‘Салеһләр ҝүнәш кими парлајаҹаглар’

«О заман салеһләр Аталарынын Сәлтәнәтиндә ҝүнәш кими парлајаҹаглар» (МАТ. 13:43).

1. Иса нүмунәләрдән истифадә едәрәк Падшаһлыг һагда һансы һәгигәтләри изаһ етмишди?

ИСА МӘСИҺ Падшаһлыгла бағлы мүхтәлиф һәгигәтләри изаһ етмәк үчүн нүмунәләрдән вә мәсәлләрдән истифадә едирди. О, һәр шеји «халга мәсәлләрлә сөјләјирди, вә онлара мәсәлсиз һеч бир шеј сөјләмәзди» (Мат. 13:34). Падшаһлыг һагда һәгигәт тохумунун сәпилмәсинә даир чәкдији нүмунәдә Иса вурғулады ки, инсанын хәбәри гәбул етмәси онун үрәјинин вәзијјәтиндән, руһани инкишафы исә Јеһовадан асылыдыр (Марк 4:3—9, 26—29). Иса һәмчинин Падшаһлыг ишинин илк бахышдан ајдын ҝөрүнмәсә дә, гејри-ади дәрәҹәдә ирәлиләјәҹәјини нүмунә әсасында ҝөстәрмишди. Бундан башга, о вурғуламышды ки, Падшаһлыг хәбәринә һај верәнләрин һамысы һәмин Падшаһлығын лајигли тәбәәләри олмајаҹаг (Мат. 13:47—50)a.

2. Исанын дәлиҹә вә буғда мәсәлиндә јахшы тохум нәји тәмсил едир?

² Лакин чәкдији мәсәлләрдән бириндә Иса диггәти Падшаһлыгда онунла бирликдә идарә едәҹәк шәхсләрин јығылмасына јөнәлтмишди. Чох вахт буна дәлиҹә вә буғда мәсәли дејилир. Һәмин мәсәл «Матта» китабынын 13-ҹү фәслиндә јазылмышдыр. Башга бир мәсәлдә Иса сәпилән тохумун ‘Сәлтәнәт барәдәки кәлам’ олдуғуну сөјләдији һалда, бу мәсәлдә јахшы тохумун башга бир шеји — ‘Сәмави Сәлтәнәтин оғулларыны’ тәмсил етдијини дејир (Мат. 13:19, 38). Онлар Падшаһлығын тәбәәләри дејилләр, әксинә, ‘оғуллар’, јәни Падшаһлығын варисләридирләр. (Ром. 8:14—17; Галатијалылара 4:6, 7 ајәләрини оху.)

Дәлиҹә вә буғда мәсәли

3. Мәсәлдәки адам һансы чәтинликлә үзләшир вә о, мәсәләни неҹә һәлл етмәји гәрара алыр?

³ Мәсәл бундан ибарәтдир: «Сәмави Сәлтәнәт тарласына јахшы тохум сәпмиш бир адама бәнзәјир; Адам [«адамлар», МК—09] јатаркән онун дүшмәни ҝәлиб буғдаларын арасына дәлиҹә буғда сәпиб ҝетди. Буғда бөјүјүб сәмәрә вердији заман дәлиҹәләр дә ҝөрүндү. Ев саһибинин гуллары ҝәлиб она дедиләр: “Аға, сән тарлана јахшы тохум сәпмәдинми? Белә исә, дәлиҹә буғда һарадан әмәлә ҝәлди?” О исә гуллара деди: “Буну дүшмән адам етмишдир”. Гуллар да она дедиләр: “Белә исә, истәјирсәнми ҝедиб онлары сечиб јығаг?” Амма о деди: “Хејр, бәлкә дәлиҹәләри сечәркән, онларла бәрабәр буғданы да гопарарсыныз. Бичинә гәдәр гојун һәр икиси бирликдә бөјүсүн; бичин вахты мән бичинчиләрә дејәҹәјәм: Әввәлҹә дәлиҹәләри топлајын вә јандырмаг үчүн онлардан дәрз бағлајын; буғданы исә амбарларыма топлајын”» (Мат. 13:24—30).

4. а) Мәсәлдәки адам кими тәмсил едир? б) Иса сәпин иши илә нә вахт вә неҹә мәшғул олмаға башлады?

