниз олсун, чүнки мәһәббәт бир чох ҝүнаһын үстүнү өртәр» (1 Пет. 4:8).
13-15. Бәзи гардашлар фәлакәтдән сонра мәсиһчи мәһәббәтини неҹә тәзаһүр етдирмишләр?
13 Бүтүн дүнјада Јеһованын Шаһидләри мәсиһчи мәһәббәтини әмәлдә ҝөстәрмәклә танынырлар. Ҝәлин 2005-ҹи илдә Бирләшмиш Штатларын ҹәнубунун ҝениш әразисини дармадағын едән туфан вә гасырғадан сонра көмәк үчүн чағырыша һај верән Шаһидләрин нүмунәсинә бахаг. Исанын мәһәббәт нүмунәсини тәглид едәрәк 20 000-дән артыг көнүллү раһат евләрини вә даими ишләрини атараг зәрәр чәкмиш гардашларынын көмәјинә ҝетдиләр.
14 Бир әразидә һүндүрлүјү 10 метрә чатан далға 80 километрә јахын әразини суја гәрг етмишди. Су ҝери чәкиләндә евләрин вә биналарын үчдә бири тамамилә јерлә јексан олмушду. Һәмин әразијә мүхтәлиф өлкәләрдән көмәк етмәк чағырышына һај верән Шаһидләр ахышмышдылар. Онлардан бәзиләринин лазыми баҹарығы, башгаларынын исә аләтләри вә тикинти материаллары вар иди. Бу баҹы-гардашлар истәнилән һәр бир иши ҝөрмәјә һазыр идиләр. Дул галмыш ики доғма баҹы бүтүн әшјаларыны кичик јүк машынына топлајыб 3 000 километр јол гәт етди. Баҹылардан бири һәмин әразидә галыб һәлә дә јерли јардым комитәсинә көмәк едир вә даими пионер кими хидмәт едир.
15 Һәмин әразидә Шаһидләрин вә диҝәр инсанларын 5 600-дән чох евләри бәрпа олунмуш вә ја јенидән тикилмишдир. Бәс јерли Шаһидләрә мәһәббәтин белә бөјүк тәзаһүрү неҹә тәсир бағышлады? Еви учуб-дағылмыш бир баҹы дамы сызан вә газ плитәси хараб олан кичик фургона көчмәли олмушду. Гардашлар она худмани, амма раһат бир ев тикдиләр. О, тәзә евини ҝөрәндә үрәји Јеһоваја вә гардашлара миннәтдарлыгла долду вә о, севиндијиндән ҝөз јашларыны сахлаја билмәјиб ағлады. Анҹаг бир чох јерли Шаһидләр евләри бәрпа едилдикдән сонра да бир ил вә ја ондан бир аз артыг вахт әрзиндә мүвәггәти јашајыш јерләриндә јашамалы олдулар ки, јардым ҝөстәрән гардашларын јашамаға јерләри олсун. Бу, Мәсиһин дүшүнҹә тәрзини неҹә дә ҝөзәл әкс етдирир!
Хәстәләрә Мәсиһин јанашдығы кими јанашын
16, 17. Хәстәликдән әзијјәт чәкән баҹы-гардашларымыза Мәсиһ кими јанашдығымызы неҹә ҝөстәрә биләрик?
16 Бизләрдән чох аз адам иримигјаслы тәбии фәлакәтләрдән әзијјәт чәкиб. Амма демәк олар ки, һәр биримиз — истәр өзүмүз, истәрсә дә гоһумларымыз сәһһәтлә бағлы проблемләрлә үзләширик. Исанын хәстәләрә гаршы мүнасибәти бизим үчүн ҝөзәл нүмунәдир. Мәһәббәт Исаны онлара гаршы шәфгәтли олмаға тәшвиг едирди. Инсанлар өз хәстәләрини онун јанына ҝәтирәндә о, онларын ‘һамысыны сағалдырды’ (Мат. 8:16; 14:14).
17 Бу ҝүн мәсиһчиләрә мөҹүзәли шәкилдә шәфа вермәк габилијјәти верилмәсә дә, онлар хәстәләрә Иса кими ҹаныјананлыгла јанашырлар. Бу, өзүнү нәдә бүрузә верир? Мәсәлән, ағсаггаллар Матта 25:39, 40 (ајәләри оху) ајәләриндә әкс олунан принсипә мүвафиг олараг јығынҹагдакы хәстә баҹы-гардашлара јардым тәшкил етмәклә вә онларын һәјата кечирилмәсинә нәзарәт етмәклә Мәсиһин дүшүнҹә тәрзинә малик олдугларыны ҝөстәрирләрa.
18. Ики баҹымыз хәстәликдән әзијјәт чәкән һәмиманлымыза неҹә көмәк етдиләр вә бунун нәтиҹәси нә олду?
