Гардашлар, руһ үчүн әкин вә хејирли ишә ҹан атын!
«Руһ үчүн әкән... Руһдан әбәди һәјат бичәҹәкдир» (ГАЛАТ. 6:8).
1, 2. Матта 9:37, 38 ајәләри неҹә јеринә јетир вә бунун нәтиҹәсиндә јығынҹагда һансы тәләбат јараныр?
БИЗ тарихи һадисәләрин шаһидијик. Иса Мәсиһин һаггында бәһс етдији ишин ән гызғын чағыдыр. О демишди: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин» (Мат. 9:37, 38). Јеһова бу ҹүр дуалара ағлаҝәлмәз тәрздә ҹаваб верир. 2009-ҹу хидмәт или әрзиндә бүтүн дүнјада Јеһованын Шаһидләринин 2 031 јени јығынҹағы тәшкил олунмуш вә инди онларын сајы 105 298-дир. Орта һесабла һәр ҝүн 757 адам вәфтиз олунуб.
2 Белә артым нәтиҹәсиндә јығынҹаглара тәлим верән вә онун гајғысына галан мәсул гардашлара зәрурәт јараныр (Ефес. 4:11). Артыг онилликләрдир ки, Јеһова Өз халгынын гајғысына галан мүнасиб гардашлар јетирир вә бундан сонра да јетирәҹәјинә әминик. Микеја 5:5 ајәсиндә јазылан пејғәмбәрлик бизи әмин едир ки, Јеһованын халгынын ‘чохлу рәһбәрләри’, јәни она башчылыг едән баҹарыглы гардашлар олаҹаг.
3. ‘Руһ үчүн әкмәк’ нә демәкдир?
3 Әҝәр сән вәфтиз олунмуш гардашсанса, хидмәтдә әлавә мәсулијјәтләр алмаға ҹан атмаг истәјини инкишаф етдирмәјә сәнә нә көмәк едә биләр? Ваҹиб амилләрдән бири ‘Руһ үчүн әкмәкдир’ (Галат. 6:8). Јәни сән елә јашамалысан ки, Аллаһын мүгәддәс руһу һеч бир манеә илә үзләшмәдән сәнин һәјатына тәсир ҝөстәрсин. ‘Ҹисмани тәбиәт үчүн әкмәмәјә’ гәти гәрарлы ол. Раһат һәјатын, истираһәт вә әјләнҹә кими шејләрин Аллаһа сәјлә хидмәт етмәк арзуну зәифләтмәсинә јол вермә. Бүтүн мәсиһчиләр ‘Руһ үчүн әкмәлидирләр’ вә буну едән гардашлар мүәјјән мүддәт сонра јығынҹагда үзәрләринә мәсулијјәт ҝөтүрмәк үчүн јарарлы һесаб олунаҹаглар. Һал-һазырда хидмәти көмәкчиләрә вә ағсаггаллара тәләбат бөјүк олдуғундан бу мәгалә, әсас етибарилә, гардашлара үнванланыб. Буна ҝөрә дә, гардашлар, биз сизи дуа едәрәк бу мәгаләнин үзәриндә ҹидди дүшүнмәјә тәшвиг едирик.
Хејирли ишә ҹан атын
4, 5. а) Вәфтиз олунмуш гардашлар јығынҹагда һансы мәсулијјәтләрә ҹан атмаға тәшвиг олунурлар? б) Гардаш хејирли ишә неҹә ҹан ата биләр?
4 Мәсиһчи кишиләр автоматик олараг нәзарәтчи олмурлар. Онлар бу ‘хејирли ишә’ һәвәс ҝөстәрмәли, јәни ҹан атмалыдырлар (1 Тим. 3:1). Бу, сәмими-гәлбдән һәмиманлыларын тәләбатларынын гајғысына галараг онлара хидмәт етмәји өзүнә дахил едир. (Јешаја 32:1, 2 ајәләрини оху.) Јахшы нијјәтлә бу хејирли ишә ҹан атан гардашы шөһрәтпәрәст адландырмаг олмаз. Әксинә, о, худбин мәгсәд ҝүдмәдән башгаларына хејир ҝәтирмәк истәјир.