⁴ Тарласына јахшы тохум сәпән адам кимдир? Иса бир гәдәр сонра мәсәли шаҝирдләринә изаһ едәркән бу суала белә ҹаваб верир: «Јахшы тохуму сәпән Инсан Оғлудур» (Мат. 13:37). «Инсан Оғлу» Иса Мәсиһ јер үзүндә үч ил јарым хидмәт едәндә тарласыны сәпин үчүн һазырлады (Мат. 8:20; 25:31; 26:64). Сонра б. е. 33-ҹү илинин Пентикост ҝүнүндән етибарән о, јахшы тохуму — ‘Сәмави Сәлтәнәтин оғулларыны’ сәпмәјә башлады. Јеһованын нүмајәндәси олан Иса, ҝөрүнүр, шаҝирдләринин үзәринә мүгәддәс руһ төкәндән, јәни онлары Аллаһын оғуллары кими мәсһ едәндән һәмин сәпин башландыb (Һәв. иш. 2:33). Јахшы тохум бөјүјүб буғда олду. Беләликлә, јахшы тохуму сәпмәјин мәгсәди варисләрин вә Падшаһлыгда Иса илә идарә едәҹәк кәсләрин һамысыны топламаг иди.

5. Исанын бәһс етдији дүшмән вә дәлиҹә кимләрдир?

⁵ Дүшмән вә дәлиҹә кимләри тәмсил едир? Исанын сөзләринә әсасән, дүшмән «иблисдир». Дәлиҹәләр исә «шејтанын оғулларыдыр» (Мат. 13:25, 38, 39). Исанын бәһс етдији дәлиҹәләр әслиндә зәһәрли олур вә буғданын инкишафынын еркән мәрһәләсиндә буғдаја чох охшајыр. Бу, өзүнү Падшаһлығын оғуллары адландырыб, әслиндә исә һәгиги бәһрәләр ҝәтирмәјән сахта мәсиһчиләри неҹә дә ҝөзәл тәсвир едир! Өзләрини Мәсиһин давамчысы адландыран бу ријакар мәсиһчиләр әслиндә Шејтан Иблисин ‘баласыдырлар’ (Јар. 3:15).

6. Дәлиҹәләр нә заман пејда олмаға башлады вә һансы мәнада о заман адамлар јатырдылар?

⁶ Дәлиҹәјә бәнзәјән мәсиһчиләр нә вахт пејда олдулар? Исанын сөзләринә әсасән, «адамлар јатанда» (Мат. 13:25, МК—09). Бу, нә заман олуб? Суалын ҹавабыны һәвари Павелин Ефес ағсаггалларына дедији сөзләрдән тапырыг: «Билирәм ки, мән ҝетдикдән сонра, сүрүјә рәһми ҝәлмәјән азғын гурдлар араныза ҝирәҹәкдир. Вә шаҝирдләри ардларынҹа чәкмәк үчүн јанлыш сөзләр данышан адамлар өз араныздан чыхаҹаглар» (Һәв. иш. 20:29, 30). О, бундан сонра да һәмин ағсаггаллара руһани ҹәһәтдән ојаг галмағы төвсијә едирди. Дөнүклүјә ‘мане олан’ һәвариләр өлүм јухусуна ҝетмәјә башлајандан сонра бир чох мәсиһчиләр руһани ҹәһәтдән јухуја ҝетдиләр. (2 Салоникилиләрә 2:3, 6—8 ајәләрини оху.) Бөјүк дөнүклүк мәһз елә бу заман башлады.

7. Буғдалардан бәзиләри дәлиҹәјә чеврилдими? Изаһ един.

⁷ Иса буғданын дәлиҹәјә чевриләҹәјини јох, дәлиҹәләрин буғдаларын арасына сәпиләҹәјини демишди. Беләликлә, бу мәсәлдә һәгигәтдән дөнән әсил мәсиһчиләр тәсвир олунмур, әксинә, Шејтанын пис инсанлары мәсиһчи јығынҹағына ҝәтирәрәк ону гәсдән позмаға чалышмасы вурғуланыр. Ахырынҹы һәвари олан Јәһјанын аһыл јаша чатдығы вахтларда дөнүклүк артыг ајдын нәзәрә чарпырды (2 Пет. 2:1—3; 1 Јәһ. 2:18).

