Мөһкәм тәмәл үзәриндә көк салмысанмы?
НӘ ВАХТСА ҝүҹлү туфанын о тәрәф-бу тәрәфә әјдији бөјүк ағаҹы ҝөрмүсәнми? Ҝүҹлү тәсирә мәруз галмасына бахмајараг, ағаҹ давам ҝәтирир. Нәјә ҝөрә? Чүнки онун торпағын дәринликләринә узанан ҝүҹлү көк системи вар. Биз дә бу ағаҹ кими ола биләрик. Әҝәр мөһкәм тәмәл үзәриндә көк салмышыгса, биз дә һәјатымызда туфанабәнзәр сынаглара таб ҝәтирә биләҹәјик (Ефес. 3:14-18). Сөһбәт һансы тәмәлдән ҝедир?
Аллаһын Кәламында дејилир ки, мәсиһчи јығынҹағынын тәмәлинин «ҝушә дашы... Иса Мәсиһ Өзүдүр» (Ефес. 2:20; 1 Кор. 3:11). Биз мәсиһчиләр ‘Онун јолунда јеримәјә, Онда көк салыб, инкишаф етмәјә вә иманда мөһкәмләнмәјә’ тәшвиг олунуруг. Белә етмәклә биз, «бош һијлә»јә әсасланан ‘игнаедиҹи сөзләр’ дә дахил олмагла, иманымызы сынаға чәкән бүтүн чәтинликләрә таб ҝәтирә биләҹәјик (Колос. 2:4-8).
«Ҝениш, узун, уҹа вә дәрин»
Бәс биз неҹә ‘көк сала’ вә ‘иманда мөһкәмләнә’ биләрик? Дәрин көк салмағын ваҹиб үсулларындан бири Аллаһын илһамланмыш Кәламыны диггәтлә вә сәјлә өјрәнмәкдир. Јеһова истәјир ки, биз «бүтүн мүгәддәсләрлә бирликдә» һәгигәтин ‘ҝенишлијини, узунлуғуну, уҹалығыны вә дәринлијини баша дүшәк’ (Ефес. 3:18). Буна ҝөрә дә һеч бир мәсиһчи Аллаһын Кәламында олан «ибтидаи» шејләрлә, јәни садәҹә сәтһи биликлә кифајәтләнмәмәлидир (Ибр. 5:12; 6:1). Әксинә, Мүгәддәс Китаб һәгигәтләринин дәринликләрини баша дүшмәк үчүн һәр биримиздә ҝүҹлү истәк олмалыдыр (Сүл. мәс. 2:1-5).
Әлбәттә, һәгигәтдә ‘көк салмаг’ үчүн тәкҹә чохлу билијә јијәләнмәк кифајәт дејил. Бунун үчүн даһа чох шеј тәләб олунур. Ахы Шејтан да Мүгәддәс Китабда нә јазылдығыны јахшы билир. Биз Мәсиһин ‘һәр дәрракәдән үстүн олан мәһәббәтини дәрк етмәлијик’ (Ефес. 3:19). Анҹаг әҝәр биз Јеһованы вә һәгигәти севдијимиз үчүн Мүгәддәс Китабы өјрәнириксә, Онун Кәламындан алдығымыз дәгиг биликләр иманымызы мөһкәмләндирәҹәк (Колос. 2:2).
Неҹә баша дүшүрсән?
Нәјә ҝөрә инди Мүгәддәс Китабын бәзи ваҹиб һәгигәтләрини неҹә баша дүшдүјүнү јохламајасан? Бу, сәни Мүгәддәс Китабы даһа чалышганлыгла өјрәнмәјә тәшвиг едәҹәк. Мисал үчүн, һәвари Павелин ефеслиләрә јаздығы мәктубун ҝириш ајәләрини оху. («Ефеслиләрә» адлы чәрчивәјә бах.) Бу ајәләри охудугдан сонра өзүндән соруш: «Чәрчивәдә ҝәтирилән Мүгәддәс Китабын бу парчасында курсивлә ҝөстәрилән ифадәләрин мәнасыны баша дүшүрәмми?» Ҝәлин онлары бир-бир нәзәрдән кечирәк.