5 Мүгәддәс Јазыларда садаланан тәләбләрә мүвафиг олмаға чалышмагла гардаш хидмәти көмәкчи вә нәзарәтчи олмаға ҹан ата биләр (1 Тим. 3:1—10, 12, 13; Тит. 1:5—9). Өзләрини Аллаһа һәср едән гардашлар нөвбәти суалларын үзәриндә дүшүнмәлидирләр: «Тәблиғдә фәал иштирак едирәмми вә башгаларына Аллаһа сәјлә хидмәт етмәјә көмәк едирәмми? Баҹы-гардашлара сәмими мараг ҝөстәрәрәк онлары мөһкәмләндирирәмми? Аллаһын Кәламыны диггәтлә арашдыран инсан кими таныныраммы? Шәрһләрими јахшылашдырмаға чалышыраммы? Ағсаггалларын мәнә вердији тапшырыглары чалышганлыгла јеринә јетирирәмми?» (2 Тим. 4:5). Бу кими суалларын үзәриндә ҹидди дүшүнмәјә дәјәр.
6. Јығынҹагда әлавә мәсулијјәтләр алмағын ваҹиб амилләриндән бири һансыдыр?
6 Јығынҹагда мәсулијјәт алмағын диҝәр үсулу инсанын ‘дахили варлығынын [Аллаһын] Руһу илә мөһкәмләнмәсидир’ (Ефес. 3:16). Мәсиһчи јығынҹағында хидмәти көмәкчи вә ја ағсаггаллар сечкиләр јолу илә тәјин олунмур. Бу шәрәфә јалныз руһани инкишаф сајәсиндә наил олмаг олар. Бәс руһани ҹәһәтдән инкишаф етмәк неҹә мүмкүндүр? Тәләбләрдән бири даима ‘Руһа ҝөрә һәрәкәт етмәк’ вә онун сәмәрәсини өзүмүздә јетишдирмәкдир (Галат. 5:16, 22, 23). Әлавә мәсулијјәтләр алмаг үчүн лазыми руһани кејфијјәтләр тәзаһүр етдирдикҹә вә сәнә верилән мәсләһәтләри јеринә јетирдикҹә ‘тәрәггин һамыја ашкар олаҹаг’ (1 Тим. 4:15).
Фәдакарлығын ваҹиблији
7. Башгаларына хидмәт етмәк өзүнә нәји дахил едир?
7 Башгаларына хидмәт етмәк үчүн сәј вә фәдакарлыг руһу тәләб олунур. Мәсиһчи нәзарәтчиләр руһани чобанлар олдуглары үчүн сүрүнүн проблемләри онлары чох нараһат едир. Һәвари Павелин Коринфдәки һәмиманлыларына дедији сөзләрдән онун бу мәсулијјәтли ишә неҹә јанашдығыны ҝөрмәк олар: «Сизи кәдәрләндирмәк үчүн дејил, сизә олан бол мәһәббәтими дәрк етмәниз үчүн мән сизә бөјүк кәдәр вә үрәк изтирабы үзүндән чохлу ҝөз јашы төкәрәк јаздым» (2 Кор. 2:4). Бәли, Павел бу ишә ҹан јандырырды.
8, 9. Мүгәддәс Китабын ҝөстәрдији кими, бәзи кишиләр башгаларынын тәләбатларынын гајғысына неҹә галырдылар?
8 Фәдакарлыг руһу һәр заман Јеһованын хидмәтчиләринин гајғысына галан кишиләрин сәҹијјәви хүсусијјәти олмушдур. Мәсәлән, Нуһун өз аиләсинә: «Ҝәми һазыр оланда хәбәр верин ки, мән дә сизинлә ҝәмијә миним»,— дедијини тәсәввүр етмәк гејри-мүмкүндүр. Муса Мисирдә исраиллиләрә: «Мән сизи Гырмызы дәнизин саһилләриндә ҝөзләјәҹәјәм. Ора ҝәлмәк үчүн әлиниздән ҝәләни един»,— демәмишди. Јешуанын: «Јерихонун диварлары дағыланда мәнә хәбәр верәрсиниз»,— демәсинә һеч һарада раст ҝәлмирик. Јешаја исә башгасыны ҝөстәрәрәк: «Ону ҝөндәр»,— демәмишди (Јешаја 6:8).
9 Иса Мәсиһ Аллаһын руһунун ону тәшвиг етмәсинә јол вермәкдә ән бөјүк нүмунәдир. О, ҹаныны гурбан верәрәк бәшәријјәти сатын алмаг тапшырығыны ҹанла-башла гәбул етди (Јәһ. 3:16). Мәҝәр Исанын фәдакар мәһәббәти бизи дә фәдакар олмаға тәшвиг етмәли дејилми? Узун мүддәт ағсаггал кими хидмәт едән бир гардаш сүрүјә бәсләдији һиссләрини белә тәсвир едир: «Исанын Петерә дедији “гојунларымы отар” сөзләри мәнә дәрин тәәссүрат бағышлајыр. Хидмәт етдијим узун илләр әрзиндә баша дүшдүм ки, бир нечә хош сөз вә ја ади хејирхаһлыг инсана гол-ганад верә биләр. Сүрүнүн гајғысына галмаг мәнә бөјүк зөвг верир» (Јәһ. 21:16).