«Бичинә гәдәр гојун һәр икиси бирликдә бөјүсүн»

8, 9. а) Нәјә ҝөрә Ағанын өз гулларына вердији тапшырыг Исаны динләјәнләр үчүн мәнтиги сәсләнирди? б) Буғда вә дәлиҹәнин бирликдә бөјүмәси неҹә баш верди?

⁸ Ағанын гуллары ону мәсәләдән һалы етдикдән сонра сорушдулар: «Истәјирсәнми ҝедиб онлары [дәлиҹәләри] сечиб јығаг?» (Мат. 13:27, 28). Ағанын ҹавабы гәрибә ҝөрүнә биләр. О деди ки, гој бичинә гәдәр буғда илә дәлиҹә бир јердә бөјүсүн. Исанын давамчылары үчүн бу әмр мәнтиги сәсләнирди. Чүнки буғданы дәлиҹәдән ајырмағын нә дәрәҹәдә чәтин олдуғуна онлар јахшы бәләд идиләр. Әкинчиликлә мәшғул оланлар билирдиләр ки, адәтән дәлиҹәнин көкү буғданын көкүнә долашырc. Буна ҝөрә дә, Ағанын ҝөзләмәји тапшырмасы тәәҹҹүблү дејилди!

⁹ Буна бәнзәр тәрздә, әсрләр бојунҹа Христиан дүнјасынын мүхтәлиф тәригәтләри әввәлҹә Рома Католик вә Православ килсәси, сонра исә сајсыз-һесабсыз протестант груплары арасындан мисли ҝөрүнмәмиш сајда дәлиҹә јетишдирмишдир. Бунунла јанашы, дүнјада бир гәдәр һәгиги буғда тохумлары да сәпилмишди. Мәсәлдәки ев саһиби нисбәтән гыса олан бичин вахты чатана кими узун мүддәт сәбир едиб онларын бөјүмәсини ҝөзләди.

Чохдан ҝөзләнилән бичин вахты

10, 11. а) Бичин нә заман башланды? б) Символик буғда Јеһованын анбарына неҹә ҝәтирилир?

¹⁰ Иса демишди: «Бичин дөврүн сонудур; вә бичинчиләр мәләкләрдир» (Мат. 13:39). Дәлиҹә илә буғданын бир-бириндән сечилмәси, јәни Падшаһлығын оғулларынын топланыб дәлиҹәјә бәнзәјәнләрдән ајрылмасы бу пис системин сон ҝүнләриндә баш верир. Бунунла бағлы һәвари Петер демишди: «Мәһкәмәнин Аллаһын ев әһлиндән башланмасынын вахтыдыр. Јох, әҝәр әввәлҹә биздән башларса, Аллаһын Мүждәсинә итаәтсизлик едәнләрин ахыры неҹә олар?» (1 Пет. 4:17).

¹¹ Ахыр ҝүнләрин, башга сөзлә, ‘дөврүн сонунун’ башланмасындан аз сонра һәгиги мәсиһчи олдуғуну иддиа едәнләр, истәр һәгигәтән Сәлтәнәтин оғуллары, истәрсә дә «шејтанын оғуллары» оланлар үчүн мәһкәмә башлады. Бичин башлајанда «әввәлҹә» Бөјүк Бабил сүгута уғрады, сонра исә Падшаһлығын оғуллары бир јерә топланды (Мат. 13:30). Бәс символик буғда Јеһованын анбарына неҹә ҝәтирилир? Онлар Аллаһын лүтфүнү тапдыглары вә Онун һимајәсинә сығындыглары бәрпа олунмуш мәсиһчи јығынҹағына ҝәтирилирләр, ја да сәмави мүкафатларыны алырлар.

12. Бичин нә гәдәр давам едәҹәк?

¹² Мәһкәмә нә гәдәр давам едәҹәк? Иса бичин ‘вахтындан’ данышырды. Бичин вахты исә адәтән мүәјјән мүддәт давам едир (Вәһј 14:15, 16). Мәсһ олунмушларын ајры-ајры үзвләринин мәһкәмәси дөврүн сону әрзиндә ҝедир вә бу мәһкәмә онларын сонунҹу дәфә мөһүрләнмәсинә кими давам едәҹәк (Вәһј 7:1—4).