‘Дүнја јаранмаздан габаг тәјин едилибләр’
Павел һәмиманлыларына јазырды: «[Аллаһ] бизи габагҹадан Өзү үчүн Иса Мәсиһ васитәсилә оғуллуға тәјин етди». Бәли, Јеһова гәрар верди ки, бәзи инсанлары өвладлыға ҝөтүрәрәк камил сәмави аиләсинә гәбул етсин. Аллаһын өвладлыға ҝөтүрдүјү бу оғуллары падшаһ вә каһин кими Мәсиһлә бирликдә идарә едәҹәкләр (Ром. 8:19-23; Вәһј 5:9, 10). Шејтан илк дәфә Јеһованын һөкмранлығына мејдан охујанда Онун јаратдығы инсанларда нөгсан олдуғуну иддиа етди. Буна ҝөрә дә, Јеһованын бәшәријјәти писликдән вә онун мәнбәји олан Шејтан Иблисдән тамамилә азад етмәк үчүн бәшәр аиләсинин үзвләриндән инсанлар сечмәси неҹә дә мүнасибдир! Лакин Јеһова кимләрин Онун оғуллары олаҹағыны габагҹадан мүәјјән етмәмишди. Әксинә, О гәрара алмышды ки, Мәсиһлә бирликдә ҝөјләрдә һөкмранлыг едәҹәк инсанлардан ибарәт бир груп вә ја синиф тәшкил етсин (Вәһј 14:3, 4).
Павел мәсиһчиләрә «дүнја јаранмаздан габаг» онларын бир груп кими сечилдијини дејәндә һансы «дүнја»ны нәзәрдә тутурду? О, Аллаһын јери вә ја бәшәријјәти јаратмаздан өнҹәки вахты нәзәрдә тутмурду. Әҝәр белә олсајды, әдаләтин әсас принсипләри позуларды. Јеһова Адәмлә Һәвванын ҝүнаһ ишләдәҹәјини онларын јаранмасындан өнҹә мүәјјән етмиш олсајды, онлар өз һәрәкәтләринә ҝөрә мәсулијјәт дашыја биләрдиләр? Бәс Адәмлә Һәвва Шејтана гошулараг Аллаһын һөкмранлығына гаршы үсјан галдырдыгдан сонра јаранан вәзијјәти неҹә дүзәлдәҹәјинә Аллаһ нә заман гәрар верди? Јеһова буну јалныз илк валидејнләримизин үсјанындан сонра, ҝүнаһларынын јујулмасы мүмкүн олан гејри-камил бәшәријјәтин исә јаранмасындан өнҹә етди.
«Бол-бол ҝөстәрдији Өз лүтфүнүн зәнҝинлијинә ҝөрә»
Нәјә ҝөрә Павел гејд едир ки, «Ефеслиләрә мәктуб»ун ҝириш ајәләриндә һаггында бәһс олунан тәдбирләр Аллаһын ‘бол-бол ҝөстәрдији лүтфүнүн зәнҝинлији’ сајәсиндә мүмкүндүр? О, бунунла Јеһованын ҝүнаһлы бәшәријјәти сатын алмаға борҹлу олмадығыны ҝөстәрди.
Анаданҝәлмә бизләрдән һеч ким хиласа лајиг ола билмәз. Лакин бәшәријјәтә дәрин мәһәббәтиндән ирәли ҝәләрәк Јеһова бизи хилас етмәк үчүн хүсуси тәдбирләр ҝөрүб. Гејри-камиллијимизи вә ҝүнаһлы олмағымызы нәзәрә алсаг, Павелин дедији кими, бизим хиласымыз һәгигәтән дә Јеһованын лүтфү сајәсиндә мүмкүндүр.
Аллаһын нијјәтинин мүгәддәс сирри
Башланғыҹда Аллаһ Шејтанын вурдуғу зәрәри неҹә арадан галдыраҹағыны ачыгламамышды. Бу, мүгәддәс «сирр» иди (Ефес. 3:4, 5). Сонралар, мәсиһчи јығынҹағы тәшкил олунанда Јеһова инсанлара вә јер үзүнә даир илкин нијјәтини неҹә һәјата кечирәҹәјини тәфсилаты илә ачыглады. Павелин дедији кими, «вахт тамам олдугда» Аллаһ ‘ишләрин идарәсинә’ (ЈД) башлајаҹагды, јәни бүтүн шүурлу варлыглары бирләшдирмәк үчүн һәрәкәтә кечәҹәкди.