10. Мәсиһчи гардашлары башгаларына хидмәт етмәкдә Исанын нүмунәсини изләмәјә нә тәшвиг едә биләр?
10 Әлбәттә ки, јығынҹагдакы һәср олунмуш гардашлар Аллаһын сүрүсүнә гаршы «Мән сизә раһатлыг верәрәм» сөзләрини дејән Исанын әһвал-руһијјәсини әкс етдирмәк истәјирләр (Мат. 11:28). Аллаһа иман вә јығынҹаға мәһәббәт гардашлары бу хејирли ишин һәддиндән артыг бөјүк гурбанлар тәләб етдијини вә чох ағыр олдуғуну дүшүнмәдән она ҹан атмаға тәшвиг едир. Әҝәр гардаш бу ишә ҹан атмаға һәвәсли дејилсә, онда неҹә? Гардаш јығынҹаға хидмәт етмәк истәји инкишаф етдирә биләрми?
Хидмәт етмәк истәји инкишаф етдирин
11. Гардаш башгаларына хидмәт етмәк арзусуну неҹә инкишаф етдирә биләр?
11 Әҝәр хејирли иш үчүн јарарлы олмадығыны дүшүндүјүнә ҝөрә она ҹан атмырсанса, јахшы оларды ки, Аллаһдан мүгәддәс руһ диләјәсән (Лука 11:13). Јеһованын руһу бунунла әлагәдар истәнилән нараһатчылығын өһдәсиндән ҝәлмәкдә сәнә көмәк едәҹәк. Хидмәт етмәк арзусу Аллаһдандыр, буна ҝөрә дә гардашы хејирли ишә ҹан атмаға тәшвиг едән вә мүгәддәс хидмәти иҹра едә билмәси үчүн она лазыми гүввәни верән мәһз Јеһованын руһудур (Филип. 2:13; 4:13, И—93). Буна ҝөрә дә, хидмәтдә үзәринә әлавә мәсулијјәтләр ҝөтүрмәк арзусу инкишаф етдирмәк үчүн Јеһовадан көмәк диләмәк мүнасибдир. (Мәзмур 25:4, 5 ајәләрини оху.)
12. Гардаш она һәвалә олунан мәсулијјәтләрин өһдәсиндән ҝәлмәк үчүн лазыми һикмәтә неҹә јијәләнә биләр?
12 Сүрүнүн гајғысына галмаг бөјүк гүввә вә сәј тәләб едән иш кими ҝөрүндүјүндән гардаш јығынҹагда әлавә мәсулијјәтләрә ҹан атмамаг гәрарына ҝәлә биләр. Јахуд да о, бу мәсулијјәтин өһдәсиндән ҝәлмәк үчүн кифајәт гәдәр мүдрик олмадығыны дүшүнә биләр. Белә һалда о, Аллаһын Кәламыны вә она әсасланан нәшрләри диггәтлә арашдырмагла һикмәт газана биләр. Гардаш өзүндән соруша биләр: «Аллаһын Кәламыны арашдырмаг үчүн вахт ајырыраммы вә дуада Аллаһдан мүдриклик диләјирәмми?» Шаҝирд Јагуб јазмышдыр: «Әҝәр сизләрдән биринин һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан диләсин, она вериләҹәкдир» (Јаг. 1:5). Сән Аллаһдан илһам алмыш бу сөзләрә инанырсан? Сүлејманын дуасына ҹаваб олараг Аллаһ она «һикмәтли вә дәрракәли үрәк» верди ки, һөкм верәркән јахшыны писдән ајырмағы баҹарсын (1 Пад. 3:7—14). Дүздүр, бу, мүстәсна һал иди. Бунунла белә, биз әмин ола биләрик ки, Јеһова јығынҹагда мәсулијјәтләр һәвалә олунан гардашлара Онун сүрүсүнүн гајғысына лазыми гајдада гала билмәләри үчүн һикмәт верәҹәк (Сүл. мәс. 2:6).
13, 14. а) «Мәсиһин мәһәббәти»нин Павелә неҹә тәсир етдијини изаһ един. б) «Мәсиһин мәһәббәти» бизә неҹә тәсир етмәлидир?
