Мәһәббәт олмајан дүнјада достлуғу горујун
«Бир-биринизи севәсиниз дејә бу шејләри сизә әмр едирәм» (ЈӘҺ. 15:17).
1. Нәјә ҝөрә биринҹи әсрдә јашајан мәсиһчиләр араларындакы јахын достлуғу горумалы идиләр?
ЈЕРҮЗҮ һәјатынын сонунҹу ҝеҹәсиндә Иса садиг шаҝирдләрини араларындакы достлуғу горумаға сәсләди. Бир гәдәр әввәл исә о, шаҝирдләринә демишди ки, араларындакы мәһәббәт сајәсиндә онун давамчысы олдуглары ајдын ҝөрүнәҹәк (Јәһ. 13:35). Ҝәләҹәкдә онлары ҝөзләјән сынаглара таб ҝәтирмәк вә Исанын тезликлә онлара верәҹәји тапшырығы јеринә јетирмәк үчүн һәвариләр јахын достлугларыны горумалы идиләр. Биринҹи әсрдә јашајан мәсиһчиләр Аллаһа вә бир-бирләринә олан сарсылмаз мәһәббәтләри илә танынырдылар.
2. а) Биз нәјә гәти гәрарлыјыг вә нәјә ҝөрә? б) Һансы суаллары нәзәрдән кечирәҹәјик?
2 Бу ҝүн еркән мәсиһчиләрин гојдуғу нүмунә илә ҝедән үмумдүнја тәшкилатынын үзвү олмаг неҹә дә хошдур! Биз Исанын бир-биримизә сәмими мәһәббәт ҝөстәрмәк әмринә риајәт етмәјә гәти гәрарлыјыг. Лакин сон ҝүнләрдә инсанларын әксәријјәти хаин вә шәфгәтсиздир (2 Тим. 3:1-3). Адәтән, белә инсанларын достлуғу сәтһи олур вә онлар јалныз өз мәнфәәтләрини ҝүдүрләр. Бундан сонра да һәгиги мәсиһчи олдуғумузу ҝөстәрмәк үчүн бу ҹүр дүшүнҹә тәрзинә ујмамалыјыг. Буна ҝөрә дә ҝәлин нөвбәти суалларын үзәриндә дүшүнәк: јахшы достлуг нәјә әсасланыр? Биз јахшы достлары неҹә тапа биләрик? Һансы һалларда достлуға сон гојмалыјыг? Әсил достлуғу горумаг неҹә мүмкүндүр?
Јахшы достлуг нәјә әсасланыр?
3, 4. Мөһкәм достлуғун әсасыны нә тәшкил едир вә нәјә ҝөрә?
3 Мөһкәм достлуг Јеһоваја мәһәббәтин әсасында гурулур. Сүлејман падшаһ јазмышдыр: «Әҝәр бир нәфәр тәк галыб мәғлуб оларса, ики нәфәр һүҹума таб ҝәтирә биләр. Үчгат ип тез гырылмаз» (Ваиз 4:12). Әҝәр достлуғумузда үчүнҹү ип Јеһовадырса, белә достлуг давамлы олаҹаг.
4 Дүздүр, Јеһованы севмәјән инсанларын арасында да јахшы достлуг ола биләр. Лакин әҝәр инсанларын достлуғунун әсасыны Аллаһа мәһәббәт тәшкил едәрсә, онларын достлуғу сарсылмаз олаҹаг. Анлашылмазлыглар јарананда әсил достлар бир-бири илә Јеһоваја мәгбул тәрздә давранаҹаглар. Аллаһын дүшмәнләри Онун халгы арасында нифаг салмаға чалышанда һәгиги мәсиһчиләрин арасындакы достлуғун сарсылмаз олдуғуну ҝөрүрләр. Тарих бојунҹа Јеһованын хидмәтчиләри бир-бирләрини әлә вермәмәк үчүн өлүмә белә ҝетмәјә һазыр олмушлар. (1 Јәһја 3:16 ајәсини оху.)
5. Рутла Наоминин достлуғу нәјә ҝөрә мөһкәм иди?
5 Әлбәттә, бизә ән бөјүк мәмнунлуғу Јеһованы севәнләрлә достлуг етмәјимиз ҝәтирә биләр. Ҝәлин Рут вә Наоминин нүмунәсинә нәзәр салаг. Онларын достлуғу Мүгәддәс Китабда гејдә алынан ән ҝөзәл достлуг нүмунәләриндән биридир. Нәјин сајәсиндә онларын достлуғу белә мөһкәм вә давамлы иди? Ҝөрүн, Рут Наомијә нә дејир: «Халгын халгым олаҹаг, Аллаһын Аллаһым. [...] Әҝәр өлүмдән башга бир шеј мәни сәндән ајырарса, гој Рәбб мәнә беләсини вә бундан бетәрини етсин» (Рут 1:16, 17). Ҝөрүнүр, Рут вә Наоми Аллаһа дәрин мәһәббәт бәсләјир вә јол верирдиләр ки, бу мәһәббәт онларын мүнасибәтләриндә өз әксини тапсын. Нәтиҹәдә, һәр ики гадын Јеһованын хејир-дуасыны алды.
Јахшы достлары неҹә тапа биләрик?
6-8. а) Мөһкәм достлуг үчүн нә тәләб олунур? б) Киминләсә дост олмаг үчүн тәшәббүсү өз әлинә неҹә ҝөтүрә биләрсән?
6 Рутла Наоминин нүмунәси ҝөстәрир ки, јахшы достлуг тәсадүфән јаранмыр. Достлуғун әсасыны һәр ики тәрәфин Јеһоваја олан мәһәббәти тәшкил едир. Лакин мөһкәм достлуг бөјүк сәј вә фәдакарлыг тәләб едир. Аиләликҹә Јеһоваја хидмәт едән ушаглара белә достлуг мүнасибәти гурмаг үчүн сәј ҝөстәрмәк лазымдыр. Белә исә, јахшы достлуг гурмаг үчүн нә ҝәрәкдир?
7 Тәшәббүс ҝөстәрин. Һәвари Павел Рома јығынҹағындакы достларыны тәшвиг едирди ки, онлар ‘гонагпәрвәр олмаға ҹан атсынлар’ (Ром. 12:13). Демәли, јахшы достлар газанмаг үчүн һәр имкандан истифадә едәрәк гонагпәрвәрлик ҝөстәрмәк лазымдыр. Һеч ким бизим јеримизә гонагпәрвәрлик ҝөстәрән дејил. (Сүлејманын мәсәлләри 3:27 ајәсини оху.) Гонагпәрвәрлик ҝөстәрмәк үчүн јығынҹагдан башга-башга баҹы-гардашлары евимизә гонаг дәвәт етмәк олар. Мүнтәзәм олараг јығынҹағымызын үзвләрини евимизә гонаг дәвәт етмәји гаршымыза мәгсәд гоја биләрикми?
8 Тәшәббүс ҝөстәрмәјин даһа бир үсулу ајры-ајры баҹы-гардашларла тәблиғә јазылмагдыр. Гапы ағзында дајаныб әмәкдашынын Јеһоваја олан мәһәббәти һаггында шөвглә данышдығыны ешидәндә, тәбии ки, өзүнү она даһа јахын һисс едәҹәксән.
9, 10. Павел һансы нүмунәни гојуб вә биз ону неҹә тәглид едә биләрик?
9 Үрәјинизи мәһәббәт үчүн ачын. (2 Коринфлиләрә 6:12, 13 ајәләрини оху.) Јығынҹагда достлуг едә биләҹәк бир нәфәрин белә олмадығыны дүшүндүјүн һаллар олубму? Бәлкә, сәнин достлуға даир тәләбләрин чох јүксәкдир? Һәвари Павел үрәкләримизи мәһәббәт үчүн ачмаға даир ҝөзәл нүмунә гојуб. Вахт вар иди, о, гејри-јәһудиләрлә јахын дост олаҹағыны ағлына белә ҝәтирмәзди. Бунунла белә, о, ‘гејри-јәһудиләрә һәвари олараг ҝөндәрилди’ (Ром. 11:13).
10 Үстәлик, Павел тәкҹә өзү јашда оланларла достлуг етмирди. Мисал үчүн, араларындакы бөјүк јаш фәргинә вә мүхтәлиф мәншәли олмаларына бахмајараг, Тимотејлә о, јахын дост олмушду. Бу ҝүн бир чох ҝәнҹләр јығынҹагларындакы јашлы нәслин нүмајәндәләри илә достлугларыны чох гијмәтләндирирләр. 20 јашларында олан Ванесса дејир: «Мәним јашы 50-дән чох олан бир рәфигәм вар. Јашыдым олан рәфигәләримә дејә билдијим һәр шеји она да дејә билирәм. Вә о да мәнә чох гајғы ҝөстәрир». Онлар неҹә дост олмушлар? Ванесса давам едир: «Мән бу достлуг наминә бөјүк гүввә сәрф етмишәм». Бәс сән өзүндән бөјүкләрлә дост олмаг истәјирсәнми? Јеһова сәнин сәјини мүтләг хејир-дуаландыраҹаг.
11. Јонатанла Давудун нүмунәсиндән нә өјрәнә биләрик?
11 Садиг олун. «Дост һәр заман севәр, гардаш дар ҝүн үчүн доғулур» (Сүл. мәс. 17:17). Сүлејман бу сөзләри јазанда, јәгин, атасы Давудла Јонатан арасындакы достлуғу нәзәрдә тутурду (1 Шам. 18:1). Шаул падшаһ оғлу Јонатанын Исраил тахтыны мирас алмасыны истәјирди. Анҹаг Јонатан Јеһованын бу шәрәфә Давуду лајиг ҝөрдүјүнү етираф едирди. Шаулдан фәргли олараг, Јонатан Давуда пахыллыг етмирди. Башгалары Давуду тәрифләјәндә о нә инҹијир, нә дә Шаулун Давуда атдығы бөһтанлара инанырды. (1 Шам. 20:24-34). Биз дә Јонатан кими давранырыгмы? Достларымыз јығынҹагда тәјинатлар аланда биз онлар үчүн севинирикми? Дара дүшәндә онлара тәсәлли вериб, дајаг дуруругму? Кимсә достумузун архасынҹа пис данышанда дәрһал инанырыгмы? Јохса, Јонатан кими, достумузу мүдафиә едирик?
Достлуға нә заман сон гојмаг лазымдыр?
12-14. Мүгәддәс Китабы өјрәнәнләрдән бәзиләри һансы чәтинликлә үзләшир вә биз онлара неҹә көмәк едә биләрик?
12 Мүгәддәс Китабы өјрәнән адам һәјат тәрзини дәјишмәјә башлајанда о, достлугла бағлы чәтинликләр јашаја биләр. Ола билсин, онун Мүгәддәс Китабын әхлаг нормаларына мүвафиг јашамајан чох севдији достлары вар. Еһтимал ки, о, әввәлләр онларла тез-тез вахт кечирир вә үнсијјәт едирди. Инди исә о, достларынын мәшғулијјәтләринин она пис тәсир едә биләҹәјини ҝөрүр вә һисс едир ки, онларла үнсијјәти мәһдудлашдырмалыдыр (1 Кор. 15:33). Бунунла белә, онларла әлагәни кәссә, онлара хәјанәт етмиш олаҹағыны дүшүнүр.
13 Әҝәр сәнин дә белә бир чәтинлијин варса, унутма ки, сәнин јахшылыға доғру дәјишмәјә чалышдығыны ҝөрән әсил достларын чох севинәҹәк, һәтта, ола билсин, сәнинлә бирликдә онлар да Јеһова һаггында өјрәнмәк истәјәҹәкләр. Диҝәр тәрәфдән исә, сахта достларын онларла бирҝә ‘ејни позғунлуг селинә атылмадығын’ үчүн сәни ‘сөјәҹәкләр’ (1 Пет. 4:3, 4). Әслиндә исә, сән онлара јох, онлар сәнә хәјанәт едирләр.
14 Мүгәддәс Китабы өјрәнән инсанын Аллаһы севмәјән достлары ону тәрк едәндә јығынҹағын үзвләри бу бошлуғу долдура биләр (Галат. 6:10). Јығынҹаға ҝәлән мараглананларла шәхсән танышсанмы? Сән онларла үнсијјәт едирсәнми?
15, 16. а) Әҝәр достумуз Јеһоваја хидмәтә сон гојурса, биз буна неҹә реаксија вермәлијик? б) Аллаһы севдијимизи неҹә сүбут едә биләрик?
15 Бәс әҝәр Јеһовадан үз дөндәрдији үчүн достуну јығынҹагдан кәнар етмәк лазым ҝәләрсә, онда неҹә? Бу, бизә үрәкағрысы верә биләр. Бир баҹы Јеһоваја хидмәт етмәјә сон гојан јахын рәфигәсини хатырлајараг дејир: «Бу хәбәри ешидәндә, санки, дахилимдә нә исә өлдү. Мәнә елә ҝәлирди ки, о, һәгигәтдә мөһкәмдир, әслиндә, бу, белә дејилмиш. Сән демә, о, Јеһоваја аиләсинин хатиринә хидмәт едирмиш. Мән өз мотивләримә јенидән нәзәр салмаға башладым: мән Јеһоваја дүзҝүн нијјәтләми хидмәт едирәм?» Баҹы бу вәзијјәтин өһдәсиндән неҹә ҝәлди? О дејир: «Мән өз јүкүмү Јеһованын үзәринә гојдум. Јеһованы тәшкилатында мәнә дост тапмаға көмәк етдији үчүн јох, неҹә Аллаһ олдуғуна ҝөрә Ону севдијими ҝөстәрмәк гәрарына ҝәлдим».
16 Әҝәр биз дүнја илә дост олмағы сечмишиксә, чәтин ки, Аллаһла достлуғумуз узун чәксин. Шаҝирд Јагуб јазмышдыр: «Мәҝәр билмирсиниз ки, дүнја илә достлуг Аллаһа гаршы дүшмәнчиликдир? Демәли, ким дүнјаја дост олмаг истәјирсә, өзүнү Аллаһын дүшмәни едир» (Јаг. 4:4). Аллаһа олан мәһәббәтимизи Онун дост иткисинә таб ҝәтирмәкдә бизә көмәк едәҹәјинә етибар етмәклә ҝөстәрә биләрик. Бу јалныз Она садиг галдығымыз тәгдирдә мүмкүндүр. (Мәзмур 18:25 ајәсини оху.) Јухарыда һаггында данышылан баҹы сөзләринә белә јекун вурур: «Мән баша дүшдүм ки, һеч кими Јеһованы вә ја бизи севмәјә мәҹбур едә билмәрик. Чүнки бу, һәр кәсин шәхси сечимидир». Бәс Аллаһа садиг галан инсанларла достлуғумузу неҹә горујуб сахлаја биләрик?
Јахшы достлуғу неҹә горумаг олар?
17. Јахшы достлар бир-бирилә неҹә данышыр?
17 Достлуғу јахшы үнсијјәт јашадыр. Рут вә Наоми, Давуд вә Јонатан, Павел вә Тимотеј барәдә охујанда ҝөрүрүк ки, јахшы достлар бир-бирилә сәрбәст, лакин һөрмәтҹил тәрздә данышыр. Башгалары илә неҹә үнсијјәт етмәли олдуғумуза даир Павел јазыр: «Гој сөзүнүз һәмишә нәвазишли олсун». Бурада Павел хүсусилә «хариҹдәкиләрлә», јәни мәсиһчи олмајанларла неҹә данышмалы олдуғумузу гејд едир (Колос. 4:5, 6). Әҝәр иманымыза шәрик олмајанларла һөрмәтҹил тәрздә данышмалыјыгса, онда јығынҹагдакы достларымызла белә данышмалы олдуғумуз нә гәдәр јәгиндир!
18, 19. Мәсиһчи достумуздан алдығымыз һәр бир мәсләһәтә неҹә мүнасибәт ҝөстәрмәлијик вә Ефес јығынҹағынын ағсаггаллары бизим үчүн һансы нүмунәни гојмушлар?
18 Јахшы достлар бир-биринин фикрини гијмәтләндирир, буна ҝөрә дә онларын үнсијјәти сәмими вә хош олур. Мүдрик падшаһ Сүлејман јазмышдыр: «Ҝөзәл әтир вә бухурун үрәјә вердији ләззәт кими достун нәсиһәти дә инсана хош ҝәләр» (Сүл. мәс. 27:9). Достунун вердији һәр бир мәсләһәти сән дә бу ҹүр гәбул едирсәнми? (Мәзмур 141:5 ајәсини оху.) Достун сәнин һансыса һәрәкәтинә ҝөрә нараһатчылығыны билдирәндә сән неҹә реаксија ҝөстәрирсән? Сән буну онун хејирхаһлығынын тәзаһүрү кими гәбул едирсән, јохса дәрһал инҹијирсән?
19 Һәвари Павел Ефес јығынҹағынын ағсаггаллары илә јахын дост иди. Ҝөрүнүр, Павел онлардан бәзиләрини имана тәзә ҝәлдикләри вахтдан таныјырды. Амма сонунҹу дәфә онларла ҝөрүшәндә бир нечә ачыг-ајдын мәсләһәт верди. Онлар буна неҹә мүнасибәт ҝөстәрдиләр? Бу, онун достларынын хәтринә дәјмәди. Әксинә, буну чох гијмәтләндирдиләр вә бир даһа ону ҝөрмәјәҹәкләрини ешидәндә һәтта ағладылар (Һәв. иш. 20:17, 29, 30, 36-38).
20. Әсил дост неҹә давранаҹаг?
20 Јахшы дост мүдрик мәсләһәти гәбул етмәклә јанашы, мәсләһәт вермәји дә баҹарыр. Әлбәттә, биз еһтијатлы олмалыјыг ки, башгаларынын ишинә гарышмајаг (1 Салон. 4:11). Биз һәмчинин баша дүшмәлијик ки, «һәр биримиз өзү үчүн Аллаһа һесабат верәҹәкдир» (Ром. 14:12). Лакин јери ҝәләндә, әсил дост Јеһованын нормаларыны хејирхаһлыгла јолдашына хатырладаҹаг (1 Кор. 7:39). Мәсәлән, субај достунун мәсиһчи олмајан инсанла јахын мүнасибәт гурдуғуну биләндә нә едәҹәксән? Достунун хәтринә дәјмәкдән горхараг өз нараһатчылығыны ҝизләдәҹәксән? Бәс бирдән достун мәсләһәтини рәдд етсә, онда неҹә? Әсил дост гајғыкеш чобанлара мүраҹиәт едәҹәк ки, онлар онун сәһв аддым атан достуна көмәк етсинләр. Бу ҹүр аддым ҹәсарәт тәләб едир. Лакин Јеһоваја мәһәббәтә әсасланан достлуға зәрәр дәјсә дә, бу, узун сүрмәјәҹәк.
21. Бәзән һансы сәһвә јол верә биләрик, лакин јығынҹагда мөһкәм достлуг телләрини горумаг нәјә ҝөрә ваҹибдир?
21 Колослулара 3:13, 14 ајәләрини оху. Бәзән достларымызын биздән ‘шикајәт’ етмәсинә сәбәбкар өзүмүз олуруг. Онлар да сөз вә ја һәрәкәтләри илә бизим хәтримизә дәјә биләрләр. «Һамымыз чох сәһв едирик»,— дејә Јагуб јазыр (Јаг. 3:2). Лакин достлуғун ҝүҹлү олмасы бир-биримизә гаршы нә гәдәр ҝүнаһ ишләтмәјимиздән јох, нә дәрәҹәдә там бағышламағымыздан асылыдыр. Бир-биримизлә сәмими үнсијјәт етмәклә вә үрәкдән бағышламагла достлуғумузу мөһкәмләндирмәк неҹә дә ваҹибдир! Бу ҹүр мәһәббәтин тәзаһүрү «камил бирлијин бағы» олаҹаг.
Неҹә ҹаваб верәрдиниз?
• Јахшы достлары неҹә тапа биләрик?
• Достлуға нә заман сон гојмаг лазымдыр?
• Мөһкәм достлуғу горумаг үчүн нә етмәлијик?
[18-ҹи сәһифәдәки шәкил]
Рут вә Наоминин мөһкәм достлуғу нәјә әсасланмышды?
[19-ҹу сәһифәдәки шәкил]
Даим гонагпәрвәрлик ҝөстәрирсәнми?