Бу бирләшмәнин биринҹи мәрһәләси ерамызын 33-ҹү илинин Пентикост ҝүнү башланды. Һәмин ҝүн Јеһова ҝөјләрдә Мәсиһлә бирҝә идарә едәҹәк шәхсләри јығмаға башламышды (Һәв. иш. 1:13-15; 2:1-4). Икинҹи мәрһәлә исә јер үзүндә Аллаһын Падшаһлығынын һакимијјәти алтында јашајаҹаг кәсләрин топланмасы илә башланаҹагды (Вәһј 7:14-17; 21:1-5). ‘Ишләрин идарәси’ ифадәси алтында Аллаһын Падшаһлығы нәзәрдә тутулмур, чүнки бу Падшаһлыг 1914-ҹү илдә гурулуб. Әслиндә, бу ифадә каинатда бирлији бәргәрар етмәк үчүн Аллаһын ҝөрдүјү ишләри билдирир.
«Әглән... камил олун»
Шүбһәсиз, Мүгәддәс Китабы өјрәнмәк үчүн јахшы графикимизин олмасы сајәсиндә һәгигәтин ‘ҝенишлијини, узунлуғуну, уҹалығыны вә дәринлијини’ там анлаја биләҹәјик. Лакин јүксәктемпли һәјат тәрзи Шејтан үчүн әлверишли шәраит јарадыр ки, инсанын бу кими вәрдишләрини зәифләтсин, һәтта мәһв етсин. Бунун сәнинлә дә баш вермәсинә јол вермә. ‘Әглән камил олмаг үчүн’ Аллаһ тәрәфиндән сәнә верилән ‘ағылдан’ истифадә ет (1 Кор. 14:20; 1 Јәһ. 5:20). Нәјә вә нә үчүн инандығына шәхсән өзүн әмин ол ки, ‘малик олдуғун үмид барәсиндә ҹаваб вермәк үчүн’ һәмишә һазыр оласан (1 Пет. 3:15).
Тәсәввүр ет ки, Павелин «Ефеслиләрә мәктуб»у илк дәфә охунанда сән дә орада идин. Мәҝәр онун сөзләри сәни ‘Аллаһын Оғлу һаггындакы дәгиг билијини’ (ЈД) артырмаға тәшвиг етмәздими? (Ефес. 4:13, 14). Әлбәттә, едәрди! Онда гој Павелин илһамланмыш сөзләри сәни бу ҝүн дә һәрәкәтә тәшвиг етсин. Јеһоваја дәрин мәһәббәт вә Онун Кәламындан алдығын дәгиг билик Мәсиһин ‘мөһкәм тәмәли үзәриндә көк салыб мәтин дурмағына’ көмәк едәҹәк. Онда сән бу пис систем там мәһвә уғрамаздан өнҹә, Шејтанын истәнилән сынагларына таб ҝәтирә биләҹәксән (Мәз. 1:1-3; Јер. 17:7, 8).
[27-ҹи сәһифәдәки чәрчивә/шәкил]
«Ефеслиләрә»
«Бизи Мәсиһдә һәр ҹүр руһани немәтлә сәмави аләмдә мүбарәк етмиш Рәббимиз Иса Мәсиһин Аллаһы вә Атасына һәмд олсун! Чүнки О, дүнја јаранмаздан габаг бизи Мәсиһдә сечди ки, биз Онун гаршысында мәһәббәтдә мүгәддәс вә ләкәсиз олаг. Өз ирадәсинин илтифатына ҝөрә, севимли Оғлунда бизә еһсан етдији Өз иззәтли лүтфүнүн мәдһи үчүн, бизи габагҹадан Өзү үчүн Иса Мәсиһ васитәсилә оғуллуға тәјин етди. Там һикмәтлә вә анлајышла бизә бол-бол ҝөстәрдији Өз лүтфүнүн зәнҝинлијинә ҝөрә, Мәсиһдә, Мәсиһин ганы васитәсилә хиласа, ҝүнаһларымызын әфвинә маликик. Аллаһ, Мәсиһдә нијјәт етдији Өз илтифатына ҝөрә, Өз ирадәсинин сиррини бизә билдирди» (Ефес. 1:3-9). «О, Өз нијјәтинә әсасән, тәјин едилмиш вахтын сонунда ишләрин идарәсини тәшкил етмәји, јәни ҝөјдә вә јердә оланлары јенидән Мәсиһдә бирләшдирмәји гәрарлашдырды» (Ефес. 1:10, ЈД).