13 Башгаларына хидмәт етмәк истәјини Јеһованын вә Онун Оғлунун бизим үчүн нәләр етдикләри барәдә дәриндән дүшүнмәклә дә инкишаф етдирә биләрик. Мисал үчүн, 2 Коринфлиләрә 5:14, 15 ајәләринә нәзәр салаг. (Оху.) Мәсиһин мәһәббәти бизи неҹә «мәҹбур едир», башга сөзлә, неҹә тәшвиг едир? Аллаһын ирадәсинә мүвафиг давранараг Иса өзүнү бизим уғрумузда гурбан вермәклә бөјүк мәһәббәт ҝөстәриб, буна ҝөрә миннәтдарлығымыз вә анлајышымыз артдыгҹа үрәкләримиз риггәтә ҝәлир. Павел Мәсиһин мәһәббәтинин она тәсир етмәсинә јол верирди. Бу мәһәббәт ону худбин һәрәкәтләрдән чәкиндирир вә һәјатда әсас мәгсәдә — Аллаһа, һәмиманлыларына вә диҝәр инсанлара хидмәт етмәјә ҹан атмаға көмәк едирди.
14 Мәсиһин бәшәријјәтә ҝөстәрдији мәһәббәт үзәриндә дүшүнмәјин сајәсиндә үрәјимиздә миннәтдарлыг јараныр. Бу сәбәбдән анлајырыг ки, худбин мәгсәдләр ҝүдәрәк вә әсас етибарилә өз арзуларымызы тәмин едәрәк ‘ҹисмани тәбиәт үчүн әкмәјә’ давам етмәк һеч дә дүзҝүн олмазды. Әксинә, лазыми дәјишикликләр едирик ки, Аллаһын иши һәјатымызда биринҹи јери тутсун. Бизи һәмиманлыларымыза ‘гуллуг етмәјә’ тәшвиг едән мәһәббәтдир. (Галатијалылара 5:13 ајәсини оху.) Әҝәр биз өзүмүзә Јеһованын һәср олунмуш хидмәтчиләринә тәвазөкарлыгла хидмәт едән гул кими бахырыгса, онда онлара һөрмәт вә еһтирам ҝөстәрәҹәјик. Әлбәттә, биз Шејтанын јајдығы руһу тәглид едәрәк башгаларыны тәнгид вә мүһакимә етмәјәҹәјик (Вәһј 12:10).
Аиләликҹә сәј ҝөстәрмәјин ваҹиблији
15, 16. Хидмәти көмәкчи вә ја ағсаггал олмаға ҹан атан гардашын аилә үзвләри она бу мәгсәдә чатмагда неҹә көмәк едә биләрләр?
15 Әҝәр гардаш аиләлидирсә, онун хидмәти көмәкчи вә ја ағсаггал олмаға мүнасиб олуб-олмадығы мүзакирә олунаркән аиләсиндәки вәзијјәт нәзәрә алыныр. Һәгигәтән дә, аиләсинин руһанилији вә газандығы ад онун тәјинатына бирбаша тәсир едир. Бу, јығынҹагда хидмәти көмәкчи вә ја ағсаггал кими хидмәт етмәјә ҹан атан гардашы һәјат јолдашынын вә ушагларынын дәстәкләмәсинин нә гәдәр ваҹиб олдуғуну вурғулајыр. (1 Тимотејә 3:4, 5, 12 ајәләрини оху.)
16 Јеһова мәсиһчи аиләсиндә һамынын бир-бири илә әмәкдашлыг етдијини ҝөрәндә севинир (Ефес. 3:14, 15). Јығынҹагдакы мәсулијјәтләрини јеринә јетирмәк вә аиләсини «јахшы» идарә етмәк үчүн аилә башчысына таразлыг ҝәрәкдир. Буна ҝөрә ағсаггал вә ја хидмәти көмәкчи һәјат јолдашы вә ушаглары илә һәр һәфтә Мүгәддәс Китабы өјрәнмәлидир ки, аиләви ибадәтдән һамы фајдалансын. О, онларла мүнтәзәм хидмәт етмәлидир. Аилә башчысынын зәһмәтини јерә вурмамаг үчүн аиләнин һәр бир үзвүнүн онунла әмәкдашлыг етмәси зәруридир.
Хидмәтини бәрпа едә биләрсәнми?
17, 18. а) Әҝәр гардаш артыг ағсаггал вә ја хидмәти көмәкчи олмаг үчүн тәләбләрә ҹаваб вермирсә, нә тәләб олуна биләр? б) Вахтилә ағсаггал вә ја хидмәти көмәкчи олан гардаш нә етмәлидир?
17 Ола биләр, сән әввәлләр ағсаггал вә ја хидмәти көмәкчи идин. Сәнин Јеһованы севдијинә шүбһә јохдур, буна ҝөрә дә әмин ола биләрсән ки, О, инди дә сәнин гајғына галыр (1 Пет. 5:6, 7). Кимсә сәнә өзүндә дәјишикликләр етмәли олдуғуну дејибми? Сәһвини етираф ет вә ону Аллаһын көмәји илә дүзәлтмәјә чалыш. Еһтијатлы ол ки, үрәјиндә кин-күдурәт јаранмасын. Мүдрик ол вә мүсбәт әһвал-руһијјә тәзаһүр етдир. Узун мүддәт хидмәт едән, анҹаг сонра мәсулијјәтләрини итирән бир ағсаггал гардаш дејир: «Мән әввәлки кими ҝөрүшләрдә иштирак етмәјә, хидмәт етмәјә вә Мүгәддәс Китабы охумаға гәти гәрарлы идим — бу мәгсәдләр мәним үчүн әлчатан иди. Мән сәбирли олмағы өјрәндим, чүнки елә дүшүнүрдүм ки, бир-ики илә јенидән ағсаггал олаҹағам, лакин бу, тәхминән једди илдән сонра мүмкүн олду. Бу вахт әрзиндә руһдан дүшмәмәк вә мәгсәдә доғру ирәлиләмәк үчүн бөјүк көмәк алдым».
18 Әҝәр сәнин дә вәзијјәтин бу гардашын вәзијјәтинә охшајырса, руһдан дүшмә. Јеһованын сәнин хидмәтини вә аиләни неҹә хејир-дуаландырдығынын үзәриндә дүшүн. Аиләни руһән мөһкәмләндир, хәстәләрә баш чәк вә зәифләри руһландыр. Ән ваҹиби исә, Јеһованын Шаһиди кими Аллаһы иззәтләндирмәк вә Падшаһлыг һаггында хош хәбәри бәјан етмәк шәрәфини јүксәк гијмәтләндирa (Мәз. 145:1, 2; Јешаја 43:10—12).
Јени бахыш
19, 20. а) Бүтүн вәфтиз олунмуш гардашлар нәјә тәшвиг олунурлар? б) Нөвбәти мәгаләдә нә мүзакирә олунаҹаг?
19 Нәзарәтчиләрә вә хидмәти көмәкчиләрә бу ҝүн һәмишәкиндән даһа чох еһтијаҹ вар. Буна ҝөрә дә биз бүтүн вәфтиз олунмуш гардашлары вәзијјәтләрини јенидән нәзәрдән кечирмәјә вә нөвбәти суалы өзләринә вермәјә тәшвиг едирик: «Хидмәти көмәкчи вә ја ағсаггал кими хидмәт етмәмәјимин сәбәби нәдир?» Гој Аллаһын руһу сәнә бу ваҹиб мәсәләјә дүзҝүн бахмаға көмәк етсин.
20 Баҹы-гардашларын фәдакарлыг вә сәј ҝөстәрмәси јығынҹағын бүтүн үзвләринә фајда ҝәтирир. Мәнфәәт ҝүдмәдән хејирхаһ ишләр ҝөрәндә башгаларына хидмәт етдијимизә вә руһ үчүн әкдијимизә ҝөрә үрәјимиз севинҹлә долур. Нөвбәти мәгаләдән ҝөрәҹәјимиз кими, биз Аллаһын мүгәддәс руһуну кәдәрләндирмәмәлијик. Бундан неҹә гачмаг олар?
[Һашијә]
a «Ҝөзәтчи Гүлләси»нин 2009-ҹу ил 15 август сајынын 30—32-ҹи сәһифәләринә бахын.
Неҹә ҹаваб верәрдиниз?
• Микеја 5:5 ајәсиндәки пејғәмбәрлик бизи нәјә әмин едир?
• Фәдакарлыг руһу өзүнә нәји дахил едир? Изаһ един.
• Башгаларына хидмәт етмәк арзусуну неҹә инкишаф етдирмәк олар?
• Хидмәти көмәкчи вә ја ағсаггал олмаг истәјән гардашын аилә үзвләринин бир-бирилә әмәкдашлыг етмәси нә дәрәҹәдә ваҹибдир?
[25-ҹи сәһифәдәки шәкилләр]
Јығынҹагда мәсулијјәтләрә неҹә ҹан ата биләрсән?