13. Дәлиҹәләр неҹә пис јола чәкир вә ганунсузлуг едирләр?

¹³ Падшаһлыгдан кимләр ‘топланыр’ вә онлар неҹә пис јола чәкир вә ганунсузлуг едирләр? (Мат. 13:41). Дәлиҹәјә бәнзәјән Христиан дүнјасынын руһаниләри әсрләр әрзиндә милјонларла инсаны алдатмышдыр. Онлар буну ‘пис јола чәкән шејләрлә’, јәни Аллаһы рүсвај едән тәлимләри, мәсәлән, әбәди ҹәһәннәм әзабы, чашдырыҹы вә сирли Үч үгнум еһкамлары илә етмишләр. Бир чох дин хадимләри бу дүнја илә достлуг едәрәк, бәзи һалларда исә ҝөрүнмәмиш әхлагсызлыға јол верәрәк өз давамчылары үчүн пис нүмунә гојмушлар (Јаг. 4:4). Үстәлик, Христиан дүнјасы өз үзвләринин етдији әхлагсызлыға ҝетдикҹә даһа чох ҝөз јумур. (Јәһуда 4 ајәсини оху.) Бүтүн бунлара бахмајараг, онлар өзләрини заһирән диндар вә мөмин ҝөстәрмәјә давам едирләр. Падшаһлығын оғуллары неҹә дә хошбәхтдирләр ки, сечиләрәк дәлиҹәјә бәнзәјән бу дин хадимләринин тәсириндән вә пис јола чәкән јанлыш тәлимләрдән узаглашыблар!

14. Дәлиҹәјә бәнзәјәнләр һансы мәнада ағлајыб дишләрини гыҹајырлар?

¹⁴ Дәлиҹәјә бәнзәјәнләр һансы мәнада ағлајыб дишләрини гыҹајырлар? (Мат. 13:42). ‘Сәлтәнәтин оғуллары’ Шејтанын дәлиҹәјә бәнзәјән оғулларынын руһани ҹәһәтдән зәһәрли тәлимләрини ифша едир. Бу исә онлара әзаб верир. Онлар һәмчинин килсә үзвләриндән алдыглары көмәјин азалмасына, еләҹә дә онлары артыг нәзарәт алтында сахлаја билмәдикләринә ағлајырлар. (Јешаја 65:13, 14 ајәләрини оху.)

15. Дәлиҹәләрин аловла јандырылмасы һансы мәнаны дашыјыр?

¹⁵ Дәлиҹәләрин топланыб аловла јандырылмасы һансы мәнаны дашыјыр? (Мат. 13:40). Бу, дәлиҹәләрин сон агибәтинә аиддир. Онларын мәҹази мәнада одлу собаја атылмасы әбәдилик мәһв олаҹагларына ишарә едир (Вәһј 20:14; 21:8). Сахта, фырылдагчы, дәлиҹәјә бәнзәјән мәсиһчиләрин ‘бөјүк мәшәггәтдә’ көкү кәсиләҹәк (Мат. 24:21).

Онлар «ҝүнәш кими парлајаҹаглар»

16, 17. Малаки пејғәмбәр Аллаһын мәбәди илә бағлы нә пејғәмбәрлик етмишди вә бу, неҹә һәјата кечмәјә башлады?

¹⁶ Бәс буғдаја бәнзәјәнләр нә заман «ҝүнәш кими парлајаҹаглар»? (Мат. 13:43). Аллаһын мәбәдинин тәмизләнмәси илә бағлы Малаки пејғәмбәрлик етмишди: «“Ахтардығыныз Худавәнд гәфләтән Өз мәбәдинә ҝәләҹәк. Ҝөрмәк арзусунда олдуғунуз әһд елчиси ҝәләҹәк” дејир Ордулар Рәбби. “Анҹаг онун ҝәләҹәји ҝүнә ким таб ҝәтирә биләр? Зүһур едәндә ким давам ҝәтирә биләр? Чүнки о, әридиҹинин оду, јујуҹунун сабуну кими олаҹаг. О, ҝүмүш әридиб тәмизләјән адам кими рәфтар едәҹәк: Левилиләри сафлашдырыб гызыл вә ҝүмүшү тәмизләјән кими тәмизләјәҹәк. Беләҹә салеһликлә Рәббә гурбанлар ҝәтирәҹәкләр”» (Мал. 3:1—3).