18 Дүздүр, башгаларына көмәк етмәк үчүн ағсаггал олмаг лазым дејил. Хәрчәнҝ хәстәлијинә тутулан 44 јашлы Шарленин нүмунәсинә нәзәр салаг. Һәкимләр баҹынын узағы он ҝүн јашајаҹағыны демишдиләр. Баҹынын еһтијаҹларыны вә онун гајғысына галан әринин чәкдији әзијјәтләри ҝөрән руһани баҹыларымыз Шерон вә Николетта һәјатынын сон ҝүнләриндә Шарленин јанында олуб она бахмаг үчүн өз көмәкләрини тәклиф етдиләр. Шарлен он ҝүн јох, алты һәфтә јашады, анҹаг баҹылар сон нәфәсинәдәк мәһәббәтлә онун гајғысына галдылар. «Киминсә сағалмајаҹағыны билмәк инсана чох ағыр ҝәлир. — дејә Шерон гејд едир. — Лакин Јеһова бизә ҝүҹ верди. Бу вахт әрзиндә биз Аллаһа вә бир-биримизә јахын олдуг». Шарленин әри дејир: «Бу ики әзиз баҹынын ҝөстәрдији хејирхаһлығы вә көмәји өмрүм боју унутмајаҹағам. Онларын сәмимилији вә мүсбәт әһвал-руһијјәси әзиз јолдашым Шарленин сон ҝүнләрини јүнҝүлләшдирди вә мәнә сон дәрәҹә еһтијаҹ дујдуғум физики вә емосионал ҝүҹү верди. Мән һәмишә онлара миннәтдар олаҹағам. Бу баҹыларын фәдакарлығы Јеһоваја олан иманымы вә үмумдүнја гардашлығына мәһәббәтими мөһкәмләндирди».
19, 20. а) Мәсиһин дүшүнҹә тәрзинин һансы беш саһәсини нәзәрдән кечирдик? б) Биз нә етмәк әзминдәјик?
19 Бу силсилә мәгаләләрдә биз Исанын дүшүнҹә тәрзинин беш саһәсини нәзәрдән кечирдик вә онун кими неҹә дүшүнә вә даврана биләҹәјимизи өјрәндик. Ҝәлин Иса кими ‘һәлим вә гәлбдән тәвазөкар’ олаг (Мат. 11:29). Башгалары илә һәмишә, хүсусилә дә онларын гејри-камиллији вә зәифликләри өзүнү бүрузә верәндә мүлајим давранмаға чалышаг. Ҝәлин һәтта сынаглар гаршысында белә Јеһованын бүтүн тәләбләринә ҹәсарәтлә риајәт едәк.
20 Нәһајәт, ҝәлин Мәсиһ кими, бүтүн гардашларымызы «сона гәдәр» севәк. Белә мәһәббәт Мәсиһин әсил давамчылары олдуғумузу ҝөстәрир (Јәһ. 13:1, 34, 35). Бәли, ‘гој арамызда һәмишә гардаш мәһәббәти олсун’ (Ибр. 13:1). Һеч вахт буну етмәкдән чәкинмәјәк! Ҝәлин һәјатымызы Јеһованы иззәтләндирмәјә вә башгаларына көмәк етмәјә һәср едәк! Биз әмин ола биләрик ки, Јеһова бүтүн сәмими ҹәһдләримизә мүтләг хејир-дуа верәҹәк.
[Һашијә]
a «Ҝөзәтчи Гүлләси»нин 1987-ҹы ил 15 март сајындакы (рус.) «Садәҹә “исинин вә дојун” демәјин» адлы мәгаләјә бахын.
Изаһ едә биләрсинизми?
• Ағсаггаллар ҝүнаһ ишләдәнләрлә мүнасибәтдә Мәсиһин дүшүнҹә тәрзини неҹә тәзаһүр етдирә биләрләр?
• Нәјә ҝөрә сон ҝүнләрдә Мәсиһин мәһәббәтини тәзаһүр етмәк хүсусилә ваҹибдир?
• Хәстәләрә мүнасибәтдә Мәсиһин дүшүнҹә тәрзини неҹә тәзаһүр етдирә биләрик?
[17-ҹи сәһифәдәки шәкил]
Ағсаггаллар ҝүнаһ ишләдәнләрин Јеһоваја дөнмәләрини истәјирләр
[18-ҹи сәһифәдәки шәкил]
Јерусәлими тәрк едән мәсиһчиләр Мәсиһин дүшүнҹә тәрзини неҹә тәзаһүр етдирмишдиләр?
[19-ҹу сәһифәдәки шәкил]
Јеһованын Шаһидләри мәсиһчи мәһәббәтини әмәлдә ҝөстәрмәклә танынырлар