¹⁷ Мүасир дөврдә бу пејғәмбәрлик, еһтимал ки, 1918-ҹи илдә, Јеһова «әһд елчиси» Иса Мәсиһлә бирликдә руһани мәбәди јохлајанда јеринә јетмәјә башлады. Малаки бу тәмизләнмәнин сона чатдығы вахт нә баш вердији һагда белә дејир: «О заман сиз салеһлә пис адам, Аллаһа гуллуг едәнлә етмәјән арасындакы фәрги јенә ҝөрәҹәксиниз» (Мал. 3:18). Јенидән ҝүҹ әлдә етмиш һәгиги мәсиһчиләрин фәалијјәтиндәки артым һәмин дөврүн бичин вахтынын әввәли олдуғуну ҝөстәрир.

18. Даниел бизим ҝүнләримиздә нәјин баш верәҹәјини пејғәмбәрлик етмишди?

¹⁸ Даниел пејғәмбәр бизим ҝүнләримиз һагда данышараг пејғәмбәрлик етмишди: «Ағыллы адамлар ҝөј гүббәсинин парылтысы кими, чохуну салеһлијә дөндәрәнләр улдузлар кими әбәди вә даим парлајаҹаг» (Дан. 12:3). Бу ҹүр парлајанлар кимләрдир? Ахы бу, дәлиҹә вә буғда мәсәлиндә Исанын һаггында данышдығы һәгиги буғда олан мәсһ олунмуш мәсиһчиләрдән башга ким ола биләр?! Сајы даим артан вә сәмими инсанлардан ибарәт олан бөјүк издиһамын үзвләри дәлиҹәјә бәнзәр сахта мәсиһчиләрин ‘топланмасыны’ ачыг-ајдын баша дүшүрләр. Онлар руһани Исраилин галыгларына гошуланда Падшаһлығын ҝәләҹәк тәбәәләри дә бу гаранлыг дүнјада нур сачмаға башлајырлар (Зәк. 8:23; Мат. 5:14—16; Филип. 2:15).

19, 20. Падшаһлығын оғуллары нәји сәбирсизликлә ҝөзләјирләр вә нөвбәти мәгаләдә нә мүзакирә олунаҹаг?

¹⁹ Бу ҝүн ‘Сәлтәнәтин оғуллары’ сәбирсизликлә өз иззәтли, сәмави мүкафатларыны ҝөзләјирләр (Ром. 8:18, 19; 1 Кор. 15:53; Филип. 1:21—24). Амма нә гәдәр ки, һәмин вахт ҝәлмәјиб, онлар садиг галмалы, ‘шејтанын оғулларындан’ фәргләнәрәк парламаға давам етмәлидирләр (Мат. 13:38; Вәһј 2:10). Бизим ҝүнләримиздә дәлиҹәләрин мәҹази мәнада ‘топланмасынын’ нәтиҹәләрини ҝөрмәк бизи неҹә дә севиндирир!

²⁰ Бәс Падшаһлығын оғуллары илә Падшаһлығын тәбәәләри кими јер үзүндә әбәди јашамаға үмид едән вә сајы даим артан бөјүк издиһам арасында һансы әлагә вар? Нөвбәти мәгаләдә бу суала ҹаваб вериләҹәк.

[Һашијәләр]

Јадыныздадырмы?

Исанын дәлиҹә вә буғда мәсәлиндә

• јахшы тохум

• тохуму сәпән адам

• тохумун сәпилмәси

• дүшмән

• дәлиҹә

• бичин вахты

• анбар

• ағламаг вә дишләрини гыҹамаг

• одлу соба

кими вә ја нәји тәмсил едир?

[20-ҹи сәһифәдәки шәкилләр]

Јахшы тохум ерамызын 33-ҹү илинин Пентикост ҝүнү сәпилмәјә башланды

[23-ҹү сәһифәдәки шәкил]

Символик буғда инди Јеһованын анбарына јығылыр

[Иҹазә илә]

Pictorial Archive (Near Eastern History